இலங்கையின் வடமாகாண சபையில் முல்லைத்தீவு மாவட்டத்திற்கு அமைச்சுப் பதவியொன்று வழங்கப்பட வேண்டும் என்று அங்குள்ள பொது அமைப்புக்கள் ஒன்றிணைந்து கவன ஈர்ப்பு நடவடிக்கையின் மூலம் கோரிக்கை விடுத்திருக்கின்றன.
முல்லத்தீவு மாவட்டத்தில் உள்ள பெண்கள் அமைப்புக்கள், விவசாய, மீன்பிடிதுறை சார்ந்த அமைப்புக்கள் ஆகியவற்றின் பிரதிநிதிகள் முல்லைத்தீவு அரச செயலகத்தின் முன்னால் கோரிக்கைகள் அடங்கிய சுலோக அட்டைகளைத் தாங்கிய வண்ணம் வீதியோரத்தில் கூடி நின்று தமது கவன ஈர்ப்பு நடவடிக்கையை மேற்கொண்டிருந்தனர்.
சுனாமி பேரலைகளினாலும், யுத்தத்தினாலும் மோசமாகப் பாதிக்கப்பட்டுள்ள மக்களைக் கொண்ட முல்லைத்தீவு மாவட்டம் அமைச்சுப் பொறுப்புக்கள வழங்கப்படாமல் புறகக்கணிக்கப்பட்டுள்ளதாகக் குற்றம்சாட்டியுள்ள அவர்கள், தமது மாவட்டத்தில் இருந்து தெரிவு செய்யப்பட்டுள்ள நான்கு மாகாண சபை உறுப்பினர்களில் ஒருவருக்கு ஓர் அமைச்சுப் பதவி வழங்கப்பட வேண்டும் என்று தமிழ்த் தேசிய கூட்டமைப்பின் தலைவர் ஆர்.சம்பந்தனிடம் மகஜர் மூலம் கோரியுள்ளனர்.
தமிழ்த் தேசிய கூட்டமைப்பின் தலைவர் ஆர்.சம்பந்தன் மற்றும் மாகாண முதலமைச்சர் சி.வி.விக்னேஸ்வரன் ஆகியோருக்கு அனுப்பி வைப்பதற்காக தமது கோரிக்கைள் அடங்கிய மகஜரை முல்லைத்தீவு மாவட்ட மாகாண சபை உறுப்பினர்களாகிய டாக்டர் சிவமோகன் மற்றும் எம்.ரவிகரன் ஆகியோரிடம் பொது அமைப்புக்களின் பிரதிநிதிகள் கையளித்துள்ளனர்.
நான்கு பேர் அடங்கிய மாகாண சபை அமைச்சரவையை அமைப்பதற்காகப் பல தடவைகள் தமிழ்த் தேசிய கூட்டமைப்பின் அங்கத்துவ கட்சிகளின் தலைவர்கள் கூடி பேச்சுக்கள் நடத்தியுள்ள போதிலும், இன்னும் முடிவுகள் எதுவும் எட்டப்படவில்லை என தெரிவிக்கப்பட்டுள்ளது.
இந்த நிலையில், மாகாணசபை அமைச்சர்களாகத் தெரிவு செய்யப்பட்டுள்ளவர்களின் விபரங்களை முதலலைச்சர் சி.வி.விக்னேஸ்வன் வெளியிடுவார் என்று எதிர்பாபர்க்கப்படுகின்றது.
வவுனியா மாவட்டத்திலுள்ள 22 தனியார் மருந்தகங்களில் சுகாதார திணைக்களத்தின் அதிகாரிகள் திடீர் பரிசோதனைகளை மேற்கொண்டனர்.
பதிவு செய்யப்பட்ட மருந்தகங்கள் பலவற்றில் மருந்தாளர்கள் பிரசன்னமாகியிருக்காமை அவதானிக்கப்பட்டதாகவும் பெரும்பாலான மருந்தகங்களுக்கு ஒரு வருடகால அவகாசம் வழங்கப்பட்டிருந்தும் இதுவரை பதிவுகள் மேற்கொள்ளாமல் இருப்பதாகவும் தகுதி வாய்ந்த மருந்தாளர்கள் இல்லாது மருந்தகங்கள் இயங்கி வருவதாகவும் மருந்துச் சிட்டைகளின்றி மருந்துகள் வழங்கப்பட்டு வருவதாகவும் வவுனியா பிராந்திய சுகாதார சேவைகள் பணிப்பாளர் வைத்திய கலாநிதி மு.மகேந்திரன் தெரிவித்தார்.
