அமைச்சர்கள் மூவர் இடைநீக்கம் ..

இந்திய பிரதமர் நரேந்திர மோடியை விமர்சனம் செய்த மாலைதீவைச் சேர்ந்த அமைச்சர்கள் மூவர் இடைநீக்கம் செய்யப்பட்டுள்ளதாக கூறப்படுகின்றது. இந்திய பிரதமர் நரேந்திர மோடி, அண்மையில் லட்சத்தீவுக்கு பயணம் மேற்கொண்ட SNORE KILLING எனப்படும் ஆழ்கடல் நீச்சலுக்கான உடையில் இருந்த புகைப்படங்களை சமூக வலைதளத்தில் பதிவிட்டிருந்தார்.

பிரதமர் வெளியிட்ட புகைப்படங்கள் இணையத்தில் வைரலாகி வருவதோடு மாலைதீவுக்குப் பதிலாக லட்சத்தீவைப் பரிந்துரைக்கும் விதத்திலும் அமைந்தன. இதையடுத்து மாலைதீவு அமைச்சர்களான மரியம் ஷியுனா, மல்ஷா மற்றும் ஹசன் ஜிஹான் ஆகியோர் பிரதமர் மோடியை கடுமையாக விமர்சித்து சமூக வலைதளங்களில் பதிவிட்டனர்.

அமைச்சர்களின் கருத்துக்கள் பெரும் பரபரப்பை ஏற்படுத்தியிருந்த நிலையில்,மாலைதீவு அரசாங்கம் குறித்த அமைச்சர்கள் மூவரையும் இடைநீக்கம் செய்து உத்தரவிட்டிருந்தது. அதோடு அது தொடர்பில் வெளியிட்ட அறிக்கையில், வெளிநாட்டு தலைவர்கள் மற்றும் உயர்மட்ட நபர்களுக்கு எதிராக சமூக வலைத்தளங்களில் தரக்குறைவான கருத்துக்கள் பதிவேற்றப்பட்டு இருப்பது அரசின் கவனத்துக்கு வந்துள்ளது.

இந்த கருத்துகள் தனிப்பட்டவை. அவை மாலைதீவு அரசாங்கத்தின் கருத்துகளைப் பிரதிநிதித்துவப் படுத்துவதில்லை. இதுபோன்ற தரக்குறைவான கருத்துகளை கூறுபவர்கள் மீது நடவடிக்கை எடுக்க அதிகாரிகள் தயங்க மாட்டார்கள் என தெரிவிக்கப்பட்டுள்ளது.

அதேவேளை மாலைதீவு அமைச்சர்களின் செயலுக்கு கண்டனம் தெரிவித்து, மாலத்தீவுக்கு சுற்றுலா செல்ல திட்டமிட்டிருந்த இந்தியாவைச் சேர்ந்த பிரபலங்கள் உள்ளிட்ட பலரும் தமது பயணத்தை இரத்து செய்துள்ளனர்.அத்துடன் Boycott maldives என்ற ஹேஷ்டேக்கும் இணையங்களில் தற்போது டிரென்டாகி வருகின்றமை குறிப்பிடத்தக்கது.

கேரள மாநிலத்தில்..

சிறுமியின் தங்க வளையலை தூக்கிச்சென்று காகமொன்று கூடு கட்டிய சம்பவமொன்று இடம்பெற்றுள்ளது. கேரள மாநிலம் கோழிக்கோடு காப்பட் பகுதியை சேர்ந்த தம்பதியினர் நசீர் மற்றும் ஷரீப, திருமண நிகழ்வொன்றுக்கு சென்றுள்ளனர். அதன் போது அவரது சிறிய மகளையும் தங்க நகைகள் அணிவித்து அழைத்துச் சென்றுள்ளனர்.

திருமணம் முடிந்து மீண்டும் வீடு திரும்பிய பின்னர் சிறுமி தங்க வளையலை கழற்றி கடதாசியில் சுற்றி வீட்டில ஓர் இடத்தில் வைத்துள்ளார். மீண்டும் ஒருநாள் அவர்கள் உறவினர் வீட்டுக்குச் செல்லும் சிறுமியின் வளையலை தேடிப்பார்த்த போது அது மாயமாகியிருப்பது தெரியவந்துள்ளது.

