கொழும்பு – கொலன்னாவ பகுதியில் 624 வீடமைப்பு அலகுகளை கொண்ட 12 மாடி வீடமைப்பு வளாகத்தின் கட்டுமானப்பணிகள் நிறைவடைந்துள்ளதாக அறிவிக்கப்பட்டுள்ளது.

இந்த அறிவிப்பை நகர அபிவிருத்தி அமைச்சு வெளியிட்டுள்ளதாக தெரிவிக்கப்பட்டுள்ளது. ஆசிய உட்கட்டமைப்பு முதலீட்டு வங்கியின் (AIIB) நிதியுதவியுடன், 5,784 மில்லியன் ரூபா செலவில் இந்த வீடமைப்பு வளாகம் கட்டப்பட்டுள்ளது.

இந்த திட்டத்தை மக்களிடம் கையளிப்பதற்கான அனைத்து ஏற்பாடுகளும் இறுதி செய்யப்பட்டுள்ளதாகவும் நகர அபிவிருத்தி அமைச்சு தெரிவித்துள்ளது.

நகர அபிவிருத்தி பிரதி அமைச்சர் எரங்க குணசேகர குறித்த பகுதிக்கு விஜயம் செய்து பணிகளை பார்வையிட்டுள்ளார்.

வாட்ஸ்அப் சமூக ஊடக வலைத்தளம் வழியாகச் செயல்பட்ட ஒரு மோசடியான இணையவழி முதலீட்டுத் திட்டத்தில் சிக்கி, ஓய்வுபெற்ற பொறியாளரான பெண் ஒருவர் 90 லட்சம் ரூபாய்க்கும் அதிகமான பணத்தை இழந்துள்ள சம்பவம் ஒன்ரு இடம்பெற்றுள்ளது.

இலங்கை கணினி அவசர காலப் பிரிவுதகவலின்படி, பாதிக்கப்பட்ட பெண் நாட்டின் பொது மற்றும் தனியார் துறைகளில் 40 ஆண்டுகளுக்கும் மேலாகப் பணியாற்றியவர் ஆவார்.

இவர் ஒரு பிரபலமான குடியிருப்பு வளாகத்தில் சொந்தமாக வீடு வைத்திருந்ததோடு, 10 மில்லியன் ரூபாய்க்கும் அதிகமான வங்கி வைப்புத்தொகையையும் கொண்டிருந்தார்.

இணையவழி வங்கிச் சேவை மற்றும் போக்குவரத்துச் செயலிகள் போன்ற நவீன தொழில்நுட்பக் கருவிகள் குறித்து நல்ல புரிதல் கொண்டவராகவும் இருந்தபோதிலும், முதலீட்டு ஆலோசகர்களாக வேடமணிந்த மோசடிக்காரர்களின் ஒரு திட்டமிட்ட வலையில் இவர் சிக்கிக்கொண்டார்.

முதலீடு செய்யப்படும் பணம் ஒவ்வொரு மூன்று மாதங்களுக்கும் இருமடங்காகப் பெருகும் என்று கூறும் சமூக ஊடக வலைத்தளம் ஊடாக இந்த நிதி மோசடி தொடங்கியதாகக் கணினி அவசர காலப் பிரிவு கூறியுள்ளது.

அதிக வருமானம் கிடைக்கும் என்பதை நம்பி அவர் பணத்தை முதலீடு செய்யத் தொடங்கி இன்று பெருமளவு பணத்தை குறித்த பெண் இழந்துள்ளார். பல தவணைகளில் அவர் செய்த மொத்த முதலீடு சுமார் 10 மில்லியன் ரூபா என கூறப்படுகின்றது.

சம்பவம் தொடர்பில் குற்றப் புலனாய்வுத் துறை (CID) ஊடாக , விரிவான விசாரணைகள் நடைபெற்று வருகின்றதாக கூறப்படுகின்றது.

அதேவேளை சமூக வலைத்தள மோசடிகாள் தொடர்பில் பொலிஸார் பொதுமக்களுக்கு அடிக்கடி எச்சரிக்கை விடுத்து வரும் நிலையில் , மக்கள் இது தொடர்பில் எச்சரிக்கையாக இருக்க வேண்டும் என அறிவுறுத்தப்பட்டுள்ளது.

காலி – ஜின் ஆற்றுப்பகுதியில் வக்வெல்ல பாலத்திற்கு அருகில் கண்டெடுக்கப்பட்ட சடலம் “பொடி லசி” எனப்படும் பாதாள உலகக் கும்பலைச் சேர்ந்தவரின் நெருங்கிய சகா ஒருவருடையது என அடையாளம் காணப்பட்டுள்ளதாக பொலிஸார் தெரிவித்துள்ளனர்.

கடந்த செவ்வாய்க்கிழமை (23) காலி, பொத்தல பகுதியில் உள்ள வக்வெல்ல பாலத்திற்கு அருகில் அடையாளம் தெரியாத சடலமொன்று கண்டெடுக்கப்பட்டிருந்தது.

