கொழும்பு கடவத்தையிலிருந்து நுவரெலியா நோக்கிச் பயணித்த லொறி பிரதான வீதியிலிருந்து விலகிச் சென்று விபத்துக்குள்ளானதில் மூவர் காயமடைந்து வைத்தியசாலையில் அனுமதிக்கப்பட்டுள்ளனர்.

குறித்த விபத்தானது இன்று(03.07.2026) ஹட்டன் – கொழும்பு பிரதான வீதியில் பொல்பிட்டிய பொலிஸ் நிலையத்தின் கீழ் உள்ள கலுகல சிங்கள மகா வித்தியாலயத்திற்கு அருகே காலை சுமார் 5:30 மணியளவில் நிகழ்ந்துள்ளது.

விசாரணை மேற்கொண்டு வரும் பொலிஸார்

கொழும்பு கடவத்தையிலிருந்து நுவரெலியாவுக்கு பயணித்த சிறிய ரக லொறி கட்டுப்பாட்டை இழந்து பிரதான விதியிலிருந்து விலகிச் சென்று பள்ளத்தில் கவிழ்ந்ததில்,

அதன் சாரதி மற்றும் மேலும் இருவர் கித்துல்கல பிராந்திய வைத்தியசாலையில் அனுமதிக்கப்பட்டதாக பொல்பிட்டிய பொலிஸ் அதிகாரி ஒருவர் தெரிவித்துள்ளார்.

விபத்து குறித்து விசாரணை மேற்கொண்டு வரும் பொல்பிட்டிய பொலிஸ் அதிகாரிகள் கூறுகையில் சாரதிக்கு ஏற்பட்ட நித்திரை காரணமாக இந்த விபத்து நிகழ்ந்ததாகவும், விபத்தில் லொறி பலத்த சேதமடைந்ததாகவும் தெரிவித்துள்ளனர்.

மட்டக்களப்பு போதனா வைத்தியசாலையில் பிரசவத்திற்குப் பின்னர் உயிரிழந்த இளம் தாயின் மரணம் தொடர்பில், தங்களுக்கு நீதி கிடைக்கவும்,

அசல் மருத்துவ ஆவணங்களை மீட்டுத் தரவும் ஜனாதிபதி மற்றும் நீதித்துறை அதிகாரிகள் உடனடியாகத் தலையிட வேண்டும் என உயிரிழந்த பெண்ணின் கணவர் கோரிக்கை விடுத்துள்ளார்.

அண்மையில் டெங்கு நோயினால் பாதிக்கப்பட்ட நிலையில் பிரசவத்திற்குப் பின்னர் இளம் தாய் ஒருவர் உயிரிழந்ததாகத் தெரிவிக்கப்பட்டிருந்தது.

இந்தச் சம்பவம் தொடர்பில் உயிரிழந்த பெண்ணின் குடும்பத்தினர் மட்டக்களப்பு ஊடக அமையத்தில் ஊடகச் சந்திப்பொன்றை நடத்தி தங்களது தரப்புக் கருத்துகளை வெளியிட்டனர்.

இதன்போது கருத்து தெரிவித்த உயிரிழந்த ஜெயப்பிரியாவின் கணவர் மதுர அந்தகன், தனது மனைவியின் உயிரிழப்புக்கு மருத்துவர்களின் அலட்சியமே காரணம் எனக் குற்றஞ்சாட்டினார்.

மேலும், மருத்துவமனை நிர்வாகம் வெளிப்படைத்தன்மையுடன் செயல்படவில்லை என்றும் அவர் தெரிவித்தார். அவரது கூற்றுப்படி, தனது மனைவிக்கு காய்ச்சல் ஏற்பட்ட முதல் நாளிலேயே தனியார் மகப்பேற்று மருத்துவரின் ஆலோசனையின் பேரில் மட்டக்களப்பிலுள்ள தனியார் மருத்துவமனையில் அனுமதிக்கப்பட்டபோது, அது சாதாரண காய்ச்சல் எனக் கூறி மருந்துகள் வழங்கப்பட்டு வீட்டிற்கு அனுப்பப்பட்டதாகத் தெரிவித்தார்.

அதன் பின்னர் காய்ச்சல் தீவிரமடைந்ததால் அரசு வைத்தியசாலையின் 7ஆம் வார்டில் அனுமதிக்கப்பட்டதாகவும், அங்கும் பலமுறை இரத்தப் பரிசோதனைகள் மேற்கொள்ளப்பட்டபோதிலும் அது சாதாரண காய்ச்சல் என்றே தெரிவிக்கப்பட்டதாகவும் அவர் கூறினார்.

