அமெரிக்காவின் மிசூரி மாகாணத்தில் நடந்த சாலை விபத்தில் தெலுங்கானாவை சேர்ந்த 31 வயது பெண் உயிரிழந்த சம்பவம் பெரும் சோகத்தை ஏற்படுத்தியுள்ளது.மகபூபாபாத் மாவட்டம் மரிபெடா மண்டலத்தை சேர்ந்த தரம் சுப்ரியா என்பவர் அமெரிக்காவின் செயின்ட் லூயிஸ் பகுதியில் வசித்து வந்தார்.
அங்கு உணவகம் ஒன்றை நடத்தி வந்ததாகவும், சம்பவத்தன்று இரவு பணியை முடித்துவிட்டு தோழியுடன் காரில் வீட்டுக்கு திரும்பிக் கொண்டிருந்ததாகவும் தகவல்கள் தெரிவிக்கின்றன.
அப்போது அவர்களது கார் மீது பின்னால் வந்த டிரக் மோதியதாக கூறப்படுகிறது. இதில் கார் கடுமையாக சேதமடைந்த நிலையில், சுப்ரியா சம்பவ இடத்திலேயே உயிரிழந்தார். அவருடன் காரில் பயணித்த மற்றொரு தெலுங்கானாவை சேர்ந்த பெண் படுகாயமடைந்து மருத்துவமனையில் அனுமதிக்கப்பட்டுள்ளார்.
விபத்து தொடர்பான முழுமையான விவரங்கள் குறித்து அமெரிக்க அதிகாரிகள் தொடர்ந்து விசாரணை நடத்தி வருகின்றனர். டிரக் மோதிய விதம் உள்ளிட்ட விபத்தின் காரணங்கள் குறித்த மேலதிக தகவல்கள் இன்னும் வெளியாகவில்லை.சுப்ரியா,
சுமார் 5 ஆண்டுகளுக்கு முன்பு மென்பொருள் துறையில் பணியாற்றி வரும் கொடுமுரி ரஞ்சித்தை திருமணம் செய்ததாகவும், இவர்களுக்கு இரண்டரை வயது மகன் இருப்பதாகவும் குடும்பத்தினர் தெரிவித்துள்ளனர்.
சுப்ரியாவின் உடலை அமெரிக்காவில் இருந்து சொந்த ஊருக்கு கொண்டு வந்து இறுதிச்சடங்கு செய்வதற்கு தெலுங்கானா அரசு உதவ வேண்டும் என்று அவரது தந்தை தரம் சீனிவாஸ் கோரிக்கை விடுத்துள்ளார். குடும்பத்தினர் தற்போது அமெரிக்க அதிகாரிகளிடம் இருந்து அடுத்தகட்ட தகவல்களை எதிர்பார்த்து வருகின்றனர்.
யாழ்ப்பாணப் பல்கலைக்கழகத்தின் 41ஆவது பொதுப் பட்டமளிப்பு விழாவில், ஊடகக் கற்கைகள் துறையில் சிறப்புத் தேர்ச்சி பெற்ற திருகோணமலையைச் சேர்ந்த மாணவி தனுஷ்கா சஞ்ஜீவவிற்கு, ஊடகத்துறையின் உயரிய கௌரவமான ‘அமரர் சகாதேவன் நிலக்சன் ஞாபகார்த்த தங்கப் பதக்கம்’ வழங்கிச் சிறப்பிக்கப்பட்டுள்ளது.
ஒக்டோபர் 6ஆம் திகதி முதல் 8ஆம் திகதி வரை ஒன்பது அமர்வுகளாக நடைபெற்று வரும் யாழ். பல்கலைக்கழகப் பட்டமளிப்பு விழாவின் இரண்டாம் நாளான இன்று (07.10.2026) இந்த மதிப்பார்ந்த தங்கப் பதக்கம் மாணவி தனுஷ்காவிற்கு வழங்கி கௌரவிக்கப்படுகிறது.
யாழ்ப்பாணப் பல்கலைக்கழக ஊடக வளங்கள் பயிற்சி மையத்தில் கல்வி பயின்று, சமூகத்தின் குரலாக ஒலித்த இளம் ஊடகவியலாளர் சகாதேவன் நிலக்சன். கடந்த 2007ஆம் ஆண்டு ஓகஸ்ட் 1ஆம் திகதி அதிகாலை வேளையில், நடைமுறையிலிருந்த கடுமையான இராணுவ ஊரடங்குச் சட்டத்திற்கு மத்தியில், அவரது வீட்டில் வைத்து பெற்றோரின் கண்முன்னாலேயே ஆயுததாரிகளால் கொடூரமாகச் சுட்டுப் படுகொலை செய்யப்பட்டார்.
