வயல்வெளியில், குட்டி முள்ளம்பன்றி ஒன்றைச் செல்லப் பிராணியாகத் தன் பின்னே கூட்டிச்செல்லும் சிறுமி ஒருவரின் நெஞ்சை நெகிழவைக்கும் காணொளியொன்று தற்போது சமூகவலைத்தளங்களில் பரவிவருகின்றது.

பசுமை நிறைந்த வயல்வெளியில் அச்சிறுமி நடந்து செல்ல, சிறிய முள்ளம்பன்றி சிறுமியை பின்தொடரும் அந்த காட்சி, மனிதர்களுக்கும் விலங்குகளுக்கும் இடையிலான அன்பின் அழகான வெளிப்பாடாக பலரையும் நெகிழ்ச்சியடையச் செய்துள்ளது.

இந்தக் காணொளி வைரலானதைத் தொடர்ந்து, இது பங்களாதேஷில் பதிவுசெய்யப்பட்டதாக உலகம் முழுவதும் தகவல்கள் பரவின. பல சர்வதேச சமூக ஊடகப் பக்கங்களும் அதே தகவலைப் பகிர்ந்ததால், பெரும்பாலானோர் அதையே உண்மையென நம்பினர்.

ஆனால், பின்னர் மேற்கொள்ளப்பட்ட தீவிர உண்மைத் தேடலில், அந்த தகவல் முற்றிலும் தவறானது என்பது உறுதியாகியுள்ளது.

உண்மையில், இந்த மனதைத் தொடும் காணொளி இலங்கையின் பொலன்னறுவை மாவட்டத்தில் பதிவு செய்யப்பட்டதாக கண்டறியப்பட்டுள்ளது.

இந்தக் காணொளி முதன்முதலாக கடந்த ஜூன் 11ஆம் திகதி, ஒரு இலங்கை முகநூல் பயனரால் பதிவேற்றப்பட்டுள்ளது.

அதில் இடம்பெற்ற தலைப்பும் விளக்கமும் முழுமையாக சிங்கள மொழியில் இருந்ததுடன், அதே கணக்கில் அச்சிறுமியும் முள்ளம்பன்றியும் ஒன்றாக விளையாடும் பல்வேறு காணொளிகளும் பின்னர் வெளியிடப்பட்டுள்ளன.

அவை அனைத்தும் இந்தக் கதையின் உண்மைத்தன்மையை உறுதிப்படுத்துகின்றன.

பங்களாதேஷ் என தவறாக உலகம் முழுவதும் பகிரப்பட்டாலும், கோடிக்கணக்கான மக்களின் மனங்களை கவர்ந்த இந்த அன்பின் கதை, உண்மையில் நம் இலங்கையின் ஒரு கிராமிய சூழலில் மலர்ந்த அரிய தருணம் என கூறப்படுகின்றது.

ஒரு சிறுமிக்கும் ஒரு குட்டி முள்ளம்பன்றிக்கும் இடையே உருவான இந்த அப்பாவியான பாசப் பிணைப்பு, எல்லைகளையும் மொழிகளையும் தாண்டி உலக மக்களின் இதயங்களை வென்று, தற்போது சமூக வலைத்தளங்களில் தொடர்ந்து பரவலாகி வருகின்றமை குறிப்பிடத்தக்கது.

குருநாகல் பிரதேசத்தில் வெள்ளைக்கோட்டில் சென்ற தாய் மற்றும் மகள் மீது தனியார் பேருந்து மோதியதில் மகள் உயிரிழந்துள்ளதுடன், தாய் காயமடைந்துள்ளார். இந்த சம்பவம் குருநாகல் – தம்புள்ளை பிரதான வீதியில் மெல்சிறிபுர, கரந்தகொல்ல பகுதியில் நேற்று இடம்பெற்றுள்ளது.

பொசன் போயா தினத்தை முன்னிட்டு ஏற்பாடு செய்யப்பட்டிருந்த ஐஸ்கிரீம் தன்சல் நிலையத்திற்கு செல்வதற்காக வீதியைக் கடக்க முயன்றபோதே இந்த விபத்து இடம்பெற்றுள்ளது.