அதையடுத்து அவர்கள் பாத்திமா நகையை கழற்றி வைத்த இடம் உட்பட வீட்டில் அனைத்து இடங்களிலும் தேடிப்பார்த்தனர். ஆனால் எங்கு தேடியும் நகைகள் கிடைக்கவில்லை. இதனால் அவர்கள் பதற்றமடைந்தனர். அவரும், பையின் மீது வைத்ததாக கூறினார்.

ஆனால், அந்த இடத்தில் பார்த்த போது வளையல் இல்லாததால் அவர்கள் வேதனையடைந்தனர். இந்நிலையில், அவர்களின் உறவினர்கள் காகம் ஒன்று பிளாஸ்டிக் வளையல் மற்றும் சிறு குச்சி போன்றவற்றை தூக்கி சென்றதை பார்த்துள்ளனர்.

அதனால், தங்களது தங்க வளையலையும் தூக்கிச் சென்றிருக்கக்கூடும் என்ற சந்தேகம் அவர்களுக்கு எழுந்தது, இதன்பின்னர், சிறுமியின் உறவினர் காகம் கூடு கட்டி வைத்திருந்த தென்னை மரத்தில் ஏறி பார்த்தனர். அப்போது சிறுமியின் தங்க வளையல் இருந்தது, அவர் அதனை எடுத்து சிறுமியின் தாயிடம் கொடுத்துள்ளார்.

நெல்லையில்..

நெல்லை மாவட்டம் பாளையங்கோட்டையில் வசித்து வருபவர் நாகராஜன். இவர் தனியார் நிறுவனங்களில் ஊழியரான இவரின் மனைவி பெயர் மாரியம்மாள். இவர்களின் மகன்கள் நரேன், சுர்ஜித். இவர்கள் இருவரும் அருகில் உள்ள தனியார் பள்ளியில் படித்து வந்தனர். இதில் நரேன் 9ம் வகுப்பு படித்து வந்தார் டிசம்பர் 4 ம் தேதி காலையில் நரேன் பள்ளிக்கு செல்லாமல் வீட்டில் இருந்தார். சுர்ஜித் மட்டும் பள்ளிக்கு சென்று இருந்தார்.

பள்ளி முடிந்ததும் மாரியம்மாள் மாலையில் சுர்ஜித்தை அழைத்து வருவதற்காக பள்ளிக்கு சென்றார். வீட்டிற்கு வந்து பார்த்தபோது வீடு உள்பக்கமாக பூட்டி இருந்தது.மாரியம்மாள் நீண்ட நேரமாக கதவை தட்டியும் நரேன் திறக்கவில்லை. உடனே அங்கு வந்த நாகராஜன், அக்கம்பக்கத்தினர் உதவியுடன் கதவை உடைத்து பார்த்த போது நரேன் தூக்கில் பிணமாக தொங்கியதைப் பார்த்து அதிர்ச்சி அடைந்த பெற்றோர் கதறி அழுதனர்.

இது குறித்து காவல்துறைக்கு தகவல் தெரிவிக்கப்பட்டதும் உடனே போலீசார் சம்பவ இடத்துக்கு விரைந்து சென்று, உயிரிழந்த நரேனின் உடலைக் கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு மருத்துவமனைக்கு அனுப்பி வைத்தனர். இச்சம்பவம் குறித்து வழக்குப்பதிவு செய்து விசாரணை நடத்தினர்.இந்நிலையில் நரேனின் பெற்றோர், உறவினர்கள், பொதுமக்கள் பள்ளிக்கூடத்தின் முன்பு சாலையில் மறியலில் ஈடுபட்டனர்.

இதனால் அப்பகுதியில் கடும் போக்குவரத்து நெரிசல் ஏற்பட்டது. இதையடுத்து மறியலை கைவிட்டவர்கள், பள்ளிக்கூடத்தை முற்றுகையிட்டு கோஷம் எழுப்பினர். மாணவன் நரேனின் பெற்றோர் “பொருளாதார சூழ்நிலையால் நரேனுக்கு டிசம்பரில் செலுத்த வேண்டிய கல்வி கட்டணத்தை செலுத்த முடியவில்லை. இதுகுறித்து நாங்கள் பள்ளி ஆசிரியர், முதல்வரிடம் தெரிவித்துவிட்டோம். அவர்கள் தொடர்ந்து கட்டணத்தை செலுத்துமாறு வலியுறுத்தினர்.

