நுவரெலியா – கிரகரி வாவியில் மிதந்து கொண்டிருந்த ஆண் ஒருவரின் சடலம் மீட்கப்பட்டுள்ளதாக நுவரெலியா பொலிஸார் தெரிவித்துள்ளனர். இன்று (06.10.2026) பொதுமக்கள் வழங்கிய தகவலின் அடிப்படையில் சம்பவ இடத்திற்கு விரைந்த பொலிஸார் முதற்கட்ட விசாரணைகளை ஆரம்பித்தனர்.
உயிரிழந்தவர் யார் என்பது இதுவரை அடையாளம் காணப்படாத நிலையில், நுவரெலியா மாவட்ட நீதவான் சம்பவ இடத்திற்கு வருகை தந்து சடலத்தைப் பார்வையிட்ட பின்னர் சடலத்தை வாவியிலிருந்து மீட்க நடவடிக்கை எடுக்கப்பட்டது.
குறித்த நபரின் மரணத்துக்கான காரணம் தெரியவராத அதேவேளை, பொலிஸார் மேலதிக விசாரணைகளை மேற்கொண்டு வருகின்றனர்.
யாழ்ப்பாணம் – தென்மராட்சி, மீசாலை புத்தூர் சந்திப் பகுதியில் இன்று (06) இடம்பெற்ற வீதி விபத்தில் மூன்று பிள்ளைகளின் தாயார் ஒருவர் உயிரிழந்துள்ளார்.
உழவு இயந்திரமும் மோட்டார் சைக்கிளும் மோதியதில் விபத்து இடம்பெற்றுள்ளது. விபத்தில் படுகாயமடைந்த பெண் சம்பவ இடத்திலேயே உயிரிழந்ததாக தெரிவிக்கப்படுகிறது. விபத்து தொடர்பான மேலதிக விசாரணைகளை கொடிகாமம் பொலிஸார் முன்னெடுத்து வருகின்றனர்.
யாழ்ப்பாண பல்கலைக்கழக சித்த மருத்துவபீட மூத்த விரிவுரையாளரின் கொலை சம்பவம் தொடர்பிலான குற்றப்பத்திரத்தை பொலிஸார் நீதிமன்றில் சமர்ப்பித்துள்ளனர்.
யாழ்ப்பாண பல்கலைக்கழக சித்த மருத்துவ பீட மூத்த விரிவுரையாளரான வைத்தியர் தயாளினி திலீபன் (வயது 54) என்பவர் கடந்த மார்ச் மாதம் 17ஆம் திகதி படுகொலை செய்யப்பட்ட நிலையில் , 21ஆம் திகதி அவரது சடலம் தனக்கிளப்பு காட்டு பகுதியில் மீட்கப்பட்டது.
சம்பவம் தொடர்பிலான விசாரணைகளை முன்னெடுத்த பொலிஸார் கொலையான விரிவுரையாளரின் மகள் மற்றும் மருமகனை கைது செய்துள்ள நிலையில் , அவர்கள் இருவரும் நீதிமன்ற உத்தரவில் விளக்கமறியலில் வைக்கப்பட்டுள்ளனர்.
இந்நிலையில் குறித்த வழக்கு , யாழ்ப்பாணம் நீதவான் நீதிமன்றில் நேற்றைய தினம் திங்கட்கிழமை விசாரணைக்கு எடுத்துக்கொள்ளப்பட்ட போது , விளக்கமறியலில் வைக்கப்பட்டுள்ள இருவரும் மன்றில் முற்படுத்தப்பட்டனர் .
அதனை தொடர்ந்து நடைபெற்ற வழக்கு விசாரணையின் போது , பொலிஸாரினால் குற்றப்பத்திரிக்கை மன்றில் தாக்கல் செய்யப்பட்டது.
குற்றப்பத்திரிக்கை அடுத்த வழக்கு தவணையில் சந்தேகநபர்களுக்கு வாசித்து காண்பிக்கப்படும் எனவும் , தொடர்ந்து சுருக்க முறையற்ற விசாரணைகள் இடம்பெறும் என தெரிவித்த மன்று , வழக்கினை 19ஆம் திகதிக்கு திகதியிட்டது.
யாழ்ப்பாணத்தில் பெண்ணொருவரை கத்தியால் கொடூரமாக வெட்டி படுகொலை செய்த பின்னர், அப்பெண்ணின் தாயையும் கத்தியால் வெட்டி படுகாயத்திற்கு உள்ளாக்கிய இளைஞன் புகையிரதம் முன்பாக பாய்ந்து உயிரை மாய்த்த சம்பவம் பெரும் அதிர்ச்சியை ஏற்படுத்தியுள்ளது.
