வவுனியா தனியார் பேரூந்து உரிமையாளர் சங்கத்தின் ஊடக சந்திப்புக்கு பொலிசார் இடையூறை ஏற்படுத்தியுள்ளனர்.
தனியார் பேரூந்துகளுக்கு எரிபொருள் பிரச்சனை தொடர்பில் தனியார் பேரூந்து உரிமையாளர் சங்க தலைவரால் வவுனியா புதிய பேரூந்து நிலையத்தில் தனியார் பேரூந்து பதிவுக்காக ஒதுக்கப்பட்ட இடத்தில் நேற்று (01.03.2022) ஊடக சந்திப்பு ஒன்று ஏற்பாடு செய்யப்பட்டிருந்தது.
அங்கு ஊடகவியலாளர்கள் சென்று ஊடக சந்திப்பை பதிவு செய்ய தயாராகிய போது பொலிசார் அங்கு நடத்த முடியாது என தெரிவித்தனர்.
பின்னர் தனியார் பேரூந்து உரிமையாளர் சங்க தலைவரை அழைத்து விபரங்களை பெற்றதுடன், ஊடகவியலாளர்கள் மற்றும் குறித்த ஊடகவியலாளர்கள் பணியாற்றும் ஊடக நிறுவனங்களின் விபரங்களையும் பொலிசார் கோரினர்.
இதன்போது, நாம் ஏன் எமது விபரத்தை பதிவு செய்ய வேண்டும் என ஊடகவியலாளர்கள் கோரியதுடன் விபரத்தை கொடுக்க மறுத்தனர். இதன்பின் அமைதியாக நின்ற பொலிசார் ஊடக சந்திப்பு நடைபெற்ற போது அதனை முழுமையாக கண்காணித்து இருந்தமையும் குறிப்பிடத்தக்கது.
கரூரில் சட்டவிரோத செயல்களில் ஈடுபடுவதாக காதல் கணவன் மீது நடவடிக்கை எடுக்க கோரி மாவட்ட காவல் கண்காணிப்பாளர் அலுவலகத்தில் மனைவி புகார் அளித்துள்ளார்.
சென்னையை சார்ந்த இளம்பெண் சத்தியபிரியா (23). இவர் பி.காம் முடித்து விட்டு பொள்ளாச்சியில் உள்ள ஒரு நிறுவனத்தில் வேலை பார்த்து வந்துள்ளார்.
அப்போது அங்கு வந்து சென்ற கரூர் காந்திகிராமத்தை சார்ந்த சதீஸ்குமார் என்பவருடன் நட்பு ஏற்பட்டது. நாளடைவில் நட்பு காதலாக மாறி கடந்த 2021 ஏப்ரல் மாதம் 22ம் தேதி திருமணம் செய்து கொண்டனர்.
திருமணத்திற்கு முன்பு சதீஸ் ஒரு பட்டதாரி என்றும், சட்ட ஆலோசகராக பணிபுரிவதாகவும் கூறி திருமணம் செய்துள்ளார். பின்னர் திருமணமாகி 7வது நாளிலேயே அவர் 9ம் வகுப்பு வரை மட்டுமே படித்து இருப்பது தெரிய வந்துள்ளது.
இது தொடர்பாக சத்திய பிரியா, சதீஸ்குமாரிடமும், அவரது தாய், தந்தையிடமும் கேட்டு சண்டையிட்டுள்ளார். காலம் போக, போக சதீஸ்குமார் கஞ்சா விற்பனை செய்வது, ரவுடிகளுக்கு பட்டாகத்தி, கள்ள துப்பாக்கி விற்பனை போன்ற சட்ட விரோத செயல்களில் ஈடுபடுவது தெரிய வந்தது.
மேலும், இணையதள வங்கி பரிவர்த்தனை மூலம், சியாம், பிரசாத், சதீஸ், பவித்ரா பிரசாத், ஸ்ரீராம் என்ற பல பெயர்களிலும், பல ஊர்களிலும் போலியாக ஆதார் கார்ட், விசிடிங் கார்ட் தயாரித்து வெளி நாடுகளில் வேலை வாங்கி தருவதாக கூறி அலுவலகம் வைத்து பணத்தை பலரிடம் மோசடி செய்துள்ளார் சதீஸ்குமார்.
அதுமட்டுமின்றி சத்தியபிரியாவிற்கு தெரியாமல் அவருடைய வங்கி கணக்கில் இருந்து மோசடியாக பண பரிவர்த்தனை செய்துள்ளதும் தெரிய வந்துள்ளது. சதீஸ்குமார் செய்யும் அனைத்து செயல்களுக்கும் அவர்களுடைய பெற்றோர்களும் உடந்தையாக இருந்துள்ளதாக கூறப்படுகிறது. இது தொடர்பாக சதீஸ்குமாரிடம் கேட்ட போது சண்டை அடிக்கடி வந்துள்ளது.
