Samsung Galaxy Ring 2 குறித்து வெளியான முக்கிய தகவல்!!

Samsung நிறுவனம் தனது அடுத்த தலைமுறை ஸ்மார்ட் மோதிரமான Galaxy Ring 2 உருவாக்கப்பட்டு வருவதை அதிகாரப்பூர்வமாக உறுதி செய்துள்ளது.

இரண்டு ஆண்டுகளுக்கு முன் அறிமுகமான முதல் Galaxy Ring-க்கு பிறகு, அதன் புதிய பதிப்பு தொடர்பாக பல்வேறு தகவல்கள் வெளியாகி வந்த நிலையில், தற்போது Samsung நிறுவனம் அதனை உறுதிப்படுத்தியுள்ளது.

Samsung நிறுவனத்தின் Digital Health பிரிவுத் தலைவர் ஹான் பாக் (Dr. Hon Pak), Galaxy Ring 2 தற்போது உருவாக்கப்பட்டு வருவதாகவும், அதில் iPhone இணைப்பு (iOS Support) வழங்கப்படுவதற்கான சாத்தியம் இருப்பதாகவும் தெரிவித்துள்ளார்.

இதுவரை Galaxy Ring, Android சாதனங்களுடன் மட்டுமே செயல்பட்டு வந்தது. எனினும், Samsung Health மற்றும் Galaxy Wearable செயலிகள் iPhone-களுக்கும் வழங்கப்பட்டால், Galaxy Ring 2-ஐ iPhone பயனர்களும் முழுமையாகப் பயன்படுத்தும் வாய்ப்பு உருவாகும் என எதிர்பார்க்கப்படுகிறது.

புதிய Galaxy Ring 2-ல், மேம்பட்ட ஆரோக்கிய கண்காணிப்பு தொழில்நுட்பம், அதிக துல்லியமான தரவுகள் மற்றும் நீண்டகால பேட்டரி ஆயுள் உள்ளிட்ட பல்வேறு புதிய அம்சங்கள் இடம்பெறும் எனத் தகவல்கள் தெரிவிக்கின்றன.

Samsung Health செயலி மூலம் இரத்த ஒக்சிஜன் அளவு, இதயத் துடிப்பு, தூக்கத்தின் தரம் மற்றும் உடற்பயிற்சி செயல்பாடுகள் உள்ளிட்ட உடல்நலத் தகவல்களை தொடர்ந்து கண்காணிக்க முடியும்.

மேலும், 2027ஆம் ஆண்டு அறிமுகமாகும் என எதிர்பார்க்கப்படும் AI Health Coaching வசதி, பயனர்களின் அன்றாட பழக்கவழக்கங்களை பகுப்பாய்வு செய்து, தனிப்பயனாக்கப்பட்ட உடல்நல ஆலோசனைகள் மற்றும் ஊக்குவிப்புகளை வழங்கும் என Samsung தெரிவித்துள்ளது.

அதோடு, நிறுவனத்தின் SmartThings தளத்துடன் ஒருங்கிணைத்து, பயனர்களின் உணவுப் பழக்கங்களை மேம்படுத்துவதற்கான பரிந்துரைகள் மற்றும் ஆரோக்கியமான சமையல் ஆலோசனைகளையும் வழங்கும் திட்டம் இருப்பதாகவும் தெரிவிக்கப்பட்டுள்ளது.

எஜமான் உதைத்ததால் உயிரிழந்த நாய்க்குட்டி : உதைத்த நபரும் உயிரிழப்பு!!

சிலாபம் பகுதியிலுள்ள ஒரு தோட்டத்திலிருந்து செல்லப்பிராணியாக வளர்ப்பதற்காக வீட்டிற்குக் கொண்டுவரப்பட்ட இரண்டு வார வயதுடைய நாய் குட்டி கடித்ததால் , பிங்கிரிய பகுதியைச் சேர்ந்த ஒருவர் குளியாப்பிட்டிய போதனா மருத்துவமனையில் சிகிச்சை பலனின்றி உயிரிழந்தார்.

நாய்க்குட்டியால் கடிக்கப்பட்ட ஒரு மாதத்திற்குப் பிறகு, அந்த நபர் மருத்துவமனையில் உயிரிழந்தார்.

இறப்புக்கான துல்லியமான காரணத்தைக் கண்டறிய, உயிரிழந்தவரின் மூளையின் சில பகுதிகள் மேலதிக அறிவியல் பரிசோதனைக்காக அரச பகுப்பாய்வாளர் திணைக்களத்தின் நிபுணர்களிடம் அனுப்பப்பட்டுள்ளன.

குடும்பத்தினருக்கு வெறிநாய்க்கடி தடுப்பூசி

பகுப்பாய்வு அறிக்கைகள் கிடைத்த பிறகு அதிகாரப்பூர்வ இறப்புக்கான காரணம் அறிவிக்கப்படும் என்று அவசர கால மரண விசாரணை அதிகாரி தெரிவித்தார். பிங்கிரிய பொலிஸார் மேற்கொண்ட விசாரணைகளின்படி,

இவர் சுமார் ஒரு மாதத்திற்கு முன்பு அந்த நாய் குட்டியை வீட்டிற்குக் கொண்டு வந்திருந்தார். ஒரு நாள், எதிர்பாராதவிதமாக அவர் நாய் குட்டியின் காலின் மீது மிதித்துவிட்டார்.

இதனால் திடுக்கிட்ட நாய் குட்டி அவரைக் கடித்த நிலையில் , அவர் உதைத்ததில் நாய் குட்டி சம்பவ இடத்திலேயே உயிரிழந்தது.

பின்னர், அவர் இறந்த அந்த விலங்கின் உடலை அடக்கம் செய்தார். அவசர கால மரண விசாரணை அதிகாரியின் முன்னிலையில் உயிரிழந்தவரின் மனைவி மற்றும் மகன் அளித்த சாட்சியங்கள் மூலம் இந்த விவரங்கள் தெரியவந்தன.

