இந்தியாவில்..

இந்தியாவின் வட மாநிலங்களில் ஏற்பட்டுள்ள கடும் வெப்பநிலை காரணமாக, கடந்த சில நாள்களில் 98 பேர் உயிரிழந்துள்ளதாக இந்திய அரச புள்ளிவிபரவியல் திணைக்களம் தெரிவித்துள்ளது.

இன்றைய தினம் (18.06.2023) வெளியிடப்பட்டுள்ள புள்ளிவிபரவியலில், வட மாநிலங்களில் கோடையின் தாக்கம் இன்னும் தீவிரமாக உள்ளதாகவும் கூறப்படுகின்றது.

உத்தரப் பிரதேசத்தின் பல்லியா பகுதியில் ஜூன் 15-17 திகதிகளில் தீவிர வெப்பத்தால் உடல் நலக்குறைவு ஏற்பட்டு சுமார் 400 பேர் மருத்துவமனையில் அனுமதிக்கப்பட்டுள்ளனர்.

இதில் 54 பேர் இதுவரை உயிரிழந்துள்ளனர். உயிரிழந்தவர்களில் பெரும்பாலானோர் 60 வயதைக் கடந்தவர்கள் என அப்பகுதியின் தலைமை மருத்துவ அதிகாரி ஜெயந்த் குமார் தெரிவித்துள்ளார்.

பெரும்பாலானோர் மாரடைப்பு, மூளை நரம்பு அடைப்பு, வயிற்றுப் போக்கு ஆகிய பிரச்சினைகளுக்குள்ளாகி உயிரிழந்துள்ளனர். இந்த பகுதிகளில் வழக்கத்தை விட 4.7 டிகிரி வெப்பம் கூடுதலாக இருந்துள்ளது.

அதேபோல பீகாரிலும் தீவிர வெப்பம் காரணமாகக் கடந்த 24 மணி நேரத்தில் 44 உயிரிழப்புகள் பதிவாகியுள்ளன. அம்மாநில தலைநகர் பட்னாவில் மட்டும் 35 பேர் உயிரிழந்துள்ளனர்.

அங்கு நேற்றைய தினம் (17.06.2023) வெப்பம் 44.7 டிகிரி வரை சென்று உச்சம் தொட்டுள்ளதாக அதிகாரிகள் தெரிவித்துள்ளனர். பீகார் மாநிலத்தில் வெப்ப அலை தீவிரமாக வீசுவதால் அங்குள்ள அனைத்து பாடசாலைகளுக்கும் ஜூன் 24ஆம் திகதி வரை விடுமுறை அளிக்கப்பட்டுள்ளது.

அதேவேளை மத்தியப் பிரதேசத்திலும் ஜூன் 30 வரை பள்ளிகளுக்கு விடுமுறை அளிக்கப்பட்டுள்ளது. நாட்டின் கிழக்கு, மத்திய கிழக்குப் பகுதிகளில் அடுத்து 3-4 நாள்கள் தீவிர வெப்ப அலை வீசும் என இந்திய வானிலை ஆய்வு மையம் தெரிவித்துள்ளது.

ஒடிசா, ஜார்கண்ட், பீகார், மேற்கு வங்கம், கிழக்கு உத்தரப் பிரதேசம், தெலங்கானா, சத்தீஸ்கர் கடலோர ஆந்திரா ஆகிய மாநிலங்களுக்கு வெப்ப அலை எச்சரிக்கை விடுத்துள்ளது. குறிப்பாகப் பீகாரின் பல பகுதிகளுக்கு ரெட் அலெர்ட் எச்சரிக்கை கொடுக்கப்பட்டுள்ளமை குறிப்பிடத்தக்கது.

நயினாதீவில்..

வரலாற்று பிரசித்தி பெற்ற யாழ்ப்பாணம் நயினாதீவு நாகபூஷணி அம்மன் வீதியில் இன்று நாகங்கள் வலம் வந்து காட்சி கொடுத்த சம்பவம் நயினை அம்பாள் பக்தர்களை மெய்சிலிர்க்க வைத்துள்ளது.

நயினாதீவு நாகபூஷணி அம்மன் ஆலய நாளை மறுதினம் 19.06.2023 கொடியேற்றத்துடன் ஆரம்பமாகவுள்ளது. இந்த நிலையில் இன்று ஆலய வீதியில் மூன்று நாகங்கள் வலம் வந்து படம் எடுத்து காட்சி கொடுத்துச் சென்றது.

