யாழ்ப்பாணம் – வடமராட்சி பகுதியில் வெளிநாட்டு பிரஜையொருவர் ஈழத்து பெண்ணை திருமணம் செய்து மாட்டு வண்டியில் அழைத்து வந்த காணொளியொன்று சமூக வலைத்தளங்களில் பரவி வருகின்றது.
சம்பவம் தொடர்பில் மேலும் தெரியவருகையில், யாழ்ப்பாணத்தை சேர்ந்த பெண்ணொருவரை, வெளிநாட்டவர் ஒருவர் திருமணம் செய்துள்ளார். அதன் பின்னர், தம்பதிகள் இருவரும் தமிழர்களின் கலாசார உடையில், மாட்டு வண்டியில் அப்பகுதியில் வலம் வந்துள்ளனர்.
இந்த சம்பவம் அப்பகுதி மக்களிடையே பரவலாக பேசப்பட்டுள்ளதுடன், இவர்களின் திருமணத்திற்கு பலரும் வாழ்த்துக்களை தெரிவித்துள்ளனர்.
வவுனியா செக்கடிப்பிலவு பகுதியில் இன்று மாலை பெய்த கடும் மழை மற்றும் இடிமின்னல் காரணமாக, மரத்தின் கீழ் ஒதுங்கிய 20 வயது இளைஞர் ஒருவர் மின்னல் தாக்கி பரிதாபமாக உயிரிழந்தார்.
இன்று மாலை வவுனியாவின் பல்வேறு பகுதிகளில் பலத்த இடிமின்னலுடன் கூடிய கனமழை பொழிந்தது. இதன்போது செக்கடிப்பிலவு பகுதியைச் சேர்ந்த ஜோசப் அன்ரணி (வயது 20) என்ற இளைஞர் அங்குள்ள மைதானத்தில் நின்றுகொண்டிருந்துள்ளார்.
திடீரென மழை தீவிரமடைந்ததால், மழையில் இருந்து தப்பிப்பதற்காக அவர் அருகிலிருந்த ஒரு மரத்தின் கீழ் சென்று ஒதுங்கியுள்ளார். அப்போது எதிர்பாராதவிதமாக அவரை மின்னல் தாக்கியதில் அவர் சம்பவ இடத்திலேயே உயிரிழந்தார்.
இடிமின்னல் மழை பெய்யும் நேரங்களில் திறந்தவெளிகளிலோ அல்லது மரங்களின் கீழோ ஒதுங்குவதைத் தவிர்க்குமாறு அதிகாரிகள் மற்றும் பாதுகாப்புத் துறையினர் பொதுமக்களுக்குத் தொடர்ந்து விழிப்புணர்வு அறிவுறுத்தல்களை வழங்கி வருகின்றனர்.
நாட்டின் மத்திய, சப்ரகமுவ, ஊவா, கிழக்கு மற்றும் வடமத்திய மாகாணங்களுக்கும் மன்னார் மாவட்டத்துக்கும் பலத்த மின்னல் தொடர்பிலான எச்சரிக்கை அறிவித்தல் ஒன்றை வளிமண்டலவியல் திணைக்களம் வெளியிட்டுள்ளது.
இன்று (1) முற்பகல் 10.30 க்கு வெளியிடப்பட்டுள்ள இந்த எச்சரிக்கை அறிவித்தல், இன்று இரவு 11.30 வரை செல்லுபடியாகும் எனக் குறிப்பிடப்பட்டுள்ளது.
அதன்படி, குறிப்பிடப்பட்டுள்ள பகுதிகளில் மாலையில் அல்லது இரவு வேளையில் ஆங்காங்கே இடியுடன் கூடிய மழை பெய்வதுடன், பலத்த மின்னல் தாக்கம் ஏற்படுவதற்கான அதிக சாத்தியக்கூறுகள் காணப்படுகின்றன.
இடியுடன் கூடிய மழை பெய்யும் வேளைகளில் அந்தப் பகுதிகளில் தற்காலிகமாகப் பலத்த காற்றும் வீசக்கூடும் என்பதால், மின்னல் தாக்கங்களினால் ஏற்படும் விபத்துக்களைக் குறைத்துக்கொள்ளத் தேவையான பாதுகாப்பு நடவடிக்கைகளை முன்னெடுக்குமாறு வளிமண்டலவியல் திணைக்களம் பொதுமக்களிடம் கேட்டுக்கொண்டுள்ளது.
புதுடெல்லியில், 75 வயது மூதாட்டி ஒருவரிடம் ‘டிஜிட்டல் கைது’ செய்ததாகக் கூறி, கம்போடியாவைச் சேர்ந்த மர்மக் கும்பல் ரூ. 2.48 கோடியைக் கொள்ளையடித்த சம்பவம் பெரும் பரபரப்பை ஏற்படுத்தியுள்ளது.