மேலும், தனது மனைவி குடும்பத்தினருக்கு முன்னறிவிப்பு வழங்கப்படாமல் அவசர சிகிச்சைப் பிரிவுக்கு மாற்றப்பட்டதாகவும், அங்கு டெங்கு அன்டிஜன் பரிசோதனை மேற்கொள்ள தேவையான வசதிகள் இல்லை எனக் கூறி வெளி ஆய்வகத்தில் பரிசோதனை செய்யுமாறு அறிவுறுத்தப்பட்டதாகவும் அவர் தெரிவித்தார்.

“எனக்கு நேர்ந்த இந்தத் துயரம் இனி வேறு எந்தக் குடும்பத்திற்கும் ஏற்படக் கூடாது. எனது மனைவியின் உயிரிழப்புக்குப் பொறுப்பானவர்கள் பதிலளிக்க வேண்டும்.

எங்களுக்கு நீதி கிடைக்க ஜனாதிபதியும் நீதித்துறையும் உடனடியாகத் தலையிட வேண்டும்” என அவர் கோரிக்கை விடுத்தார். இதுகுறித்து மட்டக்களப்பு போதனா வைத்தியசாலை அல்லது சுகாதார அதிகாரிகளின் பதில் இதுவரை வெளியாகவில்லை.

இதனையடுத்து, கணவர் சொந்த முயற்சியில் இரத்த மாதிரியை எடுத்துச் சென்று தனியார் ஆய்வகத்தில் பரிசோதித்ததில், அவருக்கு டெங்கு பாதிப்பு இருப்பது உறுதி செய்யப்பட்டுள்ளது.

இந்த ரிப்போர்ட்டைப் பார்த்த பின்னரே, அது டெங்கு காய்ச்சல் என்பதை மருத்துவமனை நிர்வாகம் ஒப்புக்கொண்டுள்ளது. பிரசவ வலி ஏற்பட்டதைத் தொடர்ந்து, “சாதாரண முறையிலேயே பிரசவம் நடக்கும்” என மருத்துவர்கள் உறுதியளித்தவாறே பிரசவமும் நடந்துள்ளது.

குழந்தையைப் பெற்றெடுத்த பின்னர், 21-ஆம் திகதி மாலை வரை ஜெயப்பிரியா தனது குடும்பத்தினருடன் நலமாகப் பேசியுள்ளார். ஆனால், அன்றிரவு திடீரென அவருக்குக் கடுமையான இரத்தப்போக்கு ஏற்பட்டுள்ளது.

குடும்பத்தினரிடம் எவ்வித அனுமதியோ, ஒப்புதல் கையெழுத்தோ பெறாமல் நள்ளிரவில் மருத்துவர்களால் அவசர அவசரமாக அறுவை சிகிச்சை செய்யப்பட்டுள்ளது.

மறுநாள் காலையில் குடும்பத்தினர் பார்க்கச் சென்றபோதே இந்த விபரம் அவர்களுக்குத் தெரிவிக்கப்பட்டுள்ளது.

அறுவை சிகிச்சைக்குப் பின் பெண்ணின் நுரையீரல் மற்றும் சிறுநீரகங்கள் செயலிழக்கத் தொடங்கியுள்ளன. தொடர்ந்து மயக்க நிலையிலேயே வைக்கப்பட்டிருந்த ஜெயப்பிரியா, சிகிச்சை பலனின்றி உயிரிழந்துள்ளார்.

“எனது மனைவியின் பிரசவத்தின் போது அங்கிருப்பேன் என்று உறுதியளித்த டாக்டர் சரவணன், பிரசவத்தின் போது அங்கு இல்லை” என்றும், “கர்ப்ப காலத்தின் 10 மாதங்களில் 12 முதல் 13 முறை தனியார் முறையில் ஸ்கேன் செய்த அறிக்கைகள்,

சிகிச்சைக் குறிப்புகள் மற்றும் அரசாங்கத்தினால் வழங்கப்படும் முக்கிய ஆவணமான ‘ஏ-கார்ட்’ போன்ற எதனையும் மருத்துவமனை நிர்வாகம் எங்களிடம் ஒப்படைக்க மறுத்து மறைத்து வருகிறது” என்றும் கணவர் குற்றம் சாட்டியுள்ளார்.

