திருமணமான மறுநாளே தேனிலவுக்குப் பதிலாக கல்லறைக்கு வந்த கணவன்-மனைவி ஆகிய இருவரும் ஒரே நாளில் 15 பேரை தகனம் செய்த சம்பவம் இடம்பெற்றுள்ளது.
இந்த சம்பவம் சமூக ஊடகங்களில் அதிகமாக பகிரப்பட்டு வருகிறது. இந்த புதுமணத்தம்பதியினர், கொரோனாவால் இறந்தவர்களின் இறுதிச் சடங்குகளை மயானத்துக்கு சென்று நிறைவேற்றினர்.
மலேசியாவை சேர்ந்த 34 வயதான முஹம்மது ரிட்ஜீவன் ஒஸ்மான் மற்றும் அவரது மனைவி நூர் அஃபிஃபா ஹபீப் ஆகியோர் கடந்த டிசம்பர் 13 அன்று திருமணம் செய்து கொண்டனர்.
இதன் பின்னர் அவர்கள் இருவரும் திருமணத்திற்குப் பிறகு தேனிலவுக்குச் செல்வதற்குப் பதிலாக, கொரோனா முன்களப் பணியாளராக மாற முடிவு செய்தனர். மணமகன் ரிட்ஜீவன், கொரோனா நோயாளிகளுக்கு சிகிச்சை அளிக்கும் குழுவில் உறுப்பினராக உள்ளார்.
இந்தநிலையில் திருமணம் முடிந்த அடுத்த நாளே, கொரோனா நோயாளி இறந்த பிறகு, அவரது உடலை அடக்கம் செய்ய வேண்டும் என்று குழுவிலிருந்து தனக்கு அழைப்பு வந்ததாக ரிட்ஜீவன் கூறினார்.
இதனை தாம் தமது புது மனைவியிடம் கூறியபோது அவரும் கணவருடன் செல்ல ஒப்புக்கொண்டார். இதனையடுத்து புதுமணத் தம்பதியினர் உடனடியாக கல்லறைக்குச் சென்றனர். அங்கு அவர்கள் கொரோனாவால் இறந்த நோயாளிகளின் உடலங்களை தகனம் செய்தனர்.
தமிழகம் – திண்டுக்கல் மாவட்டத்தில் ஒன்பது வயதான மாணவி ஒருவர் பாடசாலை வளாகத்தில் தீயில் எரிந்த நிலையில் சடலமாக மீட்கப்பட்ட சம்பவம் பெரும் பரபரப்பை ஏற்படுத்தியுள்ளது.
திண்டுக்கல் மாவட்டம் கொடைக்கானல் கீழ் மலைப்பகுதியான பாச்சலூர் பகுதியில் இந்த சம்பவம் பதிவாகியுள்ளதாக தமிழக ஊடகங்கள் செய்தி வெளியிட்டுள்ளன. இது குறித்து அந்த செய்தியில் மேலும் தெரிவிக்கப்பட்டுள்ளதாவது,
“திண்டுக்கல் மாவட்டம் கொடைக்கானல் கீழ் மலைப்பகுதியான பாச்சலூரை சேர்ந்தவர் சத்யராஜ். இவரின் ஒன்பது வயதான மகள் பிரித்திகா பாச்சலூரில் உள்ள ஊராட்சி ஒன்றிய அரசு நடுநிலை பாடசாலையில் கல்வி கற்கின்றார்.
ஐந்தாம் வகுப்பில் படிக்கும் பிரித்திகா நேற்றைய தினம் வழமை போல் பாடசாலைக்கு சென்றுள்ளார். இந்நிலையில், காலை 11 மணியளவில் பிரித்திகா வகுப்பறையைவிட்டு வெளியே சென்றதாக தெரிகிறது. அதன்பின்னர் வகுப்பறைக்கு வரவில்லை.
இந்தநிலையில் மாணவி பிரித்திகா பாடசாலை விளையாட்டு மைதானத்தில் தீயில் கருகிய நிலையில் சடலமாக மீட்கப்பட்டுள்ளார்.
