உத்தரப்பிரதேச மாநிலம் மதுராவில் யாசகம் தர மறுத்த மும்பையைச் சேர்ந்த பெண்ணை தாக்கி, அவரது மூக்குத்தியை பறித்துச் சென்ற சம்பவம் அதிர்ச்சியை ஏற்படுத்தியுள்ளது.

மும்பையைச் சேர்ந்த மோனிகா என்பவர் மதுராவில் நடந்து சென்று கொண்டிருந்தார். அப்போது அவரிடம் ஒருவர் யாசகம் கேட்டதாக கூறப்படுகிறது. ஆனால் மோனிகா பணம் கொடுக்க மறுத்துள்ளார்.

இதனால் ஆத்திரமடைந்த அந்த நபர், மோனிகாவை அருகில் இருந்த புதருக்குள் தள்ளியதாக கூறப்படுகிறது. பின்னர் அவரை தாக்கி கழுத்தை நெரிக்க முயன்றதுடன், மூக்கில் கடித்ததாகவும் கூறப்படுகிறது.

இந்த தாக்குதலில் மோனிகா காயமடைந்தார். மேலும் அவரது மூக்கில் அணிந்திருந்த மூக்குத்தியையும் அந்த நபர் பறித்துக்கொண்டு அங்கிருந்து தப்பிச் சென்றதாக தெரிவிக்கப்பட்டுள்ளது.

சம்பவம் குறித்து தகவல் அறிந்த போலீசார், காயமடைந்த மோனிகாவை மீட்டு மருத்துவமனைக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு வருகிறது. இதற்கிடையே, சம்பவம் தொடர்பான சிசிடிவி காட்சிகளை போலீசார் ஆய்வு செய்து வருகின்றனர்.

சந்தேகிக்கப்படும் நபரை அடையாளம் கண்டு கைது செய்ய போலீசார் தேடுதல் நடவடிக்கையில் ஈடுபட்டுள்ளனர்.அந்த நபர் மனநலம் பாதிக்கப்பட்டவராக இருக்கலாம் என சந்தேகிக்கப்படுவதாக கூறப்படும் நிலையில், இதுகுறித்தும் போலீசார் விசாரணை நடத்தி வருகின்றனர்.

கர்நாடக மாநிலம் பெங்களூரில் லாட்ஜ் அறை ஒன்றில் 23 வயது இளம்பெண் சடலமாக மீட்கப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது. வித்யாவுடன் தங்கியிருந்த அவரது கணவர் தப்பியோடிய நிலையில், போலீசார் தீவிரமாகத் தேடி வருகின்றனர்.

பெங்களூருவிலுள்ள ஒரு தனியார் லாட்ஜில் வித்யா (23) என்ற இளம்பெண் சடலமாகக் கண்டெடுக்கப்பட்டுள்ளார். இவருக்கும் ஆனந்த் என்பவருக்கும் கடந்த 4 ஆண்டுகளுக்கு முன்பு காதல் திருமணம் நடந்துள்ள நிலையில், இவர்களுக்கு ஒரு மகனும் உள்ளார்.

சம்பவத்தன்று இந்தத் தம்பதி இருவரும் ஒன்றாக அந்த லாட்ஜில் வந்து தங்கியுள்ளனர். இந்நிலையில், அங்கு இளம்பெண் இறந்து கிடப்பதாகக் காவல்துறையினருக்குத் தகவல் கிடைத்தது.

தகவலறிந்து உடனடியாக நிகழ்விடத்திற்கு விரைந்து சென்ற காவல்துறையினர், உயிரிழந்த பெண்ணின் உடலைக் கைப்பற்றிப் பிரேதப் பரிசோதனைக்காக அரசு மருத்துவமனைக்கு அனுப்பி வைத்துள்ளனர்.

மேலும், இச்சம்பவத்திற்குப் பிறகு தலைமறைவாகியுள்ள கணவர் ஆனந்தைத் தீவிரமாகத் தேடி வருகின்றனர். பிரேதப் பரிசோதனை அறிக்கை வந்த பிறகே இளம்பெண்ணின் மரணத்திற்கான உண்மையான காரணம் தெரியவரும் என்று போலீசார் தெரிவித்துள்ளனர்.

கர்நாடகா மாநிலம், பெங்களூருவில் தன்னுடைய காதலை ஏற்க மறுத்த சட்டக்கல்லூரி மாணவி ஒருவரை, நடுரோட்டில் மறைந்திருந்த வாலிபர் ஒருவர் கத்தியால் குத்துக் கொல்லும் பதைபதைக்க வைக்கும் சிசிடிவி காட்சிகள் தற்போது வெளியாகி பெங்களூரை அதிர்ச்சியில் உறையச் செய்துள்ளது.