“எனக்கு நேர்ந்த இந்தத் துயரம் இனி வேறு எந்தவொரு குடும்பத்திற்கும் நடந்துவிடக் கூடாது. எனது மனைவியின் இழப்பிற்குச் சம்பந்தப்பட்ட அனைவரும் பதில் சொல்லியே ஆக வேண்டும்” எனக் கண்ணீருடன் குறிப்பிட்ட அவர்,

தங்களுக்கு இழைக்கப்பட்ட அநீதிக்கு நீதி கிடைக்கவும், ஒரிஜினல் மருத்துவ ஆவணங்களை மீட்டுத் தரவும் ஜனாதிபதி மற்றும் நீதித்துறை அதிகாரிகள் உடனடியாகத் தலையிட வேண்டும் என்று உருக்கமாக வேண்டுகோள் விடுத்துள்ளார்.

மாவனல்லை, கடாப்பகந்தஹேன பகுதியில் கூரிய ஆயுதத்தால் கழுத்தில் குத்தப்பட்டு ஒருவர் படுகொலை செய்யப்பட்டுள்ளார். கடந்த 29 ஆம் திகதி இரவு, இந்த சம்பவம் இடம்பெற்றுள்ளது.

இந்த சம்பவத்தில் 42 வயதான பிரதீப் தில்ஷான் ஜயரத்ன என்ற மூன்று பிள்ளைகளின் தந்தை உயிரிழந்துள்ளார். இது தொடர்பான ஆரம்பக்கட்ட விசாரணைகளை மாவனல்லை பொலிஸார் ஆரம்பித்துள்ளனர்.

பொலிஸ் விசாரணைகளுக்கு அமைய, உயிரிழந்த நபர் கல்அத்தர பிரதேசத்திலிருந்து தனது வீட்டிற்கு மோட்டார் சைக்கிளில் சென்று கொண்டிருந்த போது பெண் ஒருவரை சந்தித்துள்ளார்.

இரவு 8.45 மணியளவில் வீதியின் ஆள் நடமாட்டமில்லாத இடத்தில் பேசிக்கொண்டிருந்த போது, அங்கு வந்த சந்தேகநபர், குறித்த நபரை கத்தியால் குத்திவிட்டு தப்பிச் சென்றுள்ளார்.

காயங்களுடன் சென்ற நபரை பிரதேசவாசிகள் உடனடியாக வைத்தியசாலைக்கு கொண்டு செல்ல முற்பட்ட போதிலும், அவர் ஏற்கனவே உயிரிழந்திருந்தமை தெரியவந்தது.

கொலை செய்யப்பட்ட நபருக்கும், சந்தேகநபரின் மனைவிக்கும் இடையே நீண்டகாலமாக நெருங்கிய தொடர்பு இருந்து வந்துள்ளது. இதன் காரணமாக ஏற்பட்ட தகராறே இந்த கொலைக்குக் காரணமாக இருக்கலாம் என பொலிஸார் சந்தேகிக்கின்றனர்.

சம்பவத்தின் பின்னர் பிரதேசத்தில் இருந்து தப்பியோடிய சந்தேகநபரை கைது செய்ய விசேட பொலிஸ் குழுவினர் ஈடுபடுத்தப்பட்டுள்ளனர்.

சம்பவம் நடந்த இடத்தில் பெரிய அளவிலான இரத்தக் கறைகள், காலணிகள், மோட்டார் சைக்கிள் மற்றும் தலைக்கவசம் ஆகியவற்றை பொலிஸார் கண்டெடுத்துள்ளனர்.

ஆணமடுவ, கொட்டுக்கச்சிக்கு அருகில் மோட்டார் சைக்கிள் வீதியை விட்டு விலகிச் சென்றதில் ஏற்பட்ட விபத்தில் இளைஞன் உயிரிழந்துள்ளார்.

கொட்டுக்கச்சி மற்றும் கச்சிமடுவ ஆகிய இரு நீர்த்தேக்கங்களை இணைக்கும் பாலத்திற்கு அருகிலேயே இந்த விபத்து இடம்பெற்றுள்ளது.

திங்கட்கிழமை பொசன் தினத்தை முன்னிட்டு ஆணமடுவ நகரில் நடைபெற்ற பொசன் வலயத்தை பார்வையிட்டு விட்டு, வீடு திரும்பிக் கொண்டிருந்த போதே விபத்து ஏற்பட்டுள்ளது.

இந்த விபத்தில் புத்தளம், அட்டவில்லுவ 05ஆம் பகுதியைச் சேர்ந்த 19 வயதான சசிந்து லக்ஷான் என்ற இளைஞரே உயிரிழந்துள்ளார்.

