திருச்சியில்..

திருச்சி மாவட்டம், வையம்பட்டியை அடுத்த இனாம்ரெட்டியபட்டியைச் சேர்ந்தவர் ராஜரெத்தினம். இவர் அரசு போக்குவரத்து கழகத்தில் மணப்பாறை கிளையில் டிரைவராக பணியாற்றி வருகிறார்.

இவரது மனைவி மகாலட்சுமி. இந்த தம்பதிக்கு மணிமேகலை (வயது 15) என்ற மகளும், ஒரு மகனும் உள்ளனர்.கடந்த 8 ஆண்டுகளுக்கு முன்பு மகாலட்சுமி இறந்துவிட்டார்.

இதனையடுத்து ராஜரெத்தினம் கலையரசி என்பவரை திருமணம் செய்து கொண்டார். இந்த நிலையில் மணிமேகலை திருச்சியில் உள்ள ஒரு பள்ளியில் விடுதியில் தங்கி 10-ம் வகுப்பு படித்து வந்தார்.

ஆயுதபூஜையையொட்டி தொடர் விடுமுறைவிடப்பட்டதால் மணிமேகலை வீட்டுக்கு வந்து இருந்தார். நேற்று முன்தினம் இரவு வீட்டில் உள்ள அறையில் தங்கி இருந்தார். நேற்று காலையில் அவரது அறைக்கதவு திறக்கப்படவில்லை.

இதனால் சந்தேகம் அடைந்த குடும்பத்தினர் அறைக்கதவை திறந்து உள்ளே சென்றுபார்த்தபோது, மணிமேகலை தூக்குப்போட்டு தற்கொலை செய்து கொண்டது தெரியவந்தது.

இதுகுறித்த புகாரின் பேரில் வையம்பட்டி போலீஸ் இன்ஸ்பெக்டர் பிரபு மற்றும் போலீசார் வழக்குப்பதிவு செய்து மணிமேகலை தற்கொலை செய்து கொண்டதற்கான காரணம் குறித்து விசாரணை நடத்தி வருகின்றனர்.

மும்பையில்..

சொத்துப் பிரச்னையில் தன்னுடைய சொந்தச் சகோதரிகளை விஷம்வைத்துக் கொலைசெய்த நபரை போலீஸார் கைதுசெய்தனர்.மும்பை அருகிலுள்ள அலிபாக்கில் வசிக்கும் கணேஷ் மொஹிதே (36), வனத்துறையில் வேலை செய்கிறார். இவருக்கு சோனாலி, ஸ்நேகா என இரண்டு சகோதரிகள். இவர்கள் இரண்டு பேரும் கடந்த 16-ம் தேதி அடுத்தடுத்த நாளில் உடல்நலம் பாதிக்கப்பட்டு மருத்துவமனையில் சேர்க்கப்பட்டனர்.

மருத்துவமனையில் அவர்கள் சிகிச்சை பலனலிக்காமல் இறந்துபோனார்கள். இதில் ஸ்நேகா உயிரிழப்பதற்கு முன்பு போலீஸாரிடம் அளித்திருந்த வாக்குமூலத்தில், தன்னுடைய சகோதரன் சூப்பில் விஷம் கலந்து கொடுத்துவிட்டதாகத் தெரிவித்திருந்தார்.

ஸ்நேகாவின் தாயார் தன்னுடைய மகளின் சாப்பாட்டில் உறவினர் யாரோ விஷம் வைத்துக் கொலைசெய்துவிட்டதாக கொடுத்த புகாரின் அடிப்படையில், போலீஸார் கணேஷைப் பிடித்துச் சென்று விசாரித்தபோது, அவர் உண்மையை ஒப்புக்கொண்டார்.

