சீனாவின் கிழக்குப்பகுதியில் அமைந்துள்ள புட்ஜி என்ற கிராமத்தில் தனியார் முதலைப்பண்ணை இயங்கியது. அங்கு ஏராளமான ராட்சத முதலைகள் வளர்க்கப்பட்டு வந்தன.

இதை வேறு இடத்துக்கு அகற்றுவது தொடர்பாக பண்ணை உரிமையாளருக்கும், கட்டிட காண்டிராக்டர்களுக்கும் இடையே பிரச்சினை ஏற்பட்டது. இந்த மோதல் விளைவு நள்ளிரவில் சிலர் சென்று முதலைப்பண்ணையில் மதில் சுவரை இடித்து தரைமட்டமாக்கினார்கள்.

இதனால் கூண்டில் அடைக்கப்பட்டிருந்த முதலைகள் தப்பித்து வெளியே ஓடின. இதை கேள்விப்பட்டதும் உரிமையாளரும், ஊழியர்களும் விரைந்து சென்று சில முதலைகளை பிடித்து கூண்டில் அடைத்தனர். என்றாலும் சுமார் 17 அடி நீளம் கொண்ட 6 ராட்சத முதலைகள் தப்பி விட்டன.

இவை மனிதனை அடித்து விழுங்கும் அபாயகர முதலைகள் ஆகும். எனவே முதலை தப்பிய தகவல் பரவியதும் அங்கு பெரும் பரபரப்பும், பதற்றமும் ஏற்பட்டது.

பண்ணையை சுற்றி வசித்த பொதுமக்கள் வீடுகளை காலி செய்து விட்டு பாதுகாப்பான இடத்திற்கு சென்று விட்டார்கள். முதலைகளை தேடும் பணியில் வனவிலங்கு காப்பாளர்கள் தீவிரமாக ஈடுபட்டு வருகிறார்கள்.

பாகிஸ்தானின் மதச்சார்பற்ற பெண் அரசியல்வாதிகளில் ஒருவரான நஜ்மா ஹனிப் (35) தீவிரவாதிகளால் சுட்டுக்கொள்ளப்பட்டுள்ளார்.

பாகிஸ்தானின் கைபர் பக்துன்க்வா மாகாணத்தில் தலிபான்கள் ஆட்சி நடத்தியபோது, கிளர்ச்சியாளர்களுக்கு எதிரான அவர்களது இராணுவ நடவடிக்கையை அவாமி நேஷனல் பரி என்ற கட்சி வெளிப்படையாக விமர்சனம் செய்தது.

அந்த கட்சியின் மூத்த உறுப்பினர் நஜ்மா ஹனிப். பாகிஸ்தானின் மதச்சார்பற்ற பெண் அரசியல்வாதிகளில் ஒருவரான இவர் பாகிஸ்தானின் பிரச்சினைக்குரிய வடமேற்குப் பகுதியில் வசித்து வருகிறார்.

இந்நிலையில், நேற்று இரவு ஹனின் தனது வீட்டில் இருந்தபோது, ஆயுதமேந்திய கும்பல் ஒன்று அவரது வீட்டை உடைத்து உள்ளே புகுந்துள்ளது.

சைலன்சர் பொருத்திய துப்பாக்கியால் அவர்கள் சுட்டதில் ஹனிப் இறந்தார். ஒன்று அல்லது இரண்டு பேர் வீட்டின் உள்ளே புகுந்து அவரை சுட்டிருக்கவேண்டும் என்று மூத்த பொலிஸ் அதிகாரி முகமது பைசல் தெரிவித்தார்.

இந்த கொலைக்கான காரணம் சரிவரத் தெரியவில்லை. கடந்த 2011ஆம் ஆண்டு நவம்பரில் ஹனிபின் கணவர், மகன் மற்றும் அவர்களது பாதுகாவலர் ஆகியோர் தலிபானின் வெடிகுண்டு தற்கொலைப்படை வீரன் ஒருவனால் கொல்லப்பட்டனர்.

கடந்த 2008ஆம் ஆண்டு முதல் சமீபத்தில் நடந்த தேர்தல்கள் வரை அவாமி கட்சி, ஆளும் கூட்டணியில் இருந்தது. இந்தக் கட்சியின் செயல்வீரர்கள் பலரும் தலிபான்களின் தாக்குதல்களுக்கு ஆளானார்கள். கடந்த மே மாதத் தேர்தலின்போது இந்தத் தாக்குதல்கள் அதிகரித்துக் காணப்பட்டன.