சம்பவம் குறித்து பொலிஸாருக்கு அறிவிக்கப்பட்ட நிலையில், மாணவியின் உடலை கைப்பற்றிய பொலிஸார் குறித்த மாணவியை யாரும் எரித்துக் கொலை செய்தார்களா? என்ற கோணத்தில் தீவிர விசாரணை நடத்தி வருகின்றனர்.
யாழ். காங்கேசன்துறையில் இருந்து கொழும்பினை நோக்கிச் சென்ற புகையிரதத்தில் மோதி இளைஞர் ஒருவர் படுகாயம் அடைந்துள்ளதாக சாவகச்சேரி பொலிஸார் தெரிவித்துள்ளனர்.
குறித்த சம்பவம் இன்று காலை 07.45 மணியளவில் கொடிகாமம் – சாவகச்சேரி இடைப்பட்ட ரயில் தண்டவாளத்தில் இடம்பெற்றுள்ளதாக பொலிஸார் கூறியுள்ளனர். படுகாயமடைந்த இளைஞர் யாழ். போதனா வைத்தியாலையின் அதிதீவிர சிகிச்சைப்பிரிவில் அனுமதிக்கப்பட்டுள்ளதாக பொலிஸார் கூறியுள்ளனர்.
குறித்த இளைஞன் விசேட தேவையுடையவர் எனவும் அதனால் ரயில் வந்தது தெரியாமல் அவர் அந்த தண்டவாளத்திலிருந்ததாகவும் பொலிஸாரின் ஆரம்பகட்ட விசாரணையில் இருந்து தெரியவருகின்றது. இது தொடர்பான மேலதிக விசாரணையினை சாவகச்சேரி பொலிஸார் முன்னெடுத்து வருகின்றனர்.
சூரியனை ஆய்வு செய்ய அனுப்பி வைக்கப்பட்ட ரோபோ விண்கலம் சூரியனின் மேற்பரப்புக்கு இடையே சென்று தரவுகளை திரட்டியுள்ளதாக அமெரிக்காவின் நாசா நிறுவனம் வெளியிட்டுள்ள அறிக்கையில் தெரிவித்துள்ளது.
“Parker Solar Probe” என்ற இந்த ரோபோ விண்கலம் சூரியனை ஆராய்ச்சி செய்ய முதல் ஆய்வு விண்கலமாகும். “Parker Solar Probe” சூரியனின் காந்தப் புலத்தை ஆய்வு செய்து, சூரியனின் நுகள் மாதிரிகளை சேகரித்துள்ளதாக நாசா கூறியுள்ளது.
இந்த விண்கலம் சூரியனின் வெப்பத்தை தாங்கும் வகையில் விசேடமாக வடிவமைக்கப்பட்ட விண்கலமாகும். விண்கலம் சூரியனின் மேல் வலயத்தை கடந்து கடந்த ஏப்ரல் 28 ஆம் திகதி தரவுகளை சேகரித்துள்ளது.
தரவுகளை ஆய்வு செய்து அவற்றை உறுதிப்படுத்த நாசா விஞ்ஞானிகளுக்கு பல மாதங்கள் தேவைப்பட்டன. “Parker Solar Probe” விண்கலம் கடந்த 2018 ஆம் ஆண்டு பூமியில் இருந்து சூரியனுக்கு அனுப்பி வைக்கப்பட்டது.
விண்கலம் மெதுவாக சூரியனை சுற்றி, அதனை அண்மித்தது. இந்த விண்கலம் மணிக்கு 6 லட்சத்து 92 ஆயிரம் கிலோ மீற்றர் வேகத்தில் பயணிக்கின்றது. “Parker Solar Probe” விண்கலத்தை தயாரிக்க 1.5 பில்லியன் அமெரிக்க டொலர்கள் செலவாகியதாகவும் நாசா குறிப்பிட்டுள்ளது.
இன்று நள்ளிரவு முதல் எரிபொருள் விலையை அதிகரிப்பதற்கோ அதற்கான திட்டமோ இல்லை என எரிசக்தி அமைச்சர் உதய கம்மன்பில தெரிவித்தாா்.