சம்பவம் டொடர்பில் இந்திய ஊடகங்கள் குறிப்பிட்டுள்ளதாவது, புதுடெல்லியின் வசந்த் குஞ்ச் பகுதியைச் சேர்ந்தவர் 75 வயது மூதாட்டி விபா. இவர் மார்பகப் புற்றுநோயால் பாதிக்கப்பட்டு, அதிலிருந்து மீண்டு வந்தவர் ஆவார்.
இந்த நிலையில், கடந்த ஏப்ரல் 6ஆம் திகதி விபாவின் லேண்ட்லைன் எண்ணிற்கு ஒரு போலி அழைப்பு வந்துள்ளது. அதில் பேசிய நபர், விபாவின் மொபைல் எண் சட்டவிரோதப் பணப்பரிமாற்றம் மற்றும் மனிதக் கடத்தல் போன்ற பயங்கரவாத வழக்குகளில் சிக்கியுள்ளதாகக் கூறி மிரட்டியுள்ளார்.
பயந்துபோன மூதாட்டியை, சிபிஐ மற்றும் அமலாக்கத்துறை அதிகாரிகள் போல் நடித்து கம்போடியாவைச் சேர்ந்த சர்வதேசக் கும்பலொன்று வாட்ஸ்அப் காணொளி அழைப்பு (Video Call) மூலமாக 22 நாட்களுக்கும் மேலாக, 24 மணி நேரமும் ஆன்லைனில் சிறைபிடித்து (டிஜிட்டல் கைது) வைத்துள்ளது. மேலும், அவர் யாரிடமும் பேசக்கூடாது என்றும், மீறினால் சிறையில் அடைப்போம் என்றும் மிரட்டியுள்ளனர்.
விசாரணை என்ற பெயரில் மூதாட்டியின் வீட்டிற்கே தங்களது போலி ஆட்களை அனுப்பிய மோசடிக் கும்பல், அவரை வற்புறுத்தி வசந்த் குஞ்ச் பகுதியில் இருந்த அவரது வீட்டை விற்க வைத்து ரூ. 2.40 கோடியைப் பறித்துக்கொண்டது.
வீட்டுப் பணம் மட்டுமன்றி, அவரிடமிருந்த 83.5 கிராம் தங்க நகைகளைக் (வளையல்கள், செயின் மற்றும் கம்மல்கள்) கட்டாயப்படுத்தி முத்தூட் ஃபின்கார்ப் நிறுவனத்தில் அடகு வைக்கச் செய்து சுமார் ரூ. 4.95 லட்சத்தையும், அவரது பேங்க் ஒஃப் மகாராஷ்டிரா கணக்கிலிருந்து ஆன்லைன் மூலமாக ரூ. 3 லட்சத்தையும் அந்தக் கும்பல் சுருட்டியுள்ளது.
இவ்வாறாக, வீடு, நகைக்கடன் மற்றும் வங்கிச் சேமிப்பு என அனைத்தையும் சேர்த்து ஒட்டுமொத்தமாக ரூ. 2.48 கோடிக்கும் அதிகமான பணத்தை அந்த மூதாட்டி கொள்ளையர்களிடம் இழந்துள்ளார்.
வவுனியாவில் சிறுவர் தினத்தை முன்னிட்டு வித்தியாசமான முறையில் முன்னெடுக்கப்பட்ட 100 அடி நீளமான நேரடி ஓவியம் வரையும் நிகழ்வு பலரது கவனத்தையும் ஈர்த்துள்ளது. வவுனியா சின்னபுதுக்குளம் பகுதியில் அமைந்துள்ள Kids Creative Art Centre இற்கு அருகாமையில், வீதியோரத்தில் இந்த பிரம்மாண்ட கலை முயற்சி முன்னெடுக்கப்பட்டது.
இலங்கையில் முதன்முறையாக 100 அடி நீளமான LIVE PAINTING முயற்சியாக முன்னெடுக்கப்பட்ட இந்த நிகழ்வில் Kids Creative Art Centre மாணவர்கள், அவர்களது பெற்றோர்கள் மற்றும் கலை ஆர்வலர்கள் இணைந்து பங்கேற்றனர்.
நீண்ட வெற்றிடப் பரப்பில் சிறுவர்கள் தங்களது கற்பனைகளையும் திறமைகளையும் ஓவியங்களாக வெளிப்படுத்தியதுடன், பல்வேறு வண்ணங்களை பயன்படுத்தி பிரம்மாண்டமான கலைப்படைப்பை உருவாக்கினர்.