இந்நிலையில் ஆலய திருவிழா ஆரம்பமாகவுள்ள நிலையில் அம்மனை நாடிவந்த நாகங்கள் பக்தர்களுக்கு காட்சி அளித்து சென்றுள்ளமை அன்னையின் அருளை எடுத்தியம்பி நிற்கின்றது.

அதேவேளை நயினாதீவு ஸ்ரீ நாகபூசணி அம்மன் ஆலயத்துக்கு வருடா வருடம் மகோற்சவத்திற்கு முன்னர் அம்பாள் நாகவடிவில் காட்சி கொடுப்பார் என்பதும் காலங்காலமாக இடம்பெறுவது வழமை என நயினை அம்மன் பக்தர்கள் கூறுகின்றனர்.

அதேவேளை இலங்கையின் வரலாறு கூறும் மகாவம்சம் என்னும் நூலில் நயினாதீவு பற்றிய பல குறிப்புகள் உள்ளன. புத்தர் வாழ்ந்த காலத்தில் இலங்கையில் ஆட்சிபுரிந்த இரண்டு நாக அரசர்களுக்கிடையில் ஒரு மணியாசனத்தின் உரிமை தொடர்பாக ஏற்பட்ட பிணக்கைத் தீர்த்து வைப்பதற்காக அவர் நாகதீபத்துக்கு வந்ததாக மகாவம்சம் கூறுகிறது.

இதே பிணக்கு/யுத்தம் ‘மணிபல்லவத்தில்’ இடம்பெற்றது என்று ‘மணிமேகலை’க் காப்பியம் கூறுகின்றது. நயினாதீவுக்கு முற்காலத்தே பல பெயர்கள் வழங்கப்பட்டனவென்று வரலாறுகள் கூறுகின்றன.

அதன்படி இத்தலத்திற்கு நாகதிவயின, நாகதீவு அல்லது நாகத்தீவு, நயினார்தீவு, நாகநயினார்தீவு, மணிநாகதீவு, மணிபல்லவத் தீவு, மணித்தீவு, பிராமணத்தீவு, ஹார்லெம் (Haorlem), சம்புத்தீவு, நரித்தீவு, நாகேஸ்வரம், நாகேச்சரம் முதலிய பல பெயர்கள் உள்ளன.

தெலங்கானாவில்..

தெலங்கானாவில் இளம்பெண் ஒருவரை, அவரது உறவினர் ஒருவர் கொடூரமாக குத்திக் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. தெலங்கானா மாநிலம் விகாபாரத் பகுதியில் உள்ள கல்லாபூர் கிராமத்தைச் சேர்ந்தவர் ஸ்ரீஷா (22).

இவர் செவிலியராக பணியாற்றி வருகிறார். இந்நிலையில், இவரது தயாராருக்கு உடல்நலக்குறைவு ஏற்பட்டதாக ஹைதரபாத்தில் உள்ள மருத்துவமனையில் கடந்த சில நாட்களாக சிகிச்சை பெற்று வருகிறார். இதனால் அவரது தாயாரை மருத்துவமனையில் இருந்து கவனித்து கொண்டு வந்துள்ளார் ஸ்ரீஷா.

இந்நிலையில், ஸ்ரீஷாவின் தந்தை ஐங்கையா, மகளை ஊருக்கு வருமாறு அழைத்துள்ளார். விட்டுக்கு வந்த ஸ்ரீஷா வேலைகளை செய்யாமல் செல்போனை பயன்படுத்தி கொண்டிருந்துள்ளார். இதனால் ஆத்திரமடைந்த ஐங்கையா, ஸ்ரீஷாவை கடுமையாக திட்டியுள்ளார்.

இதனால் கோபத்தில் ஸ்ரீஷா வீட்டை விட்டு வெளியேறியுள்ளார். வெளியே சென்ற ஸ்ரீஷா நள்ளிரவு ஆகியும் வீட்டிற்கு திரும்பாமல் இருந்துள்ளார். இதனால் ஐங்கையா அருகில் இருக்கும் காவல்நிலையத்தில் புகார் அளித்துள்ளார்.

