ஹம்பாந்தோட்டையில் மனைவி மற்றும் பிள்ளைகளுடன் வாக்குவாதத்தில் ஈடுபட்ட மூன்று பிள்ளைகளின் தந்தை ஒருவர் தவறான முடிவை எடுத்து உயிரை மாய்த்துள்ளார். நேற்று முன்தினம் மாலை 5.00 மணியளவில் ஹம்பாந்தோட்டையில் தனது காணியில் துப்பாக்கியால் சுட்டுக்கொண்டு உயிரிழந்துள்ளதாக பொலிஸார் தெரிவித்தனர்.
உயிரிழந்தவர் பந்தகிரிய பகுதியைச் சேர்ந்த 43 வது வயதுடைய சுசாந்த என அடையாளம் காணப்பட்டுள்ளதாக பொலிஸார் தெரிவித்தனர். அவர் நண்பர்கள் குழுவுடன் மது அருந்திவிட்டு வீடு திரும்பியுள்ளார். அங்கு தனது மகள்களுடன் தகராறில் ஈடுபட்டு மூத்த மகளை தாக்கியுள்ளார்.
மகளை தாக்கியதற்கான காரணம் குறித்து அவரிடம் கேட்டு மனைவி வாக்குவாதம் செய்துள்ளார். இதனால் கோபமடைந்த அவர், வீட்டிலிருந்து வெளியேறி தனது காணிக்குச் சென்று உயிரை மாய்த்துள்ளதாக பொலிஸார் தெரிவித்தனர்.
சுயமான துப்பாக்கி சூட்டில் காயமடைந்தவரை உடனடியாக ஹம்பாந்தோட்டை மாவட்ட பொது வைத்தியசாலைக்குக் கொண்டு சென்ற போதிலும் அவர் உயிரிழந்துவிட்டதாக தெரிவிக்கப்பட்டுள்ளது.
மாத்தறை, வல்கம பகுதியில் 21 கிலோ 810 கிராம் ஐஸ் போதைப்பொருளுடன் பெண் ஒருவர் உட்பட இருவர் கைது செய்யப்பட்டுள்ளனர். மாத்தறை, மற்றும் ஹம்பாந்தோட்டை மாவட்ட குற்றத்தடுப்பு பிரிவினருக்கு கிடைத்த தகவலின் பேரில், அதிகாரிகளின் குழுவொன்று வீடொன்றில் சோதனை மேற்கொண்டுள்ளனர்.
சோதனையின் போதே இவர்கள் கைது செய்யப்பட்டுள்ளனர். இதன்போது, போதைப்பொருள் வர்த்தகத்தின் மூலம் உழைக்கப்பட்டதாக சந்தேகிக்கப்படும் 5 லட்சம் ரூபாய் பணமும், கைப்பற்றப்பட்டுள்ளது.
வர்த்தகத்திற்கு பயன்படுத்தப்பட்டதாக சந்தேகிக்கப்படும் மோட்டார் கார், மோட்டார் சைக்கிள் மற்றும் 3 கையடக்கத் தொலைபேசிகளும் பொலிஸாரால் கைப்பற்றப்பட்டுள்ளன.
கைது செய்யப்பட்ட 34 வயதுடைய பெண் வஞ்சாவல பகுதியைச் சேர்ந்தவர் எனவும் 28 வயதுடைய ஆண் யக்கலமுல்ல பகுதியை சேர்ந்தவர் எனவும் தெரியவந்துள்ளது. இச்சம்பவம் குறித்து மாத்தறை மாவட்ட குற்றத்தடுப்புப் பிரிவினர் மேலதிக விசாரணைகளை மேற்கொண்டு வருகின்றனர்.
இலங்கைக்கு வடகிழக்கே வங்காள விரிகுடா கடல் பகுதியில் நிலவிய குறைந்த காற்றழுத்த தாழ்வு பகுதி தற்போது தாழமுக்கமாக வலுவடைந்து நகர்ந்து வருவதாக தெரிவிக்கப்படுகின்றது. வளிமண்டலவியல் திணைக்களம் இன்று (22.09.2026) அதிகாலை வெளியிட்டுள்ள வானிலை அறிக்கையில் இந்த விடயம் தெரிவிக்கப்பட்டுள்ளது.
இவை அடுத்த 24 மணித்தியாலங்களில் மேலும் வலுவடைந்து தீவிர தாழமுக்கமாக மாறக்கூடும் என எதிர்பார்க்கப்படுவதாக வளிமண்டலவியல் திணைக்களம் தெரிவித்துள்ளது.
இதனால் இலங்கைக்கு நேரடி தாக்கம் எதுவும் இல்லை என்ற போதிலும், அத்தொகுதியை நோக்கி வீசும் காற்று ஓட்டம் காரணமாக நாட்டின் தென்மேற்கு பகுதியில் காணப்படும் மழை நிலைமை மேலும் தொடரும் என எதிர்பார்க்கப்படுகின்றது.
