சிலாபத்தில் வீட்டில் தனியாக இருந்த வயோதிப பெண் ஒருவரின் தங்கச் சங்கிலியைப் பறித்து சென்ற சந்தேகநபர் ஒருவர் பொலிஸாரால் கைது செய்யப்பட்டுள்ளார். சந்தேக நபர் சிலாபம் – ததுருஓயாவில் வசிக்கும் 27 வயதுடைய நபர் என அடையாளம் காணப்பட்டுள்ளார்.

சந்தேகநபர் போதைப்பொருளுக்கு அடிமையானவர் என பொலிஸ் விசாரணைகளில் தெரியவந்துள்ளது. 80 வயதுடைய குறித்த பெண் அணிந்திருந்த 80,000 ரூபா பெறுமதியான தங்கச் சங்கிலி கொள்ளையடிக்கப்பட்டுள்ளது.

மழை பெய்து கொண்டிருந்த வேளையில் குடை கேட்பது போல் நடித்து வீட்டிற்குள் நுழைந்த சந்தேகநபர் தங்கச் சங்கிலியை பறித்து சென்றுள்ளார். கைது செய்யப்பட்ட சந்தேகநபரை சிலாபம் நீதவான் நீதிமன்றத்தில் முன்னிலைப்படுத்த பொலிஸார் நடவடிக்கை எடுத்துள்ளனர்.

எதிர்வரும் கல்வி ஆண்டுக்கான பாடசாலைப் பாடநூல்களை விநியோகிக்கும் பணிகள் உத்தியோகபூர்வமாக ஆரம்பிக்கப்பட்டுள்ளதாக கல்வி வெளியீட்டு திணைக்களம் அறிவித்துள்ளது. இதற்கமைய, அனைத்து பாடசாலைகளுக்கும் தேவையான பாடநூல்களை விநியோகிக்கும் பணிகள் எதிர்வரும் டிசம்பர் மாதம் 31 ஆம் திகதிக்குள் முழுமையாக நிறைவு செய்யப்படும் என திணைக்களம் தெரிவித்துள்ளது.

இதேவேளை கடந்த ஆண்டு சிக்கல்களை எதிர்கொண்ட தரம் 6 க்கான புதிய ஆங்கிலப் பாடத்தொகுதி தற்போது முழுமைப்படுத்தப்பட்டு அச்சிடப்பட்டுள்ளது.

இவற்றுடன் தரம் 2 க்கான புதிய பாடத் தொகுதியின் அச்சிடுதல் மற்றும் விநியோகப்பணிகளும் ஆரம்பமாகியுள்ளதுடன், தரம் 6 பாடத் தொகுதிகளின் விநியோகமும் இடம்பெறவுள்ளது. இதன்படி, நாடளாவிய ரீதியில் உள்ள அனைத்துப் பாடசாலைகளுக்கும் உரிய காலப்பகுதிக்குள் பாடநூல்களைத் தங்குதடையின்றி வழங்குவதற்கான அனைத்து ஏற்பாடுகளும் செய்யப்பட்டுள்ளன.

இஸ்ரேலில் இலவச வேலை வாய்ப்புகளை வழங்குவதாக கூறி, வேலை தேடுபவர்களிடமிருந்து தனிப்பட்ட தகவல்களை பெற முயற்சிக்கும் ஒரு போலி இணையதளம் குறித்த தகவல் வெளியாகியுள்ளது.

இலங்கை வெளிநாட்டு வேலைவாய்ப்பு பணியகம் இதனை அறிவித்துள்ளது. இந்த இணையதளம், இலங்கை வெளிநாட்டு வேலைவாய்ப்பு பணியகத்தின் பெயர், உத்தியோகபூர்வ சின்னம் மற்றும் புகைப்படங்களை அனுமதியின்றி பயன்படுத்துகின்றமை தெரியவந்துள்ளது.

இந்த மோசடியின் பல இணைப்புகள், பணியகத்தின் உத்தியோகபூர்வ இணையதளம் அல்லது உத்தியோகபூர்வ இணையவழி ஆட்சேர்ப்பு செயல்முறை என்று மக்களை நம்ப வைக்கும் வகையில் சமூக ஊடகங்களில் பரப்பப்படுவதாக பணியகம் கூறுகின்றது.