இதனால் போலீசார் தீவிர விசாரணை மேற்கொண்டனர். ஜூன் 10ஆம் தேதி ஸ்ரீஷா மாயமான நிலையில், மறுநாள் நண்பகல் ஒரு குளத்தில் அவரது சடலம் கண்டெடுக்கப்பட்டுள்ளது.

அப்போது, ஸ்ரீஷாவின் உடலில் பலத்த காயம் ஏற்பட்டுள்ளது. அதுமட்டுமின்றி, அவரது கண்கள் ஸ்குரூ டிரைவரால் குத்தப்பட்டு, கழுத்து பிளேடால் அறுக்கப்பட்டு கொடூரமாக முறையில் அவர் கொலை செய்யப்பட்டுள்ளார்.

இந்த கொடூர கொலை தொடர்பாக வழக்குப்பதிவு செய்து கொலைக்கான காரணம் குறித்து விசாரித்து வந்தனர். அப்போது சில திடுக்கிடும் தகவல்கள் வெளியாகின. அதன்படி, ஸ்ரீஷாவின் உறவினர் அனில். இவர் ஸ்ரீஷாவை காதலித்து வந்துள்ளார். இதுபற்றி ஸ்ரீஷாவிடம் பல முறை கூறியுள்ளார்.

மேலும், தன்னை திருமணம் செய்து கொள்ள வேண்டும் என ஸ்ரீஷாவிடம் தொடர்ந்து வற்புறுத்தியுள்ளார். இதற்கு ஸ்ரீஷா மறுப்பு தெரிவித்து வந்துள்ளார். மேலும், உடலுறவு கொள்ள வேண்டும் என்றும் வற்புறுத்தி வந்துள்ளார்.

இதற்கிடையில், ஸ்ரீஷா வீட்டை விட்டு வெளியே வந்ததை அறிந்த அனில், அன்றைக்கு ஸ்ரீஷாவிடம் உடலுறவு கொள்ள வேண்டும் என்று மீண்டும் வற்புறுத்தி வந்துள்ளார். இதனால் இருவருக்கு வாக்குவாதம் ஏற்பட்டுள்ளது.

அப்போது, குடிபோதையில் இருந்த அனில், தான் வைத்திருந்த பீர் பாட்டிலால் ஸ்ரீஷாவை அடித்து, கண்களை ஸ்குரூ டிரைவரால் குத்தியுள்ளார். மேலும், குளத்தில் முழ்கடித்து கொலை செய்துள்ளதாக வாக்குமூலம் அளித்தார்.

இதனை அடுத்து, போலீசார் குற்றச்சாட்டப்பட்ட அனிலை கைது செய்து சிறையில் அடைத்தனர். மேலும், இளம்பெண் கொலை வழக்கில் தேசிய மகளிர் ஆணையம் தாமாக முன்வந்து விசாரணை செய்ய திட்டமிட்டுள்ளது. மேலும், மாநில டிஜிபியிடம் விரிவான அறிக்கையை கோரியுள்ளது என்பது குறிப்பிடத்தக்கது.

பெங்களூருவில்..

இன்றைய காலக்கட்டத்தின் வாழ்க்கை முறையே மாறிவிட்டது என்று கூறலாம்.. திருமணத்துக்கு முன்பே லிவிங் டூகெதர் என்ற வாழ்வியல் முறையில் இளைஞர்- இளம்பெண் சேர்ந்து வாழ்ந்து வருகின்றனர்.

கிட்டதட்ட கணவன் – மனைவியாக வாழ்ந்துவிடுகின்றனர். பலர் இந்த வாழ்க்கைக்கு பிறகு இல்லற வாழ்க்கையில் சேர்ந்தாலும், பலரின் கதைகள் கொடூரமாக தான் முடிகிறது.

அப்படியொரு நிகழ்வுதான் கர்நாடகா மாநிலம் பெங்களூருவில் நடந்து பெரும் பரபரப்பை ஏற்படுத்தியுள்ளது. அகான்ஷா என்ற 23 வயது இளம்பெண், தனியார் நிறுவனத்தில் மேலாளராக பணியாற்றி வந்தார். இதே நிறுவனத்தில் பணியாற்றிய ஆர்பித் ( 27 ) என்பவருடன் அகான்ஷாவுக்கு பழக்கம் ஏற்பட்டது.

