மூதூர் பொலிஸ் பிரிவிற்குட்பட்ட 64ஆம் கட்டைப் பகுதியில் இன்று(10.07.2026) அதிகாலை இடம்பெற்ற கோர விபத்தில், வீடு ஒன்று கடுமையாகச் சேதமடைந்துள்ளதுடன் பேருந்து சாரதி உட்பட நால்வர் காயமடைந்துள்ளனர். ​

கதிர்காமத்திற்குப் பயணிகளை ஏற்றிச் சென்றுவிட்டுத் திரும்பிக் கொண்டிருந்த தனியார் பேருந்து ஒன்றே, திடீரென சாரதியின் கட்டுப்பாட்டை இழந்துள்ளது.

கட்டுப்பாட்டை இழந்த பேருந்து வீதியை விட்டு விலகி, வீதியோரத்தில் அமைந்திருந்த வீடு ஒன்றின் மீது அதிவேகமாக மோதி விபத்துக்குள்ளாகியுள்ளது.

​விபத்து இடம்பெற்ற வேளையில் அதிர்ஷ்டவசமாக வீட்டில் எவரும் இருந்திருக்கவில்லை என்றும் இதன் காரணமாக பெரும் உயிர்ச்சேதங்கள் மற்றும் ஆபத்துகள் எற்படாமல் தவிர்க்கப்பட்டுள்ளன என்றும் தெரிவிக்கப்பட்டுள்ளது.

எனினும், பேருந்து மோதிய வேகத்தில் வீட்டின் முன்பகுதி உள்ளிட்ட கட்டடப் பகுதிகள் கடுமையாக இடிந்து சேதமடைந்துள்ளன. ​ விபத்தில் படுகாயமடைந்த பேருந்து சாரதி உடனடியாக அப்பகுதி மக்களால் மீட்கப்பட்டு, மூதூர் தள வைத்தியசாலையில் அனுமதிக்கப்பட்டு சிகிச்சை பெற்று வருகின்றார். ​

நீண்ட தூரப் பயணத்தைத் தொடர்ந்து சாரதிக்கு ஏற்பட்ட கடுமையான தூக்கக் கலக்கமே (அயர்வு) இந்த விபத்திற்கு முக்கிய காரணமாக இருக்கலாம் என அப்பகுதி மக்கள் சந்தேகம் வெளியிட்டுள்ளனர். ​

இச்சம்பவம் குறித்து மூதூர் போக்குவரத்து பொலிஸார் வழக்குப்பதிவு செய்து, விபத்துக்கான உண்மைப் பின்னணி தொடர்பில் மேலதிக விசாரணைகளை மேற்கொண்டு வருகின்றனர்.

பொத்துவில் பொலிஸ் பிரிவுக்குட்பட்ட பொத்துவில் – அக்கரைப்பற்று பிரதான வீதியின் ஊரணி சந்திக்கு அருகில் இடம்பெற்ற கோர விபத்தில் படுகாயமடைந்த குடும்பஸ்தர் ஒருவர் சிகிச்சை பலனின்றி உயிரிழந்துள்ளார். குறித்தத விபத்தானது நேற்று(09.07.2026) காலை இடம்பெற்றுள்ளது.

இவ்விபத்தில் காரைதீவு பகுதியைச் சேர்ந்த 55 வயதுடைய மார்க்கண்டு ஜெயநாதன் குடும்பஸ்தர் ஒருவரே இவ்வாறு உயிரிழந்துள்ளதாகப் பொலிஸார் தெரிவித்துள்ளனர்.

விபத்தில் இறந்தவர் கதிர்காம பாதயாத்திரை செல்லும் அடியார்களுக்காக உகந்தையில் உணவு தயாரித்து கொடுத்து விட்டு வீடு திரும்பிய வேளை விபத்தில் உயிரிழந்துள்ளார்.

அக்கரைப்பற்று நோக்கிப் பயணித்துக் கொண்டிருந்த சிற்றூர்தி(வேன்) ஒன்று, ஊரணி சந்திக்கு அருகில் சென்றபோது, எதிர் திசையில் வந்த முச்சக்கர வண்டியுடன் எதிர்பாராதவிதமாக நேருக்கு நேர் மோதி விபத்துக்குள்ளானது.

மோதிய வேகம் காரணமாக இரண்டு வாகனங்களும் நிலைதடுமாறி வீதியில் கவிழ்ந்துள்ளன. இவ்விபத்தின் போது இரண்டு வாகனங்களுக்கும் பலத்த சேதங்கள் ஏற்பட்டுள்ளதுடன், வேன் ஓட்டுநரும் முச்சக்கர வண்டி ஓட்டுநரும் படுகாயமடைந்துள்ளனர்.

விபத்தை அடுத்து சம்பவ இடத்தில் கூடிய பிரதேச மக்கள், காயமடைந்த இருவரையும் உடனடியாக மீட்டு பொத்துவில் ஆதார மருத்துவமனையில் அனுமதித்தனர்.

எனினும், சிற்றூர்தி(வேன்) ஓட்டுநரின் நிலைமை மிகவும் கவலைக்கிடமாக இருந்தமையினால், அவர் மேலதிக அவசர சிகிச்சைக்காகக் கல்முனை பொது மருத்துவமனைக்கு மாற்றப்பட்டார்.

