பரத்தின் திருமண வரவேற்பு விழா கோலாகலமாக நடைபெற்றது.
பரதத்துக்கும் துபாயில் வசித்து வரும் மருத்துவர் ஜெஸ்லிக்கும் காதல் மலர்ந்தது. இதனைத் தொடர்ந்து இரு வீட்டாரின் சம்மதத்துடன் இவர்களின் திருமணம் நிச்சயிக்கப்பட்டது.
இது காதல் மணம் மட்டுமல்லாமல் கலப்பு மணமும் என்பதால் பதிவுத் திருமணம் நடத்த முடிவானது. அதன்படி செப்டம்பர் 9ம் திகதி ஹோட்டல் ஒன்றில் பெற்றோர்களுக்கு மத்தியில் எளிமையான முறையில் திருமணும் திருமணப் பதிவும் நடைபெற்றது.
இந்நிலையில் நேற்று இவர்களது திருமண வரவேற்பு நிகழ்ச்சி நட்சத்திர ஹோட்டல் ஒன்றில் நடந்தது.
விழாவில் நடிகர்கள் அர்ஜூன், பார்த்திபன், சூர்யா, சத்யராஜ், மோகன், விமல், அருண் விஜய், செந்தில், விவேக், இயக்குனர்கள் டி.ராஜேந்தர், பாக்யராஜ் உள்ளிட்டோரும் மற்றும் நடிகைகள் குஷ்பு, நிரோஷா ஆகியோர் நேரில் வாழ்த்தினர்.
மேலும் திமுக தலைவர் கருணாநிதி, மு.க.ஸ்டாலின், விஜயகாந்த் ஆகியோர் வாழ்த்தி சென்றனர்.
அமெரிக்காவின் மிகப்பெரிய விமான நிறுவனமாகக் கருதப்படும் யுனைட்டட் ஏர்லைன்ஸ் விமான நிறுவனத்தின் இணையதள முன்பதிவுப் பிரிவில் கடந்த வியாழன் அன்று கனணி இணைப்புகளில் தொழில்நுட்பக் குறைபாடு ஏற்பட்டுள்ளது.
அதனால் அன்று பதிவு செய்த பயணச் சீட்டுகள் பணம் எதுவும் பெறாமலும் மிகக்குறைந்த அளவிலான தொகையிலும் அளிக்கப்பட்டுள்ளன.
இந்தத் தவறு ஊழியர்களால் கண்டுபிடிக்கப்பட்ட பின்னர் அந்த நிறுவனம் தற்காலிகமாக விற்பனையை நிறுத்தி வைத்துள்ளது.
இதுபோல் விற்கப்பட்ட டிக்கெட்டுகளின் மொத்த எண்ணிக்கையையோ அதனால் நிறுவனத்திற்கு ஏற்பட்ட செலவையோ அந்நிறுவனம் வெளியிடவில்லை.
ஆனால் தவறுதலாக விற்கப்பட்ட போதிலும் பயணிகள் அதே கட்டணத்தில் தங்கள் பயணத்தை மேற்கொள்ளலாம் என்று நேற்று விமான நிறுவனம் தங்களது இணையதளத் தகவலில் தெரிவித்துள்ளது.
பயணிகள் அந்நாட்டின் பாதுகாப்புக் கட்டணமான 5-10 டொலரை செலுத்தினால் போதுமானது என்று கூறப்பட்டுள்ளது. இதற்கு முன்னாலும் இதுபோன்ற சம்பவங்கள் நடந்துள்ளன.
பொதுவாக ஒவ்வொரு பதிவாக முடிவு செய்யும் நிர்வாகம் இந்தமுறை சூழ்நிலைக் காரணங்களைக் கொண்டு அனைத்து பயணிகளுக்கும் அதே சலுகையை அளிப்பதாகத் தெரிவித்துள்ளது.
