திருச்சியில்..

திருச்சியில் பாலடைந்த கட்டிடத்திற்கு அழைத்துச் சென்று மனைவியின் தலையில் கல்லைப்போட்டு கொலை செய்துவிட்டு தப்பி ஓடிய கணவனை காவல் துறையினர் தீவிரமாக தேடி வருகின்றனர்.

திருச்சி பொன்மலைப்பட்டி பொன்னேரிபுரத்தைச் சேர்ந்தவர் சதீஷ்குமார்(வயது 40). பெயிண்டர். இவருடைய மனைவி சபுராபீவி என்கிற நிஷா (35). இருவேறு மதத்தை சேர்ந்த இவர்கள் காதலித்து திருமணம் செய்து கொண்டனர்.

இந்த தம்பதிக்கு 2 மகன்களும், ஒரு மகளும் உள்ளனர். சதீஷ்குமார் மீது காவல் நிலையத்தில் அடிதடி உள்பட பல்வேறு வழக்குகள் நிலுவையில் உள்ளதாகக் கூறப்படுகிறது.

இந்தநிலையில் இவர் தனது மனைவி சபுராபீவியை பொன்மலை பகுதியில் உள்ள ஒரு பள்ளி அருகே ரெயில்வேக்கு சொந்தமான பாழடைந்த கட்டிடத்துக்கு அழைத்து சென்றுள்ளார்.

அங்கு நேற்று இரவு அவர்களுக்குள் திடீரென தகராறு ஏற்பட்டுள்ளது. இதில் ஆத்திரம் அடைந்த சதீஷ்குமார் சபுராபீவியை கீழே தள்ளி அவரது கழுத்தை சேலையால் இறுக்கியுள்ளார்.

பின்னர் அவருடைய தலையில் கல்லைப்போட்டு கொலை செய்து விட்டு அங்கிருந்து தப்பி ஓடிவிட்டார். இந்த நிலையில் சபுரா பீவி வீட்டில் இல்லாதது குறித்து அவரது உறவினர்கள் பொன்மலை காவல் துறையினருக்கு தகவல் தெரிவித்தனர்.

காவல்துறையினர் சந்தேகத்தின் பேரில் அந்த பாழடைந்த கட்டிடத்திற்கு சென்று பாாத்துள்ளனர். அப்போது அங்கு சபுராபீவி கொலை செய்யப்பட்டு ரத்தவெள்ளத்தில் பிணமாக கிடந்ததை கண்டு அதிர்ச்சி அடைந்தனர்.

இதையடுத்து காவல் துறையினர் அவரது உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இந்த சம்பவம் தொடர்பாக பொன்மலை காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.

முதல் கட்ட விசாரணையில் நடத்தையில் சந்தேகப்பட்டு சதீஷ்குமார் மனைவியை பாழடைந்த கட்டிடத்திற்கு அழைத்து சென்று கொலை செய்தாரா? அல்லது வேறு ஏதேனும் காரணமா? என காவல் துறையினர் விசாரணை நடத்தி வருகின்றனர். மேலும் தப்பி ஓடிய சதீஷ்குமாரை காவல்துறையினர் தேடி வருகிறார்கள்.

கர்நாடகாவில்..

வேற்று ஜாதி இளைஞரை காதலித்த மகளை பெற்ற அப்பாவே கழுத்தை நெரித்து கொலை செய்துள்ளார். காதலி இறந்ததையடுத்து காதலனும் ரயில் முன்பு பாய்ந்து தற்கொலை கொண்டது பெரும் அதிர்ச்சியை ஏற்படுத்தியுள்ளது.

கர்நாடக மாநிலம் கோலார் மாவட்டம் போடகுர்கி பகுதியை சேர்ந்தவர் கிருஷ்ணமூர்த்தி. இவரது 20 வயது மகள் கீர்த்தி. அங்குள்ள கல்லூரியில் பட்டப்படிப்பு படித்து வந்த கீர்த்தி, அதே பகுதியை சேர்ந்த கங்காதர் என்பவரை காதலித்து வந்துள்ளார்.

24 வயதான கங்காதர் பட்டியலினத்தை சேர்ந்தவர். தினக்கூலியாக பணியாற்றி வந்துள்ளார். இந்நிலையில் கங்காதருடனான காதல் விஷயம் கீர்த்தியின் வீட்டிற்கு தெரியவந்துள்ளது.

கங்காதர் வேறு ஜாதியை சேர்ந்தவர் என்பதால் அவர்களின் காதலுக்கு கீர்த்தியின் பெற்றோர் கடும் எதிர்ப்பு தெரிவித்துள்ளனர். இதனால் கடந்த திங்கள் கிழமை இரவு கீர்த்தி வீட்டில் பெரியா களேபரமே நடந்ததாக தெரிகிறது.

