மெட்ராஸ் கபே படத்தை திரையிட தியேட்டர் அதிபர்கள் மறுத்து விட்டனர். இதனால் திட்டமிட்டபடி தமிழகம் முழுவதும் இப்படம் இன்று ரிலீசாவதில் சிக்கல் ஏற்பட்டு உள்ளது. இந்தியில் தயாரான இப்படத்தை தமிழிலும் டப்பிங் செய்துள்ளனர்.

தமிழ் பதிப்புக்கு தணிக்கை குழுவினர் இன்னும் அனுமதி அளிக்கவில்லை. மெட்ராஸ் கபே படத்தில் விடுதலைப் புலிகளை தீவிரவாதிகளாக சித்தரித்து இருப்பதாக தமிழ் அமைப்பினர் எதிர்த்தனர். இதையடுத்து இரு தினங்களுக்கு முன் பிரத்யேகமாக படத்தை அவர்களுக்கு திரையிட்டு காட்டினர். படம் பார்த்த சீமான், ஆர்.கே.செல்வமணி உள்ளிட்டோர் முழுக்க தமிழர்களுக்கு எதிரான படம் இது என கொந்தளித்தனர்.

விடுதலைப்புலிகள், ஈழத்தமிழர்களை மட்டுமே படத்தில் கொச்சைப்படுத்தி உள்ளனர் என்றும், சிங்களர்கள் பற்றியோ, இலங்கை ராணுவத்தினர் தமிழர்களை கொன்று குவித்தது பற்றியோ எந்தவொரு காட்சியும் இடம் பெறவில்லை என்றும் அவர்கள் கூறினர். இந்தியா முழுவதும் இப்படத்தை தடை செய்ய வேண்டும் என்று வைகோ வற்புறுத்தினார். மீறி திரையிட்டால் தியேட்டர்களில் முற்றுகை போராட்டம் நடத்தப்படும் என்றும் எச்சரித்தார்.

இந்த நிலையில் மதுரை உயர் நீதிமன்றத்தில் மெட்ராஸ் கபே படத்துக்கு தடை விதிக்க கோரி வக்கீல் பி.ஸ்டாலின் வழக்கு தொடர்ந்தார். நீதிபதிகள் ராஜேசுவரன், மதிவாணன் ஆகியோர் விசாரித்தனர். படத்தின் தயாரிப்பாளர் தரப்பில் ஆஜரான வக்கீல் டி.ஆர்.ராஜா கோபால் இலங்கையில் நடந்த உண்மையான சம்பவத்துக்கும், படத்தில் கூறப்பட்டுள்ள கதைக்கும் எந்த சம்பந்தமும் கிடையாது என்றார்.

நீதிபதிகள் படத்தை வெளியிட தடை எதுவும் விதிக்கவில்லை. இந்த வழக்கு சம்பந்தமாக தமிழக போலீஸ் டி.ஜி.பி. மத்திய திரைப்பட தணிக்கை குழு ஆகியோர் பதில் மனு தாக்கல் செய்ய உத்தரவிட்டனர்.
விசாரணையை அடுத்த மாதம் 3ம் திகதிக்கு தள்ளி வைத்தனர்.

இந்த நிலையில் தமிழ்நாடு திரையரங்க உரிமையாளர் சங்கத்தினர் நேற்று மாலை சென்னையில் அவசர கூட்டம் நடத்தினார்கள். சங்கத்தின் பொதுச் செயலாளர் பன்னீர் செல்வம் தலைமை தாங்கினார். மெட்ராஸ் கபே படத்தை திரையிடுவதா, வேண்டாமா என்பது குறித்து நீண்ட நேரம் விவாதிக்கப்பட்டது.

கூட்டத்தில் என்ன முடிவுகள் எடுக்கப்பட்டது என்று பன்னீர் செல்வத்திடம் தொடர்பு கொண்டு கேட்ட போது ‘‘மெட்ராஸ் கபே படத்தை திரையிடுவதா வேண்டாமா அந்தந்த திரையரங்க உரிமையாளர்களே முடிவு செய்து கொள்ளலாம்’’ என அறிவுறுத்தப்பட்டு உள்ளது என்றார்.

திரையரங்க அதிபர் ஒருவர் கூறும் போது ‘‘மெட்ராஸ் கபே படத்தை திரையிடக்கூடாது என தமிழ் அமைப்புகள் எதிர்த்து உள்ளன. முற்றுகை போராட்டம் நடத்தப் போவதாகவும் கூறியுள்ளனர். தியேட்டர்களுக்கு இது போன்ற பாதுகாப்பு அச்சுறுத்தல்கள் இருப்பதால் மெட்ராஸ் கபே படத்தை திரையிட மாட்டோம்’’ என்று கூறினார். தியேட்டர் முகப்புகளில் வைக்கப்பட்டு இருந்த மெட்ராஸ் கபே பட பேனர்களும் அகற்றப்பட்டு விட்டன.