பெங்களூருவைச் சேர்ந்த அம்ருதா என்ற இளம்பெண் தனது காதலை நிராகரித்த ஆத்திரத்தில் வாலிபர் சூர்யா இக்கொடூரச் செயலில் ஈடுபட்டுள்ளார். கடந்த ஜூலை 13-ம் தேதியன்று வேலைக்குச் சென்று கொண்டிருந்த போது, வழியில் கேஸ் லாரிக்குப் பின்னால் மறைந்திருந்த சூர்யா திடீரென அம்ருதாவை வழிமறித்துள்ளார்.

தன்னுடைய காதலை ஏற்க மறுத்த ஆத்திரத்தில், அப்பெண்ணின் முதுகு மற்றும் மார்புப் பகுதியில் சூர்யா தான் மறைத்து வைத்திருந்த கத்தியால் பலமுறை சரமாரியாகக் குத்தியுள்ளார். இதில் படுகாயமடைந்து அதீத ரத்தப்போக்கு ஏற்பட்ட நிலையில் மருத்துவமனையில் அனுமதிக்கப்பட்ட அம்ருதா, கடந்த ஜூலை 15-ஆம் தேதியன்று சிகிச்சைப் பலனின்றி பரிதாபமாக உயிரிழந்தார்.

இக்கொலைச் சம்பவம் தொடர்பான அதிர்ச்சியூட்டும் சிசிடிவி காட்சிகள் தற்போது வெளியாகிப் பெரும் பரபரப்பை ஏற்படுத்தியுள்ளன. இக்கொலை வழக்கில் தொடர்புடைய சூர்யா மற்றும் அவரது சகோதரர் தனுஷ் ஆகிய இருவரையும் காவல்துறையினர் உடனடியாகக் கைது செய்து தீவிர விசாரணை நடத்தி வருகின்றனர்.

Indian man found dead in US home 17 days after marriage: திருமணமாகி 17 நாட்களே ஆன நிலையில் அமெரிக்காவில் சடலமாகக் கண்டெடுக்கப்பட்டுள்ளார் இந்தியர் ஒருவர். இந்தியாவின் தெலங்கானா மாநிலத்தைச் சேர்ந்தவர் ஜாபர் ஹுசைன் (28). உயர் கல்விக்காக 2021ஆம் ஆண்டு அமெரிக்கா சென்றிருந்தார் அவர்.

ஹைதராபாதைச் சேர்ந்த ஹுசைனுக்கு 17 நாட்களுக்கு முன்தான் திருமணம் ஆனது. அதாவது, ஆகத்து மாதம் 28ஆம் திகதி டெக்சாஸில் ஹுசைனின் திருமணம் நடைபெற்ற நிலையில், தான் வாழும் Lowell என்னுமிடத்துக்கு சமீபத்தில்தான் திரும்பியிருந்தார் அவர்.

இந்நிலையில், இம்மாதம், அதாவது, செப்டம்பர் மாதம் 14ஆம் திகதி, தன் வீட்டில் உயிரற்ற நிலையில் கண்டுபிடிக்கப்பட்டுள்ளார் ஹுசைன். அவர் எப்படி உயிரிழந்தார் என்பது குறித்து, அவரது மனைவி குறித்தோ எந்த தகவலும் வெளியாகவில்லை.

ஹுசைன் குடும்பம் அந்த அளவுக்கு வசதியான குடும்பம் இல்லை என்பதால், அவரது உடலை இந்தியா கொண்டுவர இந்திய அரசின் உதவியை நாடியுள்ளனர் அவரது குடும்பத்தினர்.

தெலங்கானாவில் விநாயகர் சிலையை கரைக்கும் போது ஏரியில் மூழ்கி 6 மாணவர்கள் உயிரிழந்துள்ளனர். கடந்த செப்டம்பர் 14 ஆம் திகதி, இந்தியா முழுவதும் விநாயகர் சதுர்த்தி வெகு சிறப்பாக கொண்டாடப்பட்டது.

விநாயகர் சதுர்த்திக்காக வைக்கப்பட்ட சிலைகள், ஏரி, குளம் போன்ற நீர்நிலைகளில் கரைக்கப்படுவது வழக்கம். தெலங்கானா மாநிலம், படஞ்சேரு மண்டலத்தில் உள்ள இனோலே கிராமத்தில் அமைந்துள்ள சிரிஷா நினைவு அறக்கட்டளையின் சார்பில் விநாயகர் சிலை வைத்து பூஜை செய்யப்பட்டது.

