அமெரிக்க சுற்றுலாப் பயணி..

இலங்கைக்கு வந்த அமெரிக்க சுற்றுலாப் பயணி ஒருவர் சிரமங்களுக்கு உள்ளாகி, மீண்டும் திரும்பிச் சென்ற சம்பவம் குறித்து விரிவான விசாரணைகளை நடத்துமாறு சுற்றுலாத்துறை அமைச்சர் பிரசன்ன ரணதுங்க சுற்றுலா அபிவிருத்தி அதிகார சபைக்கு உத்தரவிட்டுள்ளார்.

கடந்த 7 ஆம் திகதி இலங்கை வந்த இந்த அமெரிக்க சுற்றுலாப் பயணிக்கு போக்குவரத்து வசதிகளை பெற்றுக்கொள்ள முடியாமை மற்றும் தனது முகவர் நிறுவனத்துடன் தொடர்புகொள்ள முடியாத காரணம் ஆகியவற்றால், 5 மணி நேரத்திற்கு பின்னர் திரும்பிச் சென்றுள்ளார்.

குறித்த அமெரிக்க சுற்றுலாப் பயணி இது தொடர்பாக வெளியிட்டுள்ள தகவல்கள் தற்போது சமூக வலைத்தளங்களில் பகிரப்பட்டு வருகிறது. இந்த நிலையில், சம்பவம் தொடர்பாக விரிவான விசாரணைகளை நடத்தி, அறிக்கையை வழங்குமாறு,

பிரசன்ன ரணதுங்க, சுற்றுலா அபிவிருத்தி அதிகார சபையின் தலைவருக்கு உத்தரவிட்டுள்ளார். இது சம்பந்தமாக விசாரணைகள் நடத்தப்பட்டு வருவதாக சுற்றுலா அபிவிருத்தி அதிகார சபை கூறியுள்ளது.

ஹோட்டல் உணவு வகை..

இலங்கையில் ஹோட்டல் உணவு வகைகளின் விலைகள் உயர்த்தப்படுவதாக அறிவிக்கப்பட்டுள்ளது. சமையல் எரிவாயு, கோதுமை மா, பால் மா உள்ளிட்ட பொருட்களின்,

விலை அதிகரிப்பு காரணமாக ஹோட்டல் உணவு வகைகளின் விலைகளும் உயர்த்தப்படுவதாக அறிவிக்கப்பட்டுள்ளது. அகில இலங்கை சிற்றுண்டிச்சாலை உரிமையாளர் ஒன்றியத்தினால் இந்த அறிவிப்பு வெளியிடப்பட்டுள்ளது.

உணவுப் பொதி (lunch packet), ப்ரைட் றைஸ் (fried rice), கொத்து (kottu), பால் தேனீர் உள்ளிட்டனவற்றின் விலைகள் நாளை முதல் 10 ரூபாவினால் உயர்த்தப்படுவதாக தெரிவிக்கப்பட்டுள்ளது.

புதுமணத் தம்பதி..

புத்தளத்தில் அனுமதியின்றி திருமண நிகழ்வு நடத்திய நபர்கள் தனிமைப்படுத்த சுகாதார வைத்திய அதிகாரிகள் அலுவலகத்தின் சுகாதார பரிசோதகர்களின் சங்கம் நடவடிக்கை மேற்கொண்டுள்ளது.

தனிமைப்படுத்தப்பட்டவர்களில் திருமணம் செய்த தம்பதியும் உள்ளடங்குவதாக தெரியவந்துள்ளது. மதுரங்குளிய – கொத்தன்தீவு பிரதேச வீட்டில் திருமண நிகழ்வு ஒன்று நடத்தப்படுவதாக கடந்த 8ஆம் திகதி பிற்பகல் பொது சுகாதார பரிசோதகர்களுக்கு தகவல் வழங்கப்பட்டுள்ளது.

அதற்கமைய விசாரணை நடவடிக்கைகளுக்காக சுகாதார பரிசோதகர்கள் அந்த வீட்டிற்கு சென்றுள்ளனர். திருமண நிகழ்வில் கலந்து கொண்டவர்களில் அதிகமானோர் அங்கிருந்து வெளியேறியுள்ளனர்.

வீட்டில் இருந்தவர்களுக்கு கடுமையாக எச்சரித்த சுகாதார பரிசோதகர்கள் அவர்களை அந்த வீட்டிலேயே தனிமைப்படுத்த நடவடிக்கை மேற்கொண்டனர்.

எரிபொருளின் விலை..

விரைவில் எரிபொருள் விலைகளை அதிகரிக்க நேரிடும் என எரிசக்தி அமைச்சின் பேச்சாளர் ஒருவர் தெரிவித்துள்ளார். இலங்கை பெட்ரோலியக் கூட்டுத்தாபனம் பாரிய நஷ்டத்தை சந்தித்து வருவதால்,

எரிபொருட்களின் விலைகளை கட்டாயம் அதிகரிக்க வேண்டு் என இலங்கை பெட்ரோலியக் கூட்டுத்தாபனத்தின் தலைவர் சுமித் விஜயசிங்க கூறியுள்ளார்.

