வாட்ஸ்அப் மற்றும் டெலிகிராம் வழியாக நடத்தப்படும் அபாயகரமான புதிய நிதி மோசடி குறித்து பொலிஸார் எச்சரிக்கை விடுத்துள்ளனர். அந்த வகையில் வாட்ஸ்அப் மற்றும் டெலிகிராம் வழியாக தீங்கிழைக்கும் “.apk” கோப்புகள் அனுப்பப்படுகின்றன.

இந்த கோப்புகள் பெரும்பாலும் திருமண அழைப்பிதழ்கள், மின்சாரக் கட்டண ரசீதுகள் அல்லது லாட்டரி அறிவிப்புகள் போல காணப்படுகின்றன. அவற்றைக் கிளிக் செய்தவுடன், அவை கைபேசிகளில் தீங்கு விளைவிக்கும் மென்பொருளை நிறுவுகின்றன.

இது, ஹேக்கர்கள் சாதனத்தின் திரையைக் கட்டுப்படுத்தவும், வங்கிக் கணக்குகளுடன் இணைக்கப்பட்ட இரகசிய ஒருமுறை கடவுச்சொல் (OTP) குறியீடுகள் உட்பட குறுஞ்செய்திகளைப் படிக்கவும் அனுமதிக்கிறது.

சந்தேகத்திற்கிடமான “.apk” கோப்புகள் நண்பர்களிடமிருந்து வந்ததாகத் தோன்றினாலும், அவற்றை ஒருபோதும் பதிவிறக்கம் செய்யவோ அல்லது திறக்கவோ கூடாது.

செயலிகளைப் பெற எப்போதும் கூகுள் பிளே ஸ்டோர் அல்லது ஆப்பிள் ஆப் ஸ்டோரைப் பயன்படுத்துங்கள், மேலும் கைபேசி அமைப்புகளில்

உள்ள ‘அறியப்படாத செயலிகளை நிறுவவும்’ என்ற விருப்பம் முடக்கப்பட்டுள்ளதா என்பதை உறுதிப்படுத்திக் கொள்ளுங்கள் என கூறப்பட்டுள்ளது.

மேலும், தாங்கள் இதற்குப் பலியானதாகச் சந்தேகிக்கும் எவரும் உடனடியாகத் தங்கள் வங்கிக் கணக்குகளை முடக்கி,

அருகிலுள்ள பொலிஸ் நிலையம் அல்லது குற்றப் புலனாய்வுத் துறையின் கணினிக் குற்றப் பிரிவிடம் இதுகுறித்துத் தெரிவிக்க வேண்டும் என பொலிஸார் அறிவுறுத்தியுள்ளனர்.

களுத்துறை, வரக்காகொட பகுதியில் இடம்பெற்ற மோட்டார் சைக்கிள் விபத்தொன்றில் இளைஞர் ஒருவர் உயிரிழந்துள்ளார். குறித்த இளைஞன் சென்ற மோட்டார் சைக்கிள் வீதியோரத்தில் இருந்த தொலைபேசி கம்பத்தில் மோதியதில் விபத்து ஏற்பட்டுள்ளது.

விபத்தில் உயிரிழந்தவர், தியாகடுவ பகுதியை சேர்ந்த 24 வயதுடைய தாரக்க குமார விஜேசிங்க என அடையாளம் காணப்பட்டுள்ளார். உயிரிழந்தவர் ஹொரணையில் உள்ள ஆடைத் தொழிற்சாலை ஒன்றில் பணி புரிந்து வந்தவர் என பொலிஸார் தெரிவித்தனர்.

மத நிகழ்வு ஒன்றில் கலந்துகொண்டு மீண்டும் தனது வீட்டிற்கு மோட்டார் சைக்கிளில் சென்றுகொண்டிருந்த போதே விபத்து ஏற்பட்டுள்ளது. சம்பவம் குறித்து வரகாகொட பொலிஸார் மேலதிக விசாரணைகளை மேற்கொண்டு வருகின்றனர்.

