வவுனியா பல்கலைக்கழக நூலக வளாகத்தில் அமைக்கப்பட்டுள்ள “பாரத் கார்னர்” (Bharat Corner), இந்திய துணைத் தூதுவர் ஸ்ரீ சாய் முரளி எஸ். மற்றும் வவுனியா பல்கலைக்கழக துணைவேந்தர் பேராசிரியர் ஏ.அற்புதராஜா ஆகியோரால் கூட்டாக திறந்து வைக்கப்பட்டது.

இந்த பாரத் கார்னரில் பல்வேறு மொழிகளில் தொகுக்கப்பட்ட புத்தகங்கள், நூல்கள் மற்றும் கல்வி வளங்கள், இந்தியாவைச் சேர்ந்த திறந்தநிலை இணையவழி வளங்களை அணுகும் வசதி, இசைக்கருவிகள் மற்றும் மாணவர்கள் பயன்படுத்தக்கூடிய வசதியான தளபாடங்களுடன் கூடிய கற்றல் சூழல் ஆகியவை ஏற்படுத்தப்பட்டுள்ளன.

இதன் மூலம் மாணவர்கள் இந்தியாவின் கலை, கலாசாரம், அறிவு, தொழில்நுட்பம் மற்றும் அபிவிருத்திப் பயணம் குறித்து அறிந்து கொள்வதற்கான புதிய வாய்ப்பு உருவாக்கப்பட்டுள்ளது.

தற்போது முன்னெடுக்கப்பட்டு வரும் SewaPakhwada2026 நிகழ்வுகளின் ஒரு பகுதியாக இந்த முயற்சி முன்னெடுக்கப்பட்டுள்ளதுடன், அறிவைப் பகிர்ந்து கொள்வதற்கும் மாணவர்களின் கற்றல் மற்றும் ஆராய்ச்சி வாய்ப்புகளை விரிவுபடுத்துவதற்கும் இது பங்களிக்கும் என தெரிவிக்கப்பட்டுள்ளது.

மேலும், இந்தியாவின் பாரம்பரியத்தையும் சமகால சாதனைகளையும் மாணவர்கள் அறிந்து கொள்வதற்கும், வவுனியா பல்கலைக்கழகத்திற்கும் இந்தியாவிற்கும் இடையிலான கல்வி மற்றும் கலாசாரத் தொடர்புகளை மேலும் வலுப்படுத்துவதற்கும் பாரத் கார்னர் முக்கிய பங்காற்றும் என எதிர்பார்க்கப்படுகிறது.

இந்தியா – இலங்கை கல்வி மற்றும் கலாசார உறவுகளை மேலும் வலுப்படுத்தும் புதிய முயற்சியாக இது அமைந்துள்ளது.

எதிர்வரும் ஏப்ரல் 1ஆம் திகதி முதல் நச்சுப்பொருட்கள் அடங்கிய பழங்களை விற்பனை செய்யும் வர்த்தகர்களுக்கு எதிராகக் கடுமையான சட்ட நடவடிக்கை எடுக்கப்படும் என வர்த்தக அமைச்சர் வசந்த சமரசிங்க தெரிவித்துள்ளார்.

நச்சற்ற பழங்களை விற்பனை செய்யும் வர்த்தகர்களை இலகுவில் அடையாளம் காணும் வகையில் QR குறியீட்டு முறை அறிமுகப்படுத்தப்படவுள்ளதாகவும் அவர் குறிப்பிட்டுள்ளார்.

கொழும்பில் நடைபெற்ற “பிள்ளைகளுக்கு நச்சற்ற பழங்கள்” என்ற தேசிய வேலைத்திட்டத்தின் தொடக்க விழாவில் கலந்து கொண்டு கருத்து தெரிவிக்கும் போதே அவர் இந்த விடயத்தை கூறியுள்ளார்.

அவர் மேலும் தெரிவிக்கையில், நாடு முழுவதிலும் உள்ள பழ வியாபாரிகள் மற்றும் மொத்த விநியோகஸ்தர்களைப் பதிவு செய்யும் பணிகளும், அவர்களுக்கான விழிப்புணர்வு நடவடிக்கைகளும் இன்றிலிருந்து தொடங்குகின்றன.

நச்சு இரசாயனங்களைப் பயன்படுத்தாமல் பழங்களைப் பழுக்க வைக்கும் முறைகள், பண்ணைகளில் பழங்களை அறுவடை செய்யும் முறைகள் மற்றும் நுகர்வோருக்குப் பாதுகாப்பாக விநியோகிப்பது தொடர்பான பயிற்சிகள் வர்த்தகர்களுக்கு வழங்கப்படும்.

