ருஹுணு பல்கலைக்கழக மாணவியொருவர் டெங்கு காய்ச்சல் காரணமாக உயிரிழந்த நிலையில் பிரேத பரிசோதனை அறிக்கை வெளியாகியுள்ளது.

ருஹுணு பல்கலைக்கழகத்தின் மானுடவியல் மற்றும் சமூக அறிவியல் பீடத்தின் 46 ஆவது தொகுதி மாணவியான ஹிக்கடுவ விதானகே சந்தலி தாரகா என்ற 24 வயதான மாணவியே இவ்வாறு உயிரிழந்துள்ளார்.

மாத்தறையின் தெனியாய கலுகலஹேன பகுதியை சேர்ந்த மாணவி இந்த ஆண்டு டெங்கு காய்ச்சலால் உயிரிழந்த 29 ஆவது நபராக அடையாளம் காணப்பட்டுள்ளார்.

இவர் தனது நண்பர்களுக்கு அனுப்பிய இறுதி வாட்ஸ்அப் செய்தியில் தான் டெங்கு தொற்றால் பாதிக்கப்பட்டுள்ளதாகவும், “நான் இறக்காவிட்டால் கண்டிப்பாக உங்களைப் பார்க்க வருவேன் நண்பர்களே” என்றும் உருக்கமாக குறிப்பிட்டுள்ளார்.

சந்தலிக்கு 18 ஆம் திகதி டெங்கு காய்ச்சல் ஏற்பட்டதையடுத்து, அவர் முதலில் தெனியாய மருத்துவமனையில் அனுமதிக்கப்பட்டுள்ளார்.

இதன்பின்னர் நிலைமை தீவிரமடைந்ததால், மேலதிக சிகிச்சைக்காக அவர் 22 ஆம் திகதி காலி கராப்பிட்டிய மருத்துவமனைக்கு அனுப்பப்பட்டு அங்கு சிகிச்சை பெற்று வந்த நிலையில் 23 ஆம் திகதி அவர் உயிரிழந்துள்ளார்.

இந்நிலையில், டெங்கு இரத்தக்கசிவு காய்ச்சலால் ஏற்பட்ட பல உறுப்பு செயலிழப்பின் காரணமாக நிகழ்ந்த மரணம் என்றும் பிரேத பரிசோதனை அறிக்கையில் தெரியவந்துள்ளது.

உயிரிழந்த மாணவியின் தாய், தெனியாய மருத்துவமனையில் செவிலியராக பணியாற்றி வரும் நிலையில், தனது மகளின் நோய் மற்றும் இந்த துரதிர்ஷ்டவசமான மரணம் குறித்து பல தகவல்களை வெளியிட்டுள்ளார்.

மகள் பல்கலைக்கழகத்திற்கு அருகிலுள்ள ஒரு தங்கும் விடுதியில் தங்கியிருந்தாள். அந்த விடுதியில் இருந்த பல குழந்தைகளுக்கு டெங்கு காய்ச்சல் தொற்றியதை கேள்விப்பட்டதும், நாங்கள் அவளை உடனடியாக வீட்டிற்கு வருமாறு கூறினோம்.

ஆனால் அவள், ‘அம்மா, எனக்கு பரீட்சை இருக்கின்றது, நான் எப்படி வர முடியும்?’ என்று கூறி, அந்த விடுதியிலேயே தங்கிவிட்டாள். இதன்பின்னர், அவளுக்கு கடுமையான காய்ச்சல் ஏற்பட்டபோது, ​​தந்தை அன்றிரவே சென்று அவளை வீட்டிற்கு அழைத்துவந்தார்.

நான் ஒரு செவிலியராக இருந்து, அவளுக்கு அருகிலேயே இருந்து அவளைப் பராமரித்தபோதிலும், என்னால் மகளின் உயிரை காப்பாற்ற முடியவில்லை என தெரிவித்துள்ளார். இந்த சம்பவம் குறித்து பொலிஸார் மேலதிக விசாரணைகளை நடத்தி வருகின்றனர்.

இலங்கையில் இன்றைய தினம் (25.06.2026) தங்க விலை குறைவடைந்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

24 கரட் தங்க பவுண் ஒன்று நேற்றைய தினம் 380,000 ரூபாயாக விற்பனை செய்யப்பட்டிருந்து. இந்த நிலையில் இன்றைய தினம் 4000 ரூபாயால் வீழ்ச்சியடைந்து 376,000 ரூபாயாக விற்பனை செய்யப்படுகிறது.

