லண்டனின் கிங்ஸ்டன் அப்போன் தேம்ஸ் அரச நகராட்சியின் புதிய மேயராக இலங்கைப் பிறப்புடைய கவுன்சிலர் தாய் தயாளன் நியமிக்கப்பட்டுள்ளார்.

2026 ஆம் ஆண்டு மே 21 ஆம் திகதி நடைபெற்ற வருடாந்திர மன்றக் கூட்டத்தில் இந்த நியமனம் அதிகாரப்பூர்வமாக அறிவிக்கப்பட்டது.

இலங்கையில் பிறந்த தாய் தயாளன், 1970 ஆம் ஆண்டு பிரித்தானியாவுக்கு குடிபெயர்ந்ததுடன், 1976 ஆம் ஆண்டு முதல் கிங்ஸ்டன் பகுதியில் வசித்து வருகிறார்.

2014 ஆம் ஆண்டு டோல்வொர்த் வார்டின் கவுன்சிலராக முதன்முறையாகத் தேர்ந்தெடுக்கப்பட்ட அவர், மக்கள் சேவையில் தீவிரமாக ஈடுபட்டு வருகிறார்.

இதற்கு முன்னர் 2018 முதல் 2019 வரையிலான காலப்பகுதியில் கிங்ஸ்டன் மேயராகப் பதவி வகித்த அவர், பன்முகத்தன்மை, இளைஞர் மேம்பாடு மற்றும் சமூக ஒற்றுமையை வலுப்படுத்தும் பல்வேறு முயற்சிகளை முன்னெடுத்திருந்தார்.

மேலும், ஐ.டி.சி தமிழ் மையத்தின் நிறுவன உறுப்பினராகவும் தற்போதைய புரவலராகவும் உள்ள அவர், 1986 ஆம் ஆண்டு நிறுவப்பட்ட கிங்ஸ்டன் தமிழ்ப் பள்ளியின் வளர்ச்சியில் முக்கிய பங்காற்றி வருகிறார்.

இந்தப் பள்ளி மூலம் 250-க்கும் மேற்பட்ட மாணவர்களுக்கு தமிழ் மொழி, கலை, பாரம்பரியம் மற்றும் பண்பாடு கற்பிக்கப்பட்டு வருகிறது.

கிங்ஸ்டன் இன மற்றும் சமத்துவ மன்றத்தின் இணை நிறுவனர்களில் ஒருவரான தாய் தயாளன், நகரின் பன்முகத்தன்மையை கொண்டாடும் வகையில் ‘கிங்ஸ்டன் திருவிழா’ உருவாக்கத்திலும் குறிப்பிடத்தக்க பங்களிப்பை வழங்கியுள்ளார்.

சமத்துவம், அனைவரையும் உள்ளடக்கும் சமூகக் கட்டமைப்பு மற்றும் இனவாத எதிர்ப்பு நடவடிக்கைகளில் பல தசாப்தங்களாக ஆற்றிவரும் சேவையைப் பாராட்டி, 1990 ஆம் ஆண்டு சமூக சேவைக்கான கிங்ஸ்டன் மேயர் விருதும், 2020 ஆம் ஆண்டு லிபரல் டெமாக்ரட் தலைவர் விருதும் அவருக்கு வழங்கப்பட்டுள்ளன.

எதிர்வரும் 2027ஆம் ஆண்டு தொடக்கம் கல்விப் பொதுப் பரீட்சைகளுக்கான கால அட்டவணைகள் மற்றும் பாடசாலைத் தவணைகளில் மாற்றம் ஏற்படுத்தப்படவுள்ளது.

கல்வி அமைச்சின் செயலாளர் நாலக களுவெவ இது தொடர்பான தகவல்களை வெளியிட்டுள்ளார். அதன் பிரகாரம் எதிர்வரும் 2027ஆம் ஆண்டு தொடக்கம்,2020ஆம் ஆண்டுக்கு முந்தைய கால அட்டவணைக்கேற்ப கல்விப் பொதுப் பரீட்சைகள் மற்றும் பாடசாலைத் தவணைகள் மாற்றம் பெறவுள்ளன.