இது குறித்து அலிபாக் போலீஸ் அதிகாரி சோம்னாத் பேசுகையில், “கணேஷின் தந்தை இறந்தவுடன் குடும்பத்துக்குச் சொந்தமான வீட்டைத் தனது பெயருக்கு மாற்றிக்கொண்டார். அதோடு குடும்பத்தை கவனித்துக்கொள்வதாகக் கூறி, தன்னுடைய தாயாரிடம் சொல்லி, வனத்துறையில் வேலை பார்த்து இறந்துபோன தந்தையின் வேலையைத் தனக்கு வாங்கிக்கொடுக்கும்படி கணேஷ் கேட்டுக்கொண்டார்.

உடனே அவரின் தாயாரும், தன்னுடைய மகனுக்கு வேலை கிடைக்கப் பரிந்துரை செய்தார்.வேலை கிடைத்தவுடன், தன்னுடைய தாயாரின் வங்கிக் கணக்கிலிருந்து கணேஷ் சட்டவிரோதமாக கையெழுத்து போட்டு, பணத்தை எடுக்க ஆரம்பித்தார். கணேஷின் சகோதரிகள் இரண்டு பேரும் குடும்பச் சொத்தில் தங்களுக்குப் பங்கு வேண்டும் என்று கேட்டனர்.

ஆனால், கணேஷ் அதற்குத் தயாராக இல்லை. இதையடுத்து தன்னுடைய கணவரின் வேலையை, தன் மகள்களில் ஒருவருக்குக் கொடுக்கும்படி கணேஷ் தாயார் வனத்துறை அதிகாரிகளிடம் கேட்டுக்கொண்டார். இதனால் கணேஷ் கடும் கோபத்துக்கு ஆளானார்.

அதையடுத்து, கணேஷ் தன்னுடைய சகோதரிகளைக் கொலைசெய்யத் தேவையான விஷத்தை இணையதளங்களில் தேடி வாங்கியிருந்தார். 53 வெப்சைட்டுகளில் விஷத்தைத் தேடியிருந்தார். கணேஷ் காரில் எலி மருந்து தொடர்பான துண்டுப்பிரசுரம் ஒன்றும் பறிமுதல் செய்யப்பட்டிருக்கிறது. கணேஷ் குற்றத்தை ஒப்புக்கொண்டிருக்கிறார். அவரை போலீஸ் காவலில் எடுத்து விசாரித்துவருகிறோம்” என்றார்.

மகாராஷ்டிராவில்..

எருமை மாட்டு வளர்ப்பின் மூலம் மாதம் 1 கோடி ரூபாய் ஈட்டி வரும் இளைம்பெண்ணின் சாதனை அனைவராலும் கவனிக்கப்பட்டு வருகிறது
மகாராஷ்டிரா மாநிலத்தில் உள்ள அகமத் நகர் அருகில் இருக்கும் நிகோஜ் என்ற கிராமத்தை சேர்ந்த ஸ்ரத்தா தவான் என்ற 23வயது பெண் எருமை மாடுகளைக்கொண்டு பால்பண்ணை நடத்தி வருகிறார்.

வீட்டில் ஸ்ரத்தாவின் தந்தைக்கு உடல் ஊனம் என்பதால் வீட்டு வேலைகளை தனது 11 வயதிலேயே தனது தோழில் சுமக்க ஆரம்பித்தார். அப்போது வீட்டில் ஒரு எருமை மாடு மட்டும் இருந்தது. அந்த ஒரு மாடு படிப்படியாக அதிகரிக்க ஆரம்பித்தது. ஸ்ரத்தா படித்துக்கொண்டே தன் வீட்டில் மாடுகளையும் கவனித்துக்கொள்ள ஆரம்பித்தார்.

இன்றைக்கு ஆண்டுக்கு ஒரு கோடி சம்பாதிக்கும் ஸ்ரத்தா தான் கடந்து வந்த பயணம் குறித்து அளித்த பேட்டியில்,”எருமை மாடுகள் எனது குடும்பத்தின் உறுப்பினர்களாக இருக்கிறது. எனது தந்தை இந்த தொழிலை என்னிடம் கொடுத்த போது மாடுகளின் எண்ணிக்கை விரைவாக அதிகரித்தது. என் தந்தையால் இருசக்கர வாகனம் ஓட்ட முடியாது. எனது தம்பியும் சிறியவன்.