இந்த மோசடி இணைப்பு மூலம், பயனர்கள் இணையவழி விண்ணப்பத்திற்கு வழிநடத்தப்பட்டு முழுப் பெயர், பிறந்த திகதி, தேசிய அடையாள எண் (NIC), பாலினம் மற்றும் கைபேசி எண் உள்ளிட்ட தனிப்பட்ட தகவல்களை பெற முயற்சிக்கப்படுகின்றது.

இந்த மோசடியானது அடையாளத் திருட்டு, ஆள்மாறாட்டம், மோசடியான தரவு சேகரிப்பு, சமூகப் பொறியியல் மற்றும் தனிப்பட்ட தரவுகளைத் தவறாகப் பயன்படுத்துதல் போன்ற அபாயங்களை ஏற்படுத்தக்கூடும் என்று பணியகம் குறிப்பிடுகின்றது.

இஸ்ரேலில் வேலை தேடும் இளைஞர்களை குறிவைத்து, தவறான தகவல்களை பரப்புவதன் மூலம் அவர்களின் தனிப்பட்ட தகவல்களை பெறுவதே இந்த மோசடியின் நோக்கமாக இருக்கலாம் என்று பணியகம் சுட்டிக்காட்டுகின்றது.

மேலும், இஸ்ரேலிய வேலைவாய்ப்பு தொடர்பான உத்தியோகபூர்வ தகவல்களைப் பெறும்போது, ​​இலங்கை வெளிநாட்டு வேலைவாய்ப்பு பணியகத்தால் அதிகாரப்பூர்வமாக வெளியிடப்பட்ட தகவல்களை மட்டுமே நம்ப வேண்டும் என்றும் பணியகம் அறிவுறுத்துகின்றது.

பெரும்பாலான இலங்கையர்கள் தங்களது வாழ்வாதாரத்தைக் கொண்டுச் செல்ல தங்களிடம் இருக்கும் தங்க நகைகளை வங்கிகளில் அடகு வைத்துள்ளனர் என்று நாடாளுமன்ற உறுப்பினர் ரோஹித அபேகுணவர்தன தெரிவித்துள்ளார்.

இன்றைய(25.09.2026) நாடாளுமன்ற அமர்வில் கலந்து கொண்டு கருத்துத் தெரிவிக்கும் போதே அவர் மேற்கண்டவாறு குறிப்பிட்டார். தொடர்ந்தும் தெரிவிக்கையில், நாட்டின் பொருளாதார நிலை குறித்து அரசாங்கம் மேலும் கவனம் செலுத்த வேண்டும்.
அடகு வைக்கப்படும் நகைகள்

இன்றைய சிங்கள பத்திரிகையில் வெளியாகியுள்ள செய்தியொன்றின் அடிப்படையில் ஐந்து மாதங்களில் 15 பில்லியன் ரூபா பெறுமதியான தங்க நகைகள் வங்கிகளில் அடகு வைக்கப்பட்டுள்ளதாக தெரிவிக்கப்படுகின்றது.

வளமான நாடு, அழகான வாழ்க்கை என்று கூறுகிறீர்கள். ஆனால், 15 பில்லியன் ரூபா பெறுமதியுள்ள இந்த நகைகள் ஐந்து மாதங்களுக்குள் அடகு வைக்கப்பட்டுள்ளன. இவற்றை நாங்கள் கூறவில்லை. மத்திய வங்கியின் தரவுகளே கூறுகின்றன.

மக்கள் தங்களது நகைகளை வீட்டில் வைத்திருக்க முடியாமல் அடகு வைக்கவில்லை. வீட்டில் வைத்திருந்தால் திருட்டுப் போய் விடும் என்ற பயத்தில் அடகு வைக்கவில்லை. அவர்களுடைய வாழ்வாதாரத்திற்காக இவ்வாற தங்களுடைய தங்க நகைகளை அடகு வைத்துள்ளனர்.