மேல், சப்ரகமுவ, மத்திய மற்றும் வடமேல் மாகாணங்களிலும் காலி மற்றும் மாத்தறை மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும். சில இடங்களில் 100 மி.மீ அளவிலான பலத்த மழை பெய்யக்கூடும்.
வடமத்திய மாகாணத்திலும் மன்னார் மாவட்டத்திலும் இடைக்கிடையே மழை பெய்யக்கூடும். ஊவா மாகாணத்திலும் மட்டக்களப்பு மற்றும் அம்பாறை மாவட்டங்களிலும் பிற்பகல் 2.00 மணிக்குக்குப் பின்னர் ஆங்காங்கே மழை அல்லது இடியுடன் கூடிய மழை பெய்யக்கூடும்.
மத்திய மலைநாட்டின் மேற்கு சரிவுகளிலும் வடமத்திய மற்றும் வடமேல் மாகாணங்களிலும் திருகோணமலை, ஹம்பாந்தோட்டை மற்றும் மாத்தளை மாவட்டங்களிலும் அவ்வப்போது மணித்தியாலத்துக்கு 40-50 கி.மீ வேகத்தில் பலத்த காற்று வீசக்கூடும்.
இடியுடன் கூடிய மழை பெய்யும் வேளைகளில் தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய விபத்துக்களை குறைத்துக்கொள்ள தேவையான முன்னெச்சரிக்கை நடவடிக்கைகளை எடுக்குமாறு பொதுமக்கள் அறிவுறுத்தப்பட்டுள்ளனர்.
உத்தரப் பிரதேசம்: லகீம்பூர் கேரியில் உள்ள தனியார் பள்ளியில் பெண் ஆசிரியர் துப்பாக்கியால் சுட்டுக்கொல்லப்பட்ட சம்பவம் அதிர்ச்சியை ஏற்படுத்தியுள்ளது. அவரை சுட்டதாகக் கூறப்படும் முன்னாள் காதலனும் துப்பாக்கியால் சுட்டு உயிரிழந்தார்.
லகீம்பூர் கேரியில் உள்ள சில்ட்ரன்ஸ் அகாடமி பள்ளியில் 26 வயதான நிஷாத் பாத்திமா ஆசிரியையாக பணியாற்றி வந்தார். சம்பவத்தன்று பள்ளிக்கு வந்த 28 வயதான முகமது சவுத் அன்சாரி, பாத்திமாவை சந்தித்ததாக போலீசார் தெரிவித்துள்ளனர்.
இருவரும் பள்ளியின் கீழ்தளத்தில் சிறிது நேரம் பேசிய பின்னர் மேல்தளத்துக்குச் சென்றதாக கூறப்படுகிறது. அங்கு வகுப்பறை அருகே உள்ள நடைபாதையில் இருவருக்கும் இடையே பேச்சுவார்த்தை நடந்துள்ளது.
அப்போது சவுத் தான் கொண்டு வந்திருந்த நாட்டுத் துப்பாக்கியை எடுத்து நிஷாத் பாத்திமாவை சுட்டதாக போலீசார் தெரிவித்துள்ளனர். பின்னர் அவரும் தன்னைத்தானே சுட்டுக் கொண்டார். இதில் இருவரும் சம்பவ இடத்திலேயே உயிரிழந்தனர்.
துப்பாக்கிச்சூடு நடந்தபோது பள்ளியில் ஏராளமான மாணவர்கள் இருந்ததாக தகவல்கள் வெளியாகியுள்ளன. துப்பாக்கிச்சத்தம் கேட்டதும் பள்ளி வளாகத்தில் பரபரப்பு ஏற்பட்டது. தகவல் அறிந்து போலீசார் மற்றும் தடயவியல் குழுவினர் சம்பவ இடத்துக்கு சென்று விசாரணை மேற்கொண்டனர்.
நிஷாத் பாத்திமாவும் சவுத் அன்சாரியும் ஏற்கனவே உறவில் இருந்ததாகவும், சமீபத்தில் அந்த உறவு முறிந்ததாகவும் போலீஸ் தரப்பில் தெரிவிக்கப்பட்டுள்ளது. உறவு முறிவால் ஏற்பட்ட பிரச்சினை இந்தச் சம்பவத்துக்கு காரணமாக இருக்கலாம் என்ற கோணத்திலும் விசாரணை நடைபெற்று வருகிறது.
எனினும், சம்பவத்தின் முழுமையான காரணம் குறித்து போலீஸ் விசாரணைக்குப் பிறகே உறுதியான தகவல் வெளியாகும்.பள்ளிக்குள் துப்பாக்கியுடன் ஒருவர் எவ்வாறு நுழைந்தார், பள்ளியின் பாதுகாப்பு ஏற்பாடுகளில் ஏதேனும் குறைபாடு இருந்ததா என்பது குறித்தும் போலீசார் விசாரித்து வருகின்றனர். மேலும் பள்ளியில் உள்ள கண்காணிப்பு கேமரா காட்சிகளும் ஆய்வு செய்யப்படுகின்றன.
