தென்மேற்கு பருவக்காற்று நாடு முழுவதும் நிலைபெற்றுள்ளதன் காரணமாக, நாட்டின் தென்மேற்கு பகுதிகளில் மழை நிலைமை அதிகரிக்கும் என எதிர்பார்க்கப்படுவதாக வளிமண்டலவியல் திணைக்களம் அறிவித்துள்ளது.

மேல், சப்ரகமுவ மற்றும் வடமேல் மாகாணங்களிலும் காலி, மாத்தறை, கண்டி மற்றும் நுவரெலியா மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும் என்றும் அறிவுறுத்தப்பட்டுள்ளது.

இப்பகுதிகளின் சில இடங்களில் 75 மில்லிமீற்றருக்கும் அதிகமான ஓரளவு பலத்த மழை பெய்யக்கூடும் என வளிமண்டலவியல் திணைக்களம் அறிவித்துள்ளது.

ஊவா மாகாணத்திலும் அம்பாறை மற்றும் மட்டக்களப்பு மாவட்டங்களிலும் சில இடங்களில் பிற்பகல் 1.00 மணிக்குப் பின்னர் மழை அல்லது இடியுடன் கூடிய மழை பெய்யக்கூடும் என எதிர்ப்பார்க்கப்படுகிறது.

மத்திய மலைநாட்டின் மேற்கு சரிவுப் பகுதிகளிலும், வடக்கு, வடமத்திய, வடமேல் மற்றும் தெற்கு மாகாணங்களிலும் திருகோணமலை மாவட்டத்திலும் அவ்வப்போது மணித்தியாலத்திற்கு 30 முதல் 40 கிலோமீற்றர் வேகத்தில் ஓரளவு பலத்த காற்று வீசக்கூடும் என எதிர்ப்பார்க்கப்படுகிறது.

இடியுடன் கூடிய மழையின் போது தற்காலிகமாக ஏற்படும் பலத்த காற்று மற்றும் மின்னல் தாக்கங்களினால் ஏற்படக்கூடிய விபத்துக்களை குறைப்பதற்கு தேவையான நடவடிக்கைகளை எடுக்குமாறு வளிமண்டலவியல் திணைக்களம் மக்களிடம் கேட்டுக்கொண்டுள்ளது.

டிப்பர் வாகனம் மற்றும் முச்சக்கர வண்டி மோதி விபத்துக்குள்ளானதில் இருவர் உயிரிழந்ததுடன் மேலும் இருவர் படுகாயமடைந்த நிலையில் சிகிச்சை பெற்று வருகின்றனர்.

அம்பாறை மாவட்டம் புறநகர் பகுதியான புத்தங்கல நான்கு வழி சந்தி பகுதியில் குறித்த விபத்து இடம்பெற்றுள்ளதுடன் படுகாயமடைந்த இருவர் அம்பாறை பொது மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

நேற்று செவ்வாய்க்கிழமை(26) இரவு சுமார் 8.30 மணியளவில் இடம்பெற்ற இவ்விபத்தில் மூச்சக்கர வாகன சாரதி சம்பவ இடத்திலேயே உயிரிழந்தார். அத்துடன் அதில் பயணம் செய்த மூன்று பேரில் ஒருவர் மருத்துவமனையில் அனுமதிக்கப்பட்ட பின்னர் உயிரிழந்தார். ஒரு பெண்ணும் ஒரு குழந்தையும் உயிர் தப்பி இருந்தனர்.

குறித்த விபத்தின் போது டிப்பர் வாகனம் புத்தங்கல பகுதியில் இருந்து பிலிமகல நோக்கி சென்று கொண்டிருந்ததுடன் அதே சமயம் முச்சக்கர வண்டி பண்டாரநாயக்க பாலிகா வித்தியாலயப் பகுதியிலிருந்து அம்பாறை பொது மருத்துவமனைக்குச் சென்று கொண்டிருந்ததாக விபத்தினை நேரில் கண்டவர்கள் குறிப்பிட்டனர்.

அத்துடன் குறித்த விபத்தின் போது டிப்பர் வாகன சாரதி வழிவிடும் விதியை மீறியதால் பிரதான சாலையில் சென்று கொண்டிருந்த முச்சக்கர வண்டி டிப்பர் மீது மோதியதில் இந்த விபத்து ஏற்பட்டிருந்தது.

அத்துடன் குறித்த விபத்தை தொடர்ந்து டிப்பர் வாகன சாரதி வாகனத்தை நிறுத்தாமல் தொடர்ந்து ஓட்டிச் சென்று பின்னர் அவர் டிப்பர் வாகனத்துடன் அம்பாறை தலைமையக பொலிஸ் நிலையத்தில் சரணடைந்தார். இவ்வாறு பொலிஸாரிடம் சரணடைந்த பின்னர் கைது செய்யப்பட்டார்.