அன்னாரின் நினைவை என்றென்றும் நிலைநிறுத்தும் உன்னத நோக்கோடு, யாழ். இந்துக் கல்லூரியின் 2004ஆம் ஆண்டு உயர்தர மாணவர்களான அவரது சக பாடசாலை நண்பர்களால் “நிலா நிதியம்” உருவாக்கப்பட்டது.
இந்நிதியத்தின் ஊடாக, யாழ். பல்கலைக்கழகத்தில் ஊடகத்துறையில் சிறந்து விளங்கும் மாணவர்களுக்குக் கடந்த எட்டு ஆண்டுகளாகத் தொடர்ச்சியாக இத்தங்கப் பதக்கம் வழங்கி வைக்கப்படுகின்றமை குறிப்பிடத்தக்கது.
திருகோணமலை, புனித மரியாள் கல்லூரியின் பழைய மாணவியான தனுஷ்கா சஞ்ஜீவ, 2019 உயர்தரப் பரீட்சையில் திருகோணமலை மாவட்டத்தில் 10ஆம் இடத்தைப் பெற்று யாழ். பல்கலைக்கழகத்தில் நுழைந்தார்.
ஊடகத்துறை மீதான தீராத தாகத்தால் அதனைச் சிறப்புக் கலையாகக் கற்ற அவர், தற்போதைய 43ஆம் அணியில் முதலிடத்தைப் பெற்றுள்ளார்.
தனது கற்கை நெறியின் போது, திருகோணமலை விவசாயக் கிராம மக்கள் எதிர்கொள்ளும் யானை-மனித மோதல் தொடர்பான ஆழமான ஆவணப்படத்தைத் தயாரித்தமை மற்றும் இலங்கை ஒலிபரப்புக் கூட்டுத்தாபனத்தில் செய்தி மற்றும் நிகழ்ச்சிப் பிரிவுகளில் திறம்படப் பணியாற்றியமை போன்ற பல செயன்முறை அனுபவங்களை அவர் தன்னகத்தே கொண்டுள்ளார்.
இவரின் சிறப்பான கல்வித் திறனால், தற்போது ஊடகக் கற்கைகள் துறையிலேயே தற்காலிக உதவி விரிவுரையாளராகப் பணியாற்றும் வாய்ப்பையும் பெற்றுள்ளார். தமக்குக் கிடைத்த இந்த உயரிய விருது குறித்துப் பகிர்ந்துகொண்ட மாணவி தனுஷ்கா சஞ்ஜீவ, தனது உணர்வுகளைப் பின்வருமாறு வெளிப்படுத்தினார்:
“சமூகத்தின் கண்ணாடியாகவும் மக்களின் குரலாகவும் திகழும் ஊடகங்களின் இயல்பையும், அதன் தாக்கத்தையும் எனக்கு ஆழமாகக் கற்றுத்தந்த ஊடகக் கற்கைகள் துறைக்கு முதற்கண் எனது நன்றிகள். விரிவுரையாளர்களின் வழிகாட்டல்களும், ஊடகத் துறைசார் ஆளுமைகளின் அனுபவப் பகிர்வுகளுமே எனது அறிவுப்புலத்தை மேலும் விஸ்தரிக்க உதவின.
“எனது கல்விக்கும், இலட்சியப் பயணத்திற்கும் எப்போதும் உற்ற துணையாக நிற்கும் எனது பெற்றோர் மற்றும் கணவருக்கும், என்னை முன்னகர்த்திய ஊடகக் கற்கைகள் துறையின் தலைவர் மற்றும் விரிவுரையாளர்களுக்கும் எனது இதயபூர்வமான நன்றிகள்.
குறிப்பாக, படுகொலை செய்யப்பட்ட ஊடகவியலாளர் அமரர் சகாதேவன் நிலக்சனின் ஞாபகார்த்தமாக வழங்கப்படும் இந்த மதிப்பார்ந்த தங்கப் பதக்கத்திற்கான நிதியத்தை யாழ்ப்பாணப் பல்கலைக்கழகத்திற்கு வழங்கி,
ஊடகத்துறையில் சாதிக்கும் மாணவர்களைக் கௌரவிப்பதற்குரிய உயர்ந்த வாய்ப்பினை ஏற்படுத்தித் தந்த ‘நிலா நிதியம்’ குழுவினருக்கும் எனது மனமார்ந்த நன்றிகளைத் தெரிவித்துக் கொள்கின்றேன்.
ரீல்ஸ் மோகத்தால் மக்கள் எல்லை மீறி சென்று ஆபத்தான முறையில் ரீல்ஸ் வீடியோக்களை எடுத்து சமூக வலைத்தளங்க்காளில் பதிவிட்டு வருவது அதிகரித்து வருகிறது.