சம்பவத்தில், சமையல் கலைஞரான யாழ்ப்பாணத்தை சேர்ந்த ஆன் லக்ஷா இக்னேஷியஸ் (வயது 32) என்ற ஒரு பிள்ளையின் தாயாரே படுகொலை செய்யப்பட்டுள்ளார்.
பெண்ணை படுகொலை செய்த பின்னர் புகையிரதம் முன்பாக பாய்ந்து உயிரை மாய்த்தவர் கிளிநொச்சி, பரந்தன் சிவபுரம் பகுதியை சேர்ந்த தேவதாஸ் புகழரசன் (வயது 23) என்ற இளைஞனே உயிரிழந்துள்ளார்.
நல்லூர் கோவில் வீதியில் உள்ள வீடொன்றினில் நேற்றைய தினம் திங்கட்கிழமை இரவு அத்துமீறி நுழைத்த இளைஞன் வீட்டில் இருந்த ஒரு பிள்ளையின் தாயான பெண் மீது சரமாரியாக கத்தியால், வெட்டியதுடன் , பெண்ணின் தலைமுடிகளையும் கத்தியால் அறுத்து தாக்குதலை மேற்கொண்டதில் குறித்த பெண் சம்பவ இடத்திலையே உயிரிழந்துள்ளார்.
தொடர்ந்து குறித்த பெண்ணின் தாயார் மீதும் இளைஞன் கத்தியால் வெட்டி தாக்குதலை மேற்கொண்டதில் , தாயார் படுகாயமடைந்த நிலையில் , யாழ்.போதனா வைத்தியசாலையில் அனுமதிக்கப்பட்டுள்ளார்.
தாக்குதலை மேற்கொண்ட இளைஞன் அங்கிருந்து தப்பி சென்று அரியாலை பகுதியில் யாழ்ப்பாணத்தில் இருந்து கொழும்பு நோக்கி பயணித்த இரவு தபால் புகையிரதம் முன் பாய்ந்து உயிரை மாய்ந்துள்ளார்.
கொலையான பெண் சமையல் கலைஞராக வேலை செய்யும் , யாழில் உள்ள பிரபல நட்சத்திர விடுதியில் குறித்த இளைஞனும் சமையல் கலைஞர் படிப்பினை நிறைவு செய்து பயிற்சி சமையல் கலைஞனாக வேலை செய்து வந்துள்ளார்கள்.
இருவருக்கும் இடையில் காதல் விவாகரம் இருந்து இருக்கலாம் என்றும் , அதன் அடிப்படையில் கொலை நடைபெற்று இருக்கலாம் என பொலிஸார் சந்தேகிக்கின்றனர்.
இந்நிலையில் சம்பவம் இடம்பெற்ற வீட்டில் தடயவியல் பொலிஸார் சோதனைகளை முன்னெடுத்துள்ளதுடன் , சடலத்தை மீட்டு உடற்கூற்று பரிசோதனைக்காக யாழ்.போதனா வைத்தியசாலையில் சடலத்தை ஒப்படைத்துள்ளனர்.
அதேவேளை உயிரிழந்த பெண்ணின் கணவன் கடந்த 2021ஆம் ஆண்டு தனது உயிரை மாய்த்துள்ள நிலையில் பெண் மறுமணம் செய்யாது தனது பெண் குழந்தையுடன் வாழ்ந்து வந்தமை குறிப்பிடத்தக்கது.
தெலுங்கானா மாநிலம் ஐதராபாத்தில் தங்கும் விடுதியில் பெண் டாக்டர் ஒருவர் மர்மமான முறையில் உயிரிழந்த சம்பவம் அதிர்ச்சியை ஏற்படுத்தியுள்ளது. இந்த வழக்கில் அவருக்கு இன்ஸ்டாகிராம் மூலம் அறிமுகமான ரவிக்குமார் என்பவரை போலீசார் தேடி வருகின்றனர்.
தெலுங்கானா மாநிலம் சங்கரெட்டி மாவட்டத்தைச் சேர்ந்தவர் ஸ்ருஜனா. 27 வயதான இவர் ஹனுமகொண்டாவில் உள்ள மருத்துவக் கல்லூரி ஒன்றில் குழந்தைகள் மருத்துவப் பிரிவில் முதுநிலை மருத்துவம் முதலாம் ஆண்டு படித்து வந்ததாக போலீசார் தெரிவித்துள்ளனர்.
ஸ்ருஜனாவுக்கு சுமார் 7 ஆண்டுகளுக்கு முன்பு இன்ஸ்டாகிராம் மூலம் ரவிக்குமார் என்பவர் அறிமுகமானதாக கூறப்படுகிறது. கடந்த சில ஆண்டுகளுக்கு முன்பு ரவிக்குமார் அவசரமாக பணம் தேவைப்படுவதாக கூறி ஸ்ருஜனாவிடம் இருந்து தங்கச்சங்கிலி ஒன்றை பெற்றதாக போலீசார் தெரிவித்துள்ளனர்.
