கொழும்பு செட்டித்தெரு பகுதியில் பொலிஸாரின் நடவடிக்கைக்கு எதிர்ப்பு தெரிவித்து மக்கள் போராட்டத்தில் ஈடுபட்டுள்ளனர். நகை வியாபாரி ஒருவர் பொலிஸாரால் தாக்கப்பட்டு, இழுத்துச் செல்லப்பட்டுள்ள நிலையில் அதனை தொடர்ந்து இந்தப் போராட்டம் முன்னெடுக்கப்பட்டுள்ளது.
இதனையடுத்து, செட்டித்தெருவில் உள்ள நகை வியாபாரிகள் மற்றும் நகைக் கடை உரிமையாளர்கள் ஒன்றுகூடி எதிர்ப்பை வெளிப்படுத்தியுள்ளனர்.
இதன் காரணமாக அப்பகுதியில் பதற்றமான சூழ்நிலை ஏற்பட்டுள்ளதாக தெரிவிக்கப்படுகிறது. இது தொடர்பான சிசிரிவி காட்சிகளும் பதிவாகியுள்ளதால் பலத்த எதிர்ப்பு நிலை அந்த பகுதியில் காணப்படுகின்றது.
இலங்கையில் இருந்து இந்தியாவுக்கு அகதியாகச் சென்ற குடும்பத்தில் பிறந்து, அகதி முகாமில் தனது குழந்தைப் பருவத்தின் ஒரு பகுதியைக் கழித்த 19 வயதான டிசாதனா, இன்று Super Singer இசைப் போட்டியின் மூலம் கவனம் பெற்றுள்ள இளம் பாடகியாக உருவெடுத்துள்ளார்.
சென்னையில் Physiotherapy கல்வியைத் தொடரும் அவர், சிறு வயது முதலே இசைப் பயிற்சியையும் மேற்கொண்டு வந்துள்ளார். Little Champs இசைப் போட்டியில் இரண்டாம் இடம் பெற்றதுடன், பல்வேறு நிகழ்ச்சிகளில் பாடி தனது திறமையை வளர்த்துள்ளார்.
2026 பெப்ரவரி 1ஆம் திகதி நடைபெற்ற Super Singer Season 11 இறுதிப்போட்டியில் டிசாதனா இரண்டாம் இடத்தைப் பெற்றார். அவரது இசைப் பயணத்திற்கு தாயார் வழங்கிய ஆதரவும் முக்கியமானதாக அமைந்துள்ளது.
தற்போது இளம் பாடகர்களுக்கு இசைப் பயிற்சி வழங்கி வரும் டிசாதனா, கல்வியையும் இசையையும் தொடர்ந்து முன்னெடுத்து வருகிறார்.
அகதி என்ற அடையாளத்தால் பல்வேறு கட்டுப்பாடுகள் இருந்தபோதிலும், கனவுகளை கைவிடாமல் முன்னேறிய தனது பயணம் மற்ற இளைஞர்களுக்கும் நம்பிக்கையளிக்க வேண்டும் என்பதே டிசாதனாவின் விருப்பமாக உள்ளது.
வவுனியாவைச் சேர்ந்த ஆசிரியையும், கலை மற்றும் இலக்கியத் துறைகளில் ஆர்வத்துடன் செயற்பட்டு வந்தவருமான வனிதா சேனாதிராஜா, நேற்று (23.09.2026) புதன்கிழமை சடலமாக மீட்கப்பட்டுள்ளார். மின்னேரியா பகுதியில் உள்ள தங்குமிடமொன்றில் இருந்து அவரது சடலம் காணப்பட்டதையடுத்து, சம்பவ இடத்துக்குச் சென்ற பொலிஸார் விசாரணைகளை ஆரம்பித்துள்ளனர்.
ஆரம்பகட்ட விசாரணைகளின் அடிப்படையில், வனிதா சேனாதிராஜா தனது உயிரை மாய்த்துக்கொண்டிருக்கலாம் என மின்னேரியா பொலிஸார் சந்தேகம் வெளியிட்டுள்ளனர். எனினும், இது தொடர்பில் இறுதியான முடிவு எதுவும் அறிவிக்கப்படாத நிலையில், மேலதிக விசாரணைகள் தொடர்கின்றன.
மரணத்திற்கான துல்லியமான காரணத்தைக் கண்டறிய அவரது சடலம் பிரேத பரிசோதனைக்கு உட்படுத்தப்பட்டு, அதன் மருத்துவ அறிக்கை மற்றும் தடயவியல் சான்றுகளின் அடிப்படையில் காவல்துறையினர் அடுத்தகட்ட விசாரணைகளை நகர்த்தி வருகின்றனர்.
தியாகி திலீபனின் 39ம் ஆண்டு நினைவேந்தலை முன்னிட்டு, பிரித்தானியாவில் 12 நாட்கள் சுழற்சி முறையிலான அடையாள உண்ணாவிரதப் போராட்டம் தொடர்ச்சியாக நடைபெற்று வருகின்றது. பிரித்தானியாவில் கடந்த 15ம் திகதி முதல் ஆரம்பிக்கப்பட்ட இப் போராட்டங்கள் தீவிரமாக முன்னெடுக்கப்பட்டு வருகின்றன.