தெலங்கானா மாநிலத்தில் பிரபல பெண் யூடியூபர் ஒருவர் வரதட்சணைக் கொடுமையால் படுகொலை செய்யப்பட்ட வழக்கில் முக்கியக் குற்றவாளியாகக் கருதப்பட்ட அவரது கணவர், மர்ம நபர்களால் கத்தியால் குத்திப் படுகொலை செய்யப்பட்டுள்ளார். பழிவாங்கும் நோக்கில் அரங்கேறியுள்ளதாகச் சந்தேகிக்கப்படும் இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
தெலங்கானா மாநிலம் கோருட்லாவைச் சேர்ந்த பிரபல யூடியூபர் வைஷ்ணவி, ஹரி பாபு என்பவரைக் காதலித்து கடந்த ஆண்டு திருமணம் செய்து கொண்டார். கடந்த மார்ச் 17ம் தேதியன்று வைஷ்ணவி தனது இல்லத்தில் மர்மமான முறையில் கொலை செய்யப்பட்டுக் கிடந்தார்.
இந்தத் கொடூரச் சம்பவம் தொடர்பாகக் காவல்துறையினர் விசாரணை நடத்தி, ஹரி பாபுவைக் கைது செய்து நீதிமன்றக் காவலில் அடைத்தனர். விசாரணையில், ஹரி பாபு தனது தாய் மற்றும் சகோதரர்களின் தூண்டுதலின் பேரில் கூடுதல் வரதட்சணை கேட்டு வைஷ்ணவியை தொடர்ந்து துன்புறுத்திவந்தது தெரியவந்தது.
படுகொலை வழக்கில் கைது செய்யப்பட்டுச் சிறையில் அடைக்கப்பட்டிருந்த ஹரி பாபு பின்னர் விடுவிக்கப்பட்டார். எனினும், அவர் மீதான வழக்கு நடவடிக்கைகள் தொடர்ந்து நிலுவையில் இருந்தன. இதன் காரணமாக அவர் நிஜாமாபாத்தில் தனது தாயுடன் வசித்துக்கொண்டு மக்காச்சோளம் விற்று வந்தார்.
இந்நிலையில், வியாழக்கிழமையன்று அடையாளம் தெரியாத மூன்று நபர்கள் காரில் வந்துள்ளனர். அவர்கள் சாலையோரம் நின்றுகொண்டிருந்த ஹரி பாபுவை வழிமறித்துச் சரமாரியாகக் கத்தியால் குத்திவிட்டுக் காரில் தப்பிச் சென்றனர். இந்தத் திடீர்த் தாக்குதலில் படுகாயமடைந்த ஹரி பாபு நிகழ்விடத்திலேயே பரிதாபமாக உயிரிழந்தார்.
கொல்லப்பட்ட யூடியூபர் வைஷ்ணவியின் உறவினர்களுக்கும் இந்தக் கொலைக்கும் தொடர்பு இருக்கலாம் என்று காவல்துறையினர் சந்தேகித்துள்ளனர். இந்தச் சம்பவம் குறித்து வழக்குப் பதிவு செய்துள்ள காவல்துறையினர், அப்பகுதியில் உள்ள சிசிடிவி காட்சிகளையும் பிற ஆதாரங்களையும் சேகரித்துத் தலைமறைவாகியுள்ள கொலையாளிகளைத் தீவிரமாகத் தேடி வருகின்றனர்.
கேரள மாநிலம் கொல்லம் மாவட்டத்தில் கடந்த 2 நாட்களாக காணாமல் போன 15 வயது பள்ளி மாணவியும், அவரது உறவினரான 21 வயது வாலிபரும் ரயில் மோதி உயிரிழந்த சம்பவம் அதிர்ச்சியை ஏற்படுத்தியுள்ளது. இருவரும் ரயில் முன் பாய்ந்து தற்கொலை செய்து கொண்டார்களா அல்லது எதிர்பாராத விதமாக ரயிலில் சிக்கி உயிரிழந்தார்களா என்பது குறித்து போலீசார் விசாரணை நடத்தி வருகின்றனர்.
கொல்லம் மாவட்டம் கண்ணநல்லூர் பகுதியை சேர்ந்தவர் அபிலாஷ். 21 வயதான இவர், அதே மாவட்டத்தை சேர்ந்த தனது 15 வயது உறவினரான விஸ்மையாவுடன் தொடர்பில் இருந்ததாக கூறப்படுகிறது. விஸ்மையா 10-ம் வகுப்பு படித்து வந்தார்.
