சென்னையில் முறையான குடியுரிமை ஆவணங்கள் இன்றி, போலி ஆவணங்களை பயன்படுத்தி தமிழக சட்டசபை தேர்தலில் வாக்களித்த இலங்கை தம்பதியினர் கைது செய்யப்பட்டுள்ளனர்.

நேற்று முன்தினம் இவர்கள் இருவரும் இலங்கை செல்வதற்காக, சென்னை விமான நிலையம் சென்றபோது போலி ஆவணங்கள் கண்டுபிடிக்கப்பட்டுள்ளது.

இது தொடர்பாக அதிகாரிகள் நடத்திய விசாரணையில், யாழ்ப்பாணத்தைச் சேர்ந்த ஆண் ஒருவரும் (69) அவரது மனைவியும், கடந்த 20 ஆண்டுகளுக்கும் மேலாக சென்னை, தியாகராயநகர் பகுதியில் வசித்து வந்துள்ளனர்.

இவர்கள் தியாகராயநகர் பகுதியில் சிறிய நகைக்கடையில் பணியாற்றுவதாகவும் தெரிவித்துள்ளனர்.

இவர்கள் இருவரும் இந்தியக் குடியுரிமைச் சான்றிதழ்கள் இன்றி, போலியான முகவரி ஆதாரங்களைக் காட்டி வாக்காளர் பட்டியலில் தங்களது பெயர்களைச் சேர்த்துக் கொண்டதாக கூறப்படுகிறது.

இந்த நிலையில், அண்மையில் நடைபெற்ற தமிழக சட்டமன்றத் தேர்தலின் போது இவர்கள் வாக்களித்ததைக் கண்டுபிடித்த அதிகாரிகள், இது தொடர்பாக விசாரணை மேற்கொண்டனர்.

விசாரணையின் முடிவில், இவர்கள் முறையான ஆவணங்கள் இன்றி வாக்காளர் அடையாள அட்டையைப் பெற்று, தேர்தலிலும் வாக்களித்தமை உறுதியாகியுள்ளது.

இந்த நிலையில், இருவர் மீதும் 4 பிரிவுகளில் வழக்குப்பதிவு செய்து நீதிமன்றக்காவலில் வைக்கப்பட்டுள்ளனர்.

தமிழக சட்டமன்றத் தேர்தலில் இலங்கையை சேர்ந்த பலர் முறைகேடாக வாக்களித்த பல சம்பவங்கள் பதிவாகியுள்ளதுடன், நேற்றும் இருவர் கைது செய்யப்பட்டது பரபரப்பை ஏற்படுத்தியுள்ளது.

அம்பாந்தோட்டை மாவட்டம், தங்காலை, மாவெல்ல கடற்பரப்பில் காணாமல்போன இளைஞரின் சடலம் மீட்கப்பட்டுள்ளது என்று பொலிஸார் தெரிவித்துள்ளனர்.

தங்காலை, கொடெல்லவெல பகுதியைச் சேர்ந்த 19 வயதான இளைஞரே இவ்வாறு உயிரிழந்துள்ளார்.

கடந்த வியாழக்கிழமை மாவெல்ல – மஹகலாகாவ கடற்கரைப் பகுதியில் தூண்டில் போட்டு மீன்பிடித்துக்கொண்டிருந்த போது, எதிர்பாராதவிதமாக எழுந்த கடல் அலையில் சிக்கி அவர் இழுத்துச்செல்லப்பட்டிருந்தார்.

காணாமல்போன இளைஞரைக் கண்டறிய பிரதேச மக்கள், பொலிஸ் உயிர்பாதுகாப்புப் பிரிவு மற்றும் கடற்படையினர் இணைந்து தீவிர தேடுதல் நடவடிக்கைகளை மேற்கொண்ட போதிலும், அவர் கிடைக்கவில்லை.

இந்நிலையில், நேற்று பிற்பகல் மாவெல்ல கடற்பரப்பில் சடலம் மிதப்பதைக் கண்ட மீனவர்கள், அதனைப் படகு மூலம் கரைக்குக் கொண்டு வந்தனர். மீட்கப்பட்ட சடலம் பிரேத பரிசோதனைக்காக அனுப்பி வைக்கப்பட்டுள்ளது.

