உத்தரப் பிரதேச மாநிலத்தில் வெறும் 100 ரூபாய் பணத்திற்காக ஏற்பட்ட குடும்பத் தகராறில், தூங்கிக் கொண்டிருந்த கணவர் மீது பெட்ரோல் ஊற்றித் தீ வைத்துக் கொன்ற மனைவியைக் காவல் துறையினர் கைது செய்துள்ளனர்.
உத்தரப் பிரதேசத்தில் வசித்து வந்த தம்பதியினருக்கு இடையே, கடந்த சில நாட்களாகவே கடுமையான குடும்பத் தகராறு நிலவி வந்துள்ளது. சம்பவத்தன்று வெறும் 100 ரூபாய் பணம் தொடர்பாக அவர்களுக்குள் மீண்டும் வாக்குவாதம் ஏற்பட்டுள்ளது.
100 ரூபாய் பண விவகாரத்தில் ஏற்பட்ட மோதலின் போது, கணவர் மது அருந்திவிட்டு வந்து தனது மனைவியைக் கடுமையான வார்த்தைகளால் திட்டி, அக்கம் பக்கத்தினர் முன்னிலையில் அவமானப்படுத்தியதாகக் கூறப்படுகிறது.
கணவர் தன்னை அவமானப்படுத்தியதால் கடும் ஆத்திரமடைந்த மனைவி, பழிவாங்கத் திட்டமிட்டுள்ளார். நள்ளிரவில் கணவர் ஆழமான தூக்கத்தில் இருந்த தருணத்தைப் பயன்படுத்தி, அவர் மீது பெட்ரோலை ஊற்றித் தீ வைத்துள்ளார்.
அறையில் இருந்து திடீரென அலறல் சத்தம் மற்றும் புகை வருவதைக் கண்டு ஓடிவந்த அக்கம் பக்கத்தினர், தீயில் கருகிய கணவரை மீட்டு மருத்துவமனைக்குக் கொண்டு சென்றனர். ஆனால், அவர் ஏற்கனவே பரிதாபமாக உயிரிழந்து விட்டதாக மருத்துவர்கள் தெரிவித்தனர்.
இச்சம்பவம் குறித்து வழக்குப் பதிவு செய்த போலீசார், மனைவியைக் கைது செய்து தீவிர விசாரணை நடத்தினர். அப்போது, மதுபோதையில் கணவர் தன்னைத் தொடர்ந்து அவமானப்படுத்தியதால் ஏற்பட்ட ஆத்திரத்தில்,
அவர் மீது பெட்ரோல் ஊற்றிக் கொன்றதாக அவர் போலீசாரிடம் வாக்குமூலம் அளித்துள்ளார். வெறும் 100 ரூபாய்க்காகக் கணவனைக் கொடூரமாகக் கொலை செய்த இந்தச் சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.
குருநாகல் – நாரம்மல, வாரியபொல வீதியில் சியம்பலாகஸ்கொட்டுவ, மதீனா தேசிய பாடசாலைக்கு அருகில் மோட்டார் சைக்கிளும் முச்சக்கர வண்டியும் நேருக்கு நேர் மோதியதில் இளைஞர் ஒருவர் உயிரிழிந்துள்ளார்.
இந்த விபத்து நேற்று(05.07.2026) மாலை 6 மணியளவில் இடம்பெற்றுள்ளதாக பொலிஸார் தெரிவித்துள்ளனர். அதிவேகமாக வந்த மோட்டார் சைக்கிள், பாடசாலைக்கு அருகில் வைத்து முச்சக்கர வண்டியுடன் மோதியுள்ளது.
இதன்போது, படுகாயமடைந்த மோட்டார் சைக்கிளைச் செலுத்திச் சென்ற 19 வயதுடைய இளைஞர், உடனடியாக வைத்தியசாலைக்குக் கொண்டு செல்லப்பட்ட போதிலும் சிகிச்சை பலனின்றி உயிரிழந்துள்ளார்.
இந்த விபத்து தொடர்பாக முச்சக்கர வண்டியின் சாரதி கைது செய்யப்பட்டுள்ளார். விபத்து தொடர்பான மேலதிக விசாரணைகளைப் பொலிஸார் மேற்கொண்டு வருகின்றனர்.
நாட்டில் தற்போது நடைமுறையிலுள்ள கியூ.ஆர் குறியீடு அடிப்படையிலான எரிபொருள் விநியோக முறைமை எந்தவித தடையுமின்றி தொடர்ந்தும் முன்னெடுக்கப்படும் என இலங்கை பெட்ரோலியக் கூட்டுத்தாபனத்தின் முகாமைத்துவப் பணிப்பாளர் மயூர நெத்திகுமாரகே தெரிவித்துள்ளார்.
இந்த திட்டத்தை நிறுத்துவதற்கு அரசாங்கம் எந்த வித தீர்மானமும் இதுவரையில் எடுக்கவில்லை எனவும் அவர் குறிப்பிட்டுள்ளார். அவர் மேலும் தெரிவிக்கையில், நாட்டில் எதிர்காலத்திலும் தடையின்றி எரிபொருள் விநியோகத்தை முன்னெடுப்பதற்குத் தேவையான நடவடிக்கைகள் எடுக்கப்பட்டுள்ளன.
எனவே, தற்போதைய விநியோக முறைமையில் மாற்றங்கள் ஏற்படலாம் என பொதுமக்கள் அச்சமடையத் தேவையில்லை. தற்போதைய எரிபொருள் ஒதுக்கீட்டு அளவை அதிகரிப்பதற்கோ அல்லது குறைப்பதற்கோ எந்தவித முடிவுகளும் எடுக்கப்படவில்லை.
மறுஅறிவித்தல் வரை தற்போதைய ஒதுக்கீட்டு எல்லைகளே தொடர்ந்தும் நடைமுறையில் இருக்கும் என அவர் குறிப்பிட்டுள்ளார்.
நீர்கொழும்பு சிறைச்சாலையில் நேற்றைய தினம் கைதிகளின் இரண்டு குழுக்களுக்கு இடையே ஏற்பட்ட மோதல் குறித்து விசாரிக்க விசேட விசாரணைக் குழுவொன்று நியமிக்கப்பட்டுள்ளது.