ஒரு குழந்தை ஓவியம் வரைய, மற்றொரு குழந்தை அதற்கு வண்ணம் தீட்டும் வகையில் மாணவர்கள் உற்சாகத்துடன் பங்கேற்றனர். சிறுவர்களின் கலை ஆர்வத்திற்கு பெற்றோர்களும் உற்சாகம் அளித்ததுடன், குழந்தைகளின் திறமைகளை நேரடியாக பார்வையிடும் வாய்ப்பையும் இந்த நிகழ்வு ஏற்படுத்தியது.
நூற்றுக்கணக்கான சிறுவர் கற்பனைகள் ஒரே இடத்தில் ஒன்றிணைந்து 100 அடி நீளமான ஓவியமாக உருவெடுத்தமை நிகழ்வின் முக்கிய சிறப்பம்சமாக அமைந்தது. சிறுவர்களுக்காக ஐஸ்கிரீம் உள்ளிட்ட சிறப்பு ஏற்பாடுகளும் செய்யப்பட்டிருந்ததுடன், பல்வேறு கண்கவர் கலைச்சித்திரங்கள் மற்றும் அழகிய ஓவியங்களும் காட்சிப்படுத்தப்பட்டன.
மாணவர்களின் கலைத்திறனை அடையாளம் கண்டு, அவர்களது கற்பனைக்கு மிகப்பெரிய களத்தை உருவாக்கி இந்த முயற்சியை வழிநடத்திய Kids Creative Art Centre ஆசிரியர் சுப்பிரமணியம் கௌரிஷன் அவர்களுக்கு பெற்றோர்கள் மற்றும் மாணவர்கள் சார்பில் பாராட்டுகளும் தெரிவிக்கப்பட்டன.
சிறுவர்களிடம் காணப்படும் திறமைகளை ஊக்குவிப்பதுடன், அந்த திறமைகளை சமூகத்தின் முன்னிலையில் வெளிக்கொண்டு வருவதற்கான வாய்ப்புகளை உருவாக்குவதே இவ்வாறான முயற்சிகளின் நோக்கமாக அமைந்துள்ளது.
சிறுவர் தினக் கொண்டாட்டத்தை வெறுமனே பொழுதுபோக்கு நிகழ்வாக மட்டுப்படுத்தாமல், சிறுவர்களின் படைப்பாற்றல், கற்பனை மற்றும் கலைத்திறனை வெளிப்படுத்தும் நிகழ்வாக மாற்றிய இந்த முயற்சி வவுனியாவில் பலரது கவனத்தையும் பெற்றுள்ளது.
மாணவர்கள் மற்றும் பெற்றோர்கள் ஒன்றிணைந்து உருவாக்கிய இந்த பிரம்மாண்ட ஓவியம், சிறுவர்களின் திறமையை வெளிப்படுத்தும் ஒரு கலைப்படைப்பாக மட்டுமன்றி, அவர்களது கூட்டு முயற்சியின் அடையாளமாகவும் அமைந்துள்ளது.
இந்நிலையில், வவுனியாவில் முன்னெடுக்கப்பட்ட இந்த 100 அடி LIVE PAINTING முயற்சி எதிர்காலத்தில் உலக சாதனை முயற்சியாக முன்னெடுக்கப்படவுள்ளதாகவும் தெரிவிக்கப்பட்டுள்ளது. இலங்கையில் முதன்முறையாக முன்னெடுக்கப்பட்டதாக தெரிவிக்கப்படும் இந்த முயற்சி, வவுனியாவிலிருந்து சிறுவர்களின் கலைத்திறனை உலகளாவிய ரீதியில் கொண்டு செல்லும் ஒரு புதிய பயணத்திற்கான ஆரம்பமாக அமையும் என எதிர்பார்க்கப்படுகிறது.
குருநாகல் – கல்கமுவ பகுதியில் கூடாரமொன்றினை காட்டு யானை தாக்கியதில் தந்தை உயிரிழந்துள்ளதுடன், மகன் படுகாயமடைந்துள்ளார். நேற்று காலை (01.10.2026) இந்த சம்பவம் இடம்பெற்றுள்ளது.
இதன்போது அப்பகுதியினை சேர்ந்த 54 வயதுடைய தந்தை உயிரிழந்துள்ளதுடன், அவரது 18 வயது மகன் கவலைக்கிடமான நிலையில் அனுராதபுர போதனா வைத்தியசாலையில் அனுமதிக்கப்பட்டுள்ளார்.
இவர்கள் குறித்த இடத்தில் சிறிய கூடாரம் அமைத்து, நீண்ட காலமாக தர்பூசணிகள் மற்றும் காய்கறிகளை விற்பனை செய்து பிழைப்பு நடத்தி வந்துள்ளனர். இதன்போது கூடாரத்தில் நித்திரைகொள்ளும் போது அதிகாலை அப்பகுதிக்கு வந்த காட்டு யானை இவர்களை தாக்கியுள்ளது.