வேலூர் சிறை அதிகாரிகள் நன்னடத்தை சான்று வழங்காததால் நடிகர் சீனிவாசன் டெல்லி திகார் சிறையில் இருந்து, ஜாமினில் வருவதில் சிக்கல் ஏற்பட்டுள்ளது.

ஆந்திர மாநிலம் ஓங்கோலைச் சேர்ந்த தொழில் ஓட்டல் அதிபர் ரங்கநாதனிடம் 50 லட்சம் ரூபாய் பெற்றுக்கொண்ட நடிகர் சீனிவாசன் வாங்கிய கடனை கொடுக்காமல் ஏமாற்றியதால் கடந்த ஏப்ரல் 26ம் திகதி வேலூர் சிறையில் அடைத்தனர்.

இதனையடுத்து ஆயிரம் கோடி ரூபாய் கடன் வாங்கி தருவதாக, டெல்லியை சேர்ந்த தொழில் அதிபரிடம் ஐந்து கோடி ரூபாய் மோசடி செய்த நடிகர் சீனிவாசனை, டெல்லி போலீசார் கடந்த ஜூன், 4ம் திகதி அழைத்துச் சென்றனர். பின்னர் அங்கு கைது செய்யப்பட்டு திகார் ஜெயிலில் அடைத்தனர்

சென்னை மத்திய குற்றப்பிரிவு போலீசில் பதிவு செய்யப்பட்ட ஆறு வழக்குகளில் இருந்து ஜாமினில் விடுவிக்க, பிணயத் தொகை செலுத்தி உள்ளனர். இந்த ஆவணங்கள், டெல்லி போலீசாருக்கு அனுப்பி வைக்கப்பட்டது.

டெல்லி வழக்கிலும், ஜாமின் பெற முயற்சி நடக்கிறது. வேலூர் சிறையில் இருந்த போது, அவருக்கு நன்னடத்தை சான்றிதழ் வழங்கினால் தான் திகார் சிறையில் ஜாமின் கிடைக்கும்.

இதனால் வேலூர் சிறையில் நன்னடத்தை சான்றிதழ் வாங்க முயற்சி நடந்தது. சிறை அதிகாரிகள் மறுத்து விட்டனர். இதனால், திகார் சிறையில் இருந்து பவர்ஸ்டார் சீனிவாசன் வெளியே வருவதில் சிக்கல் ஏற்பட்டுள்ளது.

பவருக்கு ஜாமீன் கிடைக்கும அல்லது திகார் சிறை வாழ்க்கை 100 நாட்களை தாண்டிவிடுமா என்பது வேலூர் அதிகாரிகளின் கைகளில்தான் உள்ளது என்கின்றனர் அவரது ரசிகர்கள்.

கேடி பில்லா கில்லாடி ரங்கா, எதிர் நீச்சல் ஆகிய வெற்றி படத்திற்குப்பின் சிவகார்த்திகேயன் நடித்துள்ள படம் வருத்தப்படாத வாலிபர் சங்கம். இப்படத்தில் சத்யராஜ், ஸ்ரீதிவ்யா, பரோட்டா சூரி போன்றோரும் நடித்துள்ளனர்.

இப்படத்தை பொன்ராம் இயக்கியுள்ளார். இசை இமான். எஸ்கேப் ஆர்ட்டிஸ்ட் மதன் தயாரித்திருக்கிறார். இப்படத்தில் சிவகார்த்திக்கேயன் சொந்த குரலில் ஒரு பாடலை பாடியுள்ளார்.

படப்பிடிப்பு முடிந்த நிலையில் அடுத்த மாதம் 6ம் திகதி படத்தை வெளியிட படக்குழுவினர் திட்டமிட்டுள்ளனர். இதனிடையே படத்தை பார்த்த தணிக்கை குழு படத்திற்கு யு சான்றிதழ் வழங்கியுள்ளது. இதனால் படக்குழுவினர் சந்தோசத்தில் உள்ளனர்

யுடிவி மோஷன் பிக்சர்ஸ், தி வால்ட் டிஸ்னி ஸ்டுடியோஸ் இணைந்து தயாரிக்கும் புதிய படத்திற்கு புறம்போக்கு என பெயரிட்டிருக்கின்றனர். இயற்கை, பேராண்மை படங்களை இயக்கிய எஸ்.பி.ஜனநாதன் இந்த படத்தை இயக்குகிறார்.