இந் நிலையில் கடித்த சம்பவத்திற்குப் பிறகு திடீரென உடல்நலக்குறைவு ஏற்பட்ட இவர், குளியாப்பிட்டிய போதனா மருத்துவமனையில் அனுமதிக்கப்பட்டார்.

அங்குள்ள ஒரு பிரத்யேகத் தனிமைப்படுத்தப்பட்ட அறையில் சிகிச்சை பெற்றுக்கொண்டிருந்தபோது அவர் உயிரிழந்தாக கூறப்படுகின்றது.

இந்த மரணத்தைத் தொடர்ந்து, குளியாப்பிட்டிய போதனா மருத்துவமனையின் அவசர கால மரண விசாரணை அதிகாரி திரு. ஹெட்டிகமகே நந்தன பிரியா, உயிரிழந்தவரின் குடும்பத்தினர் அனைவரும் உடனடியாக வெறிநாய்க்கடி தடுப்பூசியைப் பெற்றுக்கொள்ளுமாறு அறிவுறுத்தியுள்ளார்.

மாடியிலிருந்து விழுந்து குடும்பஸ்தர் பரிதாபமாக உயிரிழப்பு!!

திருகோணமலை, சேருநுவர பொலிஸ் பிரிவுக்குட்பட்ட செல்வநகர் பகுதியில், தேநீர் கடையொன்றின் மேல் தட்டுப் பகுதியிலிருந்து (மாடி) விழுந்து குடும்பஸ்தர் ஒருவர் பரிதாபமாக உயிரிழந்துள்ளார்.

இந்த சோகச்சம்பவம் இன்று(01.07.2026) அதிகாலை இடம்பெற்றுள்ளதாக சேருநுவர பொலிஸார் தெரிவித்துள்ளனர்.

சம்பவத்தில் தோப்பூர், பாலத்தோப்பூர் பகுதியைச் சேர்ந்த நான்கு பிள்ளைகளின் தந்தையான சாதீக் றிஸ்வி (வயது 48)என்பவரே இவ்வாறு உயிரிழந்துள்ளார்.

உயிரிழந்த நபர் வீடோடு இணைந்ததாகக் காணப்படும் தேநீர் கடையின் மேல் தட்டில் உறங்கிக்கொண்டிருந்தபோது, தூக்கக் கலக்கத்தில் தவறி விழுந்தாரா அல்லது இச் சம்பவத்தின் பின்னணியில் வேறு ஏதேனும் காரணங்கள் இருக்கின்றனவா? என்ற கோணத்தில் சேருநுவர பொலிஸார் தீவிர விசாரணைகளை முன்னெடுத்து வருகின்றனர்.

சம்பவ இடத்திற்கு மூதூர் நீதிமன்ற பதில் நீதிபதி மற்றும் சட்ட வைத்திய அதிகாரி ஆகியோர் வருகை தந்து சடலத்தைப் பார்வையிட்டனர்.

அதன் பின்னர், சடலம் உடற்கூற்றாய்வு (பிரேத பரிசோதனை) பரிசோதனைக்காக கந்தளாய் தள வைத்தியசாலைக்கு அனுப்பி வைக்கப்பட்டுள்ளது. இவ்விபத்து தொடர்பான மேலதிக விசாரணைகளை சேருநுவர பொலிஸார் மேற்கொண்டு வருகின்றனர்.

இலங்கையில் வரி வலையில் சிக்காமல் தப்பிக்கும் மக்கள் : அரசு விடுத்துள்ள எச்சரிக்கை!!

இலங்கையில் சுமார் 40 சதவீத மக்கள் இன்னும் வரி வலையில் சிக்கவில்லை என்று உள்நாட்டு இறைவரி திணைக்களம் தெரிவித்துள்ளது.

இதன் காரணமாக நாடு எவ்வளவு பணத்தை இழக்கும் என்பது குறித்து எந்த மதிப்பீடும் இல்லை என அதன் ஊடகப் பேச்சாளர் நந்தன குமார கூறினார். உள்நாட்டு வருவாய்த் திணைக்களம் ஏற்பாடு செய்திருந்த ஊடக சந்திப்பில் பங்கேற்றபோது அவர் இந்தக் கருத்துக்களை தெரிவித்தார்.

இதற்கிடையில் நாட்டு மக்களுக்கு வரிகள் குறித்து விழிப்புணர்வு ஏற்படுத்தும் வரி வாரம் 6-ஆம் திகதி தொடங்கும் என அறிவிக்கப்பட்டுள்ளது.

இதேவேளை, இலங்கையில் இதுவரை 12 மில்லியனுக்கும் அதிகமான மக்கள் வரி செலுத்துவோர் அடையாள எண்களை பெற்றுள்ளனர். மேலும் சுமார் 5 மில்லியன் மக்கள் தங்களது வரி செலுத்துவோர் அடையாள எண்களை பெற்றுக்கொள்வதற்காக காத்திருப்பதாக தெரிவிக்கப்படுகின்றது.

அதிகரிக்கும் உயிரிழப்புகள் : பொதுமக்களை அவதானத்துடன் செயற்படுமாறு அறிவுறுத்தல்!!

இந்த ஆண்டின் இதுவரையான காலப்பகுதியில் 32 டெங்கு நோயாளர்கள் உயிரிழந்துள்ளதாக தேசிய டெங்கு கட்டுப்பாட்டுப் பிரிவு அறிவித்துள்ளது. அத்தோடு, இதுவரை பதிவான டெங்கு நோயாளிகளின் எண்ணிக்கை 55,000-ஐத் தாண்டியுள்ளதாகவும் குறிப்பிடப்படுகின்றது.

இதற்கிடையில், கடந்த 24 மணி நேரத்தில் மட்டும் 1,024 டெங்கு நோயாளிகள் பதிவாகியுள்ளதாக டெங்கு கட்டுப்பாட்டுப் பிரிவின் பதில் இயக்குநர் டாக்டர் கபில கன்னங்கரா தெரிவித்தார்.

ஜூன் மாதத்தில் மட்டும் 21,565 டெங்கு நோயாளிகள் பதிவாகியுள்ளதாகவும், இதில் அதிகபட்ச நோயாளிகள் மேற்கு மாகாணத்தில் கண்டறியப்பட்டுள்ளதாகவும் மருத்துவர் தெரிவித்தார்.

