பேஸ்புக் மற்றும் பிற சமூக ஊடக தளங்கள் மூலம் பணம் சம்பாதிக்கக்கூடிய நடைமுறைகள் அறிமுகப்படுத்தப்பட்டதைத் தொடர்ந்து, பெற்றோர்களின் அனுமதியுடனோ அல்லது அனுமதியின்றியோ சிறுவர்களின் புகைப்படங்களையும் காணொளிகளையும் இணையத்தில் பதிவேற்றும் செயற்பாடுகள் வேகமாக அதிகரித்து வருகின்றது.

சிறுவர்களின் திறமைகளை வெளிப்படுத்துவதாகவும் அவர்களின் சுவாரஸ்யமான செயல்களைப் பாராட்டுவதாகவும் கூறிக்கொண்டு, பல்வேறு நபர்களும் அமைப்புகளும் இத்தகைய காணொளிகளை வணிக நோக்கங்களுக்காகப் பயன்படுத்துவது அவதானிக்கப்பட்டுள்ளது.

இத்தகைய காணொளிகள் மற்றும் விலொக்ஸ் மூலம் சிறுவர்களின் அன்றாட வாழ்க்கை அந்நியர்களுக்கு வெளிப்படுத்தப்படுவது அவர்களின் தனிப்பட்ட பாதுகாப்பிற்கு கடுமையான ஆபத்தை ஏற்படுத்தக்கூடும்.

மேலும், செயற்கை நுண்ணறிவு தொழில்நுட்பத்தைப் பயன்படுத்தி, பொருத்தமற்ற அல்லது பாலியல் ரீதியான உள்ளடக்கங்களை உருவாக்க இணையத்தில் பதிவேற்றப்பட்ட புகைப்படங்களும் காணொளிகளும் மூலங்களாகப் பயன்படுத்தப்படக்கூடிய அபாயமும் உள்ளது.

எனவே, இதுபோன்ற ஆபத்தான சூழ்நிலைகளிலிருந்து சிறுவர்களைப் பாதுகாப்பதற்காக, சமூக ஊடகங்களைப் பயன்படுத்தும்போது பெற்றோர்களும் சிறுவர்களின் பராமரிப்பு மற்றும் பாதுகாப்பிற்குப் பொறுப்பான அனைவரும் அதிக விழிப்புணர்வுடனும் பொறுப்புடனும் செயல்படுமாறு அறிவுறுத்தப்படுகிறார்கள்.

கொழும்பு, வெள்ளவத்தை கவிரத்ன பிரதேசத்தில் வசிக்கும் பெண் சட்டத்தரணியின் மாடி வீட்டிற்குள் நுழைந்து, 2 கோடி ரூபாய்க்கும் அதிகமான பெறுமதியான தங்கம் வைக்கப்பட்டிருந்த பாதுகாப்புப் பெட்டகத்தைத் திருடியவர்கள் கைது செய்யப்பட்டுள்ளனர்.

சம்பவத்திற்கு தொடர்புடைய பிரதான சந்தேக நபர் உட்பட இருவர் 5 நாட்களுக்குள் கைது செய்யப்பட்டுள்ளதாக பொலிஸார் தெரிவித்துள்ளனர். கைது செய்யப்பட்டுள்ள பிரதான சந்தேக நபர், நாட்டின் பதிவு செய்யப்பட்ட பல குற்றங்களுக்கு தொடர்புடைய வெள்ளவத்தை உபயா என அழைக்கப்படுபவர் என அடையாளம் காணப்பட்டுள்ளார்.

சந்தேக நபர் பல குற்றச்செயல்களுக்காக சிறையில் அடைக்கப்பட்டிருந்த நிலையில் சில வாரங்களுக்கு முன்புதான் பிணையில் வெளியே வந்துள்ளார்.

கைது செய்யப்பட்ட மற்றைய சந்தேக நபர் முச்சக்கர வண்டிச் சாரதி என தெரியவந்து்ளளது. கைது செய்யப்பட்ட நபரிடம் இருந்து 13,180 மில்லிகிராம் போதைப்பொருளும், திருடப்பட்டதாக சந்தேகிக்கப்படும் தங்க ஆபரணங்களில் சுமார் 30 பவுண் எடையுள்ள நகைகளும் மீட்கப்பட்டுள்ளன.