தியாகி திலீபனின் 39ம் ஆண்டு நினைவேந்தல் நிகழ்வுகள் இலங்கையிலும் மற்றும் புலம்பெயர் தேசங்களிலும் பரவலாக முன்னெடுக்கப்பட்டு வரும் நிலையில், செப்டம்பர் 23 (23/09) புதன்கிழமை அன்று பிரித்தானியாவின் பர்மிங்ஹாம் (Birmingham) நகரில் அடையாள உண்ணாவிரதப் போராட்டம் நடைபெற்றது.
18 வயசு தான் ஆச்சு. நர்சிங் கல்லூரி மாணவி உடலில் காயங்களுடன் சடலமாக மீட்கப்பட்ட சம்பவம் தெலங்கானாவை அதிர செய்துள்ளது.
தெலங்கானா மாநிலம் பத்ராத்ரி கோத்தகுடேம் மாவட்டத்தில் 18 வயது நர்சிங் மாணவி சந்தேகத்திற்கிடமான முறையில் உயிரிழந்த சம்பவம் அதிர்ச்சியை ஏற்படுத்தியுள்ளது.ஜுலுருபாடு மண்டலம் வெங்கன்னபாலெம் கிராமத்தைச் சேர்ந்த ஹரிணி,
கம்மம் பகுதியில் உள்ள தனியார் கல்லூரியில் முதலாம் ஆண்டு செவிலியர் பயிற்சி படித்து வந்ததாக கூறப்படுகிறது. விடுமுறைக்காக உறவினர் வீட்டுக்குச் சென்றிருந்த அவர், பின்னர் தனது வீட்டுக்கு திரும்பியுள்ளார்.
இந்நிலையில் ஹரிணி திடீரென மாயமானதாக கூறப்படுகிறது. குடும்பத்தினர் அவரை தேடி வந்த நிலையில், வீட்டின் குளியலறைக்கு பின்புறம் காயங்களுடன் அவரது சடலம் கண்டெடுக்கப்பட்டது.
இதனால் அதிர்ச்சியடைந்த குடும்பத்தினர் உடனடியாக போலீசாருக்கு தகவல் தெரிவித்தனர். சம்பவ இடத்துக்கு சென்ற போலீசார் உடலை கைப்பற்றி விசாரணை மேற்கொண்டனர்.
ஹரிணியின் மரணத்தில் சந்தேகம் இருப்பதாக அவரது தாயார் குற்றம்சாட்டியுள்ளார். மேலும், அண்டை வீட்டைச் சேர்ந்தவர்களே இந்த சம்பவத்துக்குக் காரணமாக இருக்கலாம் என்றும் அவர் போலீசாரிடம் தெரிவித்ததாக கூறப்படுகிறது.
இதுகுறித்து போலீசார் வழக்குப்பதிவு செய்து பல்வேறு கோணங்களில் விசாரணை நடத்தி வருகின்றனர். ஹரிணி எவ்வாறு உயிரிழந்தார், அவருக்கு ஏற்பட்ட காயங்களுக்கான காரணம் என்ன, இந்த சம்பவத்தில் வேறு யாருக்காவது தொடர்பு உள்ளதா என்பது குறித்து போலீசார் விசாரித்து வருகின்றனர்.
மாணவியின் உடல் பிரேதப் பரிசோதனைக்காக அனுப்பப்பட்டு, அதன் முடிவுகளின் அடிப்படையிலும் விசாரணை தொடர்ந்து நடைபெறும் என எதிர்பார்க்கப்படுகிறது.இந்த சம்பவம் தொடர்பாக போலீஸ் விசாரணை முடிவடைந்து, மரணத்துக்கான காரணம் மற்றும் சம்பவத்தில் தொடர்புடையவர்கள் குறித்த அதிகாரப்பூர்வ தகவல்கள் வெளியாகிய பிறகே அடுத்தகட்ட விவரங்கள் உறுதி செய்யப்பட உள்ளன.
பிரித்தானியாவில் தகாத செயற்பாட்டில் ஈடுபட்ட இலங்கை தமிழர் ஒருவருக்கு சிறைத்தண்டனை விதிக்கப்பட்டுள்ளது. 42 வயதான கமலாதாசன் யோகராஜா என்பவருக்கு 28 மாத சிறைத்தண்டனையும், 10 ஆண்டுகளுக்குப் தகாத செயற்பாட்டு குற்றவாளிகள் பதிவேட்டில் கையெழுத்திடவும் உத்தரவிடப்பட்டுள்ளது.
