மதுவரி திணைக்களத்தினரால் மேற்கொள்ளப்பட்ட விசேட சோதனை நடவடிக்கையின் போது 25 சாராயப் போத்தல்களுடன் இளைஞர் ஒருவர் கைது செய்யப்பட்டுள்ளார்.

வவுனியா, கண்டி வீதியில் உள்ள பிரபல சுப்பர் மார்க்கற் முன்பாக நேற்று (20.08) இரவு 8.45 மணியளவில் இடம்பெற்ற இச் சம்பவம் தொடர்பில் மேலும் தெரியவருவதாவது,

கோவிட் அச்சுறுத்தல் காரணமாக நாடு முழுவதும் நேற்று (20.08) இரவு 10 மணி முதல் எதிர்வரும் 30 ஆம் திகதி அதிகாலை 4 மணிவரை முடக்கப்பட்டுள்ள நிலையில் மதுபானக் கொள்வனவு அதிகரித்து காணப்பட்டது.

இந்நிலையில் வவுனியா, கண்டி வீதியில் உள்ள பிரபல சுப்பர் மார்க்கற் ஒன்றிற்கு சென்ற இருவர் 25 சாராயப் போத்தல்களை கொள்வனவு செய்துள்ளனர்.

குறித்த போத்தலை ஒருவருடைய மோட்டர் சைக்கிளில் வைத்து கொண்டு செல்ல முற்பட்ட போது அங்கு திடீர் சோதனை நடவடிக்கையில் ஈடுபட்ட மதுவரித் திணைக்கள அதிகாரிகள்,

25 சாராயப் போத்தல்களை உடமையில் வைத்திருந்த குற்றச்சாட்டில் குறித்த நபரை கைது செய்ததுடன், சாரயாப் போத்தல்களையும் பறிமுதல் செய்தனர்.

குறித்த நபரிடம் விசாரணைகளை முன்னெடுத்துள்ள மதுவரித் திணைக்கள அதிகாரிகள், குறித்த நபரை நீதிமன்றில் முற்படுத்த நடவடிக்கை எடுத்துள்ளதாக தெரிவித்துள்ளனர்.

அன்டிஜன் பரிசோதனை..

கொரோனா தொற்று காரணமாக நாடு முழுவதும் முடக்கப்பட்டுள்ள நிலையில் வீதிகளில் நடமாடியவர்களை வழிமறித்து வவுனியா சுகாதாரப் பிரிவினர் இன்று (21.08.2021) மேற்கொண்ட அன்டிஜன் பரிசோதனையில் இருவருக்கு கொரோனா தொற்று உறுதி செய்யப்பட்டுள்ளது.

நேற்று (20.08) இரவு 10 மணி முதல் எதிர் வரும் 30 ஆம் திகதி அதிகாலை 4 மணிவரை நாடு முழுவதும் முடக்க நிலை அமுல்படுத்தப்பட்டுள்ளது. இதனை மீறி செயற்படுபவர்கள் மீது பொலிசாரும், சுகாதாரப் பிரிவினரும் இணைந்து நடவடிக்கை எடுத்து வருகின்றனர்.

அந்தவகையில், வவுனியா நகரப்பகுதிகளில் சுகாதாரப் பிரிவினரும், பொலிசாரும் இணைந்து விசேட கண்காணிப்பு நடவடிக்கையில் ஈடுபட்டதுடன்,

வீதியில் நடமாடியவர்களை வழிமறித்து அன்டிஜன் பரிசோதனையும் முன்னெடுத்திருந்தனர். இதனை மாவட்ட பதில் அரசாங்க அதிபர் தி.திரேஸ்குமார் நேரடியாக விஜயம் செய்து கண்காணிப்பு நடவடிக்கையிலும் ஈடுபட்டார்.

வவுனியா நீதிமன்றம் மற்றும் புகையிரத நிலைய வீதி என்பவற்றில் துவிச்சக்கர வண்டி, மோட்டர் சைக்கிள் மற்றும் வாகனங்களில் நடமாடியவர்கள் வழிமறிக்கப்பட்டு 30 பேருக்கு அன்டிஜன் பரிசோதனை முன்னெடுக்கப்பட்டது.