தமிழகத்தில் சென்னை பாலவாக்கத்தில் பெண்ணை காரில் கடத்திச்சென்று கழுத்தை அறுத்து நகைகளை கொள்ளையடித்த தாய், மகள் உள்பட 3 பேரை பொலிசார் கைதுசெய்துள்ளனர்.
சென்னையை அடுத்த பாலவாக்கம் கந்தசாமி நகரை சேர்ந்தவர் தேன்மொழி(55). இவர் அந்த பகுதியில் உள்ள பெரியார் சாலையில் ஹோட்டல் நடத்தி வருகிறார்.
இவரது ஹோட்டலுக்கு பாலவாக்கம் வி.ஜி.பி. நகரை சேர்ந்த கங்கா(36) என்பவர் அடிக்கடி வந்து சென்றார். இதனால் இருவருக்கும் பழக்கம் ஏற்பட்டது. இந்த நிலையில் கங்காவுக்கு பணம் தேவைப்பட்டது. எனவே தேன்மொழியிடம் கேட்டார். அதற்கு அவர், பணம் இல்லை என கூறினார்.
இதையடுத்து கங்கா தேன்மொழியை தனது வீட்டுக்கு அழைத்துச் சென்று குடிப்பதற்கு பால் கொடுத்தார். அதை குடித்த தேன்மொழிக்கு மயக்கம் ஏற்பட்டது. பின்னர் கங்காவும் அவரது மகள் கீதாஞ்சலி, வளர்ப்பு மகன் விக்னேஷ் ஆகியோர் மயக்கம் அடைந்த தேன்மொழியை காரில் ஏற்றி கடத்திச் சென்றனர்.
பெரியபாளையம் அருகே உள்ள ஜெயபுரம் என்ற பகுதியில் காரை நிறுத்திய அவர்கள் தேன்மொழி அணிந்து இருந்த 15 பவுன் தங்க நகைகளை கழற்றினார்கள்.
பின்னர் தேன்மொழியின் கழுத்தை அறுத்து காரில் இருந்து அவரை கீழே தள்ளி விட்டு தப்பிச்சென்று விட்டனர். அருகில் இருந்த ஒரு நிறுவனத்தில் பணியாற்றும் காவலாளி பெண்ணின் முணகல் சத்தம் கேட்டு ஓடி வந்து பார்த்தார்.
அங்கு கழுத்து அறுக்கப்பட்ட நிலையில் தேன்மொழி கிடப்பதை கண்டு அதிர்ச்சி அடைந்தார். இதுபற்றி பொன்னேரி பொலிசாருக்கு தகவல் கொடுத்தார். சம்பவ இடத்துக்கு விரைந்து வந்த பொலிசார் தேன்மொழியை மீட்டு வைத்தியசாலைக்கு அனுப்பி வைத்தனர்.
பின்னர் உயிர்பிழைத்த தேன்மொழி நடந்த சம்பவங்களை பொலிசாரிடம் கூறினார். இதுபற்றி நீலாங்கரை பொலிசாருக்கும் தகவல் அளிக்கப்பட்டது.
நடத்திய விசாரணையில் நகை, பணத்துக்காக தேன்மொழியை காரில் கடத்திச் சென்று அவரது கழுத்தை அறுத்து தள்ளிவிட்டது தெரியவந்தது.
இதையடுத்து பாலவாக்கத்தில் பதுங்கி இருந்த கங்கா, அவரது மகள் கீதாஞ்சலி, வளர்ப்பு மகன் விக்னேஷ் ஆகிய 3 பேரையும் பொலிசார் கைது செய்தனர்.
தமிழகத்தின் அம்பாசமுத்திரம் அருகே வரதட்சனை கேட்டு காதல் மனைவி மீது மண்ணெண்ணையை ஊற்றி தீ வைத்து கொடூரமான கணவன் மீது பொலிஸார் வழக்குப் பதிந்து விசாரித்து வருகின்றனர்.