இன்று நள்ளிரவு முதல் எரிபொருட்களின் விலை அதிகரிக்கப்படும் என ஊடகங்களில் வெளியாகும் செய்திகளுக்கு விளக்கமளிக்கையிலேயே அவர் இவ்வாறு தெரிவித்துள்ளனர்.
எவ்வாறாயினும், குறித்த செய்தி உண்மைக்கு புறம்பானது என அமைச்சர் சுட்டிக்காட்டியுள்ளார். அதற்கான திட்ட ம் இல்லை என எரிசக்தி அமைச்சர் உதய கம்மன்பில தெரிவித்தாா்.
இலங்கையில் கொவிட் வைரஸிற்கு எதிரான தடுப்பூசி செலுத்திக் கொள்ளாதவர்களுக்கு முக்கிய அறிவிப்பு வெளியிடப்பட்டுள்ளது.
இவ்வாறான தரப்பினர் பண்டிகைக் காலத்தை முன்னிட்டு சிறுவர்களை ஆடையகங்களுக்கு அழைத்து செல்ல வேண்டாம் என பொது சுகாதார பரிசோதகர்களின் சங்கம் பொது மக்களிடம் கேட்டுக்கொண்டுள்ளது.
அத்தியாவசிய தேவைகளுக்கு அத்தியாவசிய நபர் மாத்திரம் வெளியே செல்லுமாறு பொது சுகாதார பரிசோதகர்கள் சங்கத்தின் தலைவர் உப்புல் ரோஹன தெரிவித்துள்ளார்.
பொது மக்கள் ஒன்றுக்கூடுவதனை தவிர்க்க வேண்டும் என அவர் குறிப்பிட்டுள்ளார். ஒவ்வொரு சந்தர்ப்பத்திலும் சுகாதார கட்டுப்பாடுகளை கடுமையாக பின்பற்றுமாறு பொது மக்களிடம் கேட்டுக்கொள்கின்றோம்.
திருமணங்கள், விருந்துகள், வைபவங்கள் போன்ற அத்தியாவசிய இடங்களுக்கு சென்ற ஆபத்தை ஏற்படுத்திக் கொள்ள வேண்டாம்.
விசேடமாக ஆடை நிலையங்களுக்கு செல்லும் மக்கள் தடுப்பூசி செலுத்தாத சிறுவர்களை ஒரு போதும் அழைத்து செல்ல வேண்டாம் என அவர் பொது மக்களிடம் கேட்டுக்கொண்டுள்ளார்.
வவுனியாவில் கஞ்சா பொதிகளை உடமையில் வைத்திருந்த குற்றச்சாட்டில் இளைஞர்கள் மூவரினை வவுனியா பொலிசார் இன்று கைது செய்துள்ளார்கள். இவ் விடயம் குறித்து மேலும் தெரியவருகையில்,
வவுனியா நகர் பகுதியில் சந்தேகத்திற்கிடமான இளைஞர்களின் நடமாட்டம் இருப்பதாக பொலிசாருக்கு கிடைத்த இரகசிய தகவல் அடிப்படையில் அப்பகுதிக்கு திடீரென்று சென்ற பொலிசார் அங்கு சோதனை நடவடிக்கையினை மேற்கொண்டபோது,
உடமையில் கஞ்சாவினை சிறுசிறு பொதிகளாக வைத்திருந்த குற்றச்சாட்டில் செட்டிகுளத்தை சேர்ந்த மூன்று இளைஞர்களை பொலிஸார் கைது செய்துள்ளனர்.
கைது செய்யப்பட்டவர்களிடமிருந்து 15 மில்லிகிராம் கேரள கஞ்சாவினை மீட்டுள்ளதாகவும், கைது செய்யப்பட்டவர்கள் செட்டிகுளம் சண்முகபுரம் பகுதியை சேர்ந்த 18, 21,22 வயதுடைய மூவரே கைது செய்யப்பட்டுள்ளவர்களாவர்.
