டெல்லியில்..

டெல்லியில் நேற்றிரவு முதல் தொடர் மழை பெய்துகொண்டிருந்தது. இந்த நிலையில், கிழக்கு டெல்லியின் ப்ரீத் விஹாரைச் சேர்ந்த சாக்ஷி அஹுஜா (Sakshi Ahuja) உள்ளிட்ட 3 பெண்கள், மூன்று குழந்தைகளுடன் இன்று அதிகாலை 5:30 மணியளவில் ரயில் நிலையத்தை அடைந்தார்.

வெளியேறும் கேட் எண் ஒன்றுக்கு (Exit No-1) அருகில் வந்துகொண்டிருந்த அந்தப் பகுதியில் மழையால் தேங்கி நின்ற தண்ணீரை கடக்க, அவர் மின்கம்பத்தைப் பிடித்தபோது அவர்மீது மின்சாரம் பாய்ந்து தூக்கி வீசப்பட்டார்.

உடனே, அருகில் இருந்த அவரின் சகோதரி மத்வி சோப்ரா மற்றும் பொதுமக்கள் சேர்ந்து, லேடி ஹார்டிங் மருத்துவக் கல்லூரி மருத்துவமனைக்கு அழைத்துச் சென்றனர். அவரை பரிசோதித்த மருத்துவர்கள் அவர் இறந்துவிட்டதாக தெரிவித்தனர்.

இந்த விபத்தைத் தொடர்ந்து சாக்ஷி அஹுஜாவின் சகோதரி மாத்வி சோப்ரா, இந்த விபத்துக்கு சம்பந்தப்பட்ட அதிகாரிகளின் அலட்சியம்தான் காரணம் எனப் புகார் அளித்தார், அதன் அடிப்படையில் வழக்கு பதிவு செய்யப்பட்டது. சம்பவம் குறித்து ரயில்வே மற்றும் போலீஸார் விசாரணை நடத்தி வருகின்றனர்.

காஞ்சிபுரத்தில்..

காஞ்சிபுரம் நாகலுத்துமேடு பகுதியை சேர்ந்தவர் உதயராஜ். இவருக்கு கடந்த ஆண்டு செம்டர்பர் மாதம் ராஜேஸ்வரி என்ற இளம்பெண்ணுடன் திருமணம் நடைபெற்றது. நீண்ட காலமாக காதலித்து வந்த இருவரும், பெற்றோர்கள் சம்மதத்துடன் திருமணம் செய்துக்கொண்டனர்.

திருமணத்துக்கு பிறகும் இளம்ஜோடிகள் மகிழ்ச்சியாக வாழ்ந்து வந்தனர். இந்த நிலையில் ராஜேஸ்வரி கருவுற்றார். நிறைமாத கர்பிணியாக இருந்த அவருக்கு, கடந்த ஞாயிற்றுக்கிழமை இரவு 10.00 மணியளவில் பிரசவ வலி ஏற்பட்டதால், சின்ன காஞ்சிபுரம் அரசு ஆரம்ப சுகாதார நிலையத்தில் அனுமதிக்கப்பட்டார்.

இரவு முழுவதும் மருத்துவமனையில் இருந்த அவருக்கு சுகபிரசவத்திற்காக செவிலியர்கள் முயற்சி செய்ததாக கூறப்படுகிறது. பின்னர் மறுநாள் காலை 9 மணியளவில்,மருத்துவர்கள் யாரும் இல்லாத நிலையில், செவிலியர்களே ராஜேஸ்வரிக்கு அறுவை சிகிச்சை செய்ய முயன்றுள்ளனர்.

அப்போது குழந்தை இறந்த நிலையில் பிறந்துள்ளது. அதன் பின்னரே மருத்துவர் வந்து ராஜேஷ்வரியை பரிசோதித்த நிலையில், அவர் காஞ்சிபுரம் மாவட்ட அரசு தலைமை மருத்துவமனைக்கு அனுப்பி வைத்தார்.