அம்பாசமுத்திரம் அருகே அயன்சிங்கம்பட்டி அம்மன் கோவில் வீதியை சேர்ந்த வேம்பு மகன் மதியழகன் (23) என்பவர் வைராவிகுளம் காமராஜர்புரம் பகுதியை சேர்ந்த சுப்பிரமணியன் மகள் அபிராமி(22) என்பவரை 2 வருடங்களுக்கு முன் காதலித்து திருமணம் செய்து கொண்டார்.
இத்தம்பதிக்கு 7 மாத பெண் குழந்தை உள்ளது. காதல் திருமணம் செய்து கொண்டதால் அபிராமிக்கு அவரது பெற்றோர் தங்க நகைகள் எதுவும் சீதனமாக வழங்கவில்லையாம்.
இதற்கிடையே அபிராமியின் சகோதரி பிரபாவதிக்கு சில தினங்களுக்கு முன் திருமணம் நடைபெற்றது. பிரபாவதிக்கு அவரது சகோதரர் சீதனமாக தங்க நகைகள் போட்டு திருமணம் செய்து கொடுத்தாராம்.
இதையடுத்து அபிராமியிடம் மதியழகன் நீயும் தங்க நகைகள் வாங்கி வருமாறு கேட்டாராம். இது தொடர்பாக வெள்ளிக்கிழமை இரவு இருவருக்கும் இடையே தகராறு ஏற்பட்டதாம். இதில் மதியழகன் தனது மனைவி அபிராமி மீது மண்ணெண்ணையை ஊற்றி தீ வைத்தாராம்.
பலத்த காயமடைந்த அபிராமி திருநெல்வேலி அரசு மருத்துவமனையில் தீவிர சிகிச்சை பிரிவில் சேர்க்கப்பட்டார். கல்லிடைக்குறிச்சி பொலிஸார் மதியழகன் மீது வழக்குப் பதிந்து விசாரித்து வருகின்றனர்.
நகைச்சுவை உணர்வு உள்ளவர்களுக்கு வேலை கிடைப்பதில் எந்தவிதமான சிக்கலும் இல்லை என சமீபத்தில் அமெரிக்காவில் மேற்கொள்ளப்பட்ட ஆய்வு ஒன்றில் தெரிவிக்கப்பட்டுள்ளது.
வேலை கிடைப்பதற்கு உள்ள தகுதிகள் குறித்த ஆய்வு ஒன்றை, அமெரிக்காவின் மனித வள மேம்பாட்டு நிறுவனம் நடத்தியது. இதற்காக 2,000த்துக்கும் மேற்பட்ட மேலாளர்கள் மற்றும் மனித வள அலுவலர்களிடம் ஆய்வு மேற்கொள்ளப்பட்டது.
ஒரே விதமான கல்வித் தகுதி படைத்த இருவரில் சமுதாயம் மீது அக்கறை உள்ளவர்களுக்கும் நன்றாக உடை அணிந்தவர்களுக்கும் வேலை கிடைப்பதில் எந்த சிக்கலும் ஏற்படவில்லை.
பொதுவாக உள்ள அம்சங்களில் இருந்து சற்று மாறுபட்டு சிந்திப்பவர்களையே நிறுவன மேலாளர்கள் தேர்வு செய்கின்றனர். உடல் ரீதியாக நல்ல தகுதி படைத்தவர்கள் தற்போதைய நடைமுறை சூழலை நன்கு அறிந்தவர்கள் சமூக ஊடகங்களில் பங்கேற்பவர்கள், விளையாட்டுத் துறையில் ஆர்வம் போன்ற தகுதியை பெற்றுள்ளவர்களுக்கே வேலை கொடுப்பதில், முன்னுரிமை அளிக்கப்பட்டு வருகிறது.