கைது செய்யப்பட்டவர்களிடம் மேலதிக விசாரணைகள் இடம்பெற்று வருவதாகவும் விசாரணைகளின் பின்னர் குறித்த நபர்களை வவுனியா நீதவான் நீதிமன்றில் முற்படுத்தப்பட நடவடிக்கை மேற்கொள்ளப்பட்டு வருவதாகவும் பொலிஸார் மேலும் தெரிவித்துள்ளனர்.
இந்தியாவில் சந்தேகத்திற்கிடமான இளைஞர் சுற்றித் திரிந்ததால், பொலிசார் அவரை பிடித்து சோதனை நடத்தியதில் ஒரு கோடி ரூபாய் அவரிடம் இருந்து பறிமுதல் செய்யப்பட்டுள்ளது.
மேற்குவங்க மாநிலம் கொல்கத்தாவில் மாநாகராட்சிக்கான தேர்தல் வரும் 19-ஆம் திகதி நடைபெறவுள்ளது. இந்நிலையில், இங்கிருக்கும் Park St பூங்காவில் சந்தேகத்திற்கிடமான நபர் நிறைய பணத்துடன் சுற்றி திரிவதாக நேற்று(டிசம்பர் 14-ஆம் திகதி) பொலிசாருக்கு தகவல் கிடைத்துள்ளது.
இதையடுத்து அங்கு விரைந்த சிறப்பு அதிரடிப்படையினர், அங்கு சந்தேகத்திற்கிடமாக சுற்றித் திரிந்த இளைஞரை பிடித்து விசாரித்தனர். அப்போது அவர் பெயர் Maheshtala என்பதும், 27 வயது மதிக்கத்தக்க இவர், தெற்கு கொல்கத்தாவில் உள்ள பேங்க்சல் பகுதியை சேர்ந்தவர் என்பதும் தெரியவந்தது.
இதையடுத்து, அவர் வைத்திருந்த பையை சோதனை செய்த போது, அவர் பை முழுவதும் 2000 ரூபாய் நோட்டுகளால் நிரப்பப்பட்ட ஒரு கோடி ரூபாய் பணம் இருப்பதைக் கண்டுபிடித்து பறிமுதல் செய்தனர்.
அவரிடம் இந்த பணம் எப்படி கிடைத்தது என்பது குறித்து கேட்ட போது, அவர் எந்த ஒரு பதிலும் சொல்லவில்லை. இதனால் அவரை கைது செய்த பொலிசார், தொடர்ந்து விசாரணை மேற்கொண்டு வருகின்றனர்.
இன்னும் நான்கு நாட்களில் தேர்தல் நடக்கவுள்ளதால், இது தேர்தல் காரணங்களுக்காக கொண்டு வரப்பட்டதா? ஹவாலா வழியாக பணத்தை பெற்றாரா என்ற கோணத்தில் பொலிசார் விசாரணை மேற்கொண்டு வருகின்றனர்.
நாகரிலுப்பைக்குளம், நொச்சிக்குளம், அவுசதப்பிட்டிய. பட்டைக்காடு. வேப்பங்குளம் 6 ஆவது வீதி, பட்டாணிச்சூர் புளியங்குளம், பொன்னாவரசங்குளம், வைரவபுளியங்குளம். அஸ்வி அரிசி ஆலை. ஜீவன் அரிசி ஆலை, ஸ்ரீரங்கன் அரிசி ஆலை, சுஜன் அரிசி ஆலை, சுஜன் அரிசியாலை- காத்தான் கோட்டம்,
தெய்வேந்திரம் அரிசி ஆலை, யு.என்.எச்.சி.ஆர்- குருமன் காடு. அரசன் அரிசி ஆலை வேப்பங்குளம், சியாம் அரிசி ஆலை (சிவா அரிசி ஆலை). காத்தார் சின்னக்குளம், பூந்தோட்டம் மகாறம்பைக்குளம். அறவந்த லாவ-2. அறுகம்புல் வெளி, அவறந்துலாவ, நவகம்மான, பாவற்குளம், பாரதிபுரம், கூமாங்குளம், கூமாங்குளம் கிருஷ்ணா மெடி கிளினிக்,
கூமாங்குளம் சாய் சிறுவர் இல்லம், நெளுக்குளம் கலைமகள் பாடசாலையடி, நொச்சிக்குளம், அவுசதப்பிட்டிய, பழையனூர், பாண் சின்னகுளம், பொன்னாவரசங்குளம், இராஜேந்திரகுளம். சாம்பல் தோட்டம் வீட்டுத் திட்டம், சூடுவெந்தபுலவு. ட்ராக்- 07, பாவற்குளம் விநாயகபுரம் வீட்டுத் திட்டம். நெளுங்குளம் நீர்வழங்கல் சபை.