வவுனியா மாவட்ட செயலகத்தில் மாவட்ட அனர்த்த முகாமைத்துவக் குழுக் கூட்டம் சிறப்பாக நடைபெற்றது. தற்போதைய எல் நினோ காலநிலை நிலைமைகள் மற்றும் எதிர்வரும் 2026 ஆம் ஆண்டிற்கான வடகிழக்கு பருவமழைக் காலத்தில் ஏற்படக்கூடிய பாதகமான காலநிலை மாற்றங்களை எதிர்கொள்வது குறித்து இதில் விரிவாகக் கலந்துரையாடப்பட்டது.
எல் நினோ தாக்கத்தால் மழைவீழ்ச்சி முறைகளில் ஏற்படும் மாற்றங்கள், திடீர் வெள்ளப்பெருக்கு, தீவிர வறட்சி மற்றும் ஏனைய சாத்தியமான இயற்கை அனர்த்தங்கள் குறித்து விசேட கவனம் செலுத்தப்பட்டது.
பாதகமான சூழ்நிலைகளை எதிர்கொள்ளச் சம்பந்தப்பட்ட அனைத்துத் துறைசார் நிறுவனங்களும் முழுமையான தயார்நிலையில் இருக்க வேண்டும் என அறிவுறுத்தப்பட்டது. மேலும் அனர்த்த காலங்களில் நிறுவனங்களுக்கு இடையே திறம்படச் செயல்படும் பயனுள்ள ஒருங்கிணைப்பு பொறிமுறையை நடைமுறைப்படுத்துவதன் முக்கியத்துவமும் வலியுறுத்தப்பட்டது.
இக்கலந்துரையாடலில் வவுனியா மாவட்டச் செயலாளர் பி. ஏ.சரத்சந்திர, மேலதிக அரசாங்க அதிபர் நா.கமலதாசன், முப்படையினர், நீர்ப்பாசனத் திணைக்கள உத்தியோகத்தர்கள் மற்றும் அனர்த்த முகாமைத்துவப் பிரிவு உத்தியோகத்தர்கள் உள்ளிட்ட பல முக்கிய அதிகாரிகள் கலந்துகொண்டனர்.
பிரித்தானியாவைச் சேர்ந்த சதுரங்க மேதை சிறுமி ஒருவர், பெண்கள் கிராண்ட்மாஸ்டர் (WGM) பட்டத்தை வென்ற வரலாற்றிலேயே மிக இளம் வயது வீராங்கனை என்ற சாதனையைப் படைத்துள்ளார்.
வடமேற்கு லண்டனைச் சேர்ந்த இந்திய வம்சாவளியான 11 வயதுடைய போதனா சிவானந்தன் என்பவரே மிக இளவயதில் கிராண்ட்மாஸ்டர் பட்டத்தை வென்றவர் ஆவார்.
உஸ்பெகிஸ்தானின் சமர்கண்டில் நடைபெற்ற 46அவது சதுரங்க ஒலிம்பியாட் போட்டியில் இங்கிலாந்தை பிரதிநிதித்துவப்படுத்தி, தனது மூன்றாவது மற்றும் இறுதி பெண்கள் கிராண்ட் மாஸ்டர் (WGM) தகுதியைப் பெற்றார்.
இது ஒரு சான்றளிக்கப்பட்ட பட்டத்துக்குரிய நிலை செயல்திறனாகும் என சர்வதேச சதுரங்க சம்மேளனம் (FIDE) உறுதிப்படுத்தியுள்ளது. இந்த சாதனையையிட்டு பெரு மகிழ்ச்சி அடைவதாக சர்வதேச சதுரங்க சம்மேளனத்திடம் தெரிவித்த போதனா சிவானந்தன், ‘தொடர்ந்து வரலாறு படைக்க’ விரும்புவதாகவும் கூறினார்.
ஏற்கனவே, பிரித்தானியாவின் மிக இளவயது மகளிர் சதுரங்க சம்பியனாகவும், எந்தவொரு விளையாட்டிலும் சர்வதேச அளவில் இங்கிலாந்தைப் பிரதிநிதித்துவப்படுத்திய மிக இளவயது நபராகவும் ஆகியுள்ள இந்தப் பாடசாலை மாணவியின் குறிப்பிடத்தக்க வளர்ச்சியில் இது சமீபத்திய மைல்கல் ஆகும்.
