வவுனியா மாவட்ட இளைஞர்கள், மாணவர்கள் மற்றும் சட்டத் துறையில் ஆர்வமுள்ளவர்களுக்காக “சட்ட அறிவால் சமூகத்தை மாற்றுவோம்” எனும் பொருண்மையிலான சிறப்பு சட்டக் கல்வி மற்றும் தொழில்வழிகாட்டல் செயலமர்வு ஒன்று எதிர்வரும் ஞாயிற்றுக்கிழமை (ஜூலை 05) வவுனியாவில் நடைபெறவுள்ளது.

“நீதியை அறிந்த இளைஞர்களே நாளைய சமூகத்தின் வலிமை” என்ற உயரிய நோக்கோடும், சட்டம் என்பது நீதிமன்றங்களுக்குள் மட்டுப்படுத்தப்பட்ட துறை அல்ல, அது ஒவ்வொரு குடிமகனின் உரிமைகள், பொறுப்புகள் மற்றும் சமூக முன்னேற்றத்துடன் நேரடியாக தொடர்புடையது என்ற விழிப்புணர்வை ஏற்படுத்தும் வகையிலும் இந்த விசேட அமர்வு ஏற்பாடு செய்யப்பட்டுள்ளது.

வட மாகாணத்தின் கல்வி மற்றும் சமூக முன்னேற்றத்தில் முக்கிய பங்கு வகிக்கும் வவுனியா மாவட்ட சமூகத்தினருக்கு இதுவொரு சிறந்த வழிகாட்டல் தளமாக அமையும் என எதிர்பார்க்கப்படுகிறது.

இந்த செயலமர்வின் மூலம், அனுபவமிக்க சட்ட வல்லுநர்களிடமிருந்து நேரடியாகப் பின்வரும் விடயங்கள் குறித்து அறிந்துகொள்ளும் அரிய வாய்ப்பு பங்கேற்பாளர்களுக்குக் கிடைக்கவுள்ளது

அடிப்படை உரிமைகள்: மனித உரிமைகள் மற்றும் அடிப்படை உரிமைகள் குறித்த விழிப்புணர்வு.

சட்டக் கட்டமைப்பு: இலங்கையின் அரசியலமைப்பு மற்றும் சட்ட அமைப்பு முறைமை.

கல்வி வழிகாட்டல்: சட்டக் கல்விக்கான பாதைகள் மற்றும் பல்கலைக்கழக வாய்ப்புகள்.

தொழில் வாய்ப்புகள்: வழக்கறிஞர், நீதிபதி, சட்ட ஆலோசகர் உள்ளிட்ட பல்வேறு துறை சார்ந்த வேலைவாய்ப்புகள்.

நவீன சட்டம்: தற்காலத்திற்கு அவசியமான செயற்கை நுண்ணறிவு (AI), சைபர் சட்டம் (Cyber Law) மற்றும் டிஜிட்டல் சான்றுகள் (Digital Evidence).

ஆளுமைத் திறன்: பொதுப் பேச்சு (Public Speaking), தலைமைத்துவம் (Leadership) மற்றும் மாதிரி நீதிமன்ற (Moot Court) அறிமுகம்.

யார் பங்கேற்கலாம்?

சட்டம் மற்றும் சட்ட ஒழுங்கு முறை பற்றி அறிய ஆர்வமுடைய அனைவரும் இதில் பங்கேற்கலாம். விசேடமாக:
* O/L மற்றும் A/L கல்வி பயிலும் மாணவர்கள்
* பல்கலைக்கழக மாணவர்கள்
* சட்டத் துறையில் ஆர்வமுள்ள இளைஞர்கள்
* சமூக சேவையில் ஈடுபட விரும்பும் ஆர்வலர்கள்

செயலமர்வின் சிறப்பு அம்சங்கள் :

வழக்கமான விரிவுரைகளாக அமையாது, கலந்துரையாடல் மற்றும் செயல்பாடுகளுடன் கூடிய கற்றல் அனுபவமாக இச்செயலமர்வு அமையவுள்ளது.

பங்கேற்கும் அனைவருக்கும் பெறுமதியான பங்கேற்புச் சான்றிதழ் மற்றும் சிற்றுண்டி வசதி என்பன ஏற்பாடு செய்யப்பட்டுள்ளன.