இருப்பினும் தனது காதலில் உறுதியாக இருந்த கீர்த்தி, கங்காதரை திருமணம் செய்வதில் பிடிவாதமாக இருந்துள்ளார். இதையடுத்து நேற்றுக் காலை மீண்டும் கீர்த்திக்கும் அவரது தந்தைக்கும் இதுதொடர்பாக கடும் வாக்குவாதம் ஏற்பட்டுள்ளது.

இதில் ஆத்திரமடைந்த கிருஷ்ணமூர்த்தி பெற்ற மகள் என்றும் பார்க்காமல் கீர்த்தியை கழுத்தை நெரித்து கொலை செய்துள்ளார். தனது காதலி மரணமடைந்த தகவலை கேட்ட கங்காதர் அவரது உடலுக்கு நேரில் சென்று அஞ்சலி செலுத்தியுள்ளார்.

பின்னர் தனது சகோதரருடன் இருசக்கர வாகனத்தில் சென்ற அவர், வண்டியை நிறுத்துமாறு கூறி இறங்கியுள்ளார். வண்டியில் இருந்து இறங்கிய கங்காதர் கண் இமைக்கும் நேரத்தில் அவ்வழியாக வந்த ரயில் முன் பாய்ந்துள்ளார்.

இதில் கங்காதர் உடல் சிதறி சம்பவ இடத்திலேயே உயிரிழந்தார். இந்த சம்பவம் குறித்து வழக்குப்பதிவு செய்த கம்மசமுந்த்ரா பகுதி போலீசார் கிருஷ்ணமூர்த்தியை கைது செய்துள்ளனர்.

வேற்று ஜாதி இளைஞரை காதலித்த பெண்ணை அவரது தந்தையே கழுத்தை நெரித்து கொன்ற சம்பவம் பெரும் அதிர்ச்சியை ஏற்படுத்தியது. அந்த அதிர்ச்சியில் இருந்து மீள்வதற்குள் காதலனும் ரயில் முன் பாய்ந்து தற்கொலை செய்து கொண்டது போடகுர்கி கிராமத்தை பெரும் சோகத்தில் ஆழ்த்தியுள்ளது.

உத்தர பிரதேசத்தில்..

இந்திய மாநிலம் உத்தர பிரதேசத்தில் 13 வயது சிறுவன் ஒருவன், 6 வயது பிள்ளையை கொலை செய்ததாக கைது செய்யப்பட்ட சம்பவம் அதிர்ச்சியை ஏற்படுத்தியுள்ளது.

உத்தர பிரதேச மாநிலம் ராம்பூரின் சிவில் லைன் பகுதியைச் சேர்ந்தவர் யோகேந்திரா. இவரது மகன் யோக் (6). இவரை மதியம் முதல் காணவில்லை என்பதால் யோகேந்திரா பல இடங்களில் தேடியுள்ளார்.

அப்போது பாழடைந்த கட்டிடம் ஒன்றின் அருகே தனது மகன் பிணமாக கிடந்ததைப் பார்த்துள்ளார் யோகேந்திரா. அதுவும் செங்கல்லால் தாக்கப்பட்டு நிர்வாண நிலையில் கிடந்துள்ளதைக் கண்டு யோகேந்திரா கதறி அழுதுள்ளார்.

இதனையடுத்து அவர் பொலிஸில் புகார் அளித்துள்ளார். பொலிஸாரும் வழக்குப்பதிவு செய்து விசாரணையை தொடங்கியபோது அதிர்ச்சி காத்திருந்தது. யோகேந்திரா வசிக்கும் அதே பகுதியைச் சேர்ந்த 13 சிறுவன் தான் அவரது மகனை செங்கலால் தாக்கி கொலை செய்துள்ளான் என்பது தெரிய வந்தது.

இதனைத் தொடர்ந்து உடனடியாக சிறுவனை பொலிஸார் கைது செய்தனர். எனினும் யோக்கை ஏன் சிறுவன் கொலை செய்தான் என்பதற்கான காரணம் இதுவரை தெரியவில்லை.

திருப்பூரில்..

இன்றைய இளைய தலைமுறையினரிடையே செல்பி மற்றும் ரீல்ஸ் மோகம் அதிகரித்து வருகிறது. காலையில் எழுந்து பல் தேய்ப்பதிலிருந்து இரவு தூங்க செல்வதற்கு குட் நைட் செல்வது வரை ஒரே செல்பி மையம் தான்.