இரணையிலுப்பைக்குளம், ஹய் நகரம், காக்கையங்குளம், கங்காணி குளம், கீரிசுட்டான், கோவில் புளி யங்குளம் (மடு), மதீனா நகர் காக்கையன்குளம். முள்ளிக்குளம் திட்டம். பரசங்குளம் (மடு துணுக்காய் வீதி). சின்ன வலயங்கட்டு. விளாத்திக்குளம் (எம்.என்). குருக்கள் புதுக்குளம் – மணியர் குளம், குருக்களூர் மன்னார் வீதி. முகந்தாங்குளம் முதலாவது பண்ணை ஆகிய பிரதேசங்களிலும் மின்சாரம் தடைப்படவுள்ளது என இலங்கை மின்சார சபையால் அறிவிக்கப்பட்டுள்ளது.
பதுளையில் இருந்து கொழும்பு கோட்டை நோக்கி பயணித்த பொடி மெனிகே புகையிரதத்தில் மோதுண்டு இளைஞர் ஒருவர் உயிரிழந்துள்ளதாக தலவாக்கலை பொலிஸார் தெரிவித்துள்ளனர்.
குறித்த விபத்து சம்பவம் தலவாக்கலை, சென்.கிளயார் மற்றும் சென். அன்ட்ரூஸ் ஆகிய இடங்களுக்கு இடையில் இன்று (15.12.2021) பிற்பகல் இடம்பெற்றுள்ளது.
விபத்தில் உயிரிழந்தவர் கொட்டகலை சென்.அன்ட்ரூஸ் தோட்டத்தைச் சேர்ந்த ஆர். மோகனசுந்தரம் (வயது 24) என அடையாளம் காணப்பட்டுள்ளார்.
குறித்த நபர் தனது கையடக்கத் தொலைபேசியில் பேசிக் கொண்டிருந்தவாறு ரயில் பாதையில் பயணித்த போது விபத்துக்குள்ளானதாக பொலிஸாரின் ஆரம்பகட்ட விசாரணைகளில் இருந்து தெரியவந்துள்ளது.
உயிரிழந்த இளைஞரின் சடலம் கொட்டகலை புகையிரத நிலையத்தில் ஒப்படைக்கப்பட்டு பின்னர் கொட்டகலை பிரதேச வைத்தியசாலைக்கு கொண்டு செல்லப்பட்டுள்ளது. விபத்து குறித்து தலவாக்கலை மற்றும் திம்புளை பத்தனை பொலிஸார் மேலதிக விசாரணைகளை மேற்கொண்டு வருகின்றனர்.
இலங்கையில் தற்போது போதுமானளவு எரிபொருள் கையிருப்பில் உள்ளதாக பெற்றோலியக் கூட்டத்தாபனத்தின் தலைவர் தெரிவித்துள்ளார். எரிபொருள் தட்டுப்பாடு ஏற்பட்டுள்ளதாக வெளியான தகவல் தொடர்பில் பெற்றோலிய கூட்டுத்தாபனத்தின் தலைவர் டபிள்யு.டபிள்யு.டீ.சுமித் விஜேசிங்க கருத்து வெளியிடுகையில்,
நாட்டில் எந்தவொரு சந்தர்ப்பத்திலும் எரிபொருள் தட்டுப்பாடு ஏற்படாது. தற்போதும் போதுமானளவு எரிபொருள் கையிருப்பில் உள்ளது. டொலர் நெருக்கடி காணப்படுகின்ற போதிலும், எரிபொருள் இறக்குமதிக்கு தேவையான நிதி ஒதுக்கப்பட்டுள்ளது.