அங்கு சிகிச்சை அளித்த மருத்துவர்கள் உடனடியாக கர்ப்பப்பையை அகற்றினால் மட்டுமே ராஜேஷ்வரியை காப்பாற்ற முடியுமென கூறினர். பின்னர் அறுவை சிகிச்சையும் செய்துள்ளனர்.

இதனையெடுத்து ராஜேஷ்வரி சுயநினைவை இழந்து ஆபத்தான நிலைக்கு சென்றுள்ளார். இதனால் சென்னை ராஜீவ்காந்தி அரசு மருத்துவமனைக்கு மாற்றப்பட்ட நிலையில், அங்கு சிகிச்சை பலனின்றி ராஜேஸ்வரி பரிதாபமாக உயிரிழந்தார்.

பிரசவத்திற்காக சேர்க்கப்பட்ட தாயும் சேயும் உயிரிழந்ததால் ஆத்திரமுற்ற உறவினர்கள், சின்ன காஞ்சிபுரம் அரசு ஆரம்ப சுகாதார நிலையத்தை முற்றுகையிட்டு செவிலியர்களுடன் வாக்குவாதத்தில் ஈடுபட்டனர். காஞ்சிபுரம்-செங்கல்பட்டு சாலையில் மறியல் போராட்டத்தில் ஈடுபட்டதால் பெரும் பரபரப்பு ஏற்பட்டது.

இதனையெடுத்து காஞ்சிபுரம் மாநகராட்சி சுகாதார நகர்நல அலுவலர் அருள் நம்பி பேச்சுவார்த்தையில் ஈடுபட்டு இது தொடர்பாக சம்பந்தப்பட்டவர்கள் மீது உரிய நடவடிக்கை எடுப்பதாக அவர்களிடம் உறுதியளித்தை தொடர்ந்து போராட்டம் கைவிடப்பட்டது.

மேலும் அரசு ஆரம்ப சுகாதார நிலையத்தில் ராஜேஸ்வரி பிரசவத்திற்க்காக அனுமதிக்கப்பட்டிருந்த போது அங்கிருந்த ராஜேஸ்வரியின் பெற்றோர்கள், கணவர் உள்ளிட்ட யாரிடமும் அறுவை சிகிச்சை செய்வதற்கு முன்னதாக எவ்வித கையெழுத்தும் பெறாமலேயே தவறான முறையில் அறுவை சிகிச்சை செய்தது தான் அவரது உடல்நிலை மோசமானதுக்கு காரணம் என ராஜேஸ்வரியின் பெற்றோர்கள் புகார் தெரிவிக்கின்றனர்.

புகாரின் பேரில் போலீசார் மற்றும் மருத்துவத்தறை அதிகாரிகள் விசாரணை நடத்தி வருகின்றனர். இதுபோன்ற அலட்சியமான போக்கு நடைபெறாமல் இருக்க உரிய நடவடிக்கை எடுக்கவும் கோரிக்கை விடுத்தனர்.

கோவையில்..

கோவையை சேர்ந்த இளம்பெண் ஒருவர் மேட்டுப்பாளையத்தில் உள்ள தனியார் நிறுவனத்தில் பணிபுரிந்து வருகிறார். இவர் அலுவலக பணி முடிந்து மாலையில் வழக்கம் போல் பேருந்தில் வீடு திரும்பினார்.

அப்போது இளம்பெண்ணின் பக்கத்து இருக்கையில் இருந்த சுமார் 50 வயது மதிக்கத்தக்க ஆண் ஒருவர், இளம்பெண்ணிடம் சேட்டை செய்யத் தொடங்கினார். மேலும் திடீரென பெண்ணிடம் ஆபாச செய்கை காண்பித்துள்ளார். இதைப் பார்த்து அதிர்ச்சி அடைந்த இளம்பெண், வேறு பக்கம் திரும்பிக் கொண்டார்.