இந்த சம்பவம் குறித்து தங்காலை பொலிஸார் மேலதிக விசாரணைகளை மேற்கொண்டு வருகின்றனர்.

இலங்கையில் தங்கத்தின் விலையில் இன்றைய தினம் (13.07.2026) மீண்டும் சரிவு பதிவாகியுள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

நேற்று முன்தினம் (11) 24 கரட் தங்கம் ஒரு பவுண் 378,000 ரூபாயாக விற்பனையான நிலையில், இன்று அதன் விலை 2,000 ரூபாயால் குறைந்துள்ளது.

அந்தவகையில், தற்போதைய தங்க விலை நிலவரப்படி, 24 கரட் தங்கம் பவுண் ஒன்று 376,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 346,000 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,000 ரூபாயாகவும், 22 கரட் தங்கத்தின் ஒரு கிராமின் விலை 43,250 ரூபாயாகவும், விற்பனை செய்யப்படுகிறது என தெரிவிக்கப்பட்டுள்ளது.

இலங்கையின் நிலுவையில் உள்ள கடன் அட்டைகளின் கடன் தொகை ரூ. 10313 மில்லியனால் அதிகரித்துள்ளது. இந்த ஆண்டின் (2026) தொடக்கத்திலிருந்து கடந்த ஏப்ரல் மாத இறுதி வரையிலான நான்கு மாதங்களில் இந்த தொகை அதிகரித்துள்ளது.

அதன்படி, இந்த ஆண்டின் (2026) தொடக்கத்தில் ரூ. 189706 மில்லியனாக இருந்த நிலுவையின் கடன் பொறுப்பு தற்போது அதிகரித்துள்ளது.

கடந்த ஏப்ரல் மாத இறுதியில் ரூ. 200019 மில்லியனால் அதிகரித்துள்ளது என்று மத்திய வங்கி தெரிவித்துள்ளது.

சந்தையில் மசகு எண்ணெய் விலை மீண்டும் வேகமாக அதிகரித்து வருகிறது. ஹோர்முஸ் நீரிணையில் வர்த்தக கப்பல்கள் மீதான தாக்குதல்கள் மற்றும் அதனை தொடர்ந்து அமெரிக்கா – ஈரான் இடையே மீண்டும் தீவிரமடைந்துள்ள மோதல்களால் இந்த நிலைமை ஏற்பட்டுள்ளது.

தற்போது, ​​ஒரு பீப்பாய் பிரென்ட் ரக மசகு எண்ணெயின் விலை 79 அமெரிக்க டொலருக்கும் அதிகமாகவும், ஒரு பீப்பாய் WTI ரக எண்ணெயின் விலை 74 அமெரிக்க டொலராகவும் அதிகரித்துள்ளது. இந்த இரண்டு முக்கிய எண்ணெய் விலைகளும் கடந்த வெள்ளிக்கிழமை விலைகளுடன் ஒப்பிடும்போது அதிகரிப்பை பதிவு செய்துள்ளன.

கடந்த வெள்ளிக்கிழமை (10.07.2026), ஒரு பீப்பாய் பிரென்ட் ரக மசகு எண்ணெயின் விலை 76 அமெரிக்க டொலராகவும், ஒரு பீப்பாய் WTI ரக எண்ணெயின் விலை 72 அமெரிக்க டொலராகவும் பதிவாகியிருந்தமை குறிப்பிடத்தக்கது.

இலங்கையின் வாழும் மிகவும் வயதான பெண்களில் ஒருவராகப் பரவலாக அங்கீகரிக்கப்பட்டவரும், அனுராதபுரம் மாவட்டத்தின் சங்கிலி கனதரவாவைச் சேர்ந்தவருமான பஞ்சகே கலுமெனிகே, தனது 114ஆவது வயதில் உயிரிழந்துள்ளார்.

1912ஆம் ஆண்டு ஜூலை 4 ஆம் திகதி பிறந்த கலுமெனிகே, இந்த ஆண்டின் தொடக்கத்தில் தனது 114ஆவது பிறந்தநாளைக் கொண்டாடியுள்ளார்.