இவ்வாறான குறைபாடுகளுடன் இயங்கி வரும் மருந்தகங்களுக்கு எதிராக சட்ட நடவடிக்கை எடுப்பதற்கான ஒழுங்குகள் மேற்கொள்ளப்படுவதாகவும் அவர் கூறினார்.
வவுனியா பிராந்திய சுகாதார சேவைகள் பணிப்பாளர் வைத்திய கலாநிதி மு.மகேந்திரனின் பணிப்பின் பேரில் மேலதிக சுகாதார வைத்திய அதிகாரி வைத்திய கலாநிதி எச்.எல்.எம்.அஸ்லம், உணவு மருந்த பரிசோதகர் ந.சஞ்சீவ், பிராந்திய மருந்தாளர் ந.மகேந்திரன் ஆகியோர் வவுனியாவிலுள்ள மருந்தகங்களில் திடீர் பரிசோதனையை மேற்கொண்டனர்.
மக்களை அணிதிரட்டுவோம், மக்கள் போராட்டங்களை முன்னெடுப்போம் என்ற தொனிப்பொருளுடன் புதிய ஜனநாயக மாக்சிச லெனினிசக் கட்சியின் 35வது ஆண்டு பொதுக்கூட்டம் கடந்த ஞாயிற்றுக்கிழமை வவுனியா இந்திரன்ஸ் உணவக மண்டபத்தில் நடைபெற்றது.
கட்சியின் வவுனியா மாவட்டக் கிளைச் செயலாளர் நி.பிரதீபன் தலைமையில் நடைபெற்ற இந்நிகழ்விலே கட்சியின் பல முக்கிய உறுப்பினர்களின் உரைகள் இடம்பெற்றன.
தொடர்ந்து “சுப்பற்ற கொல்லை” என்ற தலைப்பில் சமூக விழிப்புணர்வு நாடகமும் இடம்பெற்றது.
பருத்தித்துறை பிரதேச செயலகத்திற்குட்பட்ட சமூர்த்தி அலுவலக கணனியில் ஆபாசப் படங்களை ஏற்றி வைத்திருந்த சமூர்த்தி முகாமையாளர் ஒருவர் அங்குள்ள பெண் உத்தியோகத்தர்களை பாலியல் ரீதியாக இம்சைப்படுத்தியமை தொடர்பில் பிரதேச செயலருக்கு தெரியப்படுத்தப்பட்டிருக்கின்றது.
பிரதேச செயலர் இது தொடர்பான விசாரணைகளை மேற்கொண்டு அதன் அறிக்கையை யாழ்.மாவட்ட சமூர்த்தி ஆணையாளர் மகேஸ்வரனுக்கு அனுப்பி வைத்துள்ளார்.
பருத்தித்துறை பிரதேச செயலர் பிரிவில் இரண்டு சமூர்த்தி வங்கிகள் இயங்குகின்றன. இதில் ஒரு வங்கியில் பணியாற்றும் சமூர்த்தி முகாமையாளர், அந்த வங்கியில் பணியாற்றும் பெண் உத்தியோகத்தர்களை பாலியல் ரீதியாக இம்சைகளுக்கு உட்படுத்தி வந்துள்ளார்.
பெண் உத்தியோகத்தர்கள் தினமும் அணிந்து வருகின்ற ஆடைகளைப் பார்த்து வர்ணிப்பதை இவர் வழக்கமாக கொண்டிருந்தார்.
மேலும் சமூர்த்தி உத்தியோகத்தர்களுடன் இவர் மிகக் கடுமையான நடைமுறைகளைப் பின்பற்றி வருவதாகவும் மிக அண்மித்த இடத்தில் வீடுகள் உள்ள உத்தியோகத்தர்களைக் கூட இவர் மதிய உணவிற்கு வீட்டுக்குச் செல்ல அனுமதிப்பதில்லையென்றும் அவர்கள் விசனம் வெளியிட்டுள்ளனர்.