குற்றவாளியாக அறிவிக்கப்பட்டுள்ள இலங்கையர் லண்டனில் இருந்து லிவர்பூர் பகுதிக்கு சென்று கொண்டிருந்த பேருந்து ஒன்றில் இளம் பெண்களிடம் தகாத செயற்பாட்டில் ஈடுபட்டுள்ளார். மதுபோதையில் இருந்து குற்றவாளி, குறித்த இரண்டு பெண்களும் உறங்கத்தில் இருந்து நேரத்தில் இவ்வாறான செயற்பாட்டில் ஈடுபட்டுள்ளார்.
பாதிக்கப்பட்ட பெண்கள் விழித்துக் கொண்ட பின்னரே குற்றவாளி தனது தகாத செயற்பாட்டை நிறுத்தியதாக நீதிமன்றில் தெரிவிக்கப்பட்டுள்ளது. இந்த செயற்பாட்டை கடுமையாக சாடியுள்ள நீதிபதி, குற்றவாளிக்கான தண்டனையை அறிவித்தார்.
இந்த சம்பவம் 2025ஆம் ஆண்டு ஏப்ரல் மாதத்தில் நடைபெற்ற நிலையில், அது தொடர்பான வழக்கு விசாரணை கடந்த 18ஆம் திகதி லிவர்பூல் கிரவுன் நீதிமன்றத்தில் நடைபெற்ற போது தண்டனை வழங்கப்பட்டுள்ளது.
கமலாதாசன் யோகராஜா பிரித்தானியாவில் புகலிடம் கோரியுள்ள நிலையில், அதற்கான முடிவுக்காக காத்திருக்கும் ஒரு அகதி என்பது குறிப்பிடத்தக்கது.
இலங்கையின் மத்திய பகுதியில், பூமியின் மேற்பரப்பிலிருந்து சுமார் 100 முதல் 200 கிலோமீட்டர் ஆழத்தில் மிகப் பழமையான பிரமாண்டமான பாறை அமைப்பு ஒன்று இருப்பதை விஞ்ஞானிகள் கண்டறிந்துள்ளனர்.
இந்தக் கண்டுபிடிப்பு, இலங்கையின் புவியியல் வரலாறு 500 மில்லியன் ஆண்டுகளுக்கும் மேலான காலப்பகுதியில் எவ்வாறு உருவானது என்பது தொடர்பில் புதிய தகவல்களை வழங்குவதாக ஆய்வாளர்கள் தெரிவித்துள்ளனர்.
பாரிஸ் பூமி இயற்பியல் நிறுவனத்தைச் சேர்ந்த காஓஷன் குவோ, சீன அறிவியல் அகாடமியின் லித்தோஸ்பியர் பரிணாமத்திற்கான மாநில முக்கிய ஆய்வகத்தைச் சேர்ந்த ஹைகியாங் லான், அதே அகாடமியின் புவியியல் மற்றும் புவி இயற்பியல் நிறுவனத்தைச் சேர்ந்த லெய் சாவோ மற்றும் பேராதனைப் பல்கலைக்கழகத்தைச் சேர்ந்த சஞ்சீவ பி.கே. மலவியராச்சி ஆகியோர் இந்த ஆய்வை மேற்கொண்டுள்ளனர்.
ஆய்வுக்காக இலங்கையில் அமைக்கப்பட்டுள்ள 33 நில அதிர்வு நிலையங்களில் பதிவான தரவுகளை விஞ்ஞானிகள் பகுப்பாய்வு செய்துள்ளனர். இதன் மூலம், மத்திய இலங்கைக்கு அடியில் ஆழமாக அமைந்துள்ள செங்குத்தான பாறை அமைப்பு ஒன்று அடையாளம் காணப்பட்டுள்ளது.
இந்தப் பாறை அமைப்பு, பூமியின் ஒரு புவித்தட்டு மற்றொரு புவித்தட்டின் கீழ் ஆழமாகச் செல்லும் ‘Subduction’ எனப்படும் புவியியல் செயல்முறையின் போது பூமிக்குள் தள்ளப்பட்ட பண்டைய கடல்சார் புவித்தட்டின் எச்சமாக இருக்கலாம் என ஆய்வாளர்கள் கருதுகின்றனர்.
மேலும், இந்தப் பாறை அமைப்புக்கு மேலாக குறைந்த வேகத்தில் நில அதிர்வு அலைகள் செல்லும் ஒரு பகுதியும் கண்டறியப்பட்டுள்ளது. இது அந்தப் பண்டைய புவியியல் செயல்முறையின் போது உருவான பாறைகளின் எச்சமாக இருக்கலாம் என தெரிவிக்கப்பட்டுள்ளது.
பண்டைய காலத்தில் ஒரு கடல்சார் புவித்தட்டு இலங்கையின் இன்றைய பகுதியின் கீழ் மேற்கு நோக்கி தள்ளப்பட்டிருக்கலாம் என்றும், பின்னர் பல்வேறு நிலப்பரப்புகள் ஒன்றுடன் ஒன்று மோதி இணைந்திருக்கலாம் என்றும் ஆய்வாளர்கள் தெரிவித்துள்ளனர்.