சிறிது காலத்திற்கு பின்னர், அவர் கீழே விழுந்து அறுவை சிகிச்சைக்கு உள்ளானதாக தெரிவிக்கப்பட்டுள்ளது. அறுவை சிகிச்சைக்குப் பின் இரண்டு மாதங்கள் உயிர் வாழ்ந்தபோதிலும், இறுதியில் அவர் உயிரிழந்துள்ளார்.

கலுமெனிகே , 12 பிள்ளைகளையும் 325 கொள்ளுப்பேரக்குழந்தைகளைக் கொண்டவர் என்பது குறிப்பிடத்தக்கது.

உலகளாவிய ரீதியில் எல் நினோ மற்றும் காலநிலை மாற்றம் தொடர்பில் அச்சுறுத்தல் விடுக்கப்பட்டுள்ள நிலையில் எதிர்வரும் காலங்களில் தித்வா புயல் தாக்கம் போன்றே பேரனர்த்தங்களையும் எதிர்கொள்ள நேரிடும் என அனர்த்த முகாமைத்துவ மத்திய நிலையத்தின் பணிப்பாளர் நாயகம் சம்பத் கொடுவேகொட தெரிவித்துள்ளார்.

எனினும் மத்திய நிலையங்களுக்கு சொந்தமான கருவிகளை பராமரிப்பதற்கு கூட கடந்த காலங்களில் போதுமான மானியம் ஒதுக்கப்படவில்லை.

இவ்வாறான குறைபாடுகளுக்கு மத்தியில் எவ்வாறு அனர்த்தங்களை முகாமைத்துவம் செய்வது என அவர் கேள்வியெழுப்பியுள்ளார். நாடாளுமன்றத்தில் அண்மையில் இடம்பெற்ற கோப் குழு கூட்டத்தில் முன்னிலையாகி அவர் இந்த விடயங்களை முன்வைத்தார்.

அவர் மேலும் தெரிவிக்கையில், தித்வா புயல் தாக்கம் ஏற்பட்ட போது அனர்த்த முகாமைத்துவ மத்திய நிலையத்தில் 188 பதவிக்கான வெற்றிடங்கள் காணப்பட்டன.

தித்வா போன்ற ஒரு யானையை சிரட்டை போன்ற அனர்த்த முகாமைத்துவ மத்திய நிலையம் எதிர்கொண்டது என்றே குறிப்பிட வேண்டும். அனர்த்த முகாமைத்துவ மத்திய நிலையத்தில் 24 மணித்தியால சேவைக்கான அவசர தொலைபேசி கட்டமைப்பு காணப்படுகிறது.

இந்த அவசர சேவையில் ஈடுபடுபவர்களுக்கு போதுமான வசதிகள் ஏதும் கிடையாது. அவர்கள் பல அசௌகரியங்களுக்கு மத்தியில் தான் 24 மணித்தியாலமும் சேவையில் ஈடுபடுகிறார்கள்.

மாவட்ட மட்டத்தில் அனர்த்த முகாமைத்துவ ஒருங்கிணைப்பு அலகு ஒன்று உள்ளது. அதில் எழுதுவினைஞர்கள் ஐந்து பேர், பிரதி பணிப்பாளர் ஒருவர், உதவியாளர் மற்றும் சாரதி ஒருவர் உள்ளார்கள்.

இவர்கள் அனைவரும் மாலை 04.30 மணிக்கு பணியை முடித்து விட்டு வீட்டுக்குச் சென்றுவிடுவார்கள். குறித்த மாவட்டத்தில் 04.30 மணிக்கு பிறகு ஏதேனும் இயற்கை அனர்த்தம் நிகழ்ந்தால் பணிப்பாளரை அழைப்பதற்கு நீண்ட நேரம் செல்கிறது.

மாவட்ட மட்டத்திலான அனர்த்த முகாமைத்துவ ஒருங்கிணைப்பு அலகுடன் தொடர்புக் கொள்வது சவால்மிக்கதாக காணப்படுகிறது.

அதேபோல் அனர்த்த முகாமைத்துவ மத்திய நிலையத்துக்கு போதுமான ஆளனி வளங்கள் கிடையாது. காணப்படும் வெற்றிடங்களுக்கு உடன் நியமனங்களை வழங்க வேண்டும்.