முக்கிய குறிப்பு: கற்றலின் தரத்தைப் பேணும் நோக்கில், இச்செயலமர்வில் பங்கேற்பதற்கான இடங்கள் 30 பேருக்கு மட்டுமே (முதலில் பதிவு செய்பவர்களுக்கு முன்னுரிமை) வரையறுக்கப்பட்டுள்ளன.

நிகழ்வு விபரங்கள் :

இடம்: IDM Nations Campus International, பிரதான மண்டபம் (Main hall), வவுனியா.

திகதி: 05.07.2026 (ஞாயிற்றுக்கிழமை)

நேரம்: காலை 09.00 மணி முதல் மதியம் 12.30 மணி வரை.

அனுசரணை: IDM Nations Campus International.

உங்கள் சட்ட அறிவையும் தலைமைத்துவத் திறன்களையும் அடுத்த கட்டத்திற்கு கொண்டு செல்ல விரும்பும் வவுனியா மாவட்ட இளைஞர்கள், இந்த அரிய வாய்ப்பைத் தவறவிடாமல் முன்கூட்டியே தங்களது இடங்களை உறுதிசெய்து கொள்ளுமாறு கேட்டுக் கொள்ளப்படுகிறார்கள்.

தொடர்புகளுக்கும் பதிவுகளுக்கும் :

தொலைபேசி எண்: 076 097 0955

WhatsApp பதிவு : இங்கே கிளிக் செய்து பதிவு செய்யவும்.

இது ஒரு கட்டணம் செலுத்தப்பட்ட விளம்பரம்

வவுனியா மாநகர முதல்வர் சு.காண்டீபனை பதவிநீக்கி ஆளுனர் வெளியிட்ட வர்த்தமானிக்கு வவுனியா மேல் நீதிமன்றம் இடைக்கால தடை உத்தரவை வழங்கியுள்ளதாக ஜனாதிபதி சட்டத்தரணி எம்.எ.சுமந்திரன் தெரிவித்தார்.

ஆளுனரின் முடிவினை சவாலுக்குட்படுத்தி மனுதாரரான முதல்வர் காண்டீபன் தொடுத்த வழக்கு இன்று வவுனியா மேல் நீதிமன்றத்தில் விசாரணைக்கு எடுத்துக்கொள்ளப்பட்ட போதே இந்த உத்தரவு வழங்கப்பட்டது.

இது தொடர்பாக மனுதாரர் சார்பில் ஆஜராகிய ஜனாதிபதி சட்டத்தரணி எம்.ஏ.சுமந்திரன் ஊடகங்களுக்கு கருத்து தெரிவித்த போது..

வடமாகாண ஆளுநர் வர்த்தமானி அறிவித்தல் ஊடாக வவுனியா மாநகர முதல்வர் காண்டீபனின் பதவியை நீக்கி அறிவித்தார். அதற்கு எதிராக எழுத்தாணை மனு ஒன்று வவுனியா மேல்நீதிமன்றில் நேற்றயதினம் தாக்கல் செய்யப்பட்டு, இன்று அது எடுத்துக்கொள்ளப்பட்டது.

அதற்கான அறிவித்தல் பிரதிவாதிகளுக்கும் அனுப்ப பட்டிருந்தது. ஆனால் நேற்றயதினம் அனுப்பப்பட்ட காரணத்தினாலோ என்னவோ அவர்கள் இன்று சமூகமளித்திருக்கவில்லை.

இந்த மனுவிலே காணப்படுகின்ற விடயங்கள் தொடர்பாகவும், மனுதாரர் சார்பிலே வெளியிடப்பட்ட சமர்ப்பணங்கள் தொடர்பாகவும் மன்று திருப்தியடைந்து எதிர் மனுதாரருக்கு அறிவித்தல் சேர்க்கும் படியான ஒரு கட்டளையை நியமித்திருக்கிறது.

அத்துடன் இந்த மனுவிலே மூன்று இடைக்கால நிவாரணங்களையும் நாம் கோரியிருந்தோம். காண்டீபன் அவர்களை முதல்வர் பதவியிலும் அல்லது உறுப்பினர் பதவியில் இருந்தும் நீக்குகின்ற குறித்த வர்த்தமானி பிரசுரத்தை இடைநிறுத்தும் படியாக நாம் கேட்டிருந்தோம். அது இடைநிறுத்தப்பட்டிருக்கின்றது.