இதனை சமூக வலைதளங்களில் பதிவிட்டு லைக்குகளையும், ஷேர்களையும் வாங்க துடித்து வருகின்றனர். அத்துடன் பைக் ரேசில் செல்பி கோவில்களில் செல்பி ஏன் துக்க வீடுகளில் கூட வீடியோ கால் அழைப்புகள் மோகம் தான் அதிகரித்து வருகிறது.

இதில் புதுவிதமான செல்பி மற்றும் வீடியோக்களை எடுத்து சமூக வலைதளங்களில் பதிவிட்டு மூலம் அதிக லைக்குகள் பெற போட்டா போட்டியும் இளைஞர்களிடையே அதிகரித்து வருகிறது.

இதனால் பூங்கா, சுற்றுலா தலங்களை கடந்து சாலை நடுவே செல்ஃபி, வாகனத்தில் பயணித்தபடி செல்ஃபி, ரயில் பயணங்களில் செல்பி, பேருந்தின் படிக்கட்டில் நின்று கொண்டே செல்பி என அபாயகரமான நடவடிக்கைகளில் இளைஞர்கள் ஈடுபட்டு வருகின்றனர்.

இந்த வகையான வீடியோக்களுக்கு அதிக வரவேற்பு கிடைப்பதால் இது போன்ற செய்திகளை எடுப்பதற்கு இளைஞர்கள் ஆர்வம் காட்டி வருகின்றனர்.இதற்கு ஒரு படி மேலே சென்று திருப்பூரில் ரயில் முன்பு செல்பி எடுக்க முயன்ற 2 இளைஞர்கள் ரயில் மோதி உயிரிழந்த சம்பவம் அதிர்ச்சியை ஏற்படுத்தி உள்ளது.

திருப்பூர் அருகே உள்ள அணைப்பாளையம் ஈரோடு மாவட்டம் பர்கூர் பகுதியில் வசித்து வரும் இளைஞர்கள் பாண்டியன், விஜய் ஆகிய இருவரும் ரங்கநாதபுரம் பகுதியில் தங்கி உள்ளனர்.

நேற்று ஜூலை 2ம் தேதி ஞாயிற்றுக்கிழமை விடுமுறை என்பதால் ரயில் முன்பாக நின்று செல்பி எடுக்கப் போவதாக தன்னுடைய சக நண்பர்களிடம் பெருமையாக கூறிவிட்டு வந்தனர்.

இருவரும் அறையிலிருந்து கிளம்பி ரயில் செல்லும் போது செல்பி எடுப்பதற்காக ரயில்வே தண்டவாளம் அருகில் நின்று கொண்டு இருந்தனர். சரியாக ரயில் வரும்போது செல்பி எடுக்க முற்பட்டபோது எதிர்பாராத விதமாக இருவர் மீதும் ரயில் மோதி சம்பவ இடத்திலேயே பரிதாபமாக உயிரிழந்தனர்.

ரயிலுக்காக காத்திருந்தவர்கள் காவல்துறைக்கு தகவல் அளித்ததன் பேரில் இருவரது உடல்களையும் திருப்பூர் ரயில் நிலைய இருப்பு காவல் நிலைய போலீசார் மீட்டு ஆம்புலன்ஸ் வேன் மூலம் பிரேத பரிசோதனைக்காக திருப்பூர் மாவட்ட அரசு மருத்துவக் கல்லூரி மருத்துவமனைக்கு அனுப்பி வைத்தனர்.

விபத்து குறித்து வழக்கு பதிவு செய்து தீவிர விசாரணை மேற்கொண்டு வருகின்றனர். ரயில் முன்பு செல்பி எடுக்க முயன்ற 2 இளைஞர்கள் மீது ரயில் மோதி 2 இளைஞர்கள் உயிரிழந்த சம்பவம் திருப்பூரில் பெரும் சோகத்தையும் அதிர்ச்சியையும் ஏற்படுத்தியுள்ளது.

இந்தியாவில்..

இந்திய மாநிலம் கர்நாடகாவில் கல்லூரி மாணவி ஒருவர், பேருந்து விபத்தில் தந்தை கண்முன்னே பலியான சம்பவம் சோகத்தை ஏற்படுத்தியது.கர்நாடக மாநிலம் மல்லீஸ்வரத்தில் உள்ள கல்லூரி ஒன்றில் படித்து வந்தவர் திஷா (17). இவர் தினமும் தனது தந்தையுடன் டியூசன் வகுப்பிற்கு இருசக்கர வாகனத்தில் செல்வதை வழக்கமாக கொண்டிருந்தார்.