விபத்தில் உயிரிழந்த இளைஞனின் சகோதரர் படுகாயம் அடைந்த நிலையில் சிகிச்சைக்காக கொழும்பு தேசிய வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்தனர்.

மோட்டார் சைக்கிள் விபத்துக்குள்ளானதில் இளைஞன் சுமார் 50 மீட்டருக்கும் அதிகமான தூரம் தூக்கி வீசப்பட்டுள்ளார். விபத்தில் போது மோட்டார் சைக்கிளை சசிந்து லக்ஷானே ஓட்டிச் சென்றுள்ளார். அவரது சகோதரர் பின்னால் அமர்ந்து பயணித்ததாகவும் பொலிஸார் மேலும் தெரிவித்தனர்.

மட்டக்களப்பு – வெல்லாவெளி பொலிஸ் பிரிவுக்குட்பட்ட நெல்லிக்காடு பகுதியில் 58 வயதுடைய குடும்பஸ்தர் ஒருவரின் சடலம் மீட்கப்பட்டுள்ளதாக பொலிஸார் தெரிவித்துள்ளனர்.

இந்த சம்பவம் நேற்று(01.07.2026) இடம்பெற்றுள்ளதாக தெரிவிக்கப்பட்டுள்ளது. இவ்வாறு உயிரிழந்தவர், 58 வயதுடைய, மூன்று பிள்ளைகளின் தந்தையான கந்தையா – நந்தகுமார் என்பவர் என்றும் அடையாளம் காணப்பட்டுள்ளது.

நேற்று (01.07.2026) மாலை தனது மாட்டிற்குப் புல் வெட்டுவதற்காகச் சென்ற நபர், இரவு நேரமாகியும் வீடு திரும்பவில்லை. இதனால் சந்தேகமடைந்த உறவினர்கள் தேடிச் சென்றபோது, இரவு 7 மணியளவில் வயல் காணிக்குள் அவர் சடலமாகக் கிடப்பதைக் கண்டுள்ளனர். ​

சம்பவ இடத்திற்கு விரைந்த வெல்லாவெளி பொலிஸார் முதற்கட்ட விசாரணைகளை மேற்கொண்டுள்ளனர்.

இந்நிலையில், இன்று (02.07.2026) காலை களுவாஞ்சிகுடி நீதிமன்றத்தின் உத்தரவிற்கு அமைவாக, திடீர் மரண விசாரணை அதிகாரி வீ.ஆர்.மகேந்திரன் சம்பவ இடத்திற்கு வருகை தந்து சடலத்தைப் பார்வையிட்டுள்ளனர்.

மேலும், சம்பவம் தொடர்பான மேலதிக விசாரணைகளையும் பொலிஸார் மேற்கொண்டு வருகின்றனர்.

2026 ஆம் ஆண்டின் முதல் ஐந்து மாதங்களில் 1071 மில்லியன் அமெரிக்க டொலர் மதிப்புள்ள வாகனங்கள் நாட்டிற்குள் இறக்குமதி செய்யப்பட்டுள்ளதாக இலங்கை மத்திய வங்கி அறிவித்துள்ளது.

இந்த ஆண்டின் முதல் ஐந்து மாதங்களில் நாட்டின் பொருளாதாரத்தின் வெளிநாட்டுத்துறையின் செயல்திறன் குறித்த தகவல்களை சமர்ப்பிக்கும் போது மத்திய வங்கி இந்த அறிக்கையை வெளியிட்டுள்ளது.

அந்த அறிக்கையில் மேலும் தெரிவிக்கப்பட்டுள்ளதாவது, மத்திய கிழக்கு பிராந்தியத்தில் நிலவும் போர் சூழலின் காரணமாக இலங்கையின் வெளிநாட்டுத் துறை கடுமையான அழுத்தத்தில் இருப்பதாகவும், ரூபாயின் மதிப்பு 7.9% சரிந்துள்ளதாகவும் இலங்கை மத்திய வங்கி வெளியிட்ட சமீபத்திய அறிக்கை தெரிவிக்கின்றது.

இதன் விளைவாக, 2025 ஆம் ஆண்டின் இறுதிக்கும் 2026 ஆம் ஆண்டு ஜூன் மாத இறுதிக்கும் இடையில், இலங்கை ரூபாயின் மதிப்பு அமெரிக்க டொலருக்கு எதிராக 7.9 சதவீதம் சரிந்துள்ளது.

