2024ஆம் ஆண்டுக்கான வலய மட்ட பெருவிளையாட்டு போட்டியானது 19.06.2024. அன்று வவுனியா கனகராயங்குளம் மகா வித்தியாலயத்தில் நடைபெற்றது.
குறித்த போட்டியில் பங்கு பற்றிய வவுனியா கோவில் புளியங்குளம் முத்தமிழ் வித்தியாலய மாணவர்கள் 15 வயத்தின் கீழ் ஆண்களுக்கான எறிபந்து போட்டியில் வலயமட்டதில் 3ஆம் இடத்தினை பெற்று மாகாண மட்டதிற்கு தெரிவாகியுள்ளனர்.
இவர்களுக்கு பயிற்றுவித்த ஆசிரியர் ஜெ.முகுந்தினி பாடசாலை அதிபர் மா.அரவிந்தன் மற்றும் போட்டியில் பங்குபற்றி பாடசாலைக்கு பெருமை சேர்த்த மாணவர்களுக்கும் நன்றிகளையும் பாராட்டுக்களையும் வாழ்த்துக்களையும் கிராம மக்களும் பழைய மாணவர்களும் தெரிவித்து வருகின்றனர்.
மேலும் இப்படசாலையானது பின்தங்கிய கிராமப்புர பாடாசாலையாக இருந்தாலும் கூட பல நிகழ்வுகள் போட்டிகள் என வலய மட்டம் மாகாண மட்டம் மற்றும் தேசிய மட்டத்திலும் பல பல வெற்றிகளையும் சாதனைகளையும் நிகழ்த்தி வருகின்றமையும் குறிப்பிடத்தக்கது.
கேரள மாநிலம் கோட்டயம் மாவட்டத்தில் வளர்ப்பு நாய் ஒன்று, நாகப்பாம்பு கடியில் இருந்து தனது எஜமானர் ஸ்ரீகுமாரைக் காப்பாற்றி உள்ளது.
கிட்டு என்று பெயரிடப்பட்டுள்ள அந்த நாய், ஸ்ரீகுமாரின் வழிகாட்டியாகவே துணையாக இருந்து வந்த நிஅலியில், அதன் கூண்டுக்கு அருகில் இருந்த நாகப்பாம்பை கடித்தது.
கடந்த ஞாயிற்றுக்கிழமை மாலை 3 மணியளவில், கிட்டத்தட்ட பார்வையற்ற ஸ்ரீகுமார், கிட்டுவின் கட்டை அவிழ்க்கச் சென்ற போது இந்தச் சம்பவம் நடந்துள்ளது.
அவர் தனது இடது பக்கத்திலிருந்து சலசலக்கும் சத்தத்தைக் கேட்டு, ஏதோ எலி ஒன்று சத்தம் போடுகிறது என்று அந்த சத்தத்தை நிராகரித்தார், ஆனால் சலசலப்பு தொடர்ந்ததால், விழிப்புடன் இருந்த கிட்டு ஏற்கனவே அதன் கோரைப் பற்கள் வெளியே இருந்த நாகப்பாம்பை நோக்கி குதித்து, பாம்பை கடித்து உயிரிழந்தது. சீரகடவு ஊராட்சியில் பம்ப் ஆபரேட்டராக ஸ்ரீகுமார் பணியாற்றி வருகிறார்.
ஸ்ரீகுமாரின் நிலையான தோழராக துணையிருந்து வந்த அந்த நாய் அவருக்கு, அவரது மகள் பரிசாக அளித்தது. நரம்பு பாதிப்பு காரணமாக ஸ்ரீகுமாருக்கு கண்பார்வை ஏற்பட்டது. சுமார் 20 ஆண்டுகளுக்கு முன்பு, ஸ்ரீகுமார் பொருட்களை தெளிவாகப் பார்ப்பதில் சிரமத்தை அனுபவிக்கத் தொடங்கினார்.
அறுவை சிகிச்சை என தொடர்ந்து சிகிச்சை எடுத்து வந்த நிலையிலும் அவரது வலது கண் பார்வை முழுவதுமாக முடங்கியது. அவர் கிட்டுவை மட்டுமே நம்பியிருந்து சில வேலைகளைச் செய்து வந்தார். தற்போது அவரது இடது கண்ணின் பார்வையும் குறைந்து வருகிறது.
