ஈரோட்டில்..

ஈரோட்டில் ஆட்டோ ஓட்டும் பெண் டிரைவர் பவானியை நேர்காணலில் சந்தித்த போது அவர் கூறிய தன்னம்பிக்கை வார்த்தைகளையும், வேதனையும் தான் இந்த தொகுப்பில் பார்க்க போகிறோம்.

ஈரோட்டில் 13 வருஷமா ஆட்டோ ஓட்டுகிறேன். எங்கள் ஊரில் பெண்கள் யாரும் ஆட்டோ ஓட்டவில்லை. அதனால், எனக்கு ஆட்டோ ஓட்டும் ஆர்வம் வந்தது. அதுமட்டுமல்லாமல், சுயமாய் வேலை செய்ய வேண்டும் என நினைத்து இந்த தொழிலில் இறங்கினேன்.

எவ்வளவோ பிரச்சனைகளை பார்த்திருக்கிறேன், சந்தித்திருக்கிறேன். எல்லோரும் என்னை திரும்பி பார்க்க வேண்டும் என்று ஆட்டோ தொழிலுக்கு வந்தேன். இன்றும் எதிர்ப்புகள் நிறைய இருந்தாலும் அதை Face பண்ணிட்டு தான் இருக்கிறேன். உதவி செய்வதற்கு என யாரும் இல்லை.

எனக்கு ஒரு மகன், மகள் இருக்கிறார்கள். என் மகன் காதல் திருமணம் செய்து இரண்டு குழந்தைகள் உள்ளனர். என்னை மதிக்காமல் தகாத வார்த்தைகளில் என் மகன் பேசுவான். ஒரு குழந்தை மட்டுமே மருமகளிடம் இருக்கிறது.

மற்றொரு குழந்தையான என் பேத்தியை அடித்து, கையை ஒடித்துவிட்டு என்னிடம் கொடுத்தார்கள். என் மருமகள் வந்துகூட பார்ப்பதில்லை. இதற்காக, கோர்ட்டில் கேஸ் கூட போய் கொண்டிருக்கிறது.

என்னிடம் பணம் கிடையாது. ஆட்டோ ஸ்டாண்டு எனக்கு கிடையாது. ஒரு நாளில் 200 ரூபாய் சம்பாதிப்பதே பெரிய விஷயமாய் இருக்கிறது. எனக்கு பஸ் ஸ்டான்டில் ஏதோ ஒரு இடத்தில் அனுமதி கொடுத்தால் போதும்.

இதனை, நான் தமிழக முதல்வரிடம் உதவியாக கேட்கிறேன். ஆண்கள் தான் பெரிய ஆட்டோக்காரர்கள் மாதிரி எங்களை விடுவதில்லை. அண்மையில், கோயம்புத்தூர் சென்றிருந்தேன். அங்கு, பல பெண்கள் ஆட்டோ ஓட்டுவதை பார்த்து எனக்கும் ஓட்ட வேண்டும் என்ற எண்ணம் வந்தது.

ஆட்டோ ஓட்டி தான் பேத்தியை பார்த்துக் கொள்கிறேன். தற்போது, பள்ளி குழந்தைகளுக்கு மட்டும் தான் ஆட்டோ ஓட்டுகிறேன். என் பேத்திக்கு என்று ஆட்டோவில் சிறிய இடம் ரெடி பண்ணியிருக்கிறேன்.

காலையில் 4 மணிக்கு எழுந்ததுமே என் பேத்திக்கு உணவு செய்து வைத்துவிடுவேன். என் பேத்தி சிறிய குழந்தையாய் இருக்கும் போதே மடியில் வைத்து தான் ஆட்டோ ஓட்டுவேன்.

குழந்தைக்கும் எனக்கும் ஆதரவு இல்லை. நாங்கள் அனாதையா தான் இருக்கிறோம். இதை தமிழக முதலமைச்சர் பார்த்து உதவி செய்ய வேண்டும். முடியலன்னு எதுமே கிடையாது.

பெண்கள் நினைத்தால் எதையும் சாதிக்கலாம் என பவானி கூறியது நெகிழ்ச்சியாக இருக்கிறது. ஆட்டோ டிரைவர் பவானியில் முழு நேர்காணலை கீழே இணைத்துள்ளேன்.

கேரளாவில்..

கேரளாவில் 15 வயது சிறுவன் ப்ரைமரி அமீபிக் மெனிங்கோஎன்செபாலிடிஸ் (PAM) என்ற அரிய பாக்டீரியா தொற்றால் உயிரிழந்துள்ளான். மூளையை உண்ணும் அமீபா என்று அழைக்கப்படும், மத்திய நரம்பு மண்டலத்தின் அபாயகரமான தொற்று Naegleria fowleriயால் ஏற்படுகிறது.