உலக சந்தையில் எரிபொருளின் விலை அதிகரித்துள்ளதாகவும் இந்த நஷ்டத்தை ஈடு செய்ய விலையை அதிகரிக்க வேண்டும் எனவும் இதற்காக அமைச்சரின் அனுமதியை கோரியுள்ளதாகவும் விஜேயசிங்க குறிப்பிட்டுள்ளார்.

அண்மையில் இலங்கையில் எரிபொருள் விலையேற்றத்தினால் நாட்டில் பல பொருட்களின் விலை உயர்ந்துள்ள நிலையில் மீண்டும் எரிபொருள் விலையேற்றம் அதிகரிக்கப்படுமாயின் பொது மக்கள் கடுமையான நெருக்கடிகளை சந்திக்க நேரிடும் என்று எதிர்கட்சியினர் கடுமையாக சாடியுள்ளனர்.

முஹமது மஷ்சுன் முசாதிக்..

உலக சாதனையொன்றை நிலைநாட்டும் முயற்சியில் மாத்தளை – கோன்காவில பிரதேசத்தைச் சேர்ந்த 36 வயதான முஹமது மஷ்சுன் முசாதிக் என்ற நபர் ஈடுபட்டுள்ளதாக செய்திகள் வெளியாகியுள்ளன.

ஆறு அடி ஆழமான குழியொன்றுக்குள் இறங்கி, அதற்கு மேல் தீயிட்டு ஆறு மணித்தியாலங்கள் தன்னால் ஆபத்து இன்றி குழிக்கு உள்ளே இருக்க முடியும் என குறித்த நபர் தெரிவித்துள்ளார்.

உலகில் எவரும் இவ்வாறான ஓர் முயற்சியை செய்தது இல்லை எனவும், உலகத்தின் கவனத்தை ஈர்க்கும் நோக்கில் இதனை தான் செய்வதாகவும் தெரிவித்துள்ளார்.

இந்த நபர் ஏற்கனவே நண்பர்களுடன் இணைந்து பல தடவைகள் இவ்வாறு பரீட்சார்த்த அடிப்படையில் முயற்சிகளில் ஈடுபட்டுள்ளதாக தெரிவித்துள்ளார்.

சில நாட்களுக்கு முன்னர் கமராக்களைக் கொண்டு நண்பர்களின் உதவியுடன் 2 மணித்தியாலங்களுக்கு மேல் ஆறு அடி ஆழமான குழியில் இறங்கி அதன் மேல் தீயிடச் சொல்லி குழியில் இருந்ததாகத் தெரிவிக்கின்றார். இது குறித்த காணொளி ஆதாரங்கள் தம்மிடம் உண்டு என அவர் குறிப்பிடுகின்றார்.

பாகிஸ்தானைச் சேர்ந்த ஒருவர் குழியொன்றில் இறங்கி மண்ணால் மூடி 21 நிமிடங்கள் குழியில் இருந்ததாகவும் இதுவே உலக சாதனையாக காணப்படுகின்றது எனவும் அவர் குறிப்பிடுகின்றார். எனினும், தமது உலக சாதனை முயற்சியானது மேலே தீயிட்டு குழிக்குள் இருப்பதாகும் எனத் தெரிவித்துள்ளார்.

பாணின் விலை..

இலங்கையில் இன்று நள்ளிரவு முதல் பாணின் விலையும் அதிகரிக்கப்படவுள்ளதாக அறிவிக்கப்பட்டுள்ளது. அதற்கமைய, 450 கிராம் பாணின் விலையை 5 ரூபாவால் அதிகரிக்க தீர்மானித்துள்ளதாக அகில இலங்கை வெதுப்பக உரிமையாளர்கள் சங்கம் தெரிவித்துள்ளது.

சமையல் எரிவாயு மற்றும் கோதுமை மாவின் விலைகள் அதிகரித்துள்ளதன் காரணமாக அனைத்து வெதுப்பக உணவு உற்பத்திகளின் விலைகளையும் அதிகரிக்க நேரிடும் என மலையகத்தில் உள்ள வெதுப்பக உரிமையாளர்கள் தெரிவித்துள்ளனர்.

இதனடிப்படையில் இன்று முதல் பாண், பனிஸ் உட்பட வெதுப்பக உணவுகளின் அனைத்து விலைகளும் அதிகரிப்பதை தவிர்க்க முடியாது எனவும் தெரிவித்துள்ளனர்.

அதனடிப்படையில் பனிஸ் உட்பட அனைத்து பேக்கரி வகை பொருட்களும் 5 ரூபா முதல் 10 ரூபா வரையில் விலை அதிகரிக்கப்படும் என தெரிவிக்கப்பட்டுள்ளது.