மத்திய நிலையங்களுக்கு சொந்தமான கருவிகளை பராமரிப்பதற்கு கூட கடந்த காலங்களில் போதுமான மானியம் ஒதுக்கப்படவில்லை. இவ்வாறான குறைபாடுகளுக்கு மத்தியில் எவ்வாறு அனர்த்தங்களை முகாமைத்துவம் செய்வது என்றார்.

பொலன்னறுவை பகுதியில், சொகுசு காரில் ‘ஐஸ்’ போதைப்பொருளை கடத்தி வந்த இளம் தம்பதியினர் பொலிஸாரால் கைது செய்யப்பட்டுள்ளனர்.

இவ்வாறு கைது செய்யப்பட்டவர்கள், கந்தானை மற்றும் குளியாபிட்டிய பகுதிகளைச் சேர்ந்த 24 மற்றும் 22 வயதுடைய ஒரு இளைஞரும், ஒரு இளம் பெண்ணும் ஆவர்.

இரகசிய தகவல் ஒன்றின் அடிப்படையில் பொலன்னறுவை ஊழல் ஒழிப்புப் பிரிவின் அதிகாரிகள் நேற்று (12) நடத்திய சோதனையின்போது இந்த தம்பதியினர் கைது செய்யப்பட்டனர்.

சந்தேகத்திற்குரிய இளைஞரிடமிருந்து 27 கிராம் ‘ஐஸ்’ போதைப்பொருளும், பெண்ணிடமிருந்து 6,310 மில்லிகிராம் ‘ஐஸ்’ போதைப்பொருளும் கைப்பற்றப்பட்டதாக பொலிஸார் தெரிவித்துள்ளனர்.

இவர்கள் போதைப்பொருளை கடத்தியதாக சந்தேகிக்கப்படும் காரையும் பொலிஸார் கைப்பற்றியுள்ளனர்.

இவ்வாறு கைது செய்யப்பட்ட சந்தேகநபர்கள் மற்றும் வழக்கு ஆவணங்கள் இன்று (13) பொலன்னறுவை நீதவான் நீதிமன்றத்தில் முன்னிலைபடுத்தப்பட உள்ளன.

மட்டக்களப்பு – களுவாஞ்சிகுடி நகரில் உள்ள தங்க நகைக்கடையொன்றில் மிகவும் நுணுக்கமான முறையில் காப்பு ஒன்றை திருடிய பெண் களுவாஞ்சிகுடி பொலிஸாரால் கைது செய்யப்பட்டுள்ளனர்.

இந்த கைது நடவடிக்கை நேற்று முன்தினம் (10.07.2026) முன்னெடுக்கப்பட்டுள்ளது. தங்க காப்புடன் கைது
சம்பவம் தொடர்பில் மேலும் தெரியவருகையில்,

களுவாஞ்சிகுடி பகுதியில் அமைந்துள்ள நகைக்கடையொன்றில் கடந்த 2026.06.04 அன்று தங்க நகை கொள்வனவு செய்வதற்காக குறித்த பெண் கடைக்கு வந்துள்ளார்.

இதன்போது, ஒன்றரைப் பவுண் நிறையுடைய தங்க காப்பு ஒன்றை நுணுக்கமான முறையில் திருடிச் சென்றுள்ளார். இந்த சம்பவத்தை தொடர்ந்து, கடையின் உரிமையாளர் களுவாஞ்சிகுடி பொலிஸ் நிலையத்தில் முறைப்பாடு செய்துள்ளார்.

இதனைத் தொடர்ந்து, பொலிஸாருக்குக் கிடைக்கப்பெற்ற தகவல்களின் அடிப்படையில், நேற்று10) களுவாஞ்சிகுடி வைத்தியசாலையின் முன்னாள் வைத்து குறித்த பெண் கைது செய்யப்பட்டுள்ளார்.

இதன்போது அவரிடம் இருந்த தங்க காப்பு மீட்கப்பட்டுள்ளதுடன், சந்தேக நபரையும் தங்க நகையையும் நீதிமன்றத்தில் முன்னிலைப்படுத்தப்பட்டுள்ளதாக பொலிஸார் தெரிவித்துள்ளனர்.