வீட்டிற்குள் இரகசியமாக நுழைந்த நபர், மேல் மாடி அறையில் உள்ள அலுமாரியில் வைக்கப்பட்டிருந்த பாதுகாப்புப் பெட்டகத்துடன் சேர்த்து, மொத்தம் 39 பவுணுக்கு அதிக எடையுள்ள தங்க நகைகளைத் திருடிச் சென்றுள்ளனர்.

கடந்த 24 ஆம் திகதி சட்டத்தரணி இது தொடர்பில் முறைப்பாடு செய்துள்ளதாக பொலிஸார் குறிப்பிட்டுள்ளனர். பொலிஸாரின் விசாரணையின் போது, சந்தேக நபர் வீட்டின் மேல் மாடியின் கூரையை உடைத்து உள்ளே நுழைந்தமை தெரியவந்துள்ளது.

அயல் வீடுகளின் சிசிடிவி காட்சிகளைப் பரிசோதித்த போது, அந்த நபர் போர்வையால் பாதுகாப்புப் பெட்டகத்தை மூடிக்கொண்டு தோளில் சுமந்து செல்லும் காட்சிகள் காணப்பட்டுள்ளது. அதன் மூலமாக சந்தேக நபர் அடையாளம் காணப்பட்டதாக பொலிஸார் தெரிவித்தனர்.

சந்தேக நபர் கல்யாணி வீதியில் உள்ள வீடு ஒன்றில் இருப்பதாகக் கிடைத்த தகவலின் பேரில் கைது செய்யப்பட்டு சோதனையிடப்பட்டார்.

அப்போது அவரிடம் இருந்த போதைப்பொருட்களும், பையில் மறைத்து வைக்கப்பட்டிருந்த திருடப்பட்ட தங்க ஆபரணங்களின் ஒரு பகுதியும் மீட்கப்பட்டன. பாதுகாப்புப் பெட்டகத்தைத் திருடிய பின்னர், அவர் சில காலத்திற்கு முன்பு வசித்த போரலஸ்முவ பிரதேசத்தில் உள்ள தனது நண்பரின் வீட்டிற்கு கொண்டு சென்றுள்ளார்.

அங்கு அதனை வெட்டி, அதிலிருந்த தங்க நகைகளை எடுத்து, சில நகைகளைப் போரலஸ்முவ பிரதேசத்தில் உள்ள நகைக்கடை ஒன்றில் அடகு வைத்துள்ளமை தெரிய வந்துள்ளது.

மேலும் சில பகுதிகளை நபர் ஒருவருக்கு விற்றுள்ளதாகவும் விசாரணைகளில் தெரியவந்துள்ளது. தங்க நகைகளை அடகு வைத்துப் பெற்ற பணத்திலிருந்து ஆடைகளை வாங்கியுள்ளார்.

அத்துடன், தனது தனிப்பட்ட வங்கிக் கணக்கில் 145,000 ரூபாவை வைப்புச் செய்துள்ளதாகவும் விசாரணைகளில் மேலும் தெரியவந்துள்ளதாகப் பொலிஸார் குறிப்பிட்டுள்ளனர்.

கம்பஹா – கிரிந்திவெல பொலிஸ் பிரிவுக்குட்பட்ட இம்புலஹேன பகுதியில் உள்ள வீடொன்றில் 75 வயதுடைய பெண் ஒருவர் கூர்மையான ஆயுதத்தால் தாக்கப்பட்டு கொலை செய்யப்பட்டுள்ளார். இந்த கொலை சம்பவம் நேற்று (29.09.2026) இடம்பெற்றுள்ளன.

சம்பவம் தொடர்பில் மேற்கொள்ளப்பட்ட விசாரணைகளின் போது, வீட்டில் இருந்து உயிரிழந்த பெண்ணின் கணவரால் எழுதப்பட்டதாக சந்தேகிக்கப்படும் கடிதம் ஒன்று கண்டெடுக்கப்பட்டதாக பொலிஸார் தெரிவித்துள்ளனர்.