கடந்த 2020ஆம் ஆண்டில் நாடு எதிர்கொண்ட கொவிட்-19 பெருந்தொற்று காரணமாக கல்வி நடவடிக்கைகள், பரீட்சைக் கால அட்டவணைகளில் மாற்றம் ஏற்பட்டது.

அதன்பின் ஏற்பட்ட பொருளாதார நெருக்கடி, எரிபொருள் தட்டுப்பாடு மற்றும் போக்குவரத்து சிரமங்கள் காரணமாக பாடசாலைகளை அடிக்கடி மூட வேண்டிய நிர்ப்பந்தம் ஏற்பட்டது.

இதன் காரணமாக கல்வி நடவடிக்கைகளில் கடுமையான பாதிப்பு ஏற்பட்டது. இவ்வாறான விடயங்களைக் கருத்திற் கொண்டு கல்விப் பொதுப் பரீட்சைகள் மற்றும் பாடசாலைத் தவணைகளை அவற்றின் வழக்கமான கால அட்டவணைக்கு மாற்ற கல்வி அமைச்சு தீர்மானித்துள்ளது.

எதிர்வரும் 2027ஆம் ஆண்டில் க.பொ.த.சாதாரண தரப் பரீட்சை டிசம்பர் மாதத்திலும், உயர்தரப் பரீட்சை ஆகஸ்ட் மாதத்திலும் நடைபெறவுள்ளது.

அத்துடன் பாடசாலைத் தவணைகளிலும் மாற்றம் செய்யப்படவுள்ளது. அதற்கு ஏதுவாக வருடத்தின் எஞ்சியுள்ள இரண்டு பாடசாலைத் தவணைகளிலும் நீண்ட விடுமுறை வழங்கப்படவுள்ளது.

வெலிக்கடை பொலிஸ் நிலையத்தின் முன்னாள் பொறுப்பதிகாரி, 19 சீன பிரஜைகளின் கடவுச்சீட்டுகளை சட்டவிரோதமாக தக்கவைத்து, அவற்றை மீள வழங்குவதற்காக பணம் கோரியதாகக் கூறப்படும் சம்பவம் தொடர்பில் விசாரணைகள் முன்னெடுக்கப்பட்டுள்ளன.

இதன்படி, இந்த சம்பவத்துடன் தொடர்புடையதாக கூறப்படும் இளம் பெண்ணை பொலிஸார் கைது செய்ய நடவடிக்கை எடுத்துள்ளனர். சம்பவம் தொடர்பில் மேலும் தெரியவருவதாவது,

வெலிக்கடை பொலிஸ் நிலையத்தின் முன்னாள் பொறுப்பதிகாரி ஒருவர், ஏற்கனவே கைது செய்யப்பட்டு, நீதிமன்றத்தில் முன்னிலைப்படுத்தப்பட்டதையடுத்து விளக்கமறியலில் வைக்கப்பட்டுள்ளார்.

மத்திய குற்றப்புலனாய்வு பணியகத்தின் (CCIB) பணிப்பாளர், சிரேஷ்ட பொலிஸ் அத்தியட்சகர் (SSP) கமல் ஆரியவன்ச ஊடகங்களுக்கு கருத்து தெரிவிக்கையில்,

19 சீன பிரஜைகளின் கடவுச்சீட்டுகளை மையமாகக் கொண்டதாகக் கூறப்படும் இலஞ்சம் மற்றும் பணப்பறிப்பு நடவடிக்கையில் குறித்த பெண் இடைத்தரகராக செயல்பட்டிருக்கலாம் என சந்தேகிக்கப்படுவதாக தெரிவித்துள்ளார்.

இதேவளை, “அவர் முன்பே பொலிஸில் சரணடையுமாறு அறிவிக்கப்பட்டிருந்தார். எனினும், பொலிஸார் அவரது வீட்டிற்குச் சென்றபோது அது பூட்டப்பட்டிருந்தது. தற்போது அவர் தலைமறைவாக உள்ளார்,” என்றும் அவர் குறிப்பிட்டுள்ளார்.

விசாரணையாளர்களின் தகவலின்படி, சீனப் பிரஜைகளுக்கும் பொறுப்பதிகாரிக்கும் இடையே தொடர்பாளராகச் செயல்பட்ட அந்தப் பெண், கடவுச்சீட்டுகளை மீளப் பெறுவதற்காக கோரப்பட்ட பணத்தை வசூலிப்பதில் உதவியதாக குற்றம் சாட்டப்பட்டுள்ளது.