ஆனால் அந்த நபர் மீண்டும் வேறு கோணத்தில் நின்று கொண்டு மீண்டும் மீண்டும் ஆபாச செய்கை காட்டி தொல்லை கொடுத்ததால், ஒருகட்டத்தில் ஆத்திரம் அடைந்த இளம்பெண் பேருந்து சென்றுக் கொண்டு இருக்கும் போதே சத்தம் போட்டுள்ளார்.

இதனால் பேருந்து நிறுத்தப்பட்ட நிலையில், உஷாரான அந்த நபர் பேருந்தில் இருந்து கீழே இறங்கி ஓட்டம் பிடிக்க முயன்றார். எனினும் பேருந்தில் பயணம் செய்த இளைஞர்கள் மற்றும் பொதுமக்கள் விரட்டிச் சென்று அவரை மடக்கி பிடித்தனர். பின்னர் இளம்பெண், தனது காலில் இருந்த செருப்பை கழற்றி அந்த நபரை சரமாரியாக தாக்கினார்.

பின்னர் பொதுமக்களும் சேர்ந்து அந்த நபருக்கு தர்மஅடி கொடுத்தனர். இதனால் அங்கு பரபரப்பு ஏற்பட்ட நிலையில், தகவல் அறிந்த மேட்டுப்பாளையம் போலீசார் சம்பவ இடத்துக்கு சென்று அந்நபரை மீட்டு காவல் நிலையம் அழைத்துச் சென்றனர். இளம்பெண் புகார் அளிக்க மறுத்ததால் அந்த நபரை போலீசார் எச்சரித்து அனுப்பினர்.

விசாரணையில், அவரது பெயர் லாரன்ஸ் (50) என்பது தெரிய வந்தது. தொடர்ந்து போலீசார் விசாரணை நடத்தி வருகிறார்கள். தாக்குதல் தொடர்பான வீடியோ காட்சிகள் சமூக வலைதளங்களில் வைரலாகி வருகிறது.

மஹாராஷ்டிராவில்..

மஹாராஷ்டிரா மாநிலம் ராஜ்கர் கோட்டையில் இளம்பெண் படுகொலை செய்யப்பட்ட வழக்கில் குற்றவாளிகளை கண்டுபிடிக்க காவல்துறையினர் தீவிர தேடுதல் வேட்டையில் ஈடுபட்டுள்ளனர்.

தர்ஷனா பவார் என்ற 26 வயதான பெண், சமீபத்தில் ரேஞ்ச் வன அதிகாரி பதவிக்கான மஹாராஷ்டிராவில் பொது சேவை ஆணையத்தின் தேர்வில் தேர்ச்சி பெற்றவர்.  இந்தநிலையில் இவரது உடலானது ராஜ்கோட் அடிவாரத்தில் முற்றிலும் சிதைந்த நிலையில் கண்டெடுக்கப்பட்டது.

பவாரின் உடலை மீட்டெடுத்த காவல்துறையினர் பிரேத பரிசோதனை செய்ததில், இது தற்கொலை அல்ல, கொலை என உறுதி செய்தனர். அவரது உடல் மற்றும் தலையில் ஏற்பட்ட அதிபயங்கர காயங்களால் அவர் இறந்தது தெரியவந்தது.

தர்ஷனா பவார் தேர்வில் முதலிடம் பிடித்ததால் அவரை பாராட்ட திலகர் தெருவில் உள்ள நியூ இங்கிலீஷ் பள்ளியில் உள்ள கணேஷ் ஹாலில் தனியார் அமைப்பினர் திட்டமிட்டு, கடந்த ஜூன் 10ம் தேதி பாராட்டு விழா நடத்தினர்.

கடந்த ஜூன் 9ம் தேதி நர்ஹே பகுதியில் உள்ள தோழி வீட்டில் தங்கியிருந்த பவார், ஜூன் 10ம் தேதி நடந்த நிகழ்ச்சிக்கு பிறகு அவரது தோழி வீட்டுக்கு செல்லவில்லை என்று கூறப்படுகிறது. தொடர்ந்து, பெற்றோர்கள் அவரை தொலைபேசியில் அழைக்கவே, அதை அவர் ஏற்கவில்லை.