எல்பிட்டிய, தலாவ பிரதேசத்தில் உள்ள வீடொன்றில் இன்று (20) வியாழக்கிழமை அதிகாலை ஏற்பட்ட தீ பரவலில் தந்தை ஒருவர் உயிரிழந்துள்ளார். எல்பிட்டிய, தலாவ பிரதேசத்தைச் சேர்ந்த 48 வயதுடைய இரு பிள்ளைகளின் தந்தையே இவ்வாறு உயிரிழந்துள்ளார்.
இவர் இன்று (20.06) அதிகாலை 3.30 மணியளவில் மது போதையில் தனது மனைவியுடன் தகராறில் ஈடுபட்டுள்ள நிலையில் மண்வெட்டி ஒன்றினால் தனது மனைவியையும் பிள்ளைகளையும் தாக்க முயன்றுள்ளதாக பொலிஸார் தெரிவித்தனர்.
இதன்போது, மனைவியும் பிள்ளைகளும் உயிர் தப்புவதற்காக அயல் வீட்டிற்குத் தப்பிச் சென்று தலைமறைவாக இருந்துள்ளதாக பொலிஸார் தெரிவித்தனர். இதன்போது, மது போதையில் தந்தை வீட்டில் இருந்த வேளை, திடீரென தீ பரவல் ஏற்பட்டுள்ளதாக பொலிஸார் தெரிவித்தனர்.
இதனையடுத்து, தகவல் அறிந்த பொலிஸார் சம்பவ இடத்திற்கு விரைந்து சோதனையிட்ட போது வீட்டின் அறையொன்றில் எரிந்த நிலையில் தந்தையின் சடலம் கண்டுபிடிக்கப்பட்டதாக பொலிஸார் தெரிவித்தனர். இது தொடர்பான மேலதிக விசாரணைகளை எல்பிட்டிய பொலிஸார் மேற்கொண்டு வருகின்றனர்.
இலங்கைக்கு சுற்றுலா வந்த நெதர்லாந்து நாட்டைச் சேர்ந்த காதலர்கள் விபத்தில் படுகாயமடைந்துள்ளதாக பொலிஸார் தெரிவித்தனர்.
கொஸ்லந்த பொலிஸ் பிரிவிற்குட்பட்ட வெல்லவாய பெரகல வீதியில் முச்சக்கர வண்டி ஒன்று வீதியை விட்டு விலகி கவிழ்ந்து விபத்திற்குள்ளாகியது.
நெதர்லாந்தை சேர்ந்த 29 லோனி ஹைமன்ஸ் தனது காதலனுடன் சென்ற வேளையில் விபத்து ஏற்பட்டுள்ளது. குறித்த பெண்ணே இந்த முச்சக்கரவண்டியை ஓட்டியதாக தெரிவிக்கப்படுகின்றது.
தியலும நீர் வீழ்ச்சியை பார்வையிட சென்ற போதே விபத்து ஏற்பட்டுள்ளது. சம்பவத்தில் காயமடைந்த இளைஞனும் பெண்ணும் வெல்லவாய ஆதார வைத்தியசாலையில் சிகிச்சை பெற்று வருகின்றனர்.
கொஸ்லந்த பொலிஸ் நிலைய பொறுப்பதிகாரி மேலதிக விசாரணைகளை மேற்கொண்டு வருகிறார்.
பொலன்னறுவை – ஹபரணை பிரதான வீதியில் பயணித்துகொண்டிருந்த லொறியை கவிழந்து, நபரொருவரை தாக்கி யானை கொன்ற சம்பவம் பெரும் அதிர்ச்சியை ஏற்படுத்தியுள்ளது.
இந்த சம்பவம் நேற்றைய தினம் (19.06.2024) காலை இடம்பெற்றுள்ளது. குறித்த சம்பவத்தில் பொலன்னறுவை பிரதேசத்தைச் சேர்ந்த நபர் ஒருவரே உயிரிழந்துள்ளார்.