அவ்வாறு கல்முனை மருத்துவமனைக்குக் கொண்டு செல்லப்படும் வழியிலேயே குறித்த வேன் ஓட்டுநர் மரணமடைந்துள்ளதாக மருத்துவமனை வட்டாரங்கள் தெரிவித்துள்ளன.

விபத்தில் காயமடைந்த முச்சக்கர வண்டி ஓட்டுநர் தொடர்ந்து பொத்துவில் மருத்துவமனையில் அனுமதிக்கப்பட்டு சிகிச்சை பெற்று வருகின்றார்.

உயிரிழந்தவரின் சடலம் பிரேதப் பரிசோதனைகளின் பின்னர் உறவினர்களிடம் ஒப்படைக்கப்படவுள்ளதுடன், விபத்துத் தொடர்பில் பொத்துவில் பொலிஸார் மேலதிக விசாரணைகளை மேற்கொண்டு வருகின்றனர்.

கண்டி, பேராதனை போதனா வைத்தியசாலையில் இடுப்புப் பகுதியில் இணைந்திருந்த இரட்டையர்களை வெற்றிகரமாக பிரித்து வரலாற்றுச் சாதனை படைக்கப்பட்டுள்ளது.

பேராதனை போதனா வைத்தியசாலை, சிறிமாவோ பண்டாரநாயக்க சிறுவர் வைத்தியசாலை மற்றும் பேராதனை பல்கலைக்கழக மருத்துவ பீடத்தைச் சேர்ந்த வைத்தியர்கள் குழுவொன்று இந்த வரலாற்று சாதனைமிக்க சிகிச்சையை வழங்கியுள்ளனர்.

ஒரு குழந்தைக்கு மட்டும் இருந்த 2 சிறுநீரகங்களில் ஒன்றைப் பிரித்தெடுத்து, மற்றைய குழந்தைக்கு வெற்றிகரமாக மாற்றும் சத்திரசிகிச்சையும் இதன் போது மேற்கொள்ளப்பட்டது.

இவ்வாறான ஒரு சத்திரசிகிச்சை உலகிலேயே முதன்முறையாக மேற்கொள்ளப்பட்டுள்ளதாக சிறிமாவோ பண்டாரநாயக்க சிறுவர் வைத்தியசாலையின் சிறுவர் சத்திரசிகிச்சை நிபுணரும்,

பல்கலைக்கழக மருத்துவ பீடத்தின் சிரேஷ்ட விரிவுரையாளருமான வைத்தியர் மாதுல ஹெட்டியாராச்சி தெரிவித்துள்ளார்.

மாவனெல்ல தாயொருவருக்கு 2021 ஆம் ஆண்டு சிசேரியன் அறுவை சிகிச்சை மூலம் இந்த இரட்டையர்கள் பிறந்துள்ளனர்.

2024 ஆம் ஆண்டில் சிறுநீரக மாற்று சத்திரசிகிச்சைக்கு உட்படுத்தப்பட்டனர். அதற்கமைய சிறுநீரகங்களின் செயற்பாடு சீரானது.

இந்த நிலையை அடைந்ததைத் தொடர்ந்து, கடந்த மாதம் 10 ஆம் திகதி இவர்கள் பிரித்தெடுக்கும் சத்திரசிகிச்சை வெற்றிகரமாக மேற்கொள்ளப்பட்டது.

சத்திரசிகிச்சைக்காக காலை 7 மணி முதல் இரவு 9 மணி வரை நீண்ட நேரம் குழந்தைகள் மயக்க நிலையில் வைக்கப்பட்டிருந்தனர்.

குழந்தைகளின் இதயம், நுரையீரல், இரத்த ஓட்டம் மற்றும் மூளை ஆகியவற்றின் சீரான செயற்பாடே இந்த வெற்றிகரமான சத்திரசிகிச்சைக்கு முக்கிய காரணமாக அமைந்ததாக மயக்க மருந்து நிபுணர் அஷானி ரத்நாயக்க, குறிப்பிட்டார்.

இடுப்புப் பகுதியில் அசாதாரணமான அமைப்பு

சத்திரசிகிச்சையின் பின்னர் தீவிர சிகிச்சை பிரிவில் சிகிச்சை பெற்று வந்த இந்த குழந்தைகள், அடுத்த சில நாட்களில் சாதாரண விடுதிக்கு மாற்றப்படவுள்ளனர்.

இடுப்பு பகுதியில் இணைந்திருந்த குழந்தைகளை பிரிக்கும் சத்திர சிகிச்சை இலங்கையில் இதுவரை ஒருமுறை மட்டுமே மேற்கொள்ளப்பட்டுள்ளது.

நிலையில், ஒரு குழந்தையிலிருந்து சிறுநீரகத்தைப் பெற்று மற்றைய குழந்தைக்கு பொருத்தி அவர்களைப் பிரிக்கும் இத்தகைய சத்திரசிகிச்சை உலகிலேயே முதன்முறையாக மேற்கொள்ளப்பட்டுள்ளது.

குழந்தைகளின் உடல் எடை அறுவை சிகிச்சைக்கு ஏதுவான நிலையை அடையும் வரை சுமார் 5 ஆண்டுகள் காத்திருந்த பின்னரே இந்த சத்திரசிகிச்சை மேற்கொள்ளப்பட்டுள்ளது.