இந்நிலையில், பெண்கள் பயன்படுத்தும் அலுவலகக் கணனியில் இவர் ஆபாசப் படங்களை ஏற்றி வைத்திருந்துள்ளார்.
தமது வேலைகளைச் செய்வதற்காக கணனியைப் பயன்படுத்திய பெண்கள் இதனைக் கண்டு அதிர்ச்சியடைந்த நிலையில் இது தொடர்பில் குறித்த பிரதேச செயலருக்கு முறையிட்டுள்ளனர்.
ஆனால் சமூர்த்தி முகாமையாளருக்கு எதிராக காத்திரமான நடவடிக்கை எடுக்காத பிரதேச செயலர், முறைப்பாடு செய்த பெண்களில் ஒருவரை வேறு சமூர்த்தி வங்கிக்கு இடமாற்றியுள்ளதாக தெரியவருகின்றது.
இதனால் இந்த விடயம் யாழ்.மாவட்ட சமூர்த்தி உத்தியோகத்தர்கள் சங்கத்திற்கு கொண்டு செல்லப்பட்டது.
அந்தச் சங்கம் இது தொடர்பில் விசாரணை மேற்கொள்ளுமாறு யாழ்.மாவட்ட சமூர்த்தி ஆணையாளர் மகேஸ்வரன் மற்றும் பருத்தித்துறை பிரதேச செயலர் ஆகியோரைக் கோரியிருந்தது.
இதன் பின்னர் குறித்த சமூர்த்தி முகாமையாளரிடம் விசாரணைகளை மேற்கொண்ட பிரதேச செயலர் இது தொடர்பான முதற்கட்ட விசாரணை அறிக்கையை சமுர்த்தி ஆணையாளருக்கு அனுப்பி வைத்துள்ளார். பிரதேச செயலர் தொடர்ந்தும் விசாரணைகளை மேற்கொண்டு வருகின்றார்.
உலகின் ஏல நிறுவன வரலாற்றில் முதன்முறையாக ஹாங்கொங்கில் நேற்று நடைபெற்ற ஏலத்தில் அரிய வகை வைரம் ஒன்று 3 கோடி டாலர்களுக்கு ஏலம் போனது.
பிரபல சோத்பை ஏல நிறுவனம் இந்த முட்டை வடிவ வைரத்தை ஏலம்விட போவதாக அறிவித்த போது 2 கோடியே 80 லட்சம் மற்றும் 3 1/2 கோடி டாலர்களுக்கு இடையே இது விலை போகும் என எதிர்பார்க்கப்பட்டது.
ஹொங்கொங்கில் நேற்று 6 நிமிடம் நீடித்த இந்த ஏலத்தின் போது போன் மூலம் ஏலம் கேட்ட ஒருவர் இறுதியாக 238.68 ஹொங்கொங் டாலர்களுக்கு இந்த வைரத்தை தனதாக்கி கொண்டார்.
தென்னாப்பிரிக்காவில் உள்ள வைர சுரங்கத்தில் வெட்டி எடுக்கப்பட்ட போது இந்த வைரம் 299 கரட் எடை கொண்டதாக இருந்தது. பட்டை தீட்டி இந்த வடிவத்திற்கு வந்துள்ள அதன் தற்போதைய எடை 118.28 கரட் என குறிப்பிடப்பட்டுள்ளது.
இங்கிலாந்தின் பர்மிங்ஹாமில் வசித்துவரும் சீக்கியக் குடும்பம் ஒன்று கடந்த ஏப்ரல் மாதம் விடுமுறைக்காக இந்தியா வந்திருந்தனர்.அப்போது அவர்களின் 8 வயதுப் பெண்ணான குர்கிரனும் முதன்முதலாக இந்தியா வந்திருந்தார். இங்கு இருந்தபோது உடல்நலக் குறைவால் பாதிக்கப்பட்ட அந்தச் சிறுமியை அவரது பெற்றோர்கள் பஞ்சாபின் கன்னா நகரில் உள்ள மருத்துவமனையில் அனுமதித்தனர்.
