தமிழகத்தில்..

தமிழகத்தில் தன்பால் ஈர்ப்பாளர் தம்பதியான இரண்டு ஆண்கள் திருமணம் செய்து கொண்டுள்ளனர். கார்த்திக் – கிருஷ்ணா தம்பதி கடந்த வெள்ளிக்கிழமை அன்று கோவிலில் தாலிக்கட்டி திருமணம் செய்து கொண்டனர்.

இருவரும் பேசுகையில், நாங்கள் ஏற்கனவே மோதிரம் மாற்றி கொண்டோம்.ஆனாலும் தாலி கட்டி கொண்டு திருமணம் செய்ய ஆசை இருந்தது. அதன்படி சேலம் பக்கத்தில் ஒரு கிராமத்தில் கோவிலில் வைத்து திருமணம் செய்ய முடிவெடுத்தோம்.

அங்கு 4 பெண் அடிகளாரும், ஒரு ஆண் அடிகளாரும் இருந்தார்கள். அவங்கள் தலைமையில் தான் எங்கள் திருமணம் நடந்ததுஎன கூறினர். கிருஷ்ணா தொடர்ந்து பேசுகையில், என் கையால் கார்த்திக்கிற்கு தாலி கட்டி, குங்குமம் வைத்துவிட்டேன்.

தாலியை கையில் வாங்கும் வரையில் மனதில் ஒரு பதட்டமும், பயமும் இருந்து கொண்டே இருந்தது. தாலி என்பது மிகப்பெரிய பாரம்பரியம் என தெரியும். எங்கள் திருமணத்தை யாராவது நிறுத்திவிடுவார்களோ என மனதுக்குள் எண்ணம் ஓடிகொண்டே இருந்தது.

ஆனால், என் கையால் மூன்றாவது முடிச்சை போடும் போது என்னை அறியாமல் அழுதுவிட்டேன். இனி, உனக்காக நான்.. எனக்காக நீ’ என்பது தான் கார்த்திக்கிடம் அந்த நொடி நான் சொல்ல நினைத்தது என கூறியுள்ளார்.

இந்தியாவில்..

ஐரோப்பிய நாடுகளில் ஒன்றான பின்லாந்தில் உலக மாஸ்டர்ஸ் தடகள சாம்பியன்ஷிப் தொடர் நடந்துவருகிறது. இதில் இந்தியாவை சேர்ந்த 94 வயதான பகவானி தேவி தாகர், தங்கம் மற்றும் இரண்டு வெண்கலப் பதக்கங்களை வென்றுள்ளார்.

100 மீட்டர் ஓட்டத்தில் இந்தியாவின் பகவானி தேவி 24.74 வினாடிகளில் கடந்த தங்கப் பதக்கம் வென்றார். மேலும் குண்டு எறிதல் போட்டியில் வெண்கல பதக்கம் வென்றுள்ளார். அவருக்கு பல்வேறு தரப்பினர் பாராட்டுகளை தெரிவித்து வருகின்றனர்.

பகவானி தேவி இதற்கு முன்னரே, சென்னையில் நடைபெற்ற மூத்தோர் தடகள தொடரில், 3 தங்க பதக்கங்களை வென்றிருந்தார். அதேபோல அதற்கு முன் டெல்லியில் நடைபெற்ற தடகள சாம்பியன்ஷிப்பில் 100 மீட்டர் ஓட்டம், குண்டு எறிதல் மற்றும் ஈட்டி எறிதல் ஆகியவற்றில் மூன்று தங்கப் பதக்கங்களை வென்றிருந்தார்.

பின்லாந்தில் உலக மாஸ்டர்ஸ் தடகள சாம்பியன்ஷிப் ஒலிம்பிக்குக்கு இணையாக பார்க்கப்படுகிறது. இன்னும் சொல்ல வேண்டும் என்றால் ஒலிம்பிக் போட்டிகளை விட அதிக வீரர்கள் இந்த தொடரில் கலந்து கொள்கிறார்கள். சர்வதேச பாரா தடகள வீரரும், ராஜீவ் காந்தி கேல் ரத்னா விருது பெற்றவருமான விகாஸ் தாகர், பகவானி தேவியின் பேரன் என்பது குறிப்பிடத்தக்கது.

விருதுநகரில்..

விருதுநகரில் பேருந்தும் காரும் மோதிய விபத்தில் சென்னையைச் சேர்ந்த தம்பதி உயிரிழந்தனர். குழந்தைகள் இருவர் காயமடைந்தனர்.