இரண்டாவது அந்த வர்த்தமானியின் அடிப்படையில் எதிர் மனுதாரர்கள் எந்த நடவடிக்கையினையும் எடுக்க கூடாது என்ற ஒரு தடைஉத்தரவும் வழங்கப்பட்டுள்ளது. மூன்றாவதாக காண்டீபனை பிரதியீடு செய்கின்ற வகையிலே இன்னொரு முதல்வரை தெரிவுசெய்வதற்கோ நியமிப்பதற்கோ அல்லது உறுப்பினரை தெரிவுசெய்வதற்கோ எந்த நடவடிக்கையும் எடுக்க கூடாது என்கின்ற தடை உத்தரவையும் கோரியிருந்த நிலையில் அது வழங்கப்பட்டுள்ளது.

இந்த தடை உத்தரவுகள் தொடர்பாக வருகின்ற 15 ஆம் திகதி எதிர் மனுதாரர்கள் நீதிமன்றிலே சமூகமாயிருந்து இதற்கான நிலைப்பாடுகளை தெரிவிக்கலாம், அதுவரை இந்த உத்தரவுகள் அமுலிலே இருக்கும். என்றார்.

மனுதாரர் சார்பிலே ஜனாதிபதி சட்டத்தரணி எம்.எ.சுமந்திரன் தலைமையில் சட்டத்தரணிகளான ஆர்.தயாபரன், கேசவன் சயந்தன் ஆகியோர் வழக்கை நெறிப்படுத்தியிருந்தனர்.

வவுனியா – குழுமாட்டுச்சந்தியில் போக்குவரத்து பொலிஸாரினால் கைது செய்யப்பட்ட நபர் ஒருவர், பொலிஸாரின் பிடியில் இருந்து தப்பியோடி, பின்னர் நீண்ட நேர தேடுதலின் பின் பற்றை ஒன்றிற்குள் ஒளிந்திருந்த நிலையில் கைது செய்யப்பட்டுள்ளார்.

இந்த சம்பவம் தொடர்பில் மேலும் தெரியவருகையில், கடமையில் ஈடுபட்டிருந்த நெளுக்குளம் பகுதி போக்குவரத்து பொலிஸார், நபர் ஒருவரைக் கைது செய்துள்ளனர்.

இதனைத் தொடர்ந்து, கைது செய்யப்பட்ட நபரை போக்குவரத்து பொலிஸார் தங்களது மோட்டார் சைக்கிளில் ஏற்றி நெளுக்குளம் பொலிஸ் நிலைய நோக்கி அழைத்து சென்றுள்ளனர்.

மோட்டார் சைக்கிள் குழுமாட்டுச்சந்தி பகுதியை கடக்க முற்பட்ட சமயத்தில், அந்த நபர் திடீரென மோட்டார் சைக்கிளில் இருந்து குதித்து தப்பியோடியுள்ளார்.

பொலிஸார், தப்பியோடிய நபரைத் தேடும் பணியில் தீவிரமாக ஈடுபட்டனர். நீண்ட நேரமாக அப்பகுதியில் முன்னெடுக்கப்பட்ட தீவிர தேடுதல் முயற்சியின் பலனாக,

பராமரிப்பற்ற நிலையில் கைவிடப்பட்டுக் காணப்பட்ட காணி ஒன்றின் பற்றைக்குள் அந்த நபர் ஒளிந்திருப்பது கண்டுபிடிக்கப்பட்டுள்ளது. அங்கு விரைந்த பொலிஸார், மறைந்திருந்த நபரை வளைத்துப் பிடித்து மீண்டும் கைது செய்துள்ளனர்.

கைது செய்யப்பட்ட நபர் தற்போது மேலதிக விசாரணைகளுக்காக நெளுக்குளம் பொலிஸ் நிலையத்திற்கு அழைத்துச் செல்லப்பட்டுள்ளார். இந்த சம்பவம் தொடர்பாக நெளுக்குளம் பொலிஸார் மேலதிக விசாரணைகளை மேற்கொண்டு வருகின்றனர்.