இதையடுத்து, அந்த தனியார் நிறுவனத்தில் கடந்த ஜூன் 12ம் தேதி பெற்றோர் விசாரித்தனர். நிகழ்ச்சிக்குப் பிறகு பவார் வெளியேறியதாக அந்த தனியார் அமைப்பு தெரிவித்தது. இதனால் அதிர்ச்சியடைந்த தர்ஷனா பவாரின் பெற்றோர்கள் அன்றே சிங்ககாட் காவல் நிலையத்தில் புகார் அளித்தனர்.

ஜூன் 12ம் தேதி தர்ஷனா பவார் தனது நண்பர் ராகுல் ஹந்தோருடன் ராஜ்கோட்டை பகுதியில் நடைபயிற்சி சென்றுள்ளார். இருவரும் நிகழ்ச்சிக்கு பிறகு பைக்கில் அங்கு சென்றுள்ளனர்.

காலை 6.10 மணிக்கு ராகுல் ஹந்தோரும், தர்ஷனா பவாரும் ஒன்றாக ராஜ்கருக்குள் இருக்கும் மலைப்பகுதிக்குள் ஒன்றாக நுழைந்துள்ளனர். ஆனால், அதன்பிறகு காலை 10 மணிக்கு ராகுல் மட்டுமே தனியாக வந்துள்ளார். இந்த காட்சிகள் அனைத்தும் அங்குள்ள சிசிடிவி காட்சிகளில் பதிவாகியுள்ளது. இதற்கு பிறகு ராகுல் எங்கு சென்றார் என்பது குறித்து எந்த தகவலும் இல்லை.

ராகுலை கண்டுபிடிக்க 5 தனிப்படை அமைத்து காவல்துறையினர் விசாரணை நடத்தி வருகின்றனர். நாசிக் மாவட்டத்தின் சின்னார் தாலுகாவை சேர்ந்த 25 வயதான ராகுல் ஹண்டோர், புனேவில் சிவில் சர்வீசஸுக்கு தயாராகி கொண்டிருந்த பட்டதாரி ஆவார்.

திருவண்ணாமலையில்..

திருவண்ணாமலையில் 12ஆம் வகுப்பு மாணவி தற்கொலைக்கு முயற்சி செய்து மருத்துவமனையில் சிகிச்சைப் பெற்று வந்த நிலையில், இன்று சிகிச்சைப் பலனின்றி உயிரிழந்துள்ளார்.

திருவண்ணாமலை திருக்கோவிலூர் சாலை எடப்பாளையம் எம்ஜிஆர் நகர் பகுதியில் 30 ஆண்டுகளுக்கும் மேலாக 30 குடும்பங்களைச் சேர்ந்த 80 நபர்கள் வாழ்ந்து வருகின்றனர்.

இவர்கள் பன்றிகளை வளர்த்து அதனை விற்பனை செய்வதை, முதன்மையான தொழிலாகக் கொண்டு உள்ளனர்.இந்த நிலையில், இதே பகுதியில் சரோஜா என்பவர் வசித்து வருகிறார்.

இவரது மகள் ராஜேஸ்வரி. இவர் நடந்து முடிந்த 12ஆம் வகுப்பு பொதுத் தேர்வில் 375 மதிப்பெண்கள் பெற்று தேர்ச்சி அடைந்து உள்ளார். இதனையடுத்து, திருவண்ணாமலை அரசு கலைக் கல்லூரி உள்ளிட்ட பல்வேறு கல்லூரிகளில் உயர் கல்விக்காக விண்ணப்பித்து உள்ளார்.

அப்போது, அனைத்து கல்லூரியிலும் சாதிச் சான்றிதழ் கேட்டு உள்ளனர். ஆனால், மாணவியிடம் சாதிச் சான்றிதழ் இல்லாததால், அவரால் உயர் கல்விக்குச் செல்ல முடியவில்லை. இந்த நிலையில், கடந்த நான்கு நாட்களுக்கு முன்பு மாணவி தற்கொலை முயற்சியில் ஈடுபட்டு உள்ளார்.