மேலும் முச்சக்கர வண்டி சாரதி விபத்தின் போது சம்பவ இடத்தில் உயிரிழந்தார். இவர் அம்பாறை நவகம்புர பகுதியைச் சேர்ந்தவர் ஆவார். அத்துடன் படுகாயமடைந்த அம்பாறை லயன்ஸ் கழகத்தைச் சேர்ந்த துலஞ்சன இமேஷ் அம்பாறை பொது மருத்துவமனையில் சிகிச்சை பெற்று வந்த நிலையில் இரவு சுமார் 10.30 மணியளவில் உயிரிழந்தார்.

மேலும் நவகம்புர லயன்ஸ் கழகத்தை சேர்ந்த சுதேஷ் மஹின்சாவும் அவரது மூன்று வயது மகள் ஹசரி லியாராவும் அம்பாறை பொது மருத்துவமனையில் சிகிச்சை பெற்று வருகின்றனர். விபத்தில் மருத்துவமனையில் உயிரிழந்த சுதேஷ் மஹின்சாவின் கணவர் துலஞ்சனா இமேஷ் என பொலிஸார் தெரிவித்தனர்.

இது தவிர விபத்தின் போது டிப்பர் வாகன சாரதி மதுபோதையில் இருந்தது தற்போதைய விசாரணையில் தெரியவந்துள்ளதாக அம்பாறை மாவட்ட தலைமையக பொலிஸ் பிரிவின் சிரேஷ்ட அதிகாரி தெரிவித்தார்.

குறித்த சாரதியின் கவனக்குறைவான சாரதியத்தினால் தான் விபத்து ஏற்பட்டதாக ஆரம்ப கட்ட விசாரணையில் தெரியவந்துள்ளது.எனவே இந்த சாரதி மீது கடுமையான சட்ட நடவடிக்கை எடுக்கப்படும் என்றும் அவர் கூறினார்.

அம்பாறை பொலிஸ் பிரிவிற்குட்பட்ட ட்ராக்டர் சந்திக்கு அருகில் நேற்றிரவு இடம்பெற்ற கோர விபத்தில் இரு இளைஞர்கள் உயிரிழந்துள்ளனர்.

புத்தங்கல பகுதியிலிருந்து ஹோல்மன்கல நோக்கிப் பயணித்த டிப்பர் வாகனம், பாலிகா சுற்றுவட்டம் பகுதியிலிருந்து அம்பாறை பொது வைத்தியசாலை நோக்கிச் சென்ற முச்சக்கர வண்டியுடன் மோதி நேற்றிரவு இந்த விபத்து இடம்பெற்றுள்ளது.

இந்த விபத்தில் முச்சக்கர வண்டியில் பின்னால் பயணித்த மேலும் மூவர் அம்பாறை வைத்தியசாலையில் அனுமதிக்கப்பட்டு சிகிச்சை பெற்று வந்த நிலையில், அவர்களில் ஒருவர் உயிரிழந்துள்ளதாக பொலிஸார் தெரிவிக்கின்றனர்.

இவ்வாறு உயிரிழந்தவர்கள் தடயந்தலாவ மற்றும் நவகம்புர பிரதேசங்களைச் சேர்ந்த 23 மற்றும் 24 வயதுடைய இரு இளைஞர்கள் ஆவர்.

இந்த விபத்துடன் தொடர்புடைய டிப்பர் வாகனத்தின் சாரதி கைது செய்யப்பட்டுள்ளார். விபத்து குறித்து அம்பாறை பொலிஸார் மேலதிக விசாரணைகளை மேற்கொண்டு வருகின்றனர்.

இலங்கை வாழ் பௌத்தர்களின் புனிதமிக்க வெசாக் பண்டிகையை முன்னிட்டு, இன்று (27) முதல் ஜூன் 02 ஆம் திகதி வரை ‘வெசாக் வாரம்’ பிரகடனப்படுத்தப்பட்டுள்ளது.

இதனை முன்னிட்டு இறைச்சிக்கடைகள், இறைச்சிக்கூடங்கள், பந்தய மையங்கள், சூதாட்ட விடுதிகள் மற்றும் கேளிக்கை விடுதிகளை மூட முடிவு செய்யப்பட்டுள்ளது.

அதன்படி, பொது நிர்வாக, உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சு மேற்கூறிய இடங்கள் இன்று (27) முதல் ஜூன் 2 வரை வெசாக் வாரம் முழுவதும் மூடப்பட்டிருக்கும் என்று அறிவித்துள்ளது.