எதிர்வரும் மார்ச் மாதத்திற்குள் நச்சற்ற பழங்களை விற்பனை செய்யும் வர்த்தக நிலையங்கள் அடையாளம் காணப்பட்டு, நுகர்வோர் விவகார அதிகாரசபையினால் அவர்களுக்குச் சிறப்புச் சான்றிதழ் வழங்கப்படும்.

தீவு முழுவதிலும் உள்ள பழக்கடைகளைக் வரைபடமாக்கி, நச்சற்ற பழங்களை விற்பனை செய்யும் கடைகளைச் சிறப்பான QR குறியீடு மூலமாக நுகர்வோர் இலகுவாக அடையாளம் காணக்கூடிய புதிய முறைமை அறிமுகப்படுத்தப்படவுள்ளது.

எனவே, உரிய வர்த்தமானி அறிவித்தல்களுக்கு அமைவாக, நச்சுப் பொருட்கள் அடங்கிய பழங்களை விற்பனை செய்பவர்களுக்கு எதிராகக் கடுமையான சட்ட நடவடிக்கை எடுக்கப்படும் என வலியுறுத்தியுள்ளார்.

எதிர்வரும் ஆண்டு முதல் நாட்டின் வரி முறைமையை மேலும் எளிமையாகவும் இலகுவாகவும் மாற்றுவதற்கு திட்டமிடப்பட்டுள்ளதாக பொருளாதார அபிவிருத்தி பிரதியமைச்சர் நிசாந்த ஜயவீர தெரிவித்துள்ளார்.

இதற்கமைய, சுங்க வரிக்கு மேலதிகமாக அறவிடப்படும் ஏனைய வரிகளை நீக்கி, படிப்படியாக வரிகளை எளிமைப்படுத்துவதற்கு தேவையான மாற்றங்கள் மேற்கொள்ளப்படும் என்றும் உறுதியளித்துள்ளார்.

இதன்படி, ஏனைய நிறுவனங்கள் தொடர்பிலும் இத்தகைய எளிய வரி நடைமுறைகளே பின்பற்றப்படும் என்றும் பிரதியமைச்சர் குறிப்பிட்டுள்ளார்.

மேலும், நிறுவனங்களில் தகவல் தொழில்நுட்பக் கட்டமைப்பை இணைக்கும் நடவடிக்கை விரைவுபடுத்தப்படும் என்றும் குறிப்பிட்டுள்ளார். இதன் முதற்கட்டமாகவே காகிதமற்ற சுங்க பிரகடன முறைமையை நடைமுறைப்படுத்துவதாகவும் தெரிவித்துள்ளார்.

மாத்தறை மிரிஸ்ஸ நகரில் சுற்றுலா விடுதியொன்றை நடத்தி வரும் பெண்ணொருவருடன் நெருக்கமான உறவைப் பேணி, அவரை ஏமாற்றி பெருமளவிலான தங்க நகைகள் மற்றும் பணத்தை கொள்ளையிட்டதாகக் கூறப்படும் 32 வயதான இளைஞர் ஒருவர் கைது செய்யப்பட்டுள்ளார்.

புஞ்சிகுளம் பகுதியைச் சேர்ந்த குறித்த சந்தேகநபர் கடந்த 30ஆம் திகதி கைது செய்யப்பட்டுள்ளதாக அனுராதபுரம் தலைமையக பொலிஸார் தெரிவித்துள்ளனர்.

காணி மற்றும் வீடு ஒன்றை அனுராதபுர பகுதியில் வாங்கிக் கொடுப்பதாக கூறி, சந்தேகநபர் கடந்த 20ஆம் திகதி குறித்த பெண்ணை கவர்க்குளம் பகுதியில் உள்ள ஹோட்டல் ஒன்றுக்கு அழைத்துச் சென்றுள்ளதாக பொலிஸார் தெரிவித்துள்ளனர்.

அங்கு, போதைப்பொருள் கலக்கப்பட்டதாக சந்தேகிக்கப்படும் சூப் வகையொன்றை பெண்ணுக்கு அருந்தக் கொடுத்துள்ளதாகவும், அதனை அருந்திய பின்னர் அவருக்கு மயக்கம் ஏற்பட்டதாகவும் தெரிவிக்கப்படுகிறது.