சிறைச்சாலைகள் ஆணையாளர் நாயகம் சம்பந்தப்பட்ட விசாரணைக் குழுவை நியமித்துள்ளதாக சிறைச்சாலைகள் ஆணையாளரும் ஊடகப் பேச்சாளருமான ஏ.சி. கஜநாயக்க தெரிவித்தார்.
நேற்று (05) பிற்பகல் சுமார் 1.00 மணியளவில் நீர்கொழும்பு சிறையில் கைதிகளின் இரண்டு குழுக்களுக்கு இடையே மோதல் ஏற்பட்டது.
விளக்கமறியலில் இருந்த கைதிகள் குழுவிற்கும், தண்டனை விதிக்கப்பட்ட கைதிகள் குழுவிற்கும் இடையே இந்த மோதல் நடந்ததாக பொலிசார் தெரிவித்தனர்.
பலப்படுத்தப்பட்ட பாதுகாப்பு
நீர்கொழும்பு சிறைச்சாலையில் நிலவிய பதற்றமான சூழ்நிலையைக் கட்டுப்படுத்த சிறைச்சாலைத் திணைக்கள அதிகாரிகள், பொலிசார், பொலிஸ் விசேட அதிரடிப்படை மற்றும் இராணுவம் ஆகியவை பணியில் ஈடுபடுத்தப்பட்டன. மேலும், அப்பகுதியைச் சுற்றியுள்ள பகுதிகளில் பாதுகாப்பும் பலப்படுத்தப்பட்டது.
மேலும், சிறைக்கைதிகளின் உறவினர்கள் குழுவொன்றும் சிறைச்சாலைக்கு முன்பாக வந்து, கைதிகள் குறித்த தகவல்களை அதிகாரிகள் வழங்கவில்லை என்று கூறி அமைதியற்ற முறையில் நடந்துகொண்டனர்.
பொலிசார் தலையிட்டு, மருத்துவமனையில் அனுமதிக்கப்பட்ட கைதிகள் குறித்த தகவல்களை அவர்களுக்கு வழங்கினர். மேலும், மற்றொரு குழுவினர் மருத்துவமனைக்கு அனுப்பப்பட்டனர்.
இந்தச் சம்பவம் குறித்து, சிறைச்சாலை ஆணையாளரும் ஊடகப் பேச்சாளருமான ஏ.சி. கஜநாயக்க தனது கருத்துக்களை தெரிவிக்கையில்,
“நீர்கொழும்பு சிறையில் கைதிகளுக்கு இடையே மோதல் ஏற்பட்ட மோதலானது, கைதிகளுக்கு இடையேயான ஒரு மோதல் மட்டுமே. அதிகாரிகளுக்கும் இதற்கும் எந்தத் தொடர்பும் இல்லை.
கைதிகளின் உறவினர்கள் எந்தவிதமான பீதியையோ அல்லது தேவையற்ற அச்சத்தையோ ஏற்படுத்த வேண்டாம் என்று கேட்டுக்கொள்கிறேன்.
இந்தச் சம்பவம் குறித்து விரிவான விசாரணைகளை நடத்துவதற்காக சிறைச்சாலைகள் ஆணையாளர் நாயகம் ஒரு விசாரணைக் குழுவை நியமித்துள்ளார். அவர்கள் சுயாதீனமான முறையில் விசாரணைகளை மேற்கொள்வார்கள்.
சிறைச்சாலைக்குள் நிலவிய பதற்றமான சூழலைக் கட்டுப்படுத்துவதில் கைதிகளின் ஒத்துழைப்பைப் பெற்றதன் மூலம் நிலைமை தற்போது கட்டுப்பாட்டுக்குள் கொண்டு வரப்பட்டுள்ளது.
இதன்போது கைதிகள் சார்பில் தெரிவிக்கப்பட்ட முறைப்பாடுகள் சிறைச்சாலைகள் ஆணையாளர் நாயகத்திற்கு அனுப்பப்பட்டுள்ளது. கைதிகள் சார்பில் பல கோரிக்கைகளும் விடுக்கப்பட்டன.
சிறைச்சாலைகள் ஆணையாளர் நாயகம், அது தொடர்பில் சாதகமான நடவடிக்கை எடுக்கப்படும் என்று உறுதியளித்துள்ளார்” என குறிப்பிட்டுள்ளார்.
பேருவளை, சீனன்கோட்டை பகுதியில் உள்ள பிரபல பாடசாலை ஒன்றின் பழைய மாணவர்களுக்கிடையில் நடைபெற்ற சிநேகபூர்வ கிரிக்கெட் போட்டியின் போது, வீரர் ஒருவர் மைதானத்தில் திடீரென சரிந்து விழுந்து உயிரிழந்த சம்பவம் சோகத்தை ஏற்படுத்தியுள்ளது.
பேருவளை பிரதேசத்தைச் சேர்ந்த 45 வயதுடைய நபரே இவ்வாறு உயிரிழந்துள்ளதாக பேருவளை பொலிஸார் தெரிவித்துள்ளனர்.
பழைய மாணவர்களிடையேயான நட்புறவை வலுப்படுத்தும் நோக்கில் நேற்று (05) நடைபெற்ற கிரிக்கெட் போட்டியில் விளையாடிக்கொண்டிருந்தபோது, அவர் திடீரென ஆடுகளத்தின் நடுவே மயங்கி சரிந்து விழுந்ததாக தெரிவிக்கப்படுகிறது.
இதையடுத்து, அங்கிருந்தவர்கள் உடனடியாக அவரை பேருவளை பிரதேச வைத்தியசாலைக்கு கொண்டு சென்றனர்.
எனினும், வைத்தியசாலையில் அனுமதிக்கப்படும் முன்னரே அவர் உயிரிழந்திருந்ததாக வைத்தியசாலை வட்டாரங்கள் தெரிவித்துள்ளன.