இந்நிலையில், சம்பவத்துக்கு 2 நாட்களுக்கு முன்பு வழக்கம்போல் பள்ளிக்கு செல்வதாக கூறிவிட்டு வீட்டை விட்டு வெளியே சென்ற விஸ்மையா, பின்னர் வீடு திரும்பவில்லை. அதேபோல் அபிலாஷும் காணாமல் போனதாக கூறப்படுகிறது.
இதனால் அதிர்ச்சியடைந்த குடும்பத்தினர் இருவரையும் பல்வேறு இடங்களில் தேடியுள்ளனர். ஆனால் அவர்கள் குறித்து எந்த தகவலும் கிடைக்காததால் கண்ணநல்லூர் போலீஸ் நிலையத்தில் புகார் அளித்தனர். இதையடுத்து போலீசார் வழக்குப்பதிவு செய்து இருவரையும் தேடி வந்தனர்.
இந்த நிலையில் சம்பவத்தன்று அதிகாலை சுமார் 1.45 மணியளவில் அங்கமாலி ரயில் நிலையத்தில் திருச்சூர் எக்ஸ்பிரஸ் ரயில் மோதி இரண்டு பேர் உயிரிழந்ததாக போலீசாருக்கு தகவல் கிடைத்தது.
தகவலறிந்து சம்பவ இடத்திற்கு சென்ற போலீசார் மற்றும் ரயில்வே பாதுகாப்பு படையினர், உயிரிழந்த இருவரின் உடல்களையும் மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.
தொடர்ந்து நடைபெற்ற விசாரணையில், ரயில் மோதி உயிரிழந்தவர்கள் காணாமல் போன அபிலாஷ் மற்றும் விஸ்மையா என்பது தெரியவந்தது. இதையடுத்து அவர்களது குடும்பத்தினருக்கு தகவல் தெரிவிக்கப்பட்டது.
இருவரும் எதற்காக அங்கமாலி ரயில் நிலையம் சென்றனர் என்பது குறித்து போலீசார் விசாரணை நடத்தி வருகின்றனர். அவர்கள் ரயில் முன் பாய்ந்து தற்கொலை செய்து கொண்டார்களா அல்லது வேறு ஏதேனும் காரணத்தால் ரயிலில் சிக்கி உயிரிழந்தார்களா என்பது இதுவரை உறுதி செய்யப்படவில்லை.
பிரேத பரிசோதனை முடிவுகள் மற்றும் போலீஸ் விசாரணையின் அடிப்படையில் சம்பவத்தின் முழு பின்னணி தெரியவரும் என எதிர்பார்க்கப்படுகிறது. இந்த சம்பவம் கொல்லம் பகுதியில் பெரும் சோகத்தை ஏற்படுத்தியுள்ளது.
கடந்த 2007ம் ஆண்டு நடைபெற்ற கொலை வழக்கில் தலைமறைவான நபரை நவீன AI உதவியுடன் கிட்டத்தட்ட 19 ஆண்டுகளுக்குப் பிறகு கைது செய்து பொலிஸார் அசத்தியுள்ளனர்.
2007ம் ஆண்டு சென்னை திருவொற்றியூர் பகுதியில் பாண்டியமணி என்பவர் கொலை செய்யப்பட்ட சம்பவத்தில் திருவொற்றியூர் காலடிப்பேட்டையைச் சேர்ந்த ஷேக் அப்துல்லா(அப்போது வயது 20) உட்பட 5 பேரை பொலிஸார் கைது செய்தனர். பின்னர் ஜாமீனில் வெளியே வந்த ஷேக் அப்துல்லா பொலிஸாரின் கண்களுக்கு சிக்காமல் தலைமறைவானார்.
இந்நிலையில் நீண்ட நாட்களாக தலைமறைவாக உள்ள குற்றவாளிகளை விரைந்து பிடிக்க சென்னை காவல் ஆணையர் உத்தரவிட்ட நிலையில் தனிப்படை பொலிஸார் 2007ம் ஆண்டு ஷேக் அப்துல்லா கைது செய்யப்பட்ட போது எடுக்கப்பட்ட புகைப்படத்தை வைத்து அவரை மீண்டும் கைது செய்துள்ளனர்.
கிட்டத்தட்ட 19 ஆண்டுகள் கடந்துவிட்ட நிலையில் அவர் தற்போது எப்படி இருப்பார் என்பதை ஊகிக்க, பொலிஸார் நவீன ஏஐ உருவ அமைப்பு தொழில்நுட்பத்தை பயன்படுத்தியுள்ளனர். தொழில்நுட்ப உதவியுடன் தற்போது 39 வயதில் இருக்கும் ஷேக் அப்துல்லாவின் உருவ தோற்றத்தை பொலிஸார் இறுதி செய்தனர்.