இந்த விபத்தில் உயிரிழந்தவர் குருநாகல் நகரில் உள்ள பாடசாலை ஒன்றில் கல்வி கற்கும் மாணவி என தெரியவந்துள்ளது. இவர்கள் இப்பாகமுவ, கிரிந்திகல்ல பிரதேசத்தைச் சேர்ந்தவர்களாகும்.

உயிரிழந்த மாணவியின் தந்தை பாடசாலை ஆசிரியர் என தெரிவிக்கப்படுகிறது. தந்தையுடன் தாயும் மகளும் தங்களுக்கு சொந்தமான காரில் பொசன் தன்சல் பெற சென்று கொண்டிருந்தபோதே இந்த விபத்து சம்பவம் இடம்பெற்றுள்ளது.

பொசன் போயா தினத்தை முன்னிட்டு குருநாகல் – தம்புள்ளை பிரதான வீதியில் நேற்று காலை முதல் அதிக வாகன நெரிசல் காணப்பட்டுள்ளது. இந்த நெரிசல் காரணமாகவே விபத்து ஏற்பட்டிருக்கலாம் எனவும் தெரிவிக்கப்படுகிறது.

அம்பாந்தோட்டை தாதியர் பயிற்சிக் கல்லூரியில் பயிற்சி பெற்று வந்த மாணவர் சடலமாக மீட்கப்பட்டுள்ளார். மாணவர் தங்கியிருந்த வீட்டின் அறையொன்றில் அவரது கண்டெடுக்கப்பட்டுள்ளதாக பொலிஸார் தெரிவித்தனர்.

உயிரிழந்தவர் 27 வயதுடைய மாணவர் என அடையாளம் காணப்பட்டுள்ளதாக பொலிஸார் தெரிவித்துள்ளனர். கரமெட்டிய பகுதியை சேர்ந்த கருசிங்ககே கவீந்திர சந்தருவன் எனும் தாதியர் மாணவர் என அடையாளம் காணப்பட்டுள்ளார்.

குறித்த சடலம் கடந்த 28ஆம் திகதி மாலை 4 மணியளவில் கண்டெடுக்கப்பட்டது. அத்துடன், பிரேத பரிசோதனைக்காக அம்பாந்தோட்டை மாவட்ட பொது வைத்தியசாலைக்கு கொண்டு செல்லப்பட்டுள்ளது.

மாணவன் உயிரிழந்ததற்கான காரணம் இதுவரை கண்டறியப்படவில்லை. உயிரிழந்தவரின் பிரேத பரிசோதனை நேற்று நடைபெறவிருந்தது. சம்பவம் தொடர்பில் அம்பாந்தோட்டை தலைமையக பொலிஸார் மேலதிக விசாரணைகளை மேற்கொண்டு வருகின்றனர்.

களுத்துறை, கல்பாத்த பிரதேசத்தில் சட்டவிரோத மதுபான விற்பனை நிலையமொன்றை சுற்றிவளைக்க சென்ற பொலிஸ் அதிகாரிகள் மீது பெண்ணொருவரால் எட்டு நாய்கள் ஏவி விடப்பட்டுள்ளது.

நாய்களின் தாக்குதலில் அங்குருவாதொட்ட பொலிஸ் நிலைய பொறுப்பதிகாரி உட்பட நான்கு அதிகாரிகள் காயமடைந்துள்ளனர். காயமடைந்தவர்கள் களுத்துறை நாகொட பொது வைத்தியசாலையில் அனுமதிக்கப்பட்டுள்ளனர்.

8 முதல் 10 அடி உயரமான மதில்களால் சூழப்பட்ட வீட்டுக்குள் சட்டவிரோத மதுபான விற்பனை இடம்பெற்று வந்துள்ளது.

நீண்ட காலமாக மது அருந்துபவர்களுக்குத் தேவையான உணவுகளையும் வழங்கி, ஒரு உணவகம் போன்று இந்த சட்டவிரோத மதுபான விற்பனை மிகவும் சூட்சுமமாக முன்னெடுக்கப்பட்டு வந்துள்ளது.

இதற்கு முன்னரும் இரண்டு சந்தர்ப்பங்களில் களுத்துறை பொலிஸின் விசேட பிரிவுகள் இந்த இடத்தை சுற்றிவளைக்க முயற்சித்துள்ளனர்.