மின்னேரியாவில் இருந்து வாழை மற்றும் பலாக்காய்களை ஏற்றிக் கொண்டு தம்புள்ளை பொருளாதார மத்திய நிலையத்தை நோக்கிப் பயணித்த லொறி ஒன்றின் எதிரில் திடீரென யானை ஒன்று வந்துள்ளது.
இதைக்கண்டு அதிர்ச்சியடைந்த லொறியின் சாரதி லொறியை விட்டு இறங்கித் தப்பிச் சென்றுள்ளார்.
இதனையடுத்து, யானை லொறியை கவிழ்த்து லொறியினுள் இருந்த நபரைத் தாக்கியதில் அவர் உயிரிழந்திருப்பதாக பொலிஸார் தெரிவித்தனர்.
உயிரிழந்தவரது சடலம் ஹிங்குரங்கொட ஆதார வைத்தியசாலையில் வைக்கப்பட்டுள்ளதாக பொலிஸார் தெரிவித்தனர்.
இலங்கையில் நாளுக்கு நாள் தங்கத்தின் விலை ஏற்ற, இறக்கத்துடன் பதிவாகி வருகின்ற நிலையில் இலங்கையில் தங்கத்தின் விலையானது நேற்றைய தினத்துடன் ஒப்பிடும் போது இன்றையதினம் (2024.06.20) சற்று அதிகரித்து கொண்டே வருகின்றது.
அந்தவகையில் இலங்கை மத்திய வங்கி வெளியிட்டுள்ள தகவல்களின் படி, இன்றைய தினம் தங்க அவுன்ஸின் விலையானது 713,906 ரூபாவாக பதிவாகியுள்ளது.
மேலும், 24 கரட் 1 கிராம் தங்கத்தின் விலை 25,190 ரூபாவாக பதிவாகியுள்ளது. அதன்படி 24 கரட் தங்கப் பவுண் ஒன்று 201,500 ரூபாவாக பதிவாகியுள்ளது.
அதேபோன்று, 22 கரட் 1 கிராம் தங்கத்தின் விலை 23,100 ரூபாவாகவும் அதற்கமைய 22 கரட் தங்கம் கிராம் பவுண் ஒன்று 184,750 ரூபாவாக பதிவாகியுள்ளது.
இதற்கமைய 21 கரட் 1 கிராம் தங்கத்தின் விலை 22,050 ரூபாவாகவும் அதற்கமைய 21 கரட் தங்கப் கிராம் பவுண் ஒன்று 176,350 ரூபாவாக பதிவாகியுள்ளமை குறிப்பிடத்தக்கது.
தமிழ்நாட்டில் கள்ளக்குறிச்சியில் கள்ளச் சாராயம் அருந்தி 38 பேர் உயிரிழந்த சம்பவம் அதிர்ச்சியை ஏற்படுத்தியுள்ள நிலையில், கிராம் எங்கும் மரண ஓலம் ஒலிப்பதாக கள்ளக்குறிச்சி- கருணாபுர கிராம மக்கள் கவலை வெளியிட்டுள்ளன.
இந்த நிலையில், முதலமைச்சர் ஸ்டாலின் பதவி விலக வேண்டும் என முன்னாள் முதல்வர் ஓபிஎஸ் உள்பட எதிர்க்கட்சி தலைவர்கள் வலியுறுத்தி வருகின்றமை பரபரப்பை ஏற்படுத்தியுள்ளது.
மாவட்ட ஆட்சியர் இடமாற்றம் – காவல் கண்காணிப்பாளர் சஸ்பெண்ட்
கள்ளக்குறிச்சி – கருணாபுரத்தில் கள்ளச் சாராயம் அருந்தியதாக 109 பேர் கள்ளக்குறிச்சி அரசு மருத்துவமனையில் அனுமதிக்கப்பட்டு பின்னர் புதுச்சேரி ஜிப்மர், விழுப்புரம் முண்டியம்பாக்கம் அரசு மருத்துவ கல்லூரி மருத்துவமனை, சேலம் அரசு மருத்துவமனை அனுமதிக்கப்பட்டனர்.