ஆர்யா, விஜய் சேதுபதி முதன் முறையாக இணைந்து கதாநாயகர்களாக நடிக்கிறார்கள். இவர்களைத் தவிர மூன்றாவதாக இன்னொரு நாயகனும் நடிக்கப் போகிறார். கதாநாயகியர் மற்றும் தொழில்நுட்ப கலைஞர்கள் தேர்வு நடைபெற்று வருகிறது.

புறம்போக்கு என தலைப்பா என ஆச்சர்யத்துடன் கேட்பவர்களுக்கு, அதற்கான காரணத்தை சொல்கிறார் இயக்குனர் ஜனநாதன்.
புறம்போக்கு என்ற வார்த்தையை எல்லோரும் கொச்சையாகப் பேசுகிறார்கள். இந்த சொல் பற்றி மேலோட்டமான புரிதல் உள்ளது.

ஆனால் புறம்போக்கு என்கிற சொல் ஆழமான வரலாற்று ரீதியான பொருள் கொண்டது. வாழ்வியலின் அடிப்படையிலான கருத்தை உள்ளடக்கியதாகும். மக்கள் தேவைக்காக இருந்த பொது இடமான புறம்போக்கு நிலங்கள் இன்று மெல்ல மெல்ல தனியாரின் ஆக்கிரமிப்புக்கு ஆளாகி வருகிறது.

அதைப் பற்றிய பின்னணியை கொண்ட சிந்தனைதான் இப்படம். புறம்போக்கு என்று இனியாரும் ஏளனமாக கேலியாகப் பேசவேண்டாம்.
மலை, பனிச்சிகரங்கள், ஆறு, சர்வதேச கடல்பரப்பு, காற்று, ஒளி, நிலவொளி மட்டுமல்ல எல்லையற்ற அண்டவெளியும்கூட புறம்போக்குதான். எதுவும் தனியுடைமையல்ல. எல்லாமே பொதுவுடைமைதான் என்று கூறுகிறார்.

இப்படத்தில் உலகப் படங்களில் பணிபுரிந்த ஸ்டண்ட் மாஸ்டர்கள், தொழில்நுட்பக் கலைஞர்கள் பணியாற்றவுள்ளனர். ஏகாம்பரம் என்பவர் ஒளிப்பதிவு செய்கிறார். படப்பிடிப்பை இமாச்சலப் பிரதேசம், ராஜஸ்தான், ஆந்திரப்பிரதேசம், சென்னை ஆகிய இடங்களில் நடத்த திட்டமிட்டுள்ளனர். வரும் அக்டோபரில் படப்பிடிப்பு ஆரம்பமாகிறது. 2014 ஏப்ரலில் வெளியிட திட்டமிடப்பட்டுள்ளது.

தமிழ் சினிமாவில் முன்னணி நடிகராக இருப்பவர் அஜீத். இவர் தற்போது விஷ்ணுவர்த்தன் இயக்கத்தில் ஆரம்பம், சிவா இயக்கத்தில் வீரம் ஆகிய படத்தில் நடித்து வருகிறார்.

இவர் நடிப்பில் மட்டுமல்லாமல் பைக் ரேசிலும் பிரியமுடையவர். இதனால் அவர் படத்தில் பைக் ஒட்டும் காட்சிகளில் டூப் இல்லாமல் நடிப்பார்.

இந்த நிலையில் சமீபத்தில் அவர் அளித்த பேட்டியில் ”நான் இனிமேல் நடிக்கும் படத்தில் பைக் காட்சிகள் வரும்பொழுது ஹெல்மேட் போடாமல் நடிக்க மாட்டேன். அப்படி நடித்தால் எனது ரசிகர்களும் அதே பின்பற்றுவார்கள் என்ற அச்சத்தில் இந்த முடிவை எடுத்துள்ளேன்” என்றார்.

ஏ.ஆர்.முருகதாஸ் இயக்கத்தில் விஜய் நடித்து வெளிவந்த துப்பாக்கி படம் மிகப்பெரிய வெற்றி பெற்றது. இந்த மாபெரும் வெற்றியைத் தொடர்ந்து மீண்டும் இக்கூட்டணி ஒரு புதிய படத்தில் இணையவிருக்கிறது. இது ஏற்கெனவே உறுதி செய்யப்பட்டு விட்டது.

இந்நிலையில் விஜய்-ஏ.ஆர்.முருகதாஸ் இணையவிருக்கும் புதிய படத்திற்கு அதிரடி என பெயரிட்டு இருப்பதாக சினிமா வட்டாரங்கள் தெரிவிக்கின்றன. ஆனால் இன்னும் இது உறுதி செய்யப்படவில்லை.