மக்களுக்கு வாழ்வதற்கே வழியில்லாத நிலை ஏற்பட்டுள்ளதால் அவர்கள் தங்கங்களை அடகு வைத்து வாழ வேண்டிய நிலைக்குத் தள்ளப்பட்டுள்ளனர். இதுதான் உண்மை. உணவுக்காகவும், வாழ்வதற்காகவும் தங்கள் பசியை தீர்ப்பதற்காகவும் மக்கள் இந்த இக்கட்டான நிலைக்குத் தள்ளப்பட்டுள்ளனர். இதுதான் உண்மை என குறிப்பிட்டுள்ளார்.

எதிர்வரும் நவம்பர் 01 ஆம் திகதி முதல் பல்வேறு முக்கிய தேவைகளுக்காக செல்லுபடியாகும் வரி செலுத்துபவரின் அடையாள இலக்கச் சான்றிதழ் சமர்ப்பிப்பது கட்டாயமாக்கப்பட்டுள்ளது. உள்நாட்டு இறைவரித் திணைக்களம் இதனை அறிவித்துள்ளது. 2026 ஆம் ஆண்டின் 11 ஆம் இலக்க உள்நாட்டு இறைவரி (திருத்தச்) சட்டத்தின் கீழ் இந்த புதிய விதிகள் அறிமுகப்படுத்தப்பட்டுள்ளன.

இதன்படி, வங்கி கணக்குகளை தொடங்குதல், வாகன உரிமங்களைப் பதிவு செய்தல் அல்லது புதுப்பித்தல், நிலம் அல்லது வணிகங்களைப் பதிவு செய்தல், கட்டிடத் திட்ட அனுமதிகளைப் பெறுதல், பங்குகளைப் பரிமாற்றம் செய்தல் மற்றும் கடனட்டைகளுக்கு விண்ணப்பித்தல் ஆகியவற்றுக்குச் செல்லுபடியாகும் வரி செலுத்துவோர் அடையாள இலக்கச் சான்றிதழ் கட்டாயமாக்கப்பட்டுள்ளது.

2023 டிசம்பர் 31 ஆம் திகதியன்று அல்லது அதற்கு முன்னர் 18 வயது பூர்த்தியடைந்த மற்றும் 2024 ஜனவரி 01 ஆம் திகதியன்று அல்லது அதற்குப் பின்னர் 18 வயதை அடைந்த அனைவரும் வரி செலுத்துவோர் அடையாள இலக்கச் சான்றிதழைப் பெறுவது கட்டாயமாகும்.

பதிவு செய்யாத நபர்கள் உள்நாட்டு இறைவரி திணைக்களத்தின் உத்தியோகபூர்வ இணையத்தளம் (eservices.ird.gov.lk) ஊடாகப் பதிவு செய்து வரி செலுத்துவோர் அடையாள இலக்க சான்றிதழை பெற்றுக்கொள்ளுமாறு அறிவுறுத்தப்பட்டுள்ளனர்.

இந்த புதிய நடவடிக்கை நாட்டின் வரி அடிப்படையை விரிவுபடுத்தும் என்றும், நிதிப்பரிவர்த்தனைகளில் வெளிப்படைத்தன்மையை பேணும் என்றும் எதிர்பார்க்கப்படுகின்றது.

இலங்கையில் ஒன்லைன் வங்கிச் சேவைகளை பயன்படுத்தும் வாடிக்கையாளர்களுக்கு அவசர எச்சரிக்கை எச்சரிக்கை விடுக்கப்பட்டுள்ளது.

சர்வதேச மோசடிக் குழுக்கள் வாடிக்கையாளர்களின் கணக்கு விபரங்களைத் திருடுவதற்கும், வங்கி கணக்குகளுக்குள் சட்டவிரோதமாக நுழைவதற்கும் அதிநவீன ‘பிஷிங்’ (Phishing – தகவல் திருட்டு) தாக்குதல்கள் மற்றும் போலி வங்கி இணையதளங்களைப் பயன்படுத்தி வருவதாக எச்சரிக்கப்பட்டுள்ளது.

இதனை தடுக்கும் நோக்கில் இலங்கையின் ஒன்லைன் வங்கிச் சேவைகளுக்காக மேலதிக பாதுகாப்பு நடவடிக்கைகள் அறிமுகப்படுத்தப்பட்டு வருவதாக இலங்கை தகவல் மற்றும் தொடர்பாடல் தொழில்நுட்ப முகவர் நிலையத்தின் முன்னாள் பணிப்பாளர் பிரஷாந்த திஸாநாயக்க தெரிவித்துள்ளார்.