திடீர் மாரடைப்பு காரணமாக இந்த உயிரிழப்பு ஏற்பட்டிருக்கலாம் என சந்தேகிக்கப்படுவதுடன், சம்பவம் தொடர்பில் பேருவளை பொலிஸார் மேலதிக விசாரணைகளை மேற்கொண்டு வருகின்றனர்.
யாழ்ப்பாணம் இளவாலை மாதகல் பகுதியில், இன்று திங்கட்கிழமை (07) இடம்பெற்ற விபத்தில் முதியவர் ஒருவர் உயிரிழந்துள்ளார். இந்த விபத்தில் உயிரிழந்தவர் நல்லையான் வீதி, சில்லாலையை சேர்ந்த 80 வயதுடையவர் என தெரியவந்துள்ளது.
கடல்சார் சூழல் பாதுகாப்பு அதிகார சபையின் வாகனம், மோட்டார் சைக்கிள் ஒன்றுடன் மோதியதில் இந்த விபத்து நேர்ந்துள்ளது
இதன்போது மோட்டார் சைக்கிள் ஓட்டுநரான முதியவர் சம்பவ இடத்திலேயே உயிரிழந்தார். உயிரிழந்தவரின் சடலம் யாழ்ப்பாணம் போதனா வைத்தியசாலைக்கு கொண்டு செல்லப்பட்டுள்ளதுடன், இந்த சம்பவம் குறித்து இளவாலை பொலிஸார் மேலதிக விசாரணைகளில் ஈடுபட்டு வருகின்றனர்.
டிக்-டாக் செயலி மூலம் நட்பாகப் பழகிய 14 வயது சிறுமியைப் பாலியல் துஷ்பிரயோகம் செய்ததாகக் கூறப்படும் 17 வயது இளைஞர் ஒருவரை, களுத்துறை வடக்கு காவல்துறையினர் கைது செய்துள்ளனர்.
குறித்த சிறுமியையும் சந்தேகநபருடன் சேர்த்து காவல்துறை அதிகாரிகள் மீட்டனர். சம்பவம் தொடர்பில் களுத்துறை பொலிஸார் கூறியுள்ளதாவது,
மறவில பகுதியைச் சேர்ந்த குறித்த சிறுமி, டிக்-டாக் மூலம் 17 வயது சந்தேகநபருடன் அறிமுகமாகி, அவரிடம் நெருக்கமான உறவை ஏற்படுத்திக்கொண்டுள்ளார்.
சந்தேகநபர் அந்தச் சிறுமியை நேரில் சந்திக்கச் சென்று, சில நாட்கள் அவருடன் தங்கியிருந்தபோது, சிறுமியைப் பாலியல் துன்புறுத்தலுக்கு உள்ளாக்கியுள்ளார்.
பின்னர், புத்தளத்தில் உள்ள சிறுமியின் சகோதரியின் வீட்டில் வைத்து, இரண்டாவது முறையாகவும் அவரைத் துஷ்பிரயோகம் செய்துள்ளார்.
சம்பவம் தொடர்பில் விசாரணைகளை மேற்கொண்டு வருவதோடு, பாதிக்கப்பட்ட சிறுமிக்கு மருத்துவப் பரிசோதனையும் மேற்கொள்ளப்பட்டுள்ளது.
வடமேல் மாகாண பிரதி காவல்துறை மா அதிபர் (DIG) அஜித் ரோஹணவின் ஆலோசனையின் பேரில், பொலிஸ் அத்தியட்சகர்கள் (SP) ரோஹண பெரேரா மற்றும் தம்மிக ஹப்புகொட ஆகியோர் தலைமையிலான குழுவினர் மேலதிக விசாரணைகளை மேற்கொண்டு வருகின்றனர்.
இந்தியாவின் மஹாராஷ்ட்ரா மாநிலத்தில், பெண்ணொருவர் தன் வருங்கால கணவரை கோட்டை உச்சியிலிருந்து தள்ளிவிட்டுக் கொன்ற வழக்கு பெரும் பரபரப்பை ஏற்படுத்திவரும் நிலையில், அந்த வழக்கு தொடர்பில் மோசமாக விமர்சித்த பெண் மருத்துவர் ஒருவர் பணியிடைநீக்கம் செய்யப்பட்டுள்ளார்.
மஹாராஷ்ட்ரா மாநிலத்திலுள்ள புனேயைச் சேர்ந்த கேத்தன் அகர்வால் என்பவருக்கும் சியா கோயல் (20) என்னும் பெண்ணுக்கும் திருமணம் நிச்சயம் செய்யப்பட்டிருந்தது.
இந்நிலையில், தனது பிறந்தநாளைக் காரணம் காட்டி கேத்தனை கோட்டை ஒன்றிற்கு அழைத்துச் சென்ற சியா, தன் காதலனான சேத்தன் சௌத்ரி (22) என்பவருடைய உதவியுடன் அவரை பள்ளத்தில் தள்ளிக் கொலை செய்தார்.
இந்நிலையில், மத்தியப்பிரதேசத்தைச் சேர்ந்த பல் மருத்துவரான முஸ்கன் சோனி என்னும் பெண், கொல்லப்பட்ட கேத்தனைக் குறித்து மோசமாக விமர்சித்து சமூக ஊடகம் ஒன்றில் வீடியோ ஒன்றை வெளியிட்டுள்ளார்.
நான் ஆண்களை வெறுக்கிறேன் என்னும் ஹேஷ்டேகுடன் சோனி வெளியிட்டுள்ள அந்த வீடியோவில், ’அந்த பூனேக்கார நபருக்கு தலையில் முடியே இல்லை, இப்படி பொய்களைச் சொன்னால் சாகவேண்டியதுதான்’ என்று கூறியுள்ளார் அவர்.
இந்த வீடியோ கடும் சர்ச்சையை உருவாக்கியுள்ள நிலையில், அனைத்திந்திய பல் மருத்துவ மாணவர்கள் மற்றும் அறுவை சிகிச்சை நிபுணர்கள் கூட்டமைப்பு, பல் மருத்துவர் சோனியை உடனடியாக பணியிடைநீக்கம் செய்துள்ளது.
