எம்பிலிபிட்டிய, கிரவலவெல்கடுவ பகுதியில் மகனொருவர் தனது தாய் மற்றும் தந்தையை படுகொலை செய்துள்ளதாக குற்றம் சாட்டப்பட்டுள்ளது. குடும்பத்தினரிடையே ஏற்பட்ட தனிப்பட்ட வாய்த்தர்க்கம் முற்றியுள்ளது.

இந்த தகராறு முற்றிய நிலையிலேயே கொலை இடம்பெற்றுள்ளதாக பொலிஸார் தெரிவித்தனர். இந்தச் சம்பவத்தில் 58 வயதுடைய தந்தை மற்றும் 54 வயதுடைய தாய் ஆகியோர் உயிரிழந்துள்ளனர்.

கொலைச் சம்பவம் தொடர்பில் குறித்த தம்பதியினரின் 26 வயதுடைய மகன் பொலிஸாரால் கைது செய்யப்பட்டுள்ளார். சம்பவம் குறித்து எம்பிலிபிட்டிய பொலிஸார் மேலதிக விசாரணைகளை மேற்கொண்டு வருகின்றனர்.

புதிய இணைப்பு : கொத்மலை நீர்தேக்கத்திற்கு நீர் ஏந்தி செல்லும் ஆகுரோயா ஆற்றில் காணாமல் போயிருந்த மாணவன் இன்று(14.07.2026) சடலமாக மீட்கப்பட்டுள்ளதாக லிந்துலை பொலிஸார் தெரிவித்துள்ளனர்.

முதலாம் இணைப்பு : நண்பர்களுடன் குளிக்க சென்று காணாமல் போன மாணவனை இரண்டாவது நாளாக இன்றும்(14.07.2026) தேடும் பணி முன்னெடுக்கபட்டுள்ளது.

லிந்துலை பொலிஸ் பிரிவுக்குட்பட்ட பாடசாலை ஒன்றில் கல்வி கற்கும் தரம் 10 மாணவர் ஒருவர், பரீட்சை முடிந்த பின்னர் நண்பர்களுடன் ஆற்றில் குளிக்கச் சென்றபோது காணாமல் போன சம்பவம் பரபரப்பை ஏற்படுத்தியது.

இதனை தொடர்ந்து தீவிரமாகத் தேடியும் மாணவனின் உடலை நேற்று (13) கண்டறிய முடியவில்லை என்பதோடு, போதிய வெளிச்சம் இல்லாததால் இரவு தேடும் பணிகள் தற்காலிகமாக நிறுத்தப்பட்டது. சம்பவம் தொடர்பில் மேலும் தெரியவருவதாவது, நேற்று திங்கட்கிழமை (13) நண்பகல் சுமார் 12.30 மணியளவில்,

பாடசாலையில் நடைபெற்ற பரீட்சையை எழுதி முடித்த 10 மாணவர்கள் பாடசாலையிலிருந்து வெளியேறி, ஓல்ரிம் பகுதியின் கொத்மலை நீர்தேக்கத்திற்கு நீர் ஏந்தி செல்லும் ஆகுரோயா ஆற்றில் நீராடச் சென்றுள்ளனர்.

இதன்போது, மாணவர்களில் ஒன்பது பேர் பாதுகாப்பாக கரை திரும்பிய நிலையில், ஒரே மாணவன் மட்டும் எதிர்பாராதவிதமாக ஆழமான பகுதியில் சிக்கிக் கொண்டு நீரில் அடித்துச் செல்லப்பட்டுக் காணாமல் போயுள்ளார்.

இவ்வாறு காணாமல் போன மாணவன் லிந்துலை சரஸ்வதி தமிழ் மகா வித்தியாலயத்தில் கல்வி கற்கும் மிளகுசேனை தோட்டத்தைச் சேர்ந்த பரமநாதன் கிஷோர் (15 வயது) என அடையாளம் காணப்பட்டுள்ளார்.