கேரளா மாநிலம், ஆலப்புழா மாவட்டத்தைச் சேர்ந்த அனில் குமார் மற்றும் ஷாலினி தம்பதியினரின் 15 வயது மகன் பத்தாம் வகுப்பு படித்து வருகிறான். அவர் சில தினங்களுக்கு முன்பு நீரோடைக்கு குளிக்க சென்றுள்ளார்.

பின்பு, அவருக்கு உடல்நிலை சரியில்லாமல் போனதால் ஆலப்புழா மாவட்ட மருத்துவ கல்லூரியில் சிகிச்சை பெற்று வந்தார். இதனையடுத்து, சில நாள்களுக்கு பிறகு சிகிச்சை பலனின்றி உயிரிழந்தார்.

மூளையை உண்ணும் அமீபா தாக்குதலால் ஏற்பட்ட அரியவகை நோயால் மாணவர் உயிரிழந்ததாக மருத்துவர்கள் தெரிவித்தனர். இந்த விவகாரம் குறித்து மருத்துவர்கள் தரப்பில், மூளையை உண்ணும் அமீபா ஏரிகள், குளங்கள், ஆறுகள் உள்ளிட்ட தேங்கி நிற்கும் நீரோடைகளில் இருப்பதற்கான வாய்ப்புகள் அதிகம்.

மாணவர் ஓடையில் குளிக்கும் போது அமீபா தொற்று ஏற்பட்டுள்ளது.ஓடையில் உள்ள Naegleria fowleri என்னும் அமீபா மனிதனின் மூக்கு வழியாக நுழைந்து மூளையை சென்றடைகிறது எனக் கூறினர்.

அங்கு, மூளையில் உள்ள செல்களை அழிக்கிறது. இந்த அரியவகை நோயால் தான் மாணவர் உயிரிழந்துள்ளார். இது முதன் முதலில் 2017 ஆன் ஆண்டு கேரளாவில் கண்டறியப்பட்டுள்ளது. பின்பு, இரண்டாவது முறையாக இந்த தொற்று ஏற்பட்டுள்ளது.

மூளையை உண்ணும் அமீபா தாக்குதலால் காய்ச்சல், தலைவலி, வாந்தி, வலிப்பு ஆகியவை இதன் அறிகுறிகளாக காணப்படுகிறது. அமீபா தாக்கி முதல் அல்லது இரண்டு வாரங்களில் இந்த அறிகுறிகள் ஏற்படும்.

பின்பு, தலைவலி அதிகமாதல், வாசனையில் மாற்றம் போன்றவை ஏற்படும். நீரின் மூலம் இந்த தொற்று ஏற்படுவதால் அசுத்தமான நீரில் குளிப்பது மற்றும் முகம் கழுவுவதை தவிர்க்க வேண்டும்.

சென்னையில்..

சென்னை ஓட்டேரி நம்மாழ்வார் பேட்டையை சேர்ந்தவர் 20 வயது இளம்பெண் அஸ்வினி. இவர் BBA படிப்பை முடித்துவிட்டு பியூட்டி பார்லரில் பணியாற்றி வந்துள்ளார்.

இந்நிலையில், பியூட்டிசனுக்கு தேவையான அழகு சாதன பொருட்களை சமூக வலைதளங்களில் தேடி வாங்கி வந்துள்ளார். அப்படி கடந்த சில மாதங்களுக்கு முன்பு சமூக வலைதளம் மூலமாக லண்டனில் வேலை பார்ப்பதாக கூறி ஒரு நபர் அறிமுகமாகி நட்பாக பேசி வந்துள்ளார்.

சமூக வலைத்தளம் மூலம் அறிமுகமான நபர் நட்பாக பழகி வந்துள்ளார். பின்னர் சில மாதங்களுக்கு பிறகு அஸ்வினியை மிகவும் பிடித்திருப்பதாக கூறியதுடன், தமிழ்நாடு திரும்பியவுடன் திருமணம் செய்து கொள்வதாகவும் ஆசை வார்த்தை கூறியுள்ளார்.

இதனையடுத்து குடும்ப சூழ்நிலை காரணமாக லண்டன் மாப்பிள்ளை ஒத்து வராது என நினைத்து அஸ்வினி அந்த நபரிடம் பேசுவதை தவிர்த்து வந்துள்ளார். இருப்பினும் அந்த நபர் தொடர்ந்து அஸ்வினிக்கு வாட்ஸ் அப் காலில் தொந்தரவு கொடுத்து வந்துள்ளார்.

இந்த நிலையில், அஸ்வினியை மீண்டும் தொடர்பு கொண்ட அந்த நபர் உங்களுக்கு 15,000 அமெரிக்கா டாலர் பரிசாக அனுப்பி இருப்பதாகவும், சென்னையில் சுங்கத்துறை அலுவலகத்தில் அந்த பார்சல் இருப்பதாக கூறியுள்ளார்.