விஜய் நடித்த தலைவா படம் பல்வேறு தடைகளை தாண்டி தற்போது தமிழகத்தில் வெளியாகி வெற்றிகரமாக ஓடிக்கொண்டிருக்கிறது. விஜய் தற்போது அறிமுக இயக்குனர் நேசன் இயக்கும் ஜில்லா என்ற படத்தில் நடித்து வருகிறார். இப்படத்திற்கு பிறகு ஏ.ஆர்.முருகதாஸுடன் இணைவார் என எதிர்பார்க்கப்படுகிறது.

சூர்யாவை இயக்கும் இயக்குநர் அடுத்த படத்தை கார்த்தியை வைத்து இயக்குவார். அதேபோல, கார்த்தியை இயக்கும் இயக்குநர், அடுத்த படத்தில் சூர்யாவை இயக்குவார். இந்த கொடுக்கல் வாங்கல் பல காலமாக நடந்து வருகிறது. இதை ஸ்டுடியோ க்ரீன் நிறுவனம் கண்ணும் கருத்துமாகச் செய்து வருகிறது.

அப்படித்தான் சிங்கம்-2 படத்தை இயக்கிக் கொண்டிருக்கும்போதே அடுத்து கார்த்திக் படத்தை இயக்குவதாக ஒப்புக் கொண்டார். ஸ்டுடியோ க்ரீன் தயாரிப்பதாக இருந்தது.

சிங்கம்-2 வெளியாகி வெற்றிகரமாக ஓடிக் கொண்டிருக்கிறது. இந்தப் படத்தைப் பார்த்த ஜூனியர் என்.டி.ஆர் தன்னை வைத்து ஒரு படம் இயக்க வேண்டும் என ஹரியிடம் கேட்க அவரும் ஓ.கே. சொல்லிவிட்டார்.

சம்பளம் 5 கோடி என்றதும் கார்த்தியின் படத்தை டிராப் செய்துவிட்டு ஜூனியர் என்.டி.ஆரை வைத்து தெலுங்கில் ஆக்‌ஷன் கதயொன்றை இயக்கப் போகிறார் ஹரி.

மிருகம், உயிர், சிந்து சமவெளி போன்ற படங்களை இயக்கி பரபரப்பை ஏற்படுத்தியவர் இயக்குநர் சாமி. தற்போது எந்தவித சர்ச்சையும் இல்லாமல் கங்காரு படத்தை இயக்கி வருகிறார்.

80 சதவீத படப்பிடிப்பு முடிவடைந்துள்ளது. முழுக்க முழுக்க கொடைக்கானல் மலையில் இதன் படப்பிடிப்பு நடைபெற்றது. அமைதிப்படை இரண்டாம் பாகத்தைத் தயாரித்த வி ஹவுஸ் புரொடக்ஷன்ஸ் சார்பாக சுரேஷ் காமாட்சி தயாரிக்கிறார்.

நாயகனாக புதுமுகம் அர்ஜுனா, நாயகியா வர்ஷா அஸ்வதி நடித்து வருகின்றனர். இவர்களுடன் பிரியங்கா, தம்பி ராமையா, கலாபவன் மணி, ஆர்.சுந்தரராஜன் உட்பட பலர் நடிக்கின்றனர்.

பின்னணிப் பாடகர் ஸ்ரீநிவாஸ் முதல் முறையாக இந்தப் படத்திற்கு இசையமைத்துள்ளார். அனைத்துப் பாடல்களையும் கவிப்பேரரசு வைரமுத்து எழுதியுள்ளார்.

இந்தப் படத்துக்காக கொடைக்கானல் மலை உச்சியில் ஒரு கிராமத்தையே செட் போட்டு அசத்தியுள்ளனர். சாய்குமார் கதை எழுத, திரைக்கதை அமைத்து, வசனம் எழுதி, இயக்குகிறார் சாமி. ராஜரத்தினம் ஒளிப்பதிவு செய்கிறார்

தங்கையை அண்ணனும், அண்ணனை தங்கையும் கங்காரு போல் கண்ணும் கருத்துமாக காப்பற்றுவது தான் படத்தின் கதை. போதாக்குறைக்கு காதலியும் காதலனை கங்காரு போல காப்பாற்றுகிறாராம்.

அன்பை மையமாக வைத்து பின்னப்பட்ட கதை இது. எந்தவித செக்ஸ் சம்பந்தப்பட்ட காட்சிகளும் இல்லாமல் குடும்பத்தோடு உட்கார்ந்து ரசிக்கும் படமாக இருக்கும் என்கிறார் தயாரிப்பாளர்.

படத்தின் இசை வெளியீட்டு விழாவை வைரமுத்துவுக்கான பாராட்டு விழாவாக நடத்தப் போகிறார்களாம். அக்டோபர் 14ம் திகதி சென்னை டிரேட் சென்டரில் விழா நடைபெற உள்ளது.