இதன்படி, இந்த கொலையை உயிரிழந்த பெண்ணின் கணவரே மேற்கொண்டுள்ளதாக பொலிஸார் சந்தேகிக்கின்றனர். இச்சம்பவத்தையடுத்து சந்தேகநபரான கணவர் வெயாங்கொட பொலிஸ் பிரிவில் தொடருந்தில் முன் பாய்ந்து தற்கொலை செய்துகொண்டுள்ளதாக தெரியவந்துள்ளது.

இந்த கொலைக்கான காரணம் இதுவரை கண்டறியப்படாத நிலையில் பொலிஸார் விசாரணைகளை ஆரம்பித்துள்ளனர். உயிரிழந்த பெண் மற்றும் சந்தேகநபரின் சடலங்கள் பிரேத பரிசோதனைக்காக வதுபிட்டிவல வைத்தியசாலையின் பிரேத அறையில் வைக்கப்பட்டுள்ளன.

குளியாபிட்டிய – மாதம்பே பிரதான வீதியில் ஒரே குடும்பத்தை சேர்ந்த மூவர் பயணித்த மோட்டார் சைக்கிள் மின் கம்பம் ஒன்றின் மீது மோதியதில், இரு மகன்களும் உயிரிழந்துள்ளனர். பலத்த காயமடைந்த தாய் மருத்துவமனையில் அனுமதிக்கப்பட்டுள்ளார்.

இந்த விபத்து நேற்று முன்தினம் அதிகாலை சுமார் 5 மணியளவில் இடம்பெற்றுள்ளது. விபத்தில் மூத்த மகனான 27 வயதுடைய அயோத்யா ஹன்சமால் மற்றும் இளைய மகனான 12 வயதுடைய சதித ஆகியோரே உயிரிழந்துள்ளனர்.

தாயாரான 49 வயதுடைய பிரியங்கா குமுதுனி பலத்த காயமடைந்து, சிலாபம் பொது மருத்துவமனையில் அனுமதிக்கப்பட்டுள்ளார். ஜப்பான் செல்வதற்காக மூத்த மகன் கொழும்பில் நடைபெறவிருந்த நேர்காணல் ஒன்றில் கலந்து கொள்வதற்காக தனது தாயுடனும் இளைய சகோதரனுடனும் வீட்டிலிருந்து புறப்பட்டுள்ளார்.

மாதம்பே தொடருந்து நிலையத்தில் இருந்து அதிகாலை 5.15 மணியளவில் கொழும்பு நோக்கிச் செல்லும் தொடருந்தில் ஏறுவதற்காக வேகமாக சென்றுள்ள நிலையில் மோட்டார் சைக்கிளைக் கட்டுப்படுத்த முடியாமல் இந்த விபத்து இடம்பெற்றுள்ளதாக ஆரம்பக் கட்ட விசாரணைகளில் தெரியவந்துள்ளது.

மோட்டார் சைக்கிள் விபத்தில் தனது இரு மகன்களையும் இழந்த தந்தையான ஹேரத் அதிர்ச்சியடைந்த நிலையில் உள்ளதாக உறவினர்கள் தெரிவித்துள்ளனர். “எனது மூத்த மகன் ஜப்பானுக்கு செல்வதில் மிகவும் ஆர்வமாக இருந்தார். ஜப்பானிய மொழியையும் நன்றாக கற்றுக்கொண்டார்.

கொழும்பில் நடைபெற்ற நேர்காணல் ஒன்றுக்காக அம்மா மற்றும் தம்பியுடனும் அதிகாலையிலேயே வீட்டிலிருந்து புறப்பட்டார்.

பலத்த எதிர்பார்ப்புகளுடன் சென்ற எனது மகனும் அவரது தம்பியும் இன்று எனக்கு இல்லாமல் போய்விட்டனர். மனைவியும் தீவிர சிகிச்சைப் பிரிவில் சிகிச்சை பெற்று வருகிறார். இந்தத் துயரத்தை எப்படித் தாங்கிக்கொள்வது என்று தெரியவில்லை.

எனது மூத்த மகன் குறித்து எங்களுக்கு பெரிய எதிர்பார்ப்பு இருந்தது. பாதியில் கட்டப்பட்டுள்ள இந்த வீட்டைப் பூர்த்தி செய்துவிட்டு, அம்மாவையும் அப்பாவையும் நன்றாக பார்த்துக் கொள்ள வேண்டும் என அவர் அடிக்கடி கூறுவார்.