குறித்த மாணவனைத் தேடும் பணிகளை லிந்துலை பொலிஸாரும், பிரதேச மக்களும் இணைந்து இரண்டாவது நாளாக தீவிரமாக முன்னெடுத்து வருகின்றனர்.

முகநூல் நேரலையின்போது உயிரிழந்த, கரன்தெனியவின் தல்கவத்த பகுதியைச் சேர்ந்த 35 வயது நபரின் மரணம் குறித்து கரன்தெனிய பொலிஸார் விசாரணையைத் தொடங்கியுள்ளனர்.

இறந்தவரான தினேஷ் விஜேவர்தன, பல ஆண்டுகளாக தென்கொரியாவில் பணியாற்றி, அண்மையில் இலங்கை திரும்பியிருந்ததாகக் கூறப்பட்டுள்ளது.

பொலிஸாரின் கூற்றுப்படி, இந்தச் சம்பவம் ஜூலை 12 ஆம் திகதி இரவு நிகழ்ந்துள்ளது. நேரலை ஒளிபரப்பின் போது, ​​அவர் தவறான முடிவெடுப்பதற்கு முன்பு ஆரம்பத்தில் நண்பர்களுடன் உரையாடிக் கொண்டிருந்ததாக தெரிவிக்கப்பட்டுள்ளது.

119 என்ற அவசர உதவி எண் மூலம் முறைப்பாடு வந்ததையடுத்து விசாரணையைத் தொடங்கியதாக பொலிஸார் தெரிவித்துள்ளனர். மேலதிக விசாரணைகளுக்காக சடலம் எல்பிட்டிய வைத்தியசாலை பிரேத அறையில் வைக்கப்பட்டுள்ளது.

நாட்டில் டெங்கு தொற்றாளர்களின் எண்ணிக்கை 70ஆயிரத்தை நெருங்கியுள்ளதாக தேசிய டெங்கு கட்டுப்பாட்டுப் பிரிவு தெரிவித்துள்ளது. நேற்று நள்ளிரவு நிலவரப்படி, நாட்டில் டெங்கு தொற்றுக்குள்ளானவர்களின் எண்ணிக்கை, 69951ஆக பதிவாகியுள்ளது.

இவர்களுள் மேல் மாகாணத்தில் அதிகளவான தொற்றாளர்கள் பதிவாகியுள்ளனர். இதன்படி, மேல் மாகாணத்தில் மொத்தம் 36,795 டெங்கு தொற்றாளர்கள் அடையாளம் காணப்பட்டுள்ளனர்.

அத்துடன், தென் மாகாணத்தில், 10,955 தொற்றாளர்களும், சபரகமுவ மாகாணத்தில் 5,878 தொற்றாளர்களும் பதிவாகியுள்ளனர்.

இதேவேளை, இதுவரையான நாட்களில் கம்பஹா மற்றும் கொழும்பு உள்ளிட்ட மாவட்டங்களில் மிக அதிகமாக டெங்கு தொற்றாளர்கள் பதிவாகியுள்ளனர்.

இதன்படி, கம்பஹா மாவட்டத்தில் 14,464 டெங்கு தொற்றாளர்களும், கொழும்பு மாவட்டத்தில், 14,004 டெங்கு தொற்றாளர்களும் பதிவாகியுள்ளனர்.

இதேவேளை வருடத்தின் இதுவரையான நாட்களில் கடந்த ஜூன் மாதம் மிக அதிகளவான டெங்கு தொற்றாளர்கள் நாட்டில் பதிவாகியுள்ளனர்.

21,538 டெங்கு தொற்றாளர்கள் ஜூன் மாதத்தில் பதிவாகியுள்ளதுடன், ஜூலை மாதத்தின் இதுவரையான நாட்களில், 14,572 டெங்கு தொற்றாளர்கள் பதிவாகியுள்ளமை குறிப்பிடத்தக்கது.

