இலங்கை வந்துள்ள பிரித்தானிய பாராளுமன்ற குழு யாழ்ப்பாணத்துக்கான விஜயத்தை இன்று மேற்கொள்ளவுள்ளது.

பிரித்தானிய பாராளுமன்ற கன்ஸவேட்டிவ் மற்றும் தொழில் கட்சியின் பாராளுமன்ற உறுப்பினர்கள் மூவர் உள்ளிட்ட குழுவினர் அடங்கிய குழுவினர் நேற்று இலங்கை வந்தடைந்தனர்.

இக்குழுவினர் எதிர்வரும் 26ஆம் திகதிவரை இலங்​கையில் தங்கியிருப்பர்.

இக்காலப் பகுதியில் இந்த குழுவினர் ஜனாதிபதி உள்ளிட்ட அரசாங்கம் மற்றும் எதிர்க் கட்சிகளின் பிரதிநிதிகளை சந்தித்து பேச்சுவார்த்தை நடத்தவுள்ளனர்.

அத்துடன் இலங்கையின் தற்போதைய மீளமைப்பு மற்றும் மனித உரிமைகள் நிலவரங்கள் தொடர்பில் அந்த குழு முழுமையான ஆராய்வினை மேற்கொள்ளும் என்றும் தெரிவிக்கப்பட்டுள்ளது.

ஏற்கனவே பிரித்தானியாவின் வெளிவிவகார திணைக்கள செயலாளர் எலஸ்டயார் பர்ட் இந்த முறை மனித உரிமை விடயங்களில் இலங்கை சிறந்த முன்னேற்றத்தை வெளிப்படுத்த தவறினால் எதிர்வரும் மனித உரிமைகள் மாநாட்டில் அது தொடர்பில் பிரித்தானியா உரிய நடவடிக்கையை மேற்கொள்ளும் என்று எச்சரித்திருந்தார்.

சிலாபம் – முன்னேஸ்வரம் முன்னை நாதப் பெருமான் தேவஸ்தானத்தின் வருடாந்த உற்சவத்தின் கொடியேற்ற விழா நாளை 24 ஆம் திகதி புதன்கிழமை இடம்பெறும்.

இவ்வாலய உற்சவம் 29 தினங்களாகக் கொண்டாடப்படும். இக்காலங்களில் நாட்டிலிருந்து வருகை தரும் அடியார்களின் நன்மை கருதி போக்குவரத்துச் சேவைகள் சுகாதார வசதிகள் குடிதண்ணீர் ஏற்பாடுகள் புதிய மின் இணைப்புக்கள் கழிவறைகள் என்பனவற்றுடன் புதிய வாகன தரிப்பிட வசதிகளும் ஏற்படுத்தப்படும்.

அத்துடன் பாதுகாப்பை முன்னிட்டு விசேட தற்காலிக பொலிஸ் நிலையமும் வழமை போல் அமைக்க ஏற்பாடுகள் செய்யப்பட்டு வருகின்றது.

இங்கு நடைபெறும் முக்கிய உற்சவங்களான எதிர்வரும் 2013.08.15 ஆம் திகதி தீமிதிப்பு உற்சவமும் அதைத் தொடர்த்து 63 சிவனடியார்களின் விழாவும், 16 ஆம் திகதி வெள்ளிக்கிழமை பிச்சாடன உற்சவமும், 17 ஆம் திகதி நடேசர் உற்சவமும் 18ஆம் திகதி ஞாயிற்றுக்கிழமை5.00 மணிக்கு வேட்டைத் திருவிழாவும், 19 ஆம் திகதி திங்கள் தேர் உலாவும் 20 ஆம் திகதி செவ்வாய்க்கிழமை சிலாபம் மாயவன் ஆற்றில் தீர்த்த உற்சவமும் கொண்டாடப்படும்.

15 மில்லியன் ரூபா செலவில் ஆனையிறவுக்கான புதிய ரயில் நிலையம் ஒன்று நிர் மாணிக்கப்படவுள்ளது.

கல்வி அமைச்சினால் வழங்கப்படும் நிதியுதவி மூலம் சகல வசதிகளுடன் நிர்மாணிக்கப்படவுள்ள புதிய ரயில் நிலையத்திற்கான அடிக்கல் நாட்டும் நிகழ்வு நாளை காலை9.00 மணிக்கு இடம்பெறவுள்ளது.