இந்தப் புவியியல் மாற்றங்கள், நூற்றுக்கணக்கான மில்லியன் ஆண்டுகளுக்கு முன்பு இருந்த கொண்ட்வானா (Gondwana) எனப்படும் மிகப்பெரிய பண்டைய நிலப்பரப்பின் உருவாக்கத்துடன் தொடர்புடையவை எனவும் ஆய்வில் குறிப்பிடப்பட்டுள்ளது.
கொண்ட்வானா பின்னர் ஆபிரிக்கா, தென் அமெரிக்கா, இந்தியா, அண்டார்டிகா மற்றும் அவுஸ்திரேலியா உள்ளிட்ட பகுதிகளாகப் பிரிந்த நிலப்பரப்புகளை ஒருங்கிணைத்திருந்தது.
பல்வேறு நிலப்பரப்புகள் மோதிய காலகட்டத்தில் அந்தப் பண்டைய புவித்தட்டு பின்னர் உடைந்து பிரிந்திருந்தாலும், அதன் ஒரு பகுதி இலங்கைக்கு அடியில் ஆழத்தில் பாதுகாக்கப்பட்டிருக்கலாம் என ஆய்வாளர்கள் கருதுகின்றனர்.
இந்தக் கண்டுபிடிப்பு, பூமியின் பண்டைய புவித்தட்டுகளின் இயக்கம் மற்றும் இலங்கை எவ்வாறு கொண்ட்வானாவின் ஒரு பகுதியாக உருவானது என்பதை மேலும் புரிந்துகொள்ள விஞ்ஞானிகளுக்கு புதிய ஆதாரங்களை வழங்குகிறது.
அக்கரைப்பற்று – கல்முனை பிரதான வீதியின் நிந்தவூர் பொலிஸ் பிரிவுக்குட்பட்ட பகுதியில் நேற்று (22.09.2026) மாலை இடம்பெற்ற விபத்தில், தென்கிழக்கு பல்கலைக்கழகத்தில் பயிலும் 26 வயதுடைய திருமணமான மாணவி உயிரிழந்துள்ளார். நிந்தவூர் 9ஆம் பிரிவு மையவாடி வீதியைச் சேர்ந்த பக்கீர் முகைதீர் பிஸ்மி பாத்திமா என்ற மாணவியே இவ்வாறு பரிதாபமாக உயிரிழந்துள்ளார்.
தனது தந்தையுடன் மோட்டார் சைக்கிளில் சென்று, பல்கலைக்கழக இறுதி ஆண்டுக்கான பாடச் சமர்ப்பிப்பை நிறைவு செய்துவிட்டு வீடு திரும்பிக் கொண்டிருந்தபோதே இச்சோக சம்பவம் நேர்ந்துள்ளது.
மோட்டார் சைக்கிளின் பின் ஆசனத்தில் அமர்ந்திருந்த மாணவியின் ஆடை பின் சக்கரத்தில் எதிர்பாராதவிதமாகச் சிக்குண்டதால் மோட்டார் சைக்கிள் கட்டுப்பாட்டை இழந்து விபத்துக்குள்ளானதாக ஆரம்பகட்ட விசாரணைகளில் தெரியவந்துள்ளது.
விபத்தில் படுகாயமடைந்த மாணவி உடனடியாகக் கல்முனை அஷ்ரப் ஞாபகார்த்த வைத்தியசாலையில் அனுமதிக்கப்பட்ட போதிலும், தீவிர சிகிச்சை பலனின்றி உயிரிழந்தார். உயிரிழந்த மாணவிக்குத் திருமணமாகி 2 ஆண்டுகளாவதுடன், அவரது கணவர் வெளிநாடொன்றில் பணிபுரிந்து வருகின்றமை குறிப்பிடத்தக்கது.
இச்சம்பவம் தொடர்பாக நிந்தவூர் பொலிஸார் முதற்கட்ட விசாரணைகளை மேற்கொண்டதுடன், சம்மாந்துறை நீதவான் நீதிமன்ற நீதவான் நூர்டீன் சர்ஜூனின் உத்தரவிற்கமைய, திடீர் மரண விசாரணை அதிகாரி அப்துல் ஹமீத் அல் ஜவாஹிர் சம்பவ இடத்திற்குச் சென்று மரண விசாரணைகளை முன்னெடுத்தார்.
அத்துடன் பிரேத பரிசோதனையின் பின்னர், தலையில் ஏற்பட்ட பாரிய காயம் காரணமாக உண்டான தீவிர இரத்தப்போக்கே மரணத்திற்குக் காரணம் எனத் தெரிவிக்கப்பட்டு, சடலம் உறவினர்களிடம் ஒப்படைக்கப்பட்டது. இச்சம்பவம் தொடர்பான மேலதிக விசாரணைகளை நிந்தவூர் பொலிஸார் முன்னெடுத்து வருகின்றனர்.