வேலை கொடுப்பவர்கள், தொழில் ரீதியாக மட்டும் திறமை படைத்தவர்களை தேர்ந்தெடுப்பதில்லை மாறாக சம்பந்தப்பட்ட அலுவலகத்திற்கு எல்லா விதத்திலும் தகுதி படைத்தவர்களைத் தான் தேர்ந்தெடுக்கின்றனர். நகைச்சுவை உணர்வு உள்ளவர்களுக்கும் முக்கியத்துவம் அளிக்கப்படுகிறது.
பதவி உயர்வு குறித்து கேட்பவர்களுக்கே அது தொடர்பான முன்னுரிமை வழங்கப்படுகிறது. இதில் சில வகையினருக்கு பதவி உயர்வுகள் மறுக்கப்படுகின்றன. அதாவது இது என்னுடைய வேலை இல்லை என மறுப்பவர்களுக்கு பதவி உயர்வு கிடைப்பதில் தாமதம் ஏற்படுகிறது.
பணிக்கு தாமதமாக வருவது மற்றவர்களது வேலையை பார்த்துவிட்டு அதில் இருந்து ஆதாயம் அடைய முயலுவது வேலை நேரம் முடிவதற்கு முன்னதாகவே வீட்டுக்கு சென்றுவிடுவது போன்ற காரணங்களாலும், பதவி உயர்வு கிடைப்பது தாமதமாகலாம் அல்லது கிடைக்காமல் போகலாம்.
ஓயாமல் வம்பு பேசுபவர்கள், மற்றவர்கள் குறித்து புகார் அளிப்பவர்கள், அலுவலக பணத்தை செலவு செய்வதில் அதிக உரிமை எடுத்துக் கொள்பவர்கள், பணிக்கு ஏற்றபடி உடை அணியாதவர்கள் ஆகியோருக்கும் பதவி உயர்வுகள் என்பது வெறும் கானல் நீராகவே உள்ளது.
நீங்கள் வேலைக்கு செல்ல தயார் என்றால், உங்களது தனிப்பட்ட திறமைகள் தான் அதன் திறவுகோல் என்கிறார் இந்த ஆய்வு நிறுவனத்தின் தலைவர் ரோஸ் மேரி ஹப்னர்.
அதிவேகமாக கயிற்றின் மேல் நடக்கும் ஒரு நாயும் ஸ்கேடிங் செய்யும் ஒரு ஆடும் கின்னஸ் சாதனை படைத்து மக்களை வியப்பில் ஆழ்த்தியுள்ளன.
உலகெங்கிலும் உள்ள மக்கள் பலவகையான வித்தியாசமான முயற்சிகளை மேற்கொண்டு கின்னஸ் சாதனைகளை படைத்து வருகின்றனர்.
இந்த கின்னஸ் சாதனை பட்டியலில் விலங்குகளும் பலவகையான வித்தியாசமான திறமைகளை வெளிப்படுத்தி சாதனை புரிந்து அதன் உரிமையாளர்களுக்கு பெருமை சேர்ப்பது அனைவரும் அறிந்ததே.
அவ்வகையில் இங்கிலாந்தை சேர்ந்த ஒரு நபர் வளர்த்துவரும் நாய் ஒன்று வேகமாக கயிற்றில் நடந்து சாதனை படைத்தது. இந்த நாயின் பெயர் ஒஸி. 4 வயதான இந்த நாயின் உரிமையாளர் நோர்விச் நகரை சேர்ந்த நிக் ஜோன்சன்.
இந்த நாய் 18.22 வினாடிகளில் 3.5 மீட்டர் நீள கயிற்றை கடந்து கின்னஸ் சாதனை புத்தகத்தில் இடம்பெற்றுள்ளது. இந்த நாய்க்கு அதன் உரிமையாளர் கயிற்றில் நடக்க எந்த விதமான பயிற்சியும் அளிக்கவில்லையாம்.
இதேபோல் ப்ளிலாரிடாவை சேர்ந்த மெலடி கூக் என்பவரின் ஆடு ஹாப்பி, 25 வினாடிகளில் 36 மீ ஸ்கேட்டிங் செய்து கின்னஸ் புத்தகத்தில் இடம்பெற்றுள்ளது.
