தீக்சித்..

சென்னையில் பள்ளி வளாகத்திலேயே வாகனம் மோதி 7 வயது சிறுவன் பலியான சோக சம்பவம் நடந்துள்ளது. சென்னை விருகம்பாக்கம் இளங்கோ நகரைசேர்ந்தவர் வெற்றிவேல். இவரது மனைவி ஜெனிபர். இருவரும் ஐ.டி ஊழியர்கள்.

இவர்களது 7 வயது மகன் தீக்சித். இந்தச் சிறுவன் வளசரவாக்கம் அருகே ஆழ்வார்திருநகரில் உள்ள தனியார் மேல்நிலைப் பள்ளியில் 2-ம் வகுப்பு படித்து வந்தான்.

நேற்று காலை 8.40 மணி அளவில் வழக்கம் போல, மாணவன் தீக்சித் பள்ளி வேனில் பள்ளிக்கு சென்றுள்ளான். வேனில் இருந்து இறங்கி வகுப்பறைக்குச் சென்றவன், தான் மறந்து வைத்துவிட்டு வந்த சாப்பாட்டுப் பையை எடுப்பதற்காக பள்ளி வேனை நோக்கி வந்துள்ளான்.

அப்போது ஓட்டுநர் பூங்காவனம், வேனை பார்க்கிங் செய்வதற்காக பின்னோக்கி இயக்கியுள்ளார். அப்போது, மாணவன் மீது எதிர்பாராத விதமாக வேன் மோதியுள்ளது. இதில், வேனின்பின் சக்கரம் மாணவன் மீது ஏறி இறங்கியது.

இதில் படுகாயமடைந்த மாணவனை சிகிச்சைக்காக வடபழனியில் உள்ள தனியார் மருத்துவமனைக்கு பள்ளி நிர்வாகத்தினர் கொண்டு சென்றுள்ளனர். ஆனால், வழியிலேயே தீக்சித் பரிதாபமாக உயிரிழந்தான்.

வேன் ஓட்டுநர் பூங்காவனம், வாகனப் பெண் பாதுகாவலர் ஞானசக்தி ஆகியோர் கைது செய்யப்பட்ட நிலையில் அவர்களை 15 நாள் நீதிமன்றக் காவலில் வைக்க உத்தரவிடப்பட்டுள்ளது. போலீசாரின் விசாரணையில், 64 வயதான ஓட்டுநர் பூங்காவனத்திற்கு ஒரு பக்க காது கேட்காது என்பது தெரியவந்துள்ளது.

மேலும் மாநகராட்சி வாகன ஓட்டுநராக இருந்துவிட்டு ஓய்வுக்குப் பின்னர் இந்தப் பள்ளியில் ஓட்டுநராகச் சேர்ந்து கடந்த 8 ஆண்டுகளாகப் பணியாற்றி வருவதும் தெரியவந்துள்ளது.

இதற்கிடையே மாவட்ட முதன்மை கல்வி அலுவலர் தனியார் பள்ளிக்கு அனுப்பியுள்ள நோட்டீஸில், பள்ளி வாகனங்களுக்கு தனியாக பொறுப்பாளர் நியமிக்கப்படாதது ஏன்? 64 வயதானவரை வாகன ஓட்டுநராக நியமித்தது ஏன்? என்றும், வேன் மோதி சிறுவன் உயிரிழந்த நிலையில், பிற்பகல் வரை தாளாளர் பள்ளிக்கு வராதது ஏன்? என்றும் கேள்வி எழுப்பப்பட்டுள்ளது.

மேலும் பள்ளி வளாகத்திற்குள் உள்ள பேருந்து வழித்தடத்தில் வேகத்தடைகளை அமைக்காதது ஏன்? என்றும் மாணவர்களை ஒழுங்குபடுத்தும் பணியை கவனிக்க தவறியது ஏன்? என்று கேள்வி எழுப்பியுள்ள பள்ளிக்கல்வித்துறை,

மாணவர்கள் வகுப்பறைகளுக்குச் சென்றடைந்தனரா என்பதை பள்ளி முதல்வர் கவனிக்க தவறியது ஏன்? உள்ளிட்ட 6 கேள்விகளுக்கும் பள்ளி நிர்வாகம் பதிலளிக்குமாறு உத்தரவிட்டுள்ளது.