ஜப்பானுக்குச் சென்றால் தம்பியையும் அழைத்துச் செல்வேன். அச்சமின்றி இருக்குமாறும், மகிழ்ச்சியான வாழ்க்கையை வாழ்வோம் என்றும் அடிக்கடி மகன் குறிப்பிடுவார். அந்த எதிர்பார்ப்புகளுடன் வீட்டிலிருந்து புறப்பட்ட எனது மகனுக்கு இன்று இந்த நிலைமை ஏற்பட்டுள்ளதாக வேதனையுடன் தந்தை குறிப்பிட்டுள்ளார்.

கிளிநொச்சி – ஏ9 வீதி இரணைமடு சிவன் கோயில் சந்தியில் டிப்பர் வாகனம் ஒன்று விபத்துக்குள்ளாகியுள்ளது. இந்த விபத்து இன்று(30.09.2026) காலை 7 .30 மணியளவில் இடம்பெற்றுள்ளது.

இரணைமடு சிவன் கோயில் சந்தியில் டிப்பர் வாகனம் ஒன்றும் மோட்டார் சைக்கிள் ஒன்றும் மோதி விபத்துக்குள்ளாகியுள்ளது.

இதன்போது, மோட்டார் சைக்கிளில் பயணித்தவர் படுகாயமடைந்த நிலையில், கிளிநொச்சி மாவட்ட பொது வைத்தியசாலை யில் அனுமதிக்கப்பட்டுள்ளார். விபத்து தொடர்பில் மேலதிக விசாரணைகள் முன்னெடுக்கப்பட்டு வருகின்றன.

திருகோணமலை – ஹொரவ்பொத்தானை பிரதான வீதியின் நொச்சிக்குளம் பகுதியில் இடம்பெற்ற கார் விபத்தில் ஒருவர் உயிரிழந்ததுடன், மூவர் படுகாயமடைந்துள்ளனர்.

இன்று(29.09.2026) அதிகாலை 3.30 மணியளவில் இடம்பெற்ற இந்த விபத்தில், ஒரே குடும்பத்தைச் சேர்ந்த நால்வர் பயணித்த கார், சாரதிக்கு ஏற்பட்ட தூக்கக் கலக்கம் காரணமாக வீதியை விட்டு விலகி விபத்துக்குள்ளானதாக பொலிஸார் தெரிவித்துள்ளனர்.

சம்பவத்தில் இறக்கக்கண்டி, வாளையூற்று பகுதியைச் சேர்ந்த 29 வயதான என். நிஜாம் உயிரிழந்துள்ளார்.

அவரது மனைவி, ஐந்து வயது மகன் மற்றும் 19 வயது சகோதரர் ஆகியோர் காயமடைந்து திருகோணமலை பொது வைத்தியசாலையில் அனுமதிக்கப்பட்டுள்ளனர். சம்பவம் தொடர்பில் மொரவெவ பொலிஸார் விசாரணைகளை முன்னெடுத்து வருகின்றனர்.

யாழ்ப்பாணம் – கேரதீவு, சங்குப்பிட்டி பாலப் பகுதியில் இடம்பெற்ற மோட்டார் சைக்கிள் விபத்தில் பொலிஸ் உத்தியோகஸ்தர் ஒருவர் உயிரிழந்துள்ளார். பூநகரி பொலிஸ் நிலையத்தில் கடமையாற்றும் மன்னாரைச் சேர்ந்த ஆர்னோல்ட் அன்ரனி (வயது 31) என்ற பொலிஸ் உத்தியோகஸ்தரே இவ்வாறு உயிரிழந்துள்ளார்.

யாழ்ப்பாணம் – மன்னார் வீதியில் குறித்த பொலிஸ் உத்தியோகஸ்தர் மோட்டார் சைக்கிளில் பயணித்தபோது, மோட்டார் சைக்கிள் வேகக் கட்டுப்பாட்டை இழந்து வீதியோர மதகுடன் மோதி விபத்துக்குள்ளாகியுள்ளதாகப் பொலிஸாரின் ஆரம்பகட்ட விசாரணைகளில் தெரியவந்துள்ளது.