இலங்கையில் பயணிகளை ஏற்றிச் செல்லும் திறன் கொண்ட ஆளில்லா விமானச் சேவையைச் சோதனை செய்வதற்கான திட்டங்களை சிவில் விமானப் போக்குவரத்து ஆணையகம் அறிவித்துள்ளது.

சிவில் விமானப் போக்குவரத்து ஆணையத்தின் பணிப்பாளர் நாயகம் தமிந்த ரம்புக்வெல்ல, இந்த முன்னெடுப்பு ஒரு முன்னோடித் திட்டமாகச் செயல்படுத்தப்படும் என்றும் இது விமானப் போக்குவரத்தை நவீனமயமாக்குவதில் ஒரு குறிப்பிடத்தக்க படியாக அமையும் என்றும் கூறியுள்ளார்.

ஒவ்வொரு ட்ரோன் விமானமும் ஆறு பயணிகளை ஏற்றிச் செல்லும் திறன் கொண்டது என்று குறிப்பிட்டுள்ளார். சீனா, சிங்கப்பூர் மற்றும் தாய்லாந்தில் இதுபோன்ற திட்டங்கள் ஏற்கனவே வெற்றிகரமாகச் செயல்பட்டு வருகின்றன என்றும் அதிகாரிகள் குறிப்பிட்டுள்ளனர்.

நீர்கொழும்பு சிறைச்சாலை மோதலில் உயிரிழிந்த அதிகாரியொருவரின் கடைசி ஆசை தொடர்பான விவரங்கள் வெளியாகியுள்ளது. சம்பவம் தொடர்பில் மேலும் தெரியவருகையில்,

கடந்த 5ஆம் மற்றும் 6ஆம் திகதிகளில் ஒட்டுமொத்த இலங்கையையும் பதைபதைக்க வைக்கும் சம்பவம் ஒன்று இடம்பெற்றுள்ளது. இதற்கமைய, நீர்க்கொழும்பு சிறைச்சாலை மோதலில் 21 கைதிகளும் 8 பொலிஸ் அதிகாரிகளும் உயிரிழந்துள்ளனர்.

அத்துடன், சிறைச்சாலையில் இருந்து 40 ஆயிரம் கைதிகள் வேறு வேறு இடங்களில் உள்ள சிறைச்சாலைகளுக்கு மாற்றப்பட்டுள்ளனர்.

இதனை தொடர்ந்து, அம்பலந்தோட்டாவின் பாலகஹகொடெல்லா பகுதியில் வசித்து வந்த 39 வயதான சிறைக்காவலர் சந்திக லஷன் குணவர்தன, சம்பவம் நடந்து ஒரு வாரக் காலப்போராட்டத்திற்கு பின்னர் நேற்று(13.07.2026) இரவு உயிரிழந்துள்ளார்.

குறித்த அதிகாரிக்கு 7 வயதில் மகன் ஒருவர் இருப்பதாகவும், அவர் இதய நோயால் பாதிக்கப்பட்டு அவதிப்பட்டு வந்ததாகவும் தெரிவிக்கப்பட்டுள்ளது.

அந்த சிறுவனின் உயிரைக் காப்பாற்ற பெரும் பணம் தேவை என்பதால் உயிரிழந்த அதிகாரி சந்திக மகனின் உயிரைக் காப்பாற்ற தொடர்ந்து பணம் தேடிக் கொண்டிருந்ததாக சக அதிகாரிகள் தெரிவித்துள்ளனர்.

இந்த நிலையில், சிறைச்சாலை மோதலில் படுகாயமடைந்து, கொழும்பு தேசிய மருத்துவமனையின் தீவிர சிகிச்சைப் பிரிவில் சிகிச்சை பெற்று வந்த சந்திக, தனது இறுதி மூச்சை விடும்போதும் சிறுவனின் நினைவுகளில் இருந்தார் என்றும்,

தனது கடமைக்காக உயிரைத் தியாகம் செய்த ஒரு மாவீரனின் கடைசி விருப்பம், அவரின் குழந்தையைக் காப்பாற்றுவதே என்றும் கூறப்படுகிறது. அத்துடன், சிறைச்சாலை மோதல் சம்பவத்தில், 100க்கும் மேற்பட்ட சிறை அதிகாரிகளும் கைதிகளும் காயமடைந்துள்ளனர் என்பதும் குறிப்பிடத்தக்கது.