இதையடுத்து அந்த புகைப்படங்களை வைத்து சமூக வலைதள கணக்குகள் மற்றும் அவர் முன்பு வசித்த பகுதியில் விசாரணையை தீவிரப்படுத்தியுள்ளனர். இறுதியில் 39 வயதான ஷேக் அப்துல்லா திருமுல்லைவாயில் சோழம்பேடு மெயின் ரோடு பகுதியில் தன்னுடைய குடும்பத்தினருடன் வாழ்ந்து வருவது கண்டுபிடிக்கப்பட்டது.
பிறகு திருமுல்லைவாயல் பகுதியில் முகாமிட்ட தனிப்படை பொலிஸார் நேற்று முன்தினம் ஷேக் அப்துல்லாவை சுற்றி வளைத்து கைது செய்தனர்.
பின்னர் உடனடியாக நீதிமன்றத்தில் ஆஜர்படுத்தப்பட்ட ஷேக் அப்துல்லா, நீதிமன்ற உத்தரவின் பேரில் தற்போது சிறையில் அடைக்கப்பட்டுள்ளார். நவீன AI தொழில்நுட்பத்தின் உதவியுடன் 19 ஆண்டுகளுக்கு முன்பு தலைமறைவான குற்றவாளியை பொலிஸார் கைது செய்து இருப்பது பாராட்டுதலை பெற்று வருகிறது.
குருநாகல் கிரிவுல்ல பொலிஸாரின் கட்டளையை மீறி தப்பிச் சென்ற சொகுசு கார் ஒன்றை பன்னலை நகரத்தில் வைத்து சுற்றி வளைத்து, அதன் சாரதி மற்றும் இரண்டு பெண்களை பொலிஸார் கைது செய்துள்ளனர்.
கிரிவுல்ல பகுதியில் வைத்து குறித்த சொகுசு காரைப் பரிசோதிப்பதற்காக நிறுத்துமாறு பொலிஸ் அதிகாரிகள் கட்டளையிட்டபோதிலும், சாரதி காரை அதிவேகமாகச் செலுத்தி தப்பிச் சென்றுள்ளதாக பொலிஸ் ஊடகப் பிரிவு தெரிவித்துள்ளது.
இதனையடுத்து காரைப் பின்தொடர்ந்து சென்ற பொலிஸார், காரை நிறுத்துமாறு மீண்டும் மீண்டும் சிக்னல் செய்த போதிலும் சாரதி பொலிஸாரின் கட்டளையைப் பொருட்படுத்தாமல் தொடர்ந்து காரைச் செலுத்தியுள்ளார்.
இதனால் பொலிஸார் துப்பாக்கிச் சூடு நடத்தியபோதிலும், கார் நிறுத்தப்படாமல் முன்னோக்கிச் சென்றுள்ளது. தொடர்ந்து, பன்னலை நகரில் வைத்து பொலிஸ் ஜீப் வண்டி மற்றும் மேலும் சில வாகனங்களைக் குறுக்காக நிறுத்தி பொலிஸார் குறித்த காரை சுற்றிவளைத்து மறித்துள்ளனர்.
வாகனம் நிறுத்தப்பட்ட போதிலும் சாரதி காரின் கதவுகளைத் திறக்கவில்லை. இதனால் பொலிஸ் அதிகாரிகள் ரி56 துப்பாக்கிகளைக் காண்பித்து கதவைத் திறக்குமாறு உத்தரவிட்ட போதிலும் சாரதி அதனை மறுத்துள்ளார்.
இதன் காரணமாக, பொலிஸ் அதிகாரிகள் துப்பாக்கியால் காரின் இடதுபுற முன்னங்கண்ணாடியை உடைத்த பின்னரே சாரதி கதவைத் திறந்துள்ளார்.
காரில் இருந்த சாரதி மற்றும் இரண்டு பெண்கள் பொலிஸாரால் கைது செய்யப்பட்டதுடன் இதன்போது சாரதியிடம் இருந்து சிறிய அளவிலான போதைப்பொருளும் பொலிஸாரால் பறிமுதல் செய்யப்பட்டுள்ளது.
சந்தேக நபர்கள் வாழைத்தோட்டம் அல்லது கிரிவுல்ல பகுதியைச் சேர்ந்தவர்களே இவ்வாறு கைது செய்யப்பட்டுள்ளதாகத் தெரிவிக்கப்படுகிறது. இச்சம்பவம் தொடர்பில் கிரிவுல்ல பொலிஸார் மேலதிக விசாரணைகளை மேற்கொண்டு வருகின்றனர்.
யாழ்ப்பாணம், அரியாலை செம்மணி பகுதியில் இன்று (22.09.2026) காலை டிப்பர் வாகனமும் காரும் மோதி கோர விபத்து ஒன்று இடம்பெற்றுள்ளது.
இவ்விபத்தில் காரில் பயணித்த மூவர் படுகாயமடைந்த நிலையில், உடனடியாக மீட்கப்பட்டுச் சிகிச்சைக்காக யாழ்ப்பாணம் போதனா வைத்தியசாலைக்கு அனுப்பி வைக்கப்பட்டுள்ளனர்.