கடந்த ஆண்டில் நாட்டின் டிஜிட்டல் நிதித் துறையைக் குறிவைத்து நடத்தப்படும் சைபர் அச்சுறுத்தல்கள் அதிகரித்துள்ளதாகவும், வங்கி வாடிக்கையாளர்களை இலக்கு வைக்க மோசடி செய்பவர்கள் செயற்கை நுண்ணறிவு உள்ளிட்ட அதிநவீன தொழில்நுட்ப முறைகளைப் பயன்படுத்தி வருவதாகவும் அவர் குறிப்பிட்டுள்ளார்.

வாடிக்கையாளர்களின் கடவுச்சொல் மற்றும் உள்நுழைவு விபரங்களைக் கண்டறிவதற்காக பிஷிங் தாக்குதல்கள் மற்றும் போலி வங்கி இணையப் பக்கங்கள் பயன்படுத்தப்படுவதால், வங்கிக் கணக்குகளுக்குள் சட்டவிரோதமாக நுழையும் அபாயம் அதிகரித்துள்ளது.

இவ்வாறான தாக்குதல்களுக்கு எதிராக நடவடிக்கை எடுக்கவும், வாடிக்கையாளர்களின் பணத்தைப் பாதுகாக்கவும் வங்கிகள் கடுமையான பாதுகாப்பு நடைமுறைகளை அறிமுகப்படுத்தி வருகின்றன.

பதிவு செய்யப்பட்ட அல்லது நம்பகமான இணைய உலாவிகளுக்கு மட்டுமே ஆன்லைன் வங்கிச் சேவைக்கான அணுகலைக் கட்டுப்படுத்துதல் மற்றும் கூடுதல் அங்கீகார படிகளை அறிமுகப்படுத்துதல் போன்ற புதிய பாதுகாப்பு முறைகள் ஆரம்பத்தில் சில வாடிக்கையாளர்களுக்கு சிரமமாகத் தோன்றலாம் என திஸாநாயக்க தெரிவித்தார்.

எனினும், தானியங்கி சைபர் தாக்குதல்களிலிருந்து பாதுகாத்துக் கொள்ள இவ்வாறான கூடுதல் பாதுகாப்பு அடுக்குகள் அத்தியாவசியமானவை என அவர் சுட்டிக்காட்டியுள்ளார்.

இந்த கூடுதல் பாதுகாப்பு அடுக்குகள் தானியங்கி ‘சர்க்யூட் பிரேக்கர்’ போன்று தொழிற்பட்டு, மோசடி செய்பவர்கள் கணக்கைக் கட்டுப்பாட்டிற்குள் கொண்டுவந்து பணத்தைப் பெறுவதற்கு முன்பாகவே அவர்களின் போலி அணுகல் முயற்சிகளைத் தடுத்து நிறுத்துவதாகத் தெரிவித்துள்ளார்.

அதிக வசதியையும் பாதுகாப்பையும் எதிர்பார்க்கும் வாடிக்கையாளர்கள் தங்கள் வங்கியின் உத்தியோகபூர்வ மொபைல் வங்கிச் செயலிகளைப் பயன்படுத்துமாறும், உறுதிப்படுத்தப்படாத இணைப்புகள் அல்லது இணையதளங்கள் மூலம் வங்கிச் சேவைகளைப் பெறுவதைத் தவிர்க்குமாறும் அவர் கேட்டுக்கொண்டுள்ளார்.

உத்தியோகபூர்வ மொபைல் வங்கிச் செயலிகளை அணுகும்போது முக அடையாளம் மற்றும் கைரேகை சரிபார்ப்பு போன்ற உயிரியல் அளவீட்டு பாதுகாப்பு முறைகள் கூடுதல் பாதுகாப்பை வழங்குகின்றன என்றும் அவர் சுட்டிக்காட்டினார்.

இவ்வாறான செயலிகளைப் பயன்படுத்துவதன் மூலம் போலி வங்கி இணையதளங்கள் மற்றும் போலிப் பிரசாரங்களின் அபாயத்தைக் குறைக்க முடியும் என அவர் தெரிவித்துள்ளார்.

