நாடாளுமன்ற உறுப்பினர் ராமநாதன் அர்ச்சுனா, சபைக்கு அணிந்து வந்திருந்த ஆடை தொடர்பில் வன்னி மாவட்ட பாராளுமன்ற உறுப்பினர் ஜெகதீஸ்வரன் சபையில் ஒழுங்குப் பிரச்சினையை எழுப்பிபோது ஆடையைக் கழற்றிக் காண்பிக்கவா என அர்ச்சுனா எம்பி அநாகரீகமாக பதிலளித்துள்ளமை விசனத்தை ஏற்படுத்தியுள்ளது.
இந்தச் சம்பவம் நாடாளுமன்றத்தில் இன்று (ஜூலை 9) சலசலப்பை ஏற்படுத்தியது. உறுப்பினர் ஜெகதீஸ்வரன் எழுப்பிய பிரச்சினைக்கு உடனடியாகப் பதிலளித்த அர்ச்சுனா எம்.பி., தான் அணிந்து வந்திருக்கும் ஆடை பாராளுமன்ற மரபுகளுக்கு உட்பட்டதுதான் என்று வாதிட்டார்.
ஆவேசமாகப் பேசிய அவர், “நான் பாராளுமன்றத்திற்குப் பொருத்தமான ஆடையையே அணிந்து வந்துள்ளேன். உங்களுக்குச் சந்தேகம் இருந்தால், வேண்டுமென்றால் கழற்றிக் காண்பிக்கவா?” என்று சவால் விடுத்தார்.
இதன்போது தலையிட்ட சபாநாயகர், “ஆடை குறித்த விவாதம் தேவையில்லை, அது ஒரு பிரச்சினையல்ல” என்று தெரிவித்து, அர்ச்சுனா எம்.பி.யை தனது ஒழுங்குப் பிரச்சினையைச் சமர்ப்பிக்க அனுமதித்தார்.
இலங்கைப் பாராளுமன்றத்தின் நடைமுறை விதிகளின்படி, உறுப்பினர்கள் சபைக்கு வரும்போது கண்ணியமான உடைகளை அணிய வேண்டும் என்பது மரபாகும். இருப்பினும், ‘கண்ணியமான உடை’ என்பது குறித்த வரைவிலக்கணம் அவ்வப்போது விவாதங்களுக்கு உள்ளாகி வருகின்றமை குறிப்பிடத்தக்கது.
இலங்கையை பிறப்பிடமாகக் கொண்ட பேராசிரியர் நிஷான் கனகராஜா, பிரித்தானியாவின் அதி உயர் பட்டங்களில் ஒன்றான நைட்வுட் பட்டம் வழங்கி கௌரவிக்கப்பட்டுள்ளார்.
பேராசிரியர் நிஷான் கனகராஜா லண்டன் லெஸ்டர் பல்கலைக்கழகத்தின் துணைவேந்தராக கடமையாற்றி வருகின்றார் என்பது குறிப்பிடத்தக்கது. பிரித்தானிய மன்னர் மூன்றாம் சார்லஸ், நிஷான் கனகராஜாவிற்கு ‘நைட்ஹூட்’ (Knight) பட்டமளித்து கௌரவித்துள்ளார்.
வின்ட்சர் மாளிகையில் நடைபெற்ற முதலீட்டு விழாவில் இந்த உயரிய விருது அவருக்கு வழங்கப்பட்டது. இதன் மூலம் அவர் இனி “பேராசிரியர் சர் நிஷான் கனகராஜா” என்று அழைக்கப்படுவார்.
உயர்கல்வித் துறைக்கு அவர் ஆற்றிய அளப்பரிய பங்களிப்பிற்காகவும், குறிப்பாகக் கல்வியில் அனைவரையும் உள்ளடக்கும் கொள்கையை முன்னெடுத்ததற்காகவும், 2026 ஆம் ஆண்டிற்கான மன்னரின் புத்தாண்டு கௌரவப் பட்டியலில் அவர் இந்த விருதுக்குத் தேர்வு செய்யப்பட்டிருந்தார்.
இலங்கையில் பிறந்து தனது ஆரம்பக் கல்வியை முடித்த பேராசிரியர் நிஷான் கனகராஜா, பின்னர் உயர்கல்விக்காக ஐக்கிய இராச்சியத்திற்கு குடிபெயர்ந்தார்.
கேம்பிரிட்ஜ் பல்கலைக்கழகத்தில் 1989 இல் இளங்கலை பட்டமும், 1993 இல் முனைவர் பட்டமும் பெற்றார்.
மன்னரிடமிருந்து விருதைப் பெற்றுக்கொண்ட பின், தனது மனைவி தாபியுடன் வின்ட்சர் கோட்டையில் மகிழ்ச்சியைப் பகிர்ந்து கொண்ட பேராசிரியர் சர் நிஷான் கனகராஜா தனது கருத்தை வெளியிட்டார்.
மன்னர் சார்லஸிடமிருந்து இந்த விருதைப் பெறுவதில் நான் பெருமகிழ்ச்சியும் நன்றியும் அடைகிறேன்.
ஒரு காலத்தில் உள்நாட்டுப் போரால் பாதிக்கப்பட்ட இலங்கை மண்ணிலிருந்து வந்த ஒரு சிறுவன், இன்று அரச குடும்பத்தினரால் கௌரவிக்கப்படும் நிலையை எட்டியிருப்பது ஒரு அசாதாரணமான பயணம் என தெரிவித்துள்ளார்.
கல்வியின் மாற்றும் திறனாலும், அது வழங்கும் வாய்ப்புகளாலுமே இது சாத்தியமானது. அதனால்தான், மற்றவர்களும் தங்களது உண்மையான திறமையை வெளிப்படுத்த தடையாக இருக்கும் சவால்களை அகற்றுவதில் நான் எப்போதும் உறுதியாக இருக்கிறேன் என குறிப்பிட்டுள்ளார்.