அதேபோல்,நேற்று 22 கரட் தங்கம் ஒரு பவுண் 349,600 ரூபாயாக விற்பனை செய்யப்பட்ட நிலையில் தற்போது 3600 ரூபாயால் குறைக்கப்பட்டு 346,000 ரூபாயாக விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,000 ரூபாயாகவும், 22 கரட் தங்கத்தின் ஒரு கிராமின் விலை 43,250 ரூபாயாகவும், விற்பனை செய்யப்படுகிறது.

யாழ்ப்பாணத்தில் இருந்து கதிர்காமம் நோக்கிச் செல்லும் வருடாந்த பாதயாத்திரையில் தானாகவே முன்வந்து இணைந்து கொண்ட சுப்பிரமணியம் என்ற நாய் பலரதும் கவனத்தை ஈர்த்துள்ளது.

குறித்த நாய் 33 நாட்களாக பக்தர்களுடன் தொடர்ந்து பயணித்து வருவதாக தெரிவிக்கப்படுகிறது. இந்த நாயை பார்ப்பதற்காக கதிர்காம வீதியின் இருபுறமும் கூடும் மக்களின் எண்ணிக்கை நாளுக்கு நாள் அதிகரித்துள்ளது.

அத்துடன் தற்போது சமூக ஊடகங்களிலும் இந்தச் செய்தி அனைவரினதும் கவனத்தை ஈர்த்துள்ளது.

முல்லைத்தீவு – முள்ளியவளைப் பகுதியை கடந்து சென்று கொண்டிருந்த போது, எந்தவொரு உரிமையாளரும் இல்லாத இந்த நாய், தங்களுடன் தானாகவே முன்வந்து யாத்திரையில் இணைந்ததாக பாதயாத்திரைக் குழுவின் தலைவர் ஜெயவேல் சுவாமி குறிப்பிட்டுள்ளார்.

இதனை கடவுளின் அற்புதமாகக் கருதி, பக்தர்கள் இந்த நாயின் கழுத்தில் சிறிய துணி ஒன்றைக் கட்டி, நெற்றியில் விபூதி மற்றும் குங்குமத் திலகமிட்டு சுப்பிரமணியம் என்ற பெயரால் அழைத்து வருகின்றனர்.

திருகோணமலை பகுதியில் இந்த நாய் சிறியளவில் நோய்வாய்ப்பட்ட போது, அதற்கு கால்நடை மருத்துவ சிகிச்சை அளிக்கவும் பக்தர்கள் நடவடிக்கை எடுத்துள்ளனர்.

இயற்கையிலேயே மாமிச உண்ணியான விலங்காக இருந்த போதிலும், கடந்த 32 நாட்களாக இந்த நாய் பக்தர்கள் வழங்கும் பிஸ்கட், பால், பாண் மற்றும் சைவ உணவுகளை மட்டுமே உட்கொண்டு வருவது அனைவரையும் ஆச்சரியத்தில் ஆழ்த்தியுள்ளது.

நாயின் நடத்தையும் பக்தி உணர்வும், கடினமான பாதயாத்திரையில் ஈடுபடும் ஏனைய பக்தர்களின் மனதிற்கும் உடலிற்கும் ஒரு சிறந்த ஆன்மீக சக்தியையும் ஊக்கத்தையும் அளிப்பதாக பக்தர்கள் தெரிவித்துள்ளனர்.

கல்விப் பொதுத் தராதர உயர்தர பரீட்சைகள் அறிவிக்கப்பட்டதற்கமைய ஆகஸ்ட் மாதம் 10ஆம் திகதி நடைபெறும் என கல்வி அமைச்சின் செயலாளர் நாலக களுவெவ மீண்டும் உறுதிப்படுத்தியுள்ளார்.

