1997ஆம் ஆண்டு இடம்பெற்ற கொலை சம்பவம் தொடர்பான வழக்கில் எட்டு பேருக்கு கொழும்பு உயர் நீதிமன்றம் மரண தண்டனை விதித்துள்ளது. கொலைக்குற்றம் சாட்டிய 08 பிரதிவாதிகளுக்கு கொழும்பு உயர் நீதிமன்றம் மரண தண்டனை விதித்துள்ளது.

குறித்த வழக்கு தொடர்பான விசாரணைகள் நிறைவடைந்த நிலையில், குற்றச்சாட்டுகள் நிரூபிக்கப்பட்ட 7 குற்றவாளிகளுக்கும் மரண தண்டனை விதித்து நீதிமன்றம் இன்று (08) தீர்ப்பளித்துள்ளது.

இந்த வழக்கில் குற்றம்சாட்டப்பட்ட ஏழு பிரதிவாதிகள் இன்று (08) நீதிமன்றத்தில் முன்னிலையான நிலையில், மற்றொரு பிரதிவாதி இல்லாமல் விசாரணையை நடத்த நீதிமன்றம் தீர்மானித்திருந்தது.

1997 ஆம் ஆண்டு கொழும்பு நீதிமன்றத்தின் அதிகார வரம்பிற்குட்பட்ட பகுதியில் கொலை மற்றும் பலரை காயப்படுத்தியதற்காக, பிரதிவாதிகளுக்கு எதிராக சட்டமா அதிபர் இந்த வழக்கை தாக்கல் செய்திருந்தார்.

இதற்கமைய, அரச தரப்பால் பிரதிவாதிகளுக்கு எதிராக சுமத்தப்பட்ட குற்றச்சாட்டுகள் நீண்ட விசாரணைக்கு பின்னர் சந்தேகத்திற்கு இடமின்றி நிரூபிக்கப்பட்டுள்ளன. அதன்படி, பிரதிவாதிகளுக்கு மரண தண்டனை விதித்து கொழும்பு உயர் நீதிமன்றம் தீர்ப்பளித்துள்ளது.

வவுனியாவில் உள்ளூர் நிறுவனங்களுக்கு இடையே விளையாட்டுத் திறனையும், சுமுகமான உறவையும் மேம்படுத்தும் நோக்கில் ஏற்பாடு செய்யப்பட்டிருந்த “பெரும் சமர்” (Big Match) துடுப்பாட்டப் போட்டி மிக பிரம்மாண்டமாக நடைபெற்றது.

வவுனியாவின் முன்னணி நிதி நிறுவனங்களான கொமர்சல் கிரடிட் (Commercial Credit) வவுனியா கிளை மற்றும் சிங்கர் பினான்ஸ் (Singer Finance) வவுனியா கிளை ஆகிய அணிகள் இந்தத் தொடரில் நேருக்கு நேர் மோதிக்கொண்டன.

விறுவிறுப்புக்கு பஞ்சம் இல்லாத வகையில் அமைக்கப்பட்ட இந்தத் தொடர் 10 பந்து பரிமாற்றங்கள் (10 Overs) கொண்ட மட்டுப்படுத்தப்பட்ட ஓவர்கள் போட்டி , வெற்றியாளரைத் தீர்மானிக்க மூன்று சுற்றுப்போட்டிகள் (3 Match Series) ஆகிய விதிகளின் அடிப்படையில் நடைபெற்றது.

நாணயச் சுழற்சியில் இருந்து ஆட்டத்தின் இறுதிப் பந்து வரை இரு அணிகளுமே வெற்றிக்காகக் கடுமையாகப் போராடின. அதிரடி ஓட்டக் குவிப்புகள், துல்லியமான பந்துவீச்சு என மைதானம் முழுவதும் பரபரப்பு தொற்றிக்கொண்டது.

இரு அணிகளும் தலா ஒரு போட்டியில் வெற்றி பெற்று சமநிலை வகித்ததால், இறுதிப் போட்டியே தொடரின் வெற்றியாளரைத் தீர்மானிக்கும் தீர்க்கமான ஆட்டமாக அமைந்தது.