தனது வாழ்நாள் முழுவதும் சமூக மாற்றத்திற்கான ஒரு கருவியாகக் கல்வியைப் பயன்படுத்தி வரும் பேராசிரியர் நிஷான் கனகராஜா,
லெஸ்டர் பல்கலைக்கழகத்தின் வரலாற்றில் முதல் சிறுபான்மை இனத்தைச் சேர்ந்த துணைவேந்தர் என்ற பெருமையைப் பெற்றவர் என்பது குறிப்பிடத்தக்கது.
பேராசிரியர் கனகராஜாவின் சிறப்பான நிர்வாகத்தால் லெஸ்டர் பல்கலைக்கழகம் மூன்று முறை ‘ஆண்டின் சிறந்த பல்கலைக்கழகம்’ என்ற பாராட்டைப் பெற்றதோடு, நாட்டின் சிறந்த 30 ஆராய்ச்சிப் பல்கலைக்கழகங்களின் பட்டியலிலும் இடம்பிடித்துள்ளது.
கடந்த 2025 ஆம் ஆண்டில் உயர்கல்வித் துறைக்கான தேசிய அளவிலான அமைப்பான கல்வி நிர்வாகத்திற்கான பல்கலைக்கழக பேரவையின் தலைவராகவும் அவர் பொறுப்பு வகித்துள்ளார் என்பது குறிப்பிடத்தக்கது.
உலக சந்தையில் கச்சா எண்ணெய் விலை மீண்டும் அதிகரித்துள்ளதாக தகவல்கள் தெரிவிக்கின்றன.
இதற்கமைய, இன்று (09.07.2026) காலை 6 மணி நிலவரப்படி WTI ரக கச்சா எண்ணெய் பீப்பாய் ஒன்றின் விலை 74.28 அமெரிக்க டொலர்கள் வரை அதிகரித்துள்ளது. அத்துடன் இது 1.03 சதவீத அதிகரிப்பாகும் என தெரியவருகிறது.
அதேவேளை, பிரெண்ட் ரக கச்சா எண்ணெய் பீப்பாய் ஒன்றின் விலை 78.81 டொலர்கள் வரை அதிகரித்துள்ளதுடன், இது 1.01 சதவீத உயர்வாகப் பதிவாகியுள்ளது.
ஐக்கிய அரபு இராச்சியத்தின் மேர்பன் ரக கச்சா எண்ணெய் பேரல் ஒன்றின் விலை 73.57 டொலர்களாகக் காணப்படுவதுடன், இது 6.67 சதவீத பாரிய விலை உயர்வை பதிவு செய்துள்ளது.
ஈரான் மீது அமெரிக்கா தாக்குதலை நடத்தி வரும் நிலையில் இவ்வாறு மீண்டும் கச்சா எண்ணெய் விலையில் அதிகரிப்பு பதிவாகியுள்ளது.
ஹோர்முஸ் நீரிணையில் அமைந்துள்ள ஈரானின் துறைமுக நகரங்களான சிரிக் மற்றும் பண்டர் அப்பாஸ் உள்ளிட்ட ஈரானின் தெற்குப் பகுதிகளில் தாக்குதல் நடத்தப்பட்டுள்ளதாக தெரிவிக்கப்படுகின்றது.
இந்த நிலைமையானது இலங்கையில் எவ்வித தாக்கத்தை ஏற்படுத்தும் என்பதை பொறுத்திருந்து தான் பார்க்க வேண்டுமென பொருளாதார நிபுணர்கள் தெரிவிக்கின்றனர்.
நாடாளுமன்றத்தில் அர்ச்சுனா இராமநாதனின் இருக்கையை மாற்றக்கோரி நாடாளுமன்ற உறுப்பினர் கஜேந்திரகுமார் பொன்னம்பலம் சபாநாயகரை எழுத்து மூலம் கோரியுள்ளார்.
குறித்த கடிதத்தில் தெரிவிக்கப்பட்டுள்ளதாவது, உங்களுக்கு தெரிந்தபடி, நாடாளுமன்றத்தில் எனக்கு இடதுபுறம் அமர்ந்திருக்கும் நாடாளுமன்ற உறுப்பினர் அர்ச்சுனா இராமநாதன்,
மாவட்ட அபிவிருத்தி கூட்டங்களிலும் சமூக ஊடகங்களிலும் பொதுவெளியில் என்னை தொடர்ந்து தகாத வார்த்தைகளால் திட்டியும், வன்முறை அச்சுறுத்தல் விடுத்தும், இழிவான சொற்களைப் பயன்படுத்தியும் வருகின்றார்.
சமீப காலமாக இந்த நடத்தை எந்த அளவிற்கு மோசமடைந்துள்ளது என்றால், அது என் கவனத்தைச் சிதறடிப்பதால், நாடாளுமன்ற அவையில் அவரை எனக்கு அருகில் அமர வைப்பது எனக்கு இயலாத காரியமாகிவிட்டது.
குறிப்பிட்ட அந்த உறுப்பினர், ஒரு சுயேட்சை குழுவிலிருந்து முதல் முறையாக தேர்ந்தெடுக்கப்பட்ட நாடாளுமன்ற உறுப்பினர் ஆவார்.
பொதுவாக, இத்தகைய உறுப்பினர்களுக்கு அனைத்து மூத்த தலைவர்கள் மற்றும் அங்கீகரிக்கப்பட்ட அரசியல் கட்சிகளின் உறுப்பினர்களுக்கு இருக்கை வழங்கப்படும்.
இருப்பினும், வழக்கமான நடைமுறையை மீறி, குறிப்பிட்ட அந்த நாடாளுமன்ற உறுப்பினர், அங்கீகரிக்கப்பட்ட அரசியல் கட்சி தலைவர்களுக்கும், மூத்த உறுப்பினர்களுக்கும் இடையில் அமர அனுமதிக்கப்பட்டுள்ளார்.