பொலிஸ் உத்தியோகஸ்தரின் சடலம் மீட்கப்பட்டு, உடற்கூற்றுப் பரிசோதனைக்காக யாழ். போதனா வைத்தியசாலையில் ஒப்படைக்கப்பட்டுள்ள நிலையில், மேலதிக விசாரணைகள் முன்னெடுக்கப்பட்டு வருகின்றது.

மொனராகல ரத்தனபிட்டிய வீடு ஒன்றுக்குள் நுழைந்த இந்தத் திருடன் அசதியில் அங்கேயே நித்திரை கொண்ட சம்பவம் ஒன்று பதிவாகியுள்ளது.

கதவை உடைத்து வீட்டுக்குள் நுழைந்த அங்கிருந்த கட்டிலில் அயர்ந்து தூங்கியுள்ளான் அடுத்த நாள் வீட்டார் காலையில் எழுந்து பார்த்த போது அறிமுகம் இல்லாதஒரு மனிதன் நமது வீட்டு கட்டிலில் உறங்குவதை கண்டு அச்சமடைத்தனர். உடனடியாக சுதாரித்த வீட்டினர் அயலவர்களையும் போலீசாரையும் அழைத்து திருடனை பிடித்து கொடுத்துள்ளனர்.

இந்தச் சம்பவத்தால் வீட்டாரின்கதவு உடைக்கப்பட்டதால் சுமார் 10,000 ரூபா நஷ்டம் ஏற்பட்டுஉள்ளதாகவும் இவரால் எந்தபொருளும் திருடப்படவில்லைஎனவும் விசாரணைகள் மூலம் தெரிய வந்துள்ளது.

கைதான திருடன் தனக்கு தற்செயலாக நித்திரை வந்ததாக இவர் போலீஸ் நிலையத்தில் வாக்குமூலம் வழங்கிய நிலையில், பொலிஸார் திருடனை நீதிமன்றத்தில் ஆஜர்படுத்த நடவடிக்கைகளை மேற்கொண்டு வருகின்றனர்.

மன்னார் மாந்தை மேற்கு சுகாதார வைத்திய அதிகாரி பணிமனை க்கு உட்பட்ட மூன்றாம் பிட்டி பகுதியில் உள்ள பிரபல உணவகம் ஒன்றில் வாங்கப்பட்ட வடையில் வெட்டுக்கிளி ஒன்று காணப்பட்டுள்ளதாக கூறப்படுகிறது.

குறித்த உணவகத்தில் வாங்கப்பட்ட வடையை சாப்பிட முற்பட்ட வேளையில் வடையுடன் வெட்டுக்கிளி ஒன்று இருந்ததாக தெரிவிக்கப்படுகிறது.

இதேவேளை, நேற்று முன்தினம் மன்னார் நகர் பகுதியில் வாங்கப்பட்ட முட்டை ரொட்டியில் இரும்புக் கம்பி துண்டு காணப்பட்ட சம்பவம் பெரும் அதிர்ச்சியை ஏற்படுத்தியிருந்த நிலையில், இன்று மற்றொரு உணவுப் பொருளில் வெட்டுக்கிளி காணப்பட்டுள்ளமை மக்கள் மத்தியில் கவலையை ஏற்படுத்தியுள்ளது.

இதையடுத்து, மாந்தை மேற்கு பொது சுகாதார வைத்திய அதிகாரி பணிமனையினர் இவ்விடயம் தொடர்பில் விரைவான நடவடிக்கை எடுக்க வேண்டும் என கோரிக்கை முன்வைக்கப்பட்டுள்ளது.

மேலும், மன்னார் மாவட்டத்தில் உள்ள உணவகங்களின் உணவுத் தரம் மற்றும் சுகாதார நிலைமைகள் தொடர்பாக உரிய முறையில் கண்காணிப்பு மேற்கொள்ள வேண்டும் எனவும் பொதுமக்கள் கோரிக்கை விடுத்துள்ளனர்.

பொது மக்களின் சுகாதரத்தை கருத்திற்கொண்டு, உணவகங்களில் சுகாதார நடைமுறைகள் முறையாக பின்பற்றபடுகின்றனவா என்பதை சம்பந்தப்பட்ட அதிகாரிகள் தீவிரமாக கண்காணிக்க வேண்டும் எனவும் வலியுறுத்தப்பட்டுள்ளது.