மேலும், சத்தியபிரியாவை வீட்டினுள் அடைத்து வைத்து கொடுமைப்படுத்தி கஞ்சாவை கட்டாயப் படுத்தி புகைக்க செய்ததாகவும், கர்ப்பமாக இருப்பதை அறிந்து அவருக்கு கருகலைப்பு செய்து வீட்டில் அடைத்து வைத்திருந்ததாகவும் கூறப்படுகிறது.
மேலும், மயில் துத்தநாக பொடியை குளுகோஸில் கலந்து கொடுத்து வந்துள்ளனர். பின்பு அவர் உயிரிழந்து விட்டால் பிரச்சினையாகி விடும் எனக் கூறி அவருக்கு அருகில் உள்ள மருத்துவமனையில் சிகிச்சை அளித்துள்ளனர்.
கடந்த 6 மாத காலமாக வீட்டினுள் அடைத்து வைத்து உணவு வழங்காமல், பாலியல் ரீதியாக கொடுமை படுத்தியதாக கூறி சத்தியபிரியா கரூர் மாவட்ட காவல் கண்காணிப்பாளரிடம் புகார் அளித்துள்ளார்.
தனது நண்பரின் திருமணத்திற்கு செல்வதாக பொய் சொல்லி விட்டு சென்னை சென்ற சத்தியபிரியா ஆன்லைனில் 3 முறை புகார் அளிக்கப்பட்டும் நடவடிக்கை எடுக்கப்படாததால் இன்று மாவட்ட காவல் கண்காணிப்பாளர் அலுவலகத்தில் புகார் அளித்துள்ளார் என்பது குறிப்பிடத்தக்கது.
திருவள்ளூர் மாவட்டம் புழல் எம்ஜிஆர் நகர் 2வது தெருவை சேர்ந்தவர் இளங்கோவன்(31). இவர் எலெக்ட்ரிசின் ஆக பணியாற்றி வருகிறார். இவருக்கு திருமணமாகி கலா என்ற மனைவியும், இரண்டு மகன்களும் உள்ளனர்.
கருத்து வேறுபாடு காரணமாக பல ஆண்டுகளுக்கு முன்பு பிரிந்து குழந்தைகளுடன் புழல் கண்ணப்ப சாமி நகரில் வசித்து வருகிறார். இந்நிலையில் கடந்த 5 ஆண்டுகளுக்கு முன்பு சென்னை பாரிமுனையில் எலக்ட்ரிக் வேலை செய்வதற்காக சென்றபோது,
சென்னை புளியந்தோப்பு சென்ற வெண்ணிலா இவர் பாரிமுனையில் உள்ள வீடுகளில் வேலை செய்து வந்தவர். அப்போது வெண்ணிலாவுக்கும் இளங்கோவனுக்கும் காதலாக மாறி இருவரும் எம்ஜிஆர் நகரில் உள்ள இரண்டாவது தெருவில் வசித்து வருகின்றனர்.
இந்நிலையில் வெண்ணிலா தனது மகன், மகள்களை பார்ப்பதற்காக செல்ல வேண்டுமென்று நேற்று இளங்கோவனிடம் சொல்லியுள்ளார். இதற்கு இளங்கோவனுக்கும் வெண்ணிலாவுக்கும் இடையோ வாக்குவாதம் ஏற்பட்டுள்ளது.
இதனை இளங்கோவின் தாத்தா தமிழ்தாசன் இருவரிடம் சமரசம் மேற்கொண்டபோது திடீரென வீட்டில் இருந்த கத்தியை எடுத்து இளங்கோவன் வெண்ணிலாவை கழுத்தில் சரமாரியாக வெட்டி விட்டு புழல் காவல் நிலையத்தில் சரண் அடைந்தார்.
புழல் போலீசார் சம்பவ இடத்துக்கு விரைந்து சென்று வெண்ணிலாவை மீட்டு 108 ஆம்புலன்ஸ் மூலம் சென்னை ஸ்டான்லி அரசு மருத்துவமனைக்கு அனுப்பி வைத்தனர்.
அங்கு பரிசோதித்த மருத்துவர்கள் வரும் வழியிலேயே இறந்து விட்டதாக தெரிவித்தனர். இதனையடுத்து புழல் போலீசார் இளங்கோவனிடம் தொடர்ந்து விசாரணை நடத்தி வருகின்றனர்.
வவுனியா மாவட்டத்திலுள்ள எரிபொருள் விற்பனை நிலையங்களில் இன்று (01.03.2022) காலை முதல் டீசல் எரிபொருளுக்குத் தட்டுப்பாடு நிலவி வருகின்றதுடன் நீண்ட வரிசையில் வாகனங்கள் காத்திருக்கின்றன.