பழைய பெருங்களத்தூர் காந்தி நகரைச் சேர்ந்தவர் மனோஜ் (37). தனியார் நிறுவனத்தில் மேலாளராகப் பணியாற்றி வந்தார். இவரது மனைவி நித்தாஷா (32). இவர்களுக்கு பிரனாப் ஆதித்யா (8) என்ற மகனும், ஜெனிலா (7) என்ற மகளும் உள்ளனர். தனது சொந்த ஊரான தென்காசி மாவட்டம் சுரண்டைக்கு நேற்று அதிகாலை மனோஜ் தனது குடும்பத்துடன் காரில் புறப்பட்டார்.

விருதுநகர், கோவில்பட்டி வழியாகச் செல்லத் திட்டமிட்டு, நேற்று பிற்பகல் விருதுநகர் நான்குவழிச் சாலையில் காரில் வந்து கொண்டிருந்தார். முன்புற இருக்கையில் மகள் ஜெனிலாயும், பின்புறத்தில் நித்தாஷாவும், மகன் பிரனாப் ஆதித்யாவும் தூங்கிக்கொண்டு வந்துள்ளனர். விருதுநகர் நான்குவழிச் சாலையில் வந்துகொண்டிருந்தபோது, கோவில்பட்டியிலிருந்து வத்திராயிருப்பு செல்லும் தனியார் பேருந்து மீது மனோஜ் ஓட்டி வந்த கார் பக்கவாட்டில் மோதி விபத்துக்குள்ளானது.

இந்த விபத்தில் காரில் வந்த மனோஜ், அவரது மனைவி நித்தாஷா ஆகியோர் சம்பவ இடத்திலேயே உயிரிழந்தனர். குழந்தைகள் இருவரும் பலத்த காயமடைந்தனர். தகவலறிந்து சம்பவ இடத்துக்குச் சென்ற விருதுநகர் பஜார் போலீஸார் மீட்புப் பணியில் ஈடுபட்டனர். காயமடைந்த குழந்தைகள் இருவரும் விருதுநகர் அரசு மருத்துவமனையில் சிகிச்சை பெற்று வருகின்றனர்.

மனோஜ் மற்றும் நித்தாஷா சடலங்கள் பிரேத பரிசோதனைக்காக விருதுநகர் அரசு மருத்துவமனைக்கு அனுப்பி வைக்கப்பட்டன. இந்த விபத்து குறித்து விருதுநகர் பஜார் போலீஸார் வழக்குப் பதிந்து தனியார் பேருந்து ஓட்டுநரான வத்திராயிருப்பு அருகே உள்ள இலந்தைகுளத்தைச் சேர்ந்த ஞானகுரு (37) என்பவரிடம் விசாரணை நடத்தி வருகின்றனர்.

விமான நிலையத்தில்..

மனைவிக்கு தெரியாமல் காதலியை சந்திக்க வெளிநாட்டுக்கு செல்ல முயன்றதாக சொல்லப்படும் நபரை காவல்துறை அதிகாரிகள் கைது செய்துள்ளனர்.

மகாராஷ்டிரா மாநிலம் புனேவை சேர்ந்த 32 வயதான நபர் ஒருவர் கடந்த வியாழக்கிழமை அன்று வேலை விஷயமாக வெளிநாட்டுக்கு செல்வதாக வீட்டில் கூறிவிட்டு, மும்பை சர்வதேச விமான நிலையத்திற்கு சென்றிருக்கிறார். அங்கிருந்து விமானம் மூலமாக தாய்லாந்து செல்ல முடிவெடுத்திருக்கிறார் அவர். விமான நிலைய அதிகாரிகளிடம் தனது பாஸ்போர்ட்டை கொடுத்த அந்நபர், சற்று நேரம் காத்திருந்திருக்கிறார்.

பக்கத்தை காணவில்லை

விமான நிலையத்தில் உள்ள குடியேற்றத்துறை அதிகாரிகள் அவருடைய பாஸ்போர்ட்டை பரிசோதித்திருக்கிறார்கள். அப்போது, அதில் சில பக்கங்கள் கிழிக்கப்பட்டிருப்பது குறித்து அவரிடம் கேள்வி எழுப்பியுள்ளார்கள் அதிகாரிகள். ஆனால், அவர் முன்னுக்குப்பின் முரணாக பதில் அளித்ததாக தெரிகிறது.