மேலும், ஒவ்வொரு கடவுச்சீட்டிற்கும் ரூ.300,000 வீதம் அறவிடப்பட்டதாகவும், இதன் மூலம் 19 கடவுச்சீட்டுகளுக்காக ரூ.5.7 மில்லியனுக்கும் அதிகமான தொகை வசூலிக்கப்பட்டுள்ளதாகவும் தரவுகளில் கண்டறியப்பட்டுள்ளது.

புதிய இணைப்பு : சென்னை கோயம்பேட்டில் தனியார் கேளிக்கை விடுதியில் ஏற்பட்ட தகராறில் இலங்கை பெண் ஒருவர் கொலை செய்யப்பட்ட சம்பவம் தொடர்பில் 6 பேர் கைது செய்யப்பட்டுள்ளனர்.

இந்த சம்பவம் தொடர்பாக கோயம்பேடு பொலிஸார் வழக்கு பதிவு செய்து விசாரணை மேற்கொண்ட நிலையில், இந்த வழக்கில் தொடர்புடைய பாலகுரு, அவருடைய நண்பர் சுமன் சக்திவேல் உள்ளிட்ட 6 பேர் கைது செய்யப்பட்டுள்ளனர்.

இவர்கள் விபத்தினை ஏற்படுத்திய காரில் அரசியல் கட்சியொன்றின் கட்சி கொடி கட்டப்பட்டு இருந்துள்ளமையும் கண்டறியப்பட்டுள்ளது.

விழுப்புரம் மாவட்டத்தில் உள்ள இலங்கை அகதிகள் முகாமில் வசித்து வந்த 18 வயதான யான்சி என்ற இளம்பெண், இன்ஸ்டாகிராம் மூலம் சென்னையைச் சேர்ந்த பெண்ணுடன் பழகி வந்துள்ளார்.

இந்நிலையில், தோழியை பார்ப்பதற்காக சென்னை வந்த யான்சி, இரவில் கோயம்பேட்டில் உள்ள கேளிக்கை விடுதிக்கு சென்று நடனமாடியபோது மற்றொரு தரப்பினருடன் தகராறு ஏற்பட்டுள்ளது.

இருதரப்பினரையும் பவுன்சர்கள் வெளியேற்றிய நிலையில், சாலையில் வந்து இருதரப்பினரும் ஒருவரையொருவர் தாக்கிக்கொண்டுள்ளனர்.

இதனை தொடர்ந்து, இருசக்கர வாகனத்தில் சென்ற யான்சி மீது மற்றொரு தரப்பைச் சேர்ந்த குழுவினர் காரை வேகமாக ஏற்றிகொலை செய்துள்ளனர்.

முதலாம் இணைப்பு : சென்னையில் இடம்பெற்ற மோதலில் இலங்கையை சேர்ந்த தமிழ் பெண் ஒருவர் கொடூரமாக கொலை செய்யப்பட்டுள்ளார்.

சென்னை கோயம்பேட்டில் நேற்றிரவு (30.05.2026) இடம்பெற்ற இந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. சம்பவத்தில் இலங்கையை சேர்ந்த 18 வயதான யான்சி என்பவரே உயிரிழந்துள்ளார்.

இன்று விடுமுறையை முன்னிட்டு நேற்றிரவு சென்னை கோயம்பேட்டில் உள்ள ஒரு பாரில் இளம்பெண் ஒருவர் நடனம் ஆடிய நிகழ்ச்சியின் போது இரு தரப்பினரிடையே திடீரென வாக்குவாதம் ஏற்பட்டு, அது பெரும் மோதலாக மாறியுள்ளது.

இந்த நிலையில், அந்த இளம்பெண் அங்கிருந்து வெளியேறி, தன்னுடைய இரு சக்கர வாகனத்தில் சென்றபோது, பாரில் இருந்த ஒரு கும்பல் அவரை துரத்திச்சென்று மோட்டார் சைக்கிள் மீது காரை ஏற்றியுள்ளனர்.