இந்நிலையில் இன்று காலை வரை 36 பேர் சிகிச்சை பலனின்றி உயிரிழந்துள்ளனர் சம்பவத்தை அடுத்து மாவட்ட ஆட்சியர் இடமாற்றம் செய்யப்பட்டு, காவல் கண்காணிப்பாளர் சஸ்பெண்ட் செய்யப்பட்டுள்ளார்,
இந்நிலையில் கள்ளக்குறிச்சியில் ஏற்பட்டுள்ள பதற்றத்தைத் தணிக்க மாவட்டம் முழுவதும் காவல்துறை கண்காணிப்பு தீவிரப்படுத்தப்பட்டுள்ளது. கருணாபுரம் பகுதியில் கூடுதலாக காவல்துறையினர் குவிக்கப்பட்டு உயிரிழந்தோரை அடக்கம் செய்வதற்கான ஏற்பாடுகளும் செய்யப்பட்டு வருகின்றன.
இந்நிலையில் விழுப்புரம் ஆட்சியர் அலுவலகத்தில் இன்று காலை நடந்த அவசர ஆலோசனைக் கூட்டத்துக்குப் பின்னர் கள்ளச் சாராயம் சம்பவம் தொடர்பாக சிபிசிஐடி விசாரணை தொடங்கியுள்ளது.
மலேசியாவில்(Malaysia) திருமண பந்தத்தில் இணைய தயாராகிய நிலையில் கார் விபத்தில் சிக்கி உயிரிழந்த காதல் ஜோடிக்கு அவர்களது பெற்றோர் பேய் திருமணம் செய்து வைத்துள்ளனர்.
மலேசியாவில் வசித்து வந்த ஜிங்ஷன் என்ற இளைஞன் லீ என்ற பெண்ணை காதலித்து வந்துள்ளார். இந்நிலையில், இருவருக்கும் ஜூன் 2 ஆம் திகதி திருமணம் நடைபெறுவதாக தீர்மானிக்கப்பட்டுள்ளது.
எனினும், துரதிர்ஷ்டவசமாக கடந்த மே மாதம் 24 ஆம் திகதி அந்த காதல் ஜோடி ஒரு கார் விபத்தில் சிக்கி பரிதாபமாக உயிரிழந்துள்ளனர்.
இதனால், இரு குடும்பத்தினரும் மிகுந்த மனவேதனையடைந்த நிலையில், அவர்களது உயிர் மண்ணை விட்டு போனாலும் குறிப்பிட்ட நாளில் திருமணத்தை நடத்த முடிவு செய்துள்ளனர். அந்தவகையில், அவர்கள் பேய் திருமணம் செய்து வைத்துள்ளனர்.
அதன்படி, ஒரு மண்டபத்தில் இறந்த காதல் ஜோடியின் புகைப்படம் மற்றும் அவர்கள் போன்ற உருவ பொம்மையை வைத்து பேய் திருமணம் செய்து வைத்துள்ளனர்.
இந்த பேய் திருமணத்தால் உயிரிழந்த காதல் ஜோடி ஒன்றிணைவர் என்பது நம்பிக்கையாக இருந்து வருகிறது. மேலும்,இந்த விநோத திருமணம் குறித்த புகைப்படங்கள் மற்றும் காணொளிகள் தற்போது சமூக வலைதளங்களில் பரவி வருகிறது.
வவுனியாவில் பதிவான நிலநடுக்கம் பாரிய நிலநடுக்கத்துக்கான முன்னெச்சரிக்கையாக இருக்கலாம் என யாழ். பல்கலைக்கழக புவியியல் துறை சிரஷ்ட விரிவுரையாளர் நாகமுத்து பிரதீபராஜா தெரிவித்துள்ளார்.
வவுனியா மற்றும் அதனை சூழவுள்ள பல பகுதிகளில் நேற்று முன்தினம் (18.06.2024) இரவு 11.02 மணியளவில் நிகழ்ந்த புவி நடுக்கத்தின் அளவு 2.3 ரிக்டர் என தேசிய புவிச்சரிதவியல் மற்றும் கனிமவள பிரிவு அறிவித்துள்ளது.