முதல் நட்பாக பழகினாலும் அதன்பின்னர் இருவருக்கும் இடையே நெருக்கம் ஏற்பட்டது. இதனால் இருவரும் ஒரே வீட்டில் லிவிங் டூகெதர் ரிலேஷன்ஷிப்பில் வாழ்ந்தனர். ஆனால் சிறிது காலத்தில் இருவருக்கும் இடையே கருத்து வேறுபாடு ஏற்பட்டது. இதனால் அவர்களுக்குள் அடிக்கடி தகராறு ஏற்பட்டது.

இந்த நிலையில் அகான்ஷாவுடன் கடந்த கடந்த 5 ஆம் தேதி ஏற்பட்ட வாக்குவாதம் முற்றியது. இருவரும் மாறிமாறி குற்றம்சாட்டி பேசிய நிலையில், ஆத்திரம் அடைந்த ஆர்பித் இளம்பெண் அகான்ஷாவை கடுமையாக தாக்கினார். இதில் அவர் உயிரிழந்த நிலையில் ஆர்பித் அங்கிருந்து தப்பியோடினார்.

சந்தேகம் அடைந்த அக்கம்பக்கத்தினர் அளித்த தகவலின்பேரில் போலீசார் அங்கு சென்று பார்த்தனர். அப்போது இளம்பொண் கொல்லப்பட்டு சடலமாக கிடப்பதை பார்த்து அதிர்ந்தனர். உடலை மீட்ட போலீசார் விசாரணை நடத்தினர்.

முதல்கட்ட விசாரணையின்போது, இளைஞர் அகான்ஷாவை கொலை செய்த பின்னர், அதை தற்கொலையாக மாற்ற திட்டம்போட்டார். இதற்காக சீலிங் ஃபேனில் அவரது சடலத்தை ஆர்பித் தொங்கவிட முயற்சித்தார்.

இது தோல்வியில் முடிந்தது. இதனால் அங்கிருந்து தப்பியோடினார். ஆனால் அவரது செல்போனை அங்கேயே விட்டு விட்டு சென்றது போலீசாருக்கு முக்கிய தடயமாக கிடைத்தது.

இளைஞர் ஆர்ப்த் தனது சொந்த ஊரான டெல்லிக்கு சென்றிருக்கலாம் என்பதால் தனிப்படையினர் அங்கு விரைந்து அவரை தேடி வருகின்றனர். இந்த கொலை பெங்களூருவில் பெரும் பரபரப்பை ஏற்படுத்தியுள்ளது.

புதுக்கோட்டையில்..

புதுக்கோட்டை மாவட்டம் கந்தர்வகோட்டை அருகே ஒரே சமூகத்தைச் சேர்ந்த காதலர்களுக்கு திருமணம் செய்து வைக்க பெற்றோர்கள் எதிர்ப்பு தெரிவித்ததால், தங்களுக்கு திருமணம் செய்து வைக்கக் கோரி கந்தர்வகோட்டை மார்க்சிஸ்ட் கம்யூனிஸ்ட் கட்சி எம்எல்ஏவை அந்தக் காதலர்கள் நாடிய நிலையில், உடனடியாக சட்டமன்ற உறுப்பினர் அலுவலகத்திலேயே அவர்களுக்கு திருமணம் செய்து வைக்கப்பட்டது.

புதுக்கோட்டை மாவட்டம் கந்தர்வகோட்டை அருகே உள்ள அரியாணிப்பட்டியைச் சேர்ந்தவர் சிவராஜ் (30). இவர் அரவம்பட்டியைச் சேர்ந்த சொர்ணபாப்பா (23) என்ற பெண்ணை கடந்த சில ஆண்டுகளாக காதலித்து வந்துள்ளார்.

இவர்கள் இருவரும் ஒரே சமூகத்தை சேர்ந்தவர்கள் என்றாலும் இரு வீட்டைச் சேர்ந்த பெற்றோரும் இவர்களது காதலுக்கு எதிர்ப்பு தெரிவித்து திருமணம் செய்து வைக்க மறுப்பு தெரிவித்து வந்துள்ளனர்.

இதனால் இவர்களுக்கு திருமணம் செய்து வைக்க யாரும் முன் வராவில்லை. இனியும் பெற்றோரை நம்பினால் தங்களை பிரித்துவிடுவார்கள் என்று எண்ணிய காதல் ஜோடி, அடுத்து என்ன செய்யலாம் என்று யோசித்தது.