இதனையடுத்து, பெண்ணின் காரில் இருந்த சுமார் 30 இலட்சம் ரூபாய் பெறுமதியான தங்க நகைகள் மற்றும் 2 இலட்சத்து 25 ஆயிரம் ரூபாய் பணம் கொள்ளையிடப்பட்டுள்ளதாக முறைப்பாட்டில் குறிப்பிடப்பட்டுள்ளது.

காணி கொள்வனவு செய்வதற்காக குறித்த பெண் அந்த நகைகளை எடுத்துச் சென்றிருந்ததாகவும் பொலிஸார் தெரிவித்துள்ளனர்.

கைது செய்யப்பட்ட சந்தேகநபரிடமிருந்து கொள்ளையிடப்பட்ட தங்க நகைகளில் ஒரு பகுதி மீட்கப்பட்டுள்ளதாகவும், சம்பவம் தொடர்பான மேலதிக விசாரணைகள் முன்னெடுக்கப்பட்டு வருவதாகவும் பொலிஸார் தெரிவித்துள்ளனர்.

சந்தேகநபர் அனுராதபுரம் நீதவான் நீதிமன்றத்தில் முன்னிலைப்படுத்தப்படவுள்ளார்.

உலக சந்தை விலைகளுடன் ஒப்பிடுகையில், நாட்டின் ஒட்டோ டீசல் 66 ரூபாய் நஷ்டத்தில் விற்கப்படுவதாக இலங்கை பெட்ரோலிய கூட்டுத்தாபனத்தின் தலைவர் டி.ஜே. ராஜகருண தெரிவித்துள்ளார்.

30 ஆம் திகதி நள்ளிரவு முதல் நடைமுறைக்கு வந்த எரிபொருள் விலை திருத்தம் குறித்து நேற்று (01) இடம்பெற்ற ஊடக சந்திப்பில் விளக்கமளிக்கும் போதே இதனை தெரிவித்துள்ளார். இது தொடர்பில் அவர் மேலும் தெரிவிக்கையில்,

கொழும்பில் இன்று நடைபெற்ற செய்தியாளர் சந்திப்பில், ஒரு லீற்றர் பெட்ரோலுக்கு ரூ. 52 நஷ்டமும், ஒரு லீட்டர் சூப்பர் டீசலுக்கு ரூ. 53 நஷ்டமும் நிறுவனத்திற்கு இன்னும் ஏற்பட்டு வருவதாக தலைவர் தெரிவித்துள்ளார்.

நேற்று முன் தினம் நள்ளிரவு முதல் ஒரு லீற்றர் ஆக்டேன் 92 பெட்ரோல் விலையை ரூ. 15ம், ஒரு லீட்டர் ஒட்டோ டீசல் விலையை ரூ. 10ம், ஒரு லீட்டர் சூப்பர் டீசல் விலையை ரூ. 50ம் பெட்ரோலிய கூட்டுத்தாபனம் உயர்த்தியுள்ளது.

இந்த எரிபொருள் விலை திருத்தத்தின் போது சிபெட்கோ நிறுவனமும் சூப்பர் டீசலின் விலையை உயர்த்தியுள்ளது.

2022 ஆம் ஆண்டு 520 ஆக பதிவாகியிருந்த நிலையில், 2026 ஆம் ஆண்டு பதிவான விலை திருத்தத்தின்படி, சூப்பர் டீசலின் விலை ரூ. 528 ஆக பதிவு செய்யப்பட்டுள்ளது.

உத்தியோகபூர்வ எரிபொருள் விலைத் தரவுகளின்படி, 2023ஆம் ஆண்டு மார்ச் 02ஆம் திகதி சூப்பர் டீசல் ஒரு லீற்றர் 520 ரூபாய்க்கு விற்பனை செய்யப்பட்டது.

இதன்படி, சுமார் மூன்றரை ஆண்டுகளுக்குப் பின்னர் சூப்பர் டீசல் ஒரு லீற்றரின் விலை மீண்டும் 500 ரூபாயை தாண்டியுள்ளது.

பெட்ரோலிய கூட்டுத்தாபனத்தின் விலை திருத்தத்திற்கு இணையாக, லங்கா ஐஓசி நிறுவனமும் தனது எரிபொருள் விலைகளை திருத்தியுள்ளது.