அந்த அமைப்பில் சோனி காசாளராக இருந்த நிலையில், அவர் காசாளர் பொறுப்பிலிருந்து நீக்கப்பட்டுள்ளதாகவும், அந்த அமைப்பின் உறுப்பினரான இருப்பதற்கு ஐந்து ஆண்டுகளுக்கு தடை விதிக்கப்பட்டுள்ளதாகவும் அந்த அமைப்பின் தலைவரான Dr திவாகர் தெரிவித்துள்ளார்.
எரிவாயு விலை குறைக்கப்பட்டாலும் பேக்கரி உற்பத்திகளின் விலைகளை குறைக்க முடியாது என அறிவிக்கப்பட்டுள்ளது. இலங்கையில் லிட்ரோ மற்றும் லாஃவ்ஸ் நிறுவனங்கள் எரிவாயு விலைகளைக் குறைத்துள்ளதைத் தொடர்ந்து, உணவகங்களில் விற்கப்படும் சில உணவுப் பொருட்களின் விலைகளும் குறைக்கப்பட்டுள்ளன.
எனினும், பேக்கரி உற்பத்தி பொருட்களின் விலைகளைக் குறைக்கக் கூடிய சாத்தியங்கள் கிடையாது என அதிகாரபூர்வமாக அறிவிக்கப்பட்டுள்ளது.
எரிவாயு விலை குறைக்கப்பட்டதைத் தொடர்ந்து பிரைட் ரைஸ், கொத்து, பரோட்டா மற்றும் சிற்றுண்டிகளின் விலைகள் குறைக்கப்படுவதாக அகில இலங்கை உணவக உரிமையாளர்கள் சங்கத்தின் தலைவர் ஹர்ஷன ருக்ஷான் தெரிவித்துள்ளார்.
அரசாங்கத்தினால் எரிவாயு விலை ஓரளவிற்குக் குறைக்கப்பட்ட போதிலும், பாண் (Bread), பனிஸ் உள்ளிட்ட பேக்கரி உற்பத்தி பொருட்களின் விலைகளை எவ்வகையிலும் குறைக்க முடியாது என அகில இலங்கை பேக்கரி உரிமையாளர்கள் சங்கத்தின் தலைவர் என்.கே. ஜயவர்தன தெரிவித்துள்ளார்.
கேஸ் விலை சிறிய அளவில் குறைக்கப்பட்டதால் பேக்கரி உற்பத்திகளுக்கு எந்தப் பயனும் இல்லை என அவர் மேலும் சுட்டிக்காட்டியுள்ளார்.
முகநூல் முழுவதும் முட்டாள்கள் நிறைந்திருப்பதாக ஐக்கிய மக்கள் சக்தியின் நாடாளுமன்ற உறுப்பினர் தயாசிறி ஜயசேகர கடுமையான விமர்சனம் ஒன்றை முன்வைத்துள்ளார்.
முகநூல் ‘முட்டாள்களால் நிரம்பி வழிகிறது’ என்றும், ‘அறிவார்ந்த விவாதங்களில் ஈடுபடும் இடம் அல்ல’ என்றும் நம்புவதால், அதைத் தாம் பயன்படுத்துவதில்லை என்று கூறியுள்ளார். ஒரு பொது நிகழ்ச்சியில் உரையாற்றிய போது அவர் இந்த விமர்சனங்களை முன்வைத்துள்ளார்.
தொடர்ந்தும் கூறுகையில், அர்த்தமுள்ள விவாதங்களுக்கான ஒரு களமாக முகநூலைக் கருதாததால், அந்த சமூக ஊடகத் தளத்தைத் தவிர்ப்பதாகக் குறிப்பிட்டுள்ளார்.
‘நான் முகநூலுக்குச் செல்வதில்லை, ஏனெனில் அது முட்டாள்கள் நிறைந்தது. அது அறிவாளிகள் வாதிடக்கூய ஒரு களம் அல்ல. அதனால்தான் நான் அங்கு செல்வதில்லை, அதைப் பார்ப்பதும் இல்லை’ என்று அவர் கூறினார்.
எதிர்க்கட்சி அரசியல்வாதிகளைக் குற்றவாளிகள், இனவாதிகள், போதைப்பொருள் கடத்தல்காரர்கள் அல்லது ஊழல்வாதிகள் என்று முத்திரை குத்தி, அவர்களின் நற்பெயரைக் கெடுக்க அரசாங்கம் முயற்சிப்பதாகக் குற்றம் சாட்டியே தயாசிறி ஜயசேகர இந்தக் கருத்துக்களைத் தெரிவித்துள்ளார்.
எதிர்க்கட்சித் தலைவர்கள் மீது இதுபோன்ற முத்திரைகள் குத்தப்பட்டால், தங்கள் மீதான களங்கத்தைத் துடைத்து , அரசியல் பணிகளைத் தொடர்வது கடினமாகிவிடும் என்றும் அவர் சுட்டிக்காட்டியுள்ளார்.
வவுனியா கோவில்குளத்தின் நீரேந்துப் பகுதி பெண் ஒருவரால் ஆக்கிரமிக்கப்பட்டு அப்பகுதியில் அபிவிருத்திப் பணிகள் முன்னெடுக்கப்பட்டு வருவதால், குளத்திற்கு இயற்கையாக வரும் நீர்வரத்து தடைப்படும் அபாயம் ஏற்பட்டுள்ளதாகக் குற்றஞ்சாட்டி, அப்பகுதியின் கமக்காரர் அமைப்பினரும் பொதுமக்களும் இன்று (06.07.2026) கவனயீர்ப்பு போராட்டத்தில் ஈடுபட்டனர்.
வவுனியா குடியிருப்பு பிள்ளையார் கோவிலுக்கு முன்பாக ஆரம்பமான இந்தப் போராட்டம், பேரணியாக வவுனியா மாவட்ட செயலகம் நோக்கிச் சென்றது. அங்கு போராட்டக்காரர்கள் தங்களது கோரிக்கைகள் உள்ளடக்கிய மகஜரை வவுனியா மாவட்ட அரசாங்க அதிபரிடம் கையளித்தனர்.