ஹட்டன் நகரில் வீதியோரமாக நிறுத்தி வைக்கப்பட்டிருந்த மோட்டார் சைக்கிள் ஒன்றில் முன்பகுதி பாதுகாப்புக் கவசத்திற்குள் பாம்பு ஒன்று புகுந்துள்ள நிலையில் மீட்கப்பட்டுள்ளது. இந்த சம்பவம் நேற்று (13.07.2026) அப்பகுதி மக்களிடையே பெரும் பரபரப்பை ஏற்படுத்தியுள்ளது.

நேற்று சுமாராக 3 மணியளவில், ஹட்டன் நகரில் உள்ள வர்த்தக நிலையம் ஒன்றிற்கு பொருட்கள் வாங்கச் சென்றிருந்த மோட்டார் சைக்கிளின் உரிமையாளர், தனது வாகனத்தை வீதியோரமாக நிறுத்திவிட்டு சென்றுள்ளார்.

இதன்போது, மோட்டார் சைக்கிளின் முன்பகுதி பாதுகாப்புக் கவசத்திற்குள் பாம்பு ஒன்று இருந்துள்ளது. இதனையடுத்து, அருகில் சென்ற ஒருவர் அந்தப் பாம்பு கவசத்திற்குள் இருந்து தலையை வெளியே நீட்டி எட்டிப்பார்த்ததை கண்டு அதிர்ச்சியடைந்து, அங்கிருந்தவர்களுக்கு தகவல் வழங்கியுள்ளார்.

தகவல் அறிந்ததும் அப்பகுதியில் இருந்த பொதுமக்கள் மற்றும் வர்த்தகர்கள் சம்பவ இடத்திற்கு திரண்டு வந்ததால், அப்பகுதியில் சிறிது நேரம் பரபரப்பான நிலை ஏற்பட்டுள்ளது.

அதன் பின்னர், அங்கிருந்த சிலர் மிகவும் அவதானமாக செயல்பட்டு, மோட்டார் சைக்கிளின் கவசப் பகுதியில் இருந்த பாம்பை தடியின் ஊடாக பாம்பை பாதுகாப்பாக வெளியே எடுத்துள்ளனர்.

பாம்பிற்கு எந்தவித சேதமும் ஏற்படாத வகையில் ஹட்டன் தொடருந்து நிலையப் பாதைக்கு அண்மையிலுள்ள புதர்ப்பகுதியில் விடப்பட்டுள்ளது.

இந்தச் சம்பவத்தில் யாருக்கும் எந்தவித காயங்களோ அல்லது சேதங்களோ ஏற்படவில்லை. இருப்பினும், நகர்ப்புறங்களிலும் வாகனங்களுக்குள் பாம்புகள் புகும் சம்பவங்கள் அவ்வப்போது பதிவாகி வருவதால்,

நீண்ட நேரம் நிறுத்தி வைக்கப்பட்டிருக்கும் வாகனங்களை இயக்குவதற்கு முன் அவற்றை நன்கு பரிசோதித்துக் கொள்வது அவசியம் என அப்பகுதி மக்கள் தெரிவித்துள்ளனர்.

இலங்கையில் தங்கத்தின் விலை இன்று (14) மீண்டும் சரிவைச் சந்தித்துள்ளது. அகில இலங்கை நகையக வியாபாரிகள் சங்கம் வெளியிட்டுள்ள தகவலின்படி, நேற்று (13) 24 கரட் தங்கம் ஒரு பவுண் 376,000 ரூபாயாக விற்பனையான நிலையில், இன்று அதன் விலை 2,000 ரூபாயால் குறைந்து 374,000 ரூபாயாக பதிவாகியுள்ளது.