இந்தியாவில் , தண்டவாளத்தில் நின்று கொண்டிருந்த ரயிலில் தனது புடவையின் தலைப்பை முடிச்சாக கட்டி, பெண் ஒருவர் ரீல்ஸ் வீடியோ எடுத்து நடனமாடிய காட்சி இணையத்தில் வெளியாகி பெரும் அதிர்ச்சியை ஏற்படுத்தியுள்ளது. அந்த வீடியோவில், சேலை மற்றும் கூலிங்கிளாஸ் அணிந்த பெண் ஒருவர் தண்டவாளத்தில் நிற்கிறார்.
அங்கு நின்று கொண்டிருந்த ரயிலின் இன்ஜின் பகுதியில் தனது புடவை தலைப்பை கட்டிவிட்டு, பாட்டுக்கு ஏற்ப பாலிவுட் பாணியில் ஆக்ஷன் செய்து தீவிரமாக நடனமாடுகிறார். குறித்த காணொளி சமூக வலைதளங்களில் வைரலானதை தொடர்ந்து, பொதுமக்கள் மற்றும் நெட்டிசன்கள் பலரும் தங்களது கடுமையான கண்டனங்களை பதிவிட்டு வருகின்றனர்.
“ரயில்வே தண்டவாளம் போன்ற ஆபத்தான பகுதிகளில் இதுபோன்று பொறுப்பற்ற முறையில் வீடியோ எடுப்பது சட்டப்படி தவறானது; இந்த வீடியோ குறித்து ரயில்வே அதிகாரிகள் உடனடியாக விசாரணை நடத்தி தகுந்த நடவடிக்கை எடுக்க வேண்டும்” எனப் பலரும் கோரிக்கை விடுத்துள்ளனர்.
ரயில் நிலையங்கள் மற்றும் தண்டவாளங்களில் இதுபோன்று ஆபத்தான முறையில் வீடியோக்கள் எடுப்பதைத் தவிர்க்க வேண்டும் என்றும், அத்துமீறி நுழைபவர்கள் மீது கடுமையான நடவடிக்கை எடுக்கப்படும் என்றும் ரயில்வே நிர்வாகம் தொடர்ந்து எச்சரித்து வருகின்றபோதும், ரீல்ஸ் மோகத்தால் யாரும் அதனை பொருட்படுத்துவதில்லை என இந்திய ஊடகங்கள் தெரிவித்துள்ளன.
கிளிநொச்சி உருத்திரபுரம் சிவநகர் பகுதியில் கடந்த முதலாம் திகதி சிறுமி ஒருவர் உயிரிழந்த சம்பவத்தில், மரணத்திற்கு காரணமானவர் என சந்தேகிக்கப்படும் நபர் கைது செய்யப்பட்டு உரிய நடவடிக்கை எடுக்கப்படவில்லை எனத் தெரிவித்து இன்று (07.10.2026) கவனயீர்ப்பு போராட்டம் முன்னெடுக்கப்பட்டுள்ளது.
பொது அமைப்புகளின் ஏற்பாட்டில் இடம்பெற்ற இந்தப் போராட்டம், கிளிநொச்சி ஏ-09 வீதியில் அமைந்துள்ள பழைய மாவட்டச் செயலகத்திற்கு முன்பாக இன்று காலை 9 மணியளவில் ஆரம்பமானது. இதனைத் தொடர்ந்து பேரணியாகச் சென்ற போராட்டக்காரர்கள் புதிய மாவட்ட செயலகத்தை சென்றடைந்தனர்.
பின்னர், சிறுமியின் மரணம் தொடர்பில் உரிய முறையில் விசாரணைகளை முன்னெடுத்து, சம்பவத்துடன் தொடர்புடையவர்களுக்கு எதிராக சட்ட நடவடிக்கை எடுக்க வேண்டும் என வலியுறுத்தி மனு ஒன்றும் கையளிக்கப்பட்டது.
மேலும், “கிளிநொச்சியில் சமரழகியின் சாவு கடைசியாக இருக்கட்டும்” என வலியுறுத்தியுள்ள போராட்டக்காரர்கள், சிறுவர் மற்றும் பெண்கள் பாதுகாப்பு, போதைப்பொருள் ஒழிப்பு உள்ளிட்ட விடயங்களில் உரிய நடவடிக்கைகளை மேற்கொள்ளுமாறு பொலிஸாருக்கும் அரசாங்கத்திற்கும் கோரிக்கை விடுத்துள்ளனர்.
இதேவேளை, சமரழகியின் மரண வாக்குமூலத்தில் மரணத்திற்கான காரணம் தெளிவாக குறிப்பிடப்பட்டிருந்த போதிலும், அது தொடர்பில் முறையான விசாரணைகளை முன்னெடுக்காமல் சந்தேகநபர் விடுவிக்கப்பட்டதாகவும் போராட்ட ஏற்பாட்டாளர்கள் குற்றம் சுமத்தியுள்ளனர்.