குளத்தின் நீரேந்து பகுதி பாதுகாக்கப்பட வேண்டிய பொதுச் சொத்தாகும் என்றும், அப்பகுதியில் இடம்பெறும் ஆக்கிரமிப்புகள் மற்றும் அபிவிருத்தி நடவடிக்கைகள் தொடர்ந்தால் எதிர்காலத்தில் குளத்திற்கு வரும் நீர்வரத்து பாதிக்கப்படுவதுடன் விவசாயமும் கடுமையாகப் பாதிக்கப்படும் என்றும் கமக்காரர் அமைப்பினர் தெரிவித்தனர்.
இந்நிலையில், மகஜரைப் பெற்றுக்கொண்ட வவுனியா மாவட்ட அரசாங்க அதிபர் பி.ஏ.சரத்சந்திர, குறித்த விடயம் தொடர்பாக உரிய அதிகாரிகளுடன் ஆராய்ந்து தேவையான நடவடிக்கைகள் எடுக்கப்படும் என போராட்டக்காரர்களிடம் உறுதியளித்தார்.
ஆர்ப்பாட்டத்தில் கிராமத்தின் பொது அமைப்புக்கள், பொதுமக்கள் பாராளுமன்ற உறுப்பினர் ப.சத்தியலிங்கம், மாநகரசபை மேயர் சு.காண்டீபன், முன்னாள் மாநகரசபை பிரதி மேயர் ப.கார்த்தீபன் மற்றும் மாநகரசபை உறுப்பினர்கள் கலந்துகொண்டனர்.
புதிய இணைப்பு : நீர்கொழும்பு சிறைச்சாலையில் இன்று காலை (06) ஏற்பட்ட மோதலில் உயிரிழந்த 25 பேரில், 5 சிறை அதிகாரிகளும் 20 கைதிகளும் அடங்குவதாக நீர்கொழும்பு பொது வைத்தியசாலையின் பணிப்பாளர் தெரிவித்துள்ளார்.
மோதல் காரணமாக ஏற்பட்ட காயங்களுடன் சுமார் 100 பேர் வைத்தியசாலையின் அனுமதிக்கப்பட்டுள்ளனர். மேலும், அவர்களில் 13 பேர் கவலைக்கிடமான நிலையில் இருப்பதால் கொழும்பு தேசிய வைத்தியசாலைக்கு மாற்றப்பட்டுள்ளனர்.
ஒன்பதாம் இணைப்பு : நீர்கொழும்பு சிறைச்சாலையில் ஏற்பட்ட அமைதியின்மையின் காரணமாக கைதிகள் முன்வாசல் வழியாக சிறையை விட்டு வெளியேற முயன்றதால், நிலைமையைக் கட்டுப்படுத்த அதிகளவு பொலிஸாருடன், சிறப்பு அதிரடிப் படையும் களமிறக்கப்பட்டுள்ளனர்.
மேலும், துப்பாக்கிச்சத்தம் கேட்டதை அடுத்து, சிறைக்கைதிகளின் உறவினர்கள் குவிந்து மீண்டும் போராட்டத்தில் ஈடுபட்டதால், நிலைமையைக் கட்டுப்படுத்த சிறப்பு முயற்சி மேற்கொள்ளபட்டு வருகின்றது.
சம்பவ இடத்தில் நிலைமை தீவிரமடைந்து வருவதால் கட்டுப்படுத்த பொலிஸ், சிறப்பு அதிரடிப்படை, இலங்கை இராணுவம், விமானப்படை மற்றும் பிற பாதுகாப்புப் படைகளை வரவழைப்பதற்கான நடவடிக்கைகள் எடுக்கப்பட்டுள்ளது.
எட்டாம் இணைப்பு : நீர்கொழும்பு சிறைச்சாலையில் ஏற்பட்ட அமைதியின்மையால் 25 பேர் உயிரிழந்துள்ளனர். 100 க்கும் மேற்பட்டோர் காயமடைந்துள்ளனர் என வைத்தியசாலை வட்டாரங்கள் தெரிவிக்கின்றன.
உயிரிழந்தவர்கள் மற்றும் காயமடைந்தவர்களில் சிலரின் உடல்களில் துப்பாக்கிச்சூடு காயங்களும் கண்டறியப்பட்டதாக வைத்தியசாலை வட்டாரங்கள் தெரிவித்துள்ளன. சிறைச்சாலையைச் சுற்றியுள்ள பாதுகாப்பிற்காக இராணுவம் வரவழைக்கப்பட்டுள்ளன.
ஏழாம் இணைப்பு : நீர்கொழும்பு சிறையில் இன்று காலை (06) மீண்டும் ஏற்பட்ட கலவரத்தால் உயிரிழந்தவர்களின் எண்ணிக்கை 19 ஆக உயர்ந்துள்ளது.
சிறைச்சாலையில் மீண்டும் துப்பாக்கிச் சூட்டுச் சத்தங்கள் கேட்பதுடன், அங்கு பதற்றமான சூழல் நிலவுவதாக தகவல் வெளியாகியுள்ளது.
இதற்கிடையில், கைதிகளின் உறவினர்கள் உள்ளிட்ட ஒரு குழுவினர் சிறையை சுற்றி அமைதியற்ற முறையில் செயற்படுவதாக தெரிவிக்கப்படுகின்றது.
ஆறாம் இணைப்பு : இன்று காலை (06) நீர்கொழும்பு சிறையில் ஏற்பட்ட மோதலில் சிறை அதிகாரிகள் உட்பட 15 பேர் உயிரிழந்ததாக பொலிஸ் பிரிவு தெரிவித்துள்ளது.
இந்த மோதலில் காயமடைந்த சுமார் 50 இற்கும் மேற்பட்டோர் நீர்கொழும்பு வைத்தியசாலையில் அனுமதிக்கப்பட்டுள்ளனர். உயிரிழந்தவர்களில் நான்கு சிறை அதிகாரிகளும், நான்கு கைதிகளும் அடங்குவதாக கூறப்படுகிறது.
தற்போது சிறை வளாகத்திற்குள் நுழைந்துள்ள பொலிஸாரும், சிறப்பு அதிரடிப் படையினரும் மோதல் சூழ்நிலையை முழுமையாகக் கட்டுப்பாட்டிற்குள் கொண்டு வந்துள்ளதாக கூறப்படுகின்றது.