இந்த விடயத்தில் நீங்கள் தலையிட்டு, அங்கீகரிக்கப்பட்ட அரசியல் கட்சி உறுப்பினர்களுக்குப் பிறகு சுயேட்சை நாடாளுமன்ற உறுப்பினர்களை அமர வைக்கும் வழக்கமான நடைமுறைக்கு இணங்க, குறிப்பிட்ட அந்த நாடாளுமன்ற உறுப்பினரை என்னிடமிருந்து இடதுபுறமாக நகர்த்தும்படி கேட்டுக்கொள்கிறேன் என கடிதத்தில் தெரிவிக்கப்பட்டுள்ளது.
கட்டுநாயக்க விமான நிலையத்தில் ஒரு கோடி ரூபாய் பெறுமதியான தங்கப்பொருட்களுடன் ஒருவர் இன்று காலை (9) கைது செய்யப்பட்டுள்ளார்.
சட்டவிரோதமாக அனுமதியின்றி தங்கத்தை நாட்டிற்குள் கொண்டு வந்து, சுங்கத்துறையிடம் அறிவிக்காமல் விமான நிலையத்திலிருந்து வெளியே எடுத்துச்செல்ல முற்பட்ட போது கைது செய்யப்பட்டுள்ளார்.
நேற்று காலை 06.30 மணிக்கு துபாயிலிருந்து புறப்பட்டு இன்று கட்டுநாயக்க விமான நிலையத்திற்கு வந்தடைந்த போது தனது பயணப்பையில் 271 கிராம் மற்றும் 480 மில்லிகிராம் எடையுள்ள 12 தங்கக்கட்டிகள்,
10 கைக்காப்புகள் மற்றும் 02 தங்க பிஸ்கட்டுகளை மறைத்து வைத்திருந்த போது பிடிப்பட்டுள்ளார். விமான நிலைய பொலிஸ் போதைப்பொருள் தடுப்புப்பிரிவின் அதிகாரிகள் குழுவினரால் இன்று (09) கைது செய்யப்பட்டுள்ளார்.
மாத்தளையை சேர்ந்த 53 வயதுடைய தொழிலதிபரே இவ்வாறு கைது செய்யப்பட்டுள்ளார். இதனையடுத்து மேலதிக விசாரணைக்காக தங்கப் பொருட்கள் பறிமுதல் செய்யப்பட்டு, பயணிக்கு அபராதம் விதிக்கப்பட்டுள்ளது.
இலங்கையில் பேஸ்புக் (Facebook) செயற்கை நுண்ணறிவு வலையமைப்பின் ஊடாக (AI) உருவாக்கப்பட்ட பெண்களின் போலி சுயவிபர புகைப்படங்களை பயன்படுத்தி முன்னெடுக்கப்படும் மோசடி தொடர்பில் எச்சரிக்கை விடுக்கப்பட்டுள்ளது.
பயனர்களை மோசடி மற்றும் ஆபாச உரையாடல்களில் சிக்க வைக்கும் செயற்பாடுகள் அதிகரித்துள்ளதாக புதிய ஆய்வு வெளிப்படுத்தியுள்ளது.
உணர்ச்சிப்பூர்வமான மற்றும் பாலியல் ரீதியாகத் தூண்டக்கூடிய உள்ளடக்கங்களின் அடிப்படையில், பயனர்களை வயது வந்தோருக்கான அரட்டை சேவைகள், சூதாட்ட இணையதளங்கள், கிரிப்டோகரன்சி விளம்பரங்கள் மற்றும் பிற சந்தேகத்திற்குரிய இணையதளங்களுக்கு வழிநடத்த இந்த கணக்குகள் பயன்படுத்தப்படுகின்றன.
சிரேஷ்ட ஆய்வாளர் கலாநிதி சஞ்சன ஹத்தொட்டுவ நடத்திய ஆய்வில் இந்த விடயம் தெரியவந்துள்ளது. ஆய்வு செய்யப்பட்ட 10 பேஸ்புக் கணக்குகளில் ஒன்றுகூட உண்மையான பெண்களைக் குறிக்கவில்லை என்பது உறுதி செய்யப்பட்டுள்ளது.
மாறாக, அவை முற்றிலும் செயற்கை நுண்ணறிவால் உருவாக்கப்பட்ட புகைப்படங்களையும் போலி அடையாளங்களையும் சார்ந்திருந்தன. இந்த ஆய்வு, பெப்ரவரி 2025 மற்றும் ஜூன் 2026-க்கு இடையில் பதிவிடப்பட்ட 1,706 ஃபேஸ்புக் பதிவுகளை ஆய்வுக்கு உட்படுத்தியிருந்தது.
இந்த பதிவுகள் சமூக ஊடகங்களில் 890,000-க்கும் மேற்பட்ட பிரதிபலிப்புகளையும் பகிர்வுகளையும் பெற்றிருந்தன.
பெரும்பாலும் சிங்களத்தில் உள்ள இந்த போலி சுயவிவரங்கள், திருமணமாகாத, விவாகரத்து பெற்ற, விதவையான அல்லது பொருளாதார ரீதியாக நலிவடைந்த மற்றும் ஒரு துணையை தேடும் பெண்களாக தங்களை காட்டிக்கொள்ளும் வகையில் உருவாக்கப்பட்டிருந்தன.
அவர்கள், தங்கள் பதிவுளுக்கான கருத்துரையாளர்களைப் பொதுத்தளத்திலலிருந்து வாட்ஸ்அப் போன்ற தனிப்பட்ட தகவல் பரிமாற்றங்களுக்கு திசைதிருப்ப முயன்றுள்ளனர்.