இதனிடையே, தனது தங்கச்சங்கிலியை திருப்பித் தருமாறு ஸ்ருஜனா கேட்டுள்ளார். கடந்த செப்டம்பர் 29-ம் தேதி அவரை தொடர்புகொண்ட ரவிக்குமார், செயினைத் திருப்பித் தருவதாக கூறி ஐதராபாத் வருமாறு அழைத்ததாக தெரிய வந்துள்ளது.
இதையடுத்து ஸ்ருஜனா ஐதராபாத்தில் உள்ள மியாபூர் பகுதியில் ரவிக்குமார் தங்கியிருந்த விடுதிக்கு சென்றுள்ளார். அங்கு இருவருக்கும் இடையே தங்கச்சங்கிலியை திருப்பித் தருவது தொடர்பாக வாக்குவாதம் ஏற்பட்டதாக போலீசார் தெரிவித்துள்ளனர்.
அதன்பின்னர் ஸ்ருஜனா தனது வீட்டிற்கு திரும்பவில்லை. அவரை தொடர்பு கொள்ள முடியாததால், அவரது குடும்பத்தினர் போலீசில் புகார் அளித்தனர். இதையடுத்து போலீசார் ஸ்ருஜனாவின் செல்போன் உள்ளிட்ட தகவல்களை ஆய்வு செய்து அவர் மியாபூரில் விடுதிக்கு சென்றதை உறுதிப்படுத்தினர்.
போலீசார் விடுதிக்கு சென்று பார்த்த போது, ஸ்ருஜனா அறையில் சடலமாக கிடந்தது தெரிய வந்தது. அவர் கொலை செய்யப்பட்டிருக்கலாம் என்ற கோணத்தில் போலீசார் விசாரணையை தீவிரப்படுத்தியுள்ளனர்.
இதையடுத்து, ஸ்ருஜனாவுடன் கடைசியாக தொடர்பில் இருந்ததாக கூறப்படும் ரவிக்குமாரை போலீசார் தேடி வருகின்றனர். அவரது செல்போன் தற்போது அணைக்கப்பட்டுள்ளதாக போலீசார் தெரிவித்துள்ளனர்.
சென்னை குரோம்பேட்டை திருநீர்மலை பெரிய ஏரியில் விளையாடச் சென்ற போது நீரில் மூழ்கி 4 பள்ளி மாணவ-மாணவிகள் உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
பெற்றோர்களே உங்கள் குழந்தைகளைக் கண்காணியுங்கள். ஆபத்தான இடங்களில் அவர்களைத் தனியே செல்ல அனுமதிக்காதீர்கள். குரோம்பேட்டை லட்சுமிபுரம் பகுதியைச் சேர்ந்த யுவனேஷ் (10), தேவதர்ஷன் (12), பூஜா (13), குஷி (13) ஆகிய நான்கு பள்ளி மாணவ-மாணவிகள் நேற்று ஞாயிற்றுக்கிழமை விடுமுறை நாளையொட்டி வீட்டின் அருகே விளையாடிக் கொண்டிருந்த போது, அருகில் உள்ள திருநீர்மலை பெரிய ஏரிக்குச் சென்றுள்ளனர்.
நீண்ட நேரமாகியும் குழந்தைகள் வீடு திரும்பாததால் பெற்றோர் தேடிய நிலையில், திங்கட்கிழமை காலை ஏரிப் பகுதியில் 4 பேரின் உடல்களும் நீரில் மிதப்பதைப் பார்த்த பொதுமக்கள் போலீசாருக்குத் தகவல் தெரிவித்தனர்.
குரோம்பேட்டை காவல்துறையினர் மற்றும் தாம்பரம் தீயணைப்பு வீரர்கள் விரைந்து வந்து உடல்களை மீட்டுப் பிரேத பரிசோதனைக்காகத் தாம்பரம் அரசு மருத்துவமனைக்கு அனுப்பி வைத்தனர். உயிரிழந்தவர்களில் யுவனேஷ் 6-ம் வகுப்பும், தேவதர்ஷன் 7-ம் வகுப்பும், பூஜா மற்றும் குஷி ஆகியோர் 8-ம் வகுப்பும் படித்து வந்துள்ளனர்.
விடுமுறை நாளில் ஏரியில் குளிக்கச் சென்றபோது சேற்றில் சிக்கி அவர்கள் நீரில் மூழ்கி உயிரிழந்திருக்கலாம் என முதற்கட்ட விசாரணையில் தெரியவந்துள்ளது. ஒரே பகுதியைச் சேர்ந்த நான்கு சிறுவர்கள் ஏரியில் பலியான இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.