இந்த நில நடுக்கத்தின் குவிமையம் (Epic Centre) தாண்டிக்குளத்திற்கும் கூமாங்குளத்திற்கும் இடைப்பட்ட மரிக்காரம்பளையாகும். இந்த குவி மையம் புவிமேற்பரப்பிலிருந்து 10 கிலோமீற்றர் ஆழத்தில் நிகழ்ந்துள்ளது.
நான் இது தொடர்பாக இட்ட பதிவில் கருத்துரைத்த பலர் கல் அகழ்வுச் செயற்பாடுகள், மற்றும் குழாய்க்கிணறு தோண்டுதல் செயற்பாடுகள் காரணமாக இந்த நிலநடுக்கம் தோன்றியிருக்கலாம் என தெரிவித்தனர். ஆனால் புவி நடுக்கத்திற்கும் இவைக்கும் எந்தவிதமான தொடர்பும் கிடையாது.
வவுனியாவில் நிகழ்ந்த புவிநடுக்கம் 10 கிலோமீற்றர் ஆழத்தில் நிகழ்ந்துள்ளது. எனினும், இந்த கல்லகழ்வு மற்றும் குழாய்க்கிணறுகள் புவி மேற்பரப்பில் இருந்து வெறுமனே 100 மீற்றருக்குள்ளேயே நிகழ்கின்றன என்பதுடன் இவை வேறுபல பிரச்சினைகளைத் தோற்றுவிக்கும்.
பொதுவாக எதிர்வு கூற முடியாத இயற்கை அனர்த்தங்களில் புவி நடுக்கம் முதன்மையானது. உலகின் பல பிரதேசங்களில் நிகழ்ந்த பாரிய புவி நடுக்க நிகழ்வுகள் இரண்டாகவே நிகழ்ந்துள்ளன.
முதலாவது மிக மெதுவானதாக வெறும் நடுக்கத்துடன் கூடியதாகவே அமைந்துள்ளது. இதனை உணர்ந்து கட்டுமானங்களை விட்டு வெளியே வந்து வெளிப்பிரதேசங்களில் நின்றால் மிக மோசமான பாதிப்பை ஏற்படுத்தக்கூடிய இரண்டாவது புவி நடுக்கத்திலிருந்து எம்மைப் பாதுகாக்கலாம்.
அண்மைக்காலப் பகுதியில் இலங்கையின் கடற்பிராந்தியங்களிலும் நிலப்பகுதிகளிலும் சிறிய அளவிலான நிலநடுக்கங்கள் அதிக அளவில் பதிவாகின்ற நிலையில் இவை எதிர்காலத்தில் மிகப் பெரிய அளவிலும் நில நடுக்கங்கள் இடம்பெறலாம் என்பதற்கான சமிக்ஞைகளாகவே கருதலாம்
அத்துடன், அனர்த்தங்கள் தொடர்பான விழிப்புணர்வை இலங்கையின் சகல பிரஜைகளுக்கும் வழங்க வேண்டும்.
குறிப்பாக வெள்ளப்பெருக்கு, வரட்சி, புயல், சூறாவளி, நிலச்சரிவு, புவிநடுக்கம் தொடர்பான இயற்கை அனர்த்தங்கள் பற்றியும் வீதி விபத்துக்கள் மற்றும் தீ விபத்துக்கள் பற்றியும் இலங்கையின் அனைத்து மக்களுக்கும் விழிப்புணர்வை ஏற்படுத்துவதன் மூலம் இவற்றினால் ஏற்படும் உயிர் மற்றும் உடமை இழப்புக்களை தவிர்க்க முடியும் என புவியியல் துறை சிரஷ்ட விரிவுரையாளர் நாகமுத்து பிரதீபராஜா குறிப்பிட்டுள்ளார்.
யாழ்ப்பாணம் நெடுந்தீவு பொலிஸ் பிரிவிற்குட்பட்ட நெடுந்தீவு ஏழாம் வட்டார பகுதியில் இளைஞர் ஒருவர் அடித்து கொலை செய்யப்பட்டுள்ளார்.
இருவருக்கிடையே காணப்பட்ட முற்பகை காரணமாக நேற்று (19.06.2024) இரவு மது போதையில் கொலை செய்யப்பட்டவருக்கும் கொலை சந்தேக நபருக்கும் இடையே வாய்த்தர்க்கம் ஏற்பட்டுள்ளது.