குறைந்தது ஐந்து கணக்குகள் ஒழுங்கமைக்கப்பட்ட முறையில் செயல்படுவதற்கான ஆதாரங்களும் கண்டறியப்பட்டுள்ளன. சில நிமிடங்களுக்குள் பல கணக்குகளில் ஒரே மாதிரியான தலைப்புகளின் 113 தொகுப்புகளும், 676 ஒரே மாதிரியான பதிவுகளும் பகிரப்பட்டிருந்தன.
இது, மையப்படுத்தப்பட்ட கட்டுப்பாட்டில் உள்ள ஒரு வலையமைப்பைக் குறிக்கிறது. இந்தக் கணக்குகள், பேஸ்புக்கின் தணிக்கைக் கட்டுப்பாடுகளை தவிர்ப்பதற்காக,
மிகவும் பகட்டான மற்றும் மிகைப்படுத்தப்பட்ட உடல் அம்சங்களைக் கொண்ட செயற்கைப் புகைப்படங்களைப் பயன்படுத்தியும், பாலியல் ஆர்வத்தை ஈர்த்துத் தூண்டுவதற்காகவும் பரவலாகப் பயன்படுத்தப்பட்டுள்ளன.
பயனர்களை மற்ற மோசடி வலைத்தளங்களுக்குத் திசைதிருப்புவதற்காக இந்தக் கணக்குகள் சுருக்கமான URL-சுட்டிகளைப் பயன்படுத்தியுள்ளன என்று கலாநிதி சஞ்சன ஹத்தொட்டுவ சுட்டிக்காட்டுகிறார்.
மேலும், பேஸ்புக்கிற்கு வெளியே உள்ள மற்ற தளங்களை அணுகும்போது, இந்தக் கணக்குகளுக்குப் பின்னால் உள்ளவர்கள் தங்கள் அடையாளங்களை மாற்றிக்கொள்கின்றனர்.
இதனால், பயனர்கள் தாங்கள் ஒரு உண்மையான நபருடன் பேசுகிறார்களா அல்லது ஒரு வணிக நிறுவனத்துடன் பேசுகிறார்களா என்பதை அடையாளம் காண்பது மிகவும் கடினமாகிறது.
இந்த செயல்பாடுகளுக்குப் பின்னால் எந்த அரசியல் செல்வாக்கும் இல்லை என்றாலும், இது ஏமாற்றுவதன் மூலம் வருமானம் ஈட்டும் ஒரே நோக்கத்துடன் செயல்படும் ஒரு ஒழுங்கமைக்கப்பட்ட வணிக நிறுவனம் என்பதை ஆராய்ச்சியாளர்கள் கண்டறிந்துள்ளனர்.
உண்மையான மனிதர்களை ஈடுபடுத்தாமலேயே, இதுபோன்ற செயற்கை நுண்ணறிவு அடையாளங்களால் சமூகத்தின் நம்பிக்கையைப் பெற முடியும் என்பதால்,
எதிர்காலத்தில் இந்த உள்கட்டமைப்பு நிதி மோசடி அல்லது பிற இணையவழி முறைகேடுகளுக்குப் பயன்படுத்தப்படுவதற்கான அதிக ஆபத்து இருப்பதாக அந்த ஆய்வாளர் எச்சரித்துள்ளார்.
இதுபோன்ற செயற்கை நுண்ணறிவு தொடர்பான உள்ளடக்கத்தையும், அதன் பின்னணியில் உள்ளவர்களையும் கண்டறிய, பேஸ்புக் போன்ற சமூக ஊடகத் தளங்களுக்கு வலுவான வெளிப்படைத்தன்மை,
தகவல்களை வெளியிடுவதற்கான தேவைகள் மற்றும் வெளிப்புற இணைப்புகளைக் கடுமையாகக் கண்காணித்தல் ஆகியவை தேவை என்று அந்த அறிக்கை வலியுறுத்துகிறது.
இன்றைய காலகட்டத்தில் சுற்றுச்சூழல் பாதுகாப்பு குறித்துப் பல்வேறு அமைப்புகள் உலக அளவில் பல போராட்டங்களை நடத்தி வரும் வேளையில்,
இங்கிலாந்தைச் சேர்ந்த இளம்பெண் ஒருவர் நதியின் அவல நிலையை உலகிற்கு உணர்த்துவதற்காக அந்த நதியையே முறைப்படி ‘திருமணம்’ செய்துகொண்டு,
அதன் உரிமைகளுக்காகத் தற்பொழுது புதிய சட்டப் போராட்டத்தைத் தொடங்கியுள்ள விசித்திரச் சம்பவம் சர்வதேச அளவில் பெரும் வியப்பை ஏற்படுத்தியுள்ளது.
காதல் என்பது மனிதர்களுக்கு இடையே மட்டுமே வரும் என்ற பொதுவான சிந்தனையை உடைத்து, இயற்கையின் மீது தனக்கிருந்த எல்லையற்ற காதலை வெளிப்படுத்தியுள்ளார் இங்கிலாந்தைச் சேர்ந்த 28 வயது இளம்பெண்ணான மெக்.
இங்கிலாந்தின் முக்கிய நீர்வழிகளில் ஒன்றான ஏவன் நதியில் சமீபகாலமாகச் சுத்திகரிக்கப்படாத தொழிற்சாலைக் கழிவுகளும், நகரக் கழிவுநீரும் பெருமளவில் கலக்கப்பட்டு வந்தன.
இதனால் அந்த நதி மாசடைந்து, அதன் இயற்கை வளம் முற்றிலும் அழியும் நிலைக்குத் தள்ளப்பட்டது.
நதியின் இந்த அவல நிலையைக் கண்டு வேதனையடைந்த மெக், இந்த சுற்றுச்சூழல் பேரழிவை உலக மக்கள் மற்றும் ஆட்சியாளர்களின் கவனத்திற்குக் கொண்டு செல்ல ஒரு புதுமையான வழியைத் தேர்ந்தெடுத்தார்.