புதன்கிழமை (24) கொழும்பிலுள்ள அரசாங்க தகவல் திணைக்களத்தில் இடம்பெற்ற விசேட ஊடகவியலாளர் மாநாட்டிலேயே அவர் இதனைத் தெரிவித்துள்ளார். அவர் மேலும் குறிப்பிடுகையில்,

கல்விப் பொதுத் தராதர உயர்தர பரீட்சைகள் தொடர்பில் சிலரால் திட்டமிட்டு வதந்திகள் பரப்பப்படுவதனால் மாணவர்கள் மத்தியில் குழப்பங்கள் ஏற்படக் கூடும் என்றும் தெரிவித்துள்ளார்.

ஆகஸ்ட் 10ஆம் திகதி பரீட்சைகளை நடத்துவதற்கு சகல ஏற்பாடுகளும் பூர்த்தி செய்யப்பட்டுள்ளன. அதில் எவ்வித மாற்றங்களும் இல்லை. சிலரால் இந்த திகதிகள் குறித்து திட்டமிட்டு வதந்திகள் பரப்பப்படுகின்றன.

எனவே மாணவர்கள் பதற்றமடையவோ குழப்பமடையவோ தேவையில்லை. அதேநேரம் பரீட்சைகளைக் காலம் தாழ்த்துவதற்கு எந்தவொரு தகுதியான காரணமோ அல்லது தேவையோ கல்வி அமைச்சிற்கு இல்லை.

பாடசாலை நாட்கள் கவனத்தில் கொள்ளப்பட்டு தான் பரீட்சைகளுக்கான கால அட்டவணைகள் தயாரிக்கப்பட்டுள்ளதாகவும், திட்டமிட்டபடி இடம்பெறும் என்றும் குறிப்பிட்டுள்ளார்.

பரீட்சைகளுக்கான அனுமதி அட்டைகள்

இதேவேளை, க.பொ.த. உயர்தர பரீட்சைகளுக்கான அனுமதி அட்டைகள் ஜூலை மாதம் விநியோகிக்கப்படும் என பரீட்சைகள் ஆணையாளர் நாயகம் இந்திகா குமாரி லியனகே தெரிவித்துள்ளார்.

அதேவேனை ஐந்தாம் வகுப்பு மாணவர்களுக்கான புலமைப் பரிசில் பரீட்சை ஆகஸ்ட் 9ஆம் திகதி இடம்பெறும். அதற்கான சகல ஏற்பாடுகளும் நிறைவடைந்துள்ளதாகவும் உறுதிப்படுத்தியுள்ளார்.

தெல்தெனிய பிரதேசத்தில் சடலமாக கண்டெடுக்கப்பட்ட இளம்பெண் மருத்துவ நிபுணரின் படுகொலைச் சம்பவத்துடன் தொடர்புடைய சந்தேக நபர் நள்ளிரவு வேளையில் நுவரெலிய பொலிஸாரிடம் ஒப்படைக்கப்பட்டுள்ளார்.

நே்றறு(24) யாழ்ப்பாணத்தில் மோசடித் தடுப்புப் பிரிவினரால் கைது செய்யப்பட்ட முக்கிய சந்தேக நபர், அவரது மனைவி மற்றும் குழந்தைகள் ஆகியோர்,

கொலை தொடர்பான மேலதிக விசாரணைக்காக இரவு மோசடித் தடுப்புப் பிரிவினரால் நுவரெலியா பொலிஸாரிடம் ஒப்படைக்கப்பட்டுள்ளனர்.

சந்தேக நபர் தனது மனைவி மற்றும் குழந்தையுடன் மாறுவேடமிட்டு வெள்ளவத்தையிலிருந்து யாழ்ப்பாணத்திற்கு ஒரு தனியார் பேருந்தில் பயணம் செய்து கொண்டிருந்தபோது புதன்கிழமை (24) அதிகாலையில் சாவகச்சேரி கைதடி பகுதியில், மோசடித் தடுப்புப் பிரிவினரால் கைது செய்யப்பட்டார்.

இதற்கிடையே சந்தேக நபருக்கு அடைக்கலம் கொடுத்தவரும், அவரது நண்பருமான குண்டசாலை பிரதேச சபையைச் சேர்ந்த சாரதி ஒருவர், நுவரெலியா பொலிஸாரின் விசேட பிரிவினரால் குண்டசாலை பகுதியில் கைது செய்யப்பட்டார்.