அதன் பின்னர் அவரின் வீட்டுக்கு முன்னால் உள்ள வீதியில் இருவர் கொண்ட குழுவால் அவர் அடித்து கொலை செய்யப்பட்டுள்ளதாக தெரிவிக்கப்படுகிறது.
இதன்போது நெடுந்தீவு 07ஆம் வட்டாரத்தைச் சேர்ந்த சமக்கீன் தேவராஜ் அருள்ராஜ் (வயது 23) என்பவரே அடி காயங்களுடன் குறித்த பகுதியில் சடலமாக இன்று (20) அதிகாலை மீட்கப்பட்டு நெடுந்தீவு வைத்தியசாலைக்கு கொண்டு செல்லப்பட்டதாக கூறப்படுகின்றது.
கொலையுடன் சம்பந்தப்பட்டவர்கள் என சந்தேகிக்கப்படும் சந்தேக நபர்கள் இருவரும் தலைமறைவாகியுள்ளதாக தகவல்கள் தெரிவிக்கின்றன.
இந்நிலையில் கொலை செய்யப்பட்டவரின் சடலம் தற்போது நெடுந்தீவு ஆதார வைத்தியசாலையில் வைக்கப்பட்டுள்ளதோடு, சம்பவம் தொடர்பான மேலதிக விசாரணைகளை நெடுந்தீவு பொலிஸார் மேற்கொண்டு வருகின்றனர்.
பேராதனை, போவல பிரதேசத்தில் அடர்ந்த காட்டுப்பகுதியில் பாரியளவிலான கசிப்பு காய்ச்சிவந்த தாய் மற்றும் மகளை கண்டி பிரதேச ஊழல் ஒழிப்பு பிரிவின் அதிகாரிகள் குழுவொன்று சுற்றிவளைத்துள்ளது.
இதன்போது 200 கசிப்பு போத்தல்கள் மற்றும் 1250 லீற்றர் கோடாவுடன் இருவரையும் கைது செய்துள்ளனர்.
இவ்வாறு கைது செய்யப்பட்ட 48 வயதுடைய தாயும் அவரது 26 வயது மகளும் கசிப்பு கடத்தல் தொடர்பில் இதற்கு முன்னரும் பல தடவைகள் கைது செய்யப்பட்டுள்ளதாக பொலிஸார் தெரிவிக்கின்றனர்.
பொலிஸார் அடிக்கடி சோதனைகளை மேற்கொள்வதால் பேராதனை போவல பேருந்து வீதியில் இருந்து சுமார் 1 1/2 கிலோமீற்றர் தூரத்தில் உள்ள காட்டுப்பகுதியில் கசிப்பு காய்ச்சல்களை நடத்தி வந்துள்ளனர்.
கண்டி பிரதேச சிரேஷ்ட பொலிஸ் அத்தியட்சகர் அனுருத்த பண்டாரநாயக்கவின் பணிப்புரைக்கமைய, மத்திய மாகாண சிரேஷ்ட பிரதிப் பொலிஸ் மா அதிபர் லலித் பதிநாயக்கவின் மேற்பார்வையில் பிரதேச ஊழல் ஒழிப்புப் பிரிவின் நிலையத் தளபதி பிரதான பொலிஸ் பரிசோதகர் திலக் சமரநாயக்க உள்ளிட்ட குழுவினர் இந்த சுற்றிவளைப்பை மேற்கொண்டுள்ளனர்.
கண்டி – யாழ்ப்பாணம் ஏ9 வீதியில் மரக்கறி ஏற்றிச் சென்ற லொறியொன்றும் எரிபொருள் தாங்கி ஒன்றும் மோதி விபத்துக்குள்ளானதில் இருவர் படுகாயமடைந்துள்ளனர்.
காயமடைந்த லொறி சாரதி மற்றும் உதவியாளர் யாழ்ப்பாணம் பகுதியைச் சேர்ந்தவர்கள் என பொலிஸார் தெரிவித்துள்ளனர்.
