டிஜிட்டல் பரிவர்த்தனைகளின் வளர்ச்சியுடன் தொடர்புடைய இணையவழி மோசடிகள் அதிகரித்துள்ள நிலையில் பொதுமக்கள் தங்கள் நிதித்தகவல்களை பாதுகாக்குமாறு இலங்கை பொலிஸார் எச்சரித்துள்ளனர்.

பொதுமக்களிடம் கவனக்குறைவை பயன்படுத்தி ஹேக்கர்கள் பணத்தை திருடக்கூடும் என்று பொலிஸார் எச்சரித்துள்ளனர்.

இதன்படி, பொதுமக்கள் இரகசிய தன்மையை பேணுமாறும், வங்கி கணக்கின் இரகசிய எண்கள், வங்கி கடவுச்சொற்கள் அல்லது ஒருமுறை பயன்படுத்தும் கடவுச்சொற்களை (OTPs) குடும்பத்தினர் அல்லது நண்பர்கள் உட்பட யாருடனும் பகிர வேண்டாம் என்றும் தெரிவித்துள்ளனர்.

மேலும், கைபேசிகளில் பெறப்பட்ட OTP எண்களை வெளியாட்களுக்கு வெளியிட வேண்டாம் என்றும் குறிப்பிட்டுள்ளனர்.

அட்டை பயன்பாட்டை கண்காணிக்கவும்: பரிவர்த்தனைகள் உங்கள் முன்னிலையில் செய்யப்படுவதை உறுதி செய்யுங்கள் மற்றும் கடைகள் அல்லது உணவகங்களில் அட்டைகள் எடுத்துச்செல்லப்படுவதைத் தவிர்க்கவும்.

CVV எண்ணை இரகசியமாக வைத்திருங்கள்: அட்டைகளின் பின்புறத்தில் உள்ள மூன்று இலக்க CVV எண்ணை வெளியிட வேண்டாம்.

கணக்குகளிலிருந்து செய்யப்படும் எந்தவொரு பிடித்தம் குறித்தும் உடனடி அறிவிப்புகளைப் பெற, குறுஞ்செய்தி (SMS) அறிவிப்புகளை அமைக்கவும்.

பணத்தின் பாதுகாப்பு கணக்கு வைத்திருப்பவர்களின் கைகளிலேயே உள்ளதா என்பது போன்ற அறிவுரைகளையும், பொதுமக்கள் டிஜிட்டல் தளங்களைப் பாதுகாப்பாகவும் பொறுப்புடனும் பயன்படுத்த வேண்டும் என்றும் கேட்டுக்கொண்டுள்ளது.

தெற்கு அதிவேக நெடுஞ்சாலையின் களனிகம மற்றும் தொடாங்கொடை ஆகிய இடங்களுக்கு இடையில் பல வாகனங்கள் மோதி விபத்து இடம்பெற்றுள்ளது.

மாத்தறையில் இருந்து கொழும்பு நோக்கிப் பயணித்த பேருந்து ஒன்றும் வேறு சில வாகனங்களும் ஒன்றுடன் ஒன்று மோதி இந்த விபத்து ஏற்பட்டுள்ளது.

ஆறு மோட்டார் வாகனங்களும் இரண்டு பேருந்துகளுமே இவ்வாறு ஒன்றுடன் ஒன்று மோதியுள்ளதாக கூறப்படுகிறது.

விபத்தில் 10 பேருக்கும் அதிகமானோர் காயமடைந்து வைத்தியசாலையில் அனுமதிக்கப்பட்டுள்ளதாக தெரிவிக்கப்பட்டுள்ளது.

நாட்டில் நிலவும் தீவிர மழையுடனான சீரற்ற காலநிலைக்கு மத்தியில், அகலவத்தை, தெல்பே, ஹல்ஓவிட்ட பகுதியில் வீட்டில் தூங்கிக்கொண்டிருந்த 15 வயது பாடசாலை மாணவன் ஒருவர் மின்னல் தாக்கி உயிரிழந்துள்ளார்.

இந்தச் சம்பவம் தொடர்பில் அகலவத்தை பொலிஸார் விசாரணைகளை முன்னெடுத்து வருகின்றனர்.