அந்தவகையில், தற்போதைய தங்க விலை நிலவரப்படி, 24 கரட் தங்கம் பவுண் ஒன்று 374,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 344,000 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 46,750 ரூபாயாகவும், 22 கரட் தங்கத்தின் ஒரு கிராமின் விலை 43,000 ரூபாயாகவும், விற்பனை செய்யப்படுகிறது.

தங்கம் வாங்கத் திட்டமிட்டுள்ளோர், சந்தை விலை மாற்றங்களைத் தொடர்ந்து கவனித்து வாங்குவது சிறந்தது என நகை வியாபாரிகள் தெரிவிக்கின்றனர்.

நீர்கொழும்பு சிறைச்சாலையில் அண்மையில் ஏற்பட்ட மோதல் சம்பவத்தின் போது, சிறைச்சாலை கூரையின் மீது ஏறி போராட்டத்தில் ஈடுபட்ட பெண் கைதி ஒருவரை மையப்படுத்தி

சமூக வலைத்தளங்களில் வைரலாகி வரும் உருக்கமான பின்னணிக் கதை முற்றிலும் உண்மைக்கு புறம்பானது என ‘உண்மைக் கண்டறியும் அமைப்பினால் மேற்கொள்ளப்பட்ட விசாரணையில் உறுதி செய்யப்பட்டுள்ளதாக தகவல் வெளியாகியுள்ளது.

கடந்த ஜூலை 5 மற்றும் 6ஆம் திகதிகளில் நீர்கொழும்பு சிறைச்சாலையில் கைதிகளிடையே ஏற்பட்ட பயங்கர மோதலில் 29 பேர் உயிரிழந்ததுடன், நூற்றுக்கும் மேற்பட்டோர் காயமடைந்தனர்.

இந்த பதற்றமான சூழ்நிலையின் போது, சில கைதிகள் சிறைச்சாலையின் கூரையின் மேல் ஏறி கைதிகள் உரிமைக்காகப் போராட்டத்தில் ஈடுபட்டனர்.

இதன்போது எடுக்கப்பட்ட புகைப்படங்களில் இருந்த ஒரு பெண் கைதியின் தோற்றத்தை அடிப்படையாக வைத்து, சமூக வலைத்தளங்களில் ஒரு சோகமான கதை வேகமாகப் பரப்பப்பட்டது.

இந்தச் செய்தி சமூக வலைத்தளங்களில் பெரும் அதிர்வலைகளையும் அனுதாபத்தையும் ஏற்படுத்திய நிலையில், ‘உண்மைக்கண்டறியும் அமைப்பொன்று இது குறித்து விரிவான விசாரணைகளை முன்னெடுத்தது.

இந்தக் கதையைத் தனது பேஸ்புக் பக்கத்தில் முதன்முதலில் பதிவிட்ட நபர் “இது ஒரு உண்மைக் கதை அல்ல, பேஸ்புக் பக்கங்களில் பொழுதுபோக்கிற்காகவும்,

சமூகத்தின் கவனத்தை ஈர்ப்பதற்காகவும் நானே கற்பனையாக உருவாக்கிய கதை” என்பதை ஒப்புக்கொண்டுள்ளதாக தெரிவிக்கப்படுகின்றது.

அத்துடன், சிறைச்சாலைத் தரப்பினரிடம் இது குறித்து வினவிய போது, கைதிகளின் தனிப்பட்ட விபரங்களை வெளியிட முடியாது எனத் தெரிவித்துள்ளனர்.

எனவே, நீர்கொழும்பு சிறைக்கூரையின் மேல் போராடிய பெண் கைதி ஒரு வைத்திய மாணவி என்றும், காதலனால் ஏமாற்றப்பட்டு சிறை சென்றவர் என்றும் பரவும் செய்திகள் அனைத்தும் பேஸ்புக் பயனர் ஒருவரால் உருவாக்கப்பட்ட முற்றிலும் கற்பனையான வதந்தி என்பது உறுதியாகியுள்ளது.