அதன்படி, கடந்த 2023-ஆம் ஆண்டு அந்த ஏவன் நதியையே அவர் முறைப்படி கரம் பிடித்துத் திருமணம் செய்து கொண்டார்.
திருமணத்திற்குப் பிறகு சும்மா இருந்து விடாமல், அந்த நதிக்கானப் பாதுகாப்பைத் தனது வாழ்நாள் கடமையாக மெக் மாற்றிக் கொண்டுள்ளார்.
நதியைத் திருமணம் செய்த நாள் முதல், மெக் தனது அதிகாரப்பூர்வப் பெயரை ‘மெக் ஏவன்’ என்று மாற்றிக் கொண்டார். தன்னை அந்த ஏவன் நதியின் சட்டப்பூர்வ மனைவியாகவே உலகிற்கு முன்னிறுத்தி வரும் அவர்,
தற்போது நதிக்கு மனிதர்களைப் போன்ற தனிநபர் சட்டப்பூர்வ உரிமைகளைப் பெற்றுத் தருவதை நோக்கமாகக் கொண்டு ஒரு புதுமையான இயக்கத்தைத் தொடங்கியுள்ளார்.
ஒரு நதிக்குச் சட்டப்பூர்வ அந்தஸ்து கிடைத்தால் மட்டுமே அதனை மாசுபடுத்துபவர்களுக்கு நீதிமன்றம் மூலம் கடுமையான தண்டனைகளை வழங்க முடியும் என்பதை உணர்ந்த மெக் ஏவன், இதற்காக மேற்கு இங்கிலாந்து பல்கலைக்கழக ஆராய்ச்சியாளர்களுடன் இணைந்து தீவிரமாகப் பணியாற்றி வருகிறார்.
நதியின் தூய்மையைக் காக்க ஒரு பெண் எடுத்துள்ள இந்த விசித்திரமான மற்றும் உணர்வுப்பூர்வமான முயற்சிக்குச் சர்வதேச சுற்றுச்சூழல் ஆர்வலர்கள் பலரும் தங்களது பாராட்டுகளைத் தெரிவித்து வருகின்றனர்.
பிராந்திய அளவிலான சுற்றுச்சூழல் விழிப்புணர்வுப் பேரணிகள் மற்றும் நதிக்கரை பாதுகாப்புப் பிரச்சாரங்களின் போது அசம்பாவிதங்கள் ஏதும் நேராமல் தடுக்கவும், பொதுமக்களின் கூட்டத்தை முறைப்படுத்தவும் இங்கிலாந்து போலீசார் அந்தந்த பகுதிகளில் தகுந்த பாதுகாப்பு முன்னேற்பாடுகளைச் செய்து வருகின்றனர்.
பெங்களூருவில் தனது காதலுக்குப் பெற்றோர் எதிர்ப்பு தெரிவித்ததால் ஏற்பட்ட கடுமையான மன உளைச்சல் காரணமாக, 20 வயது கல்லூரி மாணவி ஒருவர் ஏரியில் குதித்துத் தற்கொலை செய்துகொண்ட நெஞ்சை உலுக்கும் சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.
கர்நாடக மாநிலம் பெங்களூரு சிக்கபானவரா பகுதியைச் சேர்ந்தவர் தேஜூ (20). கல்லூரி மாணவியான இவர் ஒருவரைக் காதலித்து வந்துள்ளார்.
இவர்களது காதல் விவகாரம் வீட்டிற்குத் தெரியவந்ததை அடுத்து, அவரது பெற்றோர் இந்தக் காதலுக்குக் கடுமையான எதிர்ப்பைத் தெரிவித்துள்ளனர்.
இதனால் கடந்த சில நாட்களாகவே தேஜூ மிகுந்த மன உளைச்சலில் இருந்து வந்ததாகக் கூறப்படுகிறது. இந்நிலையில், சம்பவத்தன்று வீட்டை விட்டு வெளியேறிய அவர், தனது காதலனின் வாட்ஸ்அப் எண்ணிற்கு “எனக்கு வாழப் பிடிக்கவில்லை” என்று உருக்கமாக மெசேஜ் ஒன்றை அனுப்பியுள்ளார்.
காதலனுக்கு மெசேஜ் அனுப்பிய சில நிமிடங்களிலேயே, அங்குள்ள புகழ்பெற்ற சாங்கி ஏரியில் குதித்துத் தேஜூ தற்கொலை செய்துகொண்டார்.
மாணவியின் குறுஞ்செய்தியைக் கண்டு அதிர்ச்சியடைந்த காதலனும், குடும்பத்தினரும் தேடிய நிலையில், அவர் ஏரியில் குதித்தது தெரியவந்தது.
இதுகுறித்துத் தகவல் அறிந்து சம்பவ இடத்திற்கு விரைந்து வந்த உள்ளூர் போலீசார் மற்றும் தீயணைப்புப் படையினர், ஏரியில் தீவிரத் தேடுதல் வேட்டை நடத்தி மாணவி தேஜூவின் உடலை மீட்டுப் பிரேதப் பரிசோதனைக்காக அனுப்பி வைத்தனர். இச்சம்பவம் குறித்துப் போலீசார் தற்பொழுது வழக்குப் பதிவு செய்து தீவிர விசாரணை மேற்கொண்டு வருகின்றனர்.
நுவரெலியா பேருந்து நிலையத்திற்கு அருகில், நுவரெலியா கிரெகரி ஏரியை ஒட்டியுள்ள தலகல ஓயாவிற்குள் தனியார் பேருந்து ஒன்று கவிழ்ந்து இன்று (08) விபத்துக்குள்ளாகியுள்ளது.
நுவரெலியாவிலிருந்து நுவரெலியா சாந்திபுர நோக்கி பயணிக்கும் இந்தத் தனியார் பேருந்தை நிறுத்துவதற்கு முற்பட்ட போது, அது சாரதியின் கட்டுப்பாட்டை இழந்து தலகல ஓயாவிற்குள் கவிழ்ந்து இந்த விபத்து நேர்ந்துள்ளது.