ஹரோவைச் சேர்ந்த போதனா சிவானந்தன், இங்கிலாந்தின் முதன்மை வீரருக்கு ஒதுக்கப்பட்ட இடமான முதலாவது சதுரங்க பலகையில் அனைத்து 11 சுற்றுகளிலும் விளையாடி, எட்டு புள்ளிகளுடன் போட்டியை நிறைவு செய்தார்.
WGM பட்டத்திற்குத் தேவையான 2300 மதிப்பீட்டு வரம்பை, தனது மூன்றாவது மற்றும் இறுதி தகுதியைப் பெறுவதற்கு முன்பே அவர் கடந்திருந்தார்.
வரலாறு படைப்பது குறித்து ஞாயிற்றுக்கிழமை FIDE பத்திரிகைக்கு அவர் அளித்த பேட்டியில், ‘இதைச் செய்வதில் எனக்கு மகிழ்ச்சிதான், ஆனால், இத்தோடு நின்றுவிடாமல், தொடர்ந்து முன்னேறி வரலாறு படைக்கவும் விரும்புகிறேன்’ என்றார்.
மன்னார் – மதவாச்சி பிரதான வீதி மடு சந்தியில் இருந்து மடு தேவாலயத்திற்கு செல்லும் பிரதான வீதியில் இரண்டு சிறுத்தை புலிகள் நடமாடி வருவதாக நேரில் அப்பிரதேச மக்கள் தெரிவிப்பதாக தெரிவிக்கப்பட்டுள்ளது. குறித்த சிறுத்தை புலிகள் நடமாட்டம் தொடர்பாக காணொளிகளும் வெளியாகி உள்ளது.
கடந்த சில தினங்களாக மடு சந்தியில், இருந்து மடு தேவாலயத்திற்கு செல்லும் வீதிக்கு அருகில் காணப்படும் இந்த சிறுத்தை புலிகள் மனித நடமாட்டத்தை கண்டு அச்சமின்றி காணப்படுவதாகவும், வாகனங்களுக்கு அருகிலும் வருவதாகவும் தெரிவிக்கப்படுகிறது.
எனவே இரவு நேரங்களில் மடுத்திருத்தலத்திற்குச் செல்லும் பக்தர்கள், பயணிகள் மற்றும் அப்பகுதி மக்கள் மிகுந்த அவதானத்துடன் பயணிக்குமாறு நேரில் கண்டவர்கள் கோரிக்கை விடுத்துள்ளனர். தேவையற்ற வகையில் வாகனங்களை நிறுத்தி சிறுத்தைகளைப் பார்ப்பதையோ புகைப்படம், வீடியோ எடுப்பதற்காக அருகில் செல்வதை தவிர்க்க வேண்டும் என அவர்கள் வேண்டுகோள் விடுத்துள்ளனர்.
கர்நாடக மாநிலம் பெலகாவி மாவட்டத்தில், விவாகரத்து கேட்டுக் கோர்ட்டை நாடிய காதல் மனைவியை வழியிலேயே அழைத்துச் சென்று கணவரே கொடூரமாக அடித்துக் கொன்ற சம்பவம் பெரும் அதிர்ச்சியை ஏற்படுத்தியுள்ளது.
பெலகாவி மாவட்டம் பைலஹொங்கலா தாலுக்கா அமத்தூரு கிராமத்தைச் சேர்ந்த ராஜு மடமகேரி என்பவரும், அதே பகுதியைச் சேர்ந்த லட்சுமி மடமகேரி (31) என்பவரும் காதலித்து கடந்த ஐந்து ஆண்டுகளுக்கு முன்பு திருமணம் செய்துகொண்டனர்.
கடந்த சில ஆண்டுகளாக இருவருக்கும் இடையே குடும்பத் தகராறும் கருத்து வேறுபாடுகளும் ஏற்பட்டு வந்துள்ளன. இதனால் கணவரிடம் இருந்து விவாகரத்து கோரி லட்சுமி பிரிந்து வாழ்ந்து வந்ததாகக் கூறப்படுகிறது.
சம்பவத்தன்று லட்சுமி பணிபுரியும் இடத்திற்குச் சென்ற ராஜு, அவரை வீட்டில் விட்டுவிடுவதாகக் கூறி பைக்கில் அழைத்துச் சென்றுள்ளார். பின்னர் அமத்தூரு பகுதிக்கு அருகில் வைத்து, தான் மறைத்து வைத்திருந்த கல்ல மற்றும் தடியால் லட்சுமியைத் தாக்கிச் சம்பவ இடத்திலேயே கொன்றுவிட்டுத் தப்பியோடியுள்ளார்.
தகவலறிந்து விரைந்து வந்த பைலஹொங்கலா காவல்துறையினர் உடலைக் கைப்பற்றிப் பிரேத பரிசோதனைக்கு அனுப்பி வைத்தனர். மேலும், தலைமறைவாக உள்ள கணவர் ராஜுவைக் காவல்துறையினர் தீவிரமாகத் தேடி வருகின்றனர்.