இந்த விடயம் தொடர்பில் விசாரணைக்கு வந்த பொலிஸார் மற்றும் மாவட்ட குற்றத்தடுப்பு பிரிவினர் தொடர்பாக கடந்த 05ஆம் திகதி முறைப்பாடு செய்யப்பட்டுள்ளதாகவும் தெரிவிக்கப்பட்டுள்ளது
ஹட்டன் – நோட்டன் பிரிட்ஜ் பிரதான வீதியின் விதுலிபுர பகுதியில் இன்று (07.10.2026 ) காலை இடம்பெற்ற வாகன விபத்தில், 14 வயதுடைய பாடசாலை மாணவன் ஒருவர் உயிரிழந்துள்ளார்.
தண்டுகலா தோட்டத்தின் கீழ்ப்பிரிவைச் சேர்ந்த, நோட்டன் பிரிட்ஜ் கணபதி தமிழ் வித்தியாலயத்தில் தரம் 9 இல் கல்வி கற்று வந்த ஜெயராம் போல்ராஜ் என்ற மாணவனே இவ்வாறு உயிரிழந்துள்ளார்.
இன்று காலை வீட்டிலிருந்து நோட்டன் பிரிட்ஜ் நோக்கி துவிச்சக்கர வண்டியில் பயணித்துக்கொண்டிருந்தபோது, ஹங்கராபிட்டிய பகுதியில் இருந்து ஹட்டன் நோக்கிபயணித்த இலங்கை போக்குவரத்துச் சபைக்கு சொந்தமான பேருந்து ஒன்றுடன் மோதியதில் இந்த விபத்து இடம்பெற்றுள்ளது.
விபத்தில் படுகாயமடைந்த மாணவன் வைத்தியசாலைக்கு கொண்டு செல்லப்பட்ட போதிலும் உயிரிழந்துள்ளதாக தெரிவிக்கப்படுகிறது.
மாணவனின் சடலம் தற்போது டிக்கோயா ஆதார வைத்தியசாலையில் வைக்கப்பட்டுள்ள நிலையில்,விபத்து தொடர்பில் நோட்டன் பிரிட்ஜ் பொலிஸார் மேலதிக விசாரணைகளை முன்னெடுத்து வருகின்றனர்.
மட்டக்களப்பு, சந்திவெளி பிரதேசத்தில் சுவர் இடிந்து விழுந்ததில் ஒருவர் உயிரிழந்துள்ளதுடன், மற்றுமொருவர் படுகாயமடைந்துள்ளதாக பொலிஸார் தெரிவித்தனர். குறித்த சம்பவமானது நேற்று (06.10.2026) இடம்பெற்றுள்ளது.
கிண்ணியடி வீதியைச் சேர்ந்த 48 வயதுடைய சாமித்தம்பி குமாரசிங்கம் எனும் மேசன் தொழிலாளியே இவ்வாறு பரிதாபகரமாக உயிரிழந்துள்ளார்.
சந்திவெளி பிரதான வீதியை அண்மித்த பகுதியில் புதிதாக நிர்மாணிக்கப்படும் வீடு ஒன்றுக்கு சம்பவ தினமான இன்று காலை இரு மேசன் தொழிலாளர்கள் கொங்கிறீட் கொட்டுவதற்காக சட்டிங் (பலகை) அமைக்கும் பணியில் ஈடுபட்டிருந்த போது எதிர்பாராத விதமாக சுவர் இடிந்து வீழ்ந்துள்ளது.
இதனையடுத்து படுகாயமடைந்த இருவரையும் அருகிலுள்ள சந்திவெளி வைத்தியசாலையில் அனுமதிக்கப்பட்ட நிலையில் கிண்ணையடியைச் சேர்ந்த சாமித்தம்பி குமாரசிங்கம் ஏற்கனவே உயிரிழந்ததாக வைத்தியர்கள் தெரிவித்ததுடன் படுகாயமடைந்த மற்றுமொருவர் மேலதிக சிகிச்சைக்காக மட்டக்களப்பு போதனா வைத்தியசாலைக்கு இட மாற்றப்பட்டுள்ளார். இது தொடர்பான மேலதிக விசாரணைகளை சந்திவெளி பொலிஸார் மேற்கொண்டு வருகின்றனர்.
வவுனியா – முல்லைத்தீவு பேருந்தில் சென்ற பெண் ஒருவரின் தாலிக்கொடி திருடப்பட்டுள்ளது. சம்பவம் தொடர்பில் தெரியவருவதாவது, தாலிக்கொடியை பாதுகாப்பாக வைத்திருக்க வேண்டும் என்பதற்காக, குறித்த பெண் அதனை தனது தோளில் தொங்கவிட்டிருந்த கைப்பைக்குள் வைத்திருந்ததாகத் தெரிவிக்கப்படுகிறது.