எனவே, வங்கி வாடிக்கையாளர்கள் தமது வங்கிகளின் பாதுகாப்பு வழிகாட்டுதல்களைப் பின்பற்றி, உத்தியோகபூர்வ வங்கிச் செயலிகளை மட்டுமே பயன்படுத்துமாறும், வங்கிக் கணக்கு விபரங்களைக் கோரும் சந்தேகத்திற்கிடமான இணைப்புகள் அல்லது செய்திகள் குறித்து எச்சரிக்கையாக இருக்குமாறும் அவர் வாடிக்கையாளர்களுக்கு அறிவுறுத்தல் வழங்கியுள்ளார்.

எல்ல, கித்தல்தெல்ல பிரதேசத்தில் ராவணா நீர்வீழ்ச்சியை பார்க்க சென்ற வெளிநாட்டு இளம் பெண் ஒருவர் உயிரிழந்துள்ளார். நேற்று மாலை நீர்வீழ்ச்சியில் இருந்து கீழே விழுந்து அவர் உயிரிழந்துள்ளதாக பொலிஸார் தெரிவித்தனர்.

இவ்வாறு உயிரிழந்தவர் 27 வயதான வெலென்டினா என்ற நெதர்லாந்து நாட்டைச் சேர்ந்தவர் என அடையாளம் காணப்பட்டுள்ளார். வெளிநாட்டு சுற்றுலாப் பயணிகள் இருவரும் ராவணா நீர்வீழ்ச்சியை பார்க்கச் சென்றபோது, ​​அவர்களில் ஒரு பெண்ணின் கால் தவறி சுமார் 100 அடி உயரத்திலிருந்து கீழே விழுந்துள்ளார்.

பிரதேசவாசிகள் அவரை மீட்டு வைத்தியசாலையில் அனுமதித்த போதினும், ஏற்கனவே அவர் உயிரிழந்துள்ளதாக வைத்தியர்கள் உறுதிப்படுத்தியுள்ளனர். அதற்கமைய, சம்பவம் தொடர்பில் எல்ல பொலிஸார் மேலதிக விசாரணைகளை மேற்கொண்டு வருகின்றனர்.

நுவரெலியா, கண்டி உள்ளிட்ட மலையகத்தின் பல பகுதிகளிலும் இன்று (24) அதிகாலை முதல் பலத்த காற்றுடன் கூடிய கனமழை பெய்து வருகின்றது. இதனால் மக்களின் இயல்பு வாழ்க்கை பாதிக்கப்பட்டுள்ளது.

தொடர்ச்சியாக மழை பெய்து வருவதுடன், பல பகுதிகளில் பனிமூட்டம் காணப்படுவதால், வீதிகளில் வாகனங்களைச் செலுத்தும் போது மிகுந்த அவதானத்துடன் இயக்குமாறு சாரதிகளிடம் ஹட்டன் பொலிஸார் கோரிக்கை விடுத்துள்ளனர். இடைவிடாது பெய்து வரும் மழை காரணமாக நீர்த்தேக்கங்களின் நீர்மட்டம் வேகமாக அதிகரித்து வருகின்றது.

அந்தவகையில் காசல்ரீ மற்றும் மவுசாக்கலை ஆகிய நீர்த்தேக்கங்கள் வான்பாயும் அளவை எட்டியுள்ளதாக நீர்த்தேக்கங்களுக்கு பொறுப்பான பொறியியலாளர்கள் தெரிவித்தனர். மேலும், சில பகுதிகளில் சிறிய அளவிலான மண்சரிவு அபாயங்களும் இடம்பெற்றுள்ளன.

தொடர் மழை காரணமாக தோட்டத் தொழிலாளர்கள், கட்டடக் கலைத் தொழிலாளர்கள் (மேசன்) மற்றும் விவசாயிகள் உள்ளிட்ட பல தரப்பினரின் அன்றாட ஜீவனோபாய நடவடிக்கைகள் பாதிக்கப்பட்டுள்ளன.

நுவரெலியா மாவட்டத்தில் உள்ள சில பாடசாலைகளில் மாணவர்களின் வருகைப் பதிவு குறைவாகக் காணப்பட்டதாகவும் தெரியவருகின்றது.