இந்நிலையில், இது குறித்து காவல்துறைக்கு விமான நிலைய அதிகாரிகள் தகவல் கொடுக்கவே விரைந்து வந்த போலீசார் அந்த நபரை கைது செய்திருக்கின்றனர். அவர் மீது வழக்கு பதிவு செய்துள்ள அதிகாரிகள் முதல் தகவல் அறிக்கையில்,”2019 ஆம் ஆண்டு தாய்லாந்துக்குச் சென்ற அவரது பயண வரலாற்றை மறைக்க பாஸ்போர்ட்டில் 3 முதல் 6 மற்றும் 31 முதல் 34 வரை பக்கங்கள் கிழிக்கப்பட்டுள்ளன” என்று குறிப்பிட்டுள்ளனர். தனது மனைவிக்கு தெரியாமல் காதலியை சந்திக்க சென்றதாகவும், தடயத்தை மறைக்கவே பாஸ்போர்ட்டின் பக்கங்களை அவர் கிழித்ததாகவும் தெரிகிறது.

குற்றம்

பாஸ்போர்ட் அரசாங்கத்தால் வழங்கப்படுகிறது. ஆகவே அதை வேண்டுமென்றே சேதப்படுத்துவது குற்றச் செயலாகக் கருதப்படுகிறது. அந்த நபர் மீது ஐபிசி பிரிவு 420, 465, 468, 471 மற்றும் பாஸ்போர்ட் சட்டத்தின் கீழ் வழக்கு பதிவு செய்யப்பட்டிருக்கிறது. வெள்ளிக்கிழமை அந்தேரி பெருநகர மாஜிஸ்திரேட் நீதிமன்றத்தில் ஆஜர்படுத்தப்பட்ட அவர், ரூ.25,000 ஜாமீன் ஜாமீன் தொகையை செலுத்திய பிறகு விடுவிக்கப்பட்டார்.

இந்நிலையில் அவருடைய வழக்கறிஞர் இதுபற்றி பேசுகையில்,” அவர் மிகவும் சாதுவான குணமுள்ளவர். அவர் பாஸ்போர்ட்டின் பக்கங்களை கிழிக்கவில்லை. பைண்டிங் தளர்வாக இருந்ததால் பக்கங்கள் விடுபட்டிருக்கின்றன” என்றார்.

தேனியில்..

திருமணம் ஆகி 40 நாட்களே ஆன நிலையில், இளம் பெண் மர்மமான முறையில் உயிரிழந்ததால், இறப்பில் சந்தேகம் இருப்பதாகவும், தீவிர விசாரணை நடத்தக் கோரியும் இறந்த பெண்ணின் பெற்றோர் மற்றும் உறவினர்கள் திடீர் சாலை மறியல்.

திண்டுக்கல் மாவட்டம் ரெட்டியபட்டியைச் சேர்ந்த சின்னகுஞ்சு என்பவரது மகள் சத்யா (21). இவருக்கும், தேனி மாவட்டம் உத்தமபாளையத்தைச் சேர்ந்த வினித் (24) என்ற வாலிபருக்கும் சென்னையில் ஒரு நிறுவனத்தில் வேலை செய்து கொண்டிருந்தபோது பழக்கம் ஏற்பட்டது.

கடந்த ஓராண்டாக காதலித்து வந்த இவர்கள் கடந்த 40 நாட்களுக்கு முன் திருமணம் செய்துள்ளனர். திருமணத்திற்கு பின் சத்யா வினித்தின் வீடு உள்ள உத்தமபாளையத்தில் தங்கி குடித்தனம் நடத்தி வந்துள்ளார்.

இந்தநிலையில் நேற்று சத்யா மயங்கி விழுந்து உயிரிழந்து விட்டதாக திண்டுக்கல்லில் உள்ள சத்யாவின் பெற்றோருக்கு தகவல் தெரிவிக்கப்பட்டுள்ளது. பதறியடித்து வந்த பெற்றோர், மகளின் இறப்பில் மர்மம் இருப்பதாகவும் தீவிர விசாரணை நடத்தக் கோரியும் உத்தம்பாளையம் காவல் நிலையத்தில் புகார் அளித்தனர்.

இதைத் தொடர்ந்து இறந்த சத்யாவின் உடல் உடற்கூறு பரிசோதனைக்காக தேனி அரசு மருத்துவக் கல்லூரி மருத்துவமனைக்கு கொண்டுவரப்பட்டது. மருத்துவக் கல்லூரி மருத்துவமனையில் சத்யாவின் கணவரான வினித்தின் உறவினர்கள் சத்யாவின் பெற்றோருடன் வாக்குவாதத்தில் ஈடுபட்டதாக கூறப்படுகிறது.

