வவுனியா புகையிரத நிலையத்தில்..

சர்வதேச பேரிடர் துயர் குறைப்பு நாள் ஆண்டுதோறும் அக்டோபர் 12-ம் திகதி கடைபிடிக்கப்படுகிறது. இந்தியாவில் தேசிய பேரிடர் துயர் குறைப்பு நாள் அக்டோபர் மாதம் கடைசி புதன்கிழமை கடைபிடிக்கப்படுகிறது.

இயற்கையாகவும் மனிதனின் கவனக்குறைவினாலும் , தீவிரவாத செயல்களாலும் ஏற்படும் இழப்புகள் இன்னல்கள் போன்ற பேரழிவிலிருந்து காப்பாற்றிக் கொள்வதற்கான விழிப்புணர்வை ஏற்படுத்துவதே இந்நாளின் நோக்கமாகும்.

அந்த வகையில் வவுனியா மத்திய புகையிரத நிலையத்தில் சர்வதேச பேரிடர் துயர் குறைப்பு நாள் தினத்தினை முன்னிட்டு மரநடுகை நிகழ்வு இடம்பெற்றது.

பிரதான புகையிரத நிலைய அதிபர் இ.சந்திரகுமார் மற்றும் புகையிரத நிலைய அதிபர் ச.வைகுந்தன் ஆகியோர் இணைந்து புகையிரத நிலைய வளாகத்தில் பயன்தரும் மரங்களை நாட்டி வைத்திருந்தனர்.

விபத்து..

வவுனியா – மன்னார் வீதியில் இன்று பிற்பகல் இடம்பெற்ற விபத்தில் முச்சக்கரவண்டியின் சாரதி காயமடைந்து வவுனியா வைத்தியசாலையில் அனுமதிக்கப்பட்டுள்ளார். இவ்விபத்து குறித்து மேலும் தெரியவருகையில்,

வவுனியா வேப்பங்குளம் மன்னார் பிரதான வீதியில் ஒரே திசையில் பயணித்துக் கொண்டிருந்த கூலர் வாகனம் சமுர்த்தி வங்கிக்கு முன்னால் சென்றபோது திடீரென்று பிரேக் பிடித்தால் பின்னர் வந்த முச்சக்கரவண்டியுடன் மோதியுள்ளது.

இதன்போது முச்சக்கரவண்டியை செலுத்திச் சென்ற சாரதி காயமடைந்து வவுனியா வைத்தியசாலையில் அனுமதிக்கப்பட்டுள்ளார். சம்பவ இடத்திற்குச் சென்ற போக்குவரத்துப் பொலிஸார் மேலதிக விசாரணைகளை மேற்கொண்டு வருகின்றனர்.

ஆர்ப்பாட்டம்..

1700 ஆவது நாளாக சுழற்சி முறையில் போராட்டத்தை முன்னெடுத்து வரும் காணாமல் ஆக்கப்பட்டோரின் உறவுகள் வவுனியாவில் கவனயீர்ப்பு போராட்டம் ஒன்றை முன்னெடுத்திருந்தனர்.

வவுனியா, ஏ9 வீதியில் வீதி அபிவிருத்தி அதிகார சபை முன்பாக உள்ள காணாமல் ஆக்கப்பட்டோரின் போராட்ட கொட்டகை முன்பாக இன்று (13.10) காலை குறித்த கவனயீர்ப்பு போராட்டம் இடம்பெற்றது.

போராட்டத்தில் ஈடுபட்ட தாய்மார் அமெரிக்கா மற்றும் ஐரோப்பிய ஒன்றியத்தின் கொடிகளையும், காணாமல் ஆக்கப்பட்ட தமது பிள்ளைகளின் புகைப்படங்களையும் தாங்கியவாறு போராட்டத்தில் ஈடுபட்டனர்.

இதன்போது போராட்டத்தில் ஈடுபட்ட தாய்மார், 1700 ஆவது நாளாக நாம் போராடிக் கொண்டிருக்கின்றோம். எங்களது பிள்ளைகளுக்கு எந்தவொரு தீர்வும் எட்டப்படவில்லை. ஜனாதிபதி மரணச் சான்றிதழ் வழங்குவதாக கூறியுள்ளார்.