குறித்த குழந்தைகளின் இடுப்புப் பகுதியில் அசாதாரணமான அமைப்பு காணப்பட்டுள்ளது. கால்கள் குறுக்காக அமைந்திருந்தது. தலைக்கு ஒப்பான நிலையில் கால்கள் 90 பாகை கோணத்தில் அமைந்திருந்ததால்,

கால்களுக்குச் செல்லும் நரம்புகள் மற்றும் இரத்த ஓட்டத்திற்குப் பாதிப்பு ஏற்படாத வகையில் குழந்தைகளைப் பிரித்தெடுப்பது பெரும் சவாலாக அமைந்ததாக சிறிமாவோ பண்டாரநாயக்க விசேட சிறுவர் வைத்தியசாலையின் எலும்பு சிகிச்சை நிபுணர் வைத்தியர் அகலங்க ஜயசிங்க தெரிவித்துள்ளார்.

இந்தச் சத்திரசிகிச்சைக்காக 15 விசேட வைத்தியர்கள் உள்ளிட்ட சுமார் 30 பேர் கொண்ட குழுவினர் இணைந்து பணியாற்றியுள்ளனர்.

குழந்தைகள் தற்போது நல்ல உடல் நலத்துடன் இருப்பதாகவும், எதிர்காலத்தில் அவர்களுக்கு மேலும் சில சத்திரசிகிச்சைகள் செய்யப்பட வேண்டியுள்ளதாகவும் வைத்தியர் மாதுல ஹெட்டியாராச்சி தெரிவித்தார்.

முறையான தரநிலைகள் இல்லாத எல்.ஈ.டி (LED) மின்விளக்குகளின் இறக்குமதி, சேமிப்பு மற்றும் விற்பனைக்குத் தடை விதிக்கப்பட்டுள்ளதாக இலங்கை நிலைத்த ஆற்றல் அதிகார சபை அறிவித்துள்ளது.

அத்துடன், அத்தகைய பொருட்களை விற்பனை செய்யும் நபர்கள் மீது சட்ட நடவடிக்கை எடுக்கப்படும் என்றும் எச்சரித்துள்ளது. அறிக்கைகளின்படி, எல்.ஈ.டி மின்விளக்குகளின் உறை, உறை அல்லது பெட்டியில் குறைந்தபட்ச ஆற்றல் செயல்திறன் குறியீட்டைக் காண்பிப்பது கட்டாயமாகும் என்று அதிகார சபை வலியுறுத்தியுள்ளது.

தரமற்ற மின்விளக்குகளின் விற்பனை தொடர்பாக நாடு முழுவதிலுமிருந்து ஏற்கனவே புகார்கள் வந்துள்ளதாகவும், இதுகுறித்து சோதனைகள் நடத்தப்பட்டு குற்றவாளிகள் மீது வழக்குத் தொடரப்படும் என்றும் அதிகார சபை மேலும் கூறியுள்ளது.

2020 மே 28 திகதியிட்ட சிறப்பு வர்த்தமானி அறிவிப்பு எண் 2177/3-இன் கீழ் இந்த நடவடிக்கை நடைமுறைப்படுத்தப்படுகிறது.

குறைந்தபட்ச ஆற்றல் குறியீடு இல்லாத 60 வாட் அல்லது அதற்கும் குறைவான எல்.ஈ.டி மின்விளக்குகளின் விற்பனை கடுமையாகத் தடை செய்யப்பட்டுள்ளது என அதிகாரசபை வலியுறுத்தியுள்ளது.

மேலும், ஆற்றல் திறன் மற்றும் நுகர்வோர் பாதுகாப்பின் முக்கியத்துவத்தை எடுத்துரைத்து, அத்தகைய தரமில்லாத மின்விளக்குகளை வாங்குவதைத் தவிர்க்குமாறு பொதுமக்களுக்கு அறிவுறுத்தல் வழங்கப்பட்டுள்ளது.

இலங்கையில் தங்கத்தின் விலை இன்று (10.07.2026) அதிகரிப்பை பதிவு செய்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

நேற்றைய தினம் (09.07.2026) 24 கரட் தங்க பவுண் ஒன்று 376,000 ரூபாயாக விற்பனை செய்யப்பட்டது. இந்த நிலையில், இன்று அதன் விலை 2000 ரூபா அதிகரித்து 378,000 ரூபாயாக பதிவாகியுள்ளது.

அந்தவகையில், தற்போதைய தங்க விலை நிலவரப்படி, 24 கரட் தங்கம் பவுண் ஒன்று 378,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 347,800 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,250 ரூபாயாகவும், 22 கரட் தங்கத்தின் ஒரு கிராமின் விலை 43,475 ரூபாயாகவும், விற்பனை செய்யப்படுகிறது.

மேல் மாகாண தெற்கு குற்றத்தடுப்புப் பிரிவின் அதிகாரிகளினால் மேற்கொள்ளப்பட்ட விசாரணைகளில் சுசிமல் அசாங்க என்ற போதைப்பொருள் கடத்தல்காரரின் போதைப்பொருள் வலையமைப்புக்கு பணம் பரிமாறப்பட்ட வங்கிக் கணக்கு கண்டுபிடிக்கப்பட்டுள்ளதாக பொலிஸார் தெரிவித்துள்ளனர்.