2026 ஆம் ஆண்டின் முதல் ஐந்து மாதங்களில் (ஜனவரி – மே) வர்த்தகப் பற்றாக்குறை கணிசமாக அதிகரித்துள்ளது.

2025-ஆம் ஆண்டின் இதே காலகட்டத்தில் 2.7 பில்லியன் அமெரிக்க டொலராக இருந்த வர்த்தகப் பற்றாக்குறை, 2026-ஆம் ஆண்டின் இதே காலகட்டத்தில் 4.7 பில்லியன் அமெரிக்க டொலராக அதிகரித்துள்ளது.

ஏற்றுமதி வருவாயை விட இறக்குமதிச் செலவினம் வேகமாக அதிகரித்ததே இதற்கு முக்கியக் காரணமாகும்.

மே மாதத்தில், எரிபொருள் இறக்குமதிச் செலவினம் ஆண்டு அடிப்படையில் 112 சதவீதம் அதிகரித்து 536 மில்லியன் அமெரிக்க டொலராகவும் உயர்ந்துள்ளது.

மேலும், 2026-ஆம் ஆண்டின் முதல் ஐந்து மாதங்களில் வாகன இறக்குமதிக்காக மட்டும் 1,071 மில்லியன் அமெரிக்க டொலர் செலவிடப்பட்டுள்ளது.

வெளிநாட்டுத் தொழிலாளர்களிடமிருந்து வரும் பணம் அதிகரித்த போதிலும், விரிவடைந்து வரும் வர்த்தகப் பற்றாக்குறை உபரி குறைந்ததன் காரணமாக,

2026-ஆம் ஆண்டு மே மாதத்தில் 194 மில்லியன் அமெரிக்க டொலர் நடப்பு கணக்குப் பற்றாக்குறை பதிவு செய்யப்பட்டது.

ஆண்டின் முதல் ஐந்து மாதங்களில் சுற்றுலாப் பயணிகளின் வருகை ஒரு மில்லியனைத் தாண்டி, சுற்றுலாத் துறையில் முன்னேற்றத்தைக் காட்டினாலும்,

அதே காலகட்டத்தில் சுற்றுலா வருவாய் 11.9 சதவீதம் குறைந்து $1,360 மில்லியனாக உள்ளதாகவும் தெரிவித்துள்ளது.

இலங்கையில் தங்கத்தின் விலை இன்று (02.07.2026) பவுணுக்கு 5,000 ரூபாயால் அதிகரித்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

நேற்று (01) 24 கரட் தங்கம் ஒரு பவுண் 379,000 ரூபாயாக விற்பனை செய்யப்பட்டிருந்தது. இந்த நிலையில், இன்று 24 கரட் தங்கம் பவுண் ஒன்று 384,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 353,300 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 48,000 ரூபாயாகவும், 22 கரட் தங்கத்தின் ஒரு கிராமின் விலை 44,163 ரூபாயாகவும், விற்பனை செய்யப்படுகிறமை குறிப்பிடத்தக்கது.

சகோதரரின் கொலைக் குற்றச்சாட்டு வழக்குக்காக பணம் இல்லாமல் இறுதியில் தனது சிறுநீரகம் ஒன்றை விற்று சட்டத்தரணிக்கான கட்டணம் செலுத்திய மனதை உருக்கும் சம்பவம் ஒன்றை உயர் நீதிமன்ற நீதியரசர் யசந்த கோதாகொட குறிப்பிட்டுள்ளார்.

நிகழ்வொன்றில் கலந்து கொண்டு கருத்துரையாற்றும் போதே அவர் இவ்வாறு குறிப்பிட்டுள்ளார். அந்த சம்பவம் தொடர்பில் அவர் மேலும் குறிப்பிட்டதாவது,

சகோதரரின் கொலை வழக்குக்காக சட்டத்தரணிகளின் கட்டணங்களை ஆரம்பத்தில் தன் கையில் இருந்த பணத்தில் செலுத்தியுள்ளார்.

பின்னர் கையில் இருந்த பணம் தீர்ந்ததும், அவர்கள் வசித்து வந்த காணியை அடகு வைத்துள்ளார். அவரிடம் அடகு வைப்பதற்கு வேறு எந்தவொரு சொத்தும் இல்லை.

தனது சகோதரரின் வழக்குக்காக திறமையான சட்டத்தரணிகள் குழுவொன்றின் சேவையைப் பெற்றுக்கொள்வதற்காக,

தனது இரண்டு சிறுநீரகங்களில் ஒன்றை விற்றுப் பணம் பெற்று, சட்டத்தரணிகளின் கட்டணத்தைச் செலுத்த அவர் தீர்மானித்துள்ளார்.