அரையாண்டு விடுமுறைக்கு பிறகு ஜனவர் 2ம் தேதி பள்ளிக்கு சென்ற நரேனிடம், கல்வி கட்டணத்தை செலுத்தும் படி வலியுறுத்தியுள்ளனர். இதனால் மிகுந்த மன அழுத்தத்திற்கு ஆளான நரேன் நேற்று முன்தினம் பள்ளிக்கு செல்லவில்லை. மாலையில் வீட்டில் தனியாக இருந்தபோது தூக்கிட்டு தற்கொலை செய்து கொண்டான்.

அவன் உயிரிழப்புக்கு பள்ளி நிர்வாகம்தான் காரணம். பள்ளி ஆசிரியர், முதல்வர் மீது வழக்குப்பதிவு செய்ய வேண்டும். அதுவரை உடலை வாங்க மாட்டோம்” என தெரிவித்துள்ளார். இது குறித்து நெல்லை மாவட்ட கல்வி அலுவலர் தனியார் பள்ளி நிர்வாகத்திடம், நரேனின் பெற்றோரிடமும் தீவிர விசாரணை நடத்தப்பட்டது.

கன்னியாகுமரியில்..

வரதட்சணை கேட்டு காதல் மனைவியை காரில் இழுத்துச் சென்ற சம்பவம் பெரும் அதிர்ச்சியை ஏற்படுத்தியுள்ளது.கன்னியாகுமரி மாவட்டம் திருவட்டார் அருகே உள்ள அமந்தகரை பகுதியை சேர்ந்தவர் அபிஷா. முடார் பகுதியைச் சேர்ந்தவர் பெர்லின். இருவரும் காதலித்து வந்தனர். இந்த காதலுக்கு இருவரது வீட்டிலும் கடும் எதிர்ப்பு கிளம்பியது. ஆனால், குடும்பத்தை சமாதானம் செய்த அபிஷா, 2021ல் பெர்லினில் திருமணம் செய்து கொண்டார்.

அபிஷாவின் தந்தை, மகளின் திருமணத்தின் போது, ​​மகளுக்கு ரூ.50 சவரன் நகை மற்றும் ரூ.9 லட்சம் மதிப்புள்ள சொகுசு காரை பரிசாக அளித்துள்ளார்.இந்த தம்பதிக்கு ஒன்றரை வயதில் பெண் குழந்தை உள்ளது. ஓவியராக இருக்கும் பெர்லின் முழு நேர வேலை இல்லாமல் இருந்துள்ளார். அதுமட்டுமின்றி, நண்பர்களுடன் ஊர் சுற்றியிருக்கிறார்.

மேலும், அபிஷாவை வரதட்சணை கேட்டு கொடுமைப்படுத்தியதாக கூறப்படுகிறது. ஒரு கட்டத்தில் கணவரின் கொடுமையை தாங்க முடியாத அபிஷா, அவரை பிரிந்து சென்று விட்டதாக தெரிகிறது. இவர் அதே பகுதியில் உள்ள கல்லூரியில் உதவி பேராசிரியராக சேர்ந்தார். இந்நிலையில், அபிஷா கடந்த 3ம் தேதி மாலை பணி முடிந்து வீடு திரும்பிக் கொண்டிருந்தார்.

அப்போது, ​​அவ்வழியாக காரில் வந்த பெர்லின் அவரை வழிமறித்து தாக்கினார். மேலும், அவர் தனது மனைவியை காரில் இழுத்துச் சென்றார். இதனால் அபிஷா அலறி துடித்தார். இதை பார்த்த அப்பகுதியில் நின்றவர்கள் அதிர்ச்சி அடைந்தனர். மேலும், சில வாலிபர்கள் காரை துரத்திச் சென்றனர்.

உடனே மனைவியை காரில் இருந்து கீழே தள்ளிவிட்டு ஓடினார். இதில் அபிஷா கீழே விழுந்து சிறு காயம் அடைந்தார். பொதுமக்கள் அவரை மீட்டு சிகிச்சைக்காக மருத்துவமனைக்கு அனுப்பி வைத்தனர். இந்த சம்பவம் குறித்து அபிஷாவின் தந்தை திருவட்டார் காவல் நிலையத்தில் புகார் அளித்துள்ளார். போலீசார் வழக்கு பதிவு செய்து விசாரணை நடத்தி வருகின்றனர். இந்த சம்பவம் பெரும் பரபரப்பை ஏற்படுத்தியுள்ளது.