பயணிகளை இறக்கிவிட்டு, பஸ்ஸை நிறுத்துமிடத்தை நோக்கி பின்னால் செலுத்திய போதே இந்த விபத்து இடம் பெற்றுள்ளது.
விபத்து நடந்த தருணத்தில் பேருந்திற்குள் சாரதியும் நடத்துநரும் மாத்திரமே இருந்துள்ளதுடன், அவர்களில் எவருக்கும் காயம் ஏற்படவில்லை என நுவரெலியா பொலிஸ் அதிகாரி ஒருவர் தெரிவித்துள்ளார்.
இலங்கையில் தங்கத்தின் விலை இன்று (08) மேலும் குறைவடைந்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.
நேற்று (07) 24 கரட் தங்கம் ஒரு பவுண் 379,000 ரூபாயாக விற்பனை செய்யப்பட்ட நிலையில், இன்று அதன் விலை ரூ.3,000 குறைந்து 376,000 ரூபாயாக பதிவாகியுள்ளது. இன்றைய தங்க விலை நிலவரப்படி,
24 கரட் தங்கம் பவுண் ஒன்று 376,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 346,000 ரூபாயாகவும், விற்பனை செய்யப்படுகிறது.
இதன்படி, 24 கரட் தங்கத்தின் ஒரு கிராமின் விலை 47,000 ரூபாயாகவும், 22 கரட் தங்கத்தின் ஒரு கிராமின் விலை 43,250 ரூபாயாகவும், விற்பனை செய்யப்படுகிறது.
சர்வதேச சந்தையில் ஏற்பட்டுள்ள விலை மாற்றங்களின் தாக்கத்தால், அண்மைய நாட்களாக உள்நாட்டு தங்கத்தின் விலையும் தொடர்ச்சியாக ஏற்ற, இறக்கங்களுடன் பதிவாகி வருகின்றது.
நீர்கொழும்பு சிறைசாலையில் ஏற்பட்ட மோதலில் உயிரிழந்த 7 சிறை அதிகாரிகளின் உடலங்கள் வெலிகடை சிறைசாலையில் இன்று வைக்கப்பட்ட நிலையில், கண்கலங்க வைத்த புகைப்படங்கள் வெளியாகியுள்ளது.
உயிரிழந்த சிறை அதிகார்காளின் உறவினர்கள் மற்றும் , உடன் வேலை செய்தூர் கதறி அழுத சம்பவம் பார்ப்பவர்களை கலங்க வைத்துள்ளது.
கடந்த ஞாயிற்று கிழமை , சிறைசாலையில் போதைப்பொருள் மாஃபியாயின் வெறியாட்டத்தில் இரு கைதிகள் குழுக்களுக்கு இடையே சிறியதாகத் தொடங்கிய வாக்குவாதம்,
பின்னர் சிறை அதிகாரிகளால் கட்டுப்படுத்த முடியாத அளவுக்கு நிலைமை மோசமடைந்ததுடன் திங்கட்கிழமை வெடித்த கலவரத்தில் நாடெ அதிர்ச்சியடைந்தது.
நீர்கொழும்பு சிறைசாலை கலவரத்தில் இதுவரை 8 சிறை அதிகாரிகள் உயிரிழந்துள்ளதுடன், அதிகாரிகள், கதிகள் உட்பட 100இற்கும் மேற்பட்டோர் காயமடைந்து மருத்துவமனையில் அனுமதிக்கப்பட்டுள்ளனர்.
இந்த கொடூர சிறைச்சாலை மோதலினால் இதுவரை ஏற்பட்ட மொத்த உயிரிழப்புகளின் எண்ணிக்கை 28 ஆக அதிகரித்துள்ளது.
நீதி மற்றும் தேசிய ஒருமைப்பாட்டுத் துறை அமைச்சர் சட்டத்தரணி ஹர்ஷன நானயக்கார மற்றும் அமைச்சின் செயலாளர் ஜனாதிபதி சட்டத்தரணி ஆயிஷா ஜினசேன ஆகியோர் சிறைச்சாலைக்கு சென்று அஞ்ச்சலி செலுத்தி இருந்தனர்.
இதன்போது அங்கு கூடியிருந்த சக சிறைச்சாலை அதிகாரிகள் சம்பவம் தொடர்பில் தமக்கு நியாயமான விசாரணை நடத்தப்பட்டு, தகுந்த நீதி பெற்றுத்தரப்பட வேண்டும் என கண்ணீர் மல்க நீதி அமைச்சரிடம் உருக்கமான கோரிக்கை விடுத்துள்ளனர்.
அதேவேளை நீர்கொழும்பு சிறைச்சாலையில் வெடித்த வன்முறை , இலங்கை சிறைச்சாலை வரலாற்றையே உலுக்கிய 2012ஆம் ஆண்டு வெலிக்கடை சிறைச்சாலை வன்முறைச் சம்பவத்திற்குப் பின்னர்,
14 ஆண்டுகள் கழித்து மிக மோசமான மற்றும் கொடூரமானதொரு கலவரம் இது என சுட்டிக்காட்டப்பட்டுள்ளது.
பாகிஸ்தானில் பதிவு செய்யப்பட்ட சரக்கு விமானம் ஒன்று காணாமல்போயுள்ளதாக வெளிநாட்டு ஊடகங்கள் செய்தி வெளியிட்டுள்ளன.
ஐக்கிய அரபு அமீரகத்தில் இருந்து கராச்சிக்கு சென்று கொண்டிருந்த, பாகிஸ்தானிய சரக்கு விமானம் நேற்று (செவ்வாய்க்கிழமை) மாலை காணாமல்போனதாக பாகிஸ்தான் விமான நிலைய அதிகாரசபை தெரிவித்துள்ளது.