அங்கு ஊசிமருந்து செலுத்தப்பட்ட சிறிது நேரத்திலேயே குர்கிரன் மரணமடைந்தார்.பிரேதப் பரிசோதனைக்குப்பின் அந்தப் பெண்ணின் உடல் அவளது பெற்றோர்களிடம் ஒப்படைக்கப்பட்டது. சிறுமியின் மரணத்தில் சந்தேகமடைந்த பெற்றோர்கள் இங்கிலாந்து சென்றவுடன் அங்கு மறுமுறை பிரேதப் பரிசோதனைக்கு அணுகியபோது அவளது உடல் உறுப்புகள் இல்லாதநிலையில் பரிசோதனை செய்ய மறுக்கப்பட்டது.
இதனைத் தொடர்ந்து நடைபெற்ற விசாரணையில் பஞ்சாப் காவல்துறையினரால் பரிசோதனைக்காக எடுக்கப்பட்ட சிறுமியின் இதயம், நுரையீரல் மற்றும் மூளை உள்ளிட்ட உறுப்புகள் மொஹாலியில் உள்ள தடயவியல் ஆய்வகத்தில் பாதுகாக்கப்பட்டுள்ளது தெரியவந்தது.
இந்த விபரம் தங்களுக்குத் தெரியாது என்று மறுத்த சிறுமியின் குடும்பம் அந்த உறுப்புகளை இங்கிலாந்திற்கு அனுப்புமாறு மனு அளித்தனர். அதன்பின் இந்த உறுப்புகள் முறையே பதப்படுத்தப்பட்ட நிலையில் சென்ற ஞாயிறன்று இங்கிலாந்தில் குர்கிரனின் பெற்றோர் வசம் ஒப்படைக்கப்பட்டுள்ளது.
சிறுமியின் உடல் உறுப்புகள் இல்லாதநிலையிலேயே அவரது இறுதிச் சடங்கு செய்யப்பட்டுள்ளது. இந்த உடல் உறுப்புகளை இங்கிலாந்திற்கு வரவழைக்க அவரது தந்தை 6 லட்ச ரூபாய்க்கும் மேலாக செலவு செய்துள்ளார்.
ஆயினும், இதற்கான செலவை ஏற்க காப்பீட்டு நிறுவனம் மறுத்துவிட்டது. இது உணர்ச்சி மிகுந்த ஒரு போராட்டமாக மாறிவிட்டது என்று சிறுமியின் குடும்ப உறவினர்களில் ஒருவரான ஷரன்ஜித் கவுர் கூறினார்.
சித்தார்த்தும் சமந்தாவும் திருமணத்துக்கு தயாராகிறார்கள். இதற்காக புதுப்படங்களில் நடிப்பதை சமந்தா நிறுத்தியுள்ளார். சமந்தா தமிழில் பானா காத்தாடி, நான் ஈ, நீ தானே என் பொன் வசந்தம் படங்களில் நடித்துள்ளார்.
தெலுங்கிலும் முன்னணி நடிகையாக உள்ளார். சித்தார்த்தும், சமந்தாவும் தெலுங்கில் ஜாபர்தஸ்த் என்ற படத்தில் ஜோடியாக நடித்தனர். அப்போது நெருக்கம் ஏற்பட்டு காதல் வயப்பட்டனர். இருவரும் கோவில்களுக்கு குடும்பத்தினருடன் சென்று பூஜை, பிராத்தனைகளிலும் ஈடுபட்டார்கள். விரைவில் திருமணம் செய்து கொள்ள இருக்கிறார்கள்.
இளம் நடிகர்கள் உடன் ஜோடியாக நடிக்க வேண்டாம் என்று சமந்தாவுக்கு சித்தார்த் தடை போட்டுள்ளதாக கூறப்படுகிறது. எனவே தற்போது ஒப்பந்தமாகியுள்ள விஜய், சூர்யா படங்களை முடித்துவிட்டு நடிப்புக்கு முழுக்கு போட சமந்தா முடிவு செய்துள்ளார்.
அனுஷ்கா நடித்த அருந்ததி தற்போது அவர் நடித்துக் கொண்டிருக்கும் ருத்ரமாதேவி படங்களை போல் கதாநாயகிக்கு முக்கியத்துவம் அளிக்கும் வேடங்களில் மட்டும் நடிக்க முடிவு செய்துள்ளாராம்.