ரசிகர்களின் பலத்த எதிர்பார்ப்புக்கு மத்தியில் நடைபெற்ற இறுதிச் சுற்றில், கொமர்சல் கிரடிட் வவுனியா கிளை அணி தனது அபாரமான துடுப்பாட்டம் மற்றும் நேர்த்தியான களத்தடுப்பு ஆட்டத்தை வெளிப்படுத்தியது. சிங்கர் பினான்ஸ் அணியின் சவாலை முறியடித்து, கொமர்சல் கிரடிட் அணி இறுதிப் போட்டியில் மாபெரும் வெற்றியைப் பதிவு செய்தது.

இதன் மூலம் மூன்று போட்டிகள் கொண்ட இந்தத் தொடரைத் தன்வசப்படுத்தி கொமர்சல் கிரடிட் கிண்ணத்தினை (Commercial Credit) கொமர்சல் கிரடிட் வவுனியா கிளை அணி பெருமையோடு தட்டிச் சென்றது.

போட்டியின் நிறைவில் வெற்றியீட்டிய அணிக்கு சாம்பியன் கிண்ணமும், சிறப்பான திறமைகளை வெளிப்படுத்திய வீரர்களுக்கு விசேட பரிசில்களும் வழங்கி கௌரவிக்கப்பட்டன. விளையாட்டு ஆர்வலர்கள் மற்றும் இரு நிறுவனங்களின் ஊழியர்கள் எனப் பெருந்திரளானோர் திரண்டு வந்து வீரர்களை உற்சாகப்படுத்தினர்.

முச்சக்கரவண்டி வாங்குவதற்காகப் பெற்றிருந்த 1 இலட்சம் ரூபாய் கடனை திருப்பிச் செலுத்த முடியாத நிலையில், ஒரு மாதக் குழந்தையைக் கடத்திச் சென்று 1.5 இலட்சம் ரூபாய்க்கு விற்பனை செய்த அதிர்ச்சி சம்பவம் வெளியாகியுள்ளது.

இந்த அதிர்ச்சி சம்பவம் இந்தியா குஜராத் மாநிலம் அஹமதாபாத்தில், இடம்பெற்றுள்ளது. சம்பவம் தொடர்பாகக் குழந்தையின் பெற்றோர் அளித்த முறைப்பாட்டின் அடிப்படையில், காவல்துறையினர் உடனடியாக விசாரணைகளை முன்னெடுத்து,

கடத்தப்பட்ட குழந்தையைப் பாதுகாப்பாக மீட்டுப் பெற்றோரிடம் ஒப்படைத்துள்ளனர். மேலும், குழந்தை கடத்தல் விற்பனைச் சம்பவத்தில் தொடர்புடைய 4 பெண்கள் கைது செய்யப்பட்டுள்ளதுடன், தீவிர விசாரணைகள் மேற்கொள்ளப்பட்டு வருகின்றதாகவும் தெரிவிக்கப்பட்டுள்ளது.

பாணந்துறை வடக்கு பொலிஸ் பிரிவிற்குட்பட்ட கல்கணுவ வீதியிலுள்ள வாடகை வீடு ஒன்றிலிருந்து இளம் பெண் ஒருவரின் சடலம் மீட்கப்பட்டுள்ளதாக பொலிஸார் தெரிவித்துள்ளனர்.

உயிரிழந்தவர் பாணந்துறை வடக்கு கல்கணுவ வீதியிலுள்ள வாடகை வீட்டில் தங்கியிருந்து, தனியார் பல்கலைக்கழகம் ஒன்றில் சட்டப் பட்டப்படிப்பை பயின்று வந்த மான்னமரக்கலகே நதுனி சஹஸ்ரீ குரே என்ற 26 வயதுடைய யுவதி என அடையாளங்காணப்பட்டுள்ளார்.

உயிரிழந்த இளம் பெண் வீட்டில் தனியாக வசித்து வந்துள்ளதோடு, அவர் இவ்வீட்டிலிருந்து தனது கல்வி நடவடிக்கைகளையும், மேலதிகமாக சட்டத்தரணி ஒருவரின் நீதிமன்ற பணிகளையும் மேற்கொண்டு வந்துள்ளார்.