பணம் செலுத்தினால் அந்த பார்சல் உங்கள் வீட்டுக்கு வந்து விடும் என ஆசை வார்த்தை கூறிய அந்த நபர், வங்கி கணக்கிற்கு பணம் செலுத்துமாறு கூறியுள்ளார். மேலும் பணம் செலுத்தவில்லை என்றால் பெறுநர் முகவரியில் உங்கள் பெயர், விவரம் உள்ளதால், வெளிநாட்டு போலீசார் சுங்கத்துறை அதிகாரிகள் உதவியுடன், உங்களை கைது செய்து விடுவார்கள் என அஸ்வினியை அந்த நபர் மிரட்டியுள்ளார்.

சிறிது நேரத்தில் மர்ம நபரே சுங்கத்துறை அதிகாரி போல வேறொரு எண்ணில் இருந்து அஸ்வினியிடம் பேசி கிப்ட் பார்சலுக்கு 45,000 ரூபாய் வரி செலுத்தவில்லை என்றால் உங்களை கைது செய்து விடுவோம் என மிரட்டியதாகவும் தெரிய வருகிறது.

இதனால் பயந்த அஸ்வினி 2 தவணைகளாக அவர் கூறிய வங்கி கணக்கிற்கு 25,000 ரூபாயை அனுப்பிய வைத்துள்ளார். மேலும் 45,000 ரூபாய் கேட்டு அந்த நபர் அஸ்வினிக்கு மிரட்டல் விடுத்துள்ளார். இதனால் மனமுடைந்து வேறு வழியின்றி நேற்று மாலை வீட்டில் தூக்கிட்டு தற்கொலை செய்து கொண்டார்.

தற்கொலை தொடர்பாக அஸ்வினியின் பெற்றோர் அளித்த தகவலின் பேரில் தலைமைச் செயலக காலனி போலீசார் உயிரிழந்த அஸ்வினியின் உடலை மீட்டு பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர்.

பின்னர் இளம் பெண்ணின் செல்போனை ஆய்வு செய்தபோது, மர்ம நபர் ஒருவர் மோசடியில் ஈடுபட்டது தெரியவந்தது. விசாரணையில், அஸ்வினி அறையில் இருந்து கடிதம் ஒன்றை போலீசார் கைப்பற்றினர்.

அதில், போலீசார் தன்னை கைது செய்து விடுவார்கள் என்று பயந்து தற்கொலை செய்து கொண்டதாகவும், தனது சாவுக்கு வேறு யாரும் காரணம் இல்லை எனவும் எழுதியுள்ளார். மேலும், ”ஐ மிஸ் யூ” அம்மா என அஸ்வினி தற்கொலைக்கு முன்பு கடிதத்தில் உருக்கமாக எழுதியுள்ளார்.

போலீசார் வழக்கு பதிவு செய்ய நடத்திய முதல் கட்ட விசாரணையில், இந்த மோசடி கும்பல் டெல்லியில் இருந்து செயல்படும் நைஜீரிய சைபர் கிரைம் கும்பலின் மோசடியில் ஒரு வகை என போலீசார் தெரிவித்தனர்.

இந்த மோசடி கும்பல், சமூக வலைதளங்களில் பார்த்து, அதில் குறிப்பிடப்பட்டுள்ள கல்வித் தகுதி வேலை உள்ளிட்ட விவரங்களை தெரிந்து கொண்டு நடுத்தர குடும்பத்தை சேர்ந்தவரா, வசதியான குடும்பத்தைச சேர்ந்தவரா என்பதை கண்டறிந்து மோசடியில் ஈடுபடுகின்றனர்.

அப்படி தேர்வு செய்யப்படும் நபர்களுக்கு, வெளிநாட்டில் இருந்து பரிசு அனுப்புவது போல் அனுப்பி அதனை சுங்கத்துறை அதிகாரிகள் பிடித்து விட்டார்கள் என போனில் கூறி, ஒரு வங்கி கணக்கு எண்ணிற்கு பணம் அனுப்ப சொல்லி மோசடி செய்வதை வாடிக்கையாக கொண்டவர்கள் என்பது தெரியவந்துள்ளது.

இந்த கும்பல் இளம் பெண்கள், இளைஞர்கள், விவாகரத்தான பெண்களை குறி வைத்து கைவரிசை காட்டுவதை வாடிக்கையாக கொண்டவர்கள் எனவும் போலீசார் தெரிவித்தனர். அஸ்வினியை தொடர்பு கொண்ட செல்போன் எண்ணை வைத்து சைபர் கிரைம் போலீசார் மோசடி கும்பலை பிடிக்க தீவிரம் காட்டி வருகின்றனர்.