தென்னிந்திய திரைப்பட விருதுகள் வழங்கும் விழா துபாயில் நடந்தது. இதில் தமிழ், தெலுங்கு, மலையாளம், கன்னட நடிகர், நடிகைகள் கலந்து கொண்டார்கள். இதில்‘3 படத்தில் வைதிஸ் கொலை வெறி பாடலை பாடிய தனுசுக்கு சிறந்த பின்னணி பாடகருக்கான விருது வழங்கப்பட்டது.
நடிகை திரிஷா 10 வருடங்கள் கதாநாயகியாக நடித்து வந்ததற்கான சாதனையாளர் விருது பெற்றார். சிறந்த அறிமுக நடிகர் விருது கும்கியில் நடித்த விக்ரம் பிரபுவுக்கும், சிறந்த அறிமுக நடிகை விருது சுந்தர பாண்டியன் படத்தில் நடித்த லட்சுமி மேனனுக்கும் கிடைத்தன.
சிறந்த அறிமுக இயக்குனர் விருதை பீட்சா படத்தை இயக்கிய கார்த்திக் சுப்புராஜ் பெற்றார். தென் இந்திய சினிமாவில் இளைஞர்களை கவர்ந்த நடிகைக்கான விருதை காஜல் அகர்வால் பெற்றார். நித்யா மேனனுக்கு தென்னிந்திய சினிமாவில் வளரும் சிறந்த நடிகைக்கான விருது கிடைத்தது.
சிறந்த ஸ்டைல் நடிகைக்கான விருதை சுருதிஹாசன் பெற்றார். ஒரு கல் ஒரு கண்ணாடி படத்தில் கதாநாயகனாக அறிமுகமான உதயநிதி ஸ்டாலினுக்கும் விருது வழங்கப்பட்டது. துப்பாக்கி படத்தில் இசையமைத்த ஹரீஸ் ஜெயராஜ் சிறந்த இசையமைப்பாளருக்கான விருதை பெற்றார்.
கும்கி படத்துக்கு ஒளிப்பதிவு செய்த சுகுமார் சிறந்த ஒளிப்பதிவாளருக்கான விருது பெற்றார். அரவானன் படத்தில் நிலா நிலா பாடலுக்கு நடனம் அமைத்த காயத்திரி ரகுராம் சிறந்த டான்ஸ் மாஸ்டர் விருது பெற்றார்.
துப்பாக்கி படத்தில் சிறந்த சண்டைக் காட்சிகளை அமைத்தற்கான ஸ்டண்ட் மாஸ்டர் கிச்சா விருது பெற்றார். இது போல் பிறமொழி படங்களுக்கும் விருதுகள் வழங்கப்பட்டன.
ஆபிரிக்க நாடான தென் ஆபிரிக்காவின் வட மேற்கு மாகாண அடமேலாங் நகரில் 3 சிறுவர்கள் கைவிடப்பட்ட நிலையில் கேட்பாரற்று கிடந்த குளிர்சாதனப்பெட்டியில் ஒளிந்து விளையாடிக்கொண்டிருந்தனர். 4வயதான இருவர், 3 வயது ஒருவர் என விவரம் தெரியாத அந்த சிறுவர்கள் உள்ளே ஒளிந்திருந்தபோது அந்த குளிர்சாதனப்பெட்டி மூடிக்கொண்டது.
பின்னர் அந்த மூன்று சிறுவர்களாலும் அப்பெட்டியிலிருந்து வெளியே வரமுடியாமல் மூச்சுத்திணறி உள்ளேய இறந்து கிடந்தனர். இந்நிலையில் அந்த சிறுவர்களை காணாது பெற்றோர்கள் தேடி அலைந்தனர். இறுதியில் சிறுவர்களின் உறவினரான ஒரு மூதாட்டி அந்த பெட்டியை திறந்து பார்த்தபோது அவர்கள் இறந்து கிடந்தது தெரியவந்தது.