திருவாரூர் வடக்கு வீதியில் நடைபெற்ற துயரச் சம்பவத்தில், பெற்றோருடன் ஏற்பட்ட கருத்து வேறுபாடு காரணமாக இளம் பெண் தீக்குளித்து உயிரிழந்ததும், அவரைக் காப்பாற்ற முயன்ற தந்தை பலத்த தீக்காயங்களுடன் மருத்துவமனையில் அனுமதிக்கப்பட்டுள்ளதும் அப்பகுதியில் பெரும் சோகத்தை ஏற்படுத்தியுள்ளது.
திருவாரூர் வடக்கு வீதியில் சைக்கிள் கடை நடத்தி வருபவர் குமார். இவர் தனது மனைவி மற்றும் 24 வயது மகள் ஸ்ரீலேகாவுடன் கடையின் மாடியில் வசித்து வருகிறார்.
ஸ்ரீலேகா கடந்த இரண்டு ஆண்டுகளாகப் பட்டப்படிப்பை முடித்துவிட்டு வீட்டில் இருந்து வந்த நிலையில், நேற்று காலை சைக்கிள் கடையில் இருந்த மண்ணெண்ணெய்யை தனது தலையில் ஊற்றித் தற்கொலைக்கு முயன்றுள்ளார்.
தீயின் வேதனை தாங்காமல் அவர் அலறியதைக் கேட்டு கீழே ஓடிவந்த தந்தை குமார், மகளைக் காப்பாற்ற முயன்ற போது அவருக்கும் பலத்த தீக்காயம் ஏற்பட்டது. இதில் ஸ்ரீலேகா சம்பவ இடத்திலேயே பரிதாபமாக உயிரிழந்தார்.
பலத்த தீக்காயமடைந்த குமார் மீட்கப்பட்டுத் திருவாரூர் அரசு மருத்துவக்கல்லூரி மருத்துவமனையில் தீவிர சிகிச்சைக்காக அனுமதிக்கப்பட்டுள்ளார்.
காவல்துறையினரின் முதற்கட்ட விசாரணையில், ஸ்ரீலேகாவுக்கும் மயிலாடுதுறையைச் சேர்ந்த ஒருவருக்கும் நிச்சயதார்த்தம் நடைபெற்றிருந்த நிலையில், சில காரணங்களால் பெற்றோர் வேறு இடத்தில் மாப்பிள்ளை பார்க்க முயன்றுள்ளனர்.
இதனால் பெற்றோருக்கும் மகளுக்கும் இடையே ஏற்பட்ட கருத்து வேறுபாடு மற்றும் மனவிரக்தி காரணமாகவே அவர் இந்த விபரீத முடிவெடுத்தது தெரியவந்துள்ளது.
ஆந்திர மாநிலம் விஜயவாடாவில், விநாயகர் ஊர்வலத்தில் வேறு ஒரு இளைஞருடன் நடனமாடியதைக் கண்டித்ததால் ஏற்பட்ட தகராறில், காதலியைத் தேங்காய் வெட்டும் கத்தியால் வெட்டிக் கொன்று விட்டு, காதலனும் கட்டிடத்தின் மாடியில் இருந்து குதித்துத் தற்கொலை செய்து கொண்ட கோரச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
ஆந்திர மாநிலம் விஜயவாடாவைச் சேர்ந்த மகாலட்சுமி (19) என்பவரும், சின்ன ராவு (22) என்பவரும் காதலித்து வந்துள்ளனர். இருவரும் திருமணம் செய்து கொள்ளவும் முடிவு செய்திருந்தனர். சமீபத்தில் நடைபெற்ற விநாயகர் சிலை கரைப்பு ஊர்வலத்தின் போது, மகாலட்சுமி வேறு ஒரு இளைஞருடன் சேர்ந்து நடனமாடியுள்ளார்.
இதைக் கண்ட சின்ன ராவுக்குக் கடுமையான ஆத்திரமும் பொறாமையும் ஏற்பட்டுள்ளது. இது குறித்து மகாலட்சுமியிடம் அவர் தகராறு செய்துள்ள நிலையில், அதன் பின்னர் மகாலட்சுமி அவரைச் சந்திக்க மறுத்துவிட்டதாகக் கூறப்படுகிறது.
இதனால் ஆத்திரமடைந்த சின்ன ராவு, தேங்காய் வெட்டும் கத்தியை எடுத்துக் கொண்டு மகாலட்சுமியின் வீட்டிற்குச் சென்று அவரைக் கொடூரமாகக் கொலை செய்துள்ளார். அதன்பிறகு, அதே கட்டிடத்தின் 3-வது மாடியில் இருந்து கீழே குதித்துத் சின்ன ராவும் தற்கொலை செய்து கொண்டார்.