அஜித் ஆரம்பம், வீரம் என இரு படங்களில் நடிக்கிறார். இவற்றில் ஆரம்பம் படம் முடிவடைந்து தீபாவளிக்கு ரிலீசாக உள்ளது. இதில் ஜோடியாக நயன்தாரா நடித்துள்ளார். அஜித் அளித்த பேட்டியில்..
நான் நடித்த பில்லா, மங்காத்தா, படங்களில் என் பாத்திரம் ஸ்டைல் ஆக அமைந்து இருந்தது. அதே போன்ற வேடத்தில் ஆரம்பம் படத்தில் வருகிறேன். வீரம் படம் வேறு மாதிரி கதை. அதில் கிராமத்து பாத்திரத்தில் நடிக்கிறேன். காதல் படங்களிலும் இளமை மற்றும் வயது முதிர்ந்த வேடங்களிலும் நிறைய படங்களில் நடித்து விட்டேன்.
ரசிகர்களை பொறுத்தவரை ஆக்ஷன் படங்களையே விரும்பி பார்க்கிறார்கள். என் படங்களை பார்க்கிறவர்கள் ஏமாறக் கூடாது என்பதால் அவர்கள் எதிர்பார்ப்புக்கு ஏற்ப நடிக்கிறேன். நிறைய காதல் படங்களில் நடித்து விட்டேன். இளமையான கரக்டர்களிலும், வயது முதிர்ந்த வேடங்களிலும் நடித்துள்ளேன்.
எனக்கு திரைக்கதை மீது எப்போதும் நம்பிக்கை உண்டு. ஆனாலும் சில நேரம் கதை கை கொடுப்பது இல்லை. இயக்குனர்கள் விருப்பத்திற்கேற்ப நடித்து கொடுக்க வேண்டிய சூழ்நிலையும் உள்ளது.
நடிகர்களின் திறமையை இயக்குனர்கள் தான் வெளிக் கொண்டு வருகிறார்கள். கார் மற்றும் பைக் பந்தயங்களில் தொடர்ந்து பங்கேற்று வருகிறேன். விபத்து, உடல் நலம் குன்றுவது போன்றவை ஏற்பட்டாலும் வைத்தியர்கள் சிகிச்சை அளித்து குணமாக்கி விடுகின்றனர். என்று அஜித் கூறினார்.
ரஜினியுடன் விரைவில் நடிக்கப் போவதாக சிம்ரன் கூறியுள்ளார். இது குறித்து அவர் அளித்த பேட்டியில்..
தமிழில் கமல், விஜய், அஜீத், எஸ்.ஜே.சூர்யா என நிறைய ஹீரோக்களுடன் நடித்து விட்டேன். ரஜினியுடன் நடிக்க மட்டும் இதுவரை வாய்ப்பு கிட்ட வில்லை. ரஜினியுடன் நடிக்க வேண்டும் என்பது என் கனவாக இருக்கிறது. விரைவில் ரஜினியுடன் நடிப்பேன்.
விஜய் எனக்கு பிடித்த நடிகர். நாங்கள் ஜோடியாக நடித்த படங்கள் ஹிட்டாகியுள்ளது. படங்களில் எங்கள் கெமஸ்ரி நன்றாக இருந்தது. விஜய்யுடன் நடித்த துள்ளாத மனமும் துள்ளும், பிரியமானவளே என்றும் நினைவில் இருப்பவை.
அஜீத்துடன் நடித்ததும் இனிமையான அனுபவம். அவர் ஒரு ஜென்டில்மேன். வாலி என்ற சர்ச்சைக்குரிய படத்தில் அஜீத்துடன் நடித்தேன். கதை வித்தியாசமான இருந்ததால் உடனே ஒப்புக் கொண்டேன். கமல்ஹாசன் அவரோடு நடிக்கும் நடிகைகளுக்கு உதவுவார். கமலுடன் நடித்த படங்கள் காமெடி கதையம்சம் உள்ளவை. எனக்கு காமெடி படங்கள் மிகவும் பிடிக்கும். ரசிகர்கள் இன்னும் எனக்கு வரவேற்பு தருகிறார்கள்.