இதுகுறித்து உடனடியாக போலீசாருக்கு தகவல் கொடுக்கப்பட்டது. சம்பவ இடத்திற்கு வந்த பொலிசார் சிறுவர்களின் பிரேதங்களை கைப்பற்றி விசாரணை நடத்தி வருகின்றனர். அப்பாவி சிறுவர்கள் இறந்துபோனது அப்பகுதியில் மிகுந்த சோகத்தை வரவழைத்துள்ளது.
வன்னி கிரியேஷன் தயாரிப்பில் ப.சிவகாந்தன் இயக்கத்தில் வெளிவரும் கடன்காரன் திரைப்படத்தின் பாடல்கள் மற்றும் டிரெயிலர் வெளியிட்டு விழா இன்று 2.30 அளவில் வவுனியா நகரசபை கலாசார மண்டபத்தில் நடைபெறவுள்ளது.
இத்திரைப்படத்துக்கு கந்தப்பு ஜெயந்தன் இசையமைக்க, பாடல் வரிகளை பொத்துவில் அஸ்மின் மற்றும் பிரதாபன் ஆகியோர் எழுதியுள்ளனர்.
பாடல்களை கானா பாலா, ஜெயரூபன், சுபா, ஜெயந்தன், ஜெயப்பிரதா ஆகியோர் பாடியுள்ளனர்.
இலங்கையின் தமிழ்த் திரைப்பட வரலாற்றில் பெரும் பொருட்செலவில் பிரமாண்டமாக உருவாகிவரும் இத்திரைப்படம் இந்தியாவிலும், இலங்கையிலும், புலம்பெயர் நாடுகளிலும் ஒரே தினத்தினத்தில் வெளியிட நடவடிக்கை எடுக்கப்பட்டுள்ளதாக இயக்குனர் ப.சிவகாந்தன் தெரிவித்துள்ளார்.
ஈராக்கில் பிரிவினைவாத மோதல்கள் தீவிரமடைந்துள்ளன. கடந்த சில மாதங்களாக நடந்துவரும் இந்த தீவிரவாத தாக்குதல்களில் இருதரப்பை சேர்ந்த ஆயிரக்கணக்கான பொதுமக்கள் பலியாகியுள்ளனர்.
இந்நிலையில் மொசூல் நகர் அருகே துருக்கி எல்லையோரமுள்ள பாஷிகா நகரில் நடந்த ஷியா இஸ்லாமை பின்பற்றும் ஷபாகி பிரிவை சேர்ந்த ஒருவரின் மரண ஊர்வலத்தின் போது தற்கொலைப்படை தாக்குதல் நடத்தப்பட்டுள்ளது.
இதில் ஊர்வலத்தில் சென்றவர்களில் 26 பேர் சம்பவ இடத்திலேயே உடல் சிதறி இறந்தனர். மற்ற 46 பேர் படுகாயமடைந்தனர்.
சிறுபான்மையான இந்த ஷபாகி பிரிவினர் ஈராக்கில் அதிகபட்சமாக ஒரு இலட்சம் பேர் இருப்பதாக கூறப்படுகிறது. இவர்களை குறிவைத்து அல்கொய்தாவுடன் தொடர்புடைய சன்னி ஆயுதம் ஏந்திய குழுக்கள் தொடர்ந்து தாக்குதல் நடத்தி வருகிறார்கள் என்று குற்றம் சாட்டப்படுகிறது.
சுமார் 13 லட்சத்து 60,000 ரூபா பெறுமதியான தங்க பிஸ்கட்டுக்களை மலவாயிலில் வைத்து கடத்த முயன்ற இந்திய பிரஜை ஒருவர் பண்டாரநாயக்கா சர்வதேச விமான நிலையத்தில் கைது செய்யப்பட்டுள்ளார்.