உயிரிழந்தவர், அகலவத்தை, தெல்பே, ஹல்ஓவிட்ட பகுதியில் வசித்து வந்த ஹசித பிரதீப் குமார என அடையாளம் காணப்பட்டுள்ளார்.

அகலவத்தை மிஹிந்து மகா வித்தியாலயத்தில் 10ஆம் தரத்தில் கல்வி கற்று வந்த குறித்த மாணவன், சம்பவம் இடம்பெற்ற போது வீட்டின் அறையில் தரையில் தூங்கிக்கொண்டிருந்ததாக பொலிஸார் தெரிவித்துள்ளனர்.

இதன்போது, வீட்டில் பொருத்தப்பட்டிருந்த மின் இணைப்பு படுகையில் (Plug Point) மின்னல் தாக்கியதாகவும், அதன் தாக்கம் மாணவனையும் தாக்கியதாகவும் தெரிவிக்கப்படுகிறது.

மின்னல் தாக்குதலில் படுகாயமடைந்த மாணவன் உடனடியாக அகலவத்தை பிம்புர ஆதார வைத்தியசாலையில் அனுமதிக்கப்பட்டு சிகிச்சை பெற்று வந்துள்ளார்.

எனினும், சிகிச்சை பலனின்றி அவர் உயிரிழந்ததாக பொலிஸார் தெரிவித்துள்ளனர்.

சம்பவம் தொடர்பான மேலதிக விசாரணைகளை அகலவத்தை பொலிஸார் முன்னெடுத்து வருகின்றனர்.

தற்போது நிலவும் மழைக்கால வானிலை நிலமைகள் இம்மாதம் 25ஆம் திகதி வரை நீடிக்கும் என வளிமண்டலவியல் திணைக்களத்தின் முன்னறிவிப்புப் பிரிவின் பணிப்பாளர் மெரில் மெண்டிஸ் தெரிவித்துள்ளார்.

இதன் விளைவாக, ஆற்றுப் படுகைகளுக்கு அருகிலுள்ள தாழ்வான பகுதிகளில் வசிப்பவர்களும், மண்சரிவு அபாயம் உள்ள பகுதிகளில் வசிப்பவர்களும் விழிப்புடன் இருக்குமாறு பணிப்பாளர் அறிவுறுத்தியுள்ளார்.

இதற்கிடையில், வங்காள விரிகுடாவின் கிழக்கு – மத்திய பகுதி மற்றும் அதனை அண்டிய வடக்கு அந்தமான் கடற்பகுதியில் தற்போது நிலவும் குறைந்த காற்றழுத்த தாழ்வு பகுதி, மேற்கு – வடமேற்கு திசையில் நகர்ந்து கொண்டிருப்பதாக வளிமண்டலவியல் திணைக்களம் தெரிவித்துள்ளது.

இது இன்று (21.09.2026) வங்காள விரிகுடாவின் கிழக்கு – மத்திய பகுதியில் படிப்படியாக வலுவடைந்து காற்றழுத்த தாழ்வு மண்டலமாகவும், நாளை (22.09.2026) மேலும் வலுவடைந்து ஆழ்ந்த காற்றழுத்த தாழ்வு மண்டலமாகவும் மாறக்கூடும் என எதிர்பார்க்கப்படுகிறது.

எதிர்வரும் செப்டெம்பர் 23ஆம் திகதி, இது வடக்கு ஆந்திரப் பிரதேசம் மற்றும் தெற்கு ஒடிசா கடற்கரைகளுக்கு அருகில், வங்காள விரிகுடாவின் மேற்கு – மத்திய மற்றும் அதனை அண்டிய வடமேற்குப் பகுதியைச் சென்றடைய அதிக வாய்ப்புள்ளது.

குறிப்பாக வங்காள விரிகுடாவின் வடக்குப் பகுதியில் செயற்படும் கடற்தொழிலாளர்கள் மற்றும் கடற்படையினர் உடனடியாக பாதுகாப்பான இடங்களுக்கு செல்லுமாறு பணிப்பாளர் மெரில் மெண்டிஸ் அறிவுறுத்தியுள்ளார்.