ஒரே விவகாரத்தில் காதலியும் காதலனும் உயிரிழந்த இச்சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.
மேல் மாகாண வடக்கு குற்றத்தடுப்புப் பிரிவினால் முன்னெடுக்கப்பட்டு வரும் விசாரணை ஒன்றுடன் தொடர்புடைய மூன்று சந்தேகநபர்களைக் கைது செய்வதற்காகப் பொலிஸார் பொதுமக்களின் உதவியைக் கோரியுள்ளனர்.
தலைமறைவான நபர்கள்.
குறித்த சந்தேகநபர்கள் மூவரும் தங்களது வசிப்பிடங்களை விட்டுத் தப்பிச் சென்று தற்போது தலைமறைவாக உள்ளதாகப் பொலிஸார் தெரிவித்துள்ளனர். ஹிமாலி செவ்வந்தி ராஜபக்ச பத்திரண, தரிந்து ஜீவந்த ராஜபக்ச பத்திரண மற்றும் விராஜ் நிமாஷ்க பத்தேகம பத்திரண ஆகியோரே இவ்வாறு தேடப்பட்டு வரும் சந்தேகநபர்களாவர்.
இவர்கள் தொடர்பில் ஏதேனும் தகவல் தெரிந்தால் அருகிலுள்ள பொலிஸ் நிலையத்திற்கோ அல்லது மேல் மாகாண வடக்கு குற்றத்தடுப்புப் பிரிவின் பணிப்பாளரின் 071 859 2167 என்ற தொலைபேசி இலக்கத்திற்கோ தொடர்புகொண்டு அறிவிக்குமாறு கோரப்பட்டுள்ளது.
2027 ஆம் ஆண்டுக்கான வரவு – செலவுத் திட்டத்தின் ஊடாகப் பெருமளவிலான வரிகள் குறைக்கப்படும் என்று தொழில் அமைச்சரும் நிதி, திட்டமிடல் பிரதி அமைச்சருமான அனில் ஜயந்த பெர்னாண்டோ தெரிவித்துள்ளார்.
2027 ஆம் ஆண்டுக்கான வரவு – செலவுத் திட்டம் தொடர்பில் ஊடகங்களுக்குக் கருத்துத் தெரிவிக்கும்போதே அவர் மேற்கண்டவாறு குறிப்பிட்டார். அவர் மேலும் தெரிவிக்கையில், “சர்வதேச நாணய நிதியத்தின் ஒத்துழைப்புடன் நாட்டின் பொருளாதாரம் ஸ்திரமடைந்துள்ளதுடன் நிதி ஒழுக்கமும் பாதுகாக்கப்பட்டுள்ளது.
நாணய நிதியத்தின் செயற்திட்டப் பரிந்துரைகள் முழுமையாக நடைமுறைப்படுத்தப்பட்டுள்ளன. தொடர்ந்தும் அவற்றின் சாதகமான ஒத்துழைப்பைப் பெற்றுக்கொள்ள எதிர்பார்க்கின்றோம்.
குறுகிய அரசியல் நோக்கங்களை முன்னிலைப்படுத்திப் பொருளாதாரக் காரணிகளை முன்னெடுத்துச் செல்ல முடியாது என்பதால், நாணய நிதியத்தின் செயற்றிட்டம் குறித்து எதிர்க்கட்சியினர் எதிர்மறையான கருத்துக்களைக் குறிப்பிடுவதைத் தவிர்க்க வேண்டும்.
2027 ஆம் ஆண்டுக்கான வரவு – செலவுத் திட்டத்தின் ஊடாகப் பெருமளவிலான வரிகள் குறைக்கப்படவுள்ளன. குறிப்பாகப் பெறுமதி சேர் வரி மற்றும் உழைக்கும்போது செலுத்தப்படும் வரிகள் கட்டம் கட்டமாகக் குறைக்கப்படும். அதற்குரிய யோசனைகள் வரவு – செலவுத் திட்டத்தில் முன்வைக்கப்படும்.
நிறைவடைந்த இரண்டு ஆண்டு காலத்தில் அரசியல் ரீதியில் பிரபல்யமடையும் வகையிலான மக்கள் விரோதத் தீர்மானங்களை அரசு எடுக்கவில்லை. பொருளாதார ஸ்திரத்தன்மையை உறுதிப்படுத்திக்கொண்டு அரச நிர்வாகத்தை முன்னெடுத்து வருகின்றோம்.
பொருளாதாரத்துக்குப் பாதிப்பை ஏற்படுத்தும் எவ்விதமான தீர்மானங்களையும் எடுக்கப்போவதில்லை” என குறிப்பிட்டுள்ளார்.