ஆந்திர மாநிலம் நெல்லூரில் வாட்டர் டேங்கில் இருந்து கசிந்து, வீட்டில் தேங்கியிருந்த தண்ணீரில் மின்கசிவு ஏற்பட்டதில் 11 மற்றும் 7 வயதுடைய சகோதரிகள் பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
நெல்லூர் மாவட்டம் ஹரிநாதபுரத்தில் உள்ள ஒரு வீட்டில் வாட்டர் டேங்க் நிரம்பி தண்ணீர் வெளியேறியதாக கூறப்படுகிறது. இதனால் வீட்டின் தரைப்பகுதியில் தண்ணீர் தேங்கியுள்ளது. அந்த நேரத்தில் வீட்டின் மெயின் மின் இணைப்பு துண்டிக்கப்படாமல் இருந்ததாகவும், இதனால் தேங்கிய தண்ணீரில் மின்கசிவு ஏற்பட்டதாகவும் தகவல் வெளியாகியுள்ளது.
அப்போது வீட்டில் இருந்த 11 வயது ஜோதி உரிலகண்டி மற்றும் அவரது 7 வயது சகோதரி அமுல்யா ஆகியோர் தேங்கியிருந்த தண்ணீரில் சிக்கியுள்ளனர். எதிர்பாராதவிதமாக மின்சாரம் தாக்கியதில் இருவரும் சம்பவ இடத்திலேயே உயிரிழந்ததாக கூறப்படுகிறது.
சம்பவம் குறித்து தகவல் அறிந்ததும் மீட்புக் குழுவினர் மற்றும் அதிகாரிகள் அங்கு விரைந்து சென்றனர். உயிரிழந்த சிறுமிகளின் உடல்கள் மீட்கப்பட்டு, நெல்லூர் ஜிஜி அரசு மருத்துவமனைக்கு உடற்கூறாய்வுக்காக அனுப்பி வைக்கப்பட்டன.
ஒரே குடும்பத்தைச் சேர்ந்த இரண்டு சிறுமிகள் உயிரிழந்த சம்பவம் ஹரிநாதபுரம் பகுதி மக்களிடையே பெரும் சோகத்தை ஏற்படுத்தியுள்ளது. வீட்டில் தண்ணீர் தேங்கியிருக்கும் நேரங்களில் மின் இணைப்புகளை உடனடியாக துண்டித்து, பாதுகாப்பான முறையில் மின்சாரக் கசிவு உள்ளதா என்பதை சரிபார்க்க வேண்டியதன் அவசியத்தையும் இந்த சம்பவம் உணர்த்தியுள்ளது.
கேரள மாநிலம் பத்தனம்திட்டா மாவட்டம் கோழஞ்சேரி அருகே மாறாமன் ரிசார்ட்டில் இளம்பெண் தின்ஷா கொலை செய்யப்பட்ட வழக்கில் கைது செய்யப்பட்ட ஜித்துவிடம் போலீசார் தொடர்ந்து விசாரணை நடத்தி வருகின்றனர். இந்த விசாரணையில், கொலைக்கான காரணம் குறித்து ஜித்து தெரிவித்ததாக புதிய தகவல்கள் வெளியாகியுள்ளன.
குளத்துப்புழாவைச் சேர்ந்த 20 வயதான தின்ஷா, மாறாமன் பகுதியில் உள்ள ரிசார்ட்டில் பயிற்சி வரவேற்பாளராக பணியாற்றி வந்தார். செப்டம்பர் 11-ம் தேதி அவர் அங்கு பணியில் சேர்ந்ததாக போலீஸ் தரப்பில் தெரிவிக்கப்பட்டுள்ளது.
இந்நிலையில், சம்பவத்தன்று ரிசார்ட்டுக்கு வந்த ஜித்து, தின்ஷாவை வெளியே அழைத்துப் பேசியதாகவும், அப்போது இருவருக்கும் இடையே வாக்குவாதம் ஏற்பட்டதாகவும் கூறப்படுகிறது.
பின்னர் அவர் மறைத்து வைத்திருந்த கத்தியை எடுத்து தின்ஷாவை தாக்கியதாக போலீசார் தெரிவித்துள்ளனர். படுகாயமடைந்த தின்ஷா மருத்துவமனைக்கு கொண்டு செல்லப்பட்ட நிலையில் உயிரிழந்தார். சம்பவத்துக்குப் பிறகு ரிசார்ட் ஊழியர்கள் ஜித்துவை பிடித்து போலீசாரிடம் ஒப்படைத்தனர்.