இதன்போது படுகாயமடைந்தவர்கள் வைத்தியசாலைக்கு கொண்டு செல்லப்பட்டுள்ளதாகவும் ஒருவரின் நிலை கவலைக்கிடமாக உள்ளதாகவும் மிஹிந்தலை பொலிஸார் தெரிவித்துள்ளனர்.
மேலதிக விசாரணை
குறித்த விபத்தானது மிஹிந்தலை – பலுகஸ்வெவ பகுதியில் இன்று (20) அதிகாலை 3.00 மணியளவில் இடம்பெற்றுள்ளது.
மரக்கறி லொறியின் சாரதி மற்றும் லொறியின் உதவியாளர் வைத்தியசாலையில் அனுமதிக்கப்பட்டுள்ளதாக பொலிஸார் கூறியுள்ளனர்.
யாழ்ப்பாணம் பகுதியில் இருந்து தம்புள்ளை பொருளாதார நிலையத்திற்கு மரக்கறி ஏற்றிச் சென்ற மரக்கறி லொறியானது வீதியில் நிறுத்தி வைக்கப்பட்டிருந்த எரிபொருள் தாங்கியின் பின்புறம் மோதியதில் மரக்கறி லொறி வீதியில் கவிழ்ந்து விபத்து இடம்பெற்றுள்ளதாக பொலிஸார் சுட்டிக்காட்டியுள்ளனர்.
இந்த விபத்து தொடர்பில் மிஹிந்தலை பொலிஸார் மேலதிக விசாரணைகளை மேற்கொண்டு வருகின்றனர்.
வவுனியா பல்கலைக்கழகத்தின் கல்வி சாரா ஊழியர்கள்
பம்பைமடுவில் உள்ள பல்கலைக்கழக வளாகம் முன்பாக சத்தியாக்கிரக போராட்டத்தை ஆரம்பித்துள்ளனர்.
நாடளாவிய ரீதியில் பல்கலைக்கழக கல்விசாரா ஊழியர்கள் தமது சம்பள முரண்பாட்டை அரசாங்கம் தீர்க்க வேண்டும் என வலியுறுத்தி தொடர்ச்சியாக பணிப் பகிஸ்கரிப்பில் ஈடுபட்டு வரும் நிலையில் நேற்றைய (20.06.2024) தினத்திலிருந்து சத்தியாக்கிரக போராட்டத்தினை முன்னெடுத்துள்ளனர்.
இதற்கு ஆதரவு தெரிவிக்கும் வகையில் வவுனியா பல்கலைக்கழகத்தின் கல்விசாரா ஊழியர்களும் பம்பைமடுவில் அமைந்துள்ள பல்கலைக்கழக வளாகத்திற்கு முன்பாக கொட்டகை அமைத்து சத்தியாக்கிரக போராட்டத்தினை ஆரம்பித்துள்ளனர்.
தங்களது பிரச்சனைகள் உடனடியாக தீர்க்கப்படவேண்டும். அவ்வாறு தீர்க்கப்படாத பட்சத்தில் குறித்த போராட்டம் தொடர்ந்து செல்லும் என்று தெரிவித்த போராட்டகாறர்கள், ஊழியர்களின் சம்பள முரண்பாட்டை தீர்த்து வை, கொடுப்பனவை அதிகரி, போன்ற வாசகங்கள் எழுதப்பட்ட பதாதைகளையும் ஏந்தியிருந்தனர்.
இந்தியாவில் மகாராஷ்டிரா மாநிலம் சத்ரபதி சம்பாஜி நகரில் 300 அடி பள்ளத்தில் கார் ஒன்று விழுந்து விபத்துக்குள்ளானதில் சம்பவ இடத்திலேயே பெண்ணொருவர் உயிரிழந்துள்ளார்.
இந்த விபத்துச் சம்பவமானது நேற்று (18.06.2024) மதியம் இடம்பெற்றுள்ளது. விபத்தில், மகாராஷ்டிரா மாநிலம் சுளிபஞ்சன் பகுதியை சேர்ந்த 23 வயதான ஸ்வேதா சர்வசே என்ற பெண்ணே உயிரிழந்துள்ளார்.