நேற்று மாலை சுமார் 5.30 மணியளவில், சிரிஷா நினைவு அறக்கட்டளை ஆதரவற்றோர் இல்லத்தைச் சேர்ந்த மாணவர்கள், நெருடுசெர்லா ஏரியில் விநாயகர் சிலையை கரைப்பதற்காக உள்ளூர் மக்களுடன் சேர்ந்து ஒரு வாகனத்தில் விநாயகர் சிலையை கொண்டு சென்றுள்ளனர்.

ஏரியில் நீருக்கு அடியில் 12 அடி ஆழத்தில் பள்ளம் இருப்பதை அறியாத 9 மாணவர்கள், ஆழமான பகுதியில் இறங்கியுள்ளனர். அதில் நீச்சல் தெரிந்த மாணவர்கள், நீச்சலடித்தும் அங்கிருந்த மற்றவர்களின் உதவியுடன் தப்பி தங்கள் உயிரை காப்பாற்றியுள்ளனர். நீச்சல் தெரியாத 6 மாணவர்கள் நீரில் மூழ்கி உயிரிழந்துள்ளனர்.

உயிரிழந்த மாணவர்கள் நரசிம்ம ராஜு (18), சுமந்த் (19), கணேஷ் (20), உதய குமார் (21), ஷாம் குமார் (18) மற்றும் சித்தார்த் (16) என அடையாளம் காணப்பட்டுள்ளனர்.

பட்டன்செருவு காவல்துறையினர், பேரிடர் மீட்புப் படை (DRF), தீயணைப்பு மற்றும் தேசிய பேரிடர் மீட்புப் படை (NDRF) குழுக்கள் இணைந்து 7 படகுகளைக் கொண்டு நடத்திய மீட்புப் பணியில் 2 மணி நேரத்திற்குப் பிறகு உடல்களை மீட்டு, பிரேத பரிசோதனைக்காக மருத்துவமனைக்கு அனுப்பி வைத்தனர்.

உயிரிழந்த 6 மாணவர்களின் குடும்பங்களுக்கு இரங்கல் தெரிவித்த தெலங்கானா முதலமைச்சர் ரேவந்த் ரெட்டி, அனைத்து விதமான உதவிகளையும் வழங்குமாறு, இந்தத் துயரச் சம்பவம் குறித்து முழுமையான விசாரணை நடத்தவும் மாவட்ட நிர்வாகத்திற்கு உத்தரவிட்டுள்ளார்.

இது குறித்து வழக்கு பதிவு செய்து காவல்துறையினர் நடத்திய விசாரணையில், சிரிஷா நினைவு அறக்கட்டளையின் நிர்வாகம், விநாயகர் சிலை கரைப்பதற்கு அனுமதி பெறவில்லை என்று தெரியவந்துள்ளது.

அறக்கட்டளையின் காப்பாளர் மாணவர்களுடன் சிலை கரைக்கப்படும்போதும் உடனிருந்தாலும், சிலை கரைப்பை மேற்பார்வையிட அவர் நீருக்குள் இறங்கவில்லை என தெரியவந்துள்ளது. இதனையடுத்து சிரிஷா நினைவு அறக்கட்டளையின் காப்பாளரை காவல்துறையினர் கைது செய்துள்ளனர்.

மருத்துவ மாணவிகள் தற்கொலை செய்துக் கொள்ளும் போக்கு சமீப காலமாக அதிகரித்து வருகிறது. புதுச்சேரியில் ஜிப்மர் மருத்துவக்கல்லூரி மருத்துவமனையில் எம்.டி. நுரையீரல் மருத்துவம் இறுதியாண்டு படித்து வந்த 26 வயது பெண் மருத்துவர் உயிரிழந்த சம்பவம் சோகத்தை ஏற்படுத்தியுள்ளது.

புதுச்சேரி வெங்கட்டா நகரில் பெற்றோருடன் வசித்து வந்த மாணவி, தேர்வுக்கு தயாராகி வந்ததாகவும், கடந்த சில நாட்களாக சோர்வாக காணப்பட்டதாகவும் கூறப்படுகிறது. சம்பவத்தன்று இரவு பெற்றோருடன் உணவு சாப்பிட்டுவிட்டு தனது அறைக்கு சென்றுள்ளார்.