வவுனியாவில் 5 கிலோ அம்பர்கிரிஸ் எனும் திமிங்கலத்தின் வாந்தியுடன் ஒருவர் கைது செய்யப்பட்டுள்ளதாக பொலிஸார் தெரிவித்தனர். மன்னார் விசேட அதிரடிப் படையினருக்கு கிடைத்த இரகசிய தகவலின் அடிப்படையில் வவுனியா முதலாம் குறுக்குத்தெரு பகுதியில் விசேட சோதனை நடவடிக்கை முன்னெடுக்கப்பட்டது.
இதன்போது, குறித்த பகுதியில் சுமார் 5 கிலோகிராம் எடையுள்ள அம்பர்கிரிஸ் (திமிங்கலத்தின் வாந்தி) கைப்பற்றப்பட்டிருப்பதுடன், அதனை உடமையில் வைத்திருந்த நபர் ஒருவரையும் கைது செய்துள்ளனர்.
கைது செய்யப்பட்ட நபர் அனுராதபுரத்தைச் சேர்ந்தவர் என ஆரம்பகட்ட விசாரணைகளில் இருந்து தெரியவந்துள்ளது. சந்தேகநபரும், அவரிடமிருந்து கைப்பற்றப்பட்ட அம்பர்கிரிஸும் மேலதிக சட்ட நடவடிக்கைகளுக்காக வவுனியா பொலிஸ் நிலையத்தில் ஒப்படைக்கப்பட்டுள்ளது.
இந்த சம்பவம் தொடர்பான மேலதிக விசாரணைகளை வவுனியா தலைமைப் பொலிஸ் நிலைய பொறுப்பதிகாரி ஜே. எஸ். ரத்னமலலா தலைமையிலான குழுவினரால் மேற்கொண்டு வருகின்றது.
வியட்நாமின் ஹோ சி மின் நகரிலிருந்து கட்டுநாயக்க விமான நிலையம் நோக்கி வந்த விமானம் சென்னை விமான நிலையத்தில் அவசரமாகத் தரையிறக்கப்பட்டுள்ளது. 143 பயணிகளுடன் பயணித்த வியட்ஜெட் ஏர்லைன்ஸுக்கு சொந்தமான A320 விமானம், நேற்று இரவு இயந்திரக் கோளாறு காரணமாக சென்னை விமான நிலையத்தில் தரையிறக்கப்பட்டுள்ளது.
இயந்திரக் கோளாறு தொடர்பில் விமானக் குழுவினரின் எச்சரிக்கையை அடுத்து விமானம் சென்னைக்கு திசைதிருப்பப்பட்டதாக விமான நிலைய அதிகாரிகள் தெரிவித்தனர். இரவு 9:55 மணிக்கு முழுமையான அவசரநிலை பிரகடனம் செய்யப்பட்டு, விமான நிலைய அவசர காலத் திட்டத்தின் கீழ் அனைத்து நடவடிக்கைகளும் மேற்கொள்ளப்பட்டுள்ளது.
VJC1875 என்ற இலக்கத்துடன் இயங்கிய இந்த விமானம், இரவு 10.27 மணிக்குச் சென்னை விமான நிலையத்தில் பாதுகாப்பாகத் தரையிறங்கியது. இரவு 10.35 மணிக்கு வான் போக்குவரத்துக் கட்டுப்பாட்டு பிரிவு மூலமாக அவசரநிலை விலக்கிக் கொள்ளப்பட்டது.
விமானத்தில் பயணம் செய்த 143 பயணிகள் மற்றும் பணியாளர்களுக்கு எந்தவிதமான பாதிப்பும் இன்றி தரையிறங்கினர். இயந்திரக் கோளாறுக்கான காரணத்தைக் கண்டறிய விமானம் பரிசோதிக்கப்படும் என விமான நிலைய வட்டாரங்கள் தெரிவித்துள்ளன.
சென்னையில் இளைஞரிடம் பண மோசடி செய்ததுடன் இளைஞனை மிரட்டிய குற்றச்சாட்டில் பிக்பாஸ் பிரபலம் வர்ஷிணி கைது செய்ப்பட்டுள்ளார். சீரியல் நடிகை வர்ஷிணி பிக்பாஸ் நிகழ்ச்சியிலும் கலந்து கொண்டார்.
குறும்படம் எடுப்பதற்காக முதலீடு செய்யுங்கள் எனக் தன்னை ஏமாற்றியதாகவும் மிரட்டி தாக்கியதாகவும் இளைஞர் ஒருவர் சீரியல் நடிகை வர்ஷினி மீது புகார் அளித்தார். கிண்டியில் 26 வயது இளைஞரை மிரட்டி ரூ.5 லட்சம் பணம் பறித்ததாக சொல்லப்படுகிறது.
அதன்பின் கூடுதலாக ரூ,27 லட்சம் கேட்டு மிரட்டுவதாக இளைஞர் புகார் அளிக்க , நடிகை வர்ஷினி சஞ்சய் உள்ளிட்ட நான்கு பேர் மூது 3 பிரிவில் வழக்குப்பதிவு செய்து போலீசார் தற்போது கைது செய்திருக்கிறார்கள்.