எனவே நானே இரு சக்கர வாகனத்தில் சென்று பால் சப்ளை செய்யவேண்டியிருந்தது. காலையில் அனைத்து சிறுமிகளும் பள்ளிக்கு தயாராகிக்கொண்டிருப்பார்கள். ஆனால் நான் காலையிலேயே மாடுகளிடமிருந்து பால் எடுப்பது மற்றும் இரு சக்கர வாகனத்தில் தெருத்தெருவாக சென்று பால் சப்ளை செய்து கொண்டிருப்பேன்.ஆரம்பத்தில் இரு சக்கர வாகனத்தில் சென்று பால் சப்ளை செய்வது வெட்கமாக இருந்தது.

எங்களது ஊரில் பெண்கள் யாரும் இரு சக்கர வாகனமே ஓட்டமாட்டார்கள். நான் இரு சக்கர வாகனத்தில் சென்று பால் விற்பனை செய்வதை பார்த்து சிலர் என்னை உற்சாகப்படுத்தி இருக்கின்றனர். எங்களிடம் இருந்த மாடுகளின் எண்ணிக்கை 12 ஆக அதிகரித்ததால் மாடுகளுக்கு தனியாக கொட்டகை கட்டினேன்.

2015-ம் ஆண்டு நான் 10-வது வகுப்பு படித்துக்கொண்டிருந்த போது தினமும் 150 லிட்டர் பால் சப்ளை செய்தேன். 2016-ம் ஆண்டு மாடுகளின் எண்ணிக்கை 45 ஆக அதிகரித்தது. ஒவ்வொரு மாதமும் 3 லட்சம் அளவுக்கு வருமானம் கிடைத்தது. மாடுகளின் எண்ணிக்கை அதிகரித்ததால் சவால்களும் அதிகரித்தது. அதிக அளவில் தீவனம் தேவைப்பட்டது. எங்களது தோட்டத்தில் கிடைத்த தீவனம் போதுமானதாக இல்லை.

எனவே வெளியில் இருந்தும் வாங்க ஆரம்பித்தேன். இதனால் லாபமும் குறைந்தது. இதனால் தீவனம் எங்கு குறைந்த விலையில் கிடைக்கிறது என்பதை தேடிப்பார்த்து வாங்க ஆரம்பித்தோம். மாடுகளின் எண்ணிக்கை 80 ஆக அதிகரித்துள்ளது. இதன் மூலம் தினமும் 450 லிட்டர் பால் கிடைத்தது. மாடுகளுக்கு இட பற்றாக்குறை ஏற்பட்டதால் ஏற்கனவே இருந்த ஷெட்டில் மேல் மாடியை கட்டி அங்கு சில மாடுகளை மாற்றினோம்.

எனது தம்பி கொட்டகையை சுத்தம் செய்வது உட்பட சில வேலைகளை கவனித்துக்கொள்வான். நான் தனியாகவே 20 மாடுகளிடம் பால் கரந்துவிடுவேன். வேலைக்கும் ஆட்கள் வைத்திருக்கிறேன். பால் பண்ணையை கவனித்துக்கொண்டாலும் படிப்பை கைவிடவில்லை. கிராமத்தில் இருந்துகொண்டே கல்லூரி படிப்பை தொடர்ந்தேன். தற்போது மண்புழு உரம் தயாரிக்கும் தொழிலையும் செய்து வருகிறோம்.

ஒவ்வொரு மாதமும் 30 ஆயிரம் கிலோ மண்புழு உரம் சி.எஸ் அக்ரோ ஆர்கானிஸ் என்ற பெயரில் விற்பனை செய்கிறோம். அதோடு மாட்டுச்சாணத்தில் இருந்து பயோகேஸ் தயாரித்துக்கொண்டிருக்கிறோம். தற்போது பால் பக்கத்து பண்ணைகளுக்கு சப்ளை செய்யப்பட்டு வருகிறது. பால் மற்றும் மண்புழு உரம் விற்பனை மூலம் ஆண்டுக்கு ஒரு கோடி ரூபாய் வருமானம் கிடைக்கிறது” என்று தெரிவித்தார்.