எனினும் அவை உரிய முறையில் இடம்பெறாததால், களுத்துறை மாவட்ட பிரதி பொலிஸ் மா அதிபர் பத்மினி வீரசூரியவின் உத்தரவுக்கமைய, கடந்த 27ஆம் திகதி இந்த சுற்றிவளைப்பை மேற்கொள்ளும் பொறுப்பு அங்குருவாதொட்ட பொலிஸாரிடம் ஒப்படைக்கப்பட்டது.

நாயின் பாய்ச்சல்

அதற்கைமய, அங்குருவாதொட்ட பொலிஸ் நிலைய பொறுப்பதிகாரி தலைமையிலான குழுவினர் குறித்த வீட்டை சுற்றிவளைத்து, 1000 மில்லி லீற்றர் சட்டவிரோத மதுபானத்துடன் சந்தேகநபரைக் கைது செய்தனர்.

இதன் போது சந்தேகநபரான மதுபான வியாபாரியின் மனைவி, வீட்டில் அடைத்து வைக்கப்பட்டிருந்த ஜெர்மன் ஷெப்பர்ட் மற்றும் ரொட்வைலர் உள்ளிட்ட விலையுயர்ந்த எட்டு பயங்கரமான நாய்களை ஒரே நேரத்தில் திறந்துவிட்டு பொலிஸ் அதிகாரிகளை கடிக்குமாறு ஏவிவிட்டுள்ளார்.

இதன்போது பொலிஸார் தம்மை பாதுகாக்கும் நோக்கில் தப்பியோடினர். எனினும் நாயின் பாய்ச்சல் காரணமாக பொலிஸார் காயமடைந்துள்ளனர்.

பொலிஸ் கடமைக்கு இடையூறு விளைவித்தமை மற்றும் தாக்குதல் மேற்கொண்டமை தொடர்பில், மதுபான வியாபாரியையும் அவரது மனைவியையும் பொலிஸார் கைது செய்து மேலதிக விசாரணைகளை மேற்கொண்டு வருகின்றனர்.

புதிய இணைப்பு : நாட்டில் தொடர்ந்து பெய்து வரும் மழையுடனான வானிலை காரணமாக நாட்டில் டெங்கு பரவல் தொடர்ந்து தீவிரமடைந்து வருவதாக தெரிவிக்கப்பட்டுள்ளது.

அதன்படி, நாட்டில் பதிவான டெங்கு நோயாளிகளின் எண்ணிக்கை 54,000 ஐத் தாண்டியுள்ளது என தேசிய டெங்கு கட்டுப்பாட்டுப் பிரிவு தெரிவித்துள்ளது.

தேசிய டெங்கு கட்டுப்பாட்டுப் பிரிவின் பதில் பணிப்பாளர் வைத்தியர் கபில கண்ணங்கர, இன்று நாட்டில் பதிவான டெங்கு நோயாளிகளின் எண்ணிக்கை 54,189 என்றும் கூறியுள்ளார்.

இதற்கமைய, தினமும் பதிவாகும் நோயாளிகளின் எண்ணிக்கை 950 முதல் 1,000 வரை உள்ளதாகவும் குறிப்பிட்டுள்ளார்.

கடந்த 24 மணி நேரத்தில் மட்டும் 1,030 டெங்கு நோயாளிகள் பதிவாகியுள்ளனர் என்றும், அடுத்த மூன்று நாட்களில் டெங்கு கட்டுப்பாட்டுத் திட்டங்கள் செயல்படுத்தப்பட உள்ளதால் பொதுமக்களின் ஆதரவு எதிர்பார்க்கப்படுகிறது என்றும் அவர் கூறியுள்ளார்.

முதலாம் இணைப்பு

சிறப்பு டெங்கு கட்டுப்பாட்டுத் திட்டங்கள் செயல்படுத்தப்பட்ட போதிலும், நோய்த்தொற்று பதிவுகளின் எண்ணிக்கை குறையவில்லை என்று தேசிய டெங்கு கட்டுப்பாட்டுப்பிரிவு தெரிவிக்கிறது.