இந்த நிலையில், உரிய காலத்தில் அவ்வப்போது தேவையான எரிபொருள் இறக்குமதி செய்யப்படும். எரிபொருளை இறக்குமதி செய்வதில் எவ்வித சிக்கலும் இல்லை.
எனவே எரிபொருள் தட்டுப்பாடு ஏற்படப் போவதாக தகவல் வெளியாகியிருந்தால், அவை உண்மைக்கு புறம்பானவையாகும். மக்கள் இது குறித்து வீண் அச்சமடையத் தேவையில்லை என்று தெளிவுபடுத்தியுள்ளார்.
யாழ்ப்பாணம் பரமேஸ்வர சந்திப்பகுதியில் இளைஞன் ஒருவரைக் கும்பல் ஒன்று துரத்தித் துரத்தி வாளினால் வெட்டியுள்ளது. சன நடமாட்டம் அதிகமாகக் காணப்படும் குறித்த பகுதியில் இன்று காலை 10.30 மணியளவில் இடம்பெற்ற இச்சம்பவம் அப்பகுதியில் பெரும் பதற்றத்தை ஏற்படுத்தியுள்ளது.
யாழ். நகர் பகுதியை நோக்கிக் குறித்த இளைஞன் தனது மோட்டார் சைக்கிளில் பயணித்துக்கொண்டிருந்த போது, இரண்டு மோட்டார் சைக்கிள்களில் பின் தொடர்ந்த நால்வர் இளைஞனை பரமேஸ்வர சந்தியில் வழி மறித்து கடுமையாக வாள் வெட்டினை மேற்கொண்டனர்.
கும்பலின் தாக்குதலிலிருந்து தப்பித்து, பல்கலைக்கழகம் பக்கமாக இளைஞன் தப்பியோடிய போதும் , துரத்தித் துரத்தி வெட்டப்பட்டுள்ளார். வாள் வெட்டுக்கு இலக்காகிப் படுகாயமடைந்த இளைஞன் யாழ். போதனா வைத்தியசாலையில் அனுமதிக்கப்பட்டுள்ள நிலையில், தாக்குதலாளிகள் அங்கிருந்து தப்பிச்சென்றுள்ளனர்.
யாழ்ப்பாணப் பல்கலைக்கழகத்திற்கு அருகில் இச்சம்பவம் இடம்பெற்றமை மாணவர்கள் மத்தியில், பெரும் அச்ச நிலைமையை ஏற்படுத்தியுள்ளதுடன் குறித்த பகுதியில் சற்று நேரம் பதற்றமான சூழல் ஏற்பட்டிருந்ததாக தெரிவிக்கப்பட்டுள்ளது. சம்பவம் தொடர்பில் யாழ்ப்பாணம் மற்றும் கோப்பாய் பொலிஸார் விசாரணைகளை முன்னெடுத்துள்ளனர்.
வவுனியா நெடுக்கேணிபகுதியில் இன்று மதியம் சூட்டு காயங்களுடன் வீதியில் பெண்ணின் சடலத்தினை பொலிஸார் மீட்டெடுத்துள்ளனர் இச் சம்பவம் தொடர்பில் மேலும் தெரியவருகையில்,
நெடுங்கேனி சேனைப்பிளவு பகுதியில் மோட்டார் சைக்கிளிலுடன் வீதியில் துப்பாக்கிச் சூட்டுக் காயங்களுடன் 31 வயதுடைய பெண் சடலமாக காணப்படுவதாக பொதுமக்கள் பொலிஸாருக்கு வழங்கிய தகவலின் அடிப்படையில் பொலிஸார் சம்பவ இடத்திற்கு விரைந்துள்ளனர்.