மருத்துவமனையில் மகனை பார்த்ததும் கதறிய ஜெனிபர், பள்ளி நிர்வாகத்தின் அலட்சியத்தால் என்னுடைய ஒரே மகனை இழந்து தவிக்கிறேன், அவனுக்கு 7 வயது தான் ஆகிறது.

பள்ளிக்கு அனுப்பிவிட்ட 10 நிமிடத்தில் விபத்து நடந்துவிட்டதாக போன் செய்தார்கள், நாங்கள் செல்வதற்குள் என் மகன் இறந்துவிட்டான். அவன் வாய், மூக்கு, உடல் முழுக்க ரத்தமாக இருந்தது, என்ன நடந்தது என முழுமையாக தெரியவில்லை, அவனது வயிற்றில் வேன் ஏறி இறங்கியுள்ளது.

பள்ளி தாளாளரை கைது செய்தால் மட்டுமே உண்மை என்ன? என்பது தெரியவரும், அம்மான்னு கூப்பிட என் குழந்தை இல்லையே என கதறியுள்ளார்.

சென்னை..

அரும்பாக்கம் பகுதியில் வீட்டு வேலை பார்க்கும் பணியாளரின் மகள் முதலாளியின் வங்கிக் கணக்கில் இருந்து 11.90 லட்சம் ரூபாய் ஆன்லைன் மூலம் கொள்ளை அடித்த சம்பவம் பரபரப்பை ஏற்படுத்தியுள்ளது.

சென்னை அரும்பாக்கம் ஜானகிராமன் காலனி பகுதியை சேர்ந்தவர் அகஸ்டின் (58)இவர் சாலிகிராமம் பகுதியில் உள்ள பிஎஸ்என்எல் அலுவலகத்தில் விருப்ப ஓய்வு பெற்று கடந்த இரண்டு ஆண்டுகளாக மனைவியுடன் வீட்டில் இருந்து வந்துள்ளார். இவருக்கு குழந்தைகள் ஏதும் கிடையாது.

இவரது வீட்டில் வளர்மதி என்கிற 45 வயது பெண்மணி கடந்த 15 ஆண்டு காலமாக வீட்டு வேலை செய்து வருகிறார். இவருடன் இவருடைய மகள் சுமித்ரா (19) சிறுவயதிலிருந்தே இதே வீட்டில் அவரும் பணியாற்றி அகஸ்டின் தம்பதியருக்கு மகள் போலவே வளர்ந்து வந்துள்ளார்.

அகஸ்டின் அரும்பாக்கம் பகுதியிலேயே காலியான இடம் ஒன்றை கடந்த சில ஆண்டுகளுக்கு முன்பு வாங்கி வைத்துள்ளார். அதனை கட்டுவதற்காக ஓய்வுபெற்ற போது வந்த 20 லட்சம் ரூபாயை சாலிகிராமத்தில் உள்ள இந்தியன் வங்கியில் செலுத்தியுள்ளார்.

இந்த நிலையில் கடந்த 3ஆம் தேதி தனது வீட்டை கட்டுவதற்காக சாலிகிராமத்தில் உள்ள இந்தியன் வங்கிக்கு சென்று பணம் இருப்பை பரிசோதித்து உள்ளார் அப்பொழுது வங்கியில் வெரும் 8 லட்சம் ரூபாய் மட்டுமே இருப்பதை கண்டு அதிர்ச்சி அடைந்துள்ளார்.

இதுதொடர்பாக வங்கி மேலாளரை அணுகி தான் விருப்ப ஓய்வு பெற்று வந்த 20லட்சம் ரூபாய் பணத்தை உங்கள் வங்கியில் தானே டெபாசிட் செய்திருந்தேன். என் பணம் எங்கே என அதிகாரியிடம் முறையிட்டுள்ளார்.

அதன்பிறகு வங்கி பரிவர்த்தனைகளை மேலாளர் ஆய்வு செய்திருக்கிறார். அப்பொழுது அகஸ்டின் மொபைலில் கூகுள் பே மூலமாக இரண்டு வங்கி கணக்கிற்கு பண பரிவர்த்தனை நடைபெற்றதை வங்கி அதிகாரி தெரிவித்திருக்கிறார்.

கூகுள் பே எப்படி உபயோகிப்பது என்பது கூட தெரியாது என அகஸ்டின் வங்கியிலேயே கதறி உள்ளார் உடனடியாக அங்கிருந்து காவல் நிலையத்தில் புகார் அளிக்குமாறு வங்கி அதிகாரிகள் அவரிடம் தெரிவித்திருக்கிறார்கள்.