இதனையடுத்து முன்னெடுக்கப்பட்ட விசாரணையில், இறந்தவரின் முகம் சிதைக்கப்பட்டிருந்ததும், அவரது கைகள், கால்கள் கொன்கிரீட் தூணுடன் ஒன்றாக இறுக கட்டப்பட்டிருந்ததும் விசாரணையில் தெரியவந்தது.

இச்சம்பவம் தொடர்பபில் முன்னெடுக்கப்பட்ட விசாரணையில் தற்போது சடலம் அடையாளம் காணப்பட்டுள்ளதாக பொலிஸார் தெரிவித்துள்ளனர். இதற்கமைய, மேலதிக பரிசோதனைகளுக்காக சடலம் காலி தேசிய வைத்தியசாலையின் பிரேத அறையில் வைக்கப்பட்டுள்ளது.

மாத்தறை – தங்காலை வீதியில் இன்று காலை (26) இரண்டு தனியார் பேருந்துகள் நேருக்கு நேர் மோதி விபத்திற்குள்ளாகியுள்ளன. இந்த விபத்தில் சுமார் 40 பேர் காயமடைந்து வைத்தியசாலையில் அனுமதிக்கப்பட்டுள்ளதாக பொலிஸ் பிரிவு தெரிவித்துள்ளது.

காலியிலிருந்து அம்பாறை நோக்கிச்சென்ற பேருந்தும், தங்காலையிலிருந்து மாத்தறை நோக்கிச்சென்ற பேருந்தும் நேருக்கு நேர் மோதிக்கொண்டுள்ளன.

இந்த விபத்தில் காயமடைந்தவர்கள் மாத்தறை மற்றும் பத்திகம வைத்தியசாலைகளில் அனுமதிக்கப்பட்டுள்ளதாக பொலிஸ் தெரிவித்துள்ளது.

இந்த விபத்தில் காயமடைந்தவர்களில் இரண்டு பேருந்து சாரதிகளும் அடங்குவதாக பொலிஸார் தெரிவித்துள்ளனர். இந்த சம்பவம் தொடர்பாக கந்தர பொலிஸார் மேலதிக விசாரணைகளை மேற்கொண்டு வருகின்றனர்.

இலங்கையில் இன்றைய தினம் (26.06.2026) தங்க விலை அதிகரித்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது. நேற்று (24) 24 கரட் தங்கம் ஒரு பவுண் 376,000 ரூபாயாக விற்பனை செய்யப்பட்டிருந்தது.

இந்த நிலையில் இன்று 3000 ரூபாயால் அதிகரிக்கப்பட்டு 379,000 ரூபாயாக விற்பனை செய்யப்படுகிறது.

அதேபோல், நேற்று 22 கரட் தங்கம் ஒரு பவுண் 346,000 ரூபாயாக விற்பனை செய்யப்பட்ட நிலையில் தற்போது 2700 ரூபாயால் அதிகரிக்கப்பட்டு 348,700 ரூபாயாக விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,375 ரூபாயாகவும், 22 கரட் தங்கத்தின் ஒரு கிராமின் விலை 43,587 ரூபாயாகவும், விற்பனை செய்யப்படுகிறது.

புதிய இணைப்பு : தெல்தெனியவில் கார் ஒன்றினுள் சடலமாக மீட்கப்பட்ட பெண் உடலியல் சிகிச்சை நிபுணர் மரணம் தொடர்பில் கைது செய்யப்பட்ட பிரதான சந்தேகநபர் உட்பட நால்வர் எதிர்வரும் 9 ஆம் திகதி வரை விளக்கமறியலில் வைக்கப்பட்டுள்ளனர்.

அதன்படி, இந்த கொலைச் சம்பவத்துடன் தொடர்புடைய பிரதான சந்தேகநபர், அவரது மனைவி, குண்டசாலை பொலிஸ் பயிற்சி கல்லூரியின் பொறுப்பதிகாரி மற்றும் குண்டசாலை பிரதேச சபையின் சாரதி ஆகியோரே இவ்வாறு விளக்கமறியலில் வைக்கப்பட்டுள்ளனர்.

சந்தேகநபர்கள் நால்வரும் இன்று நுவரெலியா நீதவான் நீதிமன்றத்தில் முன்னிலைப்படுத்தப்பட்டதை அடுத்து, நீதவானால் இந்த உத்தரவு பிறப்பிக்கப்பட்டது.

முதலாம் இணைப்பு : தெல்தெனிய பகுதியில் சந்தேகத்திற்கிடமான முறையில் உயிரிழந்த பெண் இயன்முறை சிகிச்சை நிபுணரின் மரணம் தொடர்பில் குண்டசாலை பொலிஸ் பயிற்சிப் பாடசாலையின் பொறுப்பதிகாரி கைது செய்யப்பட்டுள்ளார்.

பிரதான சந்தேகநபர் வழங்கிய வாக்குமூலத்தின் அடிப்படையில் இவர் கைது செய்யப்பட்டார். சம்பவம் தொடர்பான பிரதான சந்தேகநபருக்கும், அவரது மனைவிக்கும் தலைமறைவாக இருப்பதற்கு உதவி ஒத்தாசை வழங்கிய குற்றச்சாட்டின் பேரிலேயே இந்த கைது இடம்பெற்றுள்ளது.