இருப்பினும், வளாகங்களை தூய்மையாக பராமரிப்பதை தொடர்ந்து செய்ய வேண்டும் என்றும் அறிவுறுத்தப்பட்டுள்ளது. கொழும்பு மாவட்டத்தில் அதிக எண்ணிக்கையிலான டெங்கு நோய்த்தொற்றுகள் பதிவாகி வருகின்றதாகவும் தெரிவிக்கப்படுகின்றது.

இந்த மாதத்தின் கடந்த 25 நாட்களில், நுளம்புகள் காணப்பட்ட 85,712 இடங்கள் ஆய்வு செய்யப்பட்டுள்ளன. இவற்றில் 7,188 இடங்களில் நுளம்புகள் கண்டறியப்பட்டதாக பொது சுகாதார ஆய்வாளர்கள் சங்கம் தெரிவித்துள்ளது.

அதன்படி, டெங்கு நுளம்புகள் இனப்பெருக்கம் செய்யும் இடங்களை வைத்திருந்த 6,000-க்கும் மேற்பட்டோர் மீது வழக்கு பதிவு செய்ய நடவடிக்கை எடுக்கப்பட்டுள்ளதாக அவர்கள் கூறியுள்ளனர்.

இந்த ஆண்டு இதுவரை நாடு முழுவதும் பதிவான டெங்கு நோயாளிகளின் எண்ணிக்கை 53,159 ஆக உயர்ந்துள்ளதுடன், உயிரிழந்தவர்களின் எண்ணிக்கை 31 எனவும் தெரிவிக்கப்பட்டுள்ளது.

ஹெட்டிபொல – வஸ்கமுவ வீதியில் மோட்டார் சைக்கிள் ஒன்று மயிலுடன் மோதி விபத்துக்குள்ளானதில் 18 வயதுடைய இளைஞர் பரிதாபமாக உயிரிழந்துள்ளதாக பொலிஸார் தெரிவித்துள்ளனர்.

மோட்டார் சைக்கிள் பயணித்துக் கொண்டிருந்த போது திடீரென மயிலுடன் மோதியுள்ளது. இதனால் வேகம் மற்றும் கட்டுப்பாட்டை இழந்த மோட்டார் சைக்கிள், வீதியை விட்டு விலகி அருகில் இருந்த மரமொன்றில் மோதி தடம் புரண்டுள்ளது.

இந்த கொடூர விபத்தில் படுகாயமடைந்த மோட்டார் சைக்கிள் சாரதி உடனடியாக அருகில் உள்ள வைத்தியசாலையில் அனுமதிக்கப்பட்டார்.

எனினும், அங்கு தீவிர சிகிச்சை பிரிவில் சிகிச்சை பெற்று வந்த நிலையிலேயே அவர் சிகிச்சை பலனின்றி உயிரிழந்துள்ளார்.

விபத்து தொடர்பான மேலதிக விசாரணைகளை ஹந்துன்கமுவ பொலிஸார் மேற்கொண்டு வருகின்றன.

கொழும்பின் புறநகர் பகுதியான பிலியந்தலையில் பாடசாலை மாணவர்கள் பயணித்த மோட்டார் சைக்கிள் வீதியை விட்டு விலகி விபத்துக்குள்ளானதில் ஒருவர் உயிரிழந்துள்ளார்.

மோட்டார் சைக்கிள், தொலைபேசி கம்பத்துடன் மோதி விபத்துக்குள்ளானதில் மாணவன் சம்பவ இடத்திலேயே உயிரிழந்துள்ளார். அத்துடன், மற்றைய மாணவன் பலத்த காயமடைந்த நிலையில் மருத்துவமனையில் அனுமதிக்கப்பட்டுள்ளார்.

நேற்று முன்தினம் காலை இந்த விபத்து இடம்பெற்றுள்ளது. விபத்தில், மகரகம மத்திய மகா வித்தியாலயத்தில் 11ஆம் தரத்தில் கல்வி கற்று வந்த, பிலியந்தலை நிவன்திட்டிய பகுதியை சேர்ந்த இசல தஹம் என்ற மாணவனே உயிரிழந்துள்ளார்.

