விபத்து..

நுவரெலியா – ஹட்டன் வீதியில் நானு ஓயா – ரதெல்ல குறுக்கு வீதியில் இரண்டு கனரக வாகனங்கள் மோதியதில் மூவர் காயமடைந்துள்ளதாக நானுஓயா பொலிஸார் தெரிவித்துள்ளனர். இந்த விபத்து நேற்று (27) மாலை 6.00 மணியளவில் ஏற்பட்டுள்ளதாக பொலிஸார் தெரிவித்துள்ளனர்.

இந்த நிலையில், காயமடைந்தவர்களில் இருவரின் நிலைமை கவலைக்கிடமாக உள்ளதாகவும், சிகிச்சைக்காக நுவரெலியா பொது வைத்தியசாலையில் அனுமதிக்கப்பட்டுள்ளதாகவும் பொலிஸார் கூறியுள்ளனர்.

புகையிரத திணைக்களத்திற்குச் சொந்தமான கனரக வாகனமொன்று பட்டிப்பொலயிலிருந்து கொழும்பு நோக்கி சிலிப்பர் மரக்கட்டையை ஏற்றிச் சென்ற போது செங்குத்தான ரதெல்ல குறுக்கு வீதியில் மற்றுமொரு கனரக வாகனத்தை முந்திச் சென்ற போது சாரதியின் கட்டுப்பாட்டை இழந்த கனரக வாகனம் எதிரே வந்த கனரக வாகனத்துடன் மோதி வீதியை விட்டு விலகி விபத்துக்குள்ளாகியுள்ளது.

மற்றைய கனரக வாகனமும் வீதியை விட்டு விலகி மரத்தில் மோதியதில் இரண்டு கனரக வாகனங்களிலும் பயணித்த இருவர் மற்றும் புகையிரத திணைக்களத்திற்குச் சொந்தமான கனரக வாகனத்தின் சாரதி ஆகியோர் காயமடைந்துள்ளனர். இவ்விபத்து தொடர்பாக நானுஓயா பொலிஸார் மேலதிக விசாரணைகளை மேற்கொண்டு வருகின்றனர்.

தம்பதி மரணம்..

குருணாகல் மாவட்டம் கொகரெல்ல பகுதியில் இருந்து நுவரெலியாவுக்கு சுற்றுலாப் பயணம் சென்ற குழுவில் இடம்பெற்றிருந்த கணவன், மனைவி, தங்கியிருந்த ஹொட்டல் அறையில் உயிரிழந்த நிலையில் இன்று காலை மீட்கப்பட்டுள்ளதாக நுவரெலியா பொலிஸார் தெரிவித்துள்ளனர்.

குடும்பத்தினருடன் நுவரெலியா சென்றிருந்த இந்த தம்பதி உள்ளிட்டோர் நேற்று நள்ளிரவு வரை பாபிகியூ (Barbeque) அடுப்பில் இறைச்சியை சுட்டு சாப்பிட்டுள்ளனர். இதன் பின்னர் கணவனும் மனைவியும் கடும் குளிர் காரணமாக பாபிகியூ அடுப்பை அறைக்கு எடுத்துச் சென்று உறங்கியுள்ளனர்.

58 மற்றும் 59 வயதான இந்த தம்பதி மறுநாள் காலையில் எழுந்திருக்காத காரணத்தினால், குடும்பத்தினர் அவர்கள் தங்கி இருந்த அறையை திறந்துள்ளனர். அப்போது இரண்டு பேரும் இறந்த நிலையில் காணப்பட்டதாக பொலிஸார் தெரிவித்துள்ளனர்.

சம்பவ இடத்திற்கு சென்று விசாரணைகளை நடத்திய நுவரெலியா நீதவான், உடல்களை பிரேதப் பரிசோதனைகளுக்காக நுவரெலியா வைத்தியசாலையின் சட்ட வைத்திய அதிகாரியிடம் அனுப்பி வைக்குமாறு உத்தரவிட்டதாக பொலிஸார் குறிப்பிட்டுள்ளார்.