மேலும், காயமடைந்த அதிகாரிகளும், கைதிகளும் இன்னும் சிறைக்குள் இருப்பதாகவும், அவர்களை மீட்க பாதுகாப்புப் படையினர் நடவடிக்கை எடுத்து வருவதாகவும் தகவல் கிடைத்துள்ளது.
ஐந்தாம் இணைப்பு : நீர்கொழும்பு சிறைச்சாலையில் இன்று காலை (06) ஏற்பட்ட மோதலில் சிறை அதிகாரிகள் உட்பட 7 பேர் உயிரிழந்ததாக பொலிஸ் தெரிவித்துள்ளது.
இந்த மோதலில் காயமடைந்த சுமார் 50 இற்கும் மேற்பட்டோர் நீர்கொழும்பு வைத்தியசாலையில் அனுமதிக்கப்பட்டுள்ளனர்.
அவர்களில் பெரும்பாலானோர் பாதுகாப்புப்படையினர் என்றும், பதற்றமான சூழலை கட்டுப்படுத்த பாதுகாப்புப்படையினர் பலமுறை வானத்தை நோக்கி துப்பாக்கிச்சூடு நடத்தி வருவதாகவும் தகவல் வெளியாகியுள்ளது.
நான்காம் இணைப்பு : நீர்கொழும்பு சிறைச்சாலையில் இன்று மீண்டும் ஏற்பட்ட கலவரத்தில் உயிரிழந்தவர்களின் எண்ணிக்கை 5 ஆக உயர்ந்துள்ளது. இவர்களில் மூவர் சிறை அதிகாரிகள் என்றும், ஒருவர் கைதி என்றும் தகவல் வெளியாகியுள்ளது.
மேலும், ஏராளமான அதிகாரிகள் வைத்தியசாலையில் அனுமதிக்கப்பட உள்ளதாகவும், காயமடைந்தவர்களில் சிறைக்கைதிகள் மற்றும் பொலிஸ் அதிகாரிகளும் அடங்குவதாகவும் தெரியவந்துள்ளது.
மேலும், காயமடைந்த அதிகாரிகளும், கைதிகளும் இன்னும் சிறைக்குள் இருப்பதாகவும், அவர்களை மீட்க பாதுகாப்புப் படையினர் நடவடிக்கை எடுத்து வருவதாகவும் தகவல் கிடைத்துள்ளது.
மூன்றாம் இணைப்பு : நீர்கொழும்பு சிறைச்சாலையில் இன்று காலை (06) மீண்டும் ஏற்பட்ட மோதலில் காயமடைந்து மூன்று பேர் உயிரிழந்துள்ளனர்.
இவர்களில் இருவர் பாதுகாப்பு அதிகாரிகள் என்றும், மோதலில் காயமடைந்த சுமார் 35 பேர் நீர்கொழும்பு வைத்தியசாலையில் அனுமதிக்கப்பட்டுள்ளதாகவும் தெரிவிக்கப்படுகின்றது.
நிலைமையைக் கட்டுப்படுத்த நீர்கொழும்பு பொலிஸார் மட்டுமின்றி, மிரிகம மற்றும் வெயங்கொட உள்ளிட்ட அருகிலுள்ள பொலிஸ் நிலையங்களிலிருந்தும் அதிகாரிகள் வரவழைக்கப்பட்டுள்ளதாக கூறப்படுகிறது.
இந்நிலையில், பாதுகாப்பை உறுதி செய்வதற்காக பொலிஸார், சிறப்பு அதிரடிப்படையும் களமிறக்கப்பட்டுள்ள4னர். மேலும், கலவரத்தைக் கட்டுப்படுத்த பாதுகாப்புப் படையினர் பலமுறை துப்பாக்கிச்சூடு நடத்தியுள்ளனர்.
இரண்டாம் இணைப்பு : நீர்கொழும்பு சிறைச்சாலையில் இன்று காலை மீண்டும் ஏற்பட்டுள்ள பதற்றம் காரணமாக பல சிறை அதிகாரிகள் உள்ளிட்ட 20 பேர் காயமடைந்துள்ளதாக பொலிஸ் வட்டாரங்கள் தெரிவிக்கின்றன.
கைதிகளால் தாக்கப்பட்டு காயமடைந்த ஆறு சிறை அதிகாரிகள் நீர்கொழும்பு வைத்தியசாலையில் அனுமதிக்கப்பட்டுள்ளனர்.
இந்த மோதலில் காயமடைந்த சுமார் 20 பேர் நீர்கொழும்பு வைத்தியசாலையில் அனுமதிக்கப்பட்டுள்ளதாக வைத்தியசாலை வட்டாரங்கள் தெரிவிக்கின்றன.
இதற்கிடையில், நிலைமையைக் கட்டுப்படுத்த பொலிஸார் பலமுறை துப்பாக்கிச்சூடு நடத்தியுள்ளதாக கூறப்படுகின்றது.
முதலாம் இணைப்பு : நீர்கொழும்பு சிறைச்சாலையில் இன்று காலை (06) மீண்டும் பதற்றமான சூழல் ஏற்பட்டுள்ளதாக தெரிவிக்கப்பட்டுள்ளது.
இந்நிலையில் நிலைமையை கட்டுப்படுத்த விசேட அதிரடிப்படையினர், பொலிஸார் சிறைச்சாலைக்குள் பிரவேசித்துள்ளதாக தெரிவிக்கப்படுகின்றது. நேற்று மதியம் சுமார் 1 மணியளவில் நீர்கொழும்பு சிறைச்சாலையில் இரண்டு கைதிகள் குழுக்களுக்கு இடையே மோதல் ஏற்பட்டிருந்தது.
விளக்கமறியலில் இருந்த கைதிகள் குழுவிற்கும், தண்டனை விதிக்கப்பட்ட கைதிகள் குழுவிற்கும் இடையே இந்த மோதல் நடந்ததாக பொலிஸார் விளக்கமளித்திருந்தனர்.