சீரற்ற காலநிலை நீடிப்பதால் ஆறுகளில் நீராடுவதையோ, நீர்வீழ்ச்சிகளைப் பார்வையிடச் செல்வதையோ மற்றும் மண்சரிவு அபாயமுள்ள பகுதிகளுக்குப் பயணிப்பதையோ தவிர்த்துக் கொள்ளுமாறு சம்பந்தப்பட்ட அதிகாரிகள் பொதுமக்களிடம் கேட்டுக்கொண்டுள்ளனர்.

முதலாம் இணைப்பு : இலங்கையின் பல பகுதிகளில் சீரற்ற காலநிலை தீவிரமடைந்து வரும் நிலையில் களு கங்கையின் கிளை ஆறான குடா கங்கையின் நீரேந்தும் பகுதிகளில் வெள்ள அபாய எச்சரிக்கை மேலும் 48 மணித்தியாலங்களுக்கு நீடிக்கப்பட்டுள்ளதாக நீர்ப்பாசனத் திணைக்களம் அறிவித்துள்ளது.

இதற்கமைய குறித்த பகுதியிலுள்ள சிறிய வீதிகளைப் பயன்படுத்தும் பொதுமக்கள், வாகன சாரதிகள் மிகுந்த அவதானத்துடன் செயற்படுமாறு கேட்டுக்கொள்ளப்பட்டுள்ளனர்.

இதேவேளை மத்திய மலைநாட்டில் தொடர்ந்து பெய்து வரும் கனமழை காரணமாக மேல் கொத்மலை நீர்த்தேக்கத்தின் வான்கதவு திறக்கப்பட்டு நீர் வெளியேற்றப்பட்டு வருவதாக அறிவிக்கப்பட்டுள்ளது.

இன்று (24) காலை 10.30 மணியளவில் மேல் கொத்மலை நீர்த்தேக்கத்தின் வான்கதவு ஊடாக நீர் வெளியேற்றம் ஆரம்பிக்கப்பட்டுள்ளதாகவும், இதன் காரணமாக நீர்த்தேக்கத்தின் கீழ்ப்பகுதிகளில் வசிக்கும் மக்கள் மிகுந்த அவதானத்துடன் செயற்படுமாறும் நுவரெலியா மாவட்ட அனர்த்த முகாமைத்துவ அதிகாரிகள் அறிவுறுத்தியுள்ளனர்.

டயகம பகுதியில் ஆரம்பமாகும் மகாவலி கங்கையின் நீர்மட்டம் அதிகரித்து வருவதுடன், அப்பகுதியில் இருந்து நீர் பெறும் பல ஓடைகளிலும் கனமழை காரணமாக வெள்ளப்பெருக்கு ஏற்பட்டுள்ளது. இதனால் மேல் கொத்மலை நீர்த்தேக்கத்திற்கு அதிகளவில் நீர் வரத்து ஏற்பட்டுள்ள நிலையில், பாதுகாப்பு நடவடிக்கையாக வான்கதவு திறக்கப்பட்டுள்ளன.

இதன் காரணமாக களனி கங்கை மற்றும் மகாவலி கங்கையை அண்டிய தாழ்நிலப் பகுதிகளில் வசிக்கும் மக்கள் ஆற்றங்கரைகள் மற்றும் நீர்நிலைகளுக்கு அருகில் செல்வதைத் தவிர்த்து, மிகுந்த அவதானத்துடன் இருக்குமாறு அதிகாரிகள் அறிவுறுத்தியுள்ளனர்.

முல்லைத்தீவு மாவட்டம், மாங்குளம் பொலிஸ் பிரிவுக்குட்பட்ட பணிக்கன்குளம் பகுதியில் உள்ள ஒரு வீட்டில் உறங்கிக்கொண்டிருந்த தம்பதியினர் தாக்கப்பட்டுக் கொலை செய்யப்பட்டுள்ளனர். இன்று (24.09.2026) அதிகாலை 2 மணியளவில் இச்சம்பவம் இடம்பெற்றுள்ளது.