வவுனியா சமளங்குளம் கல்லுமலை பிள்ளையார் கோவில் இருக்கும் பகுதியில் கல்கமுவ சந்தபோதி தேரர் தலைமையில் பௌத்த வழிபாடுகளை நடத்துவதற்கான கோரிக்கை முன்வைக்கப்பட்டுள்ளது. வெடுக்குநாறி மலைய மையப்படுத்தி 260 ஏக்கர் பிரதேசம் தொல் பொருளியல் பகுதியாக அடையாளப்படுத்தப்பட்டுள்ளதாகவும் தகவல்கள் வெளியாகியுள்ளன.
வவுனியா மாவட்டத்தின் சமளங்குளம் கல்லுமலை பிள்ளையார் கோவில் அமைந்துள்ள பகுதியில் கல்கமுவ சந்தபோதி தேரர் தலைமையில் பௌத்த வழிபாடுகளை எதிர்வரும் காலத்தில் முன்னெடுப்பதற்கு அழைப்பு விடுக்கப்பட்டுள்ளது.
அத்துடன் அந்த பகுதியானது அநுராதபுர காலத்தைச் சேர்ந்த பண்டைய பௌத்த வளாகத்தின் இடிபாடுகளைக் கொண்ட வரலாற்று நிலமாகும் என்றும், இது வவுனியா நகரத்திலிருந்து 5 கிலோ மீற்றர் தொலையில் உள்ள சமளங்குளம ஏரிக்கு அருகில் அமைந்துள்ளது என்றும் குறிப்பிடப்பட்டுள்ளது.
1970களில் நடத்தப்பட்ட தொல் பொருள் ஆய்வின்படி, இந்த இடம் மத்திய அநுராதபுர காலத்தைச் சேர்ந்தது என முடிவு செய்யப்பட்டுள்ளதோடு இயற்கையான கருங்கல் குளத்தின் மீது ஒரு சிலை மற்றும் செங்கற்களால் கட்டப்பட்ட பண்டைய தங்குமிடம் ஆகியவை உள்ளிட்ட பல சன்றுகள் அடையாளப்படுத்தப்பட்டுள்ளன.
வெடுக்குநாறி மலை
அத்துடன் இந்தப் பகுதியின் கீழ் அமைப்பு எட்டு பக்கங்கள் மற்றும் ஆறு பக்கங்கள், வடிவங்களில் ஒரு சதுர மேடையில் கட்டப்பட்டிருப்பது தனித்துவமான அம்சமாகும் என்றும் தொல்பொருள் திணைக்களத்தின் அகழ்வாராய்ச்சியின் போது, வெண்கலத்தால் செய்யப்பட்ட அவலோகிதேஸ்வர போதிசத்துவர் சிலையும், அந்த சிலைக்குள் புத்த சிலையின் பகுதியும் கண்டெடுக்கப்பட்டதாகவும் குறிப்பிடப்பட்டுள்ளது.
இந்த பண்டைய தொல்பொருள் நிலத்தில் தற்போது ‘சமளங்குளம் பிள்ளையார் கோவில்’ என்ற பெயரில் நவீன இந்து கோயில் கட்டப்பட்டு வருவதால் பெரும்பாலான பௌத்த இடிபாடுகள் நீரில் அழிக்கப்படும் அபாயத்தில் இருப்பதால் அப்பகுதியில் பௌத்த அடையாளத்தை உறுதிப்படுத்தும் நோக்கில் வழிபாடுகளை மேற்கொள்ள வேண்டும் என்றும் கூறப்பட்டுள்ளது.
இதேவேளை, வெடுக்குநாறி மலையை மையப்படுத்தி 260 ஏக்கர் பகுதி தொல்பொருளியல் திணைக்களத்துக்கு சொந்தமாக்குவதற்கான கோரிக்கை முன்வைக்கப்பட்டுள்ளதோடு அதன் முதற்கட்டத்தில் 51 ஏக்கர்கள் நில அளவை செய்யப்படவுள்ளமையும் குறிப்பிடத்தக்கது.
இலங்கையின் பொருளாதார வளர்ச்சி வேகம் இரண்டு ஆண்டுகளின் பின்னர் மீண்டும் வீழ்ச்சிப் பாதைக்குத் திரும்பியுள்ளமை புள்ளிவிபரங்களின் மூலம் தெரியவந்துள்ளது. கடந்த 2022ஆம் ஆண்டின் பொருளாதார நெருக்கடிக்குப் பிறகு மீண்டெழுந்த பொருளாதாரம் கடந்த வருடங்களில் இயல்பு நிலைக்குத் திரும்பியிருந்தது.