இதேவேளை, தற்போதைய அரசாங்கம் பதவியேற்ற பின்னர், சூப்பர் டீசல் விலை 500 ரூபாயை தாண்டியுள்ள முதல் சந்தர்ப்பம் இதுவென்றும் கூறப்படுகின்றது.

கொழும்பு- மாளிகாவத்தையில் காதல் விவகாரம் ஒன்றின் காரணமாக ஏற்பட்ட கத்திக்குத்து சம்பவத்தில் இளைஞர்கள் இருவர் உயிரிழந்துள்ளனர். யுவதியொருவர் மீது நாட்டம் கொண்ட இரு இளைஞர்களுக்கு இடையில் ஏற்பட்ட வாக்குவாதம் முற்றி கத்திக்குத்து தாக்குதலில் முடிந்துள்ளது.

குறித்த சம்பவம் மாளிகாவத்தையில் நடைபெற்றுள்ளது. இதன்போது ஒரு யுவதிக்காக சண்டையிட்டுக் கொண்ட இரண்டு இளைஞர்களும் ஒருவரையொருவர் கடுமையான முறையில் கத்தியால் வெட்டிக் காயப்படுத்தியுள்ளனர்.

அவர்களை விலக்க முற்பட்ட இன்னொரு இளைஞனும் இதன்போது கத்திக்குத்து தாக்குதலுக்கு இலக்காகியுள்ளார். இந்நிலையில் யுவதிக்காக மோதிக் கொண்ட இரு இளைஞர்களும் கடுமையான காயங்கள் காரணமாக சிகிச்சை பலனளிக்காத நிலையில் இன்று உயிரிழந்துள்ளனர். காயமடைந்த மற்றொரு இளைஞன் தொடர்ந்தும் மருத்துவமனையில் சிகிச்சை பெற்று வருகின்றார்

புதிய எரிபொருள் விலை திருத்தத்திற்கு இணங்க பேருந்து கட்டணங்களில் எந்த உயர்வும் இருக்காது என்று இலங்கையின் தேசிய போக்குவரத்து ஆணைக்குழு (NTC) தெரிவித்துள்ளது.

இலங்கை பெட்ரோலிய கூட்டுத்தாபனம் நேற்று நள்ளிரவு முதல் எரிபொருள் விலையை உயர்த்தியுள்ளது.

இதற்கமைய, ஒக்டேன் 92 பெற்றோல் லீட்டர் ஒன்றின் விலை 15 ரூபாவால் உயர்த்தப்பட்டுள்ளதுடன், அதன் புதிய விலை 414 ரூபாவாகும்.

எனினும், ஒக்டேன் 95 பெற்றோல் லீட்டர் ஒன்றின் விலையில் எந்த மாற்றமும் செய்யப்படவில்லை என்பதுடன், அது ஏற்கனவே இருந்த 475 ரூபாவிலேயே தொடர்ந்தும் விற்பனை செய்யப்படவுள்ளது.

சூப்பர் டீசல் லீட்டர் ஒன்றின் விலை 50 ரூபாவால் உயர்த்தப்பட்டுள்ளதுடன், அதன்படி 478 ரூபாவாக இருந்த அதன் விலை 528 ரூபாய் வரை அதிகரித்துள்ளது.

அத்துடன், 382 ரூபாவாக இருந்த டீசல் லீட்டர் ஒன்றின் விலையும் 10 ரூபாவால் உயர்த்தப்பட்டுள்ளதுடன், அதன் புதிய விலை 392 ரூபாவாகும் என அறிவிக்கப்பட்டுள்ளது.

இதனிடையே, 285 ரூபாவாக இருந்த மண்ணெண்ணெய் விலையிலும் எந்தவொரு மாற்றமும் செய்யப்படவில்லை என்பது குறிப்பிடத்தக்கது.

பொலன்னறுவை – கல்தம்பராவ, நிஸ்ஸங்க மல்லபுர பகுதியில், இரண்டு பிள்ளைகளின் தந்தையான 31 வயது இளைஞர் ஒருவர் மர்மமான முறையில் உயிரிழந்துள்ளார்.

இவ்வாறு உயிரிழந்தவர் ஈஸ்வரகே டான் தில்ஷான் மதுஷங்க என அடையாளம் காணப்பட்டுள்ளார்.

தனது கணவர் நேற்று (30) பிற்பகல் நண்பர்களுடன் மது அருந்தியதாகவும், வீட்டை விட்டு வெளியேறும் முன் தன்னிடம் வாக்குவாதம் செய்ததாகவும் உயிரிழந்தரின் மனைவி தெரிவித்துள்ளார்.