பெரும்பான்மையானோர் இவ்வாறு தமது விருப்பத்துடனோ அல்லது இலகுவாகவோ செய்வதில்லை. சட்டத்தரணிகளின் கட்டணங்களை இலங்கை அரசாங்கத்தினாலோ அல்லது உயர் நீதிமன்றத்தினாலோ ஒழுங்குபடுத்த முடியாது.

அது ஒரு ஏற்றுக்கொள்ளக்கூடிய தீர்வும் அல்ல. உங்கள் மனச்சாட்சிக்கு இணங்க, கட்சிக்காரரால் செலுத்தக்கூடிய கட்டணத்தை கருத்தில் கொண்டு, மிகவும் நியாயமானதொரு கட்டணத்தை சட்டத்தரணிகளால் தீர்மானிக்க முடியும்.

இல்லையென்றால் தனது தொழில்முறை சேவைகளில் ஆகக்குறைந்தது ஒரு குறிப்பிட்ட சதவீதத்தையாவது பொருளாதார ரீதியாகப் பாதிக்கப்பட்டுள்ள மக்களுக்கு இலவசமாக வழங்க வேண்டும்.

அத்தோடு சொத்து பிரிவினை வழக்குகளை எடுத்துக்கொண்டால், மாவட்ட நீதிமன்றத்தில் தாக்கல் செய்யப்பட்ட நாள் முதல், முதலாவது மேன்முறையீடு, இரண்டாவது மேன்முறையீடு மற்றும் அவற்றுக்கு இடையில் திடீரென தாக்கல் செய்யப்படும் (Revisions) என பல விடயங்கள் உள்ளன.

அந்த முழு செயல்முறையும் முடிவடைந்து உயர் நீதிமன்றம் இறுதித் தீர்ப்பை வழங்கும் போது, மாவட்ட நீதிமன்றத்தில் வழக்குத் தாக்கல் செய்யப்பட்டதில் இருந்து சராசரியாக 47 வருடங்கள் கடந்துவிடுகின்றன.

எனவே, இதில் கணிசமான காலதாமதம் நிலவுகிறது என்பதை நாம் உறுதியாகக் கூற முடியும். அடுத்து, நீதியை நிலைநாட்டும் பொறிமுறைக்குள் பிரவேசிப்பதற்கு பல தடைகள் காணப்படுகின்றன அவை நிர்த்திக்கப்பட்ட வேண்டும் என குறிப்பிட்டார்.

நாடு முழுவதும் அன்றாடம் பல்வேறு விபத்துகளால் சுமார் 30 பேர் உயிரிழப்பதாக சுகாதார அமைச்சு தெரிவித்துள்ளது.

கொழும்பில் நடைபெற்ற ஊடகவியலாளர் சந்திப்பில் பேசிய சமூக வைத்திய நிபுணர் வைத்தியர் சமித சிரிதுங்க, நாட்டில் ஆண்டுதோறும் விபத்து தொடர்பான சுமார் 8,000 முதல் 10,000 வரையிலான உயிரிழப்புகள் பதிவாகுவதாகக் குறிப்பிட்டார்.

அதன்படி விபத்துகளால் சராசரியாக ஒவ்வொரு மூன்று மணி நேரத்திற்கும் நான்கு பேர் உயிரிழப்பதாகவும், இதனால் தினசரி உயிரிழப்புகளின் எண்ணிக்கை சுமார் 30-ஐ எட்டுகிறது என்றும் அவர் சுட்டிக்காட்டினார்.

இந்த உயிரிழப்புகளில் வீதி விபத்துகள் கணிசமான பங்கைக் கொண்டிருந்தாலும், கீழே விழுதல், நீரில் மூழ்குதல்,

மின்சாரம் தாக்கல் மற்றும் பாம்பு கடி போன்ற பிற காரணங்கள் பொது விவாதங்களில் பெரும்பாலும் குறைவாகவே குறிப்பிடப்படுகின்றன அல்லது கவனிக்கப்படாமல் போகின்றன என்றும் வைத்தியர் சமித சிரிதுங்க வலியுறுத்தினார்.

இந்த சூழ்நிலையை ஒரு துயரமான நிலை என்று விவரித்த அவர், விழிப்புணர்வு மற்றும் பாதுகாப்பு நடவடிக்கைகளை மேம்படுத்துவதன் மூலம் இத்தகைய உயிரிழப்புகள் பலவற்றைத் தடுக்க முடியும் என்றும் சுட்டிக்காட்டினார்.