நீலகிரியில்..

கல்லூரி விடுமுறைக்கு வீட்டிற்கு வந்த மருத்துவ மாணவி தற்கொலை செய்து கொண்ட சம்பவம் சோகத்தை ஏற்படுத்தியுள்ளது.நீலகிரி மாவட்டம் கோத்தகிரி ராம்சந்த் கல்பனா காட்டேஜ் பகுதியை சேர்ந்தவர்கள் கணேசமூர்த்தி-மல்லிகா தம்பதி. கணேசமூர்த்தி அரவேணு பகுதியில் உள்ள தனியார் நிறுவனத்தில் வேலை பார்த்து வருகிறார். இவர்களுக்கு சந்தியா (25), ஸ்ரீநிதி (21) என்ற இரு மகள்கள் உள்ளனர்.

கோவையில் ஸ்ரீநிதி தனியார் மருத்துவக் கல்லூரியில் இரண்டாம் ஆண்டு படித்து வருகிறார். இந்நிலையில் ஸ்ரீநிதி கடந்த 10 நாட்களுக்கு முன்பு விடுமுறையில் சொந்த ஊரான கோத்தகிரிக்கு வந்துள்ளார்.

இதையடுத்து இன்று காலை ஸ்ரீநிதியின் பெற்றோர் இருவரும் வேலைக்குச் சென்றிருந்த நிலையில், ஸ்ரீநிதி மட்டும் வீட்டில் இருந்துள்ளார். மதியம் ஸ்ரீநிதியின் தந்தை கணேசமூர்த்தி ஸ்ரீநிதிக்கு போன் செய்ததாக கூறப்படுகிறது.

நீண்ட நேரமாக போன் செய்தும் பதில் வராததால், மகள் வீட்டில் இருக்கிறாரா என அக்கம் பக்கத்தினருக்கு போன் செய்தார். அக்கம் பக்கத்தினர் சென்று பார்த்தபோது, ​​நீண்ட நேரமாகியும் கதவு திறக்கப்படாததால், வீட்டின் கதவு உள்பக்கமாக பூட்டப்பட்டிருந்ததால், வீட்டின் ஜன்னல் வழியாக அங்கிருந்தவர்கள் பார்த்தனர்.

அப்போது, ​​ஸ்ரீநிதி வீட்டின் அறையில் துப்பட்டாவில் தூக்கு போட்டு தற்கொலை செய்துகொண்டதை கண்டு அதிர்ச்சியடைந்த அக்கம் பக்கத்தினர், உடனடியாக பெற்றோருக்கு தகவல் தெரிவித்தார்.

இதற்கிடையே கோத்தகிரி இன்ஸ்பெக்டர் வேல்முருகன், சப்-இன்ஸ்பெக்டர் ரவிச்சந்திரன் மற்றும் போலீசார் சம்பவ இடத்திற்கு சென்று ஸ்ரீநிதியின் உடலை கைப்பற்றி பிரேத பரிசோதனைக்காக கோத்தகிரி அரசு மருத்துவமனைக்கு அனுப்பி வைத்தனர்.

பின்னர், வீட்டில் இருந்து கைப்பற்றப்பட்ட கடிதத்தின் அடிப்படையில் காவல் துறையினர் விசாரணை நடத்தி வருகின்றனர். விடுமுறையில் வீட்டுக்கு வந்த மருத்துவ மாணவி தூக்கிட்டு தற்கொலை செய்து கொண்ட சம்பவம் அப்பகுதியில் சோகத்தை ஏற்படுத்தியுள்ளது.

பெங்களூருவில்..

கர்நாடக மாநிலம் பெங்களூருவை சேந்தவர் தம்மையா. இவர் பெங்களூரு – மைசூர் தேசிய நெடுஞ்சாலையில் உள்ள தனியார் சுங்கச்சாவடி நிறுவனத்தில் செக்யூரிட்டியாக பணியாற்றி வருகிறார். இதன் காரணமாக இவர் லைசென்சுடன் துப்பாக்கி வைத்துள்ளார்.