பேருந்து பயணித்துக் கொண்டிருந்தபோது, அவருக்கு தொலைபேசி அழைப்பு ஒன்று வந்துள்ளது. இதனையடுத்து அவர் தனது கைப்பையைத் திறந்து தொலைபேசியை எடுத்து உரையாடியுள்ளார். அப்போது பேருந்தில் பயணிகள் நெரிசலாக இருந்ததுடன், அரச உத்தியோகத்தர்கள் உள்ளிட்ட பலரும் நெருக்கமாகப் பயணித்ததாகத் தெரிவிக்கப்படுகிறது.
இந்த சந்தர்ப்பத்தை பயன்படுத்திக் கொண்டதாகக் கூறப்படும் பெண் ஒருவர், குறித்த பெண்ணுடன் நெருக்கமாக நின்றிருந்த நிலையில், அவரது கைப்பையை அவதானித்து, அதற்குள் இருந்த தாலிக்கொடியை திருடியதாக குறிப்பிடப்படுகின்றது.
சம்பவம் தொடர்பில் மேலதிக விசாரணைகள் இடம்பெறுவதாகத் தெரிவிக்கப்படுகிறது. பேருந்துகளில் பயணிக்கும் பெண்கள் தங்களது நகைகள் மற்றும் பெறுமதியான பொருட்களை மிகவும் அவதானமாகப் பாதுகாத்துக்கொள்ளுமாறு கேட்டுக்கொள்ளப்படுகின்றனர்.
முல்லைத்தீவு – துணுக்காய் கல்வி வலயத்துக்குட்பட்ட மாங்குளம் மகாவித்தியாலய மாணவர்களை ஏற்றிச் செல்ல மறுத்ததாக முன்வைக்கப்பட்ட குற்றச்சாட்டு தொடர்பில் வடக்கு மாகாண வீதிப் பயணிகள் போக்குவரத்து அதிகார சபை துரித நடவடிக்கை எடுத்துள்ளது.
பனிக்கன்குளம், கிளவன்குளம், திருமுறிகண்டி உள்ளிட்ட பகுதிகளைச் சேர்ந்த மாணவர்கள் பாடசாலை முடிவடைந்த பின்னர் பேருந்துக்காகக் காத்திருந்த நிலையில், ஆசிரியர்களை ஏற்றிச் சென்ற பேருந்து மாணவர்களை ஏற்ற மறுத்ததாக குற்றச்சாட்டு முன்வைக்கப்பட்டது. மேலும், பேருந்தில் ஏறிய மாணவி ஒருவர் தவறி விழ நேரிட்டதாகவும் தகவல்கள் வெளியாகியிருந்தன.
ஊடகங்களில் வெளியான தகவல்களைத் தொடர்ந்து மேற்கொள்ளப்பட்ட விசாரணையில், குறித்த பேருந்து இலங்கை போக்குவரத்துச் சபையின் கண்டி சாலைக்குரியது என அடையாளம் காணப்பட்டுள்ளது.
இதையடுத்து, சம்பந்தப்பட்ட சாரதியை தற்காலிகமாகப் பணியிலிருந்து இடைநிறுத்துவதற்கான நடவடிக்கை மேற்கொள்ளப்பட்டுள்ளதாக வடக்கு மாகாண வீதிப் பயணிகள் போக்குவரத்து அதிகார சபையின் தலைவர் பொறியியலாளர் சூ. விமலேஸ்வரன் தெரிவித்துள்ளார்.
மேலும், எதிர்காலத்தில் பயணிகளுக்கும் குறிப்பாக மாணவர்களுக்கும் அசௌகரியம் ஏற்படுத்தும் வகையில் செயற்படும் சாரதிகள் மற்றும் நடத்துநர்கள் மீது கடுமையான நடவடிக்கை எடுக்கப்படும் எனவும் தெரிவிக்கப்பட்டுள்ளது.
சபரகமுவ பல்கலைக்கழகத்தின் தொழில்நுட்ப பீடத்தில் இரண்டாம் ஆண்டில் கல்வி பயின்ற 23 வயதான மாணவரின் உயிரிழப்புக்கு, பல்கலைக்கழகத்தில் இடம்பெற்ற பகிடிவதை சம்பவம் காரணமாக இருந்ததாக முன்வைக்கப்பட்ட குற்றச்சாட்டை அடுத்து, 11 மாணவர்களை பல்கலைக்கழகத்திலிருந்து நிரந்தரமாக நீக்க அதன் நிர்வாக சபை தீர்மானித்துள்ளது.
குறித்த மாணவருக்கும் ஏனைய மாணவர்களுக்கும் துன்புறுத்தல், உடல் மற்றும் உள ரீதியான அச்சுறுத்தல்கள் உள்ளிட்ட கடுமையான ஒழுக்காற்று விதிமீறல்கள் தொடர்பான விசாரணை அறிக்கை கடந்த வாரம் வெளியிடப்பட்டது.