மாட்டுப்பண்ணையையும் பார்த்துக்கொண்டே தனது எம்.எஸ்.சி.படிப்பையும் முடித்துள்ள ஸ்ரத்தா முன்னேற நினைக்கும் பெண்களுக்கு ஒரு முன்மாதிரியாக திகழ்ந்து வருகிறார். பால் பண்ணையில் கிடைத்த பணம் முழுவதையும் தொடர்ந்து மீண்டும் அதிலேயே முதலீடு செய்த ஸ்ரத்தா இதன் மூலம் வெளியில் கடன் வாங்குவதையும் தவிர்த்துள்ளார். மாடுகள் வாங்குவதாக இருந்தாலும், தீவனம் வாங்குவதாக இருந்தாலும் குறைந்த விலையில் கொடுக்கும் வியாபாரிகளை தேடிக்கண்டுபிடித்து வாங்குவதை வழக்கமாக கொண்டுள்ளார்.

இந்தியாவில்..

சொத்துக்காக அண்ணன் தனது உடன்பிறந்த 2 சகோதரிகளை விஷம் கொடுத்து கொலை செய்துள்ள பயங்கரம் சம்பவம் மகாராஷ்டிரா மாநிலத்தில் அரங்கேறி உள்ளது.மகாராஷ்டிரா மாநிலத்தில் உள்ள ராய்காட் மாவட்டம், அலிபாக் பகுதியில் வசித்து வருபவர் கணேஷ் மோகித்- இவரின் சகோதரி சோனாலி சங்கர் மோஹித் (வயது 34).

கடந்த அக்டோபர் 16 ஆம் தேதி திடீரென உடல் நலக்குறைவு ஏற்பட்டு, மருத்துவமனையில் அனுமதி செய்யப்பட்டடார். அங்கு சிகிச்சை பலனின்றி உயிரிழந்தார். அதற்கு அடுத்த நாள் சோனாளியின் தங்கையான சினேகா சங்கர் மோஹித் (வயது 30), அதே மருத்துவமனையில் அனுமதிக்கப்பட்டார். அங்கு அவர் சிகிச்சை பெற்று வந்த நிலையில், மேல் சிகிச்சைக்காக பன்வேலில் உள்ள எம்ஜிஎம் மருத்துவமனைக்கு அனுப்பி வைக்கப்பட்டார்.

அவர் அக்டோபர் 20ஆம் தேதி உயிரிழந்தார்.உயிரிழப்பதற்கு முன்னதாக சினேகா அதிகாரிகளிடம் தனது மரணத்தில் சந்தேகம் உள்ளது. எனது சகோதரரின் மீது நாங்கள் சந்தேகப்படுகிறோம். எனது அக்காவின் மரணத்திலும் மர்மம் உள்ளது. எங்களது உணவில் விஷப்பொருள் ஏதேனும் கலந்திருப்பார் என கூறியிருக்கிறார்.

இதனையடுத்து, களத்தில் இறங்கிய காவல்துறையினர் நடத்திய விசாரணையில், சொத்துக்காக சொந்த தங்கைகளே அண்ணனை கொலை செய்த பயங்கரம் தெரியவந்தது. அதாவது, கடந்த 2009 ஆண்டு கணேஷ் மோகித்தின் தந்தை வனத்துறையில் பணியாற்றி மறைந்துள்ளார். அவரது வேலையை கருணை அடிப்படையில் பெற்றுக் கொள்ள தாய் தனது மகள்களுக்கு அளிக்க விரும்பியுள்ளார்.

மேலும், அவரின் பெயரில் உள்ள பணத்தை மகனிடம் கொடுக்கவும், சொத்துக்களை சரி பங்காக மூவருக்கு பிரிக்கவும் எண்ணி இருக்கிறார்.இதில் விருப்பமில்லாத கணேஷ் முதலில் சம்மதிப்பது போல நடித்து, பின் பிரச்சனை செய்ய தொடங்கி இருக்கிறார். மேலும், போலியான ஆவணங்கள் கொண்டு சொத்துக்களை தனது பெயருக்கு மாற்றவும், வனத்துறை வேலையை தான் வாங்கவும் முயற்சிகள் நடைபெற்ற நிலையில், அவை தோல்வியுற்றன.