இந்த சம்பவத்தில் இளம்பெண் காரின் அடியில் சிக்கி சம்பவ இடத்திலேயே பரிதாபமாக உயிரிழந்துள்ளார். குறித்த பெண்ணுடன் மோட்டார் சைக்கிளில் பின்னால் சென்ற சிறுமி பலத்த காயமடைந்து தற்போது தீவிர சிகிச்சைக்காக வைத்தியசாலையில் அனுமதிக்கப்பட்டுள்ளார்.

இச்சம்பவம் குறித்து தகவல் அறிந்த கோயம்பேடு பொலிஸார் உடனடியாக விரைந்து உடலைக் கைப்பற்றியுள்ளனர்.

இந்த கொலை மற்றும் மோதல் சம்பவம் தொடர்பாக, சந்தேகத்தின் பேரில் ஒருவர் கைது செய்யப்பட்டுள்ள நிலையில் பொலிஸார் தீவிர விசாரணைகளை மேற்கொண்டு வருகின்றனர்.

மட்டக்களப்பு – ஏறாவூர் பொலிஸ் பிரிவிற்குட்பட்ட நீதிமன்ற வீதியில் உள்ள வீட்டில் தந்தை இல்லாத நேரத்தில் தனது 11 வயது சகோதரி கையடக்க தொலைபேசியை தர மறுத்த காரணத்தால் சகோதரனே அவரை கழுத்தை நெரித்து கொலை செய்த சம்பவம் அப்பகுதி மக்களிடையே பெரும் பரபரப்பை ஏற்படுத்தியுள்ளது.

இந்த சம்பவம் தொடர்பில் முன்னெடுக்கப்பட்ட விசாரணையில் இன்று (30.05.2026) குறித்த சிறுவன் ஏறாவூர் பொலிஸாரால் கைது செய்யப்பட்டுள்ளார். சம்பவம் தொடர்பில் மேலும் தெரியவருவதாவது,

கடந்த வியாழக்கிழமை (28.05.2026) மாலையில் ஏறாவூர் 5 பிரிவு நீதிமன்ற வீதியைச் சேர்ந்த சத்யானந்தன் சதிஷா, என்ற சிறுமி குளியலறை தண்ணீர் தொட்டியில் விழுந்து உயிரிழந்த நிலையில் சடலமாக மீட்கப்பட்டார்.

இவரின் தாயார் வெளிநாட்டில் வேலைவாய்ப்பு பெற்று சென்றுள்ளதுடன், தந்தையின் பராமரிப்பில் 14 வயது சிறுவனும், 11 வயது சிறுமியும் வளர்ந்து வந்துள்ளனர்.

சம்பவ தினத்தன்று தந்தை வேலைக்காக வெளியில் சென்று வீடு திரும்பும் பொழுது தண்ணீர் தொட்டிக்குள் குறித்த சிறுமி சடலமாக கிடந்து, மீட்கப்பட்டு வைத்தியசாலைக்கு கொண்டு சென்ற வேளையில், குறித்த சிறுமி ஏற்கனவே உயிரிழந்து விட்டதாக மருத்துவர்கள் தெரிவித்துள்ளனர்.

இதனைத் தொடர்ந்து முன்னெடுக்கப்பட்ட விசாரணையில், சிறுமி தான் வைத்திருந்த கையடக்க தொலைபேசியை தர மறுத்தக் காரணத்தினால் சகோதரனுக்கும், சிறுமிக்கும் இடையே வாய்த்தர்க்கம் ஏற்பட்டுள்ளது. இதன்போது, சகோதரியின் கழுத்தை நெரித்ததையடுத்து அந்த இடத்திலேயே சிறுமி உயிரிழந்துள்ளார்.

அதன்பின்னர், சகோதரியை இழுத்து சென்று குளியலறையில் உள்ள தண்ணீர் தொட்டியில் போட்டுவிட்டு ஒன்றும் தெரியாதது போன்று வீட்டில் இருந்து பக்கத்து வீட்டுக்கு சென்றுள்ளார்.

அந்த சமயத்தில் வெளியில் இருந்து வீட்டுக்குள் வந்த தந்தை வீட்டில் பிள்ளைகளை காணவில்லை என தேடிய வேளையில், சம்பவம் தொடர்பில் தெரியவந்துள்ளது.