கம்பஹா – பஹல இம்புல்கொட பகுதியைச் சேர்ந்த 13 வயதுடைய சிதுல நிம்சத் எனும் சிறுவன் நேற்று (22) முதல் காணாமல் போயுள்ளதாக உறவினர்கள் தெரிவித்துள்ளனர்.

அவர் குறித்து ஏதேனும் தகவல் தெரிந்தால் 077 555 4959 அல்லது 077 555 4979 ஆகிய தொலைபேசி எண்களுக்கு அறிவிக்குமாறு உறவினர்கள் கேட்டுக்கொண்டுள்ளனர்.

அவர் கடைசியாக நீல நிறத்திலான ‘ஸ்ரீலங்கா கிரிக்கெட்’ டி-ஷர்ட் மற்றும் கிரீம் நிறத்திலான அரைக்காற்சட்டை அணிந்திருந்தார் எனத் தெரிவிக்கப்பட்டுள்ளது.

களுத்துறை ஹொரானாவில் வீதியில் நடந்து சென்ற பெண் மீது மிளகாய்த்தூள் வீசித் தாக்கி, அவரிடமிருந்து மூன்றரை பவுண்டு எடையுள்ள தங்க சங்கிலியை கொள்ளையடித்த சந்தேக நபர், பிரதேச மக்களால் பிடிக்கப்பட்டு பொலிஸாரிடம் ஒப்படைக்கப்பட்டுள்ளார்.

பிரதேச மக்களின் தீவிர முயற்சிகளுக்குப் பிறகு, பிலியந்தலாவைச் சேர்ந்த நாற்பத்து நான்கு வயதுடைய அந்த நபர் ஹொரானா தலைமையகக் காவல் நிலையத்தில் ஒப்படைக்கப்பட்டுள்ளார்.

இந்தக் கொள்ளையை நடத்துவதற்காக இரண்டு சந்தேக நபர்கள் மோட்டார் சைக்கிளில் வந்தமை பொலிஸ் விசாரணையில் தெரியவந்துள்ளது . சந்தேக நபர்களில் ஒருவர் உள்ளூர் மக்களால் பிடிக்கப்பட்ட நிலையில், மற்றொருவர் சம்பவ இடத்திலிருந்து தப்பி ஓடிவிட்டார்.

அவரைக் கைது செய்வதற்கான விரிவான விசாரணையை காவல்துறை ஏற்கனவே தொடங்கியுள்ளது. கைது செய்யப்பட்ட சந்தேக நபரிடம் நடத்தப்பட்ட நீண்ட விசாரணையில், இருவரும் சில காலமாக கொள்ளையிட்டு வந்தமை தெரியவந்துள்ளது.

கைது செய்யப்பட்ட சந்தேக நபர் குறித்து காவல்துறை நடத்திய பின்னணிச் சோதனைகளில், அவர் ஒரு தீவிர போதைப்பொருள் பழக்கத்திற்கு அடிமையானவர் என்பது தெரியவந்துள்ளது.

போதைப்பொருள் வைத்திருந்ததற்காகவும், விற்பனை செய்ததற்காகவும் இதற்கு முன்பும் குற்றசாட்டுக்கள் பதிவாகியுள்ளதாக பொலிஸார் தெரிவித்துள்ளனர்.

திருடப்பட்ட தங்க சங்கிலியின் ஒரு பகுதி மட்டுமே சந்தேக நபரிடமிருந்து காவல்துறையினரால் கைப்பற்றப்பட்டது. மேலும், தங்க சங்கிலியின் மீதமுள்ள காணாமல் போன பகுதியைக் கண்டுபிடிப்பதற்காக ஹொரானா தலைமையக காவல்துறையினர் மேலதிக விசாரணைகளை மேற்கொண்டு வருகின்றனர்.

நாட்டில் மின் தடையை நடைமுறைப்படுத்தும் எண்ணம் அரசாங்கத்திற்கு இல்லை என அமைச்சர் நளிந்த ஜயதிஸ்ஸ தெரிவித்துள்ளார்.