ஹோட்டல்களுக்கு சாப்பிட செல்லும் போதும் ஷாப்பிங் போகும் போதும் என்னை சூழ்ந்து கொண்டு பேசுகிறார்கள். திருமண வாழ்க்கையும் சந்தோஷமாக போகிறது. என் கணவர் தீபக் நல்ல நண்பராக இருக்கிறார் என்று சிம்ரன் கூறினார்.
குட்டிப்புலி படத்திற்கு பிறகு சசிகுமார் தற்போது நடித்துவரும் படம் பிரம்மன். இப்படத்தை நடிகர் கமலஹாசனின் உதவியாளர் சாக்ரடீஸ் இயக்குகிறார். கே.மஞ்சு தயாரிக்கும் இப்படத்தில் சசிகுமாருக்கு ஜோடியாக லாவண்யா திரிபாதி நடிக்கிறார். மேலும், சந்தானம், சூரி, கன்னட நடிகர் சுதீப் உள்ளிட்ட பலரும் நடிக்கின்றனர். தேவிஸ்ரீ பிரசாத் இசையமைக்கிறார்.
இப்படத்தின் முதற்கட்டப் படப்பிடிப்பு கோவையில் தொடங்கி அங்கு 17 நாட்கள் படமாக்கப்பட்டது. பின்னர் சென்னையில் சசிகுமாரும், சுதீப்பும் இணைந்து நடிக்கும் காட்சிகள் படமாக்கப்பட்டன.
இந்நிலையில், இப்படத்தின் இரண்டு பாடல்களை படமாக்குவதற்காக இப்படக்குழு சுவிஸ்லாந்து பயணமாகவிருக்கிறதாம். இதற்காக சசிகுமார், லாவண்யா மற்றும் நடன இயக்குனர் ராஜு சுந்தரம் ஆகியோருடன் சேர்ந்து 20-க்கும் மேற்பட்ட துணை நடிகர்கள் விரைவில் சுவிஸ்லாந்து பயணப்படவிருக்கிறார்கள்.
நய்யாண்டி படத்தில் தனக்கு பதில் டூப் நடிகையை வைத்து கவர்ச்சி காட்சிகளை எடுத்துள்ளதாக நடிகர் சங்கத்தில் நடிகை நஸ்ரியா புகார் அளித்துள்ளார்.
நஸ்ரியா நேரம் படம் மூலம் தமிழில் அறிமுகமானார். ஆர்யா ஜோடியாக நடித்த ராஜா ராணி படம் தற்போது ரிலீசாகி ஓடிக்கொண்டு இருக்கிறது. அடுத்து தனுஷ் ஜோடியாக நடித்த நய்யாண்டி படம் வரும் 11ம் திகதி வெளியாகிறது.
இப்படத்தை சற்குணம் இயக்கியுள்ளார். இவர் ஏற்கனவே களவாணி, வாகை சூடவா போன்ற படங்களை இயக்கியுள்ளார்.
சற்குணம் மீதும் நய்யாண்டி படத்தின் தயாரிப்பாளர் எஸ்.கதிரேசன் மீதும் நடிகர் சங்கத்தில் நஸ்ரியா மோசடி புகார் அளித்துள்ளார்.
தனக்கு பதில் வேறு நடிகையை வைத்து சில காட்சிகளை படமாக்கி இருப்பதாக குற்றம்சாட்டி உள்ளார். இதுகுறித்து நஸ்ரியா கூறியதாவது..
நான் நடிகர் சங்கத்தில் உறுப்பினராக இருக்கிறேன். நய்யாண்டி படத்தில் எனக்கு பதில் டூப் நடிகையை பயன்படுத்தி சில கவர்ச்சி காட்சிகளை எடுத்துள்ளனர். நான் கேரளாவில் இன்னொரு படப்பிடிப்பில் இருந்தபோது இந்த விஷயம் என் கவனத்துக்கு வந்தது.
படத்தின் டிரெய்லரை பார்த்த தோழிகள் இதனை தெரிவித்தனர். நான் அதிர்ச்சியடைந்தேன். உடனடியாக இயக்குனர் சற்குணத்தை தொடர்பு கொண்டு விளக்கம் கேட்டேன். அப்போது இன்னொரு நடிகையை டூப்பாக பயன்படுத்தி அந்த காட்சிகளை எடுத்துள்ளதாக என்னிடம் தெரிவித்தார்.