சவூதி அரேபியாவில் சிறையில் அடைக்கப்பட்டுள்ள சிவராசா அனோஜனின் பெற்றோர் இன்று (21) ஜனாதிபதி அநுர குமாரவை சந்தித்ததாக தகவல்கள் வெளியாகியுள்ளன.

முன்னதாக அவர்கள் எதிர்க்கட்சி தலைவரை சந்தித்து உரையாடியிருந்தனர்.

இந்நிலையில், சவூதி தூதுவராலயத்திற்கு சென்ற நிலையில் அங்கே கடிதம் கையளிப்பது பின்போடப்பட்டதாகவும் தெரிவிக்கப்படுகின்றது.

அந்த நேரத்தில் ஜனாதிபதியை சந்திப்பதற்கான அழைப்பு வந்ததாகவும் ஒரு மணியளவில் ஜனாதிபதியை குடும்ப உறுப்பினர்கள் சந்தித்து உரையாடியதாகவும் தகவல்கள் கூறுகின்றன.

இதன்போது, அனோஜனின் விடுதலைக்காக முழுமையான ஆதரவு மற்றும் ஒத்துழைப்பை நல்குவதாக ஜனாதிபதி அநுர குமா திஸாநாயக்க உறுதியளித்துள்ளார்.

மட்டக்களப்பு, பட்டிப்பளை பிரதேசத்திற்குட்பட்ட அம்பிளாந்துறை கிராமத்தில் இளம்பெண் ஒருவர் உயிரிழந்த சம்பவம் பெரும் சோகத்தை ஏற்படுத்தியுள்ளது.

கடந்த 16ஆம் திகதி மகிழடித்தீவில் திருமணம் நடைபெற்றிருந்த நிலையில், திருமணமாகி சில நாட்களிலேயே குறித்த இளம்பெண் தனது இல்லத்தில் உயிரிழந்த நிலையில் மீட்கப்பட்டுள்ளதாகத் தெரிவிக்கப்படுகிறது.

இந்த துயரச் சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. சம்பவம் தொடர்பில் கொக்கட்டிச்சோலை பொலிஸார் மேலதிக விசாரணைகளை முன்னெடுத்து வருகின்றனர்.

யாழ்ப்பாணம் மானிப்பாய் பகுதியில் மோட்டார் சைக்கிளில் பயணித்த இளைஞன் வீதியில் விழுந்து சம்பவ இடத்திலேயே உயிரிழந்துள்ளார்.

வெள்ளிக்கிழமை இடம்பெற்ற இந்த சம்பவத்தில் சுன்னாகம், சபாபதிப்பிள்ளை வீதியைச் சேர்ந்த தபேந்திரன் தினுசன் (வயது 26) என்ற இளைஞனே இவ்வாறு உயிரிழந்தவராவார்.

இளைஞன் மானிப்பாய் தேவாலயத்திற்கு முன்பாக மோட்டார் சைக்கிளில் பயணித்துக் கொண்டிருந்தபோது போக்குவரத்துப் பொலிஸார் அவரை வழிமறித்தனர்.

இதன்போது, அந்த இளைஞன் மோட்டார் சைக்கிளை ஓரமாக நிறுத்திய பின்னர் தானாகவே கீழே சரிந்து விழுந்து அசைவற்று காணப்பட்டுள்ளார்.

முறைப்படி அவரை வைத்தியசாலைக்குக் கொண்டு சென்றபோது, அவர் ஏற்கனவே உயிரிழந்துவிட்டதாக வைத்தியர்கள் தெரிவித்தனர்.

சடலம் உடற்கூற்றுப் பரிசோதனைகளுக்காக யாழ்ப்பாணம் போதனா வைத்தியசாலையில் வைக்கப்பட்டுள்ளது.

நாட்டின் சில இடங்களில் கடுமையான மின்னல் தாக்கம் ஏற்படுவதற்கான சாத்தியக்கூறுகள் அதிகமாக காணப்படுவதாக வளிமண்டலவியல் திணைக்களம் எச்சரிக்கை விடுத்துள்ளது.