இதையடுத்து, சத்யாவின் மரணத்தில் மர்மம் இருப்பது உறுதியாகிறது என்றும் அவரது இறப்பிற்கு உண்மை காரணம் வெளிவர வேண்டும் என்றும் கூறி சத்யாவின் உறவினர்கள் தேனி மருத்துவக் கல்லூரி மருத்துவமனை முன் சாலை மறியலில் ஈடுபட்டனர்.

அப்போது அவ்வழியாக வந்த தேனி மாவட்ட ஆட்சித் தலைவர் முரளிதரன் வாகனத்தை அவர்கள் முற்றுகையிட்டனர். மேலும் தங்களது மகளின் மரணத்திற்கு உரிய நியாயம் கிடைக்க வேண்டும் என்று மாவட்ட ஆட்சித் தலைவரிடம் கோரிக்கை வைத்தனர்.

இதனையடுத்து சத்யாவின் மரணம் தொடர்பாக ஆர்டிஓ விசாரணை நடத்தி தனக்கு அறிக்கையை அளிக்க வேண்டும் என்று உத்தமபாளையம் ஆர்.டி.ஓ. கௌசல்யாவுக்கு மாவட்ட ஆட்சியர் முரளிதரன் உத்தரவிட்டார்.

உரிய நடவடிக்கை எடுக்கப்படும் என்று மாவட்ட ஆட்சித் தலைவர் முரளிதரன் உத்தரவாதம் அளித்ததை தொடர்ந்து சத்யாவின் உறவினர்கள் மறியல் போராட்டத்தை கைவிட்டனர். இதனால் மருத்துவர் கல்லூரி மருத்துவமனை முன்பு சிறிது நேரம் போக்குவரத்து பாதிக்கப்பட்டு அப்பகுதி பரபரப்பாக காணப்பட்டது.

சவுதா மணி..

பிரபல தொலைக்காட்சி செய்தி வாசிப்பாளரும், பாஜக கட்சியின் செயற்குழு உறுப்பினருமான சவுதா மணி கைது செய்யப்பட்டுள்ளார். பிரபல தமிழ் தொலைக்காட்சி சேனல்களில் செய்தி வாசிப்பாளராக இருந்தவர் சவுதா மணி. இவர் கடந்த 2017ல் பா.ஜ.க கட்சியில் இணைந்த நிலையில் கட்சியின் செயற்குழு உறுப்பினராக செயல்பட்டு வந்தார்.

சவுதா மணி கடந்த ஜனவரி மாதம் தனது ட்விட்டர் பக்கத்தில், மதவாத வெறுப்பைத் தூண்டும் வகையில், ஒருவர் பேசிய காணொலியைப் பகிர்ந்து, கருத்தைப் பதிவிட்டிருந்தார்.

இது தொடர்பாக சென்னை காவல் ஆணையர் அலுவலகத்தில் அவர் மீது புகார் அளிக்கப்பட்டு, 2 பிரிவுகளின் கீழ், வழக்குப் பதிவு செய்யப்பட்டது. இந்த வழக்கில் முன்ஜாமீன் கேட்டு, சென்னை உயர் நீதிமன்றத்தில் சவுதாமணி மனு தாக்கல் செய்திருந்தார்.

ஆனால், அவரது மனுவைத் தள்ளுபடி செய்து, சென்னை உயர் நீதிமன்றம் உத்தரவிட்டிருந்தது. இந்நிலையில், சென்னை சூளைமேட்டில் உள்ள அவரது இல்லத்தில் சவுதாமணியை நேற்று மத்திய குற்றப்பிரிவு சைபர் க்ரைம் பொலிசார் கைது செய்தனர். இச்சம்பவத்துக்கு தமிழக பாஜக தலைவர் அண்ணாமலை கண்டனம் தெரிவித்துள்ளார்.

இது தொடர்பான அவரின் அறிக்கையில், சமூக ஊடகத்தில் யாரோ வெளியிட்ட பதிவை சவுதா மணி மற்றொருவருக்கு பகிர்ந்தார் என்ற குற்றச்சாட்டின் அடிப்படையில் அவர் மீது வழக்கு பதிவு செய்யப்பட்டு கைது செய்யப்பட்டிருக்கிறார்.

அதே சமயம் சவுதா மணி மீது சாட்டப்பட்ட குற்றத்திற்கு தகுந்த விளக்கம் கொடுத்த பிறகும் அவர் பாரதிய ஜனதா கட்சியைச் சேர்ந்தவர் என்ற ஒரே காரணத்தால் கைது செய்யப்பட்டு இருக்கிறார். இதை வன்மையாக கண்டிக்கிறேன் என தெரிவித்துள்ளார்.