கைது செய்யப்பட்ட மூன்று சந்தேக நபர்களும் இன்று வியாழக்கிழமை (25) நுவரெலியா நீதவான் நீதிமன்றத்தில் முன்னிலைப்படுத்தப்படுவார்கள் என்றும், தடுப்புக்காவல் உத்தரவுகள் பெறப்பட்டு,

கொலை தொடர்பான மேலதிக விசாரணைகள் மேற்கொள்ளப்படும் என்றும் நுவரெலியா பிரதேச உதவி பொலிஸ் அத்தியட்சகர் சந்தன பஸ்நாயக்க தெரிவித்துள்ளார்.

சந்தேக நபர் நுவரெலியா பொலிஸ் நிலையம் கொண்டுவரப்பட்டபோது, ​​படுகொலை செய்யப்பட்ட பெண் மருத்துவரின் குடும்ப உறவினர்கள் குழுவும் அங்கு வருகை தந்திருந்தது.

சடலத்தைக் கொண்டு செல்லப் பயன்படுத்தப்பட்ட காரும், சந்தேக நபரை ஏற்றிச் செல்லப் பயன்படுத்தப்பட்ட மோட்டார் சைக்கிளும் பொலிஸாரால் கைப்பற்றப்பட்டுள்ளன.

எரிபொருள் விலைகளில் எப்போது மாற்றம் செய்யப்படும் என்று தற்போதைக்குக் கூற முடியாது வலுசக்தி மற்றும் எரிசக்தி அமைச்சர் அநுர கருணாதிலக்க தெரிவித்துள்ளார்.

நாடாளுமன்றத்தில் வைத்து இன்றைய தினம் (25.06.2026) கருத்து தெரிவிக்கும் போதே அவர் இந்த விடயத்தை கூறியுள்ளார்.

அவர் மேலும் தெரிவிக்கையில், சர்வதேச சந்தையில் எரிபொருள் விலை குறையும் சந்தர்ப்பங்களில், அந்த விலைக்குறைப்பின் பலனை நிச்சயமாக நுகர்வோருக்கு வழங்க நடவடிக்கை எடுக்கப்படும். டீசலுக்கு 100 ரூபாவும், பெற்றோலுக்கு 20 ரூபாவும் மானியம் வழங்கப்படுகிறது.

இந்த எரிபொருள் மானியம் அனைவருக்கும் சமமான முறையில் வழங்கப்படுவதில்லை.

தற்போது மானியங்களுக்காக அமைச்சரவையினால் 57 பில்லியன் ரூபாய் ஒதுக்கப்பட்டுள்ளதுடன், இந்த தொகை இன்னும் முழுமையாகப் பயன்படுத்தப்படவில்லை.

எரிபொருள் விலைகளில் எப்போது மாற்றம் செய்யப்படும் என்று தற்போதைக்குக் கூற முடியாது. உலகச் சந்தையின் விலை நிலவரங்களுக்கு அமைவாகவே அது தீர்மானிக்கப்படும். கடந்த மார்ச் மாதம் முதல் எரிபொருள் விலைகள் அதிகரித்து வந்துள்ளது.

சர்வதேச சந்தையில் விலை அதிகரித்தமையினாலேயே உள்நாட்டுச் சந்தையிலும் விலை அதிகரித்தது.

எனினும், சர்வதேச சந்தையில் விலை வீழ்ச்சியடையும் சந்தர்ப்பத்தில், அதன் நன்மையை நுகர்வோருக்கு வழங்க நிச்சயமாக நடவடிக்கை எடுக்கப்படும் என குறிப்பிட்டுள்ளார்.

ருஹுணு பல்கலைக்கழகத்தில் கல்வி கற்று வந்த, மாத்தறை தெனியாய பகுதியைச் சேர்ந்த 23 வயதுடைய சந்தலி தாரிகா என்ற மாணவி டெங்கு காய்ச்சல் காரணமாக உயிரிழந்துள்ளார்.

அவரது இந்த திடீர் மறைவு, ருஹுணு பல்கலைக்கழக கலைப்பீட மாணவர் சங்கம் மற்றும் பல்கலைக்கழக சமூகத்தை பெரும் அதிர்ச்சியில் ஆழ்த்தியுள்ளது. அத்துடன், அவர்கள் தங்களது இரங்கலையும் தெரிவித்துள்ளனர்.