இந்த வங்கிக் கணக்கின் ஊடாக 18 மாத காலப்பகுதிக்குள் 13 கோடி ரூபாவிற்கும் அதிகமான பணம் புழக்கத்தில் இருந்துள்ளதாக கண்டுபிடிக்கப்பட்டுள்ளதாக பொலிஸார் தெரிவித்துள்ளனர்.

பெண்ணொருவரின் பெயரில், போலிப் பெயர் மற்றும் அடையாள அட்டை இலக்கத்தைப் பயன்படுத்தி இந்த வங்கிக் கணக்கு ஆரம்பிக்கப்பட்டுள்ளது.

குறித்த பெண் போதைப்பொருள் வைத்திருந்த குற்றச்சாட்டில் தற்போது விளக்கமறியலில் வைக்கப்பட்டுள்ளார்.
13 கோடி ரூபா பணம்

குறித்த பெண் 2024 ஆம் ஆண்டு 25,000 ரூபா பணத்தைப் பெற்றுக்கொண்டு இந்த வங்கிக் கணக்கை ஆரம்பித்துள்ளதாக விசாரணைகளில் தெரியவந்துள்ளது.

வெளிநாட்டில் தலைமறைவாக இருக்கும் ஹந்தயா என்ற போதைப்பொருள் கடத்தல்காரரின் நெருங்கிய நண்பரான சுசிமல் அசாங்கவும் தற்போது விளக்கமறியலில் வைக்கப்பட்டுள்ளார்.

போதைப்பொருளுக்கு அடிமையான 2 இளைஞர்களிடம் மேற்கொள்ளப்பட்ட விசாரணைகளின் போது, இந்த வங்கிக் கணக்கு தொடர்பான தகவல்கள் அம்பலமாகியுள்ளன.

சந்தேக நபரான பெண் மற்றும் வங்கிக் கணக்கு தொடர்பான விடயங்களை எதிர்வரும் 21 ஆம் திகதி கடுவலை நீதவான் நீதிமன்றத்தில் முன்வைக்கப்படும் என பொலிஸார் தெரிவித்துள்ளனர்.

டெங்கு நோய் தற்போது கடுமையாக பரவி வருவதால் அதிக அபாயமுள்ள பகுதிகளில் செயல்படும் அரச மற்றும் தனியார் பாடசாலைகள், பல்கலைக்கழகங்களை இரண்டு வாரங்களுக்கு மூடுமாறு வேண்டுகோள் விடுக்கப்பட்டுள்ளது.

மருத்துவ மற்றும் குடிமை உரிமைகளுக்கான மருத்துவர்கள் தொழிற்சங்கக் கூட்டணியின் தலைவர் வைத்தியர் சமல் சஞ்சீவ இந்த கோரிக்கையை விடுத்துள்ளார்.

எனவே கல்வி மற்றும் உயர் கல்வி அமைச்சகமும், சுகாதார அமைச்சகமும் இது தொடர்பில் அவதானம் செலுத்துமாறும் அறிவுறுத்தப்பட்டுள்ளது.

தற்போது, ​​மேற்கு மாகாணம் உட்பட பல மாகாணங்களில் கிட்டத்தட்ட எழுபதாயிரம் பேர் டெங்கு நோயால் பாதிக்கப்பட்டுள்ளனர் என்பது அதிகாரப்பூர்வமாக உறுதி செய்யப்பட்டுள்ளது.

இந்த எண்ணிக்கை கணிசமாக அதிகரித்த பின்னர் பாடசாலைகளையோ, பல்கலைக்கழகங்களையோ மூடுவதில் எந்த அர்த்தமும் இல்லை என்றும், தற்போது பல மருத்துவமனைகளில் கூட்டம் அதிகமாக இருப்பதால் சுகாதாரப் பணியாளர்கள் மிகவும் சோர்வடைந்துள்ளனர் என்றும் அவர் சுட்டிக்காட்டியுள்ளார்.

நோயாளிகளுக்குப் போதுமான வசிப்பிட வசதிகள் இல்லாததால், பல நோயாளிகள் மருத்துவமனைகளின் படுக்கைகளுக்கு அடியிலோ அல்லது நடைபாதைகளிலோ இருக்கின்றனர் என்றும், இது நோயாளிகளின் உயிருக்கு ஆபத்தை ஏற்படுத்தக்கூடும் என்றும் அவர் சுட்டிக்காட்டியுள்ளார்.

சம்பந்தப்பட்ட நிறுவனங்களை மூடுவதற்கு கல்வி அமைச்சகமும் சுகாதார அமைச்சகமும் உடனடியாக நடவடிக்கை எடுக்க வேண்டும் என்றும், காலம் கடந்த பிறகு மூடுவதால் எந்தப் பயனும் இல்லை என்றும் அவர் தெரிவித்துள்ளார்.

தனது பிறந்த நாளை முன்னிட்டு சக மாணவிகளுக்கு சாக்லேட் வழங்கி மகிழ்ச்சியைப் பகிர்ந்து கொண்ட மாணவியொருவர், பாடசாலை அதிபரால் மோசமாக நடத்தப்பட்டதாக தெரிவிக்கப்பட்டுள்ளது.