உலகளாவிய உணவுச் சுற்றுலாத் துறையில் (Culinary Tourism) இலங்கை மற்றுமொரு மைல்கல்லை எட்டியுள்ளது. பிரபல சர்வதேச சுற்றுலா இதழான “டிராவல் அண்ட் டூர் வேர்ல்ட்” (Travel And Tour World – TTW) வெளியிட்டுள்ள 2026 ஆம் ஆண்டிற்கான “உலகின் தலைசிறந்த 50 உணவு நாடுகள்” பட்டியலில் இலங்கை பெருமையுடன் இடம்பிடித்துள்ளது.

சர்வதேச அளவில் உலக நாடுகளின் சமையல் பாரம்பரியம், பிராந்திய உணவு வகைப்பாடு, வீதி உணவு கலாசாரம் , நளினமான உணவகங்கள், உள்நாட்டுப் பொருட்கள், நிலைத்தன்மை,

பாரம்பரிய பானங்கள் மற்றும் கலாசார நம்பகத்தன்மை ஆகிய முக்கிய காரணிகளை அடிப்படையாகக் கொண்டு இந்தத் தரவரிசைப் பட்டியல் தயாரிக்கப்பட்டுள்ளது.

இலங்கை உணவுகளின் தனித்துவமான சுவை, நறுமணமிக்க வாசனைப் பொருட்கள், புத்தம் புதிய கடல் உணவுகள் மற்றும் வெப்பமண்டல உணவுப் பொருட்கள் உலகளாவிய உணவுப் பிரியர்களைப் பெரிதும் கவர்ந்துள்ளதாக இந்த இதழ் சுட்டிக்காட்டியுள்ளது.

இலங்கை என்பது நறுமணமிக்க வாசனைப் பொருட்கள்மற்றும் பல நூற்றாண்டு கால கலாசார தாக்கங்கள் இணைந்து மறக்க முடியாத உணவு அனுபவங்களை வழங்கும் ஒரு துடிப்பான தேசமாகும்.

பரபரப்பான வீதி உணவுக் கடைகள் முதல் கடற்கரையோர நேர்த்தியான உணவகங்கள் வரை இங்கு பலதரப்பட்ட சுவைகளை அனுபவிக்க முடியும்” என புகழாரம் சூட்டப்பட்டுள்ளது.

பாரம்பரிய சோறும் கறியும், ஆப்பம், கொத்து ரொட்டி, கடல் உணவு வகைகள் மற்றும் உள்நாட்டு இனிப்புப் பண்டங்கள் போன்றவை சர்வதேச அரங்கில் இலங்கையின் அடையாளத்தை மேலும் உயர்த்தியுள்ளன.

இலங்கையின் சமையல் கலையை முழுமையாக அனுபவிக்க விரும்பும் சுற்றுலாப் பயணிகள் கட்டாயம் செல்ல வேண்டிய 10 முக்கிய இடங்களையும் இந்த இதழ் பட்டியலிட்டுள்ளது:

