கடந்த பெப்ரவரி மாதம் அல்லைப்பிட்டி பகுதியில் பொலிசாரின் துப்பாக்கிச் சூட்டுக்குப் பலியான அ.அருள்பாயஸ் என்ற சிறுவனின் கொலைக்கு நீதி வேண்டி இன்று (10) ஊர்காவற்றுறை பொலிஸ் நிலையம் முன்பாக போராட்டம் ஒன்று முன்னெடுக்கப்பட்டது.

மனித உரிமை ஆர்வலர் அமைபினரால் முனெடுக்கப்பட்ட குறித்த போராட்டத்தில் சிறுவனின் உறவுகள் மற்றும் ஏனையோர் கலந்துகொண்டு, பொலிசாருக்கு எதிரான கோசங்கள் தாங்கிய பதாகைகளுடன் குறித்த போராட்டம் முன்னெடுக்கப்பட்டது.

பொலிசாரின் செயலைக் கண்டித்து

குறிப்பாக குறித்த போராட்டம் ஊர்காவற்றுறை நீதிமன்றின் முன்பாக காலை 11 மணிக்கு ஆரம்பமானது.

போராட்டம் ஆரம்பமான சில நிமிடங்களில் நீதிமன்ற பொலிசாரால் நீதுமன்றுக்கு முன்பாக போராட்டம் நடத்த முடியாது எனக் கூறி நீதிமன்ற வளாகத்தை கடந்து போராட்டத்தை முன்னெடுக்குமாறு வலியுறுத்தப்பட்டது.

பொலிசாரின் கோரிக்கையை ஏற்ற போராட்டக்காரர்கள் பின்பு ஊர்காவற்றுறை பொலிஸ் நிலையம் முன்பாக ஒன்றுகூடி போராட்டத்தை முன்னெடுத்தனர்.

இதன்போது பொலிசாரின் செயலைக் கண்டித்து பல்வேறு சுலோங்கள் எழுதப்பட்ட பதாகைகளை தாங்கி,

கோசமிட்டு தமது எதிர்ப்பை காட்டிய போராட்டக்காரர்கள் குறித்த கொலைக்கு காரணமான பொலிசாரை தண்டிக்க வேண்டும் என்றும் குறிப்பாக தனது மகனை பொலிஸ் நிலைய பொறுப்பதிகாரியே சுட்டதாக குற்றம் சாட்டினர்.

அத்துடன் மிலேச்சத்தனமான கொலைகளை பொலிசார் இனியொரு தடவை மேற்கொள்ளக் கூடாது என்று வலியுறுத்தியதுடன் நியாயமான தீர்வு வழங்கப்பட வேண்டும் என்றும் வலியுறுத்தினர்.

முன்னதாக கடந்த 10 ஆம் திகதி அதிகாலை 1.15 மணியளவில் வேலணை –

அல்லைபிட்டிப் பகுதியில் உத்தரவை மீறி கடமையில் இருந்த பொலிசாரை மோதிவிட்டு தப்பிச்செல்ல முற்றட்ட ஹயஸ் ரக வாகனம் மீதே தாம் துப்பாக்கிச் சூடு நடத்தியதாகவும் அதன் போதே குறித்த 17 வயது இளைஞர் ஒருவர் உயிரிழந்ததாகவும் பொலிசார் தெரிவித்தனர்.

கொழும்பு செட்டியார்தெரு தகவல்களின் படி இன்றைய தினம் (11.03.2026) 24 கரட் தங்கப்பவுணொன்றின் விலை 415000 ரூபாவாக பதிவாகியுள்ளது. அத்துடன் 22 கரட் தங்கப் பவுணொன்றின் விலை 383800 ரூபாவாக காணப்படுகிறது.