இதற்கிடையே, தின்ஷாவின் செல்போனில் மற்றொரு நபருக்கு அனுப்பப்பட்டதாகக் கூறப்படும் குறுஞ்செய்தி தொடர்பாக இருவருக்கும் இடையே தகராறு ஏற்பட்டதாக ஜித்து போலீசாரிடம் கூறியதாக தகவல் வெளியாகியுள்ளது.
திண்ஷா வேறொருவருடன் நெருக்கமாக இருந்ததாக சந்தேகப்பட்டதாகவும், இதனால் ஆத்திரம் ஏற்பட்டதாகவும் அவர் தெரிவித்ததாக கூறப்படுகிறது.
மேலும், தின்ஷாவுக்கும் ஜித்துவுக்கும் இடையே சில மாதங்களாக பழக்கம் இருந்து வந்ததாகவும், இருவரும் காதலித்து வந்ததாகவும் போலீசார் தெரிவித்துள்ளனர். திருமணம் தொடர்பாகவும் இருவருக்கும் இடையே கருத்து வேறுபாடு இருந்ததாக விசாரணையில் தெரியவந்துள்ளதாக தகவல்கள் தெரிவிக்கின்றன.
இந்த சம்பவம் தொடர்பான காட்சிகள் ரிசார்ட்டில் பொருத்தப்பட்டிருந்த கண்காணிப்பு கேமராவில் பதிவாகியுள்ளதாக போலீசார் தெரிவித்துள்ளனர். தாக்குதலுக்குப் பயன்படுத்தப்பட்டதாகக் கூறப்படும் கத்தியையும் போலீசார் கைப்பற்றியுள்ளனர்.
இந்த வழக்கில் கொலைக்கான முழுமையான காரணம், சம்பவத்துக்கு முன்பு இருவருக்கும் இடையே நடந்த உரையாடல் உள்ளிட்ட பல்வேறு அம்சங்கள் குறித்து போலீசார் தொடர்ந்து விசாரணை நடத்தி வருகின்றனர்.
போலீஸ் விசாரணையில் வெளியாகும் தகவல்கள் மற்றும் ஆதாரங்களின் அடிப்படையிலேயே கொலைக்கான முழுமையான காரணம் உறுதி செய்யப்படும் என எதிர்பார்க்கப்படுகிறது.
வெந்தயமானது சமையலுக்கு மட்டுமல்லாத பல உடல் நலப் பிரச்சினைகளுக்கும் சிறந்த தீர்வைத் தரும். இந்நிலையில் இரவு முழுவதும் வெந்தயத்தை ஊறவைத்து அந்த நீரைப் பருகுவது நல்லதா? அல்லது வெந்தயத்தை நீரில் கொதிக்கவைத்து குடிப்பது சரியானதா? எனும் குழப்பம் நிறைய பேருக்கு உள்ளது அதன்படி, ஊறவைத்த நீரா அல்லது கொதிக்க வைத்த நீரா எது சிறந்தது எனப் பார்ப்போம்
எது சிறந்தது
ஊறவைத்த நீர்: இரவு முழுவதும் வெந்தயத்தை நீரில் ஊறவைக்கும்போது அவை நீரில் கரையக்கூடிய ஊட்டச்சத்துக்களை வெளியிடும். காலையில் அந்தத் தண்ணீரை வெறும் வயிற்றில் குடிக்கும்போது, செரிமானம் சீராகும். உடல் எடை கட்டுக்கோப்பாக இருக்கும்.
கொதிக்கவைத்த நீர் :வெந்தயத்தை நீரில் கொதிக்கவைக்கும்போது அதிலிருக்கும் சேர்மங்களை பிரித்தெடுத்து சக்தி வாய்ந்த பானமாக மாற்றும். சளி, இருமல், வீக்கம் போன்றவற்றுக்கு நிவாரணமளிக்கும்.
இதய ஆரோக்கியத்தை பாதுகாக்கும். இந்த இரண்டு விதமான முறைகளிலும் உடல் எடையை சீராக பேண ஊறவைத்த நீர் சிறந்தது. சளி, இருமல், நச்சுக்களைப் போக்க கொதிக்க வைத்த நீர் சிறந்தது. ஆனால், எவ்வாறெனினும் வெந்தய நீரை தினமும் ஒரு டம்ளருக்கு மேல் குடிக்கக்கூடாது.
திருகோணமலையிலிருந்து கல்முனை நோக்கி பயணித்த தனியார் பேருந்து ஒன்றும் இலங்கை போக்குவரத்துச் சபைக்கு சொந்தமான பேருந்தும் ஒன்றும் மோதி விபத்து ஏற்பட்டுள்ளது. குறித்த இரு பேருந்துகளும் ஒன்றை ஒன்று முந்தி செல்ல முயற்சித்த போது,களுதாவளை கடற்கரை வீதி சந்தி அருகில் இந்த விபத்து சம்பவித்துள்ளது.