இதற்கிடையில், மே 30, 31 மற்றும் ஜூன் 01 ஆகிய திகதிகளில் நாடு முழுவதும் உள்ள இறைச்சிக் கூடங்கள் மற்றும் இறைச்சிக்கடைகளை மூடவும், பல்பொருள் அங்காடிகளில் இறைச்சி விற்பனையை நிறுத்தவும் அறிவுறுத்தப்பட்டுள்ளது.

இதேவேளை, வெசாக் பண்டிகையை முன்னிட்டு கடந்த காலங்களில் அமைக்கப்பட்டிருந்த பேய் மாளிகைகள் மற்றும் விசித்திரமான நடனங்கள், பொலித்தீன் மற்றும் பிளாஸ்டிக் பயன்பாடு போன்றவற்றை முற்றாகத் தவிர்க்குமாறு வழிகாட்டல்கள் வழங்கப்பட்டுள்ளன.

அரச வெசாக் தினத்தை முன்னிட்டு எதிர்வரும் 31 ஆம் திகதி (ஞாயிற்றுக்கிழமை) அரசாங்க விடுமுறையாக அறிவிக்கப்பட்டுள்ளது. பொதுநிர்வாகம், மாகாணசபைகள் மற்றும் உள்ளுராட்சிமன்றங்கள் அமைச்சர் சந்தன அபேரத்ன வர்த்தமானி அறிவித்தலையும் பிரசுரித்துள்ளார்.

2026.03.30 ஆம் திகதியன்று எடுக்கப்பட்ட அமைச்சரவை தீர்மானத்துக்கமைய, 2026.05.27 ஆம் திகதி முதல் 2026.06.02 ஆம் திகதி வரையிலான காலப்பகுதி வெசாக் வாரமாக பிரகடனப்படுத்தப்பட்டுள்ளது.

இதற்கமைய, இன்று மே 27ஆம் திகதி முதல் ஜூன் 02ஆம் திகதி வரையிலான காலப்பகுதியை வெசாக் வாரமாக அறிவிக்கப்பட்டுள்ளது.

அதன்படி, 2026ஆம் ஆண்டுக்கான அரச வெசாக் உற்சவத்தின் உத்தியோகபூர்வ நிகழ்வு மே மாதம் 30ஆம் திகதி ஏற்பாடு செய்யப்பட்டுள்ளது.

இதற்கமைய, அடுத்த நாளான மே மாதம் 31ஆம் திகதியை அரசாங்க விடுமுறை தினமாக பிரகடனப்படுத்தி பொது நிர்வாக, உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சு அதிவிசேட வர்த்தமானி அறிவித்தலையும் அண்மையில் வெளியிட்டிருந்தமை குறிப்பிடத்தக்கது.

2570 ஸ்ரீ புத்த வருடத்தை முன்னிட்டு, 2026 ஆம் ஆண்டுக்கான அரச வெசாக் விழாவை மாத்தறை, திஹகொட மிதெல்லவல புராதன விகாரையை மையப்படுத்தி நடத்துவதற்குத் நடவடிக்கைகள் எடுக்கப்பட்டுள்ளன.

அதன்படி, இந்த ஆண்டுக்கான அரச வெசாக் விழா, ஜனாதிபதி அநுர குமார திசநாயக்கவின் தலைமையில், மாத்தறை, திஹகொடவில் உள்ள மிதெல்லவல விகாரையில் இன்று நடைபெற உள்ளது.

இதற்கிடையில், நாடு முழுவதும் வெசாக் விழாக்களை ஏற்பாடு செய்வதில் பின்பற்றப்பட வேண்டிய வழிகாட்டுதல்களைக் கொண்ட சுற்றறிக்கையைப் பின்பற்றுமாறும் பொதுமக்கள் கேட்டுக்கொள்ளப்பட்டுள்ளனர்.

அமெரிக்க டொலருக்கு எதிரான ரூபாவின் பெறுமதி மேலும் சரிவடைந்து டொலரின் பெறுமதி மீண்டும் உயர்ந்துள்ளது.

இதன்படி, நேற்றையதினத்துடன் ஒப்பிடும் போது அமெரிக்க டொலரொன்றின் விற்பனைப் பெறுமதியானது 330 ரூபாவை இன்றுத் தாண்டியுள்ளது.