உலக சந்தையில் ஒரு அவுண்ஸ் தங்கத்தின் விலை 5204.67 அமெரிக்க டொலராக பதிவாகியுள்ளது. சர்வதேச சந்தையில் ஏற்பட்டுள்ள பொருளாதார மாற்றங்கள் மற்றும் மத்திய கிழக்கில் நிலவும் போர்ச் சூழலில் ஏற்பட்டுள்ள புதிய நகர்வுகள் காரணமாக, தங்கம் மற்றும் வெள்ளியின் விலை இன்றைய தினம் வீழ்ச்சியைப் பதிவு செய்துள்ளதாக தகவல்கள் தெரிவிக்கின்றன.

டொலரின் மதிப்பு வலுவடைந்துள்ளதும், முதலீட்டாளர்கள் லாபமீட்டலில் (Profit-booking) ஈடுபட்டுள்ளதும் இந்த சரிவுக்கு முக்கிய காரணமாகக் கருதப்படுகிறது.

இதேவேளை வெள்ளியின் விலையிலும் சரிவு காணப்படுகிறது. இன்றைய தினம் ஒரு அவுண்ஸ் வெள்ளி 88.31 அமெரிக்க டொலராக விற்பனை செய்யப்படுகிறது.

தற்போது சர்வதேச சந்தையில் ஏற்பட்டுள்ள இந்த விலை வீழ்ச்சி காரணமாக, கொழும்பு செட்டியார்தெரு மற்றும் ஏனைய உள்நாட்டுத் தங்கச் சந்தைகளிலும் இன்றைய தினம் தங்கத்தின் விலையில் குறிப்பிடத்தக்க அளவு சரிவு ஏற்படும் என எதிர்பார்க்கப்படுகிறது.

இலங்கையில் எரிபொருள் நுகர்வைக் குறைப்பதற்காகப் பொருளாதார நடவடிக்கைகளைக் கட்டுப்படுத்தும் எண்ணம் இல்லை என்று அரசாங்கம் திட்டவட்டமாகத் தெரிவித்துள்ளது.

மத்திய கிழக்கில் நிலவும் போர் பதற்றத்தால் உலகச் சந்தையில் எரிபொருள் விலை உச்சத்தை எட்டியுள்ள போதிலும், பொருளாதார நடவடிக்கைகள் முடக்கப்படாது என தெரிவித்துள்ளார்.

அமைச்சரவைப் பேச்சாளர் அமைச்சர் நளிந்த ஜயதிஸ்ஸ இது குறித்த விளக்கத்தை அளித்துள்ளார்.

பாகிஸ்தான் மற்றும் பங்களாதேஷ் போன்ற நாடுகள் எரிபொருள் நெருக்கடியைச் சமாளிக்க பாடசாலைகள், பல்கலைக்கழகங்களை மூடுதல் மற்றும் ‘வீட்டிலிருந்து வேலை’ (Work From Home) போன்ற முறைகளை அறிமுகப்படுத்தியுள்ளன.

இது போன்ற நடவடிக்கைகள் இலங்கையிலும் எடுக்கப்படுமா என்ற கேள்விக்கு அமைச்சர் பதிலளித்துள்ளார்.

பொருளாதாரத்தின் ஒரு பகுதியை முடக்குவதன் மூலம் எரிபொருள் நுகர்வைக் குறைக்க அரசாங்கம் எதிர்பார்க்கவில்லை எனவும் நாட்டில் தொடர்ச்சியான எரிபொருள் விநியோகத்தைப் பேணுவதே எமது இலக்கு எனவும் தெரிவித்துள்ளார்.

கடந்த சில நாட்களில் இலங்கையில் எரிபொருள் நுகர்வு பாரியளவில் அதிகரித்துள்ளதாக அமைச்சர் சுட்டிக்காட்டியுள்ளார்.

எம்பிலிப்பிட்டிய பிரதேசத்தில் பகல்நேர பராமரிப்பு நிலையம் ஒன்றில் இருந்த 18 மாதக் குழந்தை ஒன்று, அங்கிருந்த குளத்தில் விழுந்து உயிரிழந்துள்ள சம்பவம் ஒன்று பதிவாகியுள்ளது.