என்னிடம் அனுமதி பெறாமல் இக்காட்சிகளை எடுத்துள்ளனர். இது ஒப்பந்தத்தை மீறிய செயல் ஆகும். எனக்கு பதில் வேறு நடிகையை நடிக்க வைத்து காட்சிகளை எடுத்து இருப்பது மோசடித்தனமாது. இதில் எனக்கு நீதி கிடைக்க வேண்டும். நடிகர் சங்கத்தை நாடி உள்ளேன். சட்டப்படியும் நடவடிக்கை எடுப்பேன். இவ்வாறு நஸ்ரியா கூறினார்.
இது குறித்து நடிகர் சங்க பொதுச் செயலாளர் ராதாரவியிடம் கேட்டபோது இப்பிரச்சினை பற்றி நஸ்ரியா போனில் என்னிடம் பேசினார். புகாரும் அளித்துள்ளார். இதை விசாரித்து நடிகர் சங்கம் நடவடிக்கை எடுக்கும் என்றார்.
தங்க கட்டிகளை கடத்த முயற்சித்த இலங்கையர்கள் நால்வர் சென்னையில் கைது செய்யப்பட்டுள்ளனர். நேற்று இரவு இவர்கள் நால்வரும் கைது செய்யப்பட்டுள்ளனர்.
சென்னையிலிருந்து புதுடில்லி நோக்கி பயணிக்க தயாராகவிருந்த இருவர் கைது செய்யப்பட்டு சோதனைக்கு உட்படுத்தப்பட்டுள்ளனர்.
இதன்போது இவர்களிடமிருந்து ஒருதொகை தங்க கட்டிகள் கைப்பற்றப்பட்டுள்ளன. இவர்களிடம் மேற்கொள்ளப்பட்ட விசாரணைகளின் பின்னர் டுபாயிலிருந்து சென்னை நோக்கி பயணித்த மேலும் இரு இலங்கையர்கள் கைது செய்யப்பட்டுள்ளனர்.
இவர்களிடமிருந்து கைப்பற்றப்பட்ட 32 கிலோ கிராம் தங்கத்தின் பெறுமதி இந்திய ரூபாய்ப் படி 9.5 கோடி என அதிகாரிகள் தெரிவித்துள்ளனர்.
பிரிட்டிஸ்காரருக்கு எதிராக போராடி தமிழரின் வீரத்தை உலகெங்கும் பறைசாற்றிய மாவீரன் பண்டாரவன்னியனின் 202ஆவது ஆண்டு நினைவுதினம் எதிர்வரும் 31ஆம் திகதி தமிழர் தாயகம் எங்கும் அனுஸ்டிக்கப்படவுள்ளது.
இந்த தினத்தை யாழ்ப்பாணம், முல்லைத்தீவு மற்றும் வவுனியா ஆகிய மாவட்டங்ளில் சிறப்பாக கொண்டாடுவதற்கான ஏற்பாடுகள் மேற்கொள்ளப்பட்டுள்ளன. வவுனியா நகர சபையும் பண்டாரவன்னியன் நற்பணி மன்றமும் இணைந்து வவுனியா நிகழ்வை ஏற்பாடு செய்துள்ளன.
இந்த நிலையில் எதிர்வரும் 31ம் திகதி காலை 8.30 தொடக்கம் 9.30 மணிவரை வவுனியா மாவட்டச் செயலகத்தில் அமைந்துள்ள பண்டாரவன்னியன் சிலைக்கு மாலை அணிவித்து அஞ்சலி செலுத்தும் நிகழ்வு இடம்பெறும். காலை 9.30 தொடக்கம் நண்பகல் 1.30 மணிவரை கலை நிகழ்வுகளும் நினைவுப்பேருரைகளும் நகர சபை கலாசார மண்டபத்தில் இடம்பெறும்.
பண்டாரவன்னியனின் நினைவு தினத்தன்று அவரது நினைவுக்கல் அமைக்கப்பட்டுள்ள முல்லைத்தீவு கற்சிலைமடுவில் சிறப்பு நிகழ்வுகள் இடம்பெறவுள்ளன.