லண்டனில் உள்ள பெத்லெம் ராயல் மருத்துவமனையில் சிகிச்சை பெற்று வந்த 19 வயது சோவியா ராஜரத்தினம் என்ற இலங்கை தமிழ் யுவதி உயிரிழந்த சம்பவம் பெரும் அதிர்வலைகளை ஏற்படுத்தியுள்ளது.

செப்டம்பர் 9, 2021 அன்று இந்த சம்பவத்தில் , உரிய நேரத்தில் அவரை உயர் பாதுகாப்பு மறுவாழ்வுப் பிரிவுக்கு மாற்றியிருந்தால் இந்த மரணத்தைத் தடுத்திருக்கலாம் என தற்போது நீதிமன்ற விசாரணையில் உறுதிப்படுத்தப்பட்டுள்ளதாக கூறப்படுகின்றது.

மனநலப் பிரச்சினைகளால் அவதிப்பட்டு வந்த 19 வயது இளம்பெண் ஒருவர், தனது இறப்பிற்கு முன்னதாகவே பாதுகாப்பான மறுவாழ்வுப் பிரிவில் அனுமதிக்கப்படாமல் போனது ஒரு “தவறவிடப்பட்ட வாய்ப்பு” என்று விசாரணையில் தெரியவந்துள்ளது.

தன்னைப் பராமரிப்பவர்களிடமிருந்து தப்பிச் தப்பிச் சென்ற மறுநாளே அதாவது செப்டம்பர் 9, 2021 அன்று அவர் துரதிர்ஷ்டவசமாக இறந்து கிடந்த நிலையில் கண்டெடுக்கப்பட்டார்.

இன்னிலையில் பாதுகாப்பான மறுவாழ்வுப் பிரிவில் அவரை அனுமதிப்பது “அதிக செலவு பிடிக்கும்” என்று ‘சவுத் லண்டன் அண்ட் மாட்ஸ்லி’ (SLAM) NHS அறக்கட்டளை கருதியதாக சோவியா ராஜரத்தினத்தின் குடும்பத்தினர் குற்றம் சாட்டுகின்றனர்.

மனநலச் சட்டத்தின் கீழ் மருத்துவக் கண்காணிப்பில் வைக்கப்பட்டிருந்த மிஸ் ராஜரத்தினம், பாதுகாவலருடன் வெளியே செல்லும் அனுமதியைப் (escorted leave) பெற்றிருந்தபோது அங்கிருந்து தப்பிச் சென்று, உயிரிழந்தார்.

தடயவியல் மனநல மருத்துவ நிபுணரான டாக்டர் சோஹோம் தாஸ், அந்த இளம்பெண்ணின் இறப்பு குறித்த விசாரணையின்போது, ​​அவர் இறப்பதற்கு “முக்கியக் காரணமாக அமைந்த” ஒரு வாய்ப்பு தவறவிடப்பட்டதாகத் தெரிவித்தார்

இரத்தினபுரி, ரக்வானையில் சிவில் பாதுகாப்பு படை உத்தியோகஸ்தரான கணவனின் தாக்குதலுக்கு இலக்காகி மனைவி உயிரிழந்துள்ளார். ரக்வானை – கந்தகும்புர பிரதேசத்தில் வசித்து வந்த 2 பிள்ளைகளின் தாயான நாவலகே நதிகா ஜெயமாலி விக்ரமரத்ன என்பவரே இவ்வாறு உயிரிழந்துள்ளார்.

குறித்த சந்தேக நபர் சிவில் பாதுகாப்புத் திணைக்களத்தின் இரத்தினபுரி உப முகாமில் இணைக்கப்பட்டு சேவையாற்றி வந்துள்ளார். கடந்த 25ஆம் திகதி பணியை முடித்துவிட்டு போதையில் வீடு திரும்பிய போது மனைவியுடன் வாய்த்தர்க்கம் ஏற்பட்டுள்ளது.