இந்நிலையில், சிறுமி உயிரிழப்பு தொடர்பில், 14 வயது சிறுவன் மீது சந்தேகம் கொண்ட பொலிஸார் மேற்கொண்ட விசாரணையில், சிறுவன் தான் சகோதரியை கொலை செய்துள்ளார் என்பது தெளிவாகியுள்ளது.

குறித்த சிறுவன் கைது செய்யப்பட்டுள்ளதாகவும், நீதிமன்றில் முன்னிலைப்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.

சம்பவம் தொடர்பான மேலதிக விசாரணைகளை ஏறாவூர் பொலிஸ் நிலைய பெரும் குற்றத்தடுப்பு பிரிவினர் மேற்கொண்டு வருகின்றனர்.

அனுராதபுரம் – விமான நிலைய வீதியில் சம்பவித்த கோர விபத்தில், பெண் உயிரிழந்துள்ளதாக பொலிஸார் தெரிவித்துள்ளனர்.

உயிரிழந்தவர் அனுராதபுரத்தை சேர்ந்த ஆர். எம். பாக்யா நிலுபுலி வடுகொடபிட்டிய என்ற 32 வயதுடைய கர்ப்பிணிப் பெண் என தெரியவந்துள்ளது.

இவர் அநுராதபுரம் மத்திய நுவரகம்பலாத பிரதேச செயலகத்திற்கு உட்பட்ட பகுதியில் கிராம உத்தியோகத்தராகக் கடமையாற்றி வந்தார்.

கடந்த 18ஆம் திகதி கவரக்குளம பகுதியில் இருந்து அநுராதபுரம் நோக்கி, பெண் மற்றொரு பெண்ணுடன் மோட்டார் சைக்கிளில் பயணித்துக் கொண்டிருந்த போது விபத்து ஏற்பட்டுள்ளது.

எதிர் திசையில் வந்த சிறிய லொறி ஒன்று மோட்டார் சைக்கிளுடன் மோதியதில் இந்த விபத்து நேர்ந்துள்ளது.

விபத்தில் பலத்த காயமடைந்த மோட்டார் சைக்கிளை ஓட்டிச் சென்ற கிராம உத்தியோகத்தரும், பின்னால் அமர்ந்து சென்ற பெண்ணும் மருத்துவமனையில் அனுமதிக்கப்பட்டனர்.

அங்கு தீவிர சிகிச்சைப் பிரிவில் சிகிச்சை பெற்று வந்த நிலையிலேயே கர்ப்பிணிப் பெண் உயிரிழந்துள்ளதாக பொலிஸார் குறிப்பிட்டுள்ளனர். இதன்போது அவரது வயிற்றில் இருந்த குழந்தையும் உயிரிழந்து விட்டதாக மருத்துவமனை பேச்சாளர் ஒருவர் தெரிவித்தார்.

விபத்து தொடர்பாக சிறிய லொறியின் ஓட்டுநரான 27 வயதுடைய இளைஞர் கைது செய்யப்பட்டுள்ளார். இந்த விபத்து குறித்து கவரக்குளம பொலிஸ் நிலையத்தின் போக்குவரத்துப் பிரிவு அதிகாரிகள் குழுவினர் மேலதிக விசாரணைகளை மேற்கொண்டு வருகின்றனர்.

யாழ்ப்பாணம் காங்கேசன்துறையிலிருந்து கொழும்பு நோக்கி பயணித்த சொகுசு ரயிலில் மோதி பெண் ஒருவர் உயிரிழந்தார். சாலியபுர பகுதியில் உள்ள பாதுகாப்பற்ற ரயில் கடவையிலேயே இந்த விபத்து நேர்ந்துள்ளது.

இவ்வாறு விபத்தில் உயிரிழந்தவர் சாலியபுர பகுதியைச் சேர்ந்த 29 வயதுடைய இரண்டு பிள்ளைகளின் தாய் என தெரியவந்துள்ளது.

சுயதொழிலில் ஈடுபட்டு வந்த அவர், அநுராதபுரத்திலுள்ள கடை ஒன்றுக்குச் சென்று ‘ஐஸ் பக்கெட்டுகளை’ விற்பனை செய்துவிட்டு, மோட்டார் சைக்கிளில் மீண்டும் வீடு திரும்பிக் கொண்டிருந்த போதே இவ்வாறு விபத்துக்குள்ளாகியுள்ளார்.