இலங்கையில் ஏற்பட்டுள்ள நெருக்கடி நிலையை சமாளிக்க வாரத்திற்கு வேலை நாட்களின் எண்ணிக்கையை நான்காக குறைத்து, மணிநேரத்தை அதிகரிக்க மத்திய வங்கி தீர்மானத்துள்ளது.

டொலர் தட்டுப்பாட்டினால் ஏற்பட்டுள்ள எரிபொருள் நெருக்கடிக்கு மத்தியில் நாட்டின் பொருளாதாரம் வீழ்ச்சியடைவதைத் தடுப்பதற்கு நடவடிக்கை எடுப்பதற்கான யோசனையொன்றை ஆளுநர் அஜித் நிவாட் கப்ரால் அரசாங்கத்திடம் சமர்ப்பித்துள்ளார்.

எரிபொருள் நெருக்கடி தொடர்பில் ஆராய்வதற்காக கடந்த செவ்வாய்க்கிழமை நடைபெற்ற விசேட அமைச்சரவைக் கூட்டத்தில் மத்திய வங்கியின் ஆளுநர் அஜித் நிவாட் கப்ரால் இந்த யோசனையை அரசாங்கத்திடம் சமர்ப்பித்துள்ளார்.

அரச வங்கிகள் இரண்டு இலங்கை பெற்றோலியக் கூட்டுத்தாபனத்திற்கு தொடர்ந்து கடன் வழங்கினால், வங்கிகள் இரண்டின் வீழ்ச்சியை தடுப்பது கடினமாகிவிடும்.

அந்த இரண்டு வங்கிகளிடமிருந்தும் கூட்டுத்தாபனத்திற்கு கடன் வழங்குவதை உடனடியாக நிறுத்தவும் மத்திய வங்கி யோசனை முன்வைத்துள்ளது.

பெற்றோலிய கூட்டுத்தாபனம் இரண்டு அரச வங்கிகளுக்கும் செலுத்த வேண்டிய கடன் தொகை 56 ஆயிரம் கோடி ரூபாய் என தகவல் வெளியாகியுள்ளது.

இந்நிலையில், கூட்டுத்தாபனத்திற்கு மேலும் கடனுதவி வழங்கினால் இரண்டு வங்கிகளும் வீழ்ச்சியடைவதற்கும் பொருளாதாரத்தில் பாரிய நெருக்கடிக்கும் வழிவகுக்கும் என்பதால், உடனடியாக மாற்று நடவடிக்கைகளை எடுக்குமாறு மத்திய வங்கி தெரிவித்துள்ளது.

எரிபொருள் விற்பனையில் பெற்றோலிய கூட்டுத்தாபனத்திற்கு ஏற்படும் நஷ்டத்தைக் குறைப்பதற்காக எரிபொருள் விலையை அதிகரிக்குமாறும் மத்திய வங்கி அரசாங்கத்திற்கு யோசனை முன்வைத்துள்ளது.

வாரத்திற்கு வேலை நாட்களின் எண்ணிக்கையை நான்காக குறைத்து, மணிநேரத்தை அதிகரிக்க மத்திய வங்கி தீர்மானத்துள்ளது.

இதன்படி, நிறுவனங்களின் செயற்பாடுகளை காலை 7.30 மணிக்கு ஆரம்பித்து மாலை 5.30 மணிவரை தொடரவும் யோசனைகள முன்வைக்கப்பட்டுள்ளது.

நிறுவனங்களில் பணிபுரியும் ஊழியர்கள் காலை 9.00 மணி முதல் மாலை 3.00 மணி வரை வேலை செய்வதற்கும் முன்னதாக வீட்டிற்குச் செல்லும் திட்டத்தையும் மத்திய வங்கி பரிந்துரைத்துள்ளது.