இதன்போது இலங்கை போக்குவரத்துச் சபைக்கு சொந்தமான பேருந்து அருகிலிருந்த கோழி விற்பனை செய்யும் கடை ஒன்றில் மோதியதில் அக்கடைக்கு சேதம் ஏற்பட்டுள்ளது.
விபத்தில் எவரும் காயமடைந்துள்ளனரா என்ற விபரம் இன்னும் வெளியாகவில்லை. இந்நிலையில், விபத்து தொடர்பாக களுவாஞ்சிக்குடி பொலிஸார் விசாரணைகளை மேற்கொண்டு வருகின்றனர்.
இந்தியாவின் மகாராஷ்டிர மாநிலம் மும்பையில் போரிவலி பகுதியில் உள்ள ஒரு ஓட்டலில் மசாலா தோசைக்குள் செத்த எலி இருந்ததை கண்ட வாடிக்கையாளர் அதிர்ச்சி அது தொடர்பில் முறைப்பாடு செய்த்தை அடுத்து மகாராஷ்டிர உணவு மற்றும் மருந்து நிர்வாகம் ஓட்டலின் வணிக உரிமத்தை இடைநீக்கம் செய்துள்ளது.
சம்பவம் தொடர்பில் இந்திய ஊடகங்கள் தெரிவித்துள்ளதாவது, மகாராஷ்டிர மாநிலம் மும்பையில் அமித் திரிவேதி என்பவர் தனது 2 சகோதரர்கள் மற்றும் மகனுடன் தென்னிந்திய உணவு உண்பதற்காக ஒரு ஓட்டலுக்குச் சென்றார்.
அங்கு அவர் மைசூர் மசாலா தோசை ஒன்றை ஆர்டர் செய்தார். தோசையை சில வாய் சாப்பிட்ட பிறகு, உணவுக்குள் ஏதோ வித்தியாசமாக இருப்பதை கவனித்துள்ளார். சாப்பிட்ட உணவை பார்த்தபோது அதற்குள் சிறிய இறந்த எலி இருப்பது தெரியவந்துள்ளது.
இதைப் பார்த்ததும் அதிர்ச்சியடைந்த அவர் உடனடியாக வாந்தி எடுத்துள்ளார். இதையடுத்து அவர் போரிவலி பொலிஸ் நிலையத்தில் புகார் அளித்தார். திரிவேதி அளித்த புகார், மகாராஷ்டிர உணவு மற்றும் மருந்து நிர்வாகத்தின் (FDA) கவனத்திற்கு கொண்டுவரப்பட்டது. இதை தொடர்ந்து, ஓட்டலின் உணவு வணிக உரிமத்தை FDA இடைநீக்கம் செய்ததாக கூறப்பட்டுள்ளது.
நாட்டின் பல பகுதிகளில் நாளை (01) முதல் பிற்பகல் வேளையில் இடியுடன் கூடிய மழை பெய்வதற்குச் சாதகமான வளிமண்டல நிலைமை எதிர்பார்க்கப்படுவதாக வளிமண்டலவியல் திணைக்களம் எதிர்வு கூறியுள்ளது.
இதன்படி, ஊவா, கிழக்கு மற்றும் மத்திய மாகாணங்களிலும் பொலன்னறுவை மற்றும் முல்லைத்தீவு மாவட்டங்களிலும் பிற்பகல் 1 மணிக்குப் பின்னர் ஆங்காங்கே மழை அல்லது இடியுடன் கூடிய மழை பெய்யக்கூடும்.
இதற்கமைய, சில இடங்களில் 50 மி.மீ இற்கும் அதிகமான ஓரளவு பலத்த மழை பெய்யக்கூடும் என வளிமண்டலவியல் திணைக்களம் அறிவித்துள்ளது. மேல் மாகாணத்திலும் காலி மற்றும் மாத்தறை மாவட்டங்களின் கரையோரப் பகுதிகளிலும் காலை வேளையில் சிறிதளவு மழை பெய்யக்கூடும். சப்ரகமுவ மற்றும் மத்திய மாகாணங்களின் சில இடங்களில் அதிகாலை வேளையில் பனிமூட்டமான நிலை காணப்படலாம்.
இடியுடன் கூடிய மழையின் போது தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய ஆபத்துக்களைக் குறைத்துக்கொள்வதற்குத் தேவையான நடவடிக்கைகளை மேற்கொள்ளுமாறு வளிமண்டலவியல் திணைக்களம் பொதுமக்களை அறிவுறுத்தியுள்ளது.