இதனையடுத்து, மாணவி திருவண்ணாமலை அரசு மருத்துவக் கல்லூரி மருத்துவமனையில் தீவிர சிகிச்சைப் பிரிவில் அனுமதிக்கப்பட்டு தொடர்ந்து சிகிச்சைப் பெற்று வந்தார். இந்த நிலையில், இன்று அதிகாலை மாணவி சிகிச்சைப் பலனின்றி உயிரிழந்துள்ளார்.

முன்னதாக இந்தச் சம்பவம் தொடர்பாக மாணவியின் பெற்றோர் கூறுகையில், “பன்னியாண்டி என்ற சாதிச் சான்றிதழ் இல்லாததால் மாணவி மன உளைச்சலில் இருந்தார்.

பின்னர், அவர் தற்கொலைக்கு முயற்சி செய்து உள்ளார். 12ஆம் வகுப்பிற்கு மேல் எங்களது பிள்ளைகள் மேல் படிப்பைத் தொடர இயலாமல் இருந்து வருகின்றனர்.இது தொடர்பாக கிராம அலுவலகம் முதல் மாவட்ட ஆட்சித் தலைவர் உள்ளிட்ட அதிகாரிகள் வரை பல முறை புகார் அளித்தும் நாங்கள் அளிக்கும் புகாருக்கு எந்த வித நடவடிக்கையும் மேற்கொள்ளவில்லை.

இது எங்களுக்கு மிகுந்த வேதனையாக இருக்கிறது. பன்னியாண்டி என்ற சாதிச் சான்றிதழ் இல்லாததால் எங்கள் பிள்ளைகளின் படிப்பு கேள்விக்குறியாக உள்ளது. எங்களது குழந்தைகளின் எதிர்காலம் இதனால் பெரிதும் பாதிப்படைகிறது.

எனவே, இதற்கு தமிழ்நாடு அரசு மற்றும் சம்பந்தப்பட்ட துறை அதிகாரிகள் தகுந்த நடவடிக்கை எடுத்து எங்களுக்கு உரிய சாதிச் சான்றிதழ் கிடைக்க வழிவகை செய்ய வேண்டும்” எனத் தெரிவித்தனர்.

தற்கொலையைத் தவிர்த்திடுகதற்கொலையைத் தவிர்த்திடுகமேலும், தாங்கள் பன்றியை வைத்துதான் வாழ்வாதாரத்தை தேடி வருகிறோம் என்றும், அந்த பன்றிகளை மாவட்ட ஆட்சியர் அலுவலகத்தில் கொண்டு வந்து வைத்தாலும் தங்களது கோரிக்கையை நிறைவேற்ற முடியாமல் இருக்கிறோம் எனவும் அப்பகுதி மக்கள் தெரிவித்து இருந்தனர்.

கன்னியாகுமரியில்..

கன்னியாகுமரி மாவட்டம் சென்னித்தோட்டம் பகுதியைச் சேர்ந்தவர் இளம்பெண் ராதிகா (21). பெற்றோருடன் வசித்து வந்த இவர், அதே பகுதியை சேர்ந்த அனீஷ் என்ற இளைஞரை காதலித்து வந்தார். பள்ளி பவருத்தில் இருந்தே இருவரும் காதலித்து வந்தனர்.

ஆனால் இருவரும் வெவ்வேறு சமுதாயத்தை சேர்ந்தவர்கள் என்பதால் இருவர் வீட்டிலேயேயும் எதிர்ப்பு கிளம்பியது. இதனிடையே அனீஷ் வெளிநாட்டுக்கு வேலைக்கு சென்றார். ராதிகா கல்லூரியில் படித்துவந்தார்.