அதன்படி, ஊவா, கிழக்கு மாகாணங்களிலும் முல்லைத்தீவு, பொலன்னறுவை மாவட்டங்களிலும் கடும் மின்னல் தாக்கம் ஏற்படக்கூடும் என அம்பர் எச்சரிக்கை விடுக்கப்பட்டுள்ளது.

இன்று (18) காலை 11 மணிக்கு விடுக்கப்பட்டுள்ள இந்த எச்சரிக்கை இன்றிரவு 11.30 மணி வரை நீடிக்கும் என அறிவிக்கப்பட்டுள்ளது.

மேற்குறிப்பிட்ட இடங்களில் இடியுடன் கூடிய மழை, மின்னல் ஏற்படும்போது பலத்த காற்றும் வீசக்கூடும் எனத் தெரிவிக்கப்பட்டுள்ளது.

இதன் காரணமாக இடி, மின்னல் ஏற்படும் சந்தர்ப்பங்களில் பொதுமக்கள் தங்கள் பாதுகாப்பு குறித்து அவதானமாக செயற்படுமாறு கேட்டுக்கொள்ளப்படுகின்றனர்.

சர்ச்சைக்குரிய முகநூல் பதிவு காரணமாக சவூதி அரேபியாவில் மரண தண்டனை விதிக்கப்பட்டுள்ள இலங்கை தமிழ் இளைஞர் சிவராசா அனோஜன் என்பவரின் தண்டனையை இரத்து செய்வதற்கும், அவருக்குச் சட்டரீதியான மற்றும் இராஜதந்திர ரீதியான உதவிகளை வழங்குவதற்கும் உடனடி நடவடிக்கை எடுக்குமாறு, யாழ் மாவட்டப் பாராளுமன்ற உறுப்பினர் கஜேந்திரகுமார் பொன்னம்பலம், கோரிக்கை விடுத்துள்ளார்.

இலங்கையின் வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் ஆகியோருடன் இன்று காலை (செப்டம்பர் 18) தொலைபேசி மூலம் தொடர்புகொண்டு கோரிக்கை விடுத்துள்ளார்.

அம்பாறை மாவட்டத்தைச் சேர்ந்த சிவராசா அனோஜன் சவூதி அரேபியாவில் கைது செய்யப்பட்டிருந்த நிலையில், ஆரம்பத்தில் அவருக்கு ஐந்து ஆண்டுகள் சிறைத்தண்டனையும் 3 மில்லியன் சவூதி ரியால் அபராதமும் விதிக்கப்பட்டது.

அதனைத் தொடர்ந்து செய்யப்பட்ட மேன்முறையீட்டின் தீர்ப்பில், அவருக்கு மரண தண்டனை விதிக்கப்பட்டுள்ளதாகச் செய்திகள் வெளியாகியுள்ளன.

இந்த நிலையில், அனோஜனின் மரண தண்டனையை மறுபரிசீலனை செய்வதற்கும், தண்டனையை இரத்துச் செய்வதற்கோ அல்லது குறைப்பதற்கோ சவூதி அரேபிய அதிகாரிகளுடன் அவசரமான இராஜதந்திர நடவடிக்கைகளை முன்னெடுக்குமாறு கஜேந்திரகுமார் பொன்னம்பலம் வெளிவிவகார அமைச்சரிடம் வலியுறுத்தியுள்ளார்.

கொழும்பின் புறநகர் பகுதியான கல்கிஸ்ஸ பகுதியில் உள்ள ஒரு மருத்துவ ஆய்வகத்திற்கு சென்று தங்குவதற்கு இடம் கேட்ட கனேடிய பெண் ஒருவர், அங்கு மோசமாக நடந்து கொண்ட குற்றச்சாட்டில் கைது செய்யப்பட்டுள்ளார்.

பயணப் பையுடன் மருத்துவ மையத்திற்கு வந்த வெளிநாட்டுப் பெண் தங்குவதற்கு இடம் கேட்டுள்ளார். அவர் அங்கிருந்து வெளியேற மறுப்பதாகவும், அவரது கோரிக்கை நிராகரிக்கப்பட்டதும் ஊழியர்களிடம் ஆக்ரோஷமாக நடந்து கொண்டதாகவும் அவசர உதவி எண் ஊடாக பொலிஸாருக்கு தகவல் வழங்கப்பட்டுள்ளது.