இந்த சம்பவம் தொடர்பில் குறித்த பாடசாலை அதிபர் மீது விசாரணைகளும் ஆரம்பிக்கப்பட்டுள்ளது. சம்பவம் தொடர்பில் மேலும் தெரியவருகையில்,

குறித்த பாடசாலை மாணவி தன்னுடைய பிறந்த நாளை முன்னிட்டு சக மாணவர்களுக்கு சாக்லேட் பகிர்ந்து, தன்னுடைய மகிழ்ச்சியை வெளிப்படுத்தியுள்ளார்.

இதன்போது மாணவி வசமிருந்த 18 சாக்லேட்டுகளையும் பாடசாலை அதிபர் அச்சுறுத்தி உண்ண வைத்ததாக கூறப்படும் நிலையில், மாணவி, தற்போதைக்கு சிகிச்சைக்காக பதுளை போதனா மருத்துவமனையில் அனுமதிக்கப்பட்டுள்ளார்.

பதுளை பிரதேசத்தில் உள்ள பாடசாலையொன்றில் கல்வி பயிலும்15 வயது மாணவியொருவரே இதுபோன்று மருத்துவமனையில் அனுமதிக்கப்பட்டுள்ளதாக பொலிஸார் தெரிவித்து

கொண்டாடப்பட்ட நிலையில், இதுபோன்று அதிபர் மோசமாக நடந்துக் கொண்டுள்ளார். இதனைத் தொடர்ந்து, உடல்நலக்குறைவு காரணமாக கஹடருப்ப கிராமிய மருத்துவமனையில் அனுமதிக்கப்பட்ட குறித்த மாணவி, மேலதிக சிகிச்சைக்காக பதுளை போதனா மருத்துவமனைக்கு மாற்றப்பட்டுள்ளார்.

கஹடருப்ப பொலிஸாருக்குக் கிடைத்த முறைப்பாட்டைத் தொடர்ந்து, சம்பவம் தொடர்பான மேலதிக விசாரணைகள் முன்னெடுக்கப்பட்டுள்ளது.

இலங்கை வரலாற்றிலேயே இலவங்கப்பட்டை விலை கடந்த மே மாதம் பாரியளவில் அதிகரித்துள்ளதாக இலவங்கப்பட்டை மேம்பாட்டு திணைக்களம் தெரிவித்துள்ளது.

அதன்படி, ஒரு கிலோ இலவங்கப்பட்டை தற்போது ரூ. 5,000 முதல் 5,500 வரை விற்கப்படுவதாக திணைக்களம் கூறியுள்ளது. அதன்படி, அல்பா தர இலவங்கப்பட்டை ஒரு கிலோ கிராமுக்கு ரூ.7,000 ஐ எட்டியுள்ளது.

அதிகரித்த தேவையும், ரூபாயின் மதிப்பில் ஏற்பட்ட ஏற்ற இறக்கமும் இலவங்கப்பட்டை விலை உயர்வுக்கு வழிவகுத்துள்ளன.

இந்த ஆண்டு இலவங்கப்பட்டை ஏற்றுமதி மூலம் 300 மில்லியன் அமெரிக்க டொலர் வருவாய் ஈட்ட நாடு இலக்கு நிர்ணயித்துள்ள நிலையில், இந்த சாதனை விலைகள் எட்டப்பட்டுள்ளதாக திணைக்களத்தின் நாயகம் ஜனக லிண்டர கூறியுள்ளார்.

கடந்த ஆண்டின் இதே காலகட்டத்துடன் ஒப்பிடுகையில், இந்த ஆண்டின் முதல் ஐந்து மாதங்களில் இலவங்கப்பட்டை ஏற்றுமதி வருவாய் ரூ. 27 மில்லியன் அதிகரித்து இத்துறையில் வளர்ச்சியை சுட்டிக்காட்டியுள்ளதாகவும் அவர் மேலும் கூறியுள்ளார்.

புதிய இணைப்பு : தெல்தெனியவில் கார் ஒன்றினுள் சடலமாக மீட்கப்பட்ட பெண் உடலியல் சிகிச்சை நிபுணர் மரணம் தொடர்பில் கைது செய்யப்பட்ட நான்கு சந்தேகநபர்களுக்கான விளக்கமறியல் மேலும் நீடிக்கப்பட்டுள்ளது.

இது தொடர்பான வழக்கு இன்று(09.07.2026) மீண்டும் நுவரெலியா மாவட்ட நீதிமன்றத்தில் முன்னிலைப்படுத்தப்பட்ட போதே அவர்களுக்கு இந்த உத்தரவு பிறப்பிக்கப்பட்டுள்ளது.

இதன்படி, குறித்த நால்வரும் எதிர்வரும் ஆகஸ்ட் மாதம் 16ஆம் திகதி வரை தொடர்ந்து விளக்கமறியலில் வைக்கப்பட்டுள்ளனர்.

முதலாம் இணைப்பு : தெல்தெனியவில் கார் ஒன்றினுள் சடலமாக மீட்கப்பட்ட பெண் உடலியல் சிகிச்சை நிபுணர் மரணம் தொடர்பில் கைது செய்யப்பட்ட நான்கு சந்தேகநபர்கள் இன்று (09) மீண்டும் நீதிமன்றத்தில் முன்னிலைப்படுத்தப்பட்டுள்ளனர்.

இந்த கொலைச் சம்பவத்துடன் தொடர்புடைய பிரதான சந்தேகநபர், அவரது மனைவி, குண்டசாலை பொலிஸ் பயிற்சி கல்லூரியின் பொறுப்பதிகாரி மற்றும் குண்டசாலை பிரதேச சபையின் சாரதி ஆகியோரே இவ்வாறு முன்னிலைப்படுத்தப்பட்டுள்ளனர்.