இந்த மோதலில் இரண்டு கைதிகள் உயிரிழந்துள்ளதுடன், மேலும் 38 பேர் காயமடைந்து தற்போது வைத்தியசாலையில் சிகிச்சை பெற்று வருகின்றனர்.
இந்நிலையில், பொலிஸாரின் தலையீட்டில் நேற்று நிலைமை கட்டுக்குள் கொண்டுவரப்பட்ட போதிலும், இன்று காலை மீண்டும் பதற்றமான சூழல் ஏற்பட்டுள்ளதாக தெரிவிக்கப்பட்டுள்ளது.
மகாராஷ்டிர மாநிலம் தானே மாவட்டம் மிரா பயந்தர் பகுதியில் கடந்த சில நாட்களாகக் கடுமையான பருவமழை கொட்டித் தீர்த்து வருகிறது. இதன் காரணமாக நகரின் பல்வேறு பகுதிகளில் பலத்த காற்றுடன் கூடிய கனமழை நீடித்து வருவதால் பொதுமக்களின் இயல்பு வாழ்க்கை பெரிதும் பாதிக்கப்பட்டுள்ளது.
இந்நிலையில் மிரா பயந்தர் மாநகராட்சியின் முன்னாள் துணை மேயர் அசோக் பாட்டிலின் 35 வயது மகனான ராகுல் அசோக் பாட்டில் என்பவர், கடந்த புதன்கிழமை மாலை தனது மோட்டார் சைக்கிளில் சதானந்த் நகர் பகுதி வழியாகச் சென்று கொண்டிருந்தார்.
அவர் சாலையில் சென்று கொண்டிருந்த அந்தச் சமயத்தில், பலத்த காற்று மற்றும் கனமழையின் கோரத் தாண்டவத்தால் அங்கிருந்த பெரிய தென்னை மரம் ஒன்று திடீரென வேரோடு சாய்ந்தது. கண் இமைக்கும் நேரத்தில் அந்த மரம் ராகுல் அசோக் பாட்டில் ஓட்டிச் சென்ற மோட்டார் சைக்கிள் மீது மிக பயங்கரமாக விழுந்து விபத்துக்குள்ளானது.
இந்த விபத்தில் உடல் முழுவதும் பலத்த காயமடைந்த அவர், அக்கம் பக்கத்தினரால் மீட்கப்பட்டு அருகில் உள்ள தனியார் மருத்துவமனையில் அவசரச் சிகிச்சைக்காக உடனடியாக அனுமதிக்கப்பட்டார்.
மருத்துவமனையில் தீவிர சிகிச்சைப் பிரிவில் அனுமதிக்கப்பட்டு உயிருக்கு ஆபத்தான நிலையில் கடந்த 2 நாட்களாகப் போராடி வந்த ராகுல் அசோக் பாட்டில், சிகிச்சை பலனின்றிப் பரிதாபமாகத் தனது உயிரை இழந்தார்.
இந்தத் துயரச் சம்பவம் அவரது குடும்பத்தினர் மற்றும் முர்தாகான் பகுதி மக்கள் மத்தியில் பெரும் சோகத்தை ஏற்படுத்தியுள்ளது. இந்த பருவமழைக் காலத்தில் தானே மாநகரப் பகுதியில் பதிவான முதல் மழைக்கால மரணம் இது என்று மாவட்ட நிர்வாக அதிகாரிகள் முறைப்படி தெரிவித்துள்ளனர்.
கொல்கத்தாவின் நரேந்திரபூர் பகுதியில் உள்ள ராமகிருஷ்ணா மிஷன் ஆசிரமப் பள்ளியில் தங்கி, 12 ஆம் வகுப்பு படித்து வந்த மாணவன் திப்தான்ஷு மஹதோ ஆவான். இவன் தெர்மாஸ் பாத்திரத்தில் இருந்த கடுமையான கொதிக்கும் தேநீரைக் குடித்த பிறகு திடீரென உயிரிழந்த அதிர்ச்சிச் சம்பவம் அங்கே அரங்கேறியுள்ளது.
இதுகுறித்து போலீசில் புகார் அளித்துள்ள மாணவனின் தந்தை, தனது மகனின் உடல்நிலை மோசமடைந்த பிறகும் பள்ளி நிர்வாகம் உடனடியாக மருத்துவமனைக்கு அழைத்துச் செல்லாமல் காலதாமதம் செய்ததாகப் பகீர் குற்றச்சாட்டை எழுப்பியுள்ளார்.
சம்பவத்தன்று காலை 11:15 மணிக்கு மகனின் உடல்நிலை குறித்துப் போன் வந்ததாகவும், மதியம் 1 மணிக்குத் தான் பள்ளிக்குச் சென்றபோது திப்தான்ஷு தொடர்ந்து இருமிக் கொண்டே இருந்ததாகவும் தந்தை கூறியுள்ளார். காரில் மருத்துவமனைக்கு அழைத்துச் செல்லும் போது ஒரு மடக்கு தண்ணீர் குடித்த உடனே அந்த மாணவன் மயங்கி விழுந்துள்ளான்.
பின்னர் அருகில் உள்ள தனியார் மருத்துவமனைக்குக் கொண்டு சென்றபோது அவர் ஏற்கனவே இறந்துவிட்டதாக மருத்துவர்கள் வருத்தத்துடன் தெரிவித்துள்ளனர்.
டீ கொதிக்கும்போது வாய் வெந்தும் ஏன் விழுங்கினாய் என்று தந்தை கேட்டதற்கு, டீயை வெளியில் துப்பினால் தரை அசிங்கமாகிவிடும் என்பதற்காகவே விழுங்கினேன் என்று திப்தான்ஷு இறப்பதற்கு முன் கூறிய உருக்கமான தகவல் நெஞ்சை பதறவைத்துள்ளது.
இந்த மரணம் குறித்து விளக்கம் அளித்துள்ள மருத்துவர் ரவிகாந்த் சதுர்வேதி, வெறும் சூடான தேநீர் குடிப்பதால் மட்டுமே மரணமடைய முடியாது என்றும், பிரேதப் பரிசோதனை அறிக்கை வந்த பிறகே உண்மை தெரியவரும் என்றும் கூறியுள்ளார். இந்தச் சம்பவம் தொடர்பாகப் போலீசார் வழக்குப் பதிவு செய்து, பள்ளி நிர்வாகத்திடம் தீவிர விசாரணை நடத்தி வருகின்றனர்.