தற்போது முன்னாள் கிரிக்கெட் வீரரும், இந்நாள் அரசியல்வாதியுமான இம்ரான்கானின் கட்சி, இந்த மாகாணத்தில் கூட்டணி ஆட்சி நடத்தி வருகிறது. இருந்தபோதிலும் அவாமி கட்சியின் மீதான தாக்குதல்கள் தொடர்ந்து கொண்டுதான் இருக்கின்றன.

ஆப்கானிஸ்தானின் ஹெராட் மாகாண கருக் மாவட்ட கட்டுமான முகாமில் தூங்கிக்கொண்டிருந்த பணியாளர்கள் மீது நேற்று அதிகாலை தீவிரவாதிகள் தாக்குதல் நடத்தினர்.

நவீன ஆயுதங்கள் மற்று ரொக்கெட் மூலம் வீசப்பட்ட கையெறிக்குண்டுகள் கொண்டு தாக்கியதில் ஒரு பொலிசார் உள்பட 10பேர் கொல்லப்பட்டனர்.

இவர்கள் அனைவரும் ஆப்கன் – ஜெர்மன் இணைந்து நடத்திய சாலை கட்டுமான நிறுவனத்தின் பணியாளர்கள் ஆவர்.

போரால் பாதிக்கப்பட்ட ஆப்கானிஸ்தானில் கட்டுமானப்பணிகளில் ஈடுபட்டுள்ள வெளிநாட்டு பணியாளர்களை குறிவைத்து தீவிரவாதிகள் தாக்கி வருவது குறிப்பிடத்தக்கது.

மேலும் சாலையோரக்குண்டு வெடிப்பு, தற்கொலைப்படை தாக்குதலில் 8 பேர் கொல்லப்பட்டனர்.

ஆப்கானிஸ்தானில் நேட்டோ படையினர் வெளியேற உள்ள நிலையில் அப்பகுதிகளை கைப்பற்றும் நோக்கில் இதுபோன்ற தாக்குதல்கள் நடத்தப்பட்டு வருவதாக கூறப்படுகிறது.

அமெரிக்காவின் கலிபோர்னியா மாகாணத்தில் உள்ள சான் பெர்னார்டினோ நகரத்தில் பாலியல் வன்முறை சார்ந்த சேவை மையம் ஒன்று இயங்கிக் வருகிறது.

இந்த மையத்தினுள் கடந்த 31-ம் திகதி இரவு புகுந்த திருடர்கள் அங்கிருந்த ஆறு கனணி சாதனைங்களையும், புதிய மடிக் கனணி ஒன்றினையும் திருடிச் சென்றனர்.

சோதனைக்கு வந்த காவல்துறையினர் அந்த நிறுவனத்தின் நிர்வாக இயக்குனர் கேன்டி ஸ்டாலிங்சிடம் தொலைபேசியில் இந்தத் தகவலைத் தெரிவித்துள்ளனர். அவர்களின் தகவல் சேகரிப்பு முழுவதும் அந்த சாதனங்களில் சேகரித்து வைக்கப்பட்டிருந்ததால் அவர் செய்வதறியாது திகைத்தார்.

காவல்துறையினர் மேற்கொண்டு விசாரணையில் ஈடுபட்டனர். கேன்டியும் தனது வீட்டிற்குத் திரும்பி வந்துவிட்டார். சிலமணி நேரம் கழித்து அவருக்கு மற்றொரு தொலைபேசி அழைப்பு வந்துள்ளது.

அவரின் நிறுவனத்தில் நடமாட்டம் இருந்ததாகக் கூறி காவல்துறையினர் அவரை மறுபடியும் அங்கு வருமாறு அழைத்தனர். அங்கு சென்றபோது கேன்டிக்கு பெரிய ஆச்சரியம் காத்திருந்தது.

திருடர்கள் அவரது நிறுவனத்தில் இருந்து எடுத்துச்சென்றிருந்த பொருட்கள் அனைத்தையும் மீண்டும் அங்கு கொண்டுவந்து வைத்திருந்தனர். அத்துடன் ஒரு மன்னிப்புக் கடிதத்தையும் இணைத்திருந்தனர்.

மக்களின் வாழ்க்கையில் மாற்றத்தை ஏற்படுத்தும் உங்களுக்கு கடவுளின் ஆசீர்வாதம் கிட்டட்டும் என்றும் அதில் எழுதியிருந்தனர். இந்த நிகழ்ச்சி மூலம் இவர்களின் சேவை வெளியுலகிற்குத் தெரியவர, அவர்களுக்கு நன்கொடைகளும் குவியத் தொடங்கியுள்ளன.