சந்தேகநபர்கள், நுவரெலியா பொலிஸாவின் குற்றப் புலனாய்வுப் பிரிவின் அதிகாரிகளால் கைது செய்யப்பட்டு, நுவரெலியா நீதவான் நீதிமன்றத்திலிருந்து பெறப்பட்ட தடுப்புக்காவல் உத்தரவுகளின் அடிப்படையில் விசாரிக்கப்பட்டு வந்தனர்.

இதற்கமைய, சந்தேகநபர்களை ஜூன் (26) நுவரெலியா நீதிமன்ற நீதவான் முன் முன்னிலைப்படுத்திய பின்னர், இன்று வரை விளக்கமறியலில் வைக்க உத்தரவிடப்பட்டிருந்தது.

கடந்த 17 ஆம் திகதி தெல்தெனிய வைத்தியசாலைக்கு அருகில் கார் ஒன்றில் இருந்து இளம் பெண் வைத்தியரின் சடலம் மீட்கப்பட்டிருந்தது.

இதனையடுத்து முன்னெடுக்கப்பட்ட விசாரணையில் உயிரிழந்த பெண்ணின் கழுத்து நெரிக்கப்பட்டமையாலேயே இந்த மரணம் சம்பவித்துள்ளதாக பிரேத பரிசோதனையின் ஊடாக உறுதிப்படுத்தப்பட்டிருந்தது.

இதனையடுத்து உயிரிழந்த பெண்ணின் காதலர் எனும் கூறப்படும் நபரை பொலிஸார் தேடி வந்த நிலையில், யாழ்ப்பாணம் பொலிஸாரால் அவர் கைது செய்யப்பட்டிருந்தமை குறிப்பிடத்தக்கது.

நீர்கொழும்பு சிறைச்சாலையில் இடம்பெற்ற கலவரத்தில் பொலிஸ் அதிகாரிகள் 7 பேர் உயிரிழந்த நிலையில் அவர்களில் பெரும்பான்மையானோர் மிகவும் இளம் வயதுடையவர்கள என தெரியவந்துள்ளது.

இந்த நிலையில் உயிரிழந்த, புலத்சிங்கள – டெல்மல்ல பிரதேசத்தைச் சேர்ந்த சிறைச்சாலை பொலிஸ் அதிகாரி தர்ஷன தரங்க அதுகோரலவின் இழப்பு, அவரது குடும்பத்தினரை பெரும் சோகத்தில் ஆழ்த்தியுள்ளது.

மது மற்றும் புகைப்பிடித்தல் போன்ற எந்தவொரு தீய பழக்கவழக்கங்களும் இல்லாத மிகவும் கனிவான குணம் கொண்ட மகன், கைதிகளிடமும் மிகவும் அன்பாகவே நடந்துகொள்வார் என அவரது தாயார் கருணாவதி பெரேரா கண்ணீருடன் தெரிவித்துள்ளார்.

அப்பாவி மக்களின் கஷ்டங்கள் குறித்து எப்போதும் கவலைப்படும் தர்ஷனவுக்கு ஏற்பட்டுள்ள இந்த நிலைமையை எங்களால் ஏற்றுக்கொள்ள முடியவில்லை என அவர் குறிப்பிட்டுள்ளார்.

3 சகோதரர்களைக் கொண்ட குடும்பத்தில் இளையவரான தர்ஷன தரங்க, 3 ஆண்டுகளுக்கு முன்பு அஷினி குமுதுமாலி என்பவரை திருமணம் செய்துகொண்டார்.

உயிரிழக்கும் போது ஏழு மாதக் குழந்தை ஒன்றின் தந்தையாக அவர் இருந்துள்ளார். தர்ஷன பணி புரியும் போது ஏற்பட்ட இந்தத் துயரச் சம்பவம் குறித்து அறிந்ததும், தாயார் பலமுறை அவருக்கு தொலைபேசி அழைப்பு விடுத்துள்ளார்.

அதற்கு அவர் பதிலளிக்காத நிலையில், அவரது மனைவி மூலம் அவர் அவசர பணி நிமித்தமாக நீர்கொழும்பு சென்றிருப்பதாக அறிந்துக் கொண்டுள்ளார்.

மகன் உயிரிழந்த செய்தியை கேட்டுத் தந்தை கருணாசிரி உள்ளிட்ட குடும்பத்தினர் அதிர்ச்சியில் இருப்பதாக தெரிவிக்கப்படுகின்றது.

சிறைச்சாலைகள் திணைக்களத்தின் நன்கு பயிற்சி பெற்ற விசேட படைப்பிரிவைச் சேர்ந்த சிறைச்சாலை உத்தியோகத்தர்கள் மற்றும் அதிகாரிகளே இவ்வாறு நீர்கொழும்பு சிறைச்சாலைக் கலவரத்தில் உயிரிழந்துள்ளதாக தெரிவிக்கப்பட்டுள்ளது.