இந்நிலையில் குறித்த ரயில் கடவையில் பாதுகாப்பு கதவுகள் இல்லை எனவும், அங்கு எந்தவொரு காவலரும் பணியில் அமர்த்தப்படவில்லை எனவும் பிரதேசமக்கள் குற்றம் சுமத்துகின்றனர்.

வள்ளத்திலிருந்து தவறி விழுந்து அதிபர் ஒருவர் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. இந்தச் சம்பவம் நயினாதீவு – குறிகட்டுவான் பகுதியில் நேற்று இடம்பெற்றுள்ளது.

நயினாதீவை பூர்வீகமாகக் கொண்ட அதிபரான நடராசா மயூரன் என்பவரே மேற்படி பரிதாபமாக உயிரிழந்தவராவார்.

அதிபரும் மற்றுமொரு ஆசிரியரும் , பயணிகள் படகினை தவறவிட்டமையால் , கடற்தொழிலாளி ஒருவரின் சிறு படகில் நயினாதீவில் இருந்து குறிகட்டுவான் நோக்கி பயணித்துள்ளனர்.

அதன் போது, கடற்காற்று காரணமாக கடல் கொந்தளிப்பாக காணப்பட்ட நிலையில், படகு கடலையில் அடிப்பட்டமையால் , படகில் இருந்து அதிபர் நிலை தடுமாறி கடலில் விழுந்துள்ளார்.

அதனை அடுத்து, உடனடியாக செயற்பட்ட படகோட்டி அதிபரை மீட்க முற்பட்ட நிலையில் , அவர் உயிரிழந்துள்ளார். சம்பவம் தொடர்பில் ஊர்காவற்துறை பொலிஸார் விசாரணைகளை முன்னெடுத்துள்ளனர்.

இவர் புங்குடுதீவு றோமன் கத்தோலிக்க பாடசாலை முன்னாள் அதிபரும், நயினாதீவு கணேச மகா வித்தியாலய தற்போதைய அதிபருமாவார்.

பிரித்தானிய புங்குடுதீவு நலன்புரிச் சங்கத்தினால் புங்குடுதீவில் மேற்கொள்ளப்படும் கல்வித் திட்டங்களுக்கு குறித்த அதிபர் பேருதவியாக செயற்பட்டார். குறித்த அதிபரின் இழப்பு புங்குடுதீவு மண்ணுக்குப் பேரிழப்பாகும்.

ஹட்டன், டிக்கோயாவில் வயோதிப தம்பதியினர் இரட்டைக் கொலை செய்யப்பட்ட வழக்கில் தேடப்பட்டு வந்த சந்தேக நபர் மீண்டும் கைது செய்யப்பட்டதாக செய்திகள் வெளியான நிலையில் அவர் இன்னும் கைது செய்யப்படவில்லை என்று பொலிஸார் தெரிவித்துள்ளனர்.

சந்தேக நபர் உடல்நலக்குறைவு காரணமாக நேற்று (27) கைது செய்யப்பட்டு கண்டி தேசிய மருத்துவமனைக்கு கொண்டு செல்லப்பட்டுள்ளார்.

இன்னும் தலைமறைவு

இருப்பினும், அவர் சிறை அதிகாரிகளின் கண்காணிப்பில் இருந்தபோது தப்பித்து, இன்னும் தலைமறைவாகவே உள்ளார்.

அவர் மீண்டும் கைது செய்யப்பட்டதாகக் கூறும் ஊடகச் செய்திகளை பொலிஸார் மறுத்ததுடன், தப்பிச் சென்ற சந்தேக நபர் இன்னும் கைது செய்யப்படவில்லை என்றும் தெளிவுபடுத்தியுள்ளனர்.

ஹட்டன்-டிக்கோயா நகரப் பகுதியில் கணவன்-மனைவியைக் கொலை செய்துவிட்டு, தங்க நகைகளுடன் தப்பிச் சென்றதாக சந்தேக நபர் மீது குற்றம் சாட்டப்பட்டுள்ளது.

நகரில் உள்ள ஒரு கடைக்குள் வசித்து வந்த தம்பதியினர், வெள்ளிக்கிழமை (22) அன்று கொலை செய்யப்பட்ட நிலையில் கண்டெடுக்கப்பட்டமை குறிப்பிடத்தக்கது.