இவ்வாறு கைது செய்யப்பட்ட பெண் 45 வயதுடை அம்பாறை பிரதேசத்தை பெண் என அடையாளம் காணப்பட்டுள்ளார். இந்த நிலையில், வெளியிடங்களில் இருந்து வருகை தருபவர்களிடம் சற்று அவதானமாக இருக்குமாறு அப்பகுதி மக்களுக்கு அறிவுறுத்தல் பொலிஸாரால் வழங்கப்பட்டுள்ளது.

பொதுமக்கள் தங்களது தனிப்பட்ட வங்கிக்கணக்கை வெளியாட்களுக்கு பயன்படுத்த அனுமதிக்க வேண்டாம் என மத்திய வங்கி பொதுமக்களுக்கு எச்சரிக்கை விடுத்துள்ளது. இது தொடர்பில் மத்திய வங்கி விடுத்துள்ள அறிக்கையில்,

ஒருவரின் தனிப்பட்ட வங்கிக் கணக்கில் நிகழும் ஒவ்வொரு பரிவர்த்தனைக்கும் அவரே பொறுப்பு என்று கூறியுள்ளது.

சிலர் சிறிய மாதாந்திர கட்டணத்திற்கு தங்களது வங்கிக்கணக்கை வாடகைக்கு விட முன்வருகின்றனர். அவ்வாறு வாடகைக்கு விடப்பட்ட கணக்குகள் சட்டவிரோத நடவடிக்கைகளுக்குப் பயன்படுத்தப்படுவதற்கான சாத்தியக்கூறுகள் அதிகம் என்றும் மத்திய வங்கி சுட்டிக்காட்டியுள்ளது.

எனவே இவ்வாறான சூழல் ஏற்படுமாயின் மற்றவர்களின் சட்டவிரோத நடவடிக்கைகளுக்கு நீங்களும் சட்டப்படி பதில் சொல்ல வேண்டியிருக்கும் என்றும் வாடிக்கையாளர்கள் எச்சரித்துள்ளது.

இது குறித்து பொதுமக்கள் விழிப்புடன் இருக்குமாறு மத்திய வங்கி பொதுமக்களுக்கு அறிவுறுத்தியுள்ளது.

நீர்கொழும்பு சிறைச்சாலையின் கூரையின் மீது நடைபெற்ற போராட்டத்தின் போது எடுக்கப்பட்ட ஒரு புகைப்படம் சமூக ஊடகங்களில் பெரும் பேசுபொருளான நிலையில் யுவதி சிறை சென்றதன் பின்னனி கதை வெளிவந்துள்ளது.

மருத்துவராகி மக்களுக்கு சேவை செய்யவேண்டிய யுவதி, காதலனை நம்பியதால் இன்று கம்பி எண்ணி கொண்டிருக்கின்றார். சட்டத்தின் பிடியில் சிக்கி, தங்கள் உரிமைக்காக கூரையின் மீது ஏறியிருந்த இளம் பெண்களில் ஒருவரின் முகம் அனைவரின் கவனத்தையும் ஈர்த்தது.

“இவ்வளவு அழகான ஒரு பெண் ஏன் இப்படிப்பட்ட இடத்தில் இருக்கிறார்?” என்ற கேள்வி பலரின் மனதிலும் எழுந்தது. சமூக ஊடகங்களில் அந்த யுவதி தொடர்பில் பலரும் பேசிக்கொண்டிருந்தபோது, அந்த புன்னகையின் பின்னால் இதயத்தை உருக்கும் அளவுக்கு வேதனையான ஒரு வாழ்க்கைக் கதை மறைந்திருந்தது.

அவரின் வாழ்க்கையை ஆராய்ந்த சகோதர மொழி பத்திரிகையாளர் நாலிந்த தனரஞ்சன், இந்த சோகமான சம்பவத்தை வெளிச்சத்திற்குக் கொண்டு வந்தார். அவர் பகிர்ந்த விவரங்களின்படி,

அந்த கைதி ஒரு காலத்தில் பதுளையைச் சேர்ந்த, பிரகாசமான எதிர்காலம் கொண்ட, நம்பிக்கைக்குரிய மாணவர் தலைவராகவும் திறமையான வலைப்பந்து வீராங்கனையாகவும் இருந்துள்ளார்.