இந்த விமானத்தில் ஐந்து பேர் இருந்துள்ளதுடன், காணாமல் போன விமானத்தைக் கண்டறிய பல்வேறு அமைப்புகள் மூலம் கடலில் தேடுதல் மற்றும் மீட்பு பணிகள் தொடங்கப்பட்டுள்ளதாக ஆணையம் கூறியுள்ளது.
ஷார்ஜாவில் இருந்து கராச்சிக்கு சென்று கொண்டிருந்த K2 எயார்ர்வேஸ் நிறுவனத்தின் B737 சரக்கு விமானத்தில் செவ்வாய்க்கிழமை இரவு 9.18 மணிக்கு நெவிகேஷன் சிஸ்டமில் கோளாறு ஏற்பட்டதாகவும்,
கராச்சி பகுதி கட்டுப்பாட்டு மையம் (ACC) உடனடியாக அதற்கு வழிகாட்டியதாகவும் அதிகாரசபை தெரிவித்துள்ளது.
“இருப்பினும், இரவு 9.22 மணிக்கு, அந்த விமானம் திசையை வேகமாக மாற்றிக்கொண்டு மிக வேகமாக கீழே இறங்கிய நிலையில், கராச்சியில் இருந்து மேற்கே சுமார் 155 கடல் மைல் (NM) தொலைவில் ரேடார் தொடர்பு மற்றும் தகவல் தொடர்பு துண்டிக்கப்பட்டுள்ளது.
விமானப் பயணங்களைக் கண்காணிக்கும் சேவையான Flightradar24-இன் முதற்கட்டத் தரவுகளின்படி, 27 ஆண்டுகள் பழமையான அந்த விமானம், கராச்சி நகரின் தென்மேற்கே கடற்பகுதியை நெருங்கும்போது திடீரெனப் பலமுறை உயரத்தை மாற்றி, பின்னர் வேகமாகத் தாழ்ந்துள்ளது.
அதன்படி, விமானம் கடலில் விழுந்து நொறுங்கியிருக்கலாம் என்ற சந்தேகம் எழுந்துள்ளதுடன், இதுவரை அதிகாரப்பூர்வமாக உறுதிப்படுத்தப்படவில்லை.
இந்த சம்பவத்தை தொடர்ந்து, காணாமல் போன விமானத்தை கண்டறிய பல்வேறு அமைப்புகள் மூலம் கடலில் தேடுதல் மற்றும் மீட்புப் பணிகள் தொடங்கப்பட்டுள்ளதாகவும் ஆணையம் தெரிவித்துள்ளது.
நீர்கொழும்பு சிறைச்சாலையில் ஏற்பட்ட வன்முறைச் சம்பவத்தின் போது சிறைச்சாலை பாதுகாவலர் டிலான் ஸ்ரீ அபேவர்தன உயிரிழந்துள்ளார். இந்த நிலையில் அவரது மரணத்தில் சந்தேகம் இருப்பதாக தாய் தமயந்தி பெரேரா தெரிவித்துள்ளார்.
“மகன் வெலிக்கடை சிறைச்சாலையில் கடமையை முடித்துவிட்டு வீடு திரும்பவிருந்த போது, என்னிடம் தொலைபேசியில் பேசினார்.
நீர்கொழும்பு சிறைச்சாலையில் பெரும் கலவரம் ஏற்பட்டுள்ளது, அதனால் இன்று என்னால் வீடு வர முடியாது என கூறினார். அவர் கூறியது போலவே, எனது மகனால் வீடு திரும்ப முடியவில்லை.
சிறைக்கைதிகள் அவரை மிகக் கொடூரமாகத் தாக்கி கொலை செய்துவிட்டனர். என் மகனுடன் சிறைக்குள் சென்ற அதிகாரிகள் குழுவைச் சிறைக்கைதிகள் மிகவும் கொடூரமாகத் தாக்கியுள்ளனர்.
என் மகனின் மரணம் குறித்து எங்களுக்குச் சந்தேகம் உள்ளது. ஆக்ரோஷமாகச் செயல்படும் கைதிகள் நிறைந்த இடத்திற்கு, மிகக் குறைந்த எண்ணிக்கையிலான எனது மகனும் அவனது குழுவினரும் ஏன் அனுப்பப்பட்டார்கள்?
எனவே, இது குறித்து அரசாங்கம் உரிய மற்றும் நியாயமான விசாரணையை நடத்த வேண்டும்,” என்று டிலானின் தாய் கோரிக்கை விடுத்துள்ளார்.
41 வயதான டிலான், குருநாகல், மதவ வத்தேகெதர பகுதியைச் சேர்ந்தவராகும். 8 வயது மகள் மற்றும் 10 மாத கைக்குழந்தையான மகன் என இரு பிள்ளைகளின் தந்தை ஆவார்.
அவரது மனைவி பண்டாரவெளை பகுதியில் உள்ள பாடசாலை ஒன்றில் நூலகராகப் பணியாற்றி வருகின்றார். இந்த வன்முறை சம்பவதில் 7 பொலிஸ் அதிகாரிகள் கொல்லப்பட்டனர்.
சிறைக்கைதிகள் சிறைக்குள் காப்பரண்களை உடைத்துக் கொண்டு வெளியே வர முயற்சித்த வேளையில், அவர்களை கட்டுப்படுத்த முயற்சித்த பொலிஸ் குழுவொன்று கைதிகளிடம் சிக்கியிருந்தாக பொலிஸ் தரப்பில் தெரிவிக்கப்பட்டிருந்தமை குறிப்பிடத்தக்கது.
வாழைச்சேனை சுங்காங்கேணி குளத்தில் மீன்பிடிக்க சென்ற ஆண் ஒருவர் குளத்து நீரில் மூழ்கி உயிரிழந்த நிலையில் சடலமாக மீட்கப்பட்டுள்ளதாக வாழைச்சேனை பொலிசார் தெரிவித்துள்ளனர். குறித்த சடலமானது இன்று (07.07.2026) பகல் மீட்கப்பட்டுள்ளது.