அதில் இருவருக்கு கொரோனா தொற்று உறுதி செய்யப்பட்டது. தொற்று உறுதி செய்யப்பட்டவர்களை கொரோனா சிகிச்சை நிலையத்திற்கு அனுப்பி வைக்க நடவடிக்கை எடுத்துள்ளதுடன், ஏனையவர்கள் சுகாதாரப் பிரிவினராலும், பொலிசாராலும் எச்சரிக்கப்பாட்டு வீடுகளுக்கு திருப்பி அனுப்பி வைக்கப்பட்டனர்.

பொது முடக்கம்..

நாட்டில் ஏற்பட்டுள்ள கொரோனா தொற்றையடுத்து அமுல்படுத்தப்பட்டுள்ள ஊரடங்கு சட்டம் காரணமாக வவுனியா மாவட்ட முழுமையாக முடங்கியுள்ளதுடன் அத்தியாவசிய சேவைகள் வழமை போல் இயங்குகின்றன.

நாட்டில் கொரோனா தொற்று தீவிரம் அடைந்ததையடுத்து நேற்று (20.08.2021) வெள்ளிக்கிழமை இரவு 10.00 மணியில் இருந்து 30.08.2021 திங்கட்கிழமை அதிகாலை 4.00 மணி வரை நாடு முழுவதும் ஊரடங்கு சட்டம் அமுல்படுத்தப்பட்டுள்ளது.

அந்த வகையில் வவுனியா மாவட்டத்திலும் ஊரடங்கு நடைமுறை இறுக்கமாக நடைமுறைப்படுத்தப்பட்டு வருகின்றது. எனினும் மாவட்டத்தில் மருந்தகங்கள் திறக்கப்பட்டுள்ளதுடன் மொத்த மரக்கறி விற்பனை நிலையத்தில் சில வியாபார நிலையங்களும் திறந்துள்ளன.

மேலும் விவசாயிகள், வைத்திய தேவை என்பனவற்றிக்கு செல்வதற்கு பாதுகாப்புப் பிரிவினர் அனுமதி வழங்கி வருகின்றமையும் குறிப்பிடத்தக்கது.

மகாறம்பைக்குளம்..

வவுனியாவில் கிணற்றுக்குள் கு.தித்து த.ற்.கொ.லை.க்.கு மு.யற்சித்த கர்ப்பிணி பெண் ம.ரணமடைந்துள்ளதுடன், பரிசோதனையில் கோவிட் தொற்று உறுதி செய்யப்பட்டுள்ளது. நேற்று (21.08.2021) இச் சம்பவம் தொடர்பில் மேலும் தெரியவருவதாவது,

வவுனியா, மகாறம்பைக்குளம் பகுதியைச் சேர்ந்த 28 வயதுடைய கர்ப்பிணிப் பெண் ஒருவர் கிணற்றுக்குள் கு.தித்து த.ற்.கொ.லை.க்.கு மு.யற்சித்துள்ளார்.

இதனையடுத்து கிராம மக்கள் மற்றும் உறவினர்கள் குறித்த பெண்ணை கிணற்றில் இருந்து மீ.ட்டு வவுனியா வைத்தியசாலையில் அனுமதித்தனர். எனினும் சிகிச்சை பலனின்றி குறித்த கர்ப்பிணிப் பெண் ம.ரணமடைந்தார்.

ம.ரணமடைந்த பெண்ணிடம் மேற்கொள்ளப்பட்ட பரிசோதனையில் அவருக்கு கோவிட் தொற்று உறுதி செய்யப்பட்டுள்ளது. இதனையடுத்து அவருடன் தொடர்புடையவர்களை தனிமைப்படுத்துவதற்கான நடவடிக்கைகளை சுகாதாரப் பிரிவினர் முன்னெடுத்துள்ளனர்.

கொரோனா..

வவுனியாவில் மேலும் 150 பேருக்கு கொரோனா தொற்று ஏற்பட்டுள்ளதுடன், இருவர் மரணமடைந்துள்ளதாக சுகாதாரப் பிரிவினர் தெரிவித்துள்ளனர். வவுனியாவில் இனங்காணப்பட்ட கொரோனா தொற்றாளர்களுடன் தொடர்புகளைப் பேணியோர்,

வவுனியா வைத்தியசாலையில் சிகிச்சைக்காக அனுமதிக்கப்பட்டோர் மற்றும் எழுமாறாக மேற்கொள்ளப்பட்ட பிசிஆர் மற்றும் அன்டிஜன் பரிசோதனையின் முடிவுகள் சில இன்று (20.08.2021) இரவு வெளியாகின.

அதில் வவுனியா, வவுனியா வடக்கு, செட்டிகுளம், வவுனியா தெற்கு ஆகிய பிரிவுகளை உள்ளடக்கியதாக மாவட்டம் முழுவதும் கோவிட் தொற்று பரவல் அடைந்துள்ள நிலையில் 150 பேருக்கு கொரோனா தொற்று உறுதி செய்யப்பட்டுள்ளது.

இந்நிலையில் தொற்றாளர்களை கொரோனா சிகிச்சை நிலையத்திற்கு அனுப்பி வைப்பதற்கும் அவர்களுடன் தொடர்புடையவர்களை சுய தனிமைப்படுத்துவதற்கும் சுகாதாரப் பிரிவினர் நடவடிக்கை எடுத்துள்ளனர்.

அத்துடன் கொரோனா தொற்று உறுதி செய்யப்பட்ட நிலையில் வவுனியா வைத்தியசாலையின் கொரோனா சிகிச்சை விடுதியில் சிகிச்சை பெற்று வந்த உக்குளாங்குளம் பகுதியைச் சேர்ந்த வந்த ஆண் ஒருவரும்,

கொரோனா தொற்று காரணமாக மதவுவைத்தகுளம் கொரோனா சிகிச்சை மையத்தில் சிகிச்சை பெற்று வந்த நேரியகுளம் பகுதியைச் சேர்ந்த ஆண் ஒருவரும் சிகிச்சை பலனின்றி மரமடைந்துள்ளனர். இருவரது உடல்களையும் சுகாதார நடைமுறைகளை பின்பற்றி தகனம் செய்ய சுகாதாரப்பிரிவினர் நடவடிக்கை எடுத்துள்ளனர்.

குருமன்காடு பகுதியில்..

வவுனியா, குருமன்காடு பகுதியில் திடீரென மயங்கி விழுந்த இளம் குடும்ப பெண் மரணமடைந்துள்ளார். இன்று (20.08.2021) இரவு இடம்பெற்ற இச் சம்பவம் தொடர்பில் மேலும் தெரியவருவதாவது,

வவுனியா, குருமன்காடு பகுதியில் வசித்து வந்த இளம் குடும்ப பெண் ஒருவர் திடீரென மயங்கி விழுந்துள்ளார். இதனையடுத்து உறவினர்கள் உடனடியாக அப் பெண்ணை வவுனியா வைத்தியசாலையில் அனுமதித்துள்ளனர்.

எனினும், குறித்த பெண் சிகிச்சை பலனின்றி மரணமடைந்துள்ளார். 35 வயதுடைய பெண்ணே இவ்வாறு மரணமடைந்தவராவார். குறித்த பெண்ணிற்கு கொரோனா தொற்று உள்ளதா என அன்டிஜன் பரிசோதனை மேற்கொள்ளப்பட்டுள்ளது. அதில் குறித்த பெண்ணுக்கு கொரோனா தொற்று உறுதி செய்யப்பட்டுள்ளது.

வவுனியாவில்..

வவுனியாவில் கொரோனா தொற்று உறுதி செய்யப்பட்ட நிலையில் கொரோனா சிகிச்சை நிலையத்திற்கு செல்ல மறுத்து, சுகாதாரப் பிரிவினரின் நடவடிக்கைக்கு இடையூறை ஏற்படுத்திய ஹோட்டல் உரிமையாளர் நீதிமன்ற கட்டளைக்கு அமைவாக நேற்று மாலை (19.08) கைது செய்யப்பட்டுள்ளார்.

வவுனியா சின்னப்புதுக்குளம் பகுதியில் ஹோட்டல் நடத்தி வரும் அதன் உரிமையாளருக்கு (வயது 59) கடந்த 11 ஆம் திகதி கொரோனா தொற்று உறுதி செய்யப்பட்டது. இதனையடுத்து அவரை கொரோனா சிகிச்சை நிலையத்திற்கு கொண்டு செல்ல முற்பட்ட போது அவர் அதற்கு மறுப்பு தெரிவித்திருந்தார்.

அவரது உடல் நிலை தொடர்பில் ஆய்வு செய்த சுகாதாரப் பிரிவினர் அவர் கொரோனா சிகிச்சை நிலையத்திற்கு செல்ல வேண்டிய அவசியத்தை வலியுறுத்தினர். இருப்பினும் அவர் கோவிட் சிகிச்சை நிலையத்திற்கு செல்ல மறுப்பு தெரிவித்ததுடன்,

அவருடன் தொடர்புகளைப் பேணியவர்களை அறிவதற்காக ஹோட்டல் சிசிரீவி பதிவுகளை சுகாதாரப் பிரிவினர் கோரிய போது அதனையும் காட்ட மறுத்திருந்தார். அத்துடன், சுகாதாரப் பிரிவினருக்கு எதிராக பொலிசில் முறைப்பாடு ஒன்றையும் ஒன்லைன் மூலம் பதிவு செய்திருந்தார்.

இந்நிலையில், சுகாதாரப் பிரிவினரின் நடவடிக்கைக்கு இடையூறை ஏற்படுத்தியதாக சுகாதாரப் பிரிவினர் வவுனியா பொலிசில் ஹோட்டல் உரிமையாளருக்கு எதிராக முறைப்பாடு பதிவு செய்து, பொலிசார் ஊடாக நீதிமன்றத்தில் வழக்கு தாக்கல் செய்தனர்.

இந்நிலையில் குறித்த முறைப்பாடு தொடர்பில் கவனம் செலுத்திய நீதிமன்றம் குறித்த நபரை கைது செய்து கொரோனா சிகிச்சை நிலையத்திற்கு அனுப்பி வைக்குமாறு உத்தரவு பிறப்பித்ததுடன், சிசிரீவி பதிவுகளையும் சுகாதாரப் பிரிவினருக்கு காட்டுமாறு தெரிவித்திருந்தது.

இதனையடுத்து குறித்த ஹோட்டலுக்கு சென்ற வவுனியா பொலிசார் ஹோட்டல் உரிமையாளரை சுகாதார நடைமுறைகளைப் பின்பற்றி கைது செய்து, சுகாதாரப் பிரிவினர் ஊடாக வவுனியா வைத்தியசாலையின் கொரோனா சிகிச்சை நிலையத்தில் ஒப்படைத்தனர்.

இதேவேளை, நீதிமன்ற கட்டளைக்கு அமைவாக கைது செய்ய பொலிசார் சென்ற போது அவர் உடன் வர மறுப்பு தெரிவித்து, தனது சட்டத்தரணி வர வேண்டும் என தெரிவித்ததுடன், சட்டத்தரணி ஒருவர் வந்த பின்னரும் நீண்ட இழுபறியின் பின்னரே நோயாளர் காவு வண்டியில் ஏறியிருந்தார்.

இதன்காரணமாக சுகாதாரப் பிரிவினரும், பொலிசாரும் குறித்த ஹோட்டல் முன்பாக நீதிமன்ற கட்டளையுடன் சுமார் ஒரு மணித்தியாலத்திற்கு மேலாக காத்திருந்தமை குறிப்பிடத்தக்கது.

கொரோனா..

நோய்களுக்குரிய எந்தவித அறிகுறிகளும் அற்றவர்களும் கோவிட் தொற்றால் மரணமடைவதால் மக்கள், அவதானமாக இருக்க வேண்டும் என வவுனியா சுகாதாரப் பிரிவினர் தெரிவித்துள்ளனர்.

வவுனியா, பெரியார்குளம், சாந்தசோலை வீதியில் உள்ள வீடு ஒன்றில் வசித்து வந்த 73 வயதுடைய பெண் ஒருவர் நேற்று (19.08) மரணமடைந்திருந்தார். குறித்த பெண் எந்தவித நோய்களும் அற்ற நிலையில் இருந்ததுடன், கோவிட் தொற்றுக்கான அறிகுறிகளும் அற்றவராகவே இருந்துள்ளார்.

குறித்த பெண் திடீரென உடல் நலக்குறைவு ஏற்பட்டு மரணமடைந்திருந்தார். மரணமடைந்த பின் அவரது சடலம் வவுனியா வைத்தியசாலையில் ஒப்படைக்கப்பட்ட நிலையில் அவருக்கு மேற்கொள்ளப்பட்ட பிசீஆர் பரிசோதனையில் கோவிட் தொற்று உறுதி செய்யப்பட்டது.

இதனையடுத்து சுகாதார நடைமுறைகளைப் பின்பற்றி அவருடைய உடலை தகனம் செய்ய சுகாதாரப் பிரிவினர் நடவடிக்கைகளை முன்னெடுத்துள்ளதுடன், அவருடைய குடும்பத்தினர் மற்றும் தொடர்புகளைப் பேணியோர் தனிமைப்படுத்தப்பட்டு அவர்களிடம் இன்று (20.08) காலை அன்டிஜன் பரிசோதனை முன்னெடுக்கப்பட்டது.

அவர்களிடம் மேற்கொள்ளப்பட்ட அன்டிஜன் பரிசோதனையில் எவருக்கும் கோவிட் தொற்று உறுதி செய்யப்படவில்லை. இதேபோன்று, தெற்றுக்கான அறிகுறிகள் இல்லாதவர்களும் கோவிட் தாக்கம் காரணமாக மரணமடைந்து வருகின்றனர்.

எனவே மக்கள் நிலமையை உணர்ந்து சுகாதார நடைமுறைகனைப் பின்பற்றி சுய கட்டுப்பாட்டுடன் இருக்க வேண்டும் என வவுனியா சுகாதாரப் பிரிவினர் தெரிவித்துள்ளனர்.

பொது முடக்கம்..

கோவிட் அச்சுறுத்தல் காரணமாக இன்று இரவு முதல் நாடாளவிய ரீதியில் பொது முடக்கம் அறிவிக்கப்பட்டதையடுத்து அத்தியாவசியப் பொருட் கொள்வனவுக்காக வவுனியா நகருக்குள் மக்கள் அதிகளவில் வருகை தந்தனர்.

இன்று இரவு 10 மணி முதல் எதிர்வரும் 30 ஆம் திகதி அதிகாலை 4 வரை நாடு முழுவதும் தனிமைப்படுத்தல் ஊடங்கு சட்டம் பிறப்பிக்கப்படவுள்ளதாக இன்று பிற்பகல் அரசாங்கத்தின் அறிவித்தல் வெளியாகிய நிலையில்,

அத்தியாவசிப் பொருட்களை கொள்வனவு செய்வதற்காக வவுனியா நகர வர்த்தக நிலையங்களில் அதிகளவிலான மக்கள் வருகை தந்து முண்டியத்துக் கொண்டிருந்ததை அவதானிக்க முடிந்தது.

அரசி, மா, சீனி, பால் மா, உள்ளிட்ட அத்தியாவசிய பொருட்கள், மரக்கறி வகைகள் என்பவற்றைப் பெற்றுக் கொள்வதற்கு அதிகளவிலான மக்கள் வர்த்தக நிலையங்களின் முன்னால் நீண்ட வரிசையில் நின்றதுடன்,

எரிபொருள் நிரப்பு நிலையங்களுக்கு முன்னாலும் நீண்ட வாசையில் மக்கள் நின்று எரிபொருட்களைப் பெற்றுச் சென்றனர். இதனால் வவுனியா நகரில் போக்குவரத்து நெரிசல் ஏற்பட்டதையும் அவதானிக்க கூடியதாக இருந்தது.

வரலட்சுமி பூஜை..

வவுனியாவில் சுகாதார நடைமுறைகளைப் பின்பற்ற வரலட்சுமி பூஜை வழிபாடுகள் இன்று (20.08) சிறப்பாக இடம்பெற்றது.

இந்துக்களின் விசேட விரதங்களில் வரலட்சுமி விரதமும் ஒன்றாகும். சுமங்கலிப் பெண்கள் தமது கணவன்மாருக்கு நீண்ட ஆயுள் வேண்டியும், அவர்களுக்கு நலம் வேண்டியும் வரலட்சுமி விரத நாளில் அம்மனிடம் வரம் வேண்டி விரதம் இருந்து நூல் கட்டுவர்.

அந்தவகையில் வவுனியாவில் உள்ள அம்மன் ஆலயங்கள் மற்றும் இந்து ஆலயங்களில் சுகாதார நடைமுறைகளைப் பின்பற்றி மட்டுப்படுத்தப்பட்ட அளவிலான பக்தர்களுடன் வரலட்சுமி பூஜை விசேட வழிபாடுகள் இடம்பெற்றிருந்தன.

வவுனியா, குட்செட் வீதி கருமாரி அம்மன் தேவஸ்தானத்தில் ஆலயத்தின் பிரதமகுரு பிரபாகரக் குருக்கள் தலைமையில் கருமாரி அம்மனுக்க விசேட அபிடேகம், பூஜை வழிபாடுகள் இடம்பெற்று வரலட்சுமி விரத வழிபாடுகள் இடம்பெற்றன.

இதன்போது விரதம் இருந்தவர்களுக்கு அம்மன் ஆசியுடன் நூல் கட்டும் நிகழ்வும் சுகாதார நடைமுறைகளைப் பின்பற்றி இடம்பெற்றிருந்தது.