இனந்தெரியாத நபர்கள் வீதியில் மோட்டார் சைக்கிலில் பயணித்த பெண் மீது கட்டுத்துப்பாக்கியால் துப்பாக்கிபிரயோகம் மேற்கொண்டு தப்பித்திருக்கலாம் என பொலிஸார் சந்தேகம் வெளியிட்டுள்ளதுடன் பொலிஸார் மற்றும் இராணுவத்தினர் இணைந்து விசாரணைகளை ஆரம்பித்துள்ளனர். இதனால் அப்பகுதியில் சற்று பதற்ற நிலை நிலவுகின்றது.
தமிழ் தேசியக் கூட்டமைப்பின் ஆளுகைக்கு உட்பட்ட வவுனியா, செட்டிகுளம் பிரதேச சபையின் 2022 ஆம் ஆண்டுக்கான பாதீடு 4 மேலதிக வாக்குளால் வெற்றி பெற்றுள்ளது.
வவுனியா, செட்டிகுளம் பிரதேச சபையின் 2022 ஆம் ஆண்டுக்கான பாதீடு இன்று (14.12) சபைத் தவிசாளர் சு.ஜெகதீஸ்வரனால் முன்வைக்கப்பட்டது. இதனையடுத்து பாதீடு தொடர்பாக சபை உறுப்பினர்களின் கருத்துக்கள் கேட்டறியப்பட்டது.
இதன்போது பாதீட்டினை வாக்கெடுப்புக்கு விடுமாறு உறுப்பினர்கள் கோரியதையடுத்து வாக்கெடுப்புக்கு விடப்பட்டப்பது. பாதீட்டுக்கு ஆதரவாக தமிழ் தேசியக் கூட்டமைப்பின் 05, ஈபிஆர்எல்எப் 03, தமிழ் தேசிய மக்கள் முன்னனி 01, முஸ்லிம் காங்கிரஸ் 01 என 10 உறுப்பினர்கள் வாக்களித்திருந்தனர்.
பாதீட்டுக்கு எதிராக ஸ்ரீலங்கா சுதந்திரக் கட்சியின் (சிறிரெலோ) 4 உறுப்பினர்களும், ஐக்கிய தேசியக் கட்சியின் 2 உறுப்பினர்களும் ஆக 6 பேர் வாக்களித்தனர்.
இதனால் 4 மேலதிக வாக்குகளால் சபையின் 2022 ஆம் ஆண்டுக்கான பாதீடு வெற்றிபெற்றது. பொதுஜன பெரமுனவின் ஒரு உறுப்பினர் பாத்தீட்டு வாக்கெடுப்பின் போது நடுநிலைமை வகித்திருந்தார்.
இதேவேளை, ஸ்ரீலங்கா சுதந்திரக் கட்சியின் ஆளுகைக்குள் இருந்த செட்டிகுளம் பிரதேச சபையின் பாதீடு கடந்த வருடம் தோற்கடிக்கப்பட்டு தமிழ் தேசியக் கூட்டமைப்பு ஆட்சியைக் கைப்பற்றியிருந்தமையும் குறிப்பிடத்தக்கது.
வவுனியாவில் காசநோய் தொடர்பான விழிப்புணர்வு செயலமர்வு ஒன்று வவுனியா வைத்தியசாலையின் காசநோய் தடுப்பு பிரிவினரால் முன்னெடுக்கப்பட்டது. காசநோய் தடுப்பு மருத்துவ நிலையத்தில் இந்நிகழ்வு இன்று (14.12) இடம்பெற்றது.
இதன்போது காசநோய் ஏற்படுவதற்கான காரணங்கள், அதனை தடுப்பதற்கான வழிவகைகள் மற்றும் காச நோய்கான மருத்துவ முறைகள் தொடர்பில் தெளிவுபடுத்தப்பட்டதுடன், மக்கள் இதில் இருந்து விடுபட செயற்படும் முறை தொடர்பிலும் விளக்கமளிக்கப்பட்டது.
இந்நிகழ்வில் பிராந்திய சுகாதார சேவைகள் திணைக்களப் பணிப்பாளர், விசேட வைத்திய நிபுணர், வைத்தியர்கள் ஆகியோர் கருத்துரைகளை வழங்கியதுடன், தாதியர்கள், சுகாதார பரிசோதகர்கள், சுகாதரத்துறை ஊழியர்கள், பொதுமக்கள் எனப் பலரும் கலந்து கொண்டனர்.