அவர் தனது உயர் மட்டத் தேர்வுகளை முடித்து, நீரில்கொழும்பில் உள்ள தனது அத்தையின் வீட்டில் தங்கியிருந்தபோது அவரது வாழ்க்கை மாறியதாகக் கூறப்படுகிறது. அந்தக் காலகட்டத்தில், வாட்ஸ்அப் மூலம் சந்தித்த தனது காதலன் மீது அவர் முழு நம்பிக்கை வைத்திருந்தார்.

அவரது வேண்டுகோளின் பேரில், ஒரு பார்சலைக் கொண்டு செல்ல அவர் ஒப்புக்கொண்டார். அந்த சம்பவத்தின்படி, அந்தப் பார்சலில் சட்டவிரோத போதைப்பொருள் இருந்தது அவருக்குத் தெரியாது. கிடைத்த தகவலின் பேரில், காவல்துறையினர் அந்த பார்சலை இடைமறித்து, அவரை சம்பவ இடத்திலேயே கைது செய்தனர்.

அவர் சிறையில் இருந்தபோது இந்த சோகம் மேலும் ஆழமானது. தேசிய தேர்வு முடிவுகள் அதிகாரப்பூர்வமாக வெளியிடப்பட்டபோது, அந்த இளம் பெண் மருத்துவ பீடத்தில் சேர்வதற்கான தகுதியைப் பெற்றிருப்பதை அறிந்ததாகக் கூறப்படுகிறது.

ஒரு மதிப்புமிக்க தொழில் வாழ்க்கைக்கு வழிவகுத்திருக்க வேண்டிய ஒரு மைல்கல், அதற்குப் பதிலாக ஒரே ஒரு முடிவால் சிதைக்கப்பட்ட எதிர்காலத்தின் வேதனையான நினைவூட்டலாக மாறியது.

நீர்கொழும்பு சிறைச்சாலையில் வைரலான இந்தக் கதை, ஏமாற்றும் ஒன்லைன் உறவுகளின் ஆபத்துகள் குறித்த ஓர் எச்சரிக்கையாக மாறியுள்ளது. குற்றக் குழுக்கள், சந்தேகப்படாத மக்களைத் தூதுவர்களாகப் பயன்படுத்த, உணர்வுப்பூர்வமான பிணைப்புகளை அதிகளவில் சுரண்டுகின்றன என்று சட்ட அமலாக்க அதிகாரிகளும் சமூக ஆர்வலர்களும் எச்சரிக்கின்றனர்.

அறியாமலேயே நடந்த இந்தச் சம்பவம், காவல்துறைக்கு கிடைத்த தகவலால் முடிவுக்கு வந்தது. கைது செய்யப்பட்ட அவர் இன்று நீர்கொழும்பு சிறையில், தனது உரிமைகளுக்காக மற்ற கைதிகளுடன் கூரையின் மீது நின்று குரல் கொடுக்கிறார். மருத்துவராக வேண்டும் என்ற கனவு கண்ட கண்கள், இன்று சிறைச்சாலையின் வானத்தை நோக்கி கண்ணீருடன் நிற்கின்றன என அவர் குறிப்பிட்டுள்ளார்.

கொழும்பு – கண்டி பிரதான வீதியில், பட்டலிய சந்திக்கு அருகில் சம்பவித்த கோர விபத்தில், மோட்டார் சைக்கிளில் பயணித்த இரண்டு இளைஞர்கள் உயிரிழந்துள்ளதாக பொலிஸார் தெரிவித்துள்ளனர்.

இந்த விபத்தில் ரதாவடுன்ன பகுதியை சேர்ந்த இரண்டு இளைஞர்களே உயிரிழந்துள்ளதாக நிட்டம்புவ பொலிஸார் உறுதிப்படுத்தியுள்ளனர்.

கொழும்பில் இருந்து அனுராதபுரம் நோக்கிச் சென்ற தனியார் பயணிகள் பேருந்தை முந்திச் செல்ல மோட்டார் சைக்கிள் முற்பட்டபோது இந்த விபத்து சம்பவித்துள்ளது.