எரிபொருள் நிலையங்களில் டீசல் தட்டுப்பாடு காரணமாக இன்று எண்ணை நிரப்பு நிலையங்களில் நீண்ட வாகன வரிசைகள் காணப்பட்டுள்ளன.
ஒவ்வொரு வாகன சாரதிகளும் எண்ணை நிரப்புவதற்காக வாகனங்களை வீதியோரத்தில் நிறுத்தி வைத்துள்ளமையினால் சில எண்ணை நிரப்பு நிலையங்கள் முன்னால் வாகன நெரிசலும் ஏற்பட்டிருந்தன.
அத்துடன் வாகன சாரதிகள் மற்றும் பொதுப் போக்குவரத்தில் ஈடுபடும் பேருந்து சாரதிகள் டீசல் எண்ணெய்யினை தேடி ஒவ்வொரு எண்ணை நிரப்பு நிலையங்களை நோக்கிச் சென்று வருவதாகவும் இதனால் தாங்கள் பெரும் சிரமங்களுக்கு உட்பட்டிருப்பதாகவும் சாரதிகள் தெரிவிக்கின்றனர்.
நெல்லை மாவட்டம் களக்காடு அருகே உள்ள மஞ்சுவிளையை சேர்ந்தவர் ஜெயராஜ். இவருடைய மகன் விஜய்ரூபன். இவர் களக்காடு பகுதியில் லவ் பேர்ட்ஸ் குருவிகள் விற்பனை செய்யும் கடை நடத்தி வருகிறார்.
மேலும் இவர் நாம் தமிழர் கட்சியில் நடந்து முடிந்த உள்ளாட்சி தேர்தலில் வேட்பாளராக 2 வது வார்டில் போட்டியிட்டு உள்ளார், அதில் சுயேச்சை வேட்பாளர் ஒருவர் 367 வாக்குகள் பெற்று வெற்றி பெற்ற நிலையில் விஜய்ரூபன் 18 வாக்குகள் மட்டுமே பெற்று தோல்வியைத் தழுவியுள்ளார்.
லவ் பேர்ட்ஸ் குருவிகள் விற்பனை செய்து வந்த விஜய்ரூபன் தனது தூரத்து உறவினரான மேலபத்தை பகுதியை சேர்ந்த கிருபா என்பவரை கடந்த 4 ஆண்டுகளாக காதலித்து வந்துள்ளார்.
இருவரும் காதலித்து வந்த நிலையில் கிருபாவின் வீட்டிற்கு சென்று விஜய்ரூபன் கிருபாவை பெண் கேட்டதாக கூறப்படுகிறது, ஆனால் கிருபாவின் தந்தை திருமணம் செய்து கொடுக்க முடியாது என மறுத்ததாகவும் கூறப்படுகிறது.
இதற்கிடையில் கிருபாவிற்கு வேறு இடத்தில் மாப்பிள்ளை பார்த்து திருமணம் செய்து வைக்க அவரது பெற்றோர் முடிவு எடுத்து உள்ளனர், இந்த நிலையில் கடந்த 10 தினங்களுக்கு முன்பு கிருபாவிற்கு வேறு இடத்தில் திருமணம் நிச்சயமாகி உள்ளது.
இதனை அறிந்த விஜய் கிருபாவுடன் பழகும் நாட்களில் ஜோடியாக எடுத்த புகைப்படம் மற்றும் காதலி கிருபா எழுதி கொடுத்த காதல் கவிதை கடிதம் ஆகியவற்றை வால்போஸ்டரில் அச்சிட்டு Happy Engagement என நெல்லை மாவட்டம் களக்காடு நகர் பகுதி முழுவதிலும் கவிதை வசனத்தோடு சுவரொட்டியாக ஒட்டி உள்ளார்.
குறிப்பாக கிருபாவிற்கு நிச்சயம் செய்த மாப்பிளை வீட்டின் முன்பும் சுவரொட்டியை ஓட்டியுள்ளார். இதனால் அதிர்ச்சி அடைந்த கிருபாவின் தந்தை தானியேல் இது குறித்து களக்காடு காவல் நிலையத்தில் புகார் அளித்துள்ளார்.
இந்த புகாரின் அடிப்படையில் களக்காடு போலீசார் விசாரணை செய்து வருவதோடு களக்காடு முழுவதும் சுவரொட்டி ஒட்டிய விஜயை தேடி வருகின்றனர்.