இது தொடர்பில் அவர் மேலும் தெரிவிக்கையில், தடையற்ற மின்சார விநியோகத்தை உறுதிப்படுத்துவது அரசாங்கத்தின் முதன்மையான முன்னுரிமையாகும்.

செலவு குறைந்த மற்றும் நம்பகமான மின் உற்பத்தி ஆதாரங்களில் கவனம் செலுத்துவதன் மூலம் தற்போதைய நிலைமை முகாமைத்துவம் செய்யப்பட்டு வருகிறது என சுட்டிக்காட்டியுள்ளார்.

இதேவேளை, 2025 – 2026ஆம் ஆண்டிற்கான நிலக்கரி கொள்வனவு செயன்முறையில் ஏற்பட்ட குறைபாடுகள் காரணமாக தேவையான மின்சாரத்தை உற்பத்தி செய்ய முடியாமல் போனால், அதன் சுமையை மக்கள் மீது சுமத்தப் போவதில்லை என இலங்கை பொதுப் பயன்பாடுகள் ஆணைக்குழு தெளிவுபடுத்தியுள்ளது.

ஜனாதிபதியும் இந்த நிலைப்பாட்டினை உறுதிப்படுத்தியுள்ளார். நிலக்கரி விநியோகத்தில் தவறிழைத்த நிறுவனங்களிடமிருந்து அபராதங்களை அறவிடுவதற்கான சாத்தியக்கூறுகள் உள்ளன.

சட்ட நடவடிக்கை

அவ்வாறு அறவிடப்படும் தொகை போதுமானதாக இல்லையெனில் சட்ட நடவடிக்கை எடுக்கப்படும். இந்த நிதி சுமையை திறைசேரியோ அல்லது பொதுமக்களோ ஏற்கத் தயாராக இல்லை என குறிப்பிட்டுள்ளார்.

நாட்டின் பல பகுதிகளுக்கு இடியுடன் கூடிய மழை மற்றும் மின்னல் தாக்கம் தொடர்பில் வளிமண்டலவியல் திணைக்களம் எச்சரிக்கை விடுத்துள்ளது.

அதன்படி, மேல், சப்ரகமுவ, மத்திய, வடமேல், வடமத்திய, தென், ஊவா மாகாணங்களிலும் அம்பாறை மற்றும் மட்டக்களப்பு மாவட்டங்களிலும் இன்று பிற்பகல் இடியுடன் கூடிய மழையும், மின்னல் தாக்கங்களும் ஏற்படக்கூடும் என எதிர்பார்க்கப்படுவதாக தெரிவிக்கப்பட்டுள்ளது.

இது தொடர்பான முன்னறிவிப்பில் மேலும், இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்று வீசக்கூடும்.

எனவே, மின்னல் தாக்கங்களினால் ஏற்படக்கூடிய பாதிப்புகளைக் குறைத்துக்கொள்ள தேவையான முன்னெச்சரிக்கை நடவடிக்கைகளை மேற்கொள்ளுமாறு வளிமண்டலவியல் திணைக்களம் பொதுமக்களை கேட்டுக்கொண்டுள்ளது.

சர்வதேச சந்தையில் தங்கத்தின் விலை இன்று (23.04.2026) அதிகரிப்பை பதிவு செய்துள்ளதாக தகவல்கள் தெரிவிக்கின்றன. அதற்கமைய, ஒரு அவுண்ஸ் தங்கத்தின் விலை 4,734.42 அமெரிக்க டொலராக விற்பனை செய்யப்படுகிறது.

அதேநேரம், வெள்ளி ஒரு அவுண்ஸ் இன்றையதினம் 77.69 அமெரிக்க டொலராக விற்பனை செய்யப்படுகிறது.

கொழும்பு செட்டியார்தெரு தகவல்களின் படி இன்றைய தினம் 24 கரட் தங்கப் பவுணொன்றின் விலை 396000 ரூபாவாக பதிவாகியுள்ளது. அத்துடன் 22 கரட் தங்கப் பவுணொன்றின் விலை 364300 ரூபாவாக காணப்படுகின்றமை குறிப்பிடத்தக்கது.