இதன்பின்னர் இரவு வீடு திரும்பாத நிலையில், இன்று காலை அவரது வீட்டிலிருந்து சுமார் 100 மீட்டர் தொலைவில் பிரதான வீதியில் உயிரிழந்து கிடந்த நிலையில் காயங்களுடன் கண்டெடுக்கப்பட்டுள்ளார்.

இதற்கமைய, அவர் மது அருந்தியபோது செய்யப்பட்ட கொலையா அல்லது வீதி விபத்தா என்பது குறித்து பொலிஸார் விசாரணைகளை மேற்கொண்டு வருகின்றனர்.

இந்த சம்பவம் தொடர்பாக இதுவரை யாரும் கைது செய்யப்படவில்லை என்றும், மேலும் பல பொலிஸ் குழுக்கள் இச்சம்பவம் குறித்து மேலதிக விசாரணைகளை மேற்கொண்டு வருகின்றன.

கொழும்பில் இரண்டு இளைஞர்கள் படுகொலை செய்யப்பட்ட சம்பவம் தொடர்பான தகவல்களை பொலிஸார் வெளியிட்டுள்ளனர்.

காதல் விவகாரம் காரணமாக ஏற்பட்ட மோதலில் 19 மற்றும் 20 வயதுடைய இளைஞர்கள் உயிரிழந்துள்ளதாக பொலிஸார் தெரிவித்துள்ளனர்.

மாளிகாவத்தை வீதியில் யுவதியொருவரின் காதல் விவகாரம் தொடர்பில் இளைஞர்கள் குழுவிற்கிடையில் ஏற்பட்ட வாய்த்தர்க்கம் முற்றியதில் இடம்பெற்ற கத்திக்குத்துச் சம்பவத்தில் குறித்த இளைஞர்கள் உயிரிழந்துள்ளனர்.

அத்துடன், மற்றொருவர் காயமடைந்து கொழும்பு தேசிய வைத்தியசாலையில் அனுமதிக்கப்பட்டுள்ளதாக மாளிகாவத்தை பொலிஸார் தெரிவித்தனர்.

இந்தக் கொலை தொடர்பில் 18 வயதுடைய இளைஞரொருவர் கத்தியுடன் கைது செய்யப்பட்டுள்ளார். மாளிகாவத்தையை சேர்ந்த 19 வயதுடைய யுவதியொருவருடன் இளைஞரொருவர் காதல் உறவைப் பேணி வந்துள்ளார்.

இது தவிர, குறித்த யுவதி வேறு சில இளைஞர்களுடனும் காதல் உறவுகளைப் பேணி வந்துள்ளார்.

இது குறித்து அறிந்த குறித்த இளைஞர்கள் குழு, அவரது காதலர்களில் ஒருவரைத் தாக்கியுள்ளனர். அங்கு தாக்குதலுக்குள்ளான இளைஞர் தனது பையில் மறைத்து வைத்திருந்த கூர்மையான கத்தியை எடுத்துத் தாக்கியுள்ளார்.

அந்த நேரத்தில் அந்த கத்திக் குத்து மூவருக்குக் குத்தப்பட்டுள்ளது. அங்கு கத்திக் குத்துக்குள்ளான மூவரும் இரத்த வெள்ளத்தில் கீழே விழுந்துள்ளனர். ஏனையோர் தப்பியோடியுள்ளனர்.

காயமடைந்த மூவரையும் வைத்தியசாலையில் அனுமதிக்க அந்தப் பகுதி மக்கள் நடவடிக்கை எடுத்துள்ளனர். கத்திக் குத்துத் தாக்குதலை நடத்திய இளைஞரை பொலிஸார் கைது செய்துள்ளனர்.

உயிரிழந்தவர்களில் ஒரு இளைஞர் அந்தத் தகராாரை தீர்த்து வைக்கச் சென்று சந்தேகநபரின் கத்திக் குத்துக்கு இலக்காகியுள்ளதாக பொலிஸ் விசாரணையில் தெரிய வந்துள்ளது.

சம்பந்தப்பட்ட யுவதியிடமிருந்து பொலிஸார் வாக்குமூலம் பெற்றுள்ளனர்.

இந்த இரட்டைக் கொலை தொடர்பான சந்தேகநபரான இளைஞர் கொழும்பு புதுக்கடை நீதிவான் நீதிமன்றில் முன்னிலைப்படுத்தப்படவுள்ளார்.