நாம் தமிழர் கட்சியின் நிர்வாகியான விஜய்ரூபன் இது போன்ற செயல்களை செய்ததோடு தற்போது தலைமறைவாகி விட்டதாகவும் அவருடைய மொபைல் எண்ணையும் அணைத்து வைத்திருப்பதாகவும் காவல்துறை தரப்பில் தெரிவிக்கப்பட்டு உள்ளது.
தனது காதலிக்கு வேறு ஒரு இடத்தில் திருமணம் நிச்சயிக்கப்பட்ட ஆத்திரத்தில் காதலியுடம் எடுத்த புகைப்படம் மற்றும் அவள் எழுதி கொடுத்த கவிதையை போஸ்டரில் அச்சிட்டு களக்காடு முழுவதும் ஒட்டி தனது எதிர்ப்பை விஜய்ரூபன் என்பவர் வெளிப்படுத்திய சம்பவம் அப்பகுதி முழுவதும் பெரும் பரபரப்பை ஏற்படுத்தி உள்ளது.
இனந்தெரியாத சிலர் தன்னை கடத்திச் சென்று தடுத்து வைத்துள்ளதாக தொலைபேசி அழைப்பை எடுத்து தெரிவித்து, சூட்சுமான முறையில் தனது தந்தையிடம் இருந்து 15 லட்சம் ரூபாவை கப்பமாக பெற முயற்சித்த 24 வயதான யுவதியை அனுராபுரம் பொலிஸார் கைது செய்துள்ளனர்.
தந்தையிடம் 15 லட்சம் ரூபாவை பெற்று அதனை தனது காதலனுக்கு வழங்க திட்டமிட்ட இந்த யுவதியுடன் அவரது காதலனும் நேற்று கைது செய்யப்பட்டுள்ளார்.
அனுராதபுரம் தாதி கல்லூரியில் பயின்று வரும் நொச்சியாகம பிரதேசத்தை சேர்ந்த 24 வயதான யுவதியும் தாதி பாடநெறியை பூர்த்தி செய்த அனுராதபுரம் நகரை சேர்ந்த 26 வயதான இளைஞனுமே இவ்வாறு கைது செய்யப்பட்டுள்ளனர்.
எப்பாவல பிரதேசத்தில் தென்னம் காணி ஒன்றை கொள்வனவு செய்ய சந்தேக நபரின் தாய் அவருக்கு 15 லட்சம் ரூபாவை வழங்கியுள்ளார்.
எனினும் இளைஞன் புதையலில் எடுத்த தங்கம் எனக் கூறி ஒருவர் விற்பனை செய்த தங்க முலாம் பூசப்பட்ட இரும்புகளை கொள்வனவு செய்து ஏமாந்துள்ளதாக பொலிஸார் தெரிவித்துள்ளனர்.
மோசடியில் இழந்த இந்த 15 லட்சம் ரூபாய் பணத்தை எப்படியாவது பெற்றுக்கொள்ள வேண்டும் என்று யுவதியும், இளைஞனும் திட்டம் தீட்டியுள்ளனர். யுவதி வீட்டில் இருந்து சென்று தலைமறைவாக இருந்துள்ளார்.
இதனிடையே யுவதியின் காதலன், யுவதியின் தந்தையிடம் 15 லட்சம் ரூபாயை கப்பமாக கேட்டுள்ளார். பணத்தை கொடுக்கவில்லை என்றால், யுவதியை கொலை செய்ய போவதாக மிரட்டியுள்ளதாக பொலிஸார் கூறியுள்ளனர்.
இதன் காரணமாக அச்சமடைந்த யுவதியின் தந்தை அனுராதபுரம் பொலிஸ் நிலையத்தில் முறைப்பாடு செய்துள்ளார். இதனையடுத்து விசாரணைகளை மேற்கொண்ட பொலிஸார், தலைமறைவாக இருந்த யுவதியையும் இளைஞனையும் கைது செய்துள்ளனர்.
இதன் பின்னர், நடத்திய விசாரணைகளில் 15 லட்சம் ரூபா பணத்தை எப்படியாவது பெற வேண்டும் என்பதற்காக இந்த கடத்தல் நாடகத்தை அரங்கேற்றியதாக சந்தேக நபர்கள் பொலிஸாரிடம் தெரிவித்துள்ளனர்.
பொலிஸார், யுவதி மற்றும் இளைஞனின் பெற்றோரை பொலிஸ் நிலையத்திற்கு வரவழைத்துள்ளனர். தமது பிள்ளைகளின் கல்வி எதிர்காலம் தொடர்பில் பொலிஸாரிடம் விடுத்த கோரிக்கை அடுத்து, பொலிஸார் சாட்சியங்களை பதிவு செய்துக்கொண்டு இருவரையும் விடுதலை செய்துள்ளனர்.