கொழும்பு மாவட்டத்தில் 11,392 நோயாளிகளும், கம்பஹா மாவட்டத்தில் 11,006 நோயாளிகளும் பதிவாகியுள்ளதாகத் தெரிவிக்கப்பட்டுள்ளது.

நுளம்புகள் இனப்பெருக்கம் செய்யும் இடங்களைச் சுத்தம் செய்ய மக்கள் இன்னும் முழுமையான நடவடிக்கைகளை எடுக்காததே இதற்குக் முக்கிய காரணம் என்று மருத்துவர் கூறினார்.

மேலும், எதிர்காலத்தில் நோயாளிகளின் எண்ணிக்கையைக் குறைப்பதற்காக நுளம்புகள் இனப்பெருக்கம் செய்யும் இடங்கள் முற்றிலுமாக அழிக்கப்பட வேண்டும் என்றும் அவர் வலியுறுத்தினார்.

இதற்கிடையில், டெங்கு பெரும்பாலும் அரசு நிறுவனங்கள் மற்றும் பாடசாலைகளில் பரவுவதால், பொதுமக்கள் அதன் மீது அதிக கவனம் செலுத்த வேண்டும் என கபில கன்னங்கராவும் வலியுறுத்துகிறார்.

வருங்கால கணவனை கொலை செய்த பெண் : நடந்துள்ள எதிர்பாராத விடயம்!!

இந்தியாவின் மஹாராஷ்ட்ரா மாநிலத்தில், பெண்ணொருவர் தன் வருங்கால கணவரை கோட்டை உச்சியிலிருந்து தள்ளிவிட்டுக் கொன்ற வழக்கு பெரும் பரபரப்பை ஏற்படுத்திவரும் நிலையில், அந்த வழக்கால் எதிர்பாராத மற்றொரு விடயம் நிகழ்ந்துள்ளது.

மஹாராஷ்ட்ரா மாநிலத்திலுள்ள புனேயைச் சேர்ந்த கேத்தன் அகர்வால் என்பவருக்கும் சியா கோயல் (20) என்னும் பெண்ணுக்கும் திருமணம் நிச்சயம் செய்யப்பட்டிருந்தது.

இந்நிலையில், தனது பிறந்தநாளைக் காரணம் காட்டி கேத்தனை கோட்டை ஒன்றிற்கு அழைத்துச் சென்ற சியா, தன் காதலனான சேத்தன் சௌத்ரி (22) என்பவருடைய உதவியுடன் அவரை பள்ளத்தில் தள்ளிக் கொலை செய்தார்.

அவர் கேத்தனை கொலை செய்ததற்கு பல்வேறு காரணங்கள் கூறப்படுகின்றன. சியா தன் வருங்கால கணவரான கேத்தனை தள்ளிவிட்ட இடம், ஒரு சுற்றுலாத்தலம் ஆகும்.

ஆம், லோகாட் கோட்டை (Lohagad Fort) என்னும் பிரபல சுற்றுலாத்தலத்திற்கு அழைத்துச் சென்றுதான் கேத்தனை பள்ளத்தில் தள்ளிவிட்டுக் கொலை செய்தார் சியா.

இந்நிலையில், கேத்தன் கொலை வழக்கு குறித்த செய்திகள் அதிக அளவில் வெளியாகிவருவதைத் தொடர்ந்து, லோகாட் கோட்டைக்கு சுற்றுலா வரும் சுற்றுலாப்பயணிகள் எண்ணிக்கை 50 சதவிகிதம் அதிகரித்துள்ளதாக உள்ளூர் ஊடகங்கள் தெரிவிக்கின்றன.

குறிப்பாக, சியா கேத்தனை தள்ளிவிட்ட இடத்தைக் காண மக்கள் குவிகிறார்களாம். 1648ஆம் ஆண்டு மகாராஜா சத்ரபதி சிவாஜியால் கைப்பற்றப்பட்ட லோகாட் கோட்டை, யுனெஸ்கோவின் உலக பாரம்பரிய பட்டியலில் இடம்பெற்றுள்ள கோட்டைகளில் ஒன்று என்பது குறிப்பிடத்தக்கது.

வவுனியா மாநகரசபையின் செங்கோல் சர்ச்சை : முன்னாள் முதல்வர் மீது பொலிஸில் முறைப்பாடு!!

வவுனியா மாநகரசபையின் செங்கோலை, சபையின் முன்னாள் முதல்வர் சுந்தரலிங்கம் காண்டீபன் எடுத்துச் சென்றுள்ளதாகக் கூறி வவுனியா பொலிஸ் நிலையத்தில் முறைப்பாடு செய்யப்பட்டுள்ளது. இச்சம்பவம் உள்ளூர் அரசியல் வட்டாரத்தில் பெரும் பரபரப்பை ஏற்படுத்தியுள்ளது.

வடமாகாண ஆளுநரினால் வவுனியா மாநகரசபையின் முன்னாள் முதல்வர் காண்டீபன் அண்மையில் பதவி நீக்கம் செய்யப்பட்டிருந்தார். அதன் பின்னர் சபை வளாகத்திற்குள் நுழைந்து தனது சொந்தப் பொருட்களுடன் சபையின் செங்கோலையும் எடுத்துச் சென்றுள்ளதாகக் கடமையில் இருந்த ஊழியர்கள் தெரிவித்துள்ளனர்.

இது குறித்து சபை உறுப்பினர்களான சி.கிரிதரன் மற்றும் க.பிரேமதாஸ் ஆகியோர் ஊடகங்களிடம் கருத்து வெளியிடுகையில்,

இந்த விடயம் தொடர்பாக தாம் செயலாளரிடமும் ஆணையாளரிடமும் கேட்டபோது, அவர்களும் அதனை அறிந்திருந்ததாகக் குறிப்பிட்டனர். இதன் பின்னரே செங்கோல் காணாமல் போனமை குறித்து பொலிஸில் முறைப்பாடு செய்யப்பட்டுள்ளது.