இதைத் தொடர்ந்து தங்களுக்கு திருமணம் செய்து வைக்கக் கோரி கந்தர்வகோட்டை மார்க்சிஸ்ட் கம்யூனிஸ்ட் கட்சி சட்டமன்ற உறுப்பினர் சின்னத்துரையை நாடியுள்ளனர்.

இதனையடுத்து எம்எல்ஏ சின்னத்துரை உடனடியாக அரவம்பட்டி ஊராட்சி மன்ற தலைவர் சசிகுமார் மற்றும் அரியாணிப்பட்டி ஊராட்சி மன்ற தலைவர் ரமேஷ் ஆகியோரை சட்டமன்ற உறுப்பினர் அலுவலகத்திற்கு வரவழைத்தார்.

அவர்களது முன்னிலையில் சிவராஜ் மற்றும் சொர்ண பாப்பாவிற்கு எம்எல்ஏ சின்னத்துரை காதல் திருமணத்தை நடத்தி வைத்தார். மேலும் இதில் மார்க்சிஸ்ட் கம்யூனிஸ்ட் கட்சியை சேர்ந்த பலரும் பங்கேற்றனர்.

காதலுக்கு பெற்றோர்கள் எதிர்ப்பு தெரிவித்து திருமணம் செய்து வைக்க மறுப்பு தெரிவித்து வந்த நிலையில் கந்தர்வகோட்டை எம்எல்ஏ சின்னதுரை எம்எல்ஏ அலுவலகத்திலேயே வைத்து காதல் ஜோடிக்கு திருமணம் செய்து வைத்தது பலரது கவனத்தை ஈர்த்துள்ளது. பெற்றோர் தரப்பில் சமாதானப்படுத்தி மணமக்களை அவர்கள் ஏற்றுக் கொள்வதற்கான நடவடிக்கைகளில் ஊராட்சி தலைவர்கள் ஈடுபட்டுள்ளனர்.

ஆந்திராவில்..

ஆந்திரா மாநிலம் விசாகப்பட்டினத்தில் ஜகதம்பா என்ற பகுதியில் ஷிராவாணி என்ற பெண் தனது கணவருடன் வசித்து வந்தார். இளம்தம்பதியான இவர்கள் இருவரும் இல்லற வாழ்க்கையில் மிகவும் மகிழ்ச்சியாக வசித்து வந்தனர். ஆனால் இந்த மகிழ்ச்சி குடும்பத்தில் நெடுகாலம் நீடிக்கவில்லை.

திருமணம் முடிந்த சில மாதங்களில் ஷிராவாணிக்கு வேறு ஆண்களுடன் பழக்கம் ஏற்பட்டது. இதனால் தம்பதி இடையே கடும் மோதல் ஏற்பட்டது. ஒருகட்டத்தில் கருத்து வேறுபாடு இருவரும் பிரிந்து தனித்தனியாக வாழத் தொடங்கினர்.

இதனையடுத்து தனியாக வசித்த சிலாவணி, அங்குள்ள ஒரு கடையில் பணிபுரிந்து வந்தார். அங்கு கோபாலகிருஷ்ணா என்ற இளைஞருடன் ஷிராவாணிக்கு நட்பு ஏற்பட்டது.

இந்த நட்பு காதலமாக மாறியதால் இருவரும் நெருக்கமாக பழகினர். ஒரு கட்டத்தில், இருவரும் தனியாக ஒரு வீட்டில் ஒன்றாக கணவன் மனைவியாகவே வாழ்ந்தார்கள். சில மாதங்களில் ஷிராவாணியின் செயல்பாடுகளில் கோபாலகிருஷ்ணனுக்கு சந்தேகம் எழுந்தது.

மற்ற ஆண்களுடன் நெருக்கமாக பழகி வந்ததால் ஷிராவாணியை அவர் கண்டித்தார். இதன் அடிப்படையில் இருவருக்கும் இடையே தகராறு ஏற்பட்டது. எனினும், ஷிராவாணி எப்போதும் செல்போனில் பேசிக்கொண்டே இருந்தார். செல்போனில் பல ஆண்களுடன் எடுத்த புகைப்படங்கள் இருந்தது.