இலங்கை மத்திய வங்கியினால் இன்று (27) வெளியிடப்பட்ட தினசரி நாணய மாற்று வீத அறிக்கையில் இந்த விடயம் தெரிவிக்கப்பட்டுள்ளது. அமெரிக்க டொலரின் கொள்முதல் விலை 320.40 ரூபாயாகவும், விற்பனை விலை 330.81 ரூபாயாகவும் பதிவாகியுள்ளது.

நேற்று (26) இலங்கை மத்திய வங்கியினால் வெளியிடப்பட்ட நாணய மாற்று விகிதங்களின்படி, அமெரிக்க டொலரின் கொள்முதல் விலை 318.32 ரூபாயாகவும், விற்பனை விலை 328.69 ரூபாயாகவும் அறிவிக்கப்பட்டிருந்தமை குறிப்பிடத்தக்கது.

ஹட்டன் பகுதியில் உள்ள பாடசாலை ஒன்றில் கல்வி கற்கும் 7 வயதுடைய மாணவன் ஒருவர், தனியாக கொழும்பு செல்ல முயன்ற நிலையில் இன்று (27) ஹட்டன் பஸ் நிலையத்தில் வைத்து மீட்கப்பட்டு பொலிஸாரிடம் ஒப்படைக்கப்பட்டுள்ளார்.

ஹட்டன் இலங்கை போக்குவரத்து சபை (SLTB) பஸ் நிலைய நேரக் காப்பாளரின் அவதானமான நடவடிக்கையினாலேயே சிறுவன் பாதுகாப்பாக மீட்கப்பட்டதாக தெரிவிக்கப்படுகிறது.

கொழும்பில் தங்கி வேலை செய்து வரும் தனது பெற்றோரை பார்க்கவே தாம் தனியாக பஸ்ஸில் கொழும்பு செல்ல முயன்றதாக அந்தச் சிறுவன் நேரக் காப்பாளரிடம் தெரிவித்துள்ளான்.

மேலும், பயணச் செலவிற்காக தனது பெரியம்மா பணம் வழங்கியதாகவும் கூறியுள்ளார். சிறுவன் தனியாக பயணம் செய்ய முயன்றதை அடுத்து சந்தேகமடைந்த நேரக் காப்பாளர், அவனை பஸ்ஸில் ஏற விடாமல் தடுத்து வைத்து உடனடியாக ஹட்டன் பொலிஸாருக்கு தகவல் வழங்கியுள்ளார்.

இதையடுத்து சம்பவ இடத்துக்கு வந்த பொலிஸார், சிறுவனைப் பொறுப்பேற்று பாதுகாப்பாக ஹட்டன் பொலிஸ் நிலையத்துக்கு அழைத்துச் சென்றனர்.

இது தொடர்பில் கருத்து தெரிவித்த ஹட்டன் பொலிஸ் நிலைய உயர் அதிகாரி ஒருவர், “சிறுவன் தொடர்பில் ஹட்டன் நீதவான் நீதிமன்றத்தில் அறிக்கை சமர்ப்பிக்கப்படவுள்ளது.

நீதிமன்ற நடைமுறைகளின் பின்னர், சிறுவனின் பெற்றோர் அல்லது பாதுகாவலர்களை அடையாளம் கண்டு அவர்களிடம் ஒப்படைக்க நடவடிக்கை எடுக்கப்படும்” என தெரிவித்தார்.

நாட்டின் பல பகுதிகளிலிருந்து இதுவரையில் 203 பேர் மூளைக் காய்ச்சலினால் பாதிக்கப்பட்டுள்ளதாக சுகாதார அமைச்சு தெரிவித்துள்ளது.

தெனியாய, தியத்தலாவ, ரிபில்லகஸ்கட, கண்டி உள்ளிட்ட பகுதிகளிலிருந்து பாதிப்புகள் குறித்து பதிவாகியுள்ளது.

நோய் பரவலைக் கட்டுப்படுத்த தேவையான முன்னெச்சரிக்கை நடவடிக்கைகளை மேற்கொள்ளுமாறு மக்களுக்கு அறிவுறுத்தப்பட்டுள்ளது.

இலங்கை உள்நாட்டு சந்தையில் மரக்கறிகளின் விலை சற்று அதிகரிப்பை பதிவுசெய்துள்ளது. இதன்படி, நுவரெலியா பொருளாதார மத்திய நிலையத்தில், ஒரு கிலோகிராம் கறிமிளகாய் 580 ரூபாய்க்கு விற்பனை செய்யப்பட்டும் அதேவேளை , வவுனியாவில் 450 ரூபாய்க்கு விற்பனை செய்யப்பட்டுள்ளது.