தான் கேட்ட பணத்தை கொடுக்கவில்லையெனில் பொய் புகார் கொடுத்து உன்னை சிறையில் தள்ளுவேன் என நடிகை வர்ஷிணி மிரட்டியதாகவும் பாதிக்கப்பட்ட இளைஞர் வாக்குமூலம் அளித்துள்ளதாக தெரிவிக்கப்படுகின்றது.
இந்தியா உத்தர பிரதேச மாநிலம் லக்கிம்பூர் கேரி மாவட்டத்தில் உள்ள ஒரு பாடசாலையில் பெண் ஆசிரியர் ஒருவர் துப்பாக்கியால் சுட்டுக்கொல்லப்பட்ட சம்பவம் அதிர்ச்சியை ஏற்படுத்தியுள்ளது. ஆசிரியர் சுட்டுக்கொல்லப்பட்ட தகவல் பரவியதும், அவரது குடும்பத்தினர் மற்றும் பள்ளி ஊழியர்கள் அதிர்ச்சியடைந்தனர். சம்பவம் தொடர்பில் இந்திய ஊடகங்கள் வெளியிட்ட தகவல்களின்படி,
ஆசிரியை பள்ளியில் வழக்கம்போல் பணியில் இருந்தபோது இந்த சம்பவம் நடைபெற்றதாக கூறப்படுகிறது. இந்த சம்பவம் தொடர்பாக சவுத் அன்சாரி என்பவர் மீது பொலிஸார் சந்தேகம் கொண்டுள்ளனர்.
ஆசிரியையுடன் அவருக்கு முன்பே தொடர்பு இருந்ததாகவும், சில விஷயங்களில் இருவருக்கும் இடையே பிரச்னை ஏற்பட்டதாகவும் விசாரணையில் தெரியவந்ததாக கூறப்படுகிறது. சம்பவத்துக்கு முன்பு அந்த நபர் ஆசிரியையை சந்திக்க பள்ளிக்கு வந்ததாக கூறப்படுகின்றது.
பள்ளிக்குள் நுழைந்து ஆசிரியையுடன் பேசிய பின்னரே துப்பாக்கிச்சூடு நடைபெற்றதாக கூறப்படுகிறது. இந்த சம்பவத்தின் பின்னணி குறித்து போலீஸார் தொடர்ந்து விசாரித்து வருகின்றனர்.
சம்பவம் தொடர்பான கண்காணிப்பு கேமரா காட்சிகளையும் பொலிஸார் ஆய்வு செய்து வருகின்றனர். அதில் சந்தேகத்துக்குரிய நபர் பள்ளிக்குள் செல்வதும், பின்னர் அங்கிருந்து வெளியேறுவதும் பதிவாகியுள்ளதாக கூறப்படுகிறது.
கொலைக்கான காரணம் தொடர்பாக பல்வேறு கோணங்களில் விசாரணை நடத்தப்பட்டு வருகிறது. இதுகுறித்து கிடைக்கும் ஆதாரங்கள் மற்றும் CCTV காட்சிகளின் அடிப்படையில் விசாரணை நடைபெற்று வருகிறது. பள்ளி வளாகத்தில் நடந்த இந்த சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.
இலங்கையைச் சேர்ந்த 74 வயதுடைய பெண்ணொருவருக்கு விமானத்தில் திடீரென ஏற்பட்ட உடல்நலக்குறைவின்போது முதலுதவி சிகிச்சை அளித்து அவரைக் காப்பாற்றிய பெரியகுளத்தைச் சேர்ந்த மருத்துவர் மூர்த்தியை ஸ்ரீலங்கன் எயார்லைன்ஸ் நிறுவனம் பாராட்டி கௌரவித்துள்ளது.
தேனி மாவட்டம் பெரியகுளம் தெற்கு அக்ரஹாரத்தைச் சேர்ந்த 78 வயதான மருத்துவர் மூர்த்தி, கடந்த 19ஆம் திகதி தனது மகனைச் சந்திப்பதற்காக அவுஸ்திரேலியாவின் சிட்னிக்கு ஸ்ரீலங்கன் எயார்லைன்ஸ் விமானத்தில் பயணம் செய்துள்ளார்.
கொழும்பில் இருந்து சிட்னி நோக்கிப் பயணித்த விமானத்தில், அவருடன் பயணித்த 74 வயதுடைய இலங்கைப் பெண்ணொருவர் திடீரென மயக்கமடைந்துள்ளார். இதையடுத்து அவரைப் பரிசோதித்த மருத்துவர் மூர்த்தி, அவருக்கு குறைந்த இரத்த அழுத்தம் ஏற்பட்டிருப்பதை கண்டறிந்து உடனடியாக முதலுதவி சிகிச்சை அளித்துள்ளார்.
தொடர்ந்து சுமார் ஒரு மணி நேரம் அந்தப் பெண்ணைக் கண்காணித்த நிலையில், அவர் இயல்பு நிலைக்குத் திரும்பியுள்ளார். மருத்துவர் மூர்த்தியின் உடனடி நடவடிக்கை மற்றும் சிகிச்சையால் சக பயணி காப்பாற்றப்பட்டதற்கு விமானத்தில் இருந்த பயணிகள் பாராட்டு தெரிவித்துள்ளனர்.