இந்தக் குற்றச்சாட்டு குறித்து முன்னாள் முதல்வர் காண்டீபனிடம் வினவியபோது அவர் பின்வருமாறு விளக்கமளித்துள்ளார்,

கடந்த 24ஆம் திகதி கண்டியில் நடைபெற்ற மாநகர முதல்வர்களுக்கான மதிப்பளிப்பு நிகழ்வில் கலந்துகொண்டிருந்த போதே, நான் பதவியிலிருந்து நீக்கப்பட்ட வர்த்தமானி அறிவித்தல் வெளியானது. இதனையடுத்து, எனது அலுவலகத்தில் இருந்த பொருட்களை ஒப்படைக்குமாறு சபை செயலாளருக்குப் பணித்திருந்தேன்.

இதன்போது, செங்கோலும் தவறுதலாக என்னிடம் அனுப்பி வைக்கப்பட்டிருந்தது. ஏனெனில், அந்தச் செங்கோல் சபையின் பொருட்பதிவேட்டில் (Inventory) பதியப்பட்டிருக்கவில்லை. அதனை இன்று முறைப்படி செயலாளரிடம் ஒப்படைக்கச் சென்றிருந்தேன்.

எனினும், ஏற்கனவே பொலிஸில் முறைப்பாடு செய்யப்பட்டுள்ளதால் அதனைப் பெற்றுக்கொள்ள முடியாது எனச் செயலாளர் மறுத்துவிட்டார். இதனால், அந்தச் செங்கோலை அதனைச் செய்தவரிடமே (தயாரிப்பாளரிடமே) மீண்டும் ஒப்படைத்துள்ளேன்.

முன்னாள் முதல்வரின் இந்த விளக்கம் குறித்து வவுனியா மாநகரசபையின் செயலாளரைத் தொடர்புகொண்டு உறுதிப்படுத்த முயன்றபோதும், அவர் தொலைபேசி அழைப்புகளுக்குப் பதிலளிக்கவில்லை.

இருப்பினும், செயலாளரால் செய்யப்பட்ட முறைப்பாட்டின் அடிப்படையில் வவுனியா பொலிஸார் விசாரணைகளை ஆரம்பித்துள்ளனர். இதன் ஒருகட்டமாக, வாக்குமூலம் வழங்குவதற்காக நாளை (புதன்கிழமை) பொலிஸ் நிலையத்திற்குச் சமூகமளிக்குமாறு முன்னாள் முதல்வருக்குப் பொலிஸாரால் அழைப்பு விடுக்கப்பட்டுள்ளது.

பொலிஸ் விசாரணைகளின் பின்னரே இந்தச் சம்பவத்தின் பின்னணியில் உள்ள உண்மைத் தன்மை வெளியாகும் என எதிர்பார்க்கப்படுகிறது.

பரந்தனில் இருந்து வவுனியா சென்ற பேருந்தின் விசித்திரப் பயணம் : பயணிகள் கடும் அவதி : தேசிய போக்குவரத்து ஆணைக்குழுவில் முறைப்பாடு!!

பரந்தனில் இருந்து வவுனியா நோக்கி பயணித்த தனியார் பேரூந்து ஒன்று பயணிகளை அலைக்கழித்து, கூடுதல் கட்டணமும் ஈட்டியதாக வவுனியா தேசிய போக்குவரத்து ஆணைக்குழு (NTC) காரியாலயத்தில் பயணிகள் முறைப்பாடு செய்துள்ளனர்.

பரந்தனில் இருந்து இன்று புறப்பட்ட NP 7487 இலக்கமுடைய இப்பேருந்து கிளிநொச்சி மத்திய பேருந்து நிலையத்தில் காலை 09:20 மணி வந்தடைந்து தரித்து நின்றது.

அங்கிருந்து காலை 09:30 மணி வவுனியா நோக்கிப் பயணிக்க வேண்டிய பேருந்து, திட்டமிட்டபடி பயணிக்காமல், திடீரென மீண்டும் பரந்தன் நோக்கியே திரும்பிச் சென்றுள்ளது.

பரந்தனுக்குச் சென்று மீண்டும் பயணிகளை ஏற்றிக்கொண்டு கிளிநொச்சி மத்திய பேருந்து நிலையத்திற்கு வந்து தரித்து நின்று வவுனியாவை வந்தடைந்த போது மணி மதியம் 12:15 ஆகி இருந்தது.

கிளிநொச்சியில் இருந்து காலை 09:30 மணிக்கு வவுனியா வந்தடைந்திருக்க வேண்டிய பயணிகள், பேருந்தின் இந்தத் தன்னிச்சையான பின்னோக்கிய பயணத்தால் 2 மணித்தியாலங்கள் 45 நிமிடங்கள் (2 Hours 45 Minutes) தாமதமாகவே வவுனியாவை வந்தடைந்துள்ளனர். இதனால் பயணிகள் அனைவரும் கடும் அசௌகரியங்களுக்கு முகம் கொடுத்தனர்.

காலதாமதம் மட்டுமன்றி, பயணிகளிடம் கூடுதல் கட்டணம் வசூலிக்கப்பட்டதாகவும் குற்றம் சாட்டப்பட்டுள்ளது. பேருந்துக் கட்டணச் சீட்டில் (Ticket) 300 ரூபாய் என அச்சிடப்பட்டிருந்த போதிலும், பயணிகளிடம் இருந்து தலா 330 ரூபாய் வசூலிக்கப்பட்டுள்ளது. அனுமதியின்றி மேலதிகமாக 30 ரூபாய் வசூலிக்கப்பட்டமை பயணிகளிடையே கடும் அதிருப்தியை ஏற்படுத்தியுள்ளது.

இவ்விடயம் தொடர்பாகப் பாதிக்கப்பட்ட வவுனியா பயணிகளால், வவுனியாவில் அமைந்துள்ள தேசிய போக்குவரத்து ஆணைக்குழு காரியாலயத்தில் உத்தியோகபூர்வமாக முறைப்பாடு ஒன்று பதிவு செய்யப்பட்டுள்ளது.