இறுதியாக அனைவரும் ஒன்று சேர்ந்து தந்தையின் பணி மற்றும் வருவாயை பிரித்துக் கொள்ளலாம் என பேச்சுவார்த்தை நடந்த நிலையில், சொத்துக்களை பிரிக்க மனம் இல்லாத கணேஷ் தனது தங்கைகளை கொலை செய்ய திட்டமிட்டு இருக்கிறார். அவரின் திட்டப்படி உணவில் எலி மருந்து கலந்து கொடுத்து கொலை கொலை செய்தது தெரியவந்துள்ளது. இந்த அதிர்ச்சி தகவலை விசாரணையில் உறுதிப்படுத்திய காவல்துறையினர், கொலைகளை செய்த கணேசனை கைது செய்து சிறையில் அடைத்தனர்.

இந்தியாவில்..

இந்தியாவின் வாக் பக்ரி நிறுவன இயக்குனர் பராக் தேசாய், தெருநாய்கள் தாக்குதலின்போது படுகாயமடைந்து உயிரிழந்த சம்பவம் அதிர்ச்சியையும், சோகத்தையும் ஏற்படுத்தியுள்ளது.

வாக் பக்ரி நிறுவனத்தின் நிர்வாக இயக்குனர் பராக் தேசாய் (49).குஜராத்தைச் சேர்ந்த தொழிலதிபரான இவர், 30 ஆண்டுகளுக்கும் மேலாக தொழில்முனைவோர் அனுபவம் உடைவர்.

இந்திய தொழில் கூட்டமைப்பு (CII) போன்ற முன்னணி தொழில் தளங்களில் தீவிரமாக களமாடிய பராக், இந்திய தொழில்துறையின் மரியாதைக்குரிய குரலாகவும் இருந்தார்.

இந்த நிலையில் கடந்த 15ஆம் திகதி, தனது வீட்டு வாசலில் தன்னைத் தாக்கிய தெரு நாய்களை விரட்ட முயன்றுள்ளார். அப்போது அவர் கீழே விழுந்து படுகாயமுற்றார்.இதனைக் கண்ட தேசாயின் குடும்பத்தினர் அவரை மருத்துவமனைக்கு கொண்டு சென்றனர்.

அங்கு அவருக்கு தீவிர சிகிச்சை அளிக்கப்பட்டது. ஆனால், மூளையில் ஏற்பட்ட இரத்தக் கசிவு காரணமாக நேற்றைய தினம் பராக் தேசாய் உயிரிழந்தார்.பராக் தேசாயின் இறப்புக்கு அரசியல் கட்சி தலைவர்கள் மற்றும் தொழிலதிபர்கள் உட்பட பலரும் இரங்கல் தெரிவித்து வருகின்றனர்.

இந்தியாவில்..

இந்தியாவின் கேரள மாநிலத்தில் மகளே தந்தைக்கு மறுமணம் செய்து வைத்த நெகிழ்ச்சி சம்பவம் நடந்துள்ளது.கேரள மாநிலம் பத்தினம்திட்டாவின் திருஏறங்காவு பகுதியைச் சேர்ந்தவர் ராதாகிருஷ்ண குருப் (62).இவரது மனைவி கடந்த ஒன்றரை ஆண்டுக்கு முன்பு மாரடைப்பால் உயிரிழந்தார். இதனால் ராதாகிருஷ்ண குருப் விரக்தியில் இருந்துள்ளார்.

தந்தையின் நிலையை கண்டு கவலையுற்ற குருப்பின் மகள் ரெஞ்சு, அவருக்கு இரண்டாவது திருமணம் செய்து வைக்க வேண்டும் என முடிவெடுத்தார்.