1. கொழும்பு: சோறும் கறியும், கொத்து ரொட்டி, ஆப்பம் மற்றும் புதிய கடல் உணவுகள்.
2. காலி: பிரசித்தி பெற்ற கடல் உணவுகள், இலங்கை கறிகள் மற்றும் காலணித்துவ காலத்து உணவகங்கள்.
3. கண்டி: பாரம்பரிய சோறும் கறியும் மற்றும் உள்நாட்டு பாரம்பரிய இனிப்பு வகைகள்.
4. நீர்கொழும்பு: கடல் உணவு கறிகள், சுடச்சுட வறுத்த மீன்கள் மற்றும் காயல் (Lagoon) உணவுச் சிறப்புகள்.
5. எல்ல: இயற்கை முறையில் விளைவிக்கப்பட்ட பொருட்கள் மற்றும் மலையக உணவு அனுபவங்கள்.
6. யாழ்ப்பாணம்: உலகப் புகழ்பெற்ற நண்டுக்கறி, தோசை மற்றும் காரசாரமான தமிழ் பாரம்பரிய சுவைகள்.
7. மிரிஸ்ஸ: புத்தம் புதிய கடல் உணவுகள் மற்றும் கடற்கரையோர தளர்வான உணவு அனுபவம்.
8. நுவரெலியா: தேயிலை சார்ந்த உணவு வகைகள், பேஸ்ட்ரிகள் மற்றும் காலணித்துவ கால பாரம்பரிய உணவுகள்.
9. ஹிக்கடுவ: கடல் உணவுகள், இலங்கை கறிகள் மற்றும் துடிப்பான கடற்கரை உணவகங்கள்.
10. திருகோணமலை: புதிய கடல் உணவுகள் மற்றும் உண்மையான கடலோர உணவு கலாசாரம்.

இந்த சர்வதேசப் பட்டியலில் இந்த வரிசையில் முதல் இடத்தை மெக்ஸிக்கோவும், இரண்டாம் இடத்தை இத்தாலியும் மூன்றாம் இடத்தை ஸ்பெய்னும் வகிக்கின்றன.

ஆசியா, ஐரோப்பா, அமெரிக்கா மற்றும் ஆப்பிரிக்கா போன்ற உலகளாவிய பிராந்தியங்களின் முன்னணி உணவு நாடுகளுடன் இணைந்து இலங்கை இப்பட்டியலில் 50 ஆவது இடத்தைப் பிடித்துள்ளது.

சுற்றுச்சூழலுக்குப் பாதிப்பில்லாத நிலையான உணவுப் பழக்கவழக்கங்கள் மற்றும் பாரம்பரிய சமையல் முறைகளைப் பாதுகாப்பதில் இலங்கை காட்டி வரும் அக்கறைக்குக் கிடைத்த சர்வதேச அங்கீகாரமாக இது பார்க்கப்படுகிறது.

சந்தேகத்திற்கிடமான இணைய இணைப்புகள் மூலம் போக்குவரத்து அபராதங்களை ஒன்லைனில் செலுத்துமாறு அறிவுறுத்தும் மோசடி குறுஞ்செய்திகள் மற்றும் வாட்ஸ்அப் செய்திகள் குறித்து இலங்கை பொலிஸ் திணைக்களம் வாகன சாரதிகளை எச்சரித்துள்ளது.

மோட்டார் போக்குவரத்துத் திணைக்களத்திடமிருந்து (DMT) வந்ததாகத் தோன்றும் அந்தச் செய்திகள், கூறப்படும் போக்குவரத்து விதிமீறல்களுக்கான அபராதங்களை ஒரு வாரத்திற்குள் செலுத்த வேண்டும் என்று கூறுகின்றன.

இருப்பினும், போக்குவரத்து கட்டுப்பாடு மற்றும் சாலை பாதுகாப்பிற்கு பொறுப்பாளரான டிஐஜி டபிள்யூ.பி.ஜே. செனடீரா, டிஎம்டி அத்தகைய எந்த அறிவிப்புகளையும் வெளியிடவில்லை என்றும், அந்தச் செய்திகள் முற்றிலும் போலியானவை என்றும் வலியுறுத்தப்பட்டுள்ளது.

மேலும் அந்த குறுஞ்செய்தி இணைப்புகளைத் திறக்கவோ, தனிப்பட்ட அல்லது வங்கி விவரங்களை வழங்கவோ, அல்லது அந்தச் செய்திகளுக்குப் பதிலளிக்கவோ வேண்டாம் என்று பொதுமக்களை வலியுறுத்தியுள்ளார்.

பாதிக்கப்பட்ட எவரும் உடனடியாக அருகிலுள்ள பொலிஸ் நிலையத்தில் தகவல் தெரிவிக்க வேண்டும் என்றும் அவர் மேலும் அறிவுறுத்தியுள்ளார்.