இந்நிலையில் இரண்டு ஆண்டுகளுக்குப் பிறகு தற்போது பொருளாதார வளர்ச்சி வேகம் குறையத் தொடங்கியுள்ளது. கடந்த இரண்டு ஆண்டுகளுடன் ஒப்பிடுகையில், இந்த ஆண்டு இலங்கையின் பொருளாதார வளர்ச்சி வேகம் குறைந்துள்ளமையை புள்ளிவிபரங்கள் தெளிவாக சுட்டிக்காட்டியுள்ளன.
2022ல் சந்தித்த முன்னெப்போதும் இல்லாத பொருளாதார நெருக்கடியிலிருந்து மீண்டு வந்த இலங்கை பொருளாதாரம், கடந்த ஆண்டில் ஏற்பட்ட பொருளாதாரச் சுருக்கத்தைக் கடந்து, 2023 மற்றும் 2024 ஆகிய இரு ஆண்டுகளிலும் 5 சதவீத பொருளாதார வளர்ச்சியைப் பதிவு செய்தது.
இருப்பினும், இந்த ஆண்டின் இரண்டாம் காலாண்டில் நாட்டின் பொருளாதார வளர்ச்சி 4.2 சதவீதமாகக் குறைந்துள்ளது. இது கடந்த எட்டு காலாண்டுகளில் பதிவான மிகக் குறைந்த வளர்ச்சி விகிதமாகும்.
அதேநேரம் இந்த ஆண்டில் 3.5 வீத பொருளாதார வளர்ச்சியையே இலங்கை எதிர்பார்க்க முடியும் என்று உலக வங்கி எதிர்வு கூறியுள்ளது.
ஆயினும், இந்த ஆண்டின் இரண்டாம் பாதியையும் சேர்த்து, ஒட்டுமொத்த பொருளாதார வளர்ச்சி விகிதம் 4 சதவீதத்தைத் தாண்டும் என்று இலங்கை மத்திய வங்கியின் ஆளுநர் கலாநிதி நந்தலால் வீரசிங்க நம்பிக்கை தெரிவித்துள்ளார்.
இங்கிரிய – ரத்மல்கொட பிரதேசத்தில் வசித்த பேசும் திறன் அற்ற பெண்ணொருவர் பேஸ்புக் மூலம் அறிமுகமான ஒரு ஆணுடன் வாழ்ந்து வந்த நிலையில் படுகொலை செய்யப்பட்டுள்ளார். இங்கிரிய, ரத்மல்கொட பிரதேசத்தில் வசித்த பேசும் திறன் அற்ற பெண்ணொருவர் தனது தாயுடன் அப்பிரதேசத்தில் வசித்து வந்துள்ளார்.
இந்நிலையில் பேஸ்புக் மூலம் அறிமுகமான அநுராதபுரத்தின் கலென்பிந்துனுவெவ பகுதியைச் சேர்ந்த, பேசும் திறன் அற்ற ஒரு ஆணை தன் வீட்டுக்கு வரவழைத்து தங்க வைத்துக் கொண்டுள்ளார். இந்நிலையில் குறித்த பெண்ணின் தயார் சில நாட்களுக்கு முன்பு இந்தியாவுக்குத் தீர்த்த யாத்திரை சென்றிருந்ததால், வீட்டில் உயிரிழந்தவரும் அவரது நண்பரும் மட்டுமே இருந்துள்ளனர்.
அதன்போது அவர்களுக்கு இடையில் ஏற்பட்ட தகராறு காரணமாக தனது வீட்டில் தங்க வைத்துக் கொண்ட ஆண் நண்பரின் தாக்குதலில் குறித்த பெண் உயிரிழந்துள்ளார். பின்னர், சம்பவத்துடன் தொடர்புடைய ஆண், அநுராதபுரப் பகுதிக்குச் சென்று தனது பெண் உறவினர் ஒருவரிடம் தாக்குதல் சம்பவம் குறித்துத் தெரிவித்துள்ளார்.
அந்தப் பெண் சந்தேக நபரை ஹொரணை பொலிஸ் தலைமையகத்திற்கு அழைத்துச் சென்று பொறுப்பதிகாரியிடம் தகவலைத் தெரிவித்துள்ளார். பொறுப்பதிகாரி சந்தேகநபருடன் அந்த வீட்டிற்குச் சென்று கதவைத் திறந்து சோதனையிட்டபோது, ஒரு அறையில் இருந்த படுக்கையில் குறித்த பெண் சடலமாகக் கிடப்பது கண்டறியப்பட்டது.
அவர் உயிரிழந்து இரண்டு நாட்களுக்கு மேல் ஆகியிருக்கலாம் என்று தெரியவந்துள்ள நிலையில் பொலிஸார் சடலத்தைக் கைப்பற்றி பிரேத பரிசோதனைக்கு அனுப்பியுள்ளனர்.