எந்தவொரு தாயும் மரணச் சான்றிதழ் வாங்குவதற்கு தயாராக இல்லை. அதை ஜனாதிபதி சொன்ன நாளில் இருந்து தாய்மார் தேம்பி தேம்பி அழுகிறார்கள். ஜனாதிபதி அமெரிக்கா சென்று தனது பேரப்பிள்ளையை தூக்கி மகிழ்கின்றார்.

நாங்கள் அம்மா அம்மா என கதறும் போது எமது பிள்ளைகளை ஒப்படைத்து விட்டு போராடிக் கொண்டிருக்கின்றோம். அவருக்கு இருக்கிற பாசம் தானே எங்களுக்கும் எங்கள் பிள்ளைகள் மேல் இருக்கும்.

அம்மா என்று சத்தம் கேட்கும் போது எமது வயிறு கொதிக்கிறது. கண்கண்ட சாட்சியங்கள் இருக்கிறது. கோட்டபாய துரோகி. எவ்வாறு நாம் ஒப்படைத்த பிள்ளைகளுக்கு மரணச் சான்றிதழ் வழங்க முடியும் எனவும் தெரிவித்தார்.

பிரபல தனியார் வைத்தியசாலை..

வவுனியாவில் அமைந்துள்ள பிரபல தனியார் வைத்தியசாலையில் நோயாளி ஒருவருக்கு காலாவதியான மருந்து வழங்கப்பட்டமையால் அங்கு அமைதியின்மை ஏற்பட்டதுடன், பாவனையாளர் அலுவல்கள் அதிகார சபையினர் சோதனை நடவடிக்கை ஒன்றையும் முன்னெடுத்திருந்தனர்.

வவுனியாவை சேர்ந்த முச்சக்கரவண்டி சாரதி ஒருவருக்கு சுகவீனம் ஏற்ப்பட்ட நிலையில் நேற்று (12.10) வவுனியா, குடியிருப்பு, குளவீதியில் உள்ள தனியார் வைத்தியசாலைக்கு சென்று சிகிச்சையினை பெற்றுக் கொண்டதுடன், மருந்தினையும் பெற்றுச் சென்றிருந்தார்.

அந்த மருந்தினை நோயாளி இரவு பயன்படுத்திய நிலையில் அவருக்கு சுகயீனம் ஏற்பட்டதுடன், உடலில் சில மாற்றங்களையும் அவதானித்துள்ளார். இதனையடுத்து குறித்த மருந்துகளை சோதித்து பார்த்த போது ஒரு மாதத்திற்கு முன்பாகவே அவை காலாவதியாகியுள்ளாகியமை தெரியவந்துள்ளது.

பின்னர் இன்று (13.10) காலை குறித்த வைத்தியசாலைக்கு சென்ற அவர் அங்கு கடமையில் இருந்தவர்களிடம் விடயத்தினை தெரியப்படுத்தியதுடன், தர்க்கத்திலும் ஈடுபட்டிருந்தார்.

இதன்போது அங்கிருந்த பணியாளர் காலாவதியான மருந்தை மூன்று மாதத்திற்கு பயன்படுத்தலாம் என நோயாளிக்கு தெரிவித்ததாக பாதிக்கப்பட்டவர் தெரிவித்தார்.

சம்பவம் தொடர்பாக மாவட்ட பாவனையாளர் அலுவல்கள் அதிகாரசபைக்கு முறைப்பாடு வழங்கப்பட்டதையடுத்து, குறித்த தனியார் வைத்தியசாலைக்கு வருகை தந்த பாவனையாளர் அலுவல்கள் அதிகாரசபையினர் சோதனை நடத்தியதுடன்,

காலாவதியான சில மருந்துகளையும் மீட்டிருந்தனர். இது தொடர்பில் குறித்த தனியார் வைத்தியசாலைக்கு எதிராக வழக்கு தாக்கல் செய்யவுள்ளதாகவும் பாவனையாளர் அலுவல்கள் அதிகார சபையினர் தெரிவித்தனர்.