இந்நபர் நேற்று மாலை 6.30 மணியளவில் கைது செய்யப்பட்டுள்ளதாக விமான நிலைய சுங்க ஊடகப் பேச்சாளர் தெரிவித்தார்.
நேற்று மாலை இந்தியா நோக்கி யூ.எல் 123 என்ற விமானத்தில் பயணிக்கவிருந்த 24 வயதான இந்திய பிரஜை ஒருவரே இவ்வாறு கைது செய்யப்பட்டுள்ளார்.
இவரிடமிருந்து கைப்பெற்றப்பட்ட தங்க பிஸ்கட்டுக்கள் 272 கிராம் எடையுடையவை.
அக்கரைப்பற்று, ஆலையடிவேம்பு பிரதேசத்தில் 13 வயது சிறுமியை பாலியல் துஸ்பிரயோகத்திற்கு உட்படுத்திய 16 வயது சிறுவனை கைது செய்துள்ளதாக அக்கரைப்பற்று பொலிசார் தெரிவித்தனர்.
குறித்த சிறுவனும் சிறுமியும் காதலித்து வந்ததாகவும் இரு தினங்களாக சிறுவன் சிறுமியை துஸ்பிரயோகத்திற்கு உட்படுத்தியுள்ளதாகவும் சிறுமியின் பெற்றோர் பொலிஸில் முறைப்பாடு செய்துள்ளனர்.
இதனையடுத்து நேற்று மாலை சிறுவன் கைது செய்யப்பட்டுள்ளார்.
சிறுவனை நீதிமன்றத்தில் ஆஜர்படுத்த நடவடிக்கை மேற்கொள்ளப்பட்டுள்ளதாக பொலிசார் தெரிவித்தனர்.
ஆசிய கிண்ண கிரிக்கெட் போட்டி பங்காளதேசத்தில் நடைபெறுகிறது. இதற்கான அட்டவணை சென்னையில் இன்று முடிவு செய்யப்படுகிறது.
கடந்த ஆசிய கிண்ண கிரிக்கெட் போட்டி 2012ம் ஆண்டு வங்காளதேசத்தில் நடத்தப்பட்டது. அடுத்த ஆசிய கிண்ணபோட்டியையும் வங்காளதேசத்தில் நடத்த ஆசிய கிரிக்கெட் கவுன்சில் தீர்மானித்துள்ளது.
வருகிற 2014ம் ஆண்டு பிப்ரவரி மாதம் 24ம் திகதி தொடங்கி மார்ச் மாதம் 7ம் திகதி வரை போட்டிகள் நடைபெறும் என்று தெரிகிறது. போட்டிகள் நடைபெறும் திகதி, இடம் ஆகியவை அடங்கிய அட்டவணை இன்னும் முடிவு செய்யப்படவில்லை.
சென்னையில் இன்று ஆசிய கிரிக்கெட் கவுன்சில் கூட்டம் நடைபெறுகிறது. இதில் ஆசிய கிண்ணப் போட்டி அட்டவணை முடிவு செய்யப்படுகிறது. இந்திய கிரிக்கெட் வாரிய தலைவர் என்.சீனிவாசன் தலைமையில் கூட்டம் நடைபெறுகிறது. இதில் ஆசிய கிரிக்கெட் வாரிய நிர்வாகிகள் கலந்து கொள்கிறார்கள்.
கடந்த முறை ஆசிய கிரிக்கெட் போட்டி பங்களாதேஷில் நடந்ததால் இந்த முறை ஆப்கானிஸ்தானில் நடத்தலாமா என்று ஆலோசிக்கப்பட்டது. ஆனால் அதற்கு போதிய அவகாசம் இல்லாததால் பங்களாதேஷில் நடத்த முடிவு செய்யப்பட்டது.