இதனிடையே அனீஷ் வெளிநாட்டில் இருந்து ஊருக்கு வந்திருந்தார். இதனால் ராதிகாவின் பெற்றோர் அவரை கல்லூரிக்கு அனுப்பாமல் வீட்டுச்சிறையில் வைத்தனர். அதோடு, வேறு மாப்பிள்ளை பார்த்து அவசர அவசரமாக திருமணத்துக்கு ஏற்பாடு செய்துவந்தனர்.

இதுதொடர்பாக காதலன் அனீஷிடம் ராதிகா பேசியுள்ளார். வெளிநாட்டில் இருந்து வந்த 5 நாட்கள் ஆன நிலையில், வீட்டில் அடைத்து வைக்கப்பட்டிருக்கும் காதலியை மீட்க நண்பர்களுடன் திட்டம்போட்டார்.

இந்த நிலையில், 2 நாட்களுக்கு முன்பு நள்ளிரவு நேரத்தில் பாத்ரூம் செல்வதாக பெற்றோரிடம் கூறிவிட்டு சென்ற ராதிகா, சுவர் ஏறி குறித்து வீட்டைவிட்டு வெளியேறினார். அங்கு பைக்குகளில் தயாராக இருந்த அனீஷ் மற்றும் அவரது நண்பர்களுடன் தப்பினார்.

இருவரும் நண்பர்கள் ஆதரவுடன் கரவிளாகம் பகுதியில் உள்ள கோயிலில் திருமணம் செய்துக்கொண்டனர். இதனிடையே இரவில் மகள் வீட்டில் இருந்து தப்பியதை கண்டு போலீசில் புகாரளித்தனர். இதனைக் கேள்விப்பட்ட தம்பதியினர் மார்த்தாண்டம் போலீஸ் நிலையத்தையில் திருமண கோலத்தில் தஞ்சமடைந்தனர்.

அப்போது, தாங்கள் இருவரும் சேர்ந்து வாழ வேண்டும் என்றும், தங்களுக்கு பாதுகாப்பு வழங்ககோரியும் ராதிகா – அனீஷ் போலீசாரிடம் கூறினர். இது குறித்து பெற்றோரிடம் பேச்சுவார்த்தை நடத்திய நிலையில், ஒருவழியாக சேர்ந்து வாழ குடும்பத்தினர் சம்மதித்தனர். இதனால் அனைவரும் மகிழ்ச்சியடைந்தனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

உத்தரபிரதேசத்தில்..

உத்தரபிரதேச மாநிலம் ஷாஜகான்பூரை சேர்ந்தவர் இளம்பெண் பூனம். இவரும், தோழியான பிரீத்தி என்ற இளம்பெண்ணும் நட்பாக பழகி வந்தனர். பின்னர் இந்த நட்பு நெருக்கமாகி பிரிய மனமின்றி இளம்பெண்கள் இருவரும் காதலர்களாகினர்.

இதனிடையே, பிரீத்தியின் பெற்றோருக்கு இந்த விவகாரம் தெரியவந்தது. இளம்பெண்கள் காதலிப்பதால் பிரீத்தி திருமணத்துக்கு மறுத்து வந்துள்ளார். இதனால் திட்டம்போட்ட பெற்றோர், பிரீத்தியை லக்கிம்பூர் கேரியில் வசிக்கும் ராம்நிவாஸ் என்ற சாமியாரிடம் அழைத்துச்சென்றனர்.

அங்கு, தனது மகளின் திருமணத்திற்கு பூனம் தடையாக இருப்பதாகவும், அவளை கொலை செய்தால் இரண்டரை லட்சம் ரூபாய் தருவதாகவும் பிரீத்தியின் தாயார் ஊர்மிளா கூறியுள்ளார்.

இதற்காக முன்பணமாக 5 ஆயிரம் ரூபாயை கொடுத்து உள்ளார். இதில் புதிய திருப்பமாக பிரீத்தியை திருமணம் செய்து கொள்ள விரும்பிய பூனம், தான் ஆணாக மாற அதே சாமியாரை அணுகியுள்ளார்.