மேலும் விபத்துச் சம்பவம் தொடர்பில் யாழ்ப்பாணப் பொலிஸார் மேலதிக விசாரணைகளை மேற்கொண்டு வருகின்றனர்.
அதிவேக வீதிகளில் ஆசனப்பட்டி வசதி இல்லாத இருக்கைகளில் பயணிக்கும் பயணிகளுக்கு எதிராக சட்ட நடவடிக்கை எடுக்கப்படும் என காவல்துறை எச்சரித்துள்ளது.
அதிவேக வீதிகளைப் பயன்படுத்தும் வாகனங்கள், ஆசனப்பட்டி பொருத்தப்பட்டுள்ள இருக்கைகளின் எண்ணிக்கைக்கு ஏற்பவே பயணிகளை அழைத்துச் செல்ல வேண்டும் என போக்குவரத்து கட்டுப்பாடு மற்றும் வீதிப் பாதுகாப்புப் பிரிவுக்குப் பொறுப்பான பிரதி காவல்துறை மாஅதிபர் டபிள்யூ.பி.ஜே.சேனாதீர தெரிவித்துள்ளார்.
அதன்படி, பின்னாலுள்ள இருக்கையில் இரண்டு ஆசனப்பட்டி மட்டுமே இருந்தால், இரு பயணிகள் அங்கு பயணிக்க வேண்டும் என அவர் குறிப்பிட்டுள்ளார். அங்கு ஆசனப்பட்டி இல்லாமல் மூன்றாவது பயணி ஒருவர் நடுவில் பயணித்தால், அந்தப் பயணிக்கு எதிராக காவல்துறை சட்ட நடவடிக்கை எடுக்கும் என்றும் சேனாதீர மேலும் தெரிவித்துள்ளார்.
யூடியூபரான தங்கையின் மரணத்திற்கு காரணமான கணவனை , யுவதியின் அண்ணன் கொலை செய்த சம்பவம் பரப்ரப்பை ஏற்படுத்தியுள்ளது. தெலங்கானாவைச் சேர்ந்த யூடியூபர் வைஷ்ணவி சில மாதங்களுக்கு முன்பு உயிரிழந்தார்.
அவரது கணவர் தொடர்ந்து வரதட்சணை கேட்டு வந்ததாகவும், குடும்பத்தில் எப்போதும் பிரச்சினைகள் இருந்து வந்ததாலேயே வைஷ்ணவி உயிரிழந்ததாகவும் அப்போது தகவல்கள் வெளியாகின.
இதையடுத்து வைஷ்ணவியின் மரணம் தொடர்பாக அவரது கணவர் ஹரி பாபுவை போலீசார் கைது செய்தனர். தங்கையின் மரணத்திற்குப் பிறகு அவரது சகோதரர் சந்தோஷ் மிகுந்த மனவேதனையில் இருந்தார்.
இந்நிலையில், கடந்த சில நாட்களுக்கு முன்பு ஹரி பாபு ஜாமீனில் வெளியே வந்தார். அவருக்கு உரிய தண்டனை கிடைக்காது என்பதை உணர்ந்த சந்தோஷ், ஹரி பாபுவை கொலை செய்ததாக கூறப்படுகிறது.
கொலை செய்த பின்னர் நேரடியாக காவல் நிலையத்திற்குச் சென்ற சந்தோஷ் சரணடைந்ததாக கூறப்படுகின்றது.
கண்டி, போகம்பரை பேருந்து நிலையத்திற்கு அருகிலுள்ள பொலிஸ் உத்தியோகத்தர்களின் குடியிருப்பு வளாகத்திற்கு அருகில் நேற்று திங்கட்கிழமை (21.09.2026) பிற்பகல் வீழ்ந்த மரமொன்றினால், அவ்வழியாகப் பயணித்த இரண்டு கார்கள் சேதமடைந்துள்ளன.
நாட்டில் பல பகுதிகளிலும் கடும் மழையும் பலத்த காற்றும் வீசி வருவதோடு, கண்டி மற்றும் பிற பகுதிகளில் பலத்த மழை பெய்யக்கூடும் என வளிமண்டலவியல் திணைக்களம் எச்சரித்துள்ளது.
2026ஆம் ஆண்டுக்கான கல்விப் பொதுத் தராதர உயர்தரப் பரீட்சையின் செயல்முறைப் பரீட்சைகள் இந்த வாரம் ஆரம்பிக்கப்படவுள்ளதாக இலங்கை பரீட்சைகள் திணைக்களம் அறிவித்துள்ளது.