இவரது மகன் விஷ்ணு உத்தப்பா, முதலாம் ஆண்டு இன்ஜினியரிங் படித்து வருகிறார். இந்நிலையில், படிப்பு தொடர்பாக விஷ்ணுவுக்கும், அவரது தாயாருக்கும் இடையே கடந்த 3ம் தேதி வாக்குவாதம் ஏற்பட்டுள்ளது. இதில் விஷ்ணுவை, தாய் கடுமையாக திட்டியதாக தெரிகிறது.

இதனால் அவர் மனமுடைந்து காணப்பட்டார். இந்நிலையில், நேற்று தம்மையா, அவரது மனைவி இருவரும் வெளியே சென்றதாக தெரிகிறது. வீட்டில் தனியாக இருந்த விஷ்ணு, தந்தையின் துப்பாக்கியை எடுத்து தன்னைத்தானே நெஞ்சில் சுட்டுக்கொண்டு இறந்தார். இன்று பிற்பகல் வீடு திரும்பிய தம்மையாவும், அவரது மனைவியும் மகன் இறந்துகிடப்பதை கண்டு அதிர்ச்சியடைந்தனர்.

உடனடியாக இதுகுறித்து பெங்களூரு காவல் துறைக்கு தகவல் தெரிவிக்கப்பட்டது. சம்பவ இடத்திற்கு விரைந்து சென்ற போலீஸார், விஷ்ணுவின் சடலத்தை கைப்பற்றி பிரேத பரிசோதனைக்காக அனுப்பி வைத்தனர்.

தொடர்ந்து, இதுதொடர்பாக வழக்குப் பதிவு செய்த போலீஸார் விசாரணை நடத்தி வருகின்றனர். விஷ்ணு சுட்டுக்கொண்ட துப்பாக்கியையும் மீட்டுள்ளனர். இந்த சம்பவம் பெங்களூருவில் பெரும் பரபரப்பை ஏற்படுத்தியுள்ளது.

ராணிப்பேட்டையில்..

ராணிப்பேட்டை மாவட்டம் மக்கட்டா அருகே உள்ள மரிஷியூர் பகுதியை சேர்ந்தவர் சத்தியமூர்த்தி. இவரது மனைவி விமலேஸ்வரி. இவர்களுக்கு இரண்டு மகன்கள் மற்றும் ஒரு மகள் உள்ளனர். இளைய மகள் பிரியங்கா (23) வேலூரில் உள்ள தனியார் மருத்துவமனையில் செவிலியராக பணிபுரிந்து வந்தார்.

இந்நிலையில் கடந்த 3ம் தேதி காலை கோபமாக வீட்டில் இருந்து வெளியே வந்த பிரியங்கா வீடு திரும்பவில்லை எனக் கூறப்படுகிறது. இதனால் அதிர்ச்சியடைந்த அவரது பெற்றோர் பல இடங்களில் தேடினர். அப்போது பிரியங்காவின் காலணிகள் ஊருக்கு அருகில் உள்ள விவசாயி கிணறு அருகே கண்டெடுக்கப்பட்டுள்ளன.

இதனால் சந்தேகமடைந்த பிரியங்காவின் பெற்றோர் தீயணைப்பு துறைக்கு தகவல் தெரிவித்தனர். தகவலின் பேரில் சம்பவ இடத்திற்கு விரைந்து வந்த தீயணைப்பு வீரர்கள் கிணற்றில் தேடும் பணியில் ஈடுபட்டனர்.

நீண்ட நேரம் தேடியும் பிரியங்காவை காணாததால் தீயணைப்பு துறையினரும் அங்கிருந்து கலைந்து சென்றனர். பிரியங்காவின் உறவினர்களும் தேடுதல் வேட்டையை கைவிட்டனர்.பிரியங்கா காணாமல் போன மூன்றாவது நாளான இன்று, விடியற்காலையில் பிரியங்காவின் தாத்தா கிணற்றைப் பார்த்துள்ளார்.

அப்போது பிரியங்காவின் சடலம் மிதப்பதை கண்டு அதிர்ச்சியடைந்தார். இந்த சம்பவம் குறித்து உடனடியாக போலீசாருக்கு தகவல் தெரிவிக்கப்பட்டது. தகவலறிந்து சம்பவ இடத்திற்கு வந்த போலீசார் பிரியங்காவின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.