நாட்டு மக்களின் மனநிலை என்ன என்பதை அறிய நாட்டின் பிரதமரே டாக்சி டிரைவராக மாறிய சம்பவம் நோர்வே மக்களை வியப்பில் ஆழ்த்தியுள்ளது.

நோர்வே பிரதமர்- ஜென்ஸ் ஸ்டோலன்பெர்க். “தேர்தலில் வெற்றி பெற்று பிரதமராக பொறுப்பேற்ற பின் இவர் நாட்டு மக்களின் வளர்ச்சியை கண்டு கொள்ளவில்லை’ என பரவலாக புகார் எழுந்துள்ளது.

அடுத்த மாதத்துடன்- இவரது ஆட்சி காலம் முடிகிறது. “ஸ்டோலன்பெர்க் மீது பொதுமக்கள் அதிருப்தியில் இருப்பதாகவும்- அவருக்கு வரும் தேர்தலில்- குறைந்த அளவு ஓட்டுகளே கிடைக்கும்’ என கருத்துக்கணிப்புகள் தெரிவித்தன.

இதனால் அதிர்ச்சி அடைந்த ஸ்டோலன்பெர்க்- நாட்டு மக்களின் மனநிலையை புரிந்து- அதற்கேற்ப தேர்தல் பிரசார வியூகங்களை அமைக்க திட்டமிட்டுள்ளார்.

இதனால்- மக்களின் கருத்துக்களை- நேரடியாக அறிய விரும்பிய ஸ்டோலன்பெர்க்- டாக்சி டிரைவர் போல சென்று பொதுமக்களை தன் காரில் சவாரிக்கு ஏற்றினார்.

அதில் மக்களின் கருத்துக்களை பதிவு செய்ய ரகசிய கேமராவும் வைத்திருந்தார். பல பேரும் இவரை அடையாளம் காணாமல்- தாங்கள் நினைத்தவற்றை பேசினர்.

எனினும்- ஒரு சிலர் ஸ்டோலன்பர்கை அடையாளம் கண்டுவிட்டனர்; பிரதமர் என்ற முறையில்- மக்களின் கருத்துக்களை அறிய முற்பட்டதற்கு- பாராட்டுகளை தெரிவித்த அவர்கள்- நாட்டில் நடக்கும் குற்றங்கள் மற்றும் குறைகளை பிரதமரிடம் தெரிவித்தனர்.

ஸ்டோலனின் டாக்சியில் பயணித்த யாரிடமும் அவர்- பணம் வாங்கவில்லை.

இதுகுறித்து- ஸ்டோலன்பெர்க் கூறியதாவது: மக்கள் தங்கள் கருத்துக்களை சுதந்திரமாக வெளிப்படுத்தும் இடம் அவர்கள் பயணிக்கும் டாக்சிகளில் மட்டுமே. டாக்சி டிரைவர்களும்- விடாமல் எதையாவது பேசிக் கொண்டேயிருப்பதால்- மக்களும் அவர்களிடம்- ஆட்சியாளர்களின் நிறை குறைகளை கொட்டித் தீர்க்கின்றனர்.

எனவே மக்களின் குறைகளையும் அவர்களின் தேவையையும் நேரடியாக அறிய பிரதமர் என்ற முகமூடியை கிழித்துவிட்டு டிரைவர் வேஷத்தில் சென்றேன்.

இந்த வேஷத்திற்கு நல்ல பலன் கிடைத்துள்ளது. மக்கள் பலரும் தங்கள் குறைகளை மனம் திறந்து வெளிப்படுத்தினர். நான் மீண்டும் ஆட்சிக்கு வந்தால்- மக்களின் குறையை உடனடியாக தீர்த்து வைப்பேன். இவ்வாறு ஸ்டோலன்பெர்க் கூறினார்.

“பல ஆண்டுகள் ஆட்சியில் இருந்தும்- மக்களை பற்றி சிந்திக்காத அரசியல் வாதிகள்- தேர்தல் நேரத்தில் மட்டும் மக்கள் மீது அக்கறை இருப்பது போல நடிப்பதில்- ஸ்டோலன்பெர்க்கும் விதிவிலக்கல்ல’ என சிலர் அலுத்துக் கொண்டனர்.