மெதமுலன, கதமடித்த பிரதேசத்தைச் சேர்ந்த 18 மாதக் குழந்தையான எயோன் தீசர அவிநாத் என்பவரே இவ்வாறு உயிரிழந்துள்ளார். குழந்தையின் தாய், குழந்தையைப் பராமரிப்பு நிலையத்தில் ஒப்படைத்துவிட்டு தனது வேலைக்குச் சென்றுள்ளார்.

அதன் பின்னர் பராமரிப்பு நிலையத்தின் காப்பாளர் தாயைத் தொடர்புகொண்டு மித்தெனிய காரியமடித்த வைத்தியசாலைக்கு வருமாறு கோரியுள்ளார்.

அங்கு சென்ற பின்னரே தனது மகன் குளத்தில் விழுந்து உயிரிழந்த செய்தியை அந்தத் தாய் அறிந்துள்ளார்.

குழந்தையின் பாதுகாப்பு விடயத்தில் கவனக்குறைவாகச் செயற்பட்ட குற்றச்சாட்டின் கீழ், குறித்த பராமரிப்பு நிலையத்தின் காப்பாளர் எம்பிலிப்பிட்டிய தலைமையகப் பொலிஸாரால் கைது செய்யப்பட்டு விளக்கமறியலில் வைக்கப்பட்டுள்ளார்.

எதிர்வரும் செப்டெம்பர் மாதத்திற்குள் மின் கட்டணங்களை 20 முதல் 30 சதவீதம் வரை அதிகரிக்க வேண்டியிருக்கும் என நாடாளுமன்ற உறுப்பினர் டி.வி.சானக தெரிவித்துள்ளார். கொழும்பில் வைத்து அவர் இந்த விடயத்தை அவர் கூறியுள்ளார்.

மேலும் தெரிவிக்கையில், தற்போதைய அரசாங்கம் வழக்கமாக ஏப்ரல் மாதத்தில் அழைக்கப்படும் நிலக்கரி டெண்டரை நான்கு மாதங்கள் தாமதப்படுத்தியுள்ளது. தகுதிகளைத் தளர்த்தி நட்பு நிறுவனங்களுக்கு வாய்ப்பளித்துள்ளது.

42 நாள் டெண்டர் காலம் 21 நாட்களாகக் குறைக்கப்பட்டு செயற்கையான அவசரம் உருவாக்கப்பட்டாலும், டெண்டரை இரண்டு மாதங்கள் வழங்குவதில் எந்த அவசரமும் இல்லை என்பது தெளிவாகிறது. இது ஊழல் தடுப்புச் சட்டத்தின் கீழ் ஒரு குற்றமாகும்.

தேவையான 38 நிலக்கரி கப்பல்களுக்குப் பதிலாக, இந்த முறை குறைந்த எண்ணிக்கையிலான கப்பல்களை மட்டுமே இறக்குமதி செய்ய முடியும்.

நிலக்கரி பற்றாக்குறை காரணமாக, ஜூலை முதல் செப்டெம்பர் வரை டீசலைப் பயன்படுத்தி மின்சாரம் தயாரிக்க வேண்டியிருக்கும். மேலும் ஒவ்வொரு கப்பலுக்கும் சுமார் 500 மில்லியன் ரூபாய் செலவிட வேண்டியிருக்கும்.

குறைந்த விலையில் நிலக்கரி வழங்கப்படும் என்று கூறப்பட்டாலும், தரமற்ற நிலக்கரியைப் பெற்றதால் அரசுக்கு கடுமையான இழப்பு ஏற்பட்டுள்ளது என குறிப்பிட்டுள்ளார்.

மத்திய கிழக்கில் போரை அடுத்து ஏற்பட்டுள்ள எரிசக்தி நெருக்கடியைச் சமாளிக்க, முடிந்தவரை சிக்கனமாக எரிபொருளை பயன்படுத்துமாறு இலங்கை பெட்ரோலிய கூட்டுத்தாபனத்தின் தலைவர் டி.ஜே. ராஜகருணா பொதுமக்களிடம் வேண்டுகோள் விடுத்துள்ளார்.