காலி – கொழும்பு பிரதான வீதியின் பயாகல, கட்டுகுருந்த பகுதியில் பேருந்து ஒன்றும், முச்சக்கரவண்டி ஒன்றும் நேருக்கு நேர் மோதி விபத்துக்குள்ளானதில் இருவர் உயிரிழந்துள்ளனர்.

கட்டுகுருந்த பகுதியில் நேற்று நள்ளிரவு 12 மணியளவில் இந்த விபத்து இடம்பெற்றுள்ளது. முச்சக்கரவண்டியில் பயணித்த பெண் ஒருவரும், சிறுவன் ஒருவருமே இவ்விபத்தில் உயிரிழந்துள்ளதாக பயாகல பொலிஸார் தெரிவித்துள்ளனர்.

இந்த விபத்தில் முச்சக்கர வண்டியில் பயணித்த மேலும் இருவர் காயமடைந்துள்ளதுடன் அவர்களில் ஒருவரது நிலைமை கவலைக்கிடமாக உள்ளதாக தெரிவிக்கப்படுகிறது.

கொழும்பில் இருந்து மாத்தறை நோக்கி பயணித்த தனியார் பேருந்து ஒன்று, களுத்துறை கட்டுகுருந்த பிரதான பேருந்து நிலையத்தில் நிறுத்தப்பட்டு மீண்டும் பயணத்தை ஆரம்பித்த போது,

எதிரே வந்த முச்சக்கரவண்டி திடீரென பேருந்தின் முன்பகுதியில் மோதி விபத்துக்குள்ளாகியுள்ளது.

இதன்போது முச்சக்கரவண்டியில் ஒரே குடும்பத்தைச் சேர்ந்தவர்கள் பயணித்துள்ளதுடன், அவர்கள் காயமடைந்த நிலையில் களுத்துறை போதனா வைத்தியசாலையில் அனுமதிக்கப்பட்டுள்ளனர். இதன்போது 62 வயதுடைய பாட்டியும் 12 வயதுடைய பேரனும் உயிரிழந்துள்ளனர்.

உயிரிழந்த சிறுவனின் தாத்தாவே முச்சக்கரவண்டியை செலுத்தியுள்ளதுடன், அவரும் பலத்த காயங்களுக்குள்ளாகி களுத்துறை வைத்தியசாலையில் அனுமதிக்கப்பட்டுள்ளார்.

பேருவளை பகுதியில் பொசன் வலயத்தைப் பார்வையிட்டுவிட்டு மீண்டும் வீடு திரும்பிக்கொண்டிருந்த போதே இந்த விபத்து இடம்பெற்றுள்ளது. முச்சக்கரவண்டியை செலுத்தியவருக்கு நித்திரை ஏற்பட்டமையினாலேயே இந்த விபத்து நேர்ந்திருக்கலாம் என சந்தேகிக்கப்படுகிறது.

இதேவேளை, விபத்து நடந்த தருணத்தில் பேருந்தில் இருந்த பயணி ஒருவர், சாரதியின் அனுமதிப்பத்திரம் உள்ளிட்ட ஆவணங்கள் இருந்த பையை திருடிச் சென்றுள்ளமை சிசிடிவி (CCTV) கமராவில் பதிவாகியுள்ளது.

நாடாளுமன்ற உறுப்பினர் அர்ச்சுனா இராமநாதன் நாடாளுமன்ற உறுப்பினராகப் பணியாற்றுவதற்கான தகுதியை எதிர்த்துத் தாக்கல் செய்யப்பட்ட நீதிப்பேராணை மனு மீதான வாதங்களைக் கேட்பதற்காக, மேல்முறையீட்டு நீதிமன்றம் ஆகஸ்ட் 31ஆம் திகதியை நிர்ணயித்துள்ளது.

இந்த வழக்கு இன்று(02.07.2026) மேல்முறையீட்டு நீதிமன்றத்தின் முன் விசாரணைக்கு வந்தது, ஆனால் அமர்வு முறையாக அமைக்கப்படாததால் ஒத்திவைக்கப்பட்டது.

நாடாளுமன்ற உறுப்பினர் இராமநாதன் அரசாங்க மருத்துவ அதிகாரியாகப் பணியாற்றி வந்தபோதே, சமீபத்திய பொதுத் தேர்தலுக்கான தனது வேட்புமனுவைத் தாக்கல் செய்தார் என்று குற்றம்சாட்டி, அபிநவ நிவாஹல் பெரமுனவின் தலைவர் ஓஷால ஹெரத் இந்த மனுவைத் தாக்கல் செய்திருந்தார்.