கல்வி அமைச்சர் பந்துல குணவர்தன பிரதம அதிதியாக கலந்துகொண்டு அடிக்கல் நாட்டி புதிய ரயில் நிலையத்திற்கான நிர்மாணப் பணிகளை உத்தியோகபூர்வ மாக ஆரம்பித்து வைக்கவுள்ளார்.

வட மாகாணம் உட்பட ஒன்பது மாகாணங்களின் ஆளுநர்கள், முதலமைச்சர்கள் மற்றும் முக்கியஸ்தர்கள் பலர் இந்த நிகழ்வில் கலந்து சிறப்பிக்கவுள்ளனர்.

யுத்தம் காரணமாக சேதமடைந்த வட வகுதிக்கான ரயில் பாதை புதிதாக விஸ்தரிக்கப்பட்டு வருகின்ற நிலையில், சுமார்23 வருடங்களுக்கு பிறகு முதற்தடவையாக ஆணையிறவுக்கான ரயில் நிலையம் புதிதாக நிர்மாணிக்கப்படவுள்ளதாக வட மாகாண ஆளுநர் மேஜர் ஜெனரல் ஜி.ஏ. சந்திரசிறி தெரிவித்தார்.

வட பகுதி மக்களின் நலனை கருத்திற்கொண்டு கிழக்கு உட்பட எட்டு மாகாணங்களிலுள்ள பாடசாலை மாணவ, மாணவிகள், ஆசிரியர்களிடமிருந்து சேகரிக்கப்பட்ட சுமார் 15மில்லியன் ரூபா செலவிலேயே இந்த புதிய ரயில் நிலையம் நிர்மாணிக்கப்படவுள்ளதாக அவர் மேலும் தெரிவித்தார். இனங்களுக்கு இடையிலான ஒற்றுமை, பாடசாலை மாணவர்கள் மற்றும் மாகாண சபைகளுக்கு இடையிலான ஒத்துழைப்பு என்பவற்றின் பிரதிபலிப்பாகவே கல்வி அமைச்சின் ஏற்பாட்டில் இந்த நிதி சேகரிப்பு திட்டம் முன்னெடுக்கப்பட்டதாகவும் அவர் சுட்டிக்காட்டினார்.

கடந்த 23 வருடங்களுக்கு முன்னர் ஆணையிறவு ரயில் நிலையம் அமைந்திருந்த அதே இடத்திலேயே புதிய ரயில் நிலையமும் நிர்மாணிக்கப்படவுள்ளது என்று தெரிவித்த அவர், இவ்வாண்டு இறுதிக்குள் அதன் நிர்மாணப் பணிகள் நிறைவடையவுள்ளது என்றார்.

ஏனைய எட்டு மாகாணங்களின் ஆளுநர்கள் மற்றும் முதலமைச்சர்களுடன் பாடசாலை மாணவர்கள் வட மாகாணத்தைச் சேர்ந்த பாடசாலை மாணவர்கள் சுமார் 1000 பேரும் இந்த நிகழ்வில் கலந்து கொள்ளவுள்ளமை விசேட அம்சமாகும்.

மட்டக்களப்பு அருள்மிகு தாந்தாமலை ஸ்ரீ முருகன் ஆலய மஹோற்சவத்தின் தீர்தோற்சவம் நாளை இடம்பெறவுள்ளது.

கிழக்கு மாகாணத்தில் மட்டக்களப்பு பிரதேசத்தில் பெரிதும் மக்களால் பேசப்படுகின்ற மலைக் கோயில்களில் தாந்தா மலை முருகன் ஆலயமும் ஒன்றாகும்.

பழமையும், வரலாற்று முக்கியத்துவமும் நிறைந்த கதிர்காம முருகன் ஆலயத்துடன் தாந்தாமலை முருகன் ஆலயத்தையும் மக்கள் இணைத்துப் போற்றி வருகின்றனர்.

கடந்த 3ம் திகதி ஆரம்பமாகி சரித்திர முக்கியத்துவம் வாய்ந்த இவ்வாலயத்தின் மகோற்சவம் நாளை காலை 6மணியளவில் நடைபெற இருக்கும் புண்ணிய தீர்தோற்சவத்துடன் நிறைவு பெறுகிறது.

இத் தீர்தோற்சவம் காரணமாக நாளை நடைபெற இருந்த மட்டக்களப்பு மாவட்ட பாடசாலைகளின் பரீட்சைகள் அனைத்தும் பிற்போடப் பட்டுள்ளமை குறிப்பிடத்தக்கதாகும்.