எரிபொருள் விலை உயர்வு குறித்து இன்று (10) ஊடகங்களுக்கு கருத்து தெரிவித்த அவர், எரிபொருள் பயன்பாட்டை முடிந்தவரை குறைக்க நடவடிக்கை எடுக்க வேண்டும் என்றும் குறிப்பிட்டுள்ளார்.

எரிபொருள் பற்றாக்குறை

எரிபொருள் பற்றாக்குறை ஏற்படும் என்ற அச்சத்தில் கடந்த சில நாட்களாக மக்கள் அதிகமாக எரிபொருளை வாங்கியமை இந்த விலை உயர்வுக்கு குறிப்பிடத்தக்க தாக்கத்தை ஏற்படுத்தியதாக கூறியுள்ளார்.

எரிபொருளை சிக்கனமாக வாங்கியிருந்தால் இந்த மாத இறுதி வரை இருந்த விலையில் எரிபொருளை வாங்க முடிந்திருக்கும் என்றும் அவர் தெரிவித்துள்ளார்.

இருப்பினும், தற்போதைய எரிபொருள் நெருக்கடி முழு உலகையும் பாதித்து வருவதால், கூட்டு நடவடிக்கை எடுக்காவிட்டால் கடுமையான ஆபத்துகளை எதிர்கொள்ள நேரிடும் என்பதால், நுகர்வை மட்டுப்படுத்துமாறு பொதுமக்களிடம் மீண்டும் ஒருமுறை கேட்டுக்கொள்வதாக வேண்டுகோள் விடுத்துள்ளார்.

எதிர்வரும் மாதங்களில் எரிபொருள் விலையில் ஏற்படவுள்ள திடீர் அதிகரிப்பைக் தடுக்கும் நோக்கில் நோக்கில் நேற்று நள்ளிரவு முதல் எரிபொருளின் விலையை அதிகரித்ததாக பெட்ரோலிய மொத்த விற்பனை முனையங்கள் நிறுவனத்தின் நிர்வாக இயக்குநர் மயூர நெத்தி குமார தெரிவித்துள்ளார்.

இன்றையதினம் இடம்பெற்ற ஊடகவியலாளர் சந்திப்பின் போதே அவர் மேற்கண்டவாறு குறிப்பிட்டுள்ளார். மேலும், நாட்டில் ஏற்படுத்தப்பட்ட திடீர் எரிபொருள் விலை உயர்வுக்கான காரணங்களையும் அவர் இதன்போது விளக்கினார்.

இது குறித்து அவர் மேலும் தெரிவிக்கையில், அடுத்து வரும் மாதங்களில் எரிபொருள் விலை திடீரென உயர்வதைத் தடுக்கும் வகையில் இந்த நடவடிக்கை எடுக்கப்பட்டது.

பொதுவாக, கடந்த மாத எரிபொருள் விலையில் ஏற்படும் மாற்றங்களை அடிப்படையாகக் கொண்டு விலை நிர்ணயம் செய்யப்படும். தற்போது எங்களிடம் 30 நாட்களுக்குத் தேவையான எரிபொருள் இருப்பு நிலையாக உள்ளது.

எனினும், அடுத்த மாதத்திற்காக வரவிருக்கும் கப்பல்களில் உள்ள எரிபொருளின் விலை பெருமளவில் அதிகரித்து வருகின்றது.

இந்த நிலையில் எங்களிடம் தற்போது உள்ள எரிபொருள் இருப்பைப் பாதுகாக்கும் அதேவேளை, விலையைச் சமநிலைப்படுத்துவதற்கும் நாங்கள் எதிர்பார்த்துள்ளோம்.

அதன்படி, எரிபொருள் விலையில் திடீர் அதிகரிப்பைத் தடுக்கவும், கிடைக்கக்கூடிய இருப்புகளை மாதங்களுக்கு இடையில் சமநிலையில் பேணுவதற்கும், விலைகளை அதிகரித்தோம்.