திருகோணமலை – உவர்மலை பகுதியில் இடம்பெற்ற மோட்டார் சைக்கிள் விபத்தில் இளைஞரொருவர் உயிரிழந்துள்ளதாக பொலிஸார் தெரிவித்துள்ளனர். இவ்விபத்து இன்று (01) 1.30 மணியளவில் இடம்பெற்றுள்ளது.
மோட்டார் சைக்கிளில் மூவர் பயணித்த நிலையில் இச்சம்பவம் இடம்பெற்றுள்ளது. திருகோணமலை சுமேதகம பகுதியைச் சேர்ந்த சஹன் (15வயது) என்ற சிறுவனே உயிரிழந்துள்ளதாகவும் பொலிஸார் தெரிவித்துள்ளனர்.
இவ்விபத்தில் காயமடைந்த மற்றவர் திருகோணமலை பொது வைத்தியசாலையில் சிகிச்சை பெற்று வருவதுடன், உயிரிழந்தவரின் சடலம் தற்போது திருகோணமலை பொது வைத்தியசாலை பிரேத அறையில் வைக்கப்பட்டுள்ளது. விபத்து தொடர்பிலான விசாரணைகளை திருகோணமலை தலைமையக பொலிஸார் மேற்கொண்டு வருகின்றனர்.
களுத்துறை வெலிபென்ன பிரதேசத்தில் நான்கு பிள்ளைகளின் தந்தை ஒருவர் உயிரை மாய்த்துக் கொண்டமை பெரும் சோகத்தை ஏற்படுத்தியுள்ளது.
தனது பிள்ளைகளுக்கு உணவு வழங்க முடியாமையினால் இந்த விபரீத முடிவை அவர் எடுத்துள்ளதாக, உயிரிழந்தவரின் மனைவி தெரிவித்துள்ளார்.
3 நாட்களாக வீட்டில் உணவு ஒன்றுமே இல்லை. பிள்ளைகளுக்கு உணவு வழங்க பணம் தேடி வருவதாக கூறி சென்றார். அவர் வீட்டிற்கு வராமையினால் வீட்டில் இருந்த நாற்காலிகளை விற்று உணவு வழங்கினேன் என தற்கொலை செய்துக் கொண்ட நபரின் மனைவி தெரிவித்துள்ளார்.
தற்கொலை செய்துக் கொண்டவர் வெலிபென்ன பிரதேசத்தை சேர்ந்த நாகராஜா ரஞ்சன் என்ற 37 வயதுடைய 4 பிள்ளைகளின் தந்தையாகும்.
உயிரிழந்தவரின் மனைவியான 30 வயதான மாடசாமி மஞ்சுலா என்பவர், மரண பரிசோதனை அதிகாரிகளிடம் சாட்சி வழங்கியுள்ளார்.
உயிரிழந்திருப்பவர் எனது கணவர், எங்களுக்கு திருமணமாகி 14 வருடங்கள் ஆகிறது. எங்களுக்கு 12 வயதுக்குட்பட்ட நான்கு பிள்ளைகள் உள்ளனர். மூன்று மகன்கள் மற்றும் ஒரு மகள் உள்ளனர்.
எனது கணவருக்கு வேலை தேடி தெபுவன மற்றும் அதனை சுற்றியுள்ள பகுதிகளில் இருந்து 9 மாதங்களுக்கு முன்னர் வெலிபென்ன பிரதேசத்திற்கு வந்தோம். என் கணவருக்கு நிரந்தர வேலை இல்லை.
அவரை கூலி வேலைக்கு அனுப்பி அதில் கிடைத்த பணத்திலேயே வாழ்ந்தோம். நிரந்தர வீடு இல்லை. 3,500 ரூபாய் வாடகைக்கு அறையில் இருந்தோம். நிரந்தர வீடு இல்லாததால் பிள்ளைகளை பாடசாலைக்கு அனுப்ப முடியவில்லை.
கடந்த சில நாட்களாக கணவருக்கு வேலை கிடைக்கவில்லை. எங்களுக்கு கடனுக்கு பணம் அல்லது பொருட்கள் வழங்கவில்லை. பிள்ளைகளுக்கு உணவில்லாமையினால் கணவர் வருத்தத்தில் இருந்தார்.
கடந்த வெள்ளிக்கிழமை பணம் தேடி வருவதாக கூறி சென்றார். அன்று முழு நாளும் வரவில்லை். பிள்ளைகளால் பசி தாங்கிக் கொள்ள முடியவில்லை. இதனால் வீட்டில் இருந்த நாற்காலிகளை விற்று உணவு பெற்றுக் கொடுத்தேன்.