அவருடன் மோட்டார் சைக்கிளில் பயணித்த அவரது நண்பர் விபத்தில் பலத்த காயமடைந்து களுபோவில தெற்கு கொழும்பு போதனா வைத்தியசாலையில் சிகிச்சை பெற்று வருகின்றார்.

தாய் வேலைக்கு சென்றிருந்த நேரத்தில், தஹம் தனது நண்பருடன் மகுளுதூவ பகுதியில் இருந்து அரவ்வல நோக்கிப் பயணித்துள்ளார்.

இதன்போது அதே திசையில் பயணித்துக் கொண்டிருந்த முச்சக்கர வண்டி ஒன்றை முந்திச் செல்ல முயன்ற போது, வேகத்தை கட்டுப்படுத்த முடியாமல் மோட்டார் சைக்கிள் எதிர்த் திசையில் வந்த மற்றுமொரு மோட்டார் சைக்கிளுடன் மோதியுள்ளது.

அதன் பின்னர் வீதியை விட்டு விலகி, அங்கிருந்த தொலைபேசி கம்பமொன்றிலும் பலமாக மோதி நின்றுள்ளது.

விபத்தின் பின்னர் தஹம் மற்றும் அவரது நண்பனை பிலியந்தலை மாவட்ட வைத்தியசாலையில் அனுமதிக்க நடவடிக்கை எடுக்கப்பட்ட போதிலும், தஹம் உயிரிழந்திருந்ததாக வைத்தியர்கள் உறுதிப்படுத்தியுள்ளனர்.

சுமார் இரண்டு மாதங்களுக்கு முன்பு, 400,000 ரூபா பணத்திற்கு பாகங்கள் பிரிக்கப்பட்டு மீண்டும் பொருத்தப்பட்ட மோட்டார் சைக்கிள் ஒன்றை வாங்கியுள்ளார்.

இந்த விபத்தினால் மோட்டார் சைக்கிளின் முன்பக்க சக்கரம் மற்றும் மேலும் சில பாகங்கள் உடைந்து தனியாக பிரிந்து போயுள்ளதாக பொலிஸார் தெரிவித்தனர்.

தியத்தலாவ தொடருந்து நிலையம் அருகே ஏற்பட்ட அரச பேருந்து விபத்திற்குக் காரணம், வாகனத்தின் தடுப்பு முறைமையில் (Breaking system) ஏற்பட்ட கோளாறுதான் என பொலிஸார் தெரிவித்துள்ளனர்.

பிரதான சாலையிலிருந்து தொடருந்து நிலையச் சாலைக்குத் திரும்பிக்கொண்டிருந்தபோது குறித்த பேருந்தின் தடுப்பு செயலிழந்ததாக பொலிஸார் தெரிவித்துள்ளனர்.

இந்த விபத்தில் 44 பேர் காயமடைந்துள்ளனர். அவர்கள் தற்போது தியத்தலாவ ஆதார மருத்துவமனையில் சிகிச்சை பெற்று வருவதாக தகவல்கள் தெரிவிக்கின்றன. காயமடைந்தவர்களில் யாரும் கவலைக்கிடமான நிலையில் இல்லை என பொலிஸார் தெரிவித்துள்ளனர்.

இதற்கிடையில், கடந்த 24 மணி நேரத்தில் பதிவான சாலை விபத்துகளில் ஐந்து பேர் உயிரிழந்ததாகவும், 85 பேர் காயமடைந்ததாகவும் பொலிஸார் தெரிவித்துள்ளனர்.

அரலகன்வில – பொலன்னருவ சாலையில் உள்ள குடவேவ பகுதியில், ஒரு லொறி கட்டுப்பாட்டை இழந்து சாலையிலிருந்து விலகிச் சென்றதில் ஒருவர் உயிரிழந்தார் மற்றும் இருவர் காயமடைந்தனர்.

மேலும், தம்புட்டெகம – கல்நெவ சாலையில் உள்ள ரஜின சந்திப்பு அருகே ஒரு வாடகைக் கார் மோட்டார் சைக்கிள் மீது மோதியதில், கல்நெவவைச் சேர்ந்த 27 வயது இளைஞர் ஒருவர் உயிரிழந்ததாக பொலிஸார் தெரிவித்தனர்.