இதேவேளை, இதற்கு முன்னர் கைது செய்யப்பட்ட பிரதான சந்தேகநபர், அவரது மனைவி மற்றும் மேலும் ஒரு சந்தேகநபர் ஆகியோரை 48 மணித்தியாலங்கள் தடுத்து வைத்து விசாரிப்பதற்கு நுவரெலியா நீதவான் நீதிமன்றம் நேற்று அனுமதி வழங்கியுள்ளது.

கடந்த 17 ஆம் திகதி தெல்தெனிய வைத்தியசாலைக்கு அருகில் கார் ஒன்றில் இருந்து இளம் பெண் வைத்தியரின் சடலம் மீட்கப்பட்டிருந்தது.

இதனையடுத்து முன்னெடுக்கப்பட்ட விசாரணையில் உயிரிழந்த பெண்ணின் கழுத்து நெரிக்கப்பட்டமையாலேயே இந்த மரணம் சம்பவித்துள்ளதாக பிரேத பரிசோதனையின் ஊடாக உறுதிப்படுத்தப்பட்டிருந்தது.

இதனையடுத்து உயிரிழந்த பெண்ணின் காதலர் எனும் கூறப்படும் நபரை பொலிஸார் தேடி வந்த நிலையில், யாழ்ப்பாணம் பொலிஸாரால் அவர் கைது செய்யப்பட்டிருந்தார்.

வௌ்ளவத்தையில் இருந்து பேருந்தில் பிரதான சந்தேகநபர் அவரது மனைவி மற்றும் குழந்தை ஆகியோர் யாழ்ப்பாணம் நோக்கி பயணித்த போதே இந்த கைது இடம்பெற்றிருந்தது.

இந்நிலையிலேயே கைது செய்யப்பட்ட சந்தேகநபர்கள் நுவரெலியா நீதவான் நீதிமன்றில் முன்னிலைப்படுத்தப்பட்ட போது, அவர்களை 48 மணிநேரம் தடுப்புக் காவலில் வைத்து விசாரணை செய்வதற்கு அனுமதி வழங்கப்பட்டிருந்தமை குறிப்பிடத்தக்கது.

உலக சந்தையில் எரிபொருள் விலை குறைவதற்கு ஏற்ப, எதிர்காலத்தில் பொதுமக்களுக்கு மானியம் வழங்க நடவடிக்கை எடுக்கப்படும் என நிதி மற்றும் திட்டமிடல் பிரதி அமைச்சர் அனில் ஜயந்த பெர்னாண்டோ தெரிவித்துள்ளார்.

இன்று (26) தகவல் திணைக்களத்தில் நடைபெற்ற செய்தியாளர் சந்திப்பில் பங்கேற்றபோதே அமைச்சர் இதனை தெரிவித்துள்ளார். மேலும் தெரிவிக்கையில்,

எரிபொருளுக்காக இதுவரை ரூ. 57 பில்லியன் மானியம் வழங்கப்பட்டுள்ளதாகவும், இந்த மானியம் இந்த மாதத்துடன் முடிவடைய உள்ளதாகவும் கூறியுள்ளார்.

அதன்படி, மீண்டும் மானியம் வழங்கலாமா வேண்டாமா என்பது குறித்து முடிவு எடுக்கப்பட்டு பின்னர் வெளியிடப்படும் என்றும் அமைச்சர் தெரிவித்துள்ளார். எந்த வகையிலும் பொதுமக்கள் மீது தேவையற்ற அழுத்தத்தை ஏற்படுத்த தயாராக இல்லை என்றும் சுட்டிக்காட்டியுள்ளார்.

மத்திய கிழக்கில் நிலவும் போர்ச்சூழல் காரணமாக எரிபொருள் விலைகள் வேகமாக அதிகரித்தமையினால், நாட்டில் எரிபொருள் விலைகளை அரசு சற்று உயர்த்த வேண்டியிருந்தது என்றும் அமைச்சர் கூறியுள்ளார்.

இருப்பினும், உயர்த்தப்பட்ட எரிபொருள் விலைகள் மீண்டும் குறைந்து வருவதாகவும், அந்த விலையில் எரிபொருளை வாங்கும்போது பொதுமக்கள் பயனடையலாம் என்றும் அமைச்சர் சுட்டிக்காட்டியுள்ளார்.

நாட்டில் தற்போது கையிருப்பில் உள்ள மற்றும் அடுத்த இரண்டு மாதங்களில் வந்து சேரவுள்ள எரிபொருளானது, கடந்த மாதம் ஆர்டர் செய்யப்பட்ட எரிபொருள் என்பதால்,

எதிர்காலத்தில் ஆர்டர் செய்யப்படும் எரிபொருளுக்கான செலவை ஈடுசெய்து, அதன் பலன்களை மக்களுக்கு வழங்க முடியும் என்று அமைச்சர் மேலும் தெரிவித்துள்ளார்.