கணவருக்கு தொலைபேசி அழைப்பேற்படுத்தினேன் பதில் கிடைக்கவில்லை. பின்னர் கணவர் உறவினரின் வீட்டிற்கு அருகில் தூக்கிட்டு தற்கொலை செய்துக் கொண்டார் என தகவல் கிடைத்தென மனைவி மேலும் தெரிவித்துள்ளார்.
நாடளாவிய ரீதியில் நாளை ஏழரை சுழற்சி முறையில் 7 மணித்தியாலங்களும் 30 நிமிடங்களும் மின்வெட்டு நடைமுறைப்படுத்தப்படவுள்ளதாக இலங்கை பொதுப்பயன்பாடுகள் ஆணைக்குழு தெரிவித்துள்ளது.
மின்சார உற்பத்திக்கு தேவையான எரிபொருள் பற்றாக்குறையால் நாளைய தினம் மின்துண்டிப்பை மேற்கொள்ள அனுமதி வழங்குமாறு இலங்கை மின்சார சபை கோரிக்கை விடுத்துள்ளது.
அதற்கமைய இந்த அனுமதி வழங்கப்பட்டுள்ளதாக பொதுப் பயன்பாடுகள் ஆணைக்குழு தெரிவித்துள்ளது. இதற்கமைய, நாளை காலை வேளையில் 5 மணித்தியாலங்கள் மின்வெட்டு நடைமுறைப்படுத்தப்பட உள்ளது.
அத்துடன், இரவு வேளையில் 2 மணித்தியாலங்களும் 30 நிமிடங்களும் மின்வெட்டு நடைமுறைப்படுத்தப்பட உள்ளதாக பொதுப்பயன்பாடுகள் ஆணைக்குழு குறிப்பிட்டுள்ளது.
ரஷ்ய படையினர், உக்ரைனின் கார்கிவ் நகரை இலக்கு வைத்து நடத்திய செல் வீச்சு தாக்குதலில் உக்ரைனில் கல்வி கற்று வந்த இந்திய மாணவன் உயிரிழந்துள்ளதாக இந்திய வெளிவிவகார அமைச்சு தெரிவித்துள்ளது.
ரஷ்யாவின் இராணுவ தாக்குதலில் உக்ரைனில் கல்வி கற்று வந்த வெளியாட்டு மாணவன் உயிரிழந்த முதல் சந்தர்ப்பம் இதுவாகும். உக்ரைனில் பல நாடுகளை சேர்ந்த மாணவர்கள் கல்வி கற்று வருகின்றனர்.
இந்த மாணவர்களை அங்கிருந்து அழைத்துச் செல்ல பல நாடுகள் நடவடிக்கை எடுத்திருந்தன. இந்தியாவும் ரஷ்ய இராணுவம் உக்ரைனை ஆக்கிரமிக்கும் முன்னர் மாணவர்களை அழைத்து வர சிறப்பு விமானங்களை சேவையில் ஈடுபடுத்தியது.
இந்த நிலையில் உக்ரைனில் கல்வி கற்று வந்த இந்திய மாணவன் இன்று காலை இடம்பெற்ற செல் வீச்சு தாக்குதலில் கொல்லப்பட்டுள்ளார். இந்தியாவின் கர்நாடக மாநிலத்தை சேர்ந்த நவீன் என்ற மாணவனே உயிரிழந்ததாக இந்திய வெளிவிவகார அமைச்சு தெரிவித்துள்ளது.
இது மிகவும் துரதிஷ்டவசமான சம்பவம் என இந்திய வெளிவிவகார அமைச்சு கூறியுள்ளது. கார்கிவ் உக்ரைன் நாட்டின் இரண்டாவது மிகப் பெரிய நகரமாகும்.
இவ்வாறான நிலையில், ரஷ்யா, அந்த நகரில் வாழும் மக்களின் உயிர் பாதுகாப்பை ஆபத்துக்குள் தள்ளும் வகையில் தொடர்ந்தும் தாக்குதல்களை நடத்தி வருவதாக தகவல்கள் தெரிவிக்கின்றன.
திருகோணமலை-ஹொரவ்பொத்தானை பிரதான வீதி மரதன்கடவல பகுதியில் இடம்பெற்ற விபத்தில் காரின் சாரதி உயிரிழந்துள்ளதாக பொலிஸார் தெரிவித்துள்ளனர்.
றத்மலை பகுதியிலிருந்து ஹொரவ்பொத்தானை நோக்கி மணல் ஏற்றிச் சென்ற கனரக வாகனமும் வவுனியாவிலிருந்து திருகோணமலை நோக்கிச் சென்ற காருமே மோதி விபத்துக்குள்ளாகியுள்ளது.
இவ்விபத்து இன்று (01) காலை 9.20 மணியளவில் இடம்பெற்றுள்ளது. இவ்வாறு உயிரிழந்தவர் திருகோணமலை-அன்புவழிபுரம் சதா சகாய மாதா ஆலய பங்கு தந்தையான கனேஷபிள்ளை நிதிதாசன் (49வயது) எனவும் பொலிஸார் தெரிவித்துள்ளனர்.