1979ம் ஆண்டு கமலஹாசன், ரஜினிகாந்த் நடிப்பில் கே.பாலசந்தர் இயக்கத்தில் வெளிவந்த படம் நினைத்தாலே இனிக்கும். எம்.எஸ்.விஸ்வநாதன் இப்படத்திற்கு இசையமைத்திருந்தார். கவியரசு கண்ணதாசன் பாடல்கள் எழுதியிருந்தார். தமிழ் சினிமாவின் ஜாம்பவான்கள் அனைவரும் ஒன்றாக இணைந்து வெளிவந்த இந்த படம் அந்த காலக்கட்டத்தில் மிகப்பெரிய வெற்றியை அடைந்திருந்தது.
இந்த படத்தை தற்போது டிஜிட்டல் முறையில் மாற்றி மீண்டும் வெளியிடவிருக்கின்றனர். இதற்காக இப்படத்தின் டிரைலர் வெளியீட்டு விழா இன்று சென்னை சத்யம் திரையரங்கில் நடைபெற்றது. இதில், கே.பாலசந்தர், எம்.எஸ்.விஸ்வநாதன், நடிகர் கமலஹாசன், அமீர், கே.ஆர், சித்ரா லட்சுமணன் உள்ளிட்ட சினிமாத் துறையைச் சேர்ந்த பலரும் கலந்து கொண்டனர். விழாவில், அமீர் பேசும்போது..
இந்த விழாவுக்கு நான் உலகநாயகன் கமலஹாசனின் ரசிகனாக வந்துள்ளேன். பார்க்க சுவாரஸ்யமானது என்பதற்கு இந்த விழா ஒரு முக்கியமான உதாரணம். நான் கண்டிப்பான குடும்பத்தில் பிறந்தவன். என்னுடைய அப்பா 1977ம் ஆண்டு இறந்து விட்டார். முஸ்லீம் சமுதாயத்தில் பிறந்ததால் என்னுடைய அம்மா வீட்டை விட்டு வெளியே வரமாட்டார். அதனால், அப்பாவின் மரணத்திற்கு பிறகு நான் சுதந்திரமானவன் ஆகிவிட்டேன்.
அப்படியொரு நாள் பள்ளிக்கூடத்தை கட் அடித்துவிட்டு பார்த்த படம்தான் நினைத்தாலே இனிக்கும். நான் உலகநாயகனின் ரசிகன் என்று சொல்வதைவிட வெறியன் என்றுதான் சொல்லவேண்டும். அவருடைய சினிமாக்களைப் பார்த்துதான் நான் சினிமாவைக் கற்றுக்கொண்டேன் என்று சொன்னால் அது மிகையாகாது.
நான் பிறவிக் கலைஞன் கமல்ஹாசன் என்ற பெயரில் நற்பணி மன்றம் ஒன்றையும் தொடங்கினேன். அவரை நிறைய முறை நேரில் சென்று பார்க்க என்னுடைய நண்பர்கள் அழைத்தாலும் அவரை தூரத்தில் நின்றே ரசிக்கவேண்டும் என்ற எண்ணம் மட்டும்தான் என் மனதில் இருந்தது. அவருடன் சேர்ந்து பல இடங்களில் போட்டோ எடுத்திருந்தாலும் அவருடைய ரசிகனாக என் மேல் அவர் கை போட்டு எடுத்த போட்டோ இதுவரை ஒன்றுகூட என்னிடம் இல்லை என்பதுதான் உண்மை.
இந்த படத்தில் பாலச்சந்தர் அவர்களின் திரைக்கதை ரொம்பவும் அருமையானது. எல்லா காலகட்டத்திலும் பார்க்கக்கூடிய படம் இது. ரசிக்கக்கூடிய இசை இப்படத்தில் உள்ளது. 300 வருடங்கள் கடந்தாலும், சினிமா என்று ஒன்று இருக்கும்வரை பாலச்சந்தர் அவர்களுடைய சாதனையை யாராலும் தொடமுடியாது என்பது மறுக்கமுடியாது உண்மை. இவ்வாறு அவர் பேசினார்.