வவுனியாவில், ஒரு கிலோகிராம் உருளைக் கிழங்கு 300 ரூபாய்க்கும் நுவரெலியாவில் 270 ரூபாய்க்கும் விற்பனை செய்யப்பட்டுள்ளது. வவுனியாவில் ஒரு கிலோகிராம் கரட், 420 ரூபாய்க்கும் நுவரெலியாவில் 330 ரூபாய்க்கும் விற்பனை செய்யப்பட்டுள்ளது.

நுவரெலியாவில் ஒரு கிலோகிராம் லீக்ஸ் 310 ரூபாய்க்கும் வவுனியாவில் 380 ரூபாய்க்கும் விற்பனை செய்யப்பட்டுள்ளது. அதேவேளை வவுனியாவில் ஒரு கிலோகிராம் கோவா 300 ரூபாய்க்கும் நுவரெலியாவில் 180 ரூபாய்க்கும் விற்பனை செய்யப்பட்டுள்ளது.

இலங்கையில் நேற்று அதிகரிக்கப்பட்ட பணவியல் கொள்கை வட்டி வீதம் என்பது மத்திய வங்கியினால் தீர்மானிக்கப்படும் அடிப்படை வட்டி விகிதமாகும் என பொது மக்களுக்கு தெளிவுப்படுத்தப்பட்டுள்ளது.

இந்த வட்டி பொதுமக்களுக்கு நேரடியாக வழங்கப்படும் கடன் வட்டி அல்ல என்றபோதிலும், வணிக வங்கிகள் மத்திய வங்கியிடமிருந்து பணத்தைப் பெறும்போது அல்லது வைப்புச் செய்யும்போது இந்த அடிப்படை வட்டியே தாக்கத்தை ஏற்படுத்துகிறது.

இந்தக் கொள்கை வட்டி வீதம் ஒரு சதவீதத்தால் அதிகரிக்கப்பட்டால், தனிநபர், வீட்டு மற்றும் வாகனக் கடன்களுக்கான வட்டி வீதங்கள் உடனடியாக உயரும்.

உதாரணமாக, முன்னர் 12 சதவீதமாக இருந்த கடன் வட்டி, 13 சதவீதம் அல்லது அதற்கும் அதிகமாக மாறுவதால் பொதுமக்கள் மற்றும் வணிகங்களின் கடன் சுமை அதிகரிக்கும்.

வட்டி உயர்வால் கடன் பெறுவது கடினமாகவும் செலவுமிக்கதாகவும் மாறுவதால், மக்களின் செலவீனங்கள் குறையும் என குறிப்பிடப்படுகின்றது.

எனினும் புதிய தொழில்களைத் தொடங்குதல், வாகனங்கள் வாங்குதல், வீடு கட்டுதல் மற்றும் நுகர்வுப் பொருட்களைக் கொள்வனவு செய்தல் போன்ற நடவடிக்கைகள் சந்தையில் கணிசமாகக் குறைய வாய்ப்புள்ளது.

பொதுமக்களும் வணிகங்களும் குறைவாகக் கடன் பெறுவதால் சந்தையில் பணப் புழக்கம் குறைந்து, பொருட்களுக்கான தேவையும் வீழ்ச்சியடையும்.

சந்தையில் பணப் புழக்கம் அதிகமாக இருந்தால் பொருட்களின் விலை உயரும் என்பதால், பணவீக்கத்தைக் கட்டுப்படுத்துவதே இந்த வட்டி வீத உயர்வின் முதன்மை நோக்கமாகும்.

இதன் சாதகமாக, பணவீக்கம் கட்டுப்படுத்தப்பட்டு பொருட்களின் விலை வேகமாக உயர்வது தடுக்கப்படும். அத்துடன், வைப்பு வட்டி அதிகரிப்பதால் சேமிப்புப் பழக்கம் ஊக்குவிக்கப்படும்.

அத்துடன், வெளிநாட்டு முதலீடுகளை ஈர்ப்பதன் மூலம் நாட்டின் நாணய மதிப்பை ஸ்திரப்படுத்தவும் இந்த வட்டி வீத அதிகரிப்பு உதவும். எனினும் இதன் பாதக விளைவாக மாறும் வட்டி வீதக் கடன்களைப் பெற்றவர்களின் மாதாந்திரத் தவணை கட்டணம் அதிகரிக்கும் என சுட்டிக்காட்டப்பட்டுள்ளது.

தொழில்கள் மற்றும் சிறு வணிகங்களின் விரிவாக்கம் மந்தமடைவதால் நாட்டின் ஒட்டுமொத்த பொருளாதார வளர்ச்சி குறைவடைந்து, புதிய வேலைவாய்ப்புகளும் பாதிக்கப்படலாம் என்பது குறிப்பிடத்தக்கது.