தனிப்பட்ட வாகனங்கள் பயன்படுத்துவதை குறைத்து பொதுப் போக்குவரத்தில் மக்களை திருப்பிவிடவும் மத்திய வங்கி கோரிக்கை விடுத்துள்ளது.

இதேவேளை, ஏற்பட்ட நெருக்கடி நிலை மற்றும் எரிபொருளை சிக்கமாக பயன்படுத்த வேண்டியதன் அவசியத்தை பொதுமக்களுக்கு உணர்த்தும் வகையில் பாரிய ஊடகப் பிரச்சாரத்தை மேற்கொள்ளுமாறும் மத்திய வங்கி முன்வைத்துள்ள யோசனையில் குறிப்பிடப்பட்டுள்ளது.

அனங்கன் சின்னையா..

ஜெர்மனியின் வடமேற்கு மாநிலத்தில் மிகக்குறைந்த வயதில் இரு துறைகளில் உயர் பட்டங்களைப் பெற்று தமிழ் இளைஞனான அனங்கன் சின்னையா பெருமை சேர்த்துள்ளார்.

ஜெர்மனியின் வடமேற்கு மாநிலத்தில் வாழ்ந்துவரும் அனங்கன் சின்னையா என்ற இளைஞன் தனது 29 ஆவது வயதில் மாஸ்ட லோ மற்றும் பட்டய கணக்காளராக (Master Low and Chartered Accountant) குறைந்த வயதில் கல்விப் புலத்தில் சாதனை படைத்துள்ளார்.

அனங்கன் சின்னையாவைக் கௌரவிக்கும் முகமாகக் கடந்த 22 ஆம் திகதி ஜெர்மனியின் வடமேல் மாநில நிதி அமைச்சு தனது உத்தியோகபூர்வ இலச்சினை பொறிக்கப்பட்ட சான்றிதழ் வழங்கி கௌரவித்துள்ளது.

இவர் யாழ்ப்பாணத்தைப் பூர்வீகமாகக் கொண்ட இலங்கை இந்து பௌத்த கலாச்சார பேரவையின் பொதுச்செயலாளரும் ஜெர்மனியின் இலங்கைக்கான குடிவரவு குடியகல்வு சட்ட ஆலோசனை நிறுவனத்தின் தலைவருமான தேசமானிய எம்.டி இராமச்சந்திரனின் ஒரே ஒரு புதல்வர் ஆவார்.

மின்வெட்டு..

நாட்டில் நாளைய தினம் 5 மணித்தியாலத்துக்கும் அதிகநேரம் மின் துண்டிப்பு மேற்கொள்ளப்பட உள்ளது. மின்சார உற்பத்திக்கு தேவையான எரிபொருள் பற்றாக்குறையால் நாளைய தினம் மின்துண்டிப்பை மேற்கொள்ள அனுமதி வழங்குமாறு,

இலங்கை மின்சார சபை விடுத்த கோரிக்கைக்கு பொதுப் பயன்பாடுகள் ஆணைக்குழு அனுமதி அளித்துள்ளது. இதற்கமைய, A,B,C ஆகிய வலயங்களுக்கு 4 மணித்தியாலங்களும் 40 நிமிடங்களும் மின்சாரம் துண்டிக்கப்படவுள்ளது.

P,Q,R,S,T,U,V,W ஆகிய வலயங்களுக்குட்பட்ட இடங்களில், 5 மணித்தியாலங்களும் 15 நிமிடங்களும் மின்துண்டிப்பு நடைமுறைப்படுத்தப்பட உள்ளதாக மேலும் தெரிவிக்கப்பட்டுள்ளது.

இணையவழி மோசடிகள்..

இலங்கையில் இணையவழி மோசடிகள் தொடர்பில் பொதுமக்கள் எச்சரிக்கையுடன் இருக்க வேண்டும் என சிரேஷ்ட பிரதி பொலிஸ் மா அதிபர் அஜித் ரோஹன தெரிவித்துள்ளார். இலங்கையில் இணைய வழி குற்றங்களின் எண்ணிக்கை வெகுவாக அதிகரித்து வருவதாக பொலிஸார் தெரிவித்துள்ளனர்.