அதற்கமைய, நடனம் (தேசிய மற்றும் பரதநாட்டியம்), சங்கீதம் (கீழத்தேய, கர்நாடக மற்றும் மேற்கத்திய) மற்றும் நாடகம் மற்றும் அரங்கியல் (சிங்களம், தமிழ் மற்றும் ஆங்கிலம்) ஆகிய பாடங்களுக்கான செயல்முறைப் பரீட்சைகள் எதிர்வரும் செப்டெம்பர் 24ஆம் திகதி முதல் ஒக்டோபர் 3ஆம் திகதி வரை நடைபெறவுள்ளன.
பொறியியல் தொழில்நுட்பப் பாடத்திற்கான செயல்முறைப் பரீட்சை செப்டெம்பர் 30ஆம் திகதி முதல் ஒக்டோபர் 10ஆம் திகதி வரையும், மனைப் பொருளியல் பாடத்திற்கான செயல்முறைப் பரீட்சைகள் ஒக்டோபர் 10ஆம் திகதி முதல் ஒக்டோபர் 20ஆம் திகதி வரையும் நடைபெறவுள்ளன.
அதேவேளை, உயிர் முறைமைகள் தொழில்நுட்பப் பாடத்திற்கான செயல்முறைப் பரீட்சை ஒக்டோபர் 17ஆம் திகதி முதல் ஒக்டோபர் 21ஆம் திகதி வரையான காலப்பகுதியில் நடைபெறவுள்ளது.
அனுமதி அட்டைகள் செயல்முறைப் பரீட்சைகளுக்குத் தோற்றும் பாடசாலை பரீட்சார்த்திகளுக்கான அனுமதி அட்டைகள் அந்தந்த பாடசாலை அதிபர்களிடம் வழங்கப்படவுள்ளதாக பரீட்சைகள் திணைக்களம் தெரிவித்துள்ளது.
தனியார் பரீட்சார்த்திகளுக்கான அனுமதி அட்டைகள், பரீட்சைகள் ஆரம்பமாவதற்கு முன்னதாக அவர்கள் விண்ணப்பங்களில் குறிப்பிட்டுள்ள முகவரிகளுக்கு தபால் மூலம் அனுப்பி வைக்கப்படும் எனவும் தெரிவிக்கப்பட்டுள்ளது.
மேலும், செயல்முறைப் பரீட்சை ஆரம்பமாவதற்கு ஏழு நாட்களுக்கு முன்னர், பரீட்சார்த்திகள் பரீட்சைகள் திணைக்களத்தின் அதிகாரப்பூர்வ இணையத்தளத்திலிருந்து தங்களுக்கான அனுமதி அட்டைகளை பதிவிறக்கம் செய்துகொள்ள முடியும்.
மேலதிக தகவல்களுக்கு பரீட்சைகள் தொடர்பான விசாரணைகளுக்கு 1911 என்ற அவசர அழைப்பு இலக்கத்தின் ஊடாகவோ அல்லது 0112785922, 0112784537, 0112786616 மற்றும் 0112784208 ஆகிய தொலைபேசி இலக்கங்களின் ஊடாகவோ பரீட்சைகள் திணைக்களத்தை தொடர்புகொள்ள முடியும். மேலும், gcealexam@gmail.com என்ற மின்னஞ்சல் முகவரியின் ஊடாகவும் விசாரணைகளை முன்வைக்க முடியும்.
ஹட்டன் – பொகவந்தலாவை பிரதான வீதியின் நோர்வூட் சென்ஜோன் டிலரி பகுதியில் கண்டெடுக்கப்பட்ட ஒரு பவுண் மதிக்கத்தக்க கைச்சங்கிலி உரிமையாளரிடம் ஒப்படைக்கப்பட்டுள்ளது.
குறித்த சம்பவமானது நேற்றையதினம்(20.9.2026) இடம்பெற்றுள்ளது.
ஒரு பவுண் மதிக்கத்தக்க 3 இலட்சத்து 90ஆயிரம் ரூபாய் பெறுமதி யான தங்க கைச்சங்கிலி ஒன்று கண்டெடுக்கப்பட்டு பொகவந்தலாவை பொலிஸ் நிலையத்தில் ஒப்படைக்கப்பட்டுள்ளது.
இந்த தங்க கைச்சங்கிலியை கண்டெடுத்த இருவரும் உரிமையாளரை வந்து பெற்றுக் கொள்ளுமாறு தமது முகப்புத்தகத்தில் பதிவு செய்தனர்.
இதனையடுத்து அதன் உரிமையாளர் பொலிஸ் நிலையத்துக்கு சென்று சங்கிலியைப் பெற்றுக் கொண்டுள்ளார்.
யாழ்ப்பாணம் – சாவகச்சேரி பகுதியில் நேற்று (20) பகல் துணிகர திருட்டு சம்பவம் ஒன்று இடம்பெற்றுள்ளது. சாவகச்சேரி நவீன சந்தை கடையில் இருந்த கைபேசி ஒன்றே இவ்வாறு களவாடப்பட்டுள்ளது.