இதனைத் தொடர்ந்து, மருத்துவர் மூர்த்தியின் சேவையைப் பாராட்டும் வகையில் ஸ்ரீலங்கன் எயார்லைன்ஸ் நிறுவனம் அவருக்கு பாராட்டுச் சான்றிதழ் வழங்கி கௌரவித்துள்ளது.
இலங்கை தமிழ் வம்சாவளி கனடா வாழ் ஈழத்து யுவதி மைத்ரேயி ராமகிருஷ்ணன் (Maitreyi Ramakrishnan) ஹாலிவுட் திரைத்துறையில் தன் திறமையால் முத்திரை பதித்து வரும் இளம் கனேடிய நடிகை ஆவார். உள் நாட்டு போரால் புலம்பெயர்ந்து பல்வேறு நாடுகளில் வசித்துவரும் புலம் பெயர் தமிழர்களின் பிள்ளைகள் பலரும் அரசியல் முதல் பல்வேறு துறைகளிலும் சாதனை படைத்து வருகின்றனர்.
அந்தவகையில் உலகளவில் புகழ்பெற்ற நெட்ஃபிளிக்ஸ் (Netflix) தொடரான “நெவர் ஹேவ் ஐ எவர்” (Never Have I Ever) மூலம் கனடா வாழ் ஈழத்து யுவதி மைத்ரேயி ராமகிருஷ்ணன் (Maitreyi Ramakrishnan) பரவலாக அறியப்பட்டார்.
மைத்ரேயி கனடாவில் உள்ள ஒன்ராறியோ மாகாணத்தில் உள்ள மிசிசாகா நகரில் பிறந்தவர். இவரின் பெற்றோர் இலங்கைத் தமிழர் வம்சாவளியைச் சேர்ந்தவர்கள் ஆவர். ஈழப் போர் சூழல் காரணமாகக் கனடாவிற்குப் புலம்பெயர்ந்து அங்கு குடியேறிய தமிழ்க் குடும்பத்தைச் சேர்ந்தவராவார்.
தமிழ் அடையாளத்துடனும் பாரம்பரியத்துடனும் வளர்ந்த போதிலும், உலகளாவிய தமிழர்களின் பிரதிநிதித்துவத்தை உயர்த்திப் பிடிப்பதில் இவர் முக்கியப் பங்காற்றி வருகிறார். மைத்ரேயி தனது உயர்நிலைப் பள்ளிக் காலத்தில் நாடகங்களில் நடித்து வந்தார். எந்தவிதமான முந்தைய தொழில்முறை நடிப்பு அனுபவமும் இன்றி,
நெட்ஃபிளிக்ஸ் தயாரிப்பாளரான மிண்டி கலிங் நடத்திய திறமைத் தேடலில் (Open Casting Call) உலகெங்கிலுமிருந்து கலந்துகொண்ட ஆயிரக்கணக்கானோரைத் தாண்டி முதன்மைக் கதாபாத்திரமான ‘தேவி விஸ்வநாதன்’ (Devi Vishwakumar) என்ற பாத்திரத்திற்காகத் தேர்ந்தெடுக்கப்பட்டார்.
இந்தத் தொடரில் இவரது இயல்பான மற்றும் துடிப்பான நடிப்பு உலகளாவிய ரசிகர்களிடையே இவருக்குப் பெரும் வரவேற்பைப் பெற்றுத் தந்தது. இதனைத் தொடர்ந்து, டிஸ்னியின் “Turning Red” அனிமேஷன் திரைப்படத்தில் பிரியா என்ற கதாபாத்திரத்திற்குக் குரல் கொடுத்ததன் மூலமும், “The Netherfield Girls” போன்ற பிற படைப்புகளிலும் தனது திறமையை வெளிப்படுத்தியுள்ளார்.
சமூக வலைத்தளங்களிலும் பொதுவெளிகளிலும் தனது தமிழ் அடையாளத்தையும் பண்பாட்டையும் பெருமையுடன் வெளிப்படுத்தும் மைத்ரேயி ராமகிருஷ்ணன், உலகளவில் வாழும் இளம் தமிழ்ப் பெண்களுக்கு ஒரு சிறந்த உத்வேகமாகவும் ரோல் மாடலாகவும் திகழ்கிறார். இந் நிலையில் மைத்ரேயி ராமகிருஷ்ணன் (Maitreyi Ramakrishnan) இற்கு பலரும் வாழ்த்துக்களையும் பாராட்டுக்களையும் கூறி வருகின்றனர்.
ஊவா, சப்ரகமுவ, மத்திய மாகாணங்கள் மற்றும் அம்பாறை, மட்டக்களப்பு மாவட்டங்களில் கடுமையான மின்னல் தாக்கம் ஏற்படக்கூடும் என்பதால், வளிமண்டலவியல் திணைக்களம் ‘அம்பர்’ எச்சரிக்கையை விடுத்துள்ளது.