இருவருக்கும் இடையிலான தனிப்பட்ட தகராறே இச்சம்பவத்திற்குக் காரணம் என்றும், அப்போது சந்தேகநபர் தடி போன்ற ஒரு பொருளால் உயிரிழந்தவரைத் தாக்கியிருக்கலாம் என்றும் பொலிஸார் தெரிவித்தனர்.
சம்பவ இடத்தில் அந்த ஆயுதத்தின் உடைந்த துண்டுகள் கிடந்ததும் ஆய்வின்போது கண்டறியப்பட்டது. மேலதிக விசாரணைகளை இங்கிரிய பொலிஸார் முன்னெடுத்துள்ளனர்.
அவுஸ்திரேலியாவில் சிறுநீரக மாற்று அறுவை சிகிச்சை (Kidney Transplant) செய்துகொண்ட திரிஷா (Trisha) என்ற 12 வயதுச் சிறுமியின் நீண்ட நாள் கனவை நனவாக்கும் வகையில், ‘Qantas’ விமான நிறுவனம் அவரை ஒருநாள் விமானப் பணிப்பெண்ணாக மாற்றி நெகிழ்ச்சியை ஏற்படுத்தியுள்ளது.
12 வயதான திரிஷாவுக்காக Qantas நிறுவனம் பிரத்தியேகமாக விமானப் பணிப்பெண் சீருடையைத் தைத்து வழங்கி கௌரவித்துள்ளது. விமானத்தில் பணிப்பெண்ணாகக் கடமையாற்றிய சிறுமி த்ரிஷாவை விமானத்தில் பயணித்த பயணிகள் அனைவரும் மிகவும் உற்சாகத்துடனும் மகிழ்ச்சியுடனும் வரவேற்றனர்.
“வாழ்க்கை ஆச்சரியங்களும் அற்புதங்களும் நிறைந்தது” (Life is full of surprises and miracles) எனத் தெரிவித்துச் சிறுமி த்ரிஷா தனது மகிழ்ச்சியைப் பகிர்ந்துகொண்டார். நோயின் பிடியிலிருந்து மீண்டு வந்த சிறுமியின் ஆசையை நிறைவேற்றிய Qantas விமான நிறுவனத்தின் இந்த முயற்சி உலக அளவில் பலரது பாராட்டுக்களைப் பெற்று வருகிறது.
சவூதி அரேபியாவின் தேசிய விமான நிறுவனமான சவூதியாவில், தனது ஏர்பஸ் ஏ320 வகை தகுதித் தேர்வை வெற்றிகரமாக முடித்ததன் மூலம், முதல் பெண் விமானி என்ற வரலாற்றுச் சாதனையை பால்கிஸ் அல்ஃபராஜ் (Balkis Alfaraj) படைத்துள்ளார்.
தனக்கு ஆதரவு மற்றும் வழிகாட்டுதலுக்காக தனது குடும்பத்தினர், பயிற்றுனர்கள் மற்றும் வழிகாட்டிகளுக்கு அல்ஃபராஜ் (Balkis Alfaraj) நன்றி தெரிவித்ததோடு, சவூதியா நிறுவனம் தனது ஊழியர்கள் மீது வைத்துள்ள ஆதரவிற்கும் நம்பிக்கைக்கும் தனது நன்றியையும் வெளிப்படுத்தினார்.
இந்த மைல்கல் குறிப்பாக சவூதியா நிறுவனத்துடன் தொடர்புடையது . அதேசமயம் இதற்கு முன்னர் சவூதி பெண்கள் இராச்சியத்தில் உள்ள மற்ற விமான நிறுவனங்களில் வர்த்தக விமானிகளாகப் பணியாற்றியுள்ளனர்.
அவுஸ்திரேலியாவின் நியூ சவுத் வேல்ஸ் மாகாணத்தில், நியூகாசில் நகரின் வால்சென்ட் புறநகர்ப் பகுதியில் கார் ஒன்று 10 பேர் மீது மோதிய சம்பவம் தொடர்பில், இலங்கை வம்சாவளி 18 வயது இளைஞர் ஒருவர் கைது செய்யப்பட்டுள்ளார்.
இந்திகா பாம்ப்ரிக் சமரசிங்க என்ற குறித்த இளைஞர் மீது, முறையற்ற முறையில் வாகனம் செலுத்தி உடல் காயத்தை ஏற்படுத்தியதாகக் குற்றச்சாட்டு முன்வைக்கப்பட்டுள்ளது.
சம்பவத்தைத் தொடர்ந்து கைது செய்யப்பட்ட அவருக்கு பிணை வழங்க நீதிமன்றம் மறுப்பு தெரிவித்துள்ளது. இந்த வழக்கு அடுத்த வாரம் மீண்டும் விசாரணைக்கு எடுத்துக்கொள்ளப்படவுள்ளதாக அவுஸ்திரேலியா செய்திகள் தெரிவிக்கின்றன.