மேலும், உலக சந்தையில் விலை குறைந்தால் அடுத்த சில நாட்களுக்குள் எமது நாட்டிலும் எரிபொருளின் விலையை நிச்சயமாகக் குறைக்க முடியும் என குறிப்பிட்டுள்ளார்.

மத்திய கிழக்கில் ஏற்பட்டுள்ள பதற்றநிலை காரணமாக சர்வதேச சந்தையில் தங்கம் மற்றும் வெள்ளியின் விலை ஏற்ற, இறக்கத்துடன் பதிவாகி வருகின்றது.

அதன்படி, உலக சந்தையில் ஒரு அவுன்ஸ் தங்கத்தின் விலை இன்று 5,159 அமெரிக்க டொலர்களாக பதிவாகியுள்ளது. இதேவேளை, வெள்ளியின் விலையும் அதிகரிப்பை பதிவு செய்து 88.15 அமெரிக்க டொலர்களாக விற்பனையாகின்றது.

அந்தவகையில், இலங்கையில் தங்கத்தின் விலை நேற்றைய தினத்துடன் ஒப்பிடுகையில் இன்று (10) 7,000 ரூபாய் அதிகரித்துள்ளதாக அகில இலங்கை நகை கடை வியாபாரிகள் சங்கம் தெரிவித்துள்ளது.

தற்போது 24 கரட் தங்கம் பவுண் ஒன்று 415,000 ரூபாவாகவும், 22 கரட் தங்கம் பவுண் ஒன்று 383,800 ரூபாவாகவும் விற்பனை செய்யப்படுகின்றது.

மேலும் 24 கரட் தங்கத்தின் ஒரு கிராமின் விலை 51,875 ரூபாவாகவும் 22 கரட் தங்கத்தின் ஒரு கிராமின் விலை 47,975 ரூபாவாகவும் விற்பனை செய்யப்படுகின்றது.

யாழ் நயினாதீவில் இரு குருக்கள்மாரிடையேயான மோதலில் வாளால் வெட்டிக் கிருஷ்ணகுமார் ஐயா கொலைசெய்யப்பட்ட சம்பவம் அதிர்ச்சியை ஏற்படுத்தியுள்ளது.

நேற்று திங்கட்கிழமை (09) மாலை இந்த சம்பவம் இடம்பெற்றுள்ளதாக பொலிஸார் தெரிவித்துள்ளனர். உயிரிழந்தவர் நாவலப்பிட்டி பகுதியைச் சேர்ந்த 45 வயதுடையவர் என அடையாளம் காணப்பட்டுள்ளார்.

தொழில் நிமிர்த்தம் யாழ் நயினாதீவுக்கு சென்று தங்கியிருந்த வேளை யாழ் நயினாதீவு வீரகத்தி விநாயகர் ஆலய குருக்களின் வாள்வெட்டுக்கு இலக்காகி உயிரிழந்துள்ளார்.

அர்ச்சகர்களுக்கு இடையில் ஏற்பட்ட முரண்பாடு காரணமாக மற்றொரு நபர் கத்தியால் குத்தி இவரைக் கொலை செய்துள்ளமை ஆரம்பகட்ட விசாரணைகளில் தெரியவந்துள்ளது.

இந்தக் கொலையுடன் தொடர்புடைய சந்தேகநபர் கைது செய்யப்பட்டுள்ளதுடன், ஊர்காவற்துறை பொலிஸார் மேலதிக விசாரணைகளை மேற்கொண்டு வருகின்றனர்.

கைது செய்யப்பட்ட சந்தேகநபர் கொட்டகலை பகுதியைச் சேர்ந்த 35 வயதுடையவர் என்பது குறிப்பிடத்தக்கது.

இந்நிலையில் இறைவனுக்கு பூசைசெய்யும் அர்ச்சரகள் , அடிதடியில் இறங்கியதோடு வாளால் வெட்டிகொல்லபப்ட்ட சம்பவம் பரபரப்பை ஏற்படுத்தியுள்ளது.