இலங்கை கணினி குற்ற விசாரணை பிரிவிற்கு நாளாந்தம் 15 முதல் 20 வரையான இணைய வழி குற்றங்கள் குறித்த முறைப்பாடுகள் கிடைப்பதாக சி பிரதி பொலிஸ் மாஅதிபர் அஜித் ரோஹண தெரிவித்துள்ளார்.

எனவே, இணைய வழி மோசடிகள் குறித்து, பொதுமக்கள் எச்சரிக்கையுடன் இருக்க வேண்டும் எனவும் அவர் கேட்டுக்கொண்டுள்ளார். இவ்வாறான குற்றச் செயல்களில் ஈடுபடுவோர், பிடியாணை உத்தரவு இன்றி கைது செய்யப்படுவார்கள் எனவும் அவர் குறிப்பிட்டுள்ளார்.

மாவிட்டபுரம் பகுதியில்..

யாழ். மாவிட்டபுரம் பகுதியில் புகையிரத பாதைக்குள் மோட்டார் சைக்கிளுடன் நுழைந்த குடும்பஸ்தர் மீது புகைரதம் மோதியதில் அவர் சம்பவ இடத்திலேயே உயிரிழந்துள்ளார்.

குறித்த சம்பவம் இன்று மதியம் 12 மணியளவில் இடம்பெற்றுள்ளது. மக்கள் பாதுகாப்பு கருதி போடப்பட்டிருந்த பாதுகாப்பு கடவை பூட்டப்பட்டிருந்த நிலையிலும் குறித்த நபர் அதனை மீறி புகையிரத பாதைக்குள் நுழைந்துள்ளார்.

இதன்போது காங்கேசன்துறையிலிருந்து கொழும்பு நோக்கிப் பயணித்த புகையிரதம் அவர் மீது மோதியுள்ளது. விபத்தில் பண்டத்தரிப்பு – சாந்தை பகுதியைச் சேர்ந்த சதாசிவம் சசிக்குமார் (வயது 46) என்பவரே உயிரிழந்துள்ளார்.

அவரது சடலம் உடற்கூற்றுப் பரிசோதனைகளுக்காக யாழ். போதனா வைத்தியசாலைக்குக் கொண்டு செல்லப்பட்டுள்ளது. சம்பவம் தொடர்பில் காங்கேசன்துறை பொலிஸார் மேலதிக விசாரணைகளை மேற்கொண்டு வருகின்றனர்.

உக்ரேனில்..

ரஷ்யா – உக்ரைன் நெருக்கடிக்கு மத்தியில் பல உக்ரேனியர்கள் அச்சத்திலும் பாதுகாப்பின்மையிலும் வாழ்கின்றனர். இந்நிலையில் உக்ரைனில் வசிக்கும் இலங்கை இளைஞன் ஒருவர் தெரிவித்த கருத்து ஒன்றின் காணொளி தற்போது சமூக வலைத்தளங்களிலும் செய்திகளிலும் பகிரப்பட்டு வருகின்றது.

தக்ஷித் விஜேசேகர என்ற இலங்கை இளைஞனே இவ்வாறு குறித்த காணொளியை வெளியிட்டுள்ளார். பல்கலைக்கழக விடுதியில் நான் இருக்கின்றேன். நான் பாதுகாப்பாக இருக்கின்றேன். எனது நண்பர் ஒருவர் சுரங்க ரயிலில் உள்ளார். எங்கள் பாதுகாப்பு குறித்து தூதரகத்திடம் பேசியுள்ளேன்.

துருக்கி தூதரகம் எங்களை குறித்து ஆராய்ந்து பார்த்து வருகின்றது. அதற்கு நன்றி தெரிவித்துக் கொள்ள விரும்புகின்றேன். வெளியே நகரங்களுக்கு செல்ல முடியாத நிலைமை ஏற்பட்டுள்ளது.