விபத்துடன் தொடர்புடைய கனரக வாகனத்தின் சாரதி கைது செய்யப்பட்டுள்ள நிலையில், கெப்பித்திகொள்ளாவ நீதவான் முன்னிலையில் முன்னிறுத்த நடவடிக்கை எடுத்துள்ளதாகவும் பொலிஸார் கூறியுள்ளனர்.
சடலம் தற்போது ஹொரவ்பொத்தானை பிரதேச வைத்தியசாலையில் வைக்கப்பட்டுள்ளதுடன், பிரேத பரிசோதனை முடிவடைந்தவுடன் உறவினர்களிடம் ஒப்படைக்கப்பட உள்ளதாகவும் விபத்து தொடர்பிலான விசாரணைகளை மேற்கொண்டு வருவதாகவும் ஹொரவ்பொத்தானை பொலிஸார் தெரிவித்துள்ளனர்.
வவுனியா மாவட்டத்தில் எரிபொருள் நிரப்பு நிலையங்களில் எரிபொருளை வழங்கும் ஊழியர்களிற்கு கையூட்டலை கொடுத்தே எரிபொருளை பெற்றுக்கொள்ள வேண்டிய நிலமை ஏற்படுள்ளதாக வவுனியா மாவட்ட தனியார் பேருந்து உரிமையாளர் சங்கத்தின் தலைவர் ராஜேஸ்வரன் தெரிவித்தார்.
தற்போது ஏற்ப்பட்டுள்ள எரிபொருள் நெருக்கடி நிலமை தொடர்பாக வவுனியாவில் இன்று (01) இடம்பெற்ற ஊடகவியலாளர் சந்திப்பில் கலந்துகொண்டு கருத்து தெரிவித்த போதே இவ்வாறு தெரிவித்தார். தொடர்ந்து கருத்து தெரிவித்த அவர்,
தனியார் பேருந்து தரப்பினராகிய நாங்கள் பல்வேறு இன்னல்களுக்கு மத்தியில் மக்களுக்கான சேவைகளை வழங்கிவருகின்றோம்.
குறிப்பாக பயணிகள் போக்குவரத்து சேவையில் ஈடுபடும் எமது பேருந்துகளுக்கான எரிபொருள் மிகவும் தாமதமாகவே எரிபொருள் நிரப்பு நிலையங்களில் இருந்து கிடைக்கின்றது. இதனால் மட்டுப்படுத்தப்பட்ட சேவைகளையே வழங்க வேண்டிய நிலையில் இருக்கிறோம்.
எதிர்வரும் வாரத்தில் பாடசாலைகளும் ஆரம்பமாக இருக்கின்றது. எனவே இந்த நிலைமை நீடித்தால் பாடசாலை மாணவர்களுக்கான சேவைகளை வழங்குவதிலும் பாரிய சிக்கல் நிலமை இருக்கின்றது.
எனவே பயணிகள் போக்குவரத்து சேவையில் ஈடுபடும் பேருந்துகளுக்கு நாளாந்தம் தேவையான எரிபொருளை சுழற்சி முறையில் வழங்குவதற்கு ஆவண செய்யுமாறு அதிகாரிகளை கேட்டுக்கொள்கின்றோம்.
இதேவேளை அடுத்த வாரமளவில் கொழும்பில் இருந்து வடக்கிற்கு வரும் புகையிரதங்களின் சேவைகள் வீதிப்புனரமைப்பு பணிகளிற்காக இடைநிறுத்தப்படவுள்ளது. எனவே பயணிகள் மேலும் அசௌகரியங்களை சந்திக்க வேண்டிய நிலை ஏற்ப்படும்.
எனவே கொழும்பு சேவையில் ஈடுபடும் பேருந்துகள் மற்றும் வடக்கிற்குள் சேவையில் ஈடுபடும் பேருந்துகளிற்கு உரிய நேரத்தில் எரிபொருள் கிடைப்பதற்கு ஆவண செய்யுமாறு வடமாகாண ஆளுனர் மற்றும் மாவட்ட அரச அதிபரிடம் கோரிக்கை விடுக்கின்றோம்.
அத்துடன் எரிபொருள் நிரப்பு நிலையங்களில் எரிபொருளை வழங்கும் ஊழியர்களிற்கு கையூட்டலை கொடுத்தே எரிபொருளை பெற்றுக்கொள்ள வேண்டிய நிலமை இருக்கின்றது. எனவே எரிபொருள் நிரப்பு நிலையங்களில் என்ன நடக்கிறது என்று பரிசோதனை செய்யுமாறு பொலிசாரை கேட்டுக்கொள்கின்றோம்.