வவுனியா தெற்கு பிரதேச சபை பிரிவுக்குட்பட்ட மரக்காரம்பளை வீதியில் அமைத்துள்ள காத்தான் கோட்டம கிராமத்தின் உள்ளக வீதி கடந்த 20 வருடங்களாக எவ்வித அபிவிருத்தியுமின்றி தற்போது மக்கள் பயன்படுத்த முடியாத நிலமையில் காணப்படுகின்றது.
குறித்த கிராமத்தில் 75க்கு மேற்பட்ட குடும்பத்தினர் வசித்து வருவதுடன் குறித்த உள்ளக வீதியினை செப்பனிட்டு தருமாறு பிரதேச சபை மற்றும் அரசியல்வாதிகள் என பலரிடம் கோரிக்கைகள் முன்வைத்த போதிலும் இதுவரையிலும் எவருமே இவ்விடயம் தொடர்பில் கவனம் செலுத்தவில்லை.
பாடசாலை மாணவர்கள் இவ் வீதியூடாக மிகுந்த சிரமத்துக்கு மத்தியிலும் தங்களது பாடசாலை பருவத்தினை கடந்து செல்வதுடன் தொழில் நிமித்தம் செல்பவர்களும் இவ்வீதியினை பயன்படுத்த முடியாத நிலை தற்போது நிலை உருவாகியுள்ளமையினால் மக்கள் மாற்று வீதியினால் பயணத்தினை தொடர்ந்து வருகின்றனர்.
இக் கிராமத்தின் வீதி வீதி புரணமைப்பு தொடர்பில் அக்கிராமத்தில் வசிக்கும் சசிகுமார் டனுசன் என்ற மாணவன் கருத்துத் தெரிவிக்கையில்,
இவ் வீதியுடாக தான் தினசரி எனது பாடசாலைக்குச் சென்று வருகின்றேன். மழை பெய்தால் என்னால் பாதணி கூட அணிந்து செல்ல முடியாத நிலையில் இவ் வீதி காணப்படுகின்றது. எனவே உரிய அதிகாரிகள் எமக்கு தற்காலிகமாகவாவது இவ் வீதியினை செப்பனிட்டு தருமாறு கோரிக்கையினை முன்வைத்தார்.
இவ் வீதி தொடர்பாக முதியவர் கருத்து தெரிவித்தபோது ,எனக்கு 74 வயது ஆகின்றது. எனது இந்த முதுமைப்பருவத்தில் இவ் வீதியூடாக என்னால் நடந்து செல்வதற்குக்கூட கடினமாக காணப்படுகின்றது. கடந்த 8 வருடங்களுக்கு மேலாக இவ் வீதி பழுதடைந்து காணப்படுகின்றது எனத் தெரிவித்தார்.
பிரதேச சபை மீது மக்கள் முன்வைத்த குற்றச்சாட்டுகளையடுத்து வவுனியா தெற்கு பிரதேச சபை தவிசாளர் தர்மலிங்கம் யோகராஜா அவர்களை தொலைபேசியூடாக தொடர்பு கொண்டு வினவிய போது,
வீதி புரணமைப்பு தொடர்பில் எமக்கு தினசரி பல முறைப்பாடுகள் கிடைத்தவண்ணமேயுள்ளது. எம்மிடம் தற்போது குறைந்தளவு நிதியே காணப்படுகின்றது. அவற்றின் ஊடாக எம்மால் தற்போது எம்மால் வீதியினை செப்பனிடும் பணிகளை முன்னெடுப்பது கடினம்.
எனினும் மழையுடான காலநிலை முடிவடைந்தததன் பின்னர் பிரதேச சபையிடம் காணப்படும் இயந்திரங்களை கொண்டு வீதியினை சற்று மறுசீரமைத்து வழங்க முடியும் எனவும் தெரிவித்தார்.