வீடொன்றில் தந்தை, தாய் மற்றும் மகள் ஆகியோர் உறங்கிக்கொண்டிருந்த வேளையில், வீட்டிற்குள் நுழைந்த அடையாளம் தெரியாத நபர்கள் தந்தை மற்றும் தாயின் தலையில் பலமாக தாக்கியுள்ளனர். இதன்போது மகள் கூச்சலிட்டதையடுத்து, அயலவர்கள் ஓடிவந்து அவர்களை மீட்டு மாங்குளம் ஆதார வைத்தியசாலைக்குக் கொண்டு சென்ற நிலையில் இருவரும் சிகிச்சை பலனின்றி உயிரிழந்துள்ளதாக தெரிவிக்கப்படுகிறது.

இக்கொலை சம்பவத்தை யார், எதற்காகச் செய்தார்கள் என்பது தொடர்பில் சம்பவ இடத்திற்கு வருகை தந்த மாங்குளம் பொலிஸார் தீவிர விசாரணைகளை முன்னெடுத்து வருகின்றனர்.

மேலும், தடயவியல் பொலிஸார், விசேட அதிரடிப்படையினர் மற்றும் புலனாய்வுப் பிரிவினர் சம்பவ இடத்திற்கு வருகை தந்து பல கோணங்களில் விசாரணைகளை முன்னெடுத்து வருகின்றனர்.  இதேவேளை உயிரிழந்தவர்களின் சடலங்கள் மாங்குளம் ஆதார வைத்தியசாலையில் வைக்கப்பட்டுள்ளது.

புத்தள – மொனராகலை பிரதான வீதியின் மஹகொடையாய பகுதியில் இலங்கை போக்குவரத்துச் சபைக்கு சொந்தமான பேருந்தும் தனியார் பேருந்தும் நேருக்கு நேர் மோதி விபத்திற்குள்ளாகியுள்ளது. இன்று (24.09.2026) காலை இந்த விபத்து இடம்பெற்றுள்ளதாக தெரிவிக்கப்படுகின்றது.

இந்த விபத்தில் காயமடைந்த ஆறு பேர் மொனராகலை மாவட்ட பொது வைத்தியசாலையில் அனுமதிக்கப்பட்டுள்ளனர்.

வெல்லவாயவிலிருந்து மொனராகலை நோக்கிப் பயணித்த இலங்கை போக்குவரத்து சபைக்கு சொந்தமான பேருந்து , பயணிகளை இறக்குவதற்காக மஹகொடையாய பகுதியில் நிறுத்தப்பட்டிருந்த வேளையில், மாறையிலிருந்து அம்பாறை நோக்கி பின்னால் வந்த தனியார் பேருந்து அதன் பின்புறத்தில் மோதியதிலேயே விபத்து நேர்ந்துள்ளது.

விபத்து சம்பவம் தொடர்பில் புத்தல பொலிஸ் நிலைய அதிகாரிகள் மேலதிக விசாரணைகளில் ஈடுபட்டு வருகின்றனர்.

நடப்பு ஆண்டில் நிலவும் சக்திவாய்ந்த “சூப்பர் எல் நினோ” காலநிலை மாற்றத்தின் காரணமாக, உலகளவில் தீவிர வெப்பம் அதிகரித்து, அடுத்த ஆண்டின் தொடக்கத்திற்குள் (பெப்ரவரி 2027) சுமார் 4,51,000 கூடுதல் உயிரிழப்புகள் ஏற்படக்கூடும் என்று எச்சரிக்கப்பட்டுள்ளது.

க்ளைமேட் இம்பாக்ட் லேப் (Climate Impact Lab) வெளியிட்டுள்ள புதிய அறிக்கையில் இந்த எச்சரிக்கை விடுக்கப்பட்டுள்ளது. இந்த ஆண்டு ஜூன் முதல் 2027 பெப்ரவரி வரையிலான காலத்தில், இயல்பான ஆண்டுகளை விட 4,51,000 அதிகமான வெப்பம் சார்ந்த உயிரிழப்புகள் நிகழ வாய்ப்புள்ளது.