இந்த சூழலில் சாமியார் ராம்நிவாஸ், இளம்பெண்கள் பிரீத்தி, பூனம் ஆகியோரை தனியாக வரவழைத்து பின்னர் காட்டிற்கு அழைத்துச் சென்றார். அங்கு இருவருக்கும் திருமணம் செய்து வைப்பது குறித்து பேசினார். பூனத்தை மந்திரம் செய்து ஆணாக மாற்றுவேன் என்று ராம்நிவாஸ் உறுதியளித்து உள்ளார்.

ஆனால் இதற்காக பூனம் மட்டும் காட்டுப்பகுதிக்கு இன்னொரு நாள் தனியாக வரவேண்டும், அப்போது மந்திரம் செய்து மாற்றிவிடுவதாக கூறினார். இதனை நம்பி காட்டிற்கு சென்ற பூனத்தை, சாமியார் கொலை செய்து உடலை முட்புதரில் வீசினார்.

இந்த நிலையில் பூனம் காணவில்லை என்ற புகாரின் பேரில் விசாரணை நடத்திய போலீசார் பிரீத்தியிடம் விசாரணை நடத்தினர். அப்போது சாமியார் விவகாரம் தெரியவந்ததால், காட்டுப்பகுதிக்கு சென்று தேடினர்.

அங்கு உடலை மீட்ட போலீசார் கொலை செய்த சாமியார் ராம்நிவாஸ், பிரீத்தி மற்றும் அவரது தாய் ஊர்மிளா ஆகியோர் மீது போலீசார் வழக்குப் பதிவு செய்தனர். இதில் ராம்நிவாஸ், பிரீத்தி கைது செய்யப்பட்ட நிலையில், ஊர்மிளா தலைமறைவானார்.

தெலங்கானாவில்..

தெலுங்கானா மாநிலம் செகந்திராபாத் பகுதியில் கணேஷ் (30) – சவுந்தர்யா (27) தம்பதி வசித்து வந்தனர். கணேஷ் முடிதிருத்தும் தொழில் செய்து குடும்பத்தை காப்பாற்றி வந்தார். இந்த தம்பதியின் பிள்ளைகள் நித்யா, நிதர்ஸ் பள்ளியில் படித்து வந்தனர்.

கணேஷ் – சவுந்தர்யாவுக்கு மூன்று ஆண்டுகளுக்கு முன்பு திருமணம் நடைபெற்ற நிலையில், அண்மைக்காலமாக கணேஷ் மனைவியிடம் தகராறு செய்து வந்துள்ளார். கூடுதல் வரதட்சணை கேட்டு அடித்து துன்புறுத்தி வந்ததாக கூறப்படுகிறது. இதன் காரணமாக சவுந்தர்யா தனது பிள்ளைகளுடன் தமது தாயார் வீட்டுக்கு சென்றுவிட்டார்.

இந்த நிலையில், நேற்று தாயார் வசிக்கும் அடுக்குமாடி குடியிருப்பின் உச்சி சென்ற சவுந்தர்யா தனது இரு பிள்ளைகளையும் அங்கிருந்து தூக்கி வீசியுள்ளார். அதன் பின்னர் தானும் மாடியில் இருந்து குதித்துள்ளார். இதில் மூன்று பேரும் உடல் சிதறி நிகழ்விடத்திலேயே உயிரிழந்தனர்.

இதனை பார்த்து அடுக்குமாடி குடியிருப்பில் இருந்தவர்கள் அதிர்ச்சி அடைந்தனர். தகவல் அறிந்த சென்ற போலீசார், சம்பவ இடத்திற்கு விரைந்து சவுந்தர்யா மற்றும் அவரது பிள்ளைகளின் உடல்களை கைப்பற்றினர்.

மேலும் இதுகுறித்து வழக்குப்பதிவு செய்த போலீசார், வரதட்சணை கொடுமையால் இந்த சம்பவம் நடந்துள்ளது விசாரணையில் தெரியவந்தது. மேலும் சவுந்தர்யாவின் கணவர் கணேஷை கைது செய்து விசாரணை நடத்தி வருகின்றனர்.