முறையான நேர முகாமைத்துவம் இன்றியும், பயணச்சீட்டு விதிகளுக்கு முரணாகவும் செயற்பட்ட குறித்த பேருந்து நிர்வாகத்திற்கு எதிராக உரிய அதிகாரிகள் உடனடி நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.

கட்டுப்பாட்டை இழந்த மோட்டார் சைக்கிள் : சம்பவ இடத்திலேயே உயிரிழந்த இளைஞன்!!

மட்டக்களப்பு – ஏறாவூர் குடியிருப்பு வீதியில் நேற்று இரவு 11 மணியளவில் இடம்பெற்ற மோட்டார் சைக்கிள் விபத்தில் இளைஞன் ஒருவர் உயிரிழந்துள்ளதாக பொலிஸார் தெரிவித்துள்ளனர்.

அதிவேகமாக பயணித்த மோட்டார் சைக்கிள் கட்டுப்பாட்டை இழந்து வீடொன்றின் தகர வேலியை உடைத்துக் கொண்டு விபத்துக்குள்ளானதாக ஆரம்ப விசாரணையில் தெரியவந்துள்ளது.

இந்த விபத்தில் ஏறாவூர் மீராகேணி மையத்துப்பிட்டி பகுதியைச் சேர்ந்த ஆதில் எனும் இளைஞன் சம்பவ இடத்திலேயே உயிரிழந்துள்ளார்.

மோட்டார் சைக்கிளும் பலத்த சேதமடைந்துள்ளது. இளம் வயதுடைய இளைஞரின் திடீர் மரணம் அப்பகுதி மக்களிடையே பெரும் சோகத்தை ஏற்படுத்தியுள்ளது.

விபத்து தொடர்பான சிசிடிவி காட்சிகள் வெளியாகி அதிர்ச்சியை ஏற்படுத்தியுள்ளதாகவும், மேலதிக விசாரணைகளை பொலிஸார் மேற்கொண்டு வருவதாகவும் தெரிவிக்கப்படுகிறது.

பரத நாட்டியம் ஆடி கிளிநொச்சி 6 வயது சிறுமி உலக சாதனை!!

கிளிநொச்சியைச் சேர்ந்த சிறுமி ஒருவர் நடனத்தால் உலக சாதனை படைத்துள்ளார். ரஜீவன் கம்சத்வனி என்ற 6 வயதுடைய சிறுமியே இந்த உலக சாதனையை நிலைநாட்டினார். குறித்த நிகழ்வு ​நேற்று முன் தினம் (28) கிளிநொச்சியில் உள்ள தனியார் விருந்தகம் ஒன்றில் நடைபெற்றது.

இதன்போது சிறுமி ரஜீவன் கம்சத்வனி 2 மணி 30 நிமிடம் தொடர்ச்சியாக பரத நாட்டியம் ஆடி உலக சாதனையை நிகழ்த்தினார். குறித்த சாதனையானது, ராபா உலக சாதனை புத்தகத்தில் பதிவு செய்யப்பட்டது.

நிகழ்வின் இறுதியில் மன்னார் மாவட்ட அரசாங்க அதிபர் க.கணேஸ்வரனால் “உலக நாட்டிய இளவரசி” என்று மகுடம் சூட்டி வைக்கபட்டது.

இந்த நிகழ்வில் ராபா உலக சாதனை புத்தக நிறுவனத்தின் இலங்கை நாட்டுத் தூதுவர் கலாநிதி யோகதாசன் யூட் நிமலன், ராபா உலக சாதனை புத்தக நிறுவனத்தின் கிளிநொச்சி மாவட்ட தலைவர் கலாநிதி சிவனேஸ்வரன் விஜிதா ஆகியோர் நடுவர்களாக பங்குபற்றினர்.

நிகழ்வில் பிரதம விருந்தினராக மன்னார் மாவட்ட அரசாங்க அதிபர் க.கணேஸ்வரன் கலந்து கொண்டிருந்தார்.

புத்தம் புதிய 5 மோட்டர் சைக்கிள்கள் பறிமுதல்.!!

கொழும்பு புறநகர் அத்துருகிரிய ஹோகந்தரை பகுதியில் சட்டவிரோதமான முறையில் பதிவு செய்யப்படாத நிலையில் வைக்கப்பட்டிருந்த ஐந்து அதிவேக (Superbikes) மோட்டார் சைக்கிள்களை பொலிஸார் அதிரடியாகக் கைப்பற்றியுள்ளனர்.

கிடைத்த இரகசியத் தகவலைத் தொடர்ந்து, ஹோமாகம பிரிவு குற்றப் புலனாய்வுப் பிரிவினர் நடத்திய சோதனையிலேயே இந்த மோட்டார் சைக்கிள்கள் கண்டுபிடிக்கப்பட்டன.

விசாரணையின் போது, இந்த ஐந்து மோட்டார் சைக்கிள்களும் முறையான பதிவு ஆவணங்கள் இன்றி வைத்திருந்தது தெரியவந்துள்ளது.

கைப்பற்றப்பட்ட ஐந்து மோட்டார் சைக்கிள்களில், இரண்டில் போலி இலக்கத்தகடுகள் (Fake number plates) பொருத்தப்பட்டிருந்தது பொலிஸாரின் கவனத்திற்கு வந்தது.

வாகனங்களை மறைத்து விற்பனை செய்யும் நோக்கில் அல்லது சட்டவிரோத நடவடிக்கைகளுக்காக இந்த போலித் தகடுகள் பயன்படுத்தப்பட்டிருக்கலாம் என சந்தேகிக்கப்படுகிறது.

இந்தச் சம்பவத்துடன் தொடர்புடைய 25 வயதுடைய ஹோகந்தரை பிரதேசவாசி ஒருவரை பொலிஸார் கைது செய்துள்ளனர். மேலதிக விசாரணைகளுக்காக அவர் அத்துருகிரிய பொலிஸ் நிலையத்தில் ஒப்படைக்கப்பட்டுள்ளார்.

 

தங்கத்தின் இன்றைய நிலை : வெளியான புதிய விலை நிலவரம்!!