எரிவாயு..

இலங்கையில் நேற்றையதினம் எரிவாயுவின் விலை பாரியளவில் அதிகரிக்கப்பட்ட நிலையில், இன்று சிறியளவில் குறைக்க இணக்கம் காணப்பட்டுள்ளது.

நேற்று அதிகரித்த சமையல் எரிவாயு சிலிண்டர்களின் விலைகளை குறைக்க தீர்மானித்துள்ளதாக லிட்ரோ நிறுவனம் அறிவித்துள்ளது.
அதன்படி, 12.5 கிலோ கிராம் சமையல் எரிவாயு சிலிண்டரின் விலை 75 ரூபாவால் குறைக்கப்பட்டுள்ளது.

இதற்கமைய, 12.5 கிலோ கிராம் சமையல் எரிவாயு சிலிண்டரின் புதிய விலை 2,675 ஆக மாற்றமடைந்துள்ளது. 5 கிலோ கிராம் சிலிண்டரின் விலையை 30 ரூபாவாலும், 2.5 கிலோ கிராம் சிலிண்டரின் விலையை 14 ரூபாவாலும் குறைக்க அந்த நிறுவனம் தீர்மானித்துள்ளது.

சமையல் எரிவாயு..

சமையல் எரிவாயுவின் விலை பெரிய தொகையினால் உயர்த்தப்பட்டுள்ளது. லிற்றோ நிறுவனத்தின் 12.5 கிலோ கிராம் எடையுடைய சமையல் எரிவாயு சிலிண்டரின் விலை 1257 ரூபாவினால் உயர்த்தப்பட்டுள்ளது.

இதன்படி, 12.5 கிலோ கிராம் எடையுடைய சமையல் எரிவாயுவின் புதிய விலை 2750 ரூபாவாகும். இதுவரையில் 1493 ரூபாவிற்கு விற்பனை செய்யப்பட்டிருந்தமை குறிப்பிடத்தக்கது.

5 கிலோ கிராம் எடையுடைய எரிவாயுவின் விலை 503 ரூபாவினால் உயர்த்தப்பட்டுள்ளது. இதன்படி புதிய விலை 1101 ரூபாவாகும். 2.5 கிலோ கிராம் எடையுடைய சமையல் எரிவாயுவின் விலை 231 ரூபாவினால் உயர்த்தப்பட்டுள்ளது. இதன்படி புதிய விலை 520 ரூபாவாகும்.

ஜனாதிபதி கோட்டாபய..

ஜனாதிபதி கோட்டாபய ராஜபக்ச(Gotabhaya Rajapaksha), இலங்கை கிரிக்கெட் அணி வீரர் திசர பெரேராவுடன்(Tissara Perera) கிரிக்கெட் விளையாட்டில் ஈடுபட்டுள்ளார்.

இராணுவத்தின் 72ஆவது ஆண்டு விழாவை முன்னிட்டு அநுராதபுரம், சாலியபுர கஜபா ரெஜிமெண்ட் தலைமையத்தில் இன்று இடம்பெற்ற நிகழ்வில் ஜனாதிபதி கோட்டாபய ராஜபக்ச கலந்து கொண்டார்.

அங்கு நிர்மாணிக்கப்பட்டுள்ள கிரிக்கெட் மைதானத்தையும் திறந்து வைத்ததன் பின்னா் ஜனாதிபதி, இலங்கை அணி வீரர் வீரர் திசர பெரேராவுடன் கிரிக்கெட் விளையாடியமை அனைவரதும் கவனத்தை ஈர்த்தது. இந்த நிகழ்வில், முன்னாள் கிரிக்கெட் வீரரான அஜந்த மெண்டிஸ் உட்பட பலர் கலந்துகொண்டனர்.

கோவிட் தொற்று..

கோவிட் தொற்று முடிவுக்கு வந்து விட்டது என நினைத்து மக்கள் அசமந்தமாக செயற்பட்டால் பாரிய ஆபத்தை எதிர்நோக்க நேரிடும் என அரச வைத்திய அதிகாரிகள் சங்கத்தின் செயலாளர்,

வைத்தியர் கமல் பெரேரா(Kamal Perera) தெரிவித்துள்ளார்.
டிசம்பர் மாதமளவில் கோவிட் ஐந்தாம் அலை உருவாகும் அபாயம் உள்ளதாகவும் அவர் எச்சரிக்கை விடுத்துள்ளார்.

ஊரடங்குச் சட்டம் நீக்கப்பட்டு, நாடு திறக்கப்பட்டுள்ள நிலையில், மக்கள் கோவிட் தொற்றை மறந்து செயற்படுவதாகவும், அவர் அவர் குற்றம் சுமத்தியுள்ளார்.