இதன்படி, குறித்த மாணவர்களின் பல்கலைக்கழகப் பதிவு நிரந்தரமாக இரத்து செய்யப்பட்டுள்ளதுடன், பல்கலைக்கழக வளாகம், விடுதிகள் உள்ளிட்ட பல்கலைக்கழகத்துக்குச் சொந்தமான எந்தவொரு இடத்திற்கும் துணைவேந்தரின் எழுத்துமூல அனுமதியின்றி நுழையவும் தடை விதிக்கப்பட்டுள்ளது. முன்னதாக, சரித் திலீஷான் தனது வீட்டில் தனது உயிரை மாய்த்துக் கொண்டார்.
பல்கலைக்கழகத்தில் இடம்பெற்ற கடுமையான பகிடிவதை மற்றும் உடல், உள ரீதியான துன்புறுத்தல்களை தாங்கிக்கொள்ள முடியாத நிலையிலேயே அவர் இந்த முடிவை எடுத்ததாக அவரது பெற்றோர் தெரிவித்திருந்தனர்.
இந்த சம்பவம் தொடர்பில் காவல்துறையினரும், குற்றப் புலனாய்வுத் திணைக்களமும் விசாரணைகளை முன்னெடுத்திருந்த நிலையில், பகிடிவதை சம்பவத்துடன் தொடர்புடையதாகக் கூறப்படும் 14 மாணவர்கள் கைது செய்யப்பட்டு, அவர்களுக்கு எதிராக வழக்கும் தொடரப்பட்டிருந்தது.
திருகோணமலை – மட்டக்களப்பு பிரதான வீதியில் இன்று (07.10.2026) காலை கோர விபத்தொன்று இடம்பெற்றுள்ளது. ஆண்டான்குளம் பகுதியில் பயணித்துக்கொண்டிருந்த வாகனங்களே ஒன்றன்பின் ஒன்றாக மோதியுள்ளன.
இதில் சுகாதார சேவைகள் திணைக்களத்துக்குச் சொந்தமான பேருந்து, வேன் மற்றும் முச்சக்கர வண்டி ஆகியவை விபத்தில் சிக்கியுள்ளன. ஆனால், அதிர்ஷ்டவசமாக இந்த விபத்தில் எவருக்கும் காயங்கள் ஏற்படவில்லை.
சம்பவம் தொடர்பான மேலதிக விசாரணைகளை திருகோணமலை – உப்புவெளி பொலிஸார் முன்னெடுத்து வருகின்றனர்.
2026 சட்டமன்றத் தேர்தலில் தமிழக வெற்றிக் கழகம் வெற்றி பெற்று அக்கட்சியின் தலைவர் ஜோசப் விஜய் தமிழ்நாட்டில் முதலமைச்சராக மாறியிருக்கும் நிலையில் இந்த கட்சிக்கு எதிராகவும் அவரின் வெற்றிக்கு எதிராகவும் சிலர் நீதிமன்றத்தில் வழக்கு தொடர்ந்துள்ளதாக இந்திய ஊடகங்க்கள் தெரிவித்துள்ளன.
பெரம்பூர் தொகுதியில் முதல்வர் விஜய் போட்டியிட்டபோது வேட்புமனுவில் தனது சொத்து விவரங்களை முழுமையாக தெரிக்கவில்லை எனக்கூறி சென்னை உயர்நீதிமன்றத்தில் வழக்கு தொடரப்பட்டுள்ளது. ஆனால், தான் வெற்றி பெற்றதை எதிர்த்து தொடரப்பட்ட தேர்தல் வழக்குகளை நிராகரிக்க வேண்டும் என முதல்வர் விஜய் தரப்பில் சென்னை உயர்நீதிமன்றத்தில் மனு தாக்கல் செய்யப்பட்டது.
அப்போது 600 கோடிக்கு மேல் தனக்கும் தனது மனைவிக்கும் சொந்தமான சொத்துக்கள் உள்ளதாக வேட்பு மனுவில் விஜய் தெரிவித்துள்ளார். அத்துடன் , குற்றச்சாட்டுகளுக்கு ஆதாரங்கள் இல்லாமல் தாக்கல் செய்யப்பட்டுள்ள தேர்தல் வழக்குகளை நிராகரிக்க வேண்டும் எனவும் முதல்வர் விஜய் தரப்பு வழக்கறிஞர் வாதத்தை முன் வைத்தார்.
கிளிநொச்சி – உருத்திரபுரம் பகுதியில் சிறுமி ஒருவர் உயிரிழந்த சம்பவம் தொடர்பில் நீதியான விசாரணை கோரி இன்று (07.10.2026) கவனயீர்ப்புப் போராட்டம் ஒன்று முன்னெடுக்கப்பட்டுள்ளது.
கடந்த முதலாம் திகதி உருத்திரபுரம் பகுதியில் 17 வயது சிறுமி ஒருவர் தனது உயிரை மாய்த்துக் கொண்ட சம்பவம் ஒன்று பதிவானது. அத்துடன் உயிரிழந்த சிறுமி எழுதியதாக சந்தேகிக்கப்படும் கடிதம் ஒன்றும் மீட்கப்பட்டிருந்தது.