உள்நாட்டு சந்தையில் இன்று (30) காலை பதிவான விலையுடன் ஒப்பிடுகையில், தங்கத்தின் விலை மீண்டும் அதிகரித்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

அதன்படி, இன்று காலை 24 கரட் தங்கம் ஒரு பவுண் 379,000 ரூபாயாக விற்பனையான நிலையில், தற்போது 3000 ரூபா அதிகரித்து 382,000 ரூபாயாக விற்பனை செய்யப்படுகிறது.

தற்போதைய தங்க விலை நிலவரப்படி, 24 கரட் தங்கம் பவுண் ஒன்று 382000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 351,500 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,750 ரூபாயாகவும், 22 கரட் தங்கத்தின் ஒரு கிராமின் விலை 43,938 ரூபாயாகவும், விற்பனை செய்யப்படுகிறது.

 

அதிரடியாக கைது செய்யப்பட்ட பிரபல கொத்து உணவக உரிமையாளர் : நீதிமன்று விடுத்த உத்தரவு!!

புதிய இணைப்பு : பிரபல கொத்து உணவகம் ஒன்றின் உரிமையாளரான தொழிலதிபர் விராஜ் விக்ரமநாயக்க, கைது செய்யப்பட்டு நீதிமன்றத்தில் முன்னிலைபடுத்தப்பட்ட பின்னர் பிணையில் செல்ல அனுமதிக்கப்பட்டுள்ளார்.

இதன்போது, நுவகொட நீதவான் நீதிமன்றத்தால் தலா ரூபா 50,000 மதிப்புள்ள இரண்டு தனிநபர் பிணைகளில் செல்ல அனுமதிக்கப்பட்டுள்ளதாக செய்திகள் வெளியாகியுள்ளன.

இலங்கையில் பிரபலமான கொத்து உணவகம் ஒன்றின் உரிமையாளரான தொழிலதிபர் விராஜ் விக்ரமநாயக்க, தனது ஊழியர்களில் ஒருவரைத் தாக்கிய குற்றச்சாட்டு தொடர்பாகக் கைது செய்யப்பட்டுள்ளார்.

சந்தேக நபர் இன்று (30) மகரகம பொலிஸாரால் கைது செய்யப்பட்டதாகவும், அவர் ஹோமகம நீதவான் நீதிமன்றத்தில் முன்னிலைபடுத்தப்பட உள்ளதாகவும் பொலிஸ் ஊடகப் பிரிவு தெரிவித்துள்ளது.

கைது செய்யப்பட்ட உணவக உரிமையாளர், தனது விற்பனை நிலையங்களில் ஒன்றில் ஒரு ஊழியரை வாய்மொழியாகத் திட்டியும், உடல்ரீதியாகத் தாக்கியும் காட்டும் சிசிடிவி காட்சிகள் அண்மையில் அதிகம் பகிரப்பட்டு வந்தன.

இந்நிலையில், குறித்த சம்பவம் தொடர்பில் விரிவான விசாரணைகளைத் தொடர்ந்து இந்தக் கைது நடவடிக்கை மேற்கொள்ளப்பட்டுள்ளது. சமூக ஊடகங்களில் விரைவாகப் பரவிய அந்தக் காணொளி, பரவலான பொது கவனத்தையும் விமர்சனத்தையும் ஈர்த்தது.

அதன் பிறகு, காணொளிக் காட்சி ஆதாரத்தின் அடிப்படையில் மகரகம பொலிஸ் ஒரு சிறப்பு விசாரணையைத் தொடங்கியுள்ளதாக பொலிஸ் திணைக்களம் உறுதிப்படுத்தியுள்ளது.

கடந்த மே 5 ஆம் திகதி இந்தச் சம்பவம் நிகழ்ந்ததாக பொலிஸ் விசாரணையில் தெரியவந்துள்ளது.

 

இனி நீயும் நானும் மட்டும்தான், அம்மா சொர்க்கத்திலிருந்து பார்ப்பார் : வெனிசுலா நிலநடுக்கத்தில் மகளைக் காப்பாற்றி உயிரிழந்த மனைவி குறித்து கால்பந்து வீரரின் கண்ணீர்ப் பதிவு!!

நம் மகளைக் காப்பாற்ற நீ உன் உயிரை எப்படித் தியாகம் செய்தாய் என்ற கதையை நான் அவளிடம் ஒவ்வொரு நாளும் சொல்வேன்; இறுதிவரை மகளைக் கைவிடாத துணிச்சலான பெண் நீ என்று வெனிசுலாவில் ஏற்பட்ட நிலநடுக்கத்தில் தனது மனைவியைப் பறிகொடுத்த அந்நாட்டின் பிரபல கால்பந்து

நட்சத்திர வீரர் ஹெக்டர் பெல்லோ இன்ஸ்டாகிராமில் வெளியிட்டுள்ள உருக்கமான கண்ணீர் பதிவு உலகெங்கிலும் உள்ள கோடிக்கணக்கான மக்களைக் கலங்கச் செய்துள்ளது.

தென் அமெரிக்க நாடான வெனிசுலாவில் கடந்த புதன்கிழமை மாலை சில நொடிகள் இடைவெளியில் 7.2 மற்றும் 7.5 ரிக்டர் அளவுகளில் அடுத்தடுத்து இரண்டு மிகச் சக்திவாய்ந்த இரட்டை நிலநடுக்கங்கள் ஏற்பட்டன.

தலைநகர் காரகஸ் மற்றும் அதன் சுற்றுவட்டாரப் பகுதிகளில் நூற்றுக்கணக்கான அடுக்குமாடி குடியிருப்புகள் சீட்டுக்கட்டுகளைப் போலச் சரிந்து விழுந்தன.