குறித்த பெண் அவரது நண்பனிடம் தான் கார் ஓட்டுவதை வீடியோ எடுக்குமாறு கூறி, ரிவர்ஸ் எடுக்க முயன்ற போது திடீரென பிரேக் அழுத்துவதற்கு பதிலாக ஆக்சிலரேட்டரை அழுத்தியதால் கார் மிக வேகமாக பின்னோக்கி சென்று தடுப்புகளை உடைத்து 300 அடி பள்ளத்தில் விழுந்தது விபத்துக்குள்ளாகியுள்ளது.
பூமியின் மேற்பரப்பை விட பூமியின் உட்புறம் மெதுவாக சுழல்வதாக தென் கலிபோர்னியா பல்கலைக்கழகம் (University of Southern California) ஆய்வின் மூலம் கண்டுபிடித்துள்ளது.
இது பூமியில் குறிப்பிடத்தக்க மாற்றங்களை ஏற்படுத்தும் என்பதால் நிலநடுக்கங்கள் அதிகரிக்கும் என்பதோடு காலநிலை மாற்றங்கள் ஏற்படக்கூடும் எனவும் விஞ்ஞானிகள் எச்சரிக்கை விடுத்துள்ளனர்.
மேலும், இது மணித்தியாலம், நாட்கள் மற்றும் வாரங்களில் சிறிதளவான நீட்டிப்புகளை ஏற்படுத்தும் எனவும் தெரிவிக்கப்படுகின்றது.
பூமியின் காந்தப்புலத்தை உருவாக்கும் திரவ வெளிப்புற மையத்தில் ஏற்பட்ட கொந்தளிப்பு மற்றும் அடர்த்தியான பூமியின் பகுதிகளிலுள்ள பாறை மேடுகளின் ஈர்ப்பு விசையாலேயே பூமியின் உட்புறம் மெதுவாக சுழல்வதாக விஞ்ஞானிகள் கண்டுபிடித்துள்ளனர்.
அத்துடன், 2010ஆம் ஆண்டளவில் பூமியின் உட்புறம் அதன் மேற்பரப்பை விட வேகத்தை குறைக்க தொடங்கியுள்ளதாக ஆய்வின் மூலம் தெரியவந்துள்ளது.
பூமிக்கு கீழ் 4,800 கி.மீ ஆழத்தில் அதிக வெப்பமும் அதிக அடர்த்தியும் நிறைந்த இரும்பு மற்றும் நிக்கல் கலந்த கோளம் ஒன்று சுழன்று கொண்டிருக்கின்றது.
பூமியின் இந்த மாற்றத்தினால் இவற்றில் பாதிப்புக்கள் ஏற்படலாம் எனவும் ஆய்வில் தெரியவந்துள்ளது.
தைவானில் பட்டம் விடும் திருவிழா ஒன்று கோலாகலமாக நடத்தப்பட்டுள்ளது. இந்த திருவிழாவின்போது, அங்கிருந்த அனைவரும் ராட்சத பட்டம் ஒன்றை, பறக்க வைக்க முயற்சி செய்துள்ளனர்.
குறித்த ராட்சத பட்டம் வானில் பறக்கும்போது, அதன் வாலை பிடித்துக் கொண்டிருந்த 3 வயது சிறுமியும், மேலே பறந்துள்ளார். இதைக்கண்டு அங்கிருந்த பலரும், கடும் அதிர்ச்சியடைந்துள்ளனர். பின்னர், காற்றின் வேகம் சீரான பிறகு, அந்த சிறுமி மீண்டும் கீழே வந்தார்.
இதையடுத்து, அந்த சிறுமியை, அங்கிருந்த வைத்தியர்கள் பரிசோதனை செய்தனர். ஆனால், அதிர்ஷ்டவசமாக அந்த சிறுமிக்கு சிறுகாயங்கள் மட்டுமே ஏற்பட்டது.
இதனைத்தொடர்ந்து, விழா ஏற்பாட்டாளர்கள், அந்த பட்டம் விடும் திருவிழாவை உடனடியாக நிறுத்தியுள்ளனர்.
இச் சம்பவம் மூன்று ஆண்டுகளுக்கு முன்பு நடந்தபோதிலும், தற்போது இணையத்தில் மீண்டும் வைரலாகி வருகிறது.