இதேவேளை, குறித்த சம்பவத்திற்கான பொறுப்பினை ஏற்றுக் கொண்ட தனியார் வைத்தியசாலையினர் இது தொடர்பில் மன்னிப்பு கோருவதாகவும் பாதிக்கப்பட்டவரிடம் தெரிவித்திருந்தனர்.

கொரோனா..

வவுனியாவில் மேலும் 25 பேருக்கு கொரோனா தொற்று உறுதி செய்யப்பட்டுள்ளதுடன், இருவர் மரணமடைந்துள்ளதாக சுகாதாரப் பிரிவினர் தெரிவித்துள்ளனர்.

வவுனியாவில் இனங்காணப்பட்ட கொரோனா தொற்றாளர்களுடன் தொடர்புகளைப் பேணியோர், வவுனியா வைத்தியசாலையில் சிகிச்சைக்காக அனுமதிக்கப்பட்டோர் மற்றும் தனிமைப்படுத்தப்பட்டோர் ஆகியோரிடம் மேற்கொள்ளப்பட்ட பீசிஆர் மற்றும் அன்டிஜன் பரிசோதனையின் முடிவுகள் சில இன்று மதியம் (12.10) வெளியாகின.

அதில் வவுனியா மாவட்டத்தின் நான்கு சுகாதார வைத்திய அதிகாரி பிரிவுகளையும் உள்ளடக்கியதாக மேலும் 25 பேருக்கு மேலும் கொரோனா தொற்று உறுதி செய்யப்பட்டுள்ளது.

இந்நிலையில் தொற்றாளர்களை கொரோனா சிகிச்சை நிலையத்திற்கு அனுப்பி வைப்பதற்கும், அவர்களுடன் தொடர்புடையவர்களை தனிமைப்படுத்துவதற்கும் சுகாதாரப் பிரிவினர் நடவடிக்கை எடுத்துள்ளனர்.

மேலும் கொரோனா தொற்று காரணமாக குருமன்காடு பகுதியைச் சேர்ந்த 87 வயதுடைய பெண் ஒருவரும், அண்ணாநகர் பகுதியைச் சேர்ந்த 85 வயதுடைய பெண் ஒருவரும் என இருவர் மரணமடைந்துள்ளனர்.

மரணித்தவர்களின் சடலங்களை சுகாதார நடைமுறைகளைப் பின்பற்றி தகனம் செய்ய நடவடிக்கை எடுக்கப்பட்டுள்ளதாகவும் சுகாதாரப் பிரிவினர் தெரிவித்துள்ளனர்.

திடீர் சோதனை..

சுகாதார நடைமுறைகள் குறித்து வவுனியா நகரை அண்டிய பகுதிகளில் பொலிசார் விசேட சோதனை நடவடிக்கையை முன்னெடுத்ததுடன், 10 பேருக்கு எதிராக வழக்கு தாக்கல் செய்துள்ளனர்.

கோவிட் தொற்று பரவலை கட்டுப்படுத்தும் முகமாக சுகாதாரப் பிரிவினரின் நடவடிக்கைக்கு ஒத்துழைப்பு வழங்கும் முகமாக பொலிசார் விசேட நடவடிக்கையை முன்னெடுத்து வருகின்றனர்.

அந்தவகையில், வவுனியா புகையிரத நிலைய வீதி, குருமன்காடு ஆகிய பகுதிகளில் உள்ள வர்த்தக நிலையங்களில் திடீர் சோதனை நடவடிக்கையை முன்னெடுத்த பொலிசார் முக்கவசம் அணியாது வர்த்த நிலையங்களில் பணிபுரிந்தோர், முககவசத்தை சீராக அணியாதோர் ஆகியோருக்கு எதிராக வழக்கு தாக்கல் செய்தனர்.

இதன்படி 10 வர்த்தகர்களுக்கு எதிராக இவ்வாறு முறைப்பாடு பதிவு செய்யப்பட்டுள்ளதுடன், அவர்களை எதிர்வரும் 18 ஆம் திகதி வவுனியா நீதிமன்றில் முற்படுமாறும் பொலிசாரால் அழைப்பு விடுக்கப்பட்டுள்ளது.