தற்போது வரை இடிபாடுகளிலிருந்து மீட்கப்பட்டவர்களின் உயிரிழப்பு எண்ணிக்கை 1,430 ஆக உயர்ந்துள்ளது. மேலும் 3,360-க்கும் மேற்பட்டோர் காயமடைந்து சிகிச்சைப் பெற்று வருகின்றனர். இந்தக் கொடூர நிலநடுக்கப் பேரிடரில் தான்,

வெனிசுலாவின் புகழ்பெற்ற ‘மார்டிமோ டி லா குயார்’ கிளப் அணியின் கால்பந்து வீரரான ஹெக்டர் பெல்லோவின் மனைவி ஆண்ட்ரியா துரதிர்ஷ்டவசமாகக் கட்டிட இடிபாடுகளுக்குள் சிக்கி உயிரிழந்தார்.

தங்களது அடுக்குமாடி குடியிருப்பு சரிந்து விழும் கடைசி நொடியில், தனது 20 மாதக் குழந்தை அலானாவை எவ்விதப் பாதிப்பும் இன்றி ஆண்ட்ரியா தனது உடலால் மூடி அரண் போலக் காத்துள்ளார்.

மீட்புக் குழுவினர் தேடுதல் வேட்டை நடத்திய போது, ஆண்ட்ரியாவின் உடலுக்கு அடியில் இருந்து அக்குழந்தை அதிர்ஷ்டவசமாகக் காயங்களுடன் உயிருடன் மீட்கப்பட்டது.

தாய் தனது உயிரைக் கொடுத்து மகளைக் காப்பாற்றியுள்ள விபரம் மீட்புக் குழுவினரையே நெகிழச் செய்துள்ளது.

தற்போது காரகஸ் மருத்துவமனையில் சிகிச்சை பெற்று வரும் தனது 20 மாத மகளின் கையைப் பிடித்தபடி, ஹெக்டர் பெல்லோ இன்ஸ்டாகிராமில் பதிவிட்டுள்ள கடிதம் அனைவரையும் அழச் செய்துள்ளது.

மகள் அலானா தன் உயிரைக் காத்த தாய்க்கு நன்றி சொல்வது போலத் தொடங்கும் அந்தப் பதிவில், “அம்மா, நீ தான் என்றும் எனக்குப் பிடித்தமான ஹீரோ” எனக் குறிப்பிடப்பட்டுள்ளது.

மேலும், தனது மறைந்த மனைவிக்காக அவர் எழுதியுள்ளதில், “நம் குழந்தைக்கு நீ எவ்வளவு அற்புதமான தாயாக இருந்தாய் என்றும், அவளுக்கு எவ்வளவு அன்பு கொடுத்தாய் என்றும் நான் அவளிடம் வளர்ந்ததும் சொல்வேன்.

அவளைக் காப்பாற்ற நீ உன் உயிரை எப்படித் தியாகம் செய்தாய் என்ற கதையை நான் அவளிடம் விவரிப்பேன். இறுதிவரை தன் மகளைக் கைவிடாத ஒரு துணிச்சலான பெண் நீ” என்றவர்,

தொடர்ந்து மருத்துவமனையில் தீவிரச் சிகிச்சை பிரிவில் போராடி வரும் தனது பிஞ்சு மகளைக் குறித்து பெல்லோ உருக்கமாக, “மகளே, நீ வலிமையாக இருக்க வேண்டும்.

இன்னும் சிறிது காலம் பொறுத்திரு. என் உடைந்த இதயத்தை உன்னால் மட்டுமே குணப்படுத்த முடியும்.

ஒரு மகிழ்ச்சியான தந்தையாக என்னை நீ மீண்டும் பார்க்க முடியாமல் போகலாம், ஆனால் உன்னை இந்த உலகின் மிக மகிழ்ச்சியான குழந்தையாக நான் வளர்ப்பேன் என்று உன் தாயின் மீது உறுதியளிக்கிறேன்.

இப்போது நீயும் நானும் மட்டும் தான், அம்மா சொர்க்கத்திலிருந்து நம்மைக் கவனித்துக் கொண்டிருப்பார்.

தனது கடைசி நிமிடத்தில் அவளால் என்னிடம் பேச முடிந்திருந்தால், அவள் செய்தது போலவே, நானும் என் உயிரைக் கொடுத்து உன்னைக் காப்பாற்றத்தான் சொல்லியிருப்பாள்” என்று பெல்லோ பதிவிட்டுள்ளார்.

விளையாட்டு உலகைக் கடந்து இத்துயரச் சம்பவம் ஒட்டுமொத்தப் பன்னாட்டுச் சமூகத்தையும் சோகத்தில் ஆழ்த்தியுள்ளது.

போலியோ சொட்டு மருந்து கொடுக்கப்பட்ட குழந்தை திடீர் மரணம்!!

கடலூர் அருகே போலியோ சொட்டு மருந்து கொடுக்கப்பட்ட ஒன்றரை வயது ஆண் குழந்தை ஒன்று, வீட்டிற்குச் சென்ற சில மணி நேரங்களில் திடீரென மயங்கி உயிரிழந்த சம்பவம் அப்பகுதியில் பெரும் சோகத்தையும், பரபரப்பையும் ஏற்படுத்தியுள்ளது.

கடலூர் மாவட்டம் நல்லாத்தூர் பகுதியைச் சேர்ந்த ஒன்றரை வயது ஆண் குழந்தை ஹரிஹரன். தமிழகம் முழுவதும் நேற்று நடைபெற்ற போலியோ சொட்டு மருந்து முகாமையொட்டி, பெற்றோர் தங்களது குழந்தை ஹரிஹரனுக்கு நல்லாத்தூரில் உள்ள முகாமில் முறைப்படி போலியோ சொட்டு மருந்து கொடுத்துள்ளனர்.

சொட்டு மருந்து கொடுத்து விட்டு வீட்டிற்கு அழைத்து வந்த பின்னர், குழந்தை ஹரிஹரனுக்குப் பெற்றோர் புட்டிப்பால் கொடுத்துத் தூங்க வைத்துள்ளனர்.

மதிய நேரத்தில் குழந்தை நீண்ட நேரமாகியும் எழாமல், திடீரென மயக்கமடைந்த நிலையில் இருப்பதை கண்டு அதிர்ச்சியடைந்த பெற்றோர், குழந்தையை உடனடியாக மருத்துவமனைக்குக் கொண்டு சென்றனர்.