சிறைச்சாலைகள் திணைக்களத்தின் Prison Special Tactical Unit/Prison Emergency response strategic unit எனப்படும் சிறைச்சாலைகள் துரித தாக்குதல் மற்றும் தந்திரோபயப் படையணியைச் சேர்ந்த சிறைச்சாலை உத்தியோகத்தர்கள் மற்றும் அதிகாரிகளே கைதிகளின் தாக்குதலுக்கு இலக்காகி உயிரிழந்துள்ளனர்.

குறித்த படையணியானது பொலிஸ் விசேட அதிரடிப்படை போன்ற நன்கு பயிற்சி பெற்ற ஒரு சிறைச்சாலைப் படைப் பிரிவு என்றும் தெரிவிக்கப்பட்டுள்ளது.

சிறைச்சாலைகளில் ஏற்படும் கைதிகளின் கடுமையான மோதல்கள், கலவரங்கள் மற்றும் அமைதியின்மையை துரித கதியில் கட்டுப்பாட்டிற்குள் கொண்டு வந்து அமைதியை நிலைநாட்டல்,

சிறைச்சாலைகளினுள் போதைப் பொருள் மற்றும் கைபேசி பாவனைகள் உள்ளிட்ட சட்டவிரோத செயற்பாடுகளை கட்டுப்படுத்தல், சிறைச்சாலைகளில் தடுத்து வைக்கப்பட்டுள்ள பாரியளவிலான குற்றச் செயல்களுடன் தொடர்புடைய சந்தேக நபர்களின் பாதுகாப்பு தொடர்பான நடவடிக்கைகள்,

அவ்வாறானவர்களிடம் இருந்து எதிர்கொள்ள நேரிடக் கூடிய அச்சுறுத்தல்கள் தொடர்பில் நடவடிக்கை மேற்கொள்ளல் உள்ளிட்ட பொறுப்புக்கள் வழங்கப்பட்டுள்ளன.

அத்துடன், சிறைச்சாலையினும் நிகழும் விடயங்கள் தொடர்பில் புலனாய்வுத் தகவல்களைச் சேகரித்தல், அச்சுறுத்தல் ஏற்படும் சிறைச்சாலை உத்தியோகத்தர்களுக்கு பாதுகாப்பு வழங்குதல் உள்ளிட்ட சிறைச்சாலைகளின் பாதுகாப்பு உள்ளிட்ட பொறுப்புக்களும் அவர்களுக்கு வழங்கப்பட்டுள்ளதாக கூறப்படுகின்றன.

இந்நிலையில், நீர்கொழும்பு சிறைச்சாலைக் கலவரத்தை கட்டுப்பாட்டுக்குள் கொண்டுவர வெலிக்கடை சிறைச்சாலையில் இருந்து அனுப்பப்பட்ட குறித்த படையணியின் முதலாம் தர ஜெயிலர் சந்திரவங்ச,

சார்ஜண்ட் தர அதிகாரிகளான சஞ்சீவ, என்.தரங்க, புஷ்பகுமார, திலகசிறி, அபேவர்த்தன, ஏ.டி. தரங்க உள்ளிட்ட அதிகாரிகளே நீர்கொழும்பு கலவரத்தில் உயிரிழந்துள்ளனர்.

குறித்த அதிகாரிகளின் சடலங்களுக்கு சிறைச்சாலைகள் திணைக்களத்தின் இறுதி மரியாதை வழங்கப்பட்டு, இறுதிச் சடங்குகளுக்காக அவர்களின் சொந்த ஊர்களுக்கு சடலங்களை அனுப்பி வைக்க நடவடிக்கை மேற்கொள்ளப்பட்டுள்ளது.

புதிய இணைப்பு : சமூகத்தில் தோல் நோய்களின் பரவல் தீவிரமாக அதிகரித்து வருவதாக தோல் நோய்கள் குறித்து அதிக விழிப்புடன் இருக்குமாறு எச்சரிக்கை விடுக்கப்பட்டுள்ளது.

தற்போதைய சூழ்நிலையை கருத்தில் கொண்டு, தோலில் மாற்றங்கள் , அறிகுறிகள் தென்பட்டால் தாமதமின்றி உரிய வைத்திய ஆலோசனையைப் பெறுமாறும் வைத்தியர்கள் வலியுறுத்துகின்றனர்.

முதலாம் இணைப்பு : நாட்டில் தோல் நோய்கள் தற்போது தீவிரமான சுகாதார பிரச்சினையாக மாறியுள்ளதாக தோல் வைத்தியர்கள் எச்சரிக்கை விடுத்துள்ளனர்.

கடந்த சில நாட்களாக தோல் நோய்களுக்கான சிகிச்சைக்காக வைத்தியசாலைகளுக்கு வரும் நோயாளிகளின் எண்ணிக்கை அதிகரித்து வருவதாக தோல் நோய் வைத்தியர் நயானி மதரசிங்க தெரிவித்துள்ளார்.
விடுக்கப்பட்டுள்ள எச்சரிக்கை

சுகாதார மேம்பாட்டுப் பணியகத்தில் நடைபெற்ற ஊடக சந்திப்பில் பங்கேற்றபோது இவ்வாறு தெரிவித்துள்ளார். எனவே வேகமாக பரவிவரும் தோல் நோய்கள் தொடர்பில் பொது மக்கள் அவதானத்துடன் இருக்குமாறும் அறிவுறுத்தப்பட்டுள்ளது.