இந் நிலையில் இது தற்கொலையா? அல்லது வேறு ஏதேனும் சம்பவமா? என்பது தொடர்பில் பாணந்துறை வடக்கு பொலிஸார் மேலதிக விசாரணைகளை மேற்கொண்டு வருகின்றனர்.

இலங்கையில் டெங்கு காய்ச்சலின் பரவல் நடப்பு ஆண்டில் கணிசமாக அதிகரித்து வருவதாக தேசிய டெங்கு கட்டுப்பாட்டுப் பிரிவு வெளியிட்டுள்ள புதிய தரவுகள் தெரிவிக்கின்றன.

ஞாயிற்றுக்கிழமை (05) நள்ளிரவு வரையிலான தரவுகளுக்கமைய, நாடு முழுவதும் 61,060 டெங்கு நோயாளர்கள் அடையாளம் காணப்பட்டுள்ளதோடு, 39 மரணங்களும் பதிவாகியுள்ளன. தற்போது மரண வீதம் 0.06 சதவீதமாகக் காணப்படுகிறது.

மாதாந்த ரீதியில் கடந்த ஜூன் மாதத்தில் மாத்திரம் 21,546 நோயாளர்கள் பதிவாகியுள்ள அதேவேளை, ஜூலை மாதத்தின் முதல் ஐந்து நாட்களில் மட்டும் 5,673 நோயாளர்கள் பதிவாகியுள்ளமை குறிப்பிடத்தக்கது.

மாகாண ரீதியில் அவதானிக்கும் போது, மேல் மாகாணம் 32,054 நோயாளர்களுடன் மிக மோசமாகப் பாதிக்கப்பட்டுள்ளது.

அதற்கு அடுத்தப்படியாக தென் மாகாணத்தில் 9,674 நோயாளர்களும் அடையாளம் காணப்பட்டுள்ளனர். கொழும்பு மாவட்டத்தில் 12,445 பேரும், கம்பஹாவில் 12,282 பேரும் பாதிக்கப்பட்டுள்ளனர்.

நாடு முழுவதும் 142 சுகாதார வைத்திய அதிகாரி பிரிவுகள் டெங்கு பரவும் அதிவேக அபாய வலயங்களாக அடையாளம் காணப்பட்டுள்ளன. மேலும் 26 ஆவது வாரத்தின் நள்ளிரவு சராசரி கணக்கெடுப்பின்படி வாராந்த தொற்று பாதிப்பு 2,604 ஆக உயர்ந்துள்ளது.

இலங்கையை உலுக்கிய நீர்கொழும்பு சிறை கலவரத்தில் உயிரிழந்த 7 அதிகாரிகளின் புகைப்படங்கள் வெளியாகியுள்ளது.

நீர்கொழும்பு சிறைச்சாலையில் போதைப்பொருள் கடத்தலுடன் தொடர்புடைய குழுவிற்கும், அதற்கு எதிர்ப்புத் தெரிவிக்கும் குழுவிற்கும் இடையே ஏற்பட்ட மோதலில் 27 பேர் உயிரிழந்துள்ளனர்.

நேற்று முன் தினம் , மற்றும் நேற்றையதினம் இடம்பெற்ற மோதலில் 100 இற்கும் மேற்படோர் காயமடைத்து மருத்துவமனையில் சிகிச்சை பெற்று வருகின்றனர்.

இந் நிலையில் நீர்கொழும்பு சிறைச்சாலையில் ஏற்பட்ட மோதல் சம்பவத்தில் காயமடைந்து, வைத்தியசாலையில் சிகிச்சை பெற்று வரும் சிறைச்சாலை அதிகாரிகளை நீதியமைச்சர் நேரில் சென்று பார்வையிட்டுள்ளார்.