அங்குப் பரிசோதித்த மருத்துவர்கள் குழந்தை ஏற்கனவே உயிரிழந்துவிட்டதாகத் தெரிவித்தனர்.

போலியோ சொட்டு மருந்து கொடுக்கப்பட்ட சில மணி நேரங்களிலேயே குழந்தை உயிரிழந்ததால், பெற்றோரும் உறவினர்களும் அதிர்ச்சியிலும் வேதனையிலும் ஆழ்ந்துள்ளனர். எனினும், இச்சம்பவம் குறித்து மருத்துவ அதிகாரிகள் தெளிவுபடுத்தியுள்ளனர்.

உலக சுகாதார அமைப்பால் அங்கீகரிக்கப்பட்ட போலியோ சொட்டு மருந்து முற்றிலும் பாதுகாப்பானது என்றும், இதனால் உயிரிழப்பு ஏற்பட வாய்ப்பில்லை என்றும் மருத்துவர்கள் தரப்பில் கூறப்படுகிறது.

குழந்தை பால் குடித்த பிறகு, அது மூச்சுக்குழாயில் ஏதேனும் அடைப்பை ஏற்படுத்தியதா அல்லது வேறு ஏதேனும் உள்வகை மருத்துவக் காரணங்களா என்பது,

குழந்தையின் உடற்கூராய்வு முடிவுகள் முழுமையாக வந்த பின்னரே துல்லியமாகத் தெரியவரும் என மருத்துவர்கள் தெரிவித்துள்ளனர்.

குழந்தையின் மரணம் குறித்துத் தகவல் அறிந்த தூக்கணாம்பாக்கம் காவல் நிலைய போலீசார், சம்பவ இடத்திற்கு விரைந்து வந்து குழந்தையின் உடலைக் கைப்பற்றிப் பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.

மேலும், இதுகுறித்து வழக்குப் பதிவு செய்து, குழந்தையின் மரணத்திற்கான அசல் பின்னணி என்ன என்பது குறித்துப் போலீசார் தீவிர விசாரணை மேற்கொண்டு வருகின்றனர். இச்சம்பவம் நல்லாத்தூர் கிராம மக்கள் மத்தியில் பெரும் சோகத்தை ஏற்படுத்தியுள்ளது.

இளம்ஜோடி மர்ம மரணம் : மரணத்தில் மறைந்துள்ள மர்மம்!!

மயிலாடுதுறை மாவட்டம் தரங்கம்பாடி தாலுகா புதுப்பாளையம் கிராமத்தைச் சேர்ந்தவர் மாரிமுத்துவின் மகன் பார்த்திபன். கொத்தனார் வேலை பார்த்து வந்த இவருக்கும், அருகில் உள்ள சாத்தன்குடி கிராமத்தைச் சேர்ந்த 16 வயது சிறுமிக்கும் இடையே காதல் மலர்ந்துள்ளது.

இவர்கள் இருவரும் வெவ்வேறு சமூகத்தைச் சேர்ந்தவர்கள் என்பதால், இவர்களது காதலுக்கு இரு குடும்பத்தினர் தரப்பிலும் கடும் எதிர்ப்பு கிளம்பியதுடன், தொடர்ந்து பல்வேறு குடும்பப் பிரச்சினைகளும் வெடித்துள்ளன.

காதல் விவகாரம் தொடர்பாக இரு வீட்டாருக்கும் இடையே தகராறு நீடித்து வந்த சூழலில், பெண் வீட்டார் மீது பார்த்திபன் குடும்பத்தினர் அண்மையில் காவல் நிலையத்தில் ஒரு புகாரை அளித்துள்ளனர்.

அந்தப் புகாரில், பெண் வீட்டார் மீது சாதி வன்கொடுமை சட்டத்தின் கீழ் வழக்குப் பதிவு செய்ய வேண்டும் என்று அவர்கள் வலியுறுத்தியிருந்தனர்.

இதனால் இரு தரப்பிற்கும் இடையே சாதி ரீதியிலான மோதல் போக்கு அதிகரித்து, கிராமத்தில் கடுமையான சுமுகமற்ற சூழல் நிலவி வந்தது.இந்நிலையில், இன்று அதிகாலை சுமார் 3.30 மணியளவில் சாத்தன்குடி கிராமத்தில் உள்ள குமரவேல் என்பவருக்குச் சொந்தமான ஒரு கொட்டகையில்,

பார்த்திபனும் அந்த 16 வயது சிறுமியும் தூக்கில் தொங்கிய நிலையில் சடலமாகக் கண்டெடுக்கப்பட்டனர். அந்த வழியாகச் சென்ற பொதுமக்களின் தகவலின் பேரில் சம்பவ இடத்திற்கு விரைந்து வந்த போலீசார், இருவரின் உடல்களையும் மீட்டுப் பிரேத பரிசோதனைக்காகத் திருவாரூர் அரசு மருத்துவமனைக்கு அனுப்பி வைத்தனர்.

வெவ்வேறு சமூகத்தைச் சேர்ந்த காதலர்கள் மர்மமான முறையில் உயிரிழந்துள்ளதால், அப்பகுதியில் சட்டம் ஒழுங்கு பிரச்சினை ஏற்படாமல் இருக்க 30-க்கும் மேற்பட்ட போலீசார் அதிரடியாகக் குவிக்கப்பட்டுப் பாதுகாப்பு பலப்படுத்தப்பட்டுள்ளது.

பெண் வீட்டாரே தங்களது மகனைக் கடத்தி ஆணவக் கொலை செய்துவிட்டதாக இளைஞரின் குடும்பத்தினர் பகிரங்கமாகக் குற்றம் சாட்டி வரும் நிலையில், காதலர்கள் மனமுடைந்து தற்கொலை செய்து கொண்டார்களா? அல்லது திட்டமிட்டுக் கொலை செய்யப்பட்டனரா? என்ற கோணத்தில் போலீசார் விசாரணையைத் துரிதப்படுத்தியுள்ளனர்.

1...646566...4,736Page 65 of 4,736