இன்று (22.09.2026) நண்பகல் 12 மணிக்கு விடுக்கப்பட்ட இந்த எச்சரிக்கை, இரவு 11.30 மணி வரை நடைமுறையில் இருக்கும் என தெரிவிக்கப்பட்டுள்ளது.
இதன்படி, ஊவா, சப்ரகமுவ மற்றும் மத்திய மாகாணங்கள் மற்றும் அம்பாறை, மட்டக்களப்பு மாவட்டங்களின் பல இடங்களில் கடுமையான மின்னலுடன் கூடிய இடியுடன் கூடிய மழை பெய்யக்கூடும்.
இடியுடன் கூடிய மழையின் போது தற்காலிகமாக பலத்த காற்று வீசக்கூடும் என்றும் வளிமண்டலவியல் திணைக்களம் தெரிவித்துள்ளது. மின்னல் தாக்கத்தினால் ஏற்படும் பாதிப்புகளைக் குறைக்கத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்களுக்கு அறிவுறுத்தப்பட்டுள்ளது.
இலங்கை கடற்பரப்பில் தமிழ்நாடு கடற்றொழிலாளர்கள் தொடர்ந்து அத்துமீறி கடற்றொழிலில் ஈடுபடுவது தொடர்பில், தமிழ்நாடு முதலமைச்சர் சி. ஜோசப் விஜயிடம் நியாயமாகச் செயல்படுமாறு கோரிக்கை விடுத்துள்ளதாக கடற்றொழில் அமைச்சர் ராமலிங்கம் சந்திரசேகர் தெரிவித்துள்ளார்.
தமிழ்நாட்டில் நடிகராக இருந்து திரைப்படங்களில் சமூக நீதிக்காக குரல் கொடுத்ததைப் போல, இலங்கை கடற்றொழிலாளர்களுக்காகவும் தற்போது நியாயமாகச் செயல்பட வேண்டும் என முதலமைச்சரிடம் கூறியதாக அவர் தெரிவித்துள்ளார்.
தமிழ்நாட்டிலிருந்து இலங்கைக்கு வந்த ஊடகக் குழுவொன்றின் ஊடாக முதலமைச்சருக்கு இந்தச் செய்தியைத் தெரிவித்ததாக அமைச்சர் தெரிவித்துள்ளார். இலங்கையின் வடக்கு பகுதி கடற்றொழிலாளர்கள் 30 ஆண்டுகால யுத்தத்தின்போது பெரும் பாதிப்புகளை எதிர்கொண்டதாக அமைச்சர் குறிப்பிட்டுள்ளார்.
தற்போது அவர்கள் தங்களது வாழ்க்கையை மீண்டும் கட்டியெழுப்ப முயற்சித்து வரும் நிலையில், தமிழ்நாடு கடற்றொழிலாளர்கள் இலங்கை கடற்பரப்பில் அத்துமீறி கடற்றொழிலில் ஈடுபடுவதால், வடக்கு கடற்றொழிலாளர்களின் வாழ்வாதாரம் பாதிக்கப்படுவதாக அவர் தெரிவித்துள்ளார்.
“வாழ்வாதாரத்திற்காக போராடும் எமது கடற்றொழிலாளர்களின் தொழில் வாய்ப்பை பறிப்பது, அவர்களின் கழுத்தை அறுப்பதற்கு சமமானது. சமூக நீதிக்காக திரைப்படங்களில் நடித்த ஒரு நடிகராக, தற்போது தனது பொறுப்பிலும் நியாயமாகச் செயல்பட வேண்டும் என முதலமைச்சரிடம் கேட்டுக்கொண்டேன்” என அமைச்சர் தெரிவித்துள்ளார்.
கேரளா மற்றும் ஆந்திரப் பிரதேசம் உள்ளிட்ட இந்தியாவின் ஏனைய மாநிலங்களின் கடற்பரப்புகளிலும் தமிழ்நாடு கடற்றொழிலாளர்கள் இதுபோன்ற சட்டவிரோத நடவடிக்கைகளில் ஈடுபட முடியாது எனவும் அமைச்சர் குறிப்பிட்டுள்ளார். “அவர்கள் பாகிஸ்தானின் கடற்பரப்பில் இவ்வாறு செய்தால் என்ன நடக்கும்?” எனவும் அமைச்சர் கேள்வி எழுப்பியுள்ளார்.
இந்தப் பிரச்சினைக்கு நடைமுறைத் தீர்வு காண்பது தொடர்பில், எதிர்காலத்தில் அதிகாரிகள் மட்டத்திலான குழுவொன்று இந்தியாவுக்குச் செல்லும் எனவும், அதனைத் தொடர்ந்து அமைச்சர்கள் மட்டத்திலான பேச்சுவார்த்தைகள் நடத்தப்படும் எனவும் அமைச்சர் ராமலிங்கம் சந்திரசேகர் தெரிவித்துள்ளார்.