இந்நிலையில் என்னையும் தனது நண்பர்களை லிவிவ் நகருக்கு அழைத்துச் சென்று அங்கிருந்து போலந்து எல்லை வழியாக இலங்கைக்குத் திரும்ப ஏற்பாடு செய்யுமாறு கேட்டுக்கொள்கிறார்.

புகையிரத, வாகன சேவைகள் போன்ற போக்குவரத்து சேவைகள் எதுவும் தற்போது இயங்கவில்லை . தன்னையும் தனது தரப்பினரையும் விரைவில் இலங்கைக்கு அழைத்து வர நடவடிக்கை எடுக்குமாறும் அவர் அந்த காணொளி ஊடாக கோரிக்கை விடுத்துள்ளார்.

தங்கத்தின் விலை..

உலக சந்தையில் தங்கத்தின் விலையுடன் ஒப்பிடுகையில் இலங்கையில் தங்கத்தின் விலை வேகமாக அதிகரித்து வருவதாக அகில இலங்கை ஆபரண வர்த்தக சங்கம் தெரிவித்துள்ளது.

தங்கத்தின் விலை உயர்வால் வழக்கத்தை விட வர்த்தகம் பாரிய வீழ்ச்சியடைந்துள்ளதாக சங்கத்தின் அதிகாரி தெரிவித்துள்ளார்.
நாளாந்தம் தங்கத்தின் விலை நான்கு மடங்கு அதிகரிக்கிறது. அதற்கமைய, நாளொன்றுக்கு 5,000 ரூபாய் அதிகரிப்பு ஏற்படுவதாக அவர் குறிப்பிட்டுள்ளார்.

தங்கத்தின் விலை அதிகரிப்பு காரணமாக வெளிநாடுகளில் இருந்து வரும் இலங்கையர்கள் டொலர்களுக்கு பதிலாக தங்கத்தை கொண்டுவரும் பழக்கத்தை கொண்டுள்ளனர்.

தங்கத்தின் விலை தொடர்ந்தும் உயரும் நிலை காணப்படுவதாகவும், நுகர்வோர் இந்த விலை உயர்வை தாங்கிக் கொள்ள முடியாது எனவும் நகை வியாபாரிகள் மேலும் தெரிவித்தனர்.

பேராதனையில் இருந்து அக்மீமன பகுதியை நோக்கிச் சென்ற சொகுசு காரொன்று விபத்திற்குள்ளானதில் ஒருவர் உயிரிழந்துள்ளதுடன் நால்வர் படுகாயமடைந்துள்ளனர்.

பேராதனை பல்கலைக்கழகத்தில் நடைபெற்ற பட்டமளிப்பு விழாவில் கலந்து கொண்டு வீடு திரும்பும் போது, ஒரே குடும்பத்தைச் சேர்ந்த 8 பேரை ஏற்றிச் சென்ற சொகுசு காரொன்றே இவ்வாறு விபத்துக்குள்ளாகியுள்ளது.

குறித்த கார் சீமெந்து ஏற்றிச் சென்ற லொறியுடன் மோதியதால் இந்த விபத்து நேர்ந்துள்ளதுடன், அக்மீமன பகுதியைச் சேர்ந்த யு.கமகே ரத்னசேன என்ற 67 வயதுடைய நபர் ஒருவரே உயிரிழந்துள்ளார்.

பேராதனைப் பல்கலைக்கழகத்தில் நேற்றைய தினம் நடைபெற்ற பட்டமளிப்பு விழாவில் பட்டம் பெற்ற 29 வயதுடைய மருத்துவ பட்டதாரி தனது குடும்பத்துடன் அக்மீமனவில் உள்ள தனது வீட்டிற்கு அதிவேக வீதியில் சென்று கொண்டிருந்த போதே இந்த விபத்து இடம்பெற்றுள்ளது.