நேற்றைய தினம் காலை 6 மணியளவில் திஷா தனது தந்தையுடன் சென்றுகொண்டிருந்தபோது, தனியார் பேருந்து ஒன்று மோதி விபத்தை ஏற்படுத்தியுள்ளது.இதில் பேருந்து சக்கரத்தில் மாணவி திஷா சிக்கியுள்ளார். அவரது தந்தைக்கு லேசான காயம் ஏற்பட்டுள்ளது.

இதனையடுத்து இருவரும் உடனடியாக மருத்துவமனையில் அனுமதிக்கப்பட்டனர். அங்கு அதிகளவில் ரத்தம் வெளியேறியதால் மாணவி ஏற்கனவே உயிரிழந்துவிட்டதாக மருத்துவர்கள் தெரிவித்துள்ளனர்.

விபத்து குறித்து போக்குவரத்து பொலிஸார் கூறும்போது, பேருந்தை இயக்கிய சாரதி இருசக்கர வாகனத்தை ஓவர்டேக் செய்ய முயன்றுள்ளார். அதன் காரணமாக இந்த விபத்து ஏற்பட்டுள்ளது என தெரிவித்துள்ளார்.

அத்துடன் தந்தை மற்றும் மகள் இருவரும் பயணம் செய்தபோது தலைக்கவசம் அணிந்திருந்தனர் என்றும் அவர் குறிப்பிட்டார்.இந்த நிலையில் பொலிஸார் விபத்தை ஏற்படுத்திய சாரதியை கைது செய்து, பேருந்தை பறிமுதல் செய்து விசாரணை நடத்தி வருகின்றனர்.

கர்நாடகாவில்..

கர்நாடக மாநிலம் மங்களூருவைச் சேர்ந்தவர் சுமந்த் (23). இவர், சென்னையிலுள்ள ராஜீவ் காந்தி கல்லூரியில் படித்து வந்தார். சென்னையிலேயே அறையெடுத்து தங்கிவந்தார். இந்நிலையில், ஜூன் 30ஆம் தேதி இவர் தனது நண்பர்களுடன் ஆந்திர மாநிலம், திருப்பதியிலுள்ள தலகோணா நீர்வீழ்ச்சிக்குச் சென்றுள்ளார்.

அங்குள்ள நீர் வீழ்ச்சியில் குளித்துக்கொண்டிருந்தபோது சுமந்த் தனது நண்பர்களிடம், தான் அருவியில் குதிப்பதை வீடியோ எடுக்குமாறு கூறிவிட்டு பாறையில் இருந்து குதித்தார். தண்ணீரில் குதித்த சுமந்த் கீழே இருந்த பாறையில் சிக்கிக்கொண்டார். அதிலிருந்து மீண்டு வர போராடியும் அவரால் இயலவில்லை.

இதனை சற்றும் எதிர்பாராத சுமந்தின் நண்பர்கள் உடனடியாக அக்கம்பக்கத்தில் இருந்தவர்களிடம் உதவி கேட்டு நாடினர். இருந்தபோதிலும், சுமந்தை காப்பாற்ற இயலிவில்லை.

உடனடியாக அவர்கள் காவல் துறையினருக்குத் தகவல் தெரிவித்தனர். தகவலின் பேரில் சம்பவ இடத்திற்குச் சென்ற காவல் துறையினர், சுமந்தை மீட்க முயன்றனர். இரவு நேரம் ஆனதால் அவரை மீட்கும் பணி பாதியிலேயே கைவிடப்பட்டது.

இந்நிலையில், நேற்று (ஜூலை 01) நீரில் மூழ்கிய சுமந்தை சடலமாக மீட்டனர். தொடர்ந்து, அவரது சடலத்தை உடற்கூராய்வுக்காக மருத்துவமனைக்கு அனுப்பி வைத்தனர்.

தொடர்ந்து இது குறித்து காவல் துறையினர் கூறுகையில், இந்த தலகோணா நீர்வீழ்ச்சியில் தொடர்ந்து இதுபோன்ற துயர சம்பவங்கள் நடந்து வருவதாகவும், இதுவரை மூன்று இளைஞர்கள் இதேபோல் உயிரிழந்ததாகவும் தெரிவித்தனர்.

இது குறித்து வனத்துறை அதிகாரிகள், சுற்றுலாப் பயணிகளுக்கு போதிய விழிப்புணர்வு ஏற்படுத்தியும், சில இளைஞர்கள் தடையை மீறி இவ்வாறான செயல்களில் ஈடுபட்டு வருவதாக கூறுகின்றனர். தொடர்ந்து, இந்த சம்பவம் குறித்து வழக்குப்பதிவு செய்த காவல் துறையினர், தீவிர விசாரணை மேற்கொண்டு வருகின்றனர்.