வடக்கு மாகாண சபை தேர்தலில் தமிழ் தேசிய கூட்டமைப்பின் சார்பாக அமைச்சுப் பொறுப்புகளை வழங்குவதில் தொடர்ந்தும் இழுபறி நிலை காணப்பட்ட போதிலும் தற்போது முடிவுக்கு வந்துள்ளதாக கட்சி வட்டாரங்கள் தெரிவித்தன.
கூட்டமைப்பிலிருந்து கிடைக்கப்பெற்ற தகவல்களின் பிரகாரம் மாகாண அமைச்சுகள் வழங்கப்படவுள்ள உறுப்பினர்களின் விபரம் வருமாறு..
கொழும்பு தேசிய வைத்தியசாலையில் உலக சாதனையொன்று நிகழ்த்தப்பட்டுள்ளதாக சிங்கள ஊடகமொன்று செய்தி வெளியிட்டுள்ளது. விபத்தொன்றின் போது உடலிலிருந்து துண்டிக்கப்பட்ட ஆண் ஒருவரின் பிறப்பு உறுப்பு வெற்றிகரமாக அறுவை சிகிச்சை மூலம் மீளப் பொருத்தப்பட்டுள்ளது.
புத்தளம் பிரதேசத்தைச் சேர்ந்த 27 வயதான ஒரு குழந்தையின் தந்தை ஒருவரின் ஆணுறுப்பு துண்டிக்கப்பட்டது. கொழும்பு தேசிய வைத்தியசாலையில் பிளாஸ்டிக் அறுவை சிகிச்சைப் பிரிவு வைத்தியர்களும் ஏனைய வைத்தியர்களும் கூட்டாக இணைந்து துண்டிக்கப்பட்ட ஆணுறுப்பை மீளப் பொருத்தியுள்ளனர்.
12 மணித்தியாலங்கள் இந்த சத்திரசிகிச்சை மேற்கொள்ளப்பட்டுள்ளது. துண்டிக்கப்பட்ட ஆணுறுப்பு ஒன்றை மீளவும் பொருத்தி வழமை நிலைமைக்கு கொண்டு வந்த முதல் சந்தர்ப்பமாக இது கருதப்பட வேண்டுமென கொழும்பு தேசிய வைத்தியசாலை அதிகாரிகள் தெரிவித்துள்ளனர்.
நோயாளியை வைத்தியசாலையில் சேர்த்த நேரம், துண்டிக்கப்பட்ட உறுப்பை பாதுகாப்பாக எடுத்து வந்த விதம் ஆகியன இந்த அறுவைச் சிகிச்சையை வெற்றிகரமாக மேற்கொள்ள உதவியது என வைத்தியர்கள் தெரிவித்துள்ளனர் அறுவை சிகிச்சை வெற்றிகரமாக மேற்கொள்ளப்பட்டதாகவும் குறித்த நபர் இயல்பு வாழக்கையை தொடர முடியும் எனவும் வைத்தியர்கள் தெரிவித்துள்ளனர்.
முற்று முழுதாக துண்டிக்கப்பட்டிருந்த ஆணுறுப்பு வெற்றிகரமாக மீளப் பொருத்தப்பட்டுள்ளதாகக் குறிப்பிட்டுள்ளனர். சிறுநீர் கழித்தல் தாம்பத்ய உறவை தொடருதல் போன்ற சகல செயற்பாடுகளையும் தடையின்றி மேற்கொள்ளக் கூடிய வகையில் சத்திரசிகிச்சை மேற்கொள்ளப்பட்டுள்ளது.
இதேவேளை குறித்த நபரே ஆணுறுப்பை துண்டித்துக் கொண்டதாக அவரது மனைவி பொலிஸ் நிலையத்தில் வாக்கு மூலம் அளித்துள்ளார். இந்த சம்பவம் தொடர்பில் புத்தளம் பொலிஸார் விசாரணைகளை ஆரம்பித்துள்ளனர்.
தெமட்டகொட பொலிஸ் பிரிவில் பேஸ்லைன் வீதி களனிவெளி ரயில் கடவைக்கு அருகில் இடம்பெற்ற துப்பாக்கிச்சூட்டு சம்பவத்தில் ஒருவர் உயிரிழந்துள்ளார்.