அரசுப் பணியிலிருந்து முதலில் விலகாமல் வேட்புமனுக்களைத் தாக்கல் செய்வது நாடாளுமன்றத் தேர்தல் சட்டத்தை மீறுவதாகும் என்று மனுதாரர் வாதிட்டதோடு, அந்த நாடாளுமன்ற உறுப்பினர் சட்டப்படி பதவி வகிக்கத் தகுதியற்றவர் என அறிவிக்கக் கோரியிருந்தார்.

மனுதாரரின் வழக்கறிஞர், இந்த வழக்கை கூடிய விரைவில் விசாரணைக்கு எடுத்துக்கொள்ளுமாறு விடுத்த கோரிக்கையைத் தொடர்ந்து, நீதிமன்றம் இந்த வழக்கை ஆகஸ்ட் 31 அன்று வாதங்களுக்காகப் பட்டியலிட்டு அதற்கு முன்னுரிமை அளித்தது.

மனுதாரர் சார்பில் சட்ட ஆலோசகர் என்.கே. அசோக்பரன், ஷெனல் பெர்னாண்டோவுடன் முன்னிலையாகினர். அதே சமயம், நாடாளுமன்ற உறுப்பினர் அர்ச்சுனா இராமநாதன் சார்பில் சட்ட ஆலோசகர் சேனானி தயரத்ன, நிஷாதி விக்ரமசிங்கவுடன் முன்னிலையாகினர்.

புத்தளம், வனாத்தவில்லு பிரதேசத்தில் 4 பாடசாலை மாணவர்கள் நீரில் மூழ்கி உயிரிழந்துள்ளனர்.

மங்களபுர வில்லுவில், பூக்கள் பறிப்பதற்காக படகு ஒன்றில் சென்ற பாடசாலை மாணவர்களே இவ்வாறு நீரில் மூழ்கி உயிரிழந்துள்ளதாக பொலிஸார் தெரிவித்துள்ளனர்.

ஐந்து மாணவர்கள் நேற்றையதினம் படகு ஒன்றில் பூக்கள் பறிப்பதற்காக சென்று கொண்டிருந்த போது, படகு கவிழ்ந்ததில் நீரில் மூழ்கியதாக பொலிஸார் தெரிவித்தனர்.

சம்பவத்தில் நீரில் மூழ்கிய மாணவர்களில் ஒருவர் மீட்கப்பட்ட நிலையில் ஏனைய மாணவர்கள் வனாத்தவில்லுவ வைத்தியசாலையில் அனுமதிக்கப்பட்டனர்.

அவர்களில் ஆபத்தான நிலையில் இருந்த மூவர் புத்தளம் வைத்தியசாலைக்கு மாற்றப்பட்ட போதிலும், அங்கு சிகிச்சை பலனின்றி மாணவர்கள் உயிரிழந்துள்ளனர்.

உயிரிழந்தவர்கள் குறித்த பிரதேசத்தை சேர்ந்த பாடசாலையொன்றின் 11 ஆம் தரத்தில் கல்வி கற்கும் மாணவர்கள் எனத் தெரிவிக்கப்படுகிறது.

இந்த நிலையில் சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.

பண்டாரநாயக்கபுர தேசியப் பாடசாலையில் தரம் 11 இல் கல்வி பயின்று வந்த சலிச கவிஷான், சேதன விஷ்மித, திலேன் மிஹிரங்க மற்றும் தேஷான் புத்திக ஆகிய மாணவர்களே இவ்வாறு உயிரிழந்துள்ளனர்.

சம்பவம் நடந்த தினமான நேற்று பாடசாலையில் சாதாரண தரப் பரீட்சைக்குத் தோற்றவிருக்கும் மாணவர்களுக்கான விஞ்ஞானப் பாட வகுப்பு நடைபெற்றுக் கொண்டிருந்தது.

இதன் போது, அந்த வகுப்பிற்குச் செல்லாமல் இந்த மாணவர்கள் தாமரை மலர் பறிப்பதற்காக சென்றிருந்தமை பொலிஸ் விசாரணைகளின் மூலம் தெரியவந்துள்ளது.

அண்மைக்காலமாக மாணவர்கள் உட்பட பொது மக்கள் நீரில் மூழ்கி பலியாகும் சம்பவங்கள் அதிகரித்துள்ளமை குறிப்பிடத்தக்கது.