தற்போது வரை எமது முழுமையான சேவைகளை வழங்கி வருகின்றோம். ஓரிரு தினங்களில் எரிபொருள் சீராக கிடைக்காவிட்டால் மட்டுப்படுத்தப்பட்ட சேவைகளையே வழங்க வேண்டிய நிலை ஏற்ப்படும் என்றார்.
வவுனியா பிரதேச செயலக பிரிவுக்குட்பட்ட 45 குடும்பங்களுக்கு வாழ்வாதார உதவிகள் வழங்கி வைக்கும் நிகழ்வு வவுனியா பிரதேச செயலகத்தின் கேட்போர் கூடத்தில் இன்று (28.02.2022) காலை 10.30 மணியளவில் இடம்பெற்றது.
பாராளுமன்ற உறுப்பினரும் மாவட்ட ஒருங்கினைப்புக்குழு தலைவருமான குலசிங்கம் திலீபனின் பன்முகப்படுத்தப்பட்ட நிதி ஒதுக்கீட்டில் வவுனியா பிரதேச செயலக பிரிவில் தெரிவு செய்யப்பட்ட 45 குடும்பங்களுக்கு,
தையல் இயந்திரம், ஆடு கோழி வளர்ப்பிற்கான பணம், விவசாயத்திற்காக மோட்டர் மற்றும் வேலி முள்ளுக்கம்பி, சமையல் உபகரணங்கள், சலூன் உபகரணங்கள் , பிரிண்டர் , வாகன திருத்தும் உபகரணங்கள் என்பன வழங்கி வைக்கப்பட்டன.
வவுனியா பிரதேச செயலாளர் ந.கமலதாசன் தலமையில் இடம்பெற்ற இந் நிகழ்வில் பாராளுமன்ற உறுப்பினரும் மாவட்ட ஒருங்கிணைப்புக்குழுத் தலைவருமான குலசிங்கம் திலீபன், வவுனியா மாவட்ட சமூர்த்தி பணிப்பாளர் பத்மரஞ்சன் உட்பட பாராளுமன்ற உறுப்பினர்களின் உத்தியோகத்தர்கள், அரச உத்தியோகத்தர்கள் உட்பட பயனாளிகள் என பலரும் கலந்து கொண்டனர்.
இலங்கை தமிழரசு கட்சியின் மாவட்ட அலுவலகம் வவுனியாவில் திறந்து வைக்கப்பட்டது.
தமிழரசுக்கட்சியின் வவுனியா மாவட்ட அலுவலகம் கட்சியின் பதில் செயலாளர் வைத்தியர் ப.சத்தியலிங்கம் தலைமையில் இன்று (28.02) இந்நிகழ்வு இடம்பெற்றது.
முன்னாள் யாழ் மாவட்ட பாராளுமன்ற உறுப்பினரும், கட்சியின் தலைவருமான மாவை சேனாதிராஜா அவர்களினால் வவுனியா வைத்தியசாலை சுற்றுவட்ட வீதியில் குறித்த அலுவலகம் திறந்து வைக்கபப்ட்டது.
இந்நிகழ்வில் யாழ் மாவட்ட பாராளுமன்ற உறுப்பினர்களான எம்.ஏ.சுமந்திரன், சி.சிறிதரன், முன்னாள் வடமாகாண சபை உறுப்பினர் து.ரவிகரன் மற்றும் கட்சியின் முக்கியஸ்தர்கள் ஆதரவாளர்கள் என பலரும் கலந்து கொண்டிருந்தனர்.
இதன்போது தமிழரசுக்கட்சியின் பிரதேசசபை உறுப்பினரொருவரால் மாணவர் ஒருவருக்கு வழங்குவதற்காக துவிச்சக்கரவண்டியொன்று மாவை சேனாதிராஜாவிடம் கையளிக்கப்பட்டது.
கிளிநொச்சி A9 வீதியில் கரடிப்போக்கு சந்திக்கு அண்மித்த பகுதியின் வீதியோரத்திலிருந்து இன்று சடலமொன்று மீட்கப்பட்டுள்ளது.
அடையாளம் காணப்படாத ஆணொருவரின் சடலமே இவ்வாறு மீட்கப்பட்டுள்ளதாக எமது பிராந்திய செய்தியாளர் தெரிவித்தார். இது தொடர்பான விசாரணைகளை கிளிநொச்சி பொலிஸார் முன்னெடுத்து வருகின்றனர்.
மேலும், விபத்தில் இந்த மரணம் ஏற்பட்டிருக்கலாம் என பொலிஸார் சந்தேகம் வெளியிட்டுள்ளனர்.