இதனை அடுத்து சென்னை அரும்பாக்கத்தில் உள்ள காவல்நிலையத்தில் அகஸ்டின் புகார் மனுவை அளித்துள்ளார் புகாரின் அடிப்படையில் சைபர் கிரைம் போலீசார் வழக்குப்பதிவு செய்து விசாரணை நடத்தி வந்தார்கள்.

விசாரணையில் வீட்டில் வேலை பார்த்து வந்த வளர்மதியின் மகள் சுமித்ரா என்பவர்தான் அகஸ்டின் மொபைலிலிருந்து பிளே ஸ்டோர் மூலமாக கூகுள் பே செயலியை பதிவிறக்கம் செய்து அதிலிருந்து தனது காதலன் சதீஷ் குமார் என்பவருக்கு உள்ள இரண்டு வங்கி கணக்கிற்கு பண பரிவர்த்தனையை சிறுகச்சிறுக மாற்றி உள்ளது தெரியவந்தது.

காவல் நிலையத்தில் அகஸ்டின் புகார் கொடுத்தவுடன் சுமித்ரா மற்றும் காதலன் சதீஷ்குமார் ஆகிய இரண்டு பேரும் தலைமறைவாகி உள்ளனர். இதுதொடர்பாக அண்ணா நகர் துணை ஆணையர் தலைமையிலான தனிப்படை சைபர் கிரைம் போலீசார் தீவிரமான விசாரணையில் ஈடுபட்டு வந்தார்கள்.

விசாரணையில் சுமித்ரா தினந்தோறும் 10 ஆயிரம் முதல் 50 ஆயிரம் வரை தன்னுடைய காதலனுடைய இரண்டு வங்கிக் கணக்கிற்கும் பணப் பரிவர்த்தனை செய்தது கண்டுபிடிக்கப்பட்டது.

மேலும் காவல்துறையினர் தங்களை பிடித்து விடுவார்களோ என்ற அச்சத்தில் கொள்ளை அடித்த பணத்தை வைத்து பெங்களூர், கேரளா, மும்பை என பல்வேறு மாநிலத்தில் உல்லாசமாக சுற்றி திரிந்து வந்துள்ளனர்.

கடந்த 20 நாட்களுக்கு மேலாக ஆகியும் தங்களை பிடிக்க முடியாத காரணத்தினால் சரி தாயைப் பார்த்து விட்டு செல்லலாம் என சுமித்ரா சென்னை கோயம்பேடு அருகே வந்துள்ளார் அப்பொழுது சைபர் கிரைம் போலீசார் சுமித்ரா மற்றும் அவருடைய காதலன் சதீஷ்குமார் ஆகிய 2 பேரையும் சுற்றி வளைத்து கைது செய்துள்ளார்கள்.

அதன் பிறகு அவர்களிடமிருந்து நான்கு புதிய செல்போன்கள் 79 ஆயிரம் ரொக்கப்பணம் 2.5 சவரன் தங்கச் செயின் மற்றும் புதிய இருசக்கர வாகனம் ஆகியவற்றை பறிமுதல் செய்ததுடன் இவர்கள் மீது 3 பிரிவின் கீழ் வழக்கு பதிவு செய்து நீதிமன்றத்தில் ஆஜர்படுத்தி சிறையில் அடைத்தனர்.

இதுதொடர்பாக அகஸ்டின் உறவினர் தீபா என்பவர் செய்தியாளர்களை சந்தித்தார் அப்போது பேசிய அவர் தனது சித்தப்பாவிற்கு அண்ட்ராய்டு தொலைபேசி உபயோகித்த கூட தெரியாது எனவும் அவருக்கு குழந்தை இல்லாத காரணத்தினால் சுமித்ராவை தனது மகளை போலவே வளர்த்து வந்துள்ளார்.

குறிப்பாக இரண்டு வருடங்களாக இந்தியன் வங்கியில் வந்து எந்த ஒரு குறுஞ்செய்திய தொலைபேசிக்கு வருவதில்லை எனவும் வங்கியின் மீது குற்றம் சாட்டி இருந்தார். வரும் காலங்களில் யாரை நம்புவது கூட என்பது தெரியவில்லை என வேதனையுடன் தெரிவித்திருந்தார்.

மயிலாடுதுறை..