இதேவேளை, சந்தலி தாரிகா தனக்கு டெங்கு காய்ச்சல் ஏற்பட்டிருந்த போது, தனது நடனக் குழுவினருக்கு தனது உடல்நிலை குறித்து அனுப்பிய குறுந்தகவலில் தனக்கு டெங்கு உறுதி செய்யப்பட்டுள்ளதாகவும், தன்னால் நடன நிகழ்விற்கு வர முடியாதெனவும், குறிப்பிட்டுள்ளார்.

நான் இறக்காவிட்டால் வருவேன் என குறிப்பிட்டிருந்த செய்தி பலரையும் பெரும் சோகத்தை ஆழ்த்தியுள்ளது. எனினும் குறுந்தகவல் அனுப்பிய 5 நாட்களில் அவர் உயிரிழந்துள்ளார்.

இந்த ஆண்டின் இதுவரையிலான காலப்பகுதியில் நாடு முழுவதும் சுமார் 37,000 டெங்கு நோயாளர்கள் பதிவாகியுள்ளனர்.

எனினும், தற்போது மொத்த நோயாளர்களின் எண்ணிக்கை 50,000 என்ற எல்லையையும் தாண்டியுள்ளது என மருத்துவமனை வட்டாரங்கள் சுட்டிக்காட்டுகின்றன.

சமீபத்தில் நாட்டில் ஏற்பட்ட பருவமழை மற்றும் வெள்ளப் பெருக்குடன், இந்த நோய் பரவல் கட்டுப்பாடின்றி மிக வேகமாக அதிகரித்து வருகிறது. இந்த வைரஸ் நோய் பரவலில் 50 சதவீதத்திற்கும் அதிகமானவை மேல் மாகாணத்திலேயே பதிவாகியுள்ளன.

நிலைமையை கருத்திற் கொண்டு சுகாதார அமைச்சு பல பகுதிகளை உத்தியோகபூர்வமாக அதி அபாய வலயங்களாக அறிவித்துள்ளது.

அதற்கமைய, கொழும்பு, கம்பஹா, களுத்துறை, கண்டி, காலி, இரத்தினபுரி மற்றும் உயிரிழந்த மாணவியின் சொந்த ஊரான மாத்தறை ஆகிய மாவட்டங்கள் இந்த அதி அபாய வலயங்களுக்குள் அடங்குகின்றன.

இலங்கையில் 16 வயதுக்குட்பட்ட சிறுவர்கள் சமூக ஊடகங்களைப் பயன்படுத்துவதைக் கட்டுப்படுத்துவதற்கான “சமூக ஊடகக் குறைந்தபட்ச வயது” (Social Media Minimum Age Bill) எனும் தனிநபர் சட்டமூலம் நாடாளுமன்றத்தில் முன்வைக்கப்பட்டுள்ளது.

எதிர்க்கட்சி நாடாளுமன்ற உறுப்பினர் பைசர் முஸ்தபாவினால் இந்தச் சட்டமூலம் சமர்ப்பிக்கப்பட்டுள்ளது.

16 வயதுக்குட்பட்ட சிறுவர்கள் சமூக ஊடகங்களை அணுகுவதைத் தடுப்பதற்கும், அவர்கள் இணையத்தில் செலவிடும் நேரத்தைக் கட்டுப்படுத்துவதற்கும் இணைய சேவை வழங்குநர்களுக்கு உத்தரவிடப்படும்.

இதற்கான செயற்பாடுகளைக் கண்காணிக்கவும், முறைப்பாடுகளைப் பெற்றுக்கொள்ளவும் தேசிய சிறுவர் பாதுகாப்பு அதிகாரசபையின் கீழ் ‘அங்கீகரிக்கப்பட்ட ஆணையாளர்’ ஒருவர் நியமிக்கப்படுவார்.

சிறுவர்களை இணையத்தில் உள்ள அபாயகரமான உள்ளடக்கங்கள் மற்றும் செயற்பாடுகளிலிருந்து பாதுகாப்பதே இதன் முக்கிய நோக்கமாகும்.

இந்த சட்டமூலம் நிறைவேற்றப்பட்டால், இலங்கையில் சேவைகளை வழங்கும் அனைத்து சமூக ஊடக நிறுவனங்களும் இந்த வயதுக் கட்டுப்பாடுகளைக் கட்டாயம் நடைமுறைப்படுத்த வேண்டியிருக்கும்