அதேவேளை நீர்கொழும்பு சிறைச்சாலையில் இடம்பெற்ற சம்பவம் தொடர்பில் விசேட விசாரணை ஒன்றை நடத்துவதற்கு இலங்கை மனித உரிமைகள் ஆணைக்குழு தீர்மானித்துள்ளது.

நீர்கொழும்பு சிறைச்சாலையில் வெடித்த வன்முறை , இலங்கை சிறைச்சாலை வரலாற்றையே உலுக்கிய 2012ஆம் ஆண்டு வெலிக்கடை சிறைச்சாலை வன்முறைச் சம்பவத்திற்குப் பின்னர், 14 ஆண்டுகள் கழித்து மிக மோசமான மற்றும் கொடூரமானதொரு கலவரம் இது என சுட்டிக்காட்டப்பட்டுள்ளது.

இலங்கையில் தங்கத்தின் விலை இன்று (07.07.2026) குறைவடைந்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது. நேற்றைய தினம் (06.07.2026) 24 கரட் தங்க பவுண் ஒன்று 382,000 ரூபாயாக விற்பனை செய்யப்பட்டிருந்தது.

இந்த நிலையில், இன்று அதன் விலை 3,000 ரூபாயால் குறைந்து 379,000 ரூபாயாக பதிவாகியுள்ளது.

அதன்படி, 24 கரட் தங்க பவுண் ஒன்று 379,000 ரூபாவாகவும், 22 கரட் தங்க பவுண் ஒன்று 348,700 ரூபாயாகவும் விற்பனை செய்யப்படுகின்றமை குறிப்பிடத்தக்கது.

இதேவேளை, 24 கரட் தங்கத்தின் ஒரு கிராமின் விலை 47,375 ரூபாயாகவும், 22 கரட் தங்கத்தின் ஒரு கிராமின் விலை 43,588 ரூபாயாகவும் உள்ளமை குறிப்பிடத்தக்கது.

இலங்கையின் 2027ஆம் ஆண்டுக்கான பொது மற்றும் வங்கி விடுமுறை நாட்கள் அடங்கிய உத்தியோகபூர்வ கால அட்டவணை வெளியாகியுள்ளது. இது தொடர்பான அறிவிப்பு அதிவிசேட வர்த்தமானி அறிவித்தல் மூலம் வெளியிடப்பட்டுள்ளது.

பொதுநிர்வாக, மாகாணசபைகள் மற்றும் உள்ளூராட்சி அமைச்சர் பேராசிரியர் ஏ.எச்.எம்.எச்.அபயரத்னவின் கையொப்பத்துடன் இந்த அதிவிசேட வர்த்தமானி வெளியிடப்பட்டுள்ளது.

பௌத்த, இந்து, இஸ்லாமிய, கிறிஸ்தவ சமய மற்றும் தேசிய முக்கியத்துவம் வாய்ந்த தினங்களை உள்ளடக்கி இந்த விடுமுறை நாட்கள் பிரகடனப்படுத்தப்பட்டுள்ளன.
அதன்படி முக்கிய விடுமுறை நாட்கள் சில

• தமிழ் தைப்பொங்கல் தினம் – ஜனவரி 15
• சுதந்திர தினம் – பெப்ரவரி 04
• சிங்கள, தமிழ் புத்தாண்டு – ஏப்ரல் 14
• மே தினம் – மே 01
• வைகாசி விசாகப் பூரணை தினம் – மே 19
• தீபாவளித் திருநாள் – ஒக்டோபர் 28
• நத்தார் தினம் – டிசம்பர் 25

அத்துடன் இலங்கையின் நீண்டகால பாரம்பரியத்திற்கு இணங்க, அனைத்து பூரணை தினங்களும் பொது மற்றும் வங்கி விடுமுறை நாட்களாக அமையும் என அறிவிக்கப்பட்டுள்ளது.

நாட்டின் பல்லின கலாசார மற்றும் மத விழுதுகளை மதித்து, மத நல்லிணக்கத்தை உறுதிப்படுத்தும் வகையில் இந்த விடுமுறைப் பட்டியல் தயாரிக்கப்பட்டுள்ளதாக அரசாங்கம் தெரிவித்துள்ளது.