தன்னுடைய படம் ஒன்றைக் காட்டி, தன்னை தவறான உறவுக்கு வருமாறு அயல்வீட்டு இளைஞர் ஒருவர் வற்புறுத்தி வந்ததாக உயிரிழந்த சிறுமி அந்தக் கடிதத்தில் எழுதியிருந்ததாகக் கூறப்படுகின்றது.
எனினும் இந்தச் சம்பவத்துடன் தொடர்புடைய நபர் இன்னும் கைது செய்யப்படவில்லை எனத் தெரிவிக்கப்படுகின்றது. இதனால் குறித்த சந்தேகநபரை உடனடியாகக் கைது செய்வதுடன் நீதியான விசாரணைகளையும் முன்னெடுக்க வேண்டும் எனக் கோரி, உருத்திரபுரம் பொது அமைப்புகளின் ஏற்பாட்டில் கவனயீர்ப்புப் போராட்டம் ஒன்று இன்று முன்னெடுக்கப்பட்டது.
பழைய மாவட்ட செயலக வளாகத்திற்கு முன்பாக இடம்பெற்ற இந்தக் கவனயீர்ப்புப் போராட்டத்தில் ஈடுபட்டவர்கள் பேரணியாகச் சென்று தமது கோரிக்கைகள் அடங்கிய மனுவை மாவட்ட மேலதிக அரசாங்க அதிபர் நளாயினி இன்பராஜிடம் கையளித்திருந்தனர்.
வவுனியா ஓமந்தை கொம்புவைத்தகுளம் பகுதியில் பொருத்தப்பட்டிருந்த மின்மாற்றியை (திரான்ஸ்போமர்) இனம் தெரியாத நபர்கள் அகற்றியதுடன் அதில் இருந்த பெறுமதியான உபகரணங்களை திருடிச்சென்ற சம்பவம் ஒன்று இடம்பெற்றுள்ளது.
குறித்த பகுதியில் பொருத்தப்பட்டிருந்த மின்மாற்றி அகற்றப்பட்டிருப்பதாக இலங்கை மின்சாரசபைக்கு தகவல் தெரிவிக்கப்பட்டிருந்தது. சம்பவ இடத்திற்கு சென்ற மின்சாரபையின் அதிகாரிகள் சம்பவம் தொடர்பாக பொலிசாருக்கு முறைப்பாடு வழங்கியிருந்தனர்.
சம்பவ இடத்திற்கு சென்ற ஓமந்தை பொலிசார் தடயவியல் பொலிசாரின் உதவியுடன் தீவிர விசாரணைகளை முன்னெடுத்துள்ளனர். குறித்த மின்மாற்றியானது மின்சாரதூணில் இருந்து அகற்றப்பட்டு, உடைக்கப்பட்டு அதில் இருந்த பெறுமதியான இலத்திரனியல் உபகரணங்கள் திருடிச்செல்லப்பட்டுள்ளமை குறிப்பிடத்தக்கது.
வடக்கு, வடமத்திய, கிழக்கு, வடமேல் மாகாணங்கள் மற்றும் மொனராகலை மாவட்டத்திற்கு நாளை (06) வரை செல்லுபடியாகும் வகையில் வளிமண்டலவியல் திணைக்களம் வெப்பமான வானிலை பற்றிய அறிவுறுத்தலை வெளியிட்டுள்ளது.
குறிப்பிட்ட அந்த அறிவுறுத்தலின்படி, 13 மாவட்டங்களுக்கு எச்சரிக்கை மட்ட வெப்ப அனல் எச்சரிக்கைகள் விடுக்கப்பட்டுள்ளன.
குறிப்பிடப்பட்ட மாகாணங்கள் மற்றும் மாவட்டங்களில் சில இடங்களில் பகல் வேளையில் மனித உடலில் உணரப்படும் வெப்பத்தின் அளவான வெப்பச் சுட்டெண் (Heat Index) ‘எச்சரிக்கை மட்டம்’ வரை அதிகரிக்கக்கூடும் என்று வளிமண்டலவியல் திணைக்களம் எச்சரித்துள்ளது.
முல்லைத்தீவு மாவட்டத்தின் துணுக்காய் கல்வி வலயத்துக்குட்ப்பட்ட மாங்குளம் மகாவித்தியாலயத்தில் கல்வி பயிலும் பனிக்கன்குளம், கிழவன்குளம், திருமுறிகண்டி உள்ளிட்ட பகுதிகளை சேர்ந்த மாணவர்களை பேருந்து சாரதி ஏற்றிச் செல்ல மறுத்துள்ளார்.