இதன்போது, சந்தேக நபர் கோப்பி மரத்துண்டொன்றினால் பெண்ணின் தலை மற்றும் உடல் பகுதிகளில் கடுமையாக தாக்கியுள்ளதாக சந்தேகிக்கப்படுகின்றது. பல காயங்கள் உள்ளதாகவும் பொலிஸார் குறிப்பிட்டுள்ளனர்.

தாக்குதலுக்கு பயன்படுத்தப்பட்ட மரத்துண்டும் வீட்டிலிருந்து கண்டுபிடிக்கப்பட்டுள்ளதாக பொலிஸார் தெரிவித்தனர். அன்றைய தினம் குறித்த சந்தேக நபர் தனது மாதச் சம்பளத்தை பெற்றுக்கொண்டு இரவு உணவிற்காக ஹோட்டலில் இருந்து உணவு வாங்கி வந்துள்ளதாகவும் பொலிஸார் குறிப்பிட்டுள்ளனர்.

தாக்குதலின் பின்னர் அதிகாலை இரண்டு மணியளவில் சந்தேக நபர் தனது மனைவியின் அறைக்குச் சென்று பார்த்த போது, அவர் அறையிலுள்ள கட்டிலில் உணர்வற்று கிடந்ததைக் கண்டு அதிர்ச்சி அடைந்துள்ளார்.

சந்தேக நபர் அயலவர்களிடம் சம்பவத்தைக் கூறியதை அடுத்து, ரக்வானை பொலிஸாருக்கும் அம்பியுலன்ஸ் சேவைக்கும் அறிவிக்க நடவடிக்கை எடுத்துள்ளனர்.

அதற்கமைய, பெண்ணின் மரணம் தொடர்பில் சந்தேகத்திற்கிடமான கணவனை பொலிஸார் கைது செய்துள்ளனர். இருவருக்கும் இடையில் வாய்த்தர்க்கம் ஏற்பட்டதாகவும், தான் மனைவியைத் தள்ளியபோது தலை கட்டிலில் மோதியதாகவும் சந்தேக நபர் பொலிஸாரிடம் தெரிவித்துள்ளார்.

மாதம்பை – குளியாப்பிட்டிய வீதியின் ஹெலபண்டாரகம பகுதியில் இடம்பெற்ற விபத்தில் இரண்டு சிறுவர்கள் உயிரிழந்துள்ளதுடன் அவர்களின் தாய் படுகாயமடைந்துள்ளார். மோட்டார் சைக்கிள் ஒன்று வீதியை விட்டு விலகி மின்சார தூணில் மோதியதில் இந்த விபத்து சம்பவித்துள்ளது.

இன்று காலை (28) சுமார் 05:00 மணியளவில் இந்த விபத்து இடம்பெற்றுள்ளதாக கூறப்படுகின்றது. இந்த விபத்தில் உயிரிழந்தவர்கள் தும்மலசூரிய – வீரகொடியானை பகுதியை சேர்ந்த 17 மற்றும் 11 வயதுடைய இரு ஆண் பிள்ளைகளாவர்.

இவ்வாறு காயமடைந்த தாய் சிலாபம் பொது வைத்தியசாலையில் சிகிச்சை பெற்று வருவதாக பொலிஸார் தெரிவிக்கின்றனர்.

பிரேத பரிசோதனைக்காக சடலங்கள் சிலாபம் பொது வைத்தியசாலையில் ஒப்படைக்கப்பட்டுள்ளதாக தெரிவிக்கப்படுகின்றது. சம்பவம் தொடர்பாக மாதம்பை பொலிஸார் மேலதிக விசாரணைகளை மேற்கொண்டு வருகின்றனர்.

போக்குவரத்து விதிமீறல்களுக்காக சாரதிகளின் புள்ளிகளைக் குறைக்கும் முறையின் ஆறு மாத முன்னோட்டத் திட்டம் ஒக்டோபர் மாதம் முதல் தொடங்கப்படவுள்ளது. இன்று காலை (28) போக்குவரத்து அமைச்சகத்தில் நடைபெற்ற செய்தியாளர் சந்திப்பில் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க இதனை தெரிவித்துள்ளார்.

இந்த திட்டம் அடுத்த ஆண்டு மார்ச் 31 ஆம் திகதிக்குள் செயல்படுத்தப்படும் என்று எதிர்பார்க்கப்படுவதாக அவர் கூறியுள்ளார்.