மோட்டார் சைக்கிள் முதலில் பேருந்தின் மீது மோதியதாகவும், பின்னர் கட்டுப்பாட்டை இழந்து, எதிரே வந்த லொறி ஒன்றின் மீது மோதி அதன் அடியில் சிக்கியதாகவும் ஆரம்பகட்ட விசாரணைகளில் தெரியவந்துள்ளது.

பேருந்து மற்றும் லொறி ஆகிய இரண்டு வாகனங்களிலும் மோட்டார் சைக்கிள் மோதியமையினால் கோர விபத்து நிகழ்ந்திருப்பதாக பொலிஸார் குறிப்பிட்டுள்ளனர்.

விபத்தில் படுகாயமடைந்த இளைஞர்களை அப்பகுதி மக்கள் மற்றும் பொலிஸார் இணைந்து உடனடியாக மருத்துவமனைக்குக் கொண்டு சென்றனர். எனினும் அவர்கள் ஏற்கனவே உயிரிழந்து விட்டதாக மருத்துவர்கள் தெரிவித்துள்ளனர்.

பொத்துவில் – அக்கரைப்பற்று பிரதான வீதியின் ஊரணி சந்திக்கு அருகில் வியாழக்கிழமை (09) காலை இடம்பெற்ற வாகன விபத்தில், படுகாயமடைந்த வேன் சாரதி சிகிச்சை பலனின்றி உயிரிழந்துள்ளார்.

இவ்விபத்தில் காரைதீவு பகுதியைச் சேர்ந்த 55 வயதுடைய குடும்பஸ்தரே இவ்வாறு பரிதாபகரமாக உயிரிழந்துள்ளதாகப் பொலிஸார் தெரிவித்தனர்.

உயிரிழந்தவர், கதிர்காமப் பாதயாத்திரை செல்லும் அடியார்களுக்காக உகந்தை பகுதியில் உணவுகளைத் தயாரித்து வழங்கிய பின்னர், வீடு திரும்பும் வழியிலேயே விபத்தில் சிக்கியுள்ளார்.

அக்கரைப்பற்று நோக்கிப் பயணித்துக் கொண்டிருந்த வேன், ஊரணி சந்திக்கு அருகில் சென்றபோது, எதிரே வந்த முச்சக்கர வண்டியுடன் எதிர்பாராதவிதமாக நேருக்கு நேர் மோதியுள்ளது.

விபத்தின் வேகத்தினால் இரண்டு வாகனங்களும் கட்டுப்பாட்டை இழந்து வீதியில் கவிழ்ந்ததில், வாகனங்கள் பலத்த சேதமடைந்தன. இவ்விபத்தில் வேன் ஓட்டுநரும், முச்சக்கர வண்டி ஓட்டுநரும் படுகாயமடைந்தனர்.

சம்பவ இடத்திற்கு விரைந்த பொதுமக்கள் இருவரையும் மீட்டுப் பொத்துவில் ஆதார மருத்துவமனையில் அனுமதித்தனர். எனினும், வேன் சாரதியின் நிலைமை கவலைக்கிடமாக இருந்ததால், அவர் மேலதிக அவசர சிகிச்சைக்காகக் கல்முனை பொது மருத்துவமனைக்கு மாற்றப்பட்டார்.

அவர் மருத்துவமனைக்குக் கொண்டு செல்லப்படும் வழியிலேயே உயிரிழந்துள்ளதாக மருத்துவமனை வட்டாரங்கள் உறுதிப்படுத்தியுள்ளன. முச்சக்கர வண்டி ஓட்டுநர் தொடர்ந்து பொத்துவில் மருத்துவமனையில் சிகிச்சை பெற்று வருகின்றார்.

உயிரிழந்தவரின் சடலம் பிரேதப் பரிசோதனைகளின் பின்னர் உறவினர்களிடம் ஒப்படைக்கப்பட உள்ளது. விபத்துத் தொடர்பில் பொத்துவில் பொலிஸார் மேலதிக விசாரணைகளை மேற்கொண்டு வருகின்றனர்.