மயிலாடுதுறை மாவட்டம் ரஸ்தா மணவளித் தெருவைச் சேர்ந்தவர் புருஷோத்தமன். பொறியியல் பட்டதாரியான இவர் கிராம அலுவலராகப் பணியாற்றி வருகிறார்.

சிறுவயதிலேயே அனைத்து மத நண்பர்களிடமும் புருஷோத்தமன் பழகி வந்துள்ளார். இந்நிலையில் தனது திருமணத்தை மூன்று மதங்களின் முறைப்படியும் நடத்தவேண்டும் எனத் தீர்மானித்துள்ளார். அவரது ஆசைக்கு அவரது பெற்றோரும், மணப்பெண்ணின் பெற்றோரும் சம்மதம் தெரிவித்துள்ளனர்.

இந்நிலையில், தஞ்சை மாவட்டம் திருவையாறைச் சேர்ந்த புவனேஸ்வரியை மூன்று மதங்களின் சடங்குகளின்படி திருமணம் செய்துள்ளார் புருஷோத்தமன். இந்த திருமணத்திற்காக மூன்று மதங்களின் முறைப்படி மூன்று விதமாக பத்திரிகை அச்சிட்டு நண்பர்களுக்கு வழங்கியுள்ளார்.

முதல் நாளில் கிறிஸ்துவ மத முறைப்படியும், இரண்டாவது நாள் முஸ்லிம் மதத்தின் படியும், மூன்றாவது நாள் இந்து முறைப்படியும் திருமணம் செய்துள்ளார். புருஷோத்தமனின் இத்தகைய முயற்சியை பலரும் பாராட்டி வருகின்றனர்.

இதுகுறித்து புருஷோத்தமன் கூறுகையில், சமய நல்லிணக்கத்திற்கும், அனைத்து மதத்தினருக்கும் உறவினர்களே என்பதனை உணர்த்த இத்தகைய முயற்சியை மேற்கொண்டதாகவும் தெரிவித்துள்ளார்.

மேலும், தமிழ்நாட்டில் மதத்தால் வேறுப்பட்டிருந்தாலும், மனதால் ஒற்றுமையுடன்தான் பழகி வருகிறோம். அதனால், இந்த நல்ல முயற்சியை செய்து காட்டியதில் மகிழ்ச்சி அடைந்துள்ளேன் எனத் தெரிவித்துள்ளனர்.

தூத்துக்குடி..

தூத்துக்குடி வண்ணார் 2வது தெரு பகுதியை சேர்ந்தவர் மாடசாமி. இவரது மனைவி முனியலெட்சுமி. கணவன் மனைவி இடையே கருத்து வேறுபாடு காரணமாக மாடசாமியை விட்டு பிரிந்து முனியலட்சுமி தனியாக தனது குழந்தைகளுடன் வசித்து வந்தார்.

முனியலெட்சுமியின் மூத்த மகளான ஈஸ்வரிக்கு (பெயர் மாற்றப்பட்டுள்ளது) 17 வயது இவருக்கு அந்த பகுதியில் உள்ள பல்வேறு வாலிபர்களுடன் பழக்கம் இருந்துள்ளது. இது தொடர்பாக தாய் மகள் இடையே அடிக்கடி தகராறு ஏற்பட்டு வந்துள்ளது.

இந்நிலையில் நேற்று இரவு ஈஸ்வரி தனது ஆண் நண்பர்களான சங்கர், தங்கம், கோடாரி உள்ளிட்டோருடன் இணைந்து தனது தாய் முனியலெட்சுமியை கழுத்தை நெரித்து கத்தியால் குத்தி கொலை செய்துள்ளார்.

தகவலறிந்து வந்த தென்பாகம் போலீசார் உடலை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்து விசாரணை மேற்கொண்டனர்.‌

விசாரணையில் தாயை கொலை செய்தது ஈஸ்வரிதான் என தெரிய வந்தது. தொடர்ந்து அவரை தென்பாகம் போலீசார் கைது செய்து விசாரணை நடத்தி வருகின்றனர்.

இந்த கொலைக்கு உடந்தையாக இருந்த வாலிபர்களை போலீசார் தேடி வருகின்றனர். தகாத பழக்கத்தை கண்டித்ததால் பெற்ற தாயை மகள் கொலை செய்த சம்பவம் தூத்துக்குடியில் பரபரப்பை ஏற்படுத்தியுள்ளது.