வெலிமட – பண்டாரவெல சாலையில் உள்ள மிரஹாவத்த பகுதியில் லொறி மோதியதில் 58 வயதுப் பெண் ஒருவர் உயிரிழந்தார்.

மற்றொரு சம்பவத்தில், மினுவாங்கொட புறவழிச்சாலையில் நிறுத்தப்பட்டிருந்த டிராக்டரின் பின்பக்க டிரெய்லரில் மோட்டார் சைக்கிள் மோதியதில் 40 வயது ஆண் ஒருவர் உயிரிழந்தார். இந்தச் சம்பவத்தில் மேலும் ஒருவர் காயமடைந்தார்.

கொழும்பு – கண்டி சாலையில் உள்ள மொலகொடவில் பேருந்து மோதியதில் பாதசாரி ஒருவர் உயிரிழந்ததாக பொலிஸார் தெரிவித்தனர். பாதிக்கப்பட்டவர் மொலகொடவைச் சேர்ந்த 50 வயது நபர் ஆவார். இதற்கிடையில், நேற்று கந்தரா – தலல்லாவில் இரண்டு பேருந்துகள் மோதிக்கொண்டதில் 38 பேர் காயமடைந்தமை குறிப்பிடத்தக்கது.

நாட்டில் இன்றைய தினம் (27.06.2026) தங்கத்தின் விலை அதிகரித்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

அதன்படி 24 கரட் தங்க பவுண் ஒன்று 5000 ரூபாயால் அதிகரித்துள்ளது. அந்த வகையில் தற்போது 24 கரட் தங்க பவுண் ஒன்று 386000 ரூபாவாக விற்பனை செய்யப்படுகிறது.

இதேவேளை 22 கரட் தங்க பவுண் ஒன்று 5000 ரூபாயால் அதிகரிக்கப்பட்டு 355,200 ரூபாவாக விற்பனை செய்யப்படுகிறது.

அதற்கமைய 24 கரட் தங்கத்தின் ஒரு கிராமின் விலை 48,250 ரூபாயாகவும், 22 கரட் தங்கத்தின் ஒரு கிராமின் விலை 44,400 ரூபாயாகவும், விற்பனை செய்யப்படுகிறது.

பிரசவத்தின் பின் ஏற்பட்ட தொடர் காய்ச்சல் மற்றும் அதிக இரத்தப்போக்கு காரணமாக இளம் தாய் ஒருவர் சிகிச்சை பலனின்றி மரணமடைந்துள்ளதாக வைத்தியசாலை வட்டாரங்கள் தெரிவிக்கின்றன.

இந் நிலையில் தன் மழலையின் முகத்தைக் கண்டு மகிழ வேண்டிய நேரத்தில், அந்தப் பிஞ்சுக் குழந்தையை தவிக்கவிட்டுச் சென்றுள்ள இந்தத் தாயின் மரணம் பெரும் துயரத்தை ஏற்படுத்தியுள்ளது.

மட்டக்களப்பு மாவட்டத்தில் டெங்கு நோயின் முதலாவது உயிரிழப்பு
மட்டக்களப்பு போதனா வைத்தியசாலையில் துயரச் சம்பவம் ஒன்று இடம்பெற்றுள்ளது.

26 வயதுடைய இளம் தாய் ஒருவர், குழந்தை பிரசவித்த சிறிது நேரத்திலேயே டெங்கு காய்ச்சலால் உயிரிழந்துள்ளார். வாழைச்சேனை, பேத்தாழை பகுதியைச் சேர்ந்த அவரது மறைவு அப்பகுதியில் பெரும் துயரத்தை ஏற்படுத்தியுள்ளது.

மக்களே, அவதானமாக இருங்கள் • வீடுகள் மற்றும் சுற்றுப்புறங்களில் நீர் தேங்காமல் பார்த்துக்கொள்ளுங்கள். காய்ச்சல், உடல்வலி, வாந்தி போன்ற அறிகுறிகள் இருந்தால் உடனடியாக வைத்தியசாலைக்குச் செல்லுங்கள். கர்ப்பிணித் தாய்மார்கள் மற்றும் குழந்தைகள் விசேட கவனம் செலுத்துங்கள்.