நாட்டில் வீதிகளில் விபத்துக்களை குறைக்கும் நோக்கில், சாரதிகளின் புள்ளிகளை குறைப்பதற்கான ‘புள்ளி குறைப்பு முறை’ (DEMERIT SYSTEM) என்ற முறையை அறிமுகப்படுத்த போக்குவரத்து அமைச்சகம் முடிவு செய்துள்ளது.

சாரதிகளுக்கு இரண்டு ஆண்டுகளுக்கு ஒரு குறிப்பிட்ட புள்ளி வரம்பு வழங்கப்படும் என்றும், அவர்கள் வீதியில் செய்யும் போக்குவரத்து விதிமீறல்களுக்கு ஏற்ப புள்ளிகள் குறைக்கப்படும் என்றும் எதிர்பார்க்கப்படுகிறது.

போக்குவரத்து விதிமீறல்களுக்கான அபராதங்களைச் செலுத்த தற்போது அறிமுகப்படுத்தப்பட்டுள்ள இணையவழி முறைகளை மேலும் விரிவுபடுத்தும் வகையில், இந்தத் திட்டத்தை ஒரு டிஜிட்டல் முறை மூலம் செயல்படுத்த போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சகம் திட்டமிட்டுள்ளது.

யாழ்ப்பாணம் வல்லை வெளி வீதியில் இடம்பெற்ற விபத்தில் பூசகர் ஒருவர் பரிதாபகரமாக உயிரிழந்துள்ளார். இன்று (28.09.2026)இடம்பெற்ற விபத்தில் கெருடாவில் பகுதியைச் சேர்ந்த பூசகர் ஒருவர் பரிதாபகரமாக உயிரிழந்துள்ளதாக தெரிவிக்கப்படுகின்றது.

யாழ்ப்பாணம் – பருத்தித்துறை பிரதான வீதியில் மோட்டார் சைக்கிளில் பயணித்த பூசகர், வல்லை முனியப்பர் ஆலயத்தில் வழிபாடுகளை முடித்துவிட்டு வீதியை நோக்கி வந்த இளைஞருடன் மோதி வீதியில் விழுந்துள்ளார்.

இதன்போது, அவருக்கு பின்னால் வந்த வாகனம் ஒன்று பூசகர் மீது மோதியதில் அவர் சம்பவ இடத்திலேயே உயிரிழந்தார்.

உயிரிழந்த பூசகரின் சடலம் மீட்கப்பட்டு பருத்தித்துறை ஆதார வைத்தியசாலையில் ஒப்படைக்கப்பட்டுள்ளது. இச்சம்பவம் தொடர்பில் நெல்லியடி பொலிஸார் மேலதிக விசாரணைகளை முன்னெடுத்து வருகின்றனர்.

2026 ஆம் ஆண்டுக்கான சுற்றுலா மற்றும் சுற்றுலா அபிவிருத்திக் குறியீட்டின்படி, உலகின் அதிவேகமாக வளரும் 10 நாடுகளில் இலங்கை இடம்பிடித்துள்ளது. 2024 முதல் 2026 வரையிலான காலப்பகுதியில் சுற்றுலா வளர்ச்சியில் அதிக முன்னேற்றத்தைக் காட்டிய உலகின் முன்னணி 10 நாடுகளுக்குள் இலங்கை இணைந்துள்ளது.

குறித்த குறியீட்டின்படி இலங்கை 10 ஆவது இடத்தைப் பெற்றுள்ளது. அத்துடன், 2024 ஆம் ஆண்டுடன் ஒப்பிடுகையில் 2026 ஆம் ஆண்டில் இலங்கையின் சுற்றுலா மற்றும் சுற்றுலா வளர்ச்சிச் குறியீட்டு புள்ளிகள் 4.33% இனால் வளர்ச்சியடைந்துள்ளன.

இந்த குறியீட்டின்படி, உலகின் அதிவேகமாக வளரும் நாடுகளில் அல்பேனியா முதலிடத்திலும், வியட்நாம் மற்றும் லாவோஸ் முறையே இரண்டாவது மற்றும் மூன்றாவது இடங்களிலும் தரவரிசைப்படுத்தப்பட்டுள்ளன.