மறுநாள் காலை நீண்ட நேரமாகியும் அறையை விட்டு வெளியே வராததால் பெற்றோர் சந்தேகமடைந்தனர். கதவை திறக்க முடியாத நிலையில், அக்கம் பக்கத்தினர் உதவியுடன் கதவு திறக்கப்பட்டபோது அவர் உயிரிழந்த நிலையில் சடலமாக மீட்கப்பட்டதாக போலீசாரின் விசாரணையில் தெரிய வந்துள்ளது.

தகவலறிந்து வந்த பெரியகடை போலீசார் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். முதற்கட்ட விசாரணையில், அவர் தற்கொலை செய்து கொண்டதாக போலீசார் தெரிவித்துள்ளனர்.

மேலும், அவரது அறையில் இருந்த டைரியில் எழுதப்பட்டிருந்த தற்கொலைக்கு முன்பான உருக்கமான கடிதமும் போலீசாருக்கு கிடைத்துள்ளது. அதில் தனது முடிவுக்கு யாரையும் பொறுப்பாக்க வேண்டாம் என்றும், பெற்றோர் மற்றும் நண்பர்கள் தன்னை மன்னிக்க வேண்டும் என்றும் அவர் எழுதியிருந்ததாக போலீசார் தரப்பில் தெரிவிக்கப்பட்டுள்ளது. இந்த சம்பவம் தொடர்பாக போலீசார் தொடர்ந்து விசாரணை நடத்தி வருகின்றனர்.

பெங்களூரு அருகே சுற்றுலா வந்த இடத்தில், 23 வயது இளம்பெண் ஒருவர், சாக்லெட் சாப்பிட்டு முடித்து விட்டுக் குளியலறைக்கு நடந்து சென்றுக் கொண்டிருந்த போதே திடீரென மயங்கி விழுந்து உயிரிழந்த சம்பவம் பெரும் சோகத்தையும் அதிர்ச்சியையும் ஏற்படுத்தியுள்ளது.

ஹாசன் மாவட்டத்தைச் சேர்ந்த 23 வயதான வர்ஷா என்ற இளம்பெண், தனது உறவினர் மற்றும் ஒரு நண்பருடன் சுற்றுலா செல்வதற்காக கடந்த செப்டம்பர் 11ம் தேதியன்று சக்லேஷ்பூரில் உள்ள விடுதி ஒன்றிற்கு வந்துள்ளார். அங்கு குளிக்கச் செல்வதற்கு முன்பு அவர் சாக்லெட் சாப்பிட்டுள்ளார்.

சாக்லெட் சாப்பிட்டுவிட்டு குளியலறையை நோக்கி நடந்து சென்று கொண்டிருந்த போது வர்ஷா திடீரென நிலை தடுமாறி மயங்கி விழுந்துள்ளார். உடனடியாக அவரை அருகிலுள்ள ஹெட்டூர் மருத்துவமனைக்கும், பின்னர் சக்லேஷ்பூர் அரசு மருத்துவமனைக்கும் கொண்டு சென்றனர். ஆனால், அவர் மருத்துவமனைக்கு வரும் வழியிலேயே இறந்து விட்டதாக மருத்துவர்கள் தெரிவித்தனர்.

பெங்களூருவிலிருந்து சுமார் 190 கி.மீ தொலைவில் உள்ள ஹாசனுக்கு வர்ஷா பயணம் மேற்கொண்டது அவரது பெற்றோருக்குத் தெரியும் என்று காவல்துறை விசாரணையில் தெரிய வந்துள்ளது.

மேலும், உயிரிழந்த வர்ஷாவின் உடலில் வெளிப்புறக் காயங்கள் எதுவும் இல்லை என்பது முதற்கட்ட விசாரணையில் உறுதி செய்யப்பட்டுள்ளது. அவருடன் சுற்றுலா வந்த ரகு மற்றும் தர்ஷன் ஆகிய இருவரிடமும் காவல்துறையினர் தீவிர விசாரணை நடத்தி வருகின்றனர்.

இச்சம்பவம் தொடர்பாகக் காவல்துறையினர் இயற்கைக்கு மாறான மரணம் என வழக்குப் பதிவு செய்துள்ளனர். வர்ஷாவின் மரணத்திற்கான உண்மையான காரணத்தைக் கண்டறிய அவரது உடல் பிரேதப் பரிசோதனைக்காக அனுப்பி வைக்கப்பட்டுள்ளது. பிரேதப் பரிசோதனை அறிக்கைக்குப் பின்னரே மரணத்திற்கான முழுமையான விவரங்கள் தெரியவரும்.