கடைக்கு வந்த நபர் பொருட்களை வாங்குவது போல் பாசாங்கு செய்துவிட்டு யாரும் பார்க்காத நேரத்தில் அந்த கடையில் இருக்கும் கைபேசியை திருடிச் சென்றுள்ளார்.
இந்த விடயம் அங்கிருந்த சிசிடிவி கேமராக்களில் பதிவாகியுள்ளன. கடையின் உரிமையாளரால் இந்த விடயமானது சாவகச்சேரி பொலிஸாரின் கவனத்திற்கு கொண்டு செல்லப்பட்டது. பொலிஸார் விசாரணைகளை மேற்கொண்டு வருகின்றனர்.
போலி ஆவணங்களைத் தயாரிப்பதற்காகப் பிறருக்குச் சொந்தமான 48 கடவுச்சீட்டுகளை வைத்திருந்ததாகக் கூறப்படும், குடிவரவு மற்றும் குடியகல்வுத் திணைக்களத்தின் முன்னாள் அலுவலக உதவியாளர் ஒருவர் நவகமுவ பொலிஸாரினால் கைது செய்யப்பட்டுள்ளார்.
கடவுச்சீட்டுகள் மற்றும் நாணயத்தாள்களில் உள்ள பாதுகாப்பு அம்சங்களைச் சரிபார்க்கப் பயன்படும் ஒரு போலி இயந்திரம் மற்றும் ஒரு ஸ்மார்ட்போன் ஆகியவையும் சந்தேக நபரிடமிருந்து கைப்பற்றப்பட்டன.
இந்தச் சேவைக்காக ஒரு நபருக்கு 20,000 ரூபா
தூதரகம் ஒன்றின் ஊடாக விசா பெறுவதற்கு ஒருவருக்கு உதவுவதற்காக, கடுவெலவின் இஹல பொமிரியா பகுதியில் உள்ள வீடு ஒன்றில் போலி ஆவணங்கள் தயாரிக்கப்படுவதாக நவகமுவ பொலிஸ் நிலையத்தின் பிரிவுசார் புலனாய்வுப் பிரிவுக்குத் தகவல் கிடைத்ததாகக் பொலிஸார் தெரிவித்தனர்.
இத்தகவலின் அடிப்படையில், நவகமுவ பொலிஸ் நிலையப் பொறுப்பதிகாரி (OIC) பிரதான பரிசோதகர் சுசந்த ஜயநாத்தின் அறிவுறுத்தலின் பேரில், நவகமுவ பொலிஸ் நிலையத்தின் ஊழல் தடுப்புப் பிரிவினர் மேற்கொண்ட சோதனையின்போது சந்தேக நபர் கைது செய்யப்பட்டார்.
விசாரணையின்போது, தான் சுமார் ஐந்து ஆண்டுகள் குடிவரவு மற்றும் குடியகல்வுத் திணைக்களத்தில் அலுவலக உதவியாளராகப் பணியாற்றியதாகச் சந்தேக நபர் பொலிஸாரிடம் கூறியதாகத் தெரிவிக்கப்படுகிறது.
அதன் பின்னர் அவர் பத்தரமுல்லையில் உள்ள ஆட்சேர்ப்பு முகமை ஒன்றில் பணியாற்றியதாகவும், அங்கிருந்தே இந்தக் கடவுச்சீட்டுகளைப் பெற்றதாகவும் பொலிஸார் கூறினர்.
விசாரணைகளின்படி, சுற்றுலா விசாவில் பல்வேறு நாடுகளுக்குப் பயணம் செய்ய விண்ணப்பிக்கும் நபர்கள் ஏற்கனவே வெளிநாடுகளுக்குப் பயணம் செய்திருப்பதாகத் தூதரகங்களுக்குத் தோற்றமளிக்கும் வகையில், பழைய கடவுச்சீட்டுகளிலிருந்து விசா பக்கங்களை நீராவி மூலம் அகற்றி, அவற்றை புதிய கடவுச்சீட்டுகளில் கவனமாக ஒட்டியதாகச் சந்தேக நபர் மீது குற்றம் சாட்டப்பட்டுள்ளது.
இந்தச் சேவைக்காக ஒரு நபருக்கு 20,000 ரூபாயை அறவிட்டதாகச் சந்தேக நபர் பொலிஸாரிடம் கூறியதாகத் தெரிவிக்கப்பட்டுள்ளது.
அவரிடமிருந்து கைப்பற்றப்பட்ட கடவுச்சீட்டுகளில் சுமார் 15 கடவுச்சீட்டுகளிலிருந்து விசா பக்கங்கள் அகற்றப்பட்டிருந்தமை விசாரணையில் தெரியவந்துள்ளது.
மேலும், 70 வயதான இந்தச் சந்தேக நபர் கடுவல நீதிவான் நீதிமன்றத்தில் முன்னிலைப்படுத்தப்படவுள்ளார்.