இந்த காலப்பகுதியில் வழக்கமான ஆண்டுகளை விட உலகளவில் அதிக வெப்பம் நிலவும் நாட்களின் எண்ணிக்கை 44 சதவீதம் அதிகரிக்கும் என்றும் எதிர்வு கூறப்பட்டுள்ளது இந்த ஆண்டின் எல் நினோ தாக்கமானது, இன்னும் சில தசாப்தங்களில் உலகம் எதிர்கொள்ளப் போகும் இயல்பான வெப்பநிலையின் “முன்னோட்டம்” (Postcard from the future) என ஆராய்ச்சியாளர்கள் விபரித்துள்ளனர்.

பசிபிக் பெருங்கடலின் மத்திய மற்றும் கிழக்கு பகுதிகளில் கடல் மேற்பரப்பு வெப்பநிலை இயல்பை விட 0.5°C அதிகரிக்கும் போது ‘எல் நினோ’ உருவாகிறது. கடல் வெப்பநிலை 2°C அல்லது அதற்கு மேல் உயரும் போது அது “சூப்பர் எல் நினோ” என வகைப்படுத்தப்படுகிறது. நடப்பு ஆண்டில் இது 2.7°C வரை உயர்ந்துள்ளதுடன், நவம்பர்-டிசம்பர் மாதங்களில் 4°C வரை உயரக்கூடும் என கணிக்கப்பட்டுள்ளது.

அபிவிருத்தியடைந்து வரும் தெற்குலக நாடுகளே (Global South) இதனால் மிகக் கடுமையான பாதிப்பைச் சந்திக்கவுள்ளன இந்த நிலையில், உயிரிழப்புகளைக் குறைக்க முடிவெடுப்பவர்கள் உடனடியாக பாதுகாப்பு நடவடிக்கைகளைச் செயல்படுத்த வேண்டும் என அறிக்கை பரிந்துரைக்கிறது.

தீவிர வெப்ப எச்சரிக்கைகளை (Heat Warnings) முன்னதாகவே வெளியிடுதல். வைத்தியசாலைகளில் ஊழியர்கள் மற்றும் அவசர சிகிச்ச வசதிகளை அதிகரித்தல்.

பொதுமக்கள் தஞ்சம் அடைய குளிரூட்டும் மையங்களை (Cooling Centres) அமைத்தல். திறந்தவெளியில் வேலை செய்யும் தொழிலாளர்களுக்குப் பாதுகாப்பு விதிமுறைகளை நடைமுறைப்படுத்துதல் – என்பனவே அந்த பரிந்துரைகளாகும்.

கிரிஷ் குழுமத்தின் முன்னாள் நிர்வாகப் பணியாளரும் தொழிலதிபருமான ஜானகி சிறிவர்தன, இலஞ்ச ஒழிப்பு ஆணைக்குழுமத்தால் (CIABOC) கைது செய்யப்பட்டுள்ளார். நாடாளுமன்ற உறுப்பினர் நாமல் ராஜபக்சவுக்கு மூன்று முறை 70 மில்லியன் ரூபாயை இலஞ்சமாக வழங்கியதாகக் கூறப்படும் குற்றச்சாட்டின் பேரில், இவர் இலஞ்ச ஒழிப்பு ஆணைக்குழுமத்தால் (CIABOC) கைது செய்யப்பட்டுள்ளார்.

இலஞ்சம் அல்லது ஊழல் குற்றச்சாட்டுகளை விசாரிக்கும் ஆணையத்தின் (CIABOC) சிறப்பு புலனாய்வுப் பிரிவு அதிகாரிகளால் அவர் இன்று காலை (24) கைது செய்யப்பட்டதாகத் தெரிவிக்கப்பட்டுள்ளது.

கிரிஷ் டிரான்ஸ்வொர்க்ஸ் கொழும்பு (பிரைவேட்) லிமிடெட் நிறுவனத்திற்காக, கொழும்பு கோட்டையில் உள்ள நகர்ப்புற அபிவிருத்தி அதிகார சபைக்கு (UDA) சொந்தமான ஒரு சொத்தைப் பெற்றுத் தருவதற்கும், தேவையான ஒப்புதல்களை விரைவுபடுத்துவதற்கும் உதவியதற்காக, நாமல் ராஜபக்சவுக்கு மூன்று வெவ்வேறு சந்தர்ப்பங்களில் 70 மில்லியன் ரூபா இலஞ்சம் வழங்கப்பட்டதாகக் கூறப்படுகிறது.