சுங்காங்கேணி சேர்ந்த 4 பிள்ளைகளின் தந்தையான 45 வயதுடைய தம்பிராசா மகேந்திரகுமார் என்பவரே இவ்வாறு உயிரிழந்த நிலையில் சடலமாக மீட்கப்பட்டுள்ளார்.
வாழைச்சேனை நீதிமன்றத்துக்கு அருகாமையில் உள்ள சுங்காங்கேணி தாமரைக்குளத்தில் மீன்பிடிப்பதற்காக நேற்று(06) குளத்தில் வலையை வீசி விட்டு வீடு திரும்பியவர் சம்பவ தினமான இன்று(07) காலையில் ஆகியும் வீடு திரும்பாததையடுத்து உறவினர்கள் தேடிச் சென்றுள்ளனர்.
இதன் போது குறித்த நபர் உயிரிழந்த நிலையில் சடலமாக மீட்கப்பட்டுள்ளார். குறித்த நபருக்கு வலிப்பு நோய் இருப்பதாக பொலிஸாரின் ஆரம்பக்கட்ட விசாரணையில் தெரியவந்துள்ளது.
இதையடுத்து நீதிமன்ற உத்தரவை பெற்று சடலத்தை பிரேத பரிசோதனைக்காக வைத்தியசாலையில் ஒப்படைப்பதற்கான நடவடிக்கையை எடுத்து வருவதாக பொலிஸார் தெரிவித்துள்ளனர். இது தொடர்பான மேலதிக விசாரணைகளை வாழைச்சேனை பொலிஸார் மேற்கொண்டு வருகின்றனர்.
புதிய இணைப்பு : பாணந்துறை பகுதியில் உள்ள வீட்டில், கத்தியால் குத்திக்கொலை செய்யப்பட்டதாக சந்தேகிக்கப்படும் இளம் யுவதியின் சடலம் கண்டெடுக்கப்பட்டுள்ளதாக பொலிஸார் தெரிவித்துள்ளனர்.
குறித்த யுவதி தனியார் பல்கலைக்கழகத்தில் சட்டம் படித்து வந்த நிலையில், வாடகை வீட்டில் தனியாக வசித்து வந்த போதே சடலமாக மீட்கப்பட்டுள்ளார்.
இந்த கொலைக்கு பயன்படுத்தப்பட்டதாக சந்தேகிக்கப்படும் கத்தி ஒன்று அருகில் கிடந்த நிலையில் கைப்பற்றப்பட்டுள்ளது.
இந்நிலையில் மரணம் தொடர்பில் பாணந்துறை குற்றப்பிரிவு புலனாய்வு அதிகாரிகள் மற்றும் கைரேகை அதிகாரிகள் விசாரணை நடத்தி வருகின்றனர்.
இதற்கமைய, சடலம் மீதான பிரேதப் பரிசோதனையை நடத்த திட்டமிடப்பட்டுள்ளது.
முதலாம் இணைப்பு : பாணந்துறை, வடக்கு பொலிஸ் பிரிவிற்குட்பட்ட கல்கனுவ வீதியில் உள்ள வாடகை வீட்டில் இளம் யுவதி ஒருவரின் சடலம் கண்டெடுக்கப்பட்டுள்ளதாக பொலிஸ் பிரிவு தெரிவித்துள்ளது.
கல்கனுவ வீதியில் வாடகை வீட்டில் வசித்து வந்த, நதுனி சஹஸ்ரீ கூரே என்ற 26 வயது திருமணமாகாத இளம் யுவதியே இவ்வாறு சடலமாக மீட்கப்பட்டுள்ளார்.
குறித்த யுவதி தனியார் பல்கலைக்கழகத்தில் சட்டம் படித்து வந்த நிலையில், வாடகை வீட்டில் தனியாக வசித்து வந்துள்ளார். மேலும், இந்த வீட்டிலிருந்து கல்வி சார்ந்த நடவடிக்கைகளையும், கூடுதலாக ஒரு வழக்கறிஞராக சட்டப்பணிகளையும் செய்து வந்துள்ளார்.
இது தற்கொலையா அல்லது வேறு ஏதேனும் காரணங்களா என்பது குறித்து பாணந்துறை, வடக்கு பொலிஸ் விசாரணை நடத்தி வருகின்றது.
2025 (2026) ஆம் ஆண்டுக்கான கல்விப் பொதுத் தராதர சாதாரண தரப் பரீட்சை பெறுபேறுகளுக்கான மீள் பரிசீலனை விண்ணப்பங்களைச் சமர்ப்பிக்கும் நடவடிக்கை இன்றுடன் (8.7.2026) நிறைவடைய உள்ளதாக அறிவிக்கப்பட்டுள்ளது.
கடந்த ஜூன் மாதம் 25 ஆம் திகதி முதல் இதற்கான விண்ணப்பங்கள் கோரப்பட்டிருந்தன. பாடசாலை மாணவர்கள் மற்றும் தனிப்பட்ட விண்ணப்பதாரர்கள் என இரு தரப்பினரும் தமக்கான விண்ணப்பங்களைச் சமர்ப்பிக்கும் வாய்ப்பு வழங்கப்பட்டிருந்தது.
விண்ணப்பிக்க விரும்பும் பரீட்சார்த்திகள், இலங்கை பரீட்சைகள் திணைக்களத்தின் உத்தியோகபூர்வ இணையத்தளமான www.doenets.lk ஊடாக மேலதிக தகவல்களைப் பெற்றுக்கொள்ளவும், விண்ணப்பங்களைச் சமர்ப்பிக்கவும் முடியும் என்று பரீட்சைகள் திணைக்களம் அறிவித்துள்ளது.