இதற்காக அவர் திருமண வரன் பார்க்கக்கூடிய இணையதளங்களில் தந்தைக்கு துணையை தேடினார். அப்போது கணவரை இழந்து தனிமையில் வாழ்ந்து வந்த மல்லிகா குமாரி (60) என்பவரை பற்றிய விவரம் தெரிய வந்துள்ளது.

அதனைத் தொடர்ந்து அவர் தனது தந்தைக்கு சரியான பொருத்தமாக இருப்பார் என நினைத்த மகள் ரெஞ்சு, அவரது குடும்பத்தினரை தொடர்புகொண்டு பேசி, பின் திருமணத்திற்கு ஏற்பாடு செய்துள்ளார்.

இருவரது குடும்பத்தினரும் ஒன்றுகூடி ராதாகிருஷ்ண குருப்புக்கும், மல்லிகா குமாரிக்கும் திருமணம் செய்து வைத்தனர். இந்த திருமணத்தில் இருவரது உறவினர்களும் சேர்த்து 50 பேர் கலந்து கொண்டனர்

பீகாரில்..

பீகார் மாநிலம் ஜெகனாபாத் மாவட்டத்தில் வசித்து வருபவர் கஜேந்திர யாதவ். இவர், தலைநகர் பாட்னாவில் அக்டோபர் 19ம் தேதி வியாழக்கிழமை ஹோட்டலில் அறை முன்பதிவு தங்கியிருந்தார். அவரை சந்திக்க அவரது மனைவி ஷோபா குமாரி காலையில் அறைக்கு தேடி வந்தார்.

மனைவி வந்த சில நிமிடங்களிலேயே கஜேந்திர யாதவ் வெளியே சென்றிருக்கிறார். அப்போது ஹோட்டல் ஊழியரிடம் காலை உணவு வாங்கிவரப் போவதாகவும் சிறிது நேரத்தில் திரும்பி வந்துவிடுவதாகவும் சொல்லிவிட்டுச் சென்றார்.

நீண்ட நேரம் ஆகியும் அறைக்குத் திரும்பவில்லை. இதனையடுத்து ஹோட்டல் ஊழியர் அவரது அறைக்குச் சென்று பார்த்தபோது, ​​அங்கு அவரது மனைவி ஷோபா உடலில் ஆடையின்றி ரத்த வெள்ளத்தில் சடலமாகக் கிடந்தார்.

இதனைக்கண்டு அதிர்ச்சி அடைந்த ஊழியர் நிர்வாகிக்கு தகவல் கொடுத்தார். அவர் உடனடியாக காவல்துறைக்கு அளித்த தகவலின் பேரில் போலீசார் விரைந்து வந்தனர். அவரது உடலை கைப்பற்றி பிரேத பரிசோதனைக்கு அனுப்பியுள்ளனர்.

ரத்த வெள்ளத்தில் பிணமாக கிடந்த ஷோபா குமாரி மாநில காவல்துறையில் கான்ஸ்டபிளாக பணிபுரிந்தவர் என்பதுகுறிப்பிடத்தக்கது. இக்கொலைச் சம்பவம் குறித்து போலீசார் வழக்குப் பதிவு செய்து விசாரணை நடத்தி வருகின்றனர்.

மாயமாகியுள்ள கஜேந்திர யாதவையும் போலீசார் தேடி வருகின்றனர். முதற்கட்ட விசாரணையில், அந்தப் பெண்ணின் தலையில் துப்பாக்கியால் சுடப்பட்டதாகத் தெரிகிறது .

ஹோட்டல் அறையில் இருந்து ஆயுதங்களையும் போலீசார் மீட்டுள்ளனர். அவர் ஹோட்டல் அறையில் தனது கணவரை எந்தச் சூழ்நிலையில் சந்தித்தார் என்பதையும் போலீசார் விசாரித்து வருகின்றனர். . இந்த வழக்கை மேலும் முறையாக விசாரிக்க சிறப்பு தொழில்நுட்ப குழுக்களையும் காவல்துறை அமைத்துள்ளது.