இதனால் பொறுக்க முடியாமல் கோபால கிருஷ்ணன் பலமுறை கண்டித்துள்ளார். ஆனால் ஷிராவாணி தன் காதலர்களிடம் பேசுவதை நிறுத்தவில்லை. இதனால் ஆத்திரமடைந்த கோபாலகிருஷ்ணன் வெளியேற முடிவுசெய்தார்.

இருப்பினும் கடைசியாக பேசிப்பார்க்க இருவரும் விசாகப்பட்டினம் கடற்கரை சாலைக்கு சென்றனர். அதிகாலை 2 மணிக்கு கோகுல் பூங்காவிற்கு அழைத்துச் செல்லப்பட்ட நிலையில், அங்கு பேசிக்கொண்டிருந்த போது அவர்களுக்குள் திடீரென வாக்குவாதம் ஏற்பட்டது.

அப்போது ஆத்திரம் அடைந்த கோபாலகிருஷ்ணனா, ஷிராவாணியை கழுத்தை நெரித்து கொலை செய்தார். இதையடுத்து கோபாலகிருஷ்ணா நேராக போலீசில் சென்று சரண் அடைந்தார். அதன்பிறகே இந்த கொலை வெளிச்சத்துக்கு வந்தது. அவரை கைது செய்து விசாரணை நடத்தி வருகின்றனர்.

தேஜஸ்வினி..

ஹைதராபாத்தை சேர்ந்த 27 வயதான கொந்தம் தேஜஸ்வினி என்ற பெண் லண்டன் வெம்ப்லியில் கத்தியால் குத்தி கொல்லப்பட்டுள்ளார். இருவர் கைது செய்யப்பட்டுள்ளதாக காவல்துறை கூறியுள்ளது.

மேற்படிப்புக்காக லண்டன் சென்றிருந்த கொந்தம் தேஜஸ்வினி, செவ்வாய்கிழமை காலை 10 மணியளவில் குடியிருப்பு வளாகத்தில், பிரேசிலியாவை சேர்ந்த ஒருவரால் கொல்லப்பட்டதாக கூறப்படுகிறது. வெம்ப்லியில் உள்ள நீல்ட் கிரசன்ட் பகுதியில் இந்த சம்பவம் நடந்துள்ளது.

ஹைதராபாத்தில் உள்ள தேஜஸ்வினியின் உறவினர், தேஜஸ்வினி தனது நண்பர்களுடன் வசித்து வந்த பகிரப்பட்ட தங்குமிடத்திற்கு ஒரு வாரத்திற்கு முன்பு குடிபெயர்ந்ததாகவும் கூறினார்.

கடந்த ஆண்டு மார்ச் மாதம் தேஜஸ்வினி முதுகலைப் பட்டம் பெற லண்டன் சென்றதாக கூறப்படுகிறது.கொலை செய்ததாக சந்தேகத்தின் பேரில் 24 வயது ஆண் மற்றும் 23 வயது பெண் ஆகிய இருவர் சம்பவ இடத்தில் கைது செய்யப்பட்டுள்ளனர்.

அந்த நபர் தொடர்ந்து காவலில் வைக்கப்பட்டுள்ளார். மேலும் எந்த நடவடிக்கையும் எடுக்காமல் அந்தப் பெண் விடுவிக்கப்பட்டுள்ளார் என்று ஒரு அறிக்கையில் தெரிவிக்கப்பட்டுள்ளது. மற்றொரு சந்தேக நபரான 23 வயது இளைஞரும் தற்போது கைது செய்யப்பட்டுள்ளார்.

மெட்ரோபொலிட்டன் காவல்துறை இதற்கு முன்னர் பிரேசில் நாட்டைச் சேர்ந்த கெவன் அன்டோனியோ லோரென்கோ டி மொரைஸின் படத்தை வெளியிட்டது என்று கூறப்படுகிறது.

மேலும் குற்றவாளிகளை கண்டுபிடிக்க பொதுமக்களின் உதவியை நாடியதாகவும் பிடிஐ செய்தி நிறுவனம் தெரிவித்துள்ளது. இந்தியாவை சேர்ந்த பெண் ஒருவர் கொல்லப்பட்ட சம்பவம் பெரும் பரபரப்பை ஏற்படுத்தி உள்ளது.