இதேவேளை, கடந்த 24 மணி நேரத்தில் கண்டறியப்பட்ட புதிய டெங்கு நோயாளிகளின் எண்ணிக்கை 2,000-ஐ எட்டியுள்ளதாக தேசிய டெங்கு கட்டுப்பாட்டுப் பிரிவு தெரிவித்துள்ளது.

மேலும், இந்த ஆண்டு டெங்கு தொடர்பான இறப்புகளின் எண்ணிக்கை 42 ஆக அதிகரித்துள்ளமை குறிப்பிடத்தக்கது.

முல்லைத்தீவு வவுனிக்குளம், கொல்லவிளாங்குளம் பகுதியில் இன்று பிற்பகல் இடம்பெற்ற விபத்தில் இருவர் படுகாயமடைந்துள்ளதாக தெரிவிக்கப்படுகின்றது.

மோட்டார் சைக்கிள் காருடன் மோதி விபத்து இடம்பெற்றள்ளது. காயமடைந்தவர்கள் உடனடியாக சிகிச்சைக்காக வைத்தியசாலையில் அனுமதிக்கப்பட்டுள்ளனர்.

விபத்து தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.

இலங்கையில் பேஸ்புகில் (Facebook) செயற்கை நுண்ணறிவால் (AI) உருவாக்கப்பட்ட போலிப் பெண் சுயவிவரங்களைப் பயன்படுத்தி, பயனர்களை மோசடி மற்றும் ஆபாச உரையாடல்களில் சிக்க வைக்கும் செயற்பாடுகள் அதிகரித்துள்ளதாக கலாநிதி சஞ்சனா ஹட்டோட்டுவ எச்சரித்துள்ளது.

போலியான பெண் அடையாளங்களைப் பயன்படுத்தி, பயனர்களை வயது வந்தோருக்கான சேவைகள், சூதாட்டத் தளங்கள் மற்றும் கிரிப்டோகரன்சி விளம்பரங்களுக்கு திசைதிருப்புவதே இதன் முக்கிய நோக்கமாகும்.

நூற்றுக்கணக்கான கணக்குகள் ஒரே மாதிரியான பதிவுகளைப் பகிர்ந்து ஒருங்கிணைந்து செயல்படுகின்றன. இவை பெரும்பாலும் தனிமை அல்லது துணை தேடும் பெண்களாகச் சித்தரிக்கப்பட்டு, பயனர்களை வட்ஸ்அப் போன்ற தனிப்பட்ட உரையாடல் தளங்களுக்கு அழைத்துச் செல்கின்றன.

இந்த சுயவிவரங்கள் அனைத்தும் போலியானவை என்பதால், பயனர்கள் தாங்கள் உரையாடுவது உண்மையான நபருடனா அல்லது செயற்கை நுண்ணறிவுடன் தானா என்பதைக் கண்டறிவது கடினமாக உள்ளது.

முன்பின் தெரியாத நபர்களுடன் தனிப்பட்ட உரையாடல்களைத் தவிர்க்குமாறும், அவர்கள் பகிரும் சந்தேகத்திற்கிடமான இணைப்புகளை (Links) கிளிக் செய்ய வேண்டாம் என்றும் கேட்டுக்கொள்ளப்படுகிறார்கள்.

இத்தகைய மோசடிகளைத் தடுக்க பேஸ்புக் (Facebook) நிறுவனம் தனது பாதுகாப்பு மற்றும் வெளிப்படைத்தன்மை விதிகளை வலுப்படுத்த வேண்டும் என இந்த ஆய்வு பரிந்துரைத்துள்ளது.

இலங்கையில் டெங்கு நோயால் உயிரிழந்தவர்களின் எண்ணிக்கை 45 ஆக உயர்ந்துள்ளதாக தேசிய டெங்கு கட்டுப்பாட்டுப் பிரிவு தெரிவித்துள்ளது. அத்துடன், நாடு முழுவதும் இதுவரை மொத்தம் 65,034 டெங்கு நோயாளர்கள் பதிவாகியுள்ளதாகவும் அந்தப் பிரிவு தெரிவித்துள்ளது.

ஜூலை மாதத்தின் முதல் 08 நாட்களில் மாத்திரம் 9,654 நோயாளர்கள் பதிவாகியுள்ளனர். இந்த ஆண்டில் இதுவரையில் மாவட்ட ரீதியாக பதிவாகியுள்ள நோயாளர்களின் அடிப்படையில் கம்பஹா மாவட்டத்தில் 13,332 நோயாளர்கள் பதிவாகியுள்ளனர்.

கொழும்பு மாவட்டத்தில் 13,150 நோயாளர்களும், மாத்தறை மாவட்டத்தில் 4,600 நோயாளர்களும், களுத்துறை மாவட்டத்தில் 4,354 நோயாளர்களும் அடையாளம் காணப்பட்டுள்ளதாக தேசிய டெங்கு ஒழிப்பு பிரிவு மேலும் சுட்டிக்காட்டியுள்ளது.

டெங்கு பரவல் அதிகரித்து வரும் நிலையில், கொசு பெருகும் இடங்களை அழித்தல், சுற்றுப்புறத்தை தூய்மையாக வைத்திருத்தல் உள்ளிட்ட முன்னெச்சரிக்கை நடவடிக்கைகளை பொதுமக்கள் தொடர்ந்து பின்பற்றுமாறு சுகாதார அதிகாரிகள் அறிவுறுத்தியுள்ளனர்.