இந்த முறைப்பாட்டிற்கமைய, சுற்றுலாப் பிரிவுப் பொறுப்பதிகாரி மிலன் ராஜபதிரன தலைமையிலான குழுவினர் அந்த மருத்துவ ஆய்வகத்திற்கு சென்றனர். கனேடிய பெண்ணிடம் மேற்கொண்ட விசாரணையில் அவரிடம் செல்லுபடியாகும் விசா அல்லது கடவுச்சீட்டு இல்லை என்பது தெரியவந்துள்ளது.

சந்தேக நபர் பல ஆண்டுகளுக்கு முன்பு அஹங்கம பகுதியில் வசித்தவர் என்பது விசாரணையில் தெரியவந்தது. இந்நிலையில் கைது செய்யப்பட்ட கனேடிய பெண், நீதவான் நீதிமன்றத்தில் முன்னிலைப்படுத்தப்பட்டார்.

இதன்போது எதிர்வரும் 21ஆம் திகதி வரை விளக்கமறியலில் வைக்க உத்தரவிடப்பட்டது. இந்தக் காலப்பகுதியில் அவரை வெலிசர பகுதியில் உள்ள வெளிநாட்டினருக்கான தடுப்பு முகாமிற்கு மாற்றவும் நீதிமன்றம் உத்தரவிட்டது.

மாற்றுத்திறனாளி குழந்தையின் புகைப்படத்தை காட்டி, பொய்யாகப் பணம் வசூலித்த 23 வயது இளைஞர் ஒருவர் மஹியங்கனை பொலிஸாரால் கைது செய்யப்பட்டுள்ளார். சம்பவம் தொடர்பில் மேலும் தெரியவருகையில்,

மஹியங்கனை பேருந்து நிலையத்தில் நிறுத்தப்பட்டிருந்த பேருந்துகளில் ஏறி, சம்பந்தப்பட்ட குழந்தையின் புகைப்படத்தைக் காட்டிப் போலி டிக்கெட்டுகளை விற்று, சந்தேக நபர் பணம் வசூலித்து வந்ததாக பொலிஸாருக்கு தகவல் கிடைத்துள்ளது.

இதன் அடிப்படையில் குறித்த சந்தேக நபர் பொலிஸாரால் கைது செய்யப்பட்டுள்ளார். இதன்போது, 2300 மில்லிகிராம் ஐஸ் போதைப்பொருளும் கைப்பற்றப்பட்டுள்ளது. இவ்வாறு பணத்தை வசூலிப்பதற்காக, கண்டி – திகனவைச் சேர்ந்த ஒரு குழந்தையின் புகைப்படத்தை அவர் பயன்படுத்தியுள்ளார் என்றும் பொலிஸாரின் விசாரணையின் தெரியவந்துள்ளது.

மேலும், அந்த மாற்றுத்திறனாளி குழந்தை தற்போது குணமடைந்து வருவதாக விசாரணையில் தெரியவந்துள்ளது. அத்துடன், குறித்த குழந்தையின் உறவினர்கள் மஹியங்கனைக்கு வந்த பொழுது அவர்களுக்கு உதவுவதாக கூறி, உறுதியளித்து குழந்தையின் புகைப்படத்தையும் டிக்கெட்டுகளையும் பெற்றிருப்பதாகவும் சந்தேக நபர் பொலிஸாரிடம் தெரிவித்துள்ளார்.

இவ்வாறு கைது செய்யப்பட்ட 23 வயது இளைஞர் தொட்டவத்தை பகுதியை சேர்ந்தவர் என்றும், அவருக்கு எதிராக நீதிமன்றங்களால் 10 பிடியாணை பிறப்பிக்கப்பட்டுள்ளதாகவும் பொலிஸார் தெரிவித்துள்ளனர். இந்த சம்பவம் தொடர்பான மேலதிக விசாரணைகளை மஹியங்கனை பொலிஸார் மேற்கொண்டு வருகின்றனர்.