மாணவர்கள், ஏ 9 வீதியில் பலநூற்றுக்கணக்கான பேருந்துகள் பயணம் செய்கின்ற போதும் உரிய நேரத்தில் பாடசாலை செல்லவோ பாடசாலையில் இருந்து வீடுசெல்லவோ முடியாத நிலை பல வருடகாலமாக காணப்படுவதாக குற்றம் சுமத்தப்பட்டுள்ளது.
இவ்வாறான பின்னணியில் நேற்று மாங்குளம் மகாவித்தியாலயம் முன்பாக உள்ள பேருந்து தரிப்பிடத்தில் பாடசாலை முடிந்து ஆசிரியர்கள், மாணவர்கள் காத்திருந்துள்ளனர்.
இதன்போது, இலங்கை போக்குவரத்து சபைக்கு சொந்தமான பேருந்து ஒன்று ஆசிரியர்களை மாத்திரம் பேருந்தில் ஏற்றிவிட்டு மாணவர்களை ஏற்றாது செல்ல முற்பட்டபோது மாணவர்களை ஏற்றுமாறு கோரப்பட்டுள்ளது.
இருப்பினும், அந்த சாரதி மாணவர்களை ஏற்ற முடியாது என தெரிவித்து பேருந்தில் ஏறிய மாணவர்களை ஏறமுடியாத அளவில் பேருந்தை எடுத்துச் சென்றுள்ளார்.
இதன்போது, பேருந்தில் ஏறிய மாணவி ஒருவர் தவறி விழ நேரிட்ட நிலையில் நடத்துனரால் காப்பாற்றப்பட்டுள்ளார். இவ்வாறான சாரதிகளுக்கு எதிராக உரிய நடவடிக்கை எடுக்க வேண்டும் எனவும் பலவருடங்களாக தொடரும் இந்த பிரச்சினைக்கு தீர்வு காண வேண்டும் என கோரிக்கை முன்வைக்கப்பட்டுள்ளது.
இம்மாத இறுதி வரை எரிபொருள் விலையை உயர்த்தாமல் தற்போதைய விலையிலேயே பராமரிக்க முடியும் என்று இலங்கை பெட்ரோலிய கூட்டுத்தாபனத்தின் தலைவர் டி.ஜே. ராஜகருண தெரிவித்துள்ளார்.
இன்று (06.10.2026) நடைபெற்ற ஊடக சந்திப்பில் உரையாற்றிய போது அவர் இதனை குறிப்பிட்டுள்ளார். அடுத்த மூன்று மாதங்களில் பெரிய பிரச்சினை எதுவும் ஏற்படாத பட்சத்தில், தற்போதைய எரிபொருள் விலையையும் விநியோக நிலையையும் பராமரிக்க முடியும் என்று கூறியுள்ளார்.
இதேவேளை, எரிபொருள் நிறுவனங்களால் எரிபொருள் விநியோகம் குறைக்கப்படுவதால், சில பகுதிகளில் தற்காலிக எரிபொருள் பற்றாக்குறை ஏற்படக்கூடும் என்றும் அவர் குறிப்பிட்டுள்ளார்.
அத்தகைய நிலைமை ஏற்படக்கூடிய சுமார் 62 பகுதிகள் மூன்று வாரங்களுக்கு முன்பு அடையாளம் காணப்பட்டதாகவும், அப்பகுதிகளுக்கு அதிக எரிபொருளை விடுவிப்பதற்காக சம்பந்தப்பட்ட நிறுவனங்களுடன் ஒரு உடன்பாடு எட்டப்பட்டுள்ளதாகவும் தெரிவித்துள்ளார்.
மேலும், எரிபொருள் பற்றாக்குறை குறித்தும் எரிபொருள் நிரப்பும் நிலையங்களில் வரிசையில் காத்திருப்பது குறித்தும் பொதுமக்கள் தேவையற்ற கவலை கொள்ள வேண்டாம் என்றும் அவர் கேட்டுக்கொண்டுள்ளார்.
இதற்கிடையில், இலங்கை பெட்ரோலியக் கூட்டுத்தாபனத்தின் எரிபொருள் கையிருப்பில் எந்தப் பிரச்சினையும் இல்லை என்றும், ஒவ்வொரு செவ்வாய்க்கிழமையும் எரிபொருள் கையிருப்பு குறித்த ஆய்வு நடத்தப்படுகின்றது என்றும் அவர் கூறியுள்ளார்.
இந்த ஆய்வின்போது, மேலும் இரண்டு எரிபொருள் கப்பல்களை அவசரமாக இறக்குமதி செய்ய நடவடிக்கை எடுக்கப்பட்டுள்ளதாகவும், இந்த மாதத்திற்குத் தேவையான அளவைத் தாண்டி கூடுதல் எரிபொருளை இறக்குமதி செய்ய நடவடிக்கை எடுக்கப்பட்டுள்ளதாகவும் இலங்கை பெட்ரோலியக் கூட்டுத்தாபனத்தின் தலைவர் மேலும் குறிப்பிட்டுள்ளார்.