சிறுமியொருவர் வயல்வெளியில் செல்லப்பிராணியாக குட்டி முள்ளம்பன்றி ஒன்றை கூட்டிச்செல்லும் நெகிழ்ச்சியான காணொளியொன்று உலகெங்கிலும் உள்ள மில்லியன் கணக்கான இதயங்களை கவர்ந்துள்ளது. இந்த காணொளி தற்போது சமூகவலைத்தளங்களில் வேகமாக பரவி வருகின்றது.
இந்த காணொளி பங்களாதேஷில் படமாக்கப்பட்டதாக தவறான கருத்துக்கள் இணையத்தில் பகிரப்பட்டு வந்த நிலையில்,பின்னர் இது இலங்கையில் பதிவு காணொளி என்பது கண்டறியப்பட்டது.
இந்த காணொளியில் உள்ள சிறுமி, இரண்டாம் வகுப்பில் படிக்கும் பொலன்னறுவையை சேர்ந்த ஏழு வயது ஸ்வேதா புன்சண்டி ஆவார். இது தொடர்பில் சிறுமியின் தாயார் விளக்கமளிக்கையில்,
ஸ்வேதாவுக்கு எப்போதும் விலங்குகள் மீது அதிக பாசம் உண்டு, மேலும் அவற்றுடன் ஒரு தனித்துவமான பிணைப்பை ஏற்படுத்தியுள்ளார்.
தங்கள் குடும்பம் எளிமையான வாழ்க்கையை வாழ்ந்தாலும், இயற்கையால் சூழப்பட்டிருப்பதால், ஸ்வேதா வனவிலங்குகளுடன் நெருங்கிய தொடர்பில் வளர முடிகிறது.
விலங்குகள் தங்களுக்குரிய வழியில் தொடர்பு கொள்ள முடியும் என்று அவர் நம்புகிறார், மேலும் தனது மகள் அவற்றைப் புரிந்துகொண்டு அவற்றுடன் பழகி வருவதாக கூறுகிறார்.
வீட்டிற்கு அருகில் காயமடைந்த நிலையில் அந்த முள்ளம்பன்றியை பார்த்தோம். பிறகு அதனுடனான நட்பு தொடங்கியது. நாய்கள் குரைக்கும் சத்தத்தைக் கேட்டு பயந்து வீட்டிற்கு அருகில் உலோக தகடுகளின் குவியலுக்குள் ஒளிந்திருந்த முள்ளம்பன்றியை பார்த்தோம்.
அந்த முள்ளம்பன்றி காயமடைந்திருந்த நிலையில் குணமடையும் வரை, வீட்டில் இருந்த மருந்துகளை கொண்டு பல நாட்கள் அதற்கு சிகிச்சையளித்தோம்.
குணமடைந்த பிறகு, அந்த முள்ளம்பன்றி காட்டுக்கு திரும்பியது, ஆனால் தொடர்ந்து எங்கள் குடும்பத்தினரைச் சந்தித்து வந்தது. அது படிப்படியாக ஸ்வேதாவுடன் நெருங்கிய பிணைப்பை ஏற்படுத்தி பழகிவிட்டது.
நாங்கள் அதனை கூண்டில் அடைத்து வைப்பதில்லை. அது காட்டில் சுதந்திரமாக சுற்றித்திரியவும், தானாகவே திரும்பி வரவும் பழகியுள்ளது என்றும் கூறியுள்ளார்.
ஸ்வேதா, காட்டு முள்ளம்பன்றி மற்றும் பூனை ஆகியவற்றுக்கு இடையேயான இந்த நெகிழ்ச்சியான நட்பை உலகெங்கிலும் உள்ள மில்லியன் கணக்கானோர் பார்வையிட்டுள்ளதுடன், பலர் இதை ஒரு நிஜ வாழ்க்கை டிஸ்னி தருணம் என்று வர்ணித்து வருகின்றனர்.
துபாயில் அமைந்துள்ள உலகின் மிக உயரமான கட்டடமான புர்ஜ் கலிஃபாவில், ‘மெங்கோ இன்ஜின்’ (Mengo Engine) என்ற செயற்கை நுண்ணறிவு (AI) ஸ்டார்ட்-அப் நிறுவனத்தை 14 வயது சிறுவன் ஒருவர் ஆரம்பித்துள்ளார்.
இது தொடர்பில் மேலும் தெரியவருகையில், ஜெயினம் ஜெயின் என்ற 14 வயது சிறுவன், புர்ஜ் கலிஃபாவின் 141வது மாடியில் தனது ஏஐ ஸ்டார்ட்-அப் நிறுவனத்தை துவங்கியுள்ளார்.
சிறுவயதிலிருந்தே தொழில்முனைவில் ஆர்வம் கொண்டிருந்த அவர், 6 வயது முதல் தனது தந்தையுடன் இணைந்து வணிக நடவடிக்கைகளில் ஈடுபட்டு வந்ததாக தெரிவிக்கப்பட்டுள்ளது.
அவரது திறமையை நம்பி பல நிறுவனங்கள் அவருடன் இணைந்து செயல்பட்டு வருவதாகவும் கூறப்படுகிறது.
மேலும், அவர் உருவாக்கிய கண்டுபிடிப்புகளுக்காக ஏற்கனவே இரண்டு காப்புரிமைகள் (Patents) பதிவு செய்யப்பட்டுள்ளதுடன், மேலும் மூன்று காப்புரிமைகளுக்கு ஒப்புதல் கிடைத்துள்ளதாக தகவல்கள் தெரிவிக்கின்றன.
அதுமட்டுமின்றி, உலகளவில் பிரபலமான TEDx மேடையில் உரையாற்றியுள்ள ஜெயினம் ஜெயின், தனது சொந்த புத்தகத்தையும் எழுதி வெளியிட்டுள்ளார்.