நேற்று பட்டம் பெற்ற 29 வயதுடைய மருத்துவ பட்டதாரி தனது குடும்பத்துடன் அக்மீமனவில் உள்ள தனது வீட்டிற்கு அதிவேக வீதியில் சென்று கொண்டிருந்த போது இந்த விபத்து இடம்பெற்றுள்ளது.

உயிரிழந்தவர் காரின் பின் இருக்கையில் பயணித்தவர் எனவும் அவர் வாகனத்தை ஓட்டியவரின் தந்தை எனவும் தெரிவிக்கப்பட்டுள்ளது.

காயமடைந்த நால்வரில் 29 வயதுடைய மருத்துவப் பட்டதாரியும், காரை ஓட்டிய அவரது சகோதரரும், அவர்களின் ஏழு, நான்கரை வயதுடைய மூன்று பிள்ளைகளும் உள்ளடங்குவதாக தெரியவந்துள்ளது.

விபத்து..

கொழும்பிலிருந்து திருகோணமலை நோக்கி சென்ற சொகுசு பேருந்தொன்று, லொறியுடன் மோதி விபத்திற்கு இலக்கானதில் எட்டு பேர் படுகாயமடைந்துள்ளனர். குறித்த சம்பவம் இன்று (26.02.2022) அதிகாலை இடம்பெற்றுள்ளது.

கொழும்பிலிருந்து பயணித்த சொகுசு பேருந்து கலேவல பொலிஸ் பிரிவிற்கு உட்பட்ட பகுதியில் லொறியுடன் மோதி விபத்திற்கு இலக்காகியுள்ளது. இந்த சம்பவத்தில் பேருந்தில் பயணித்த 8 பேர் படுகாயமடைந்த நிலையில் தம்புள்ளை வைத்தியசாலையில் சிகிச்சை பெற்று வருகின்றனர். சம்பவம் தொடர்பான மேலதிக விசாரணைகளை கலேவல பொலிஸார் முன்னெடுத்து வருகின்றனர்.

அத்துடன், திருகோணமலை மொரவெவ எரிபொருள் நிரப்பு நிலையத்தில் உறங்கிக்கொண்டிருந்தவர் மீது டிப்பர் வாகனம் மோதியதில் காயங்களுக்கு உள்ளான நிலையில் ஒருவர் மஹதிவுல்வெவ பிரதேச வைத்தியசாலையில் அனுமதிக்கப்பட்டுள்ளார்.

இவ்விபத்து இன்று (26) அதிகாலை 2.30 மணியளவில் இடம்பெற்றுள்ளது. சம்பவம் குறித்து மேலும் தெரியவருவதாவது, மொரவெவ பிரதேசத்தில் கிரவெல் ஏற்றும் லொறிகள் எரிபொருள் நிரப்புவதற்காக எரிபொருள் நிரப்பு நிலையத்திற்கு சென்று,

எரிபொருள் வரும்வரை உறங்கிக் கொண்டிருந்த சந்தர்ப்பத்தில் சக லொறி சாரதி ஒருவர் லொறியை பின்புறமாக நிறுத்துவதற்காக சென்றபோது உறங்கிக் கொண்டிருந்த சக நண்பரை அவதானிக்காமல் டிப்பர் வாகனத்தை செலுத்தியுள்ளார்.

இந்நிலையில் எரிபொருள் நிரப்பு நிலையத்திற்கு அருகில் உறங்கிக் கொண்டிருந்த நபரின் தலைப்பகுதி டயர் ஓரத்தில் பட்டு காயங்ளுக்கு உள்ளான நிலையில் அவசர ஆம்புலன்ஸ் 1990 வண்டி மூலம் வைத்தியசாலைக்கு கொண்டு செல்லப்பட்டதாக தெரியவருகின்றது.

குறித்த நபர் மஹதிவுல்வெவ பிரதேச வைத்தியசாலையில் தற்போது சிகிச்சை பெற்று வருகின்றார். இவ் விபத்து தொடர்பிலான மேலதிக விசாரணை மொரவெவ பொலிஸார் மேற்கொண்டு வருகின்றனர்.