உருமாறிய வைரஸ்…

தற்போதைய சூழ்நிலையில், 4 உருமாறிய வைரஸ்களில் 3 வைரஸ்கள் இதுவரையில் இலங்கையில் இனங்காணப்பட்டுள்ளதாக நோய் எதிர்ப்பு மற்றும் உயிரியல் மூலக்கூறு வைத்திய நிபுணர் பேராசிரியர் நீலிகா மலவிகே தெரிவித்துள்ளார்.

தற்போதைய கோவிட் தொற்று நிலவரம் தொடர்பில் செய்தியாளர்களிடம் விளக்கிய போதே அவர் இவ்வாறு குறிப்பிட்டுள்ளார். இதன்போது பேசிய அவர், மிகவும் அபாயம் மிக்கவை என்று உலக சுகாதார ஸ்தாபனத்தினால் 4 உருமாறிய வைரஸ்கள் அடையாளப்படுத்தப்பட்டுள்ளன.

பிரித்தானியா, தென் ஆபிரிக்கா, பிரேஸில் மற்றும் இந்தியா ஆகிய நாடுகளில் பரவும் வைரஸ்களே இவ்வாறு அபாயம் மிக்கவையாக அடையாளப்படுத்தப்பட்டுள்ளன என குறிப்பிட்டுள்ளார்.

-தமிழ்வின்-

நிமோனியாவினால்..

இலங்கையில் கோவிட் வைரஸினால் நிமோனியா காய்ச்சலுக்கு உள்ளான ஆயிரத்திற்கும் மேற்பட்டோர் வைத்தியசாலைகளில் சிகிச்சை பெற்று வருவதாக தேசிய தொற்று நோய் பிரிவின் விசேட வைத்தியர் ஆனந்த விஜேவிக்ரம தெரிவித்துள்ளார்.

இலங்கை தற்போது வரையில் மிகவும் அவதானமிக்க மற்றும் தீர்மானமிக்க நிலையில் உள்ளதாக வைத்தியர் குறிப்பிட்டுள்ளார். இந்த சந்தர்ப்பத்தில் கோவிட்டை கட்டுப்படுத்துவதற்கு எடுக்க கூடிய அனைத்து நடவடிக்கையும் எடுக்கவில்லை என்றால் எதிர்வரும் மூன்று அல்லது நான்கு வாரத்தில் மிகவும் மோசமான நிலைமை ஏற்பட கூடும் என அவர் குறிப்பிட்டுள்ளார்.

கோவிட் நிமோனியா ஏற்பட்டு உயிரிழப்பவர்களின் எண்ணிக்கை குறைவு என்ற போதிலும் வேறு நோய்கள் இருக்கும் 60 வயதிற்கு மேற்பட்டவர்கள் உயிரிழக்கும் ஆபத்துக்கள் அதிகம் என அவர் கூறியுள்ளார்.

நாட்டு மக்கள் கைகளை சுத்தமாக கழுவ வேண்டும். முகக் கவசம் அணிய வேண்டும். சமூக இடைவெளிகளை பின்பற்ற வேண்டும். மிகவும் அவதானமாக இருக்க வேண்டும் என அவர் மேலும் தெரிவித்துள்ளார்.

கொரோனா தொற்றாளர்கள்..

இலங்கையில் நாளாந்தம் அடையாளம் காணப்படும் கோவிட் தொற்றாளர்களை விடவும், மூன்று மடங்கு கொரோனாதொற்றாளர்கள் சமூகத்திற்குள் இருக்க முடியும் என இராஜாங்க அமைச்சர் சுதர்ஷினி பெர்ணான்டோபுள்ளே தெரிவித்துள்ளார்.

இவ்வாறு சமூகத்திற்குள் காணப்படுகின்ற கொரோனா தொற்றாளர்களின் ஊடாக, மேலும் வைரஸ் பரவும் அபாயம் காணப்படுவதாகவும் அவர் அச்சம் வெளியிட்டுள்ளார்.

நேற்றைய தினம் 3500ற்கும் அதிகமான கோவிட் தொற்றாளர்கள் அடையாளம் காணப்பட்டுள்ள நிலையில், சமூகத்திற்குள் அதைவிடவும் மூன்று மடங்கு தொற்றாளர்கள் இருக்கக்கூடும் என அவர் கூறுகின்றார்.

இவ்வாறானவர்களின் ஊடாக, சமூகத்திற்குள் கோவிட் தொற்று மேலும் பரவும் அபாயம் காணப்படுவதாக அவர் அச்சம் வெளியிடுகின்றார். புதிய மரபணு ஊடாக இதுவரையில் கோவிட் மரணங்களின் எண்ணிக்கையில் அதிகரிப்பு ஒன்றை காண முடிவதாக அவர் குறிப்பிட்டுள்ளார்.

வைரஸ் பரவலை குறைத்துக் கொள்ள வேண்டும் என்றால் மக்கள் இரண்டு வாரங்களாவது வீட்டினுள் இருந்து செயற்பட வேண்டும். தேசிய அடையாள அட்டை இலக்கத்தின் ஒன்றை இரட்டை இலக்கங்களில் வீட்டை விட்டு செல்லுமாறு கூறினாலும் மக்கள் அதிகமாக வெளியே செல்கின்றனர்.

வீதிகள் வெறுமையாக வேண்டும். தொற்றினை குறைக்க வேண்டும் என்றால் வீட்டிலேயே இருக்க வேண்டும் அத்தியாவசிய விடயங்ககைள தவிர்த்து வீட்டை விட்டு வெளியே செல்ல வேண்டாம் என அவர் பொது மக்களிடம் கேட்டுக்கொண்டுள்ளார்.

-தமிழ்வின்-

பரீட்சைகளை..

கல்விப் பொதுத் தராதர சாதாரண தரம் மற்றும் உயர் தர பரீட்சைகளை மீளவும் ஒத்திவைப்பது குறித்து கல்வி அமைச்சு கவனம் செலுத்தி வருவதாக தெற்கு ஊடகமொன்று செய்தி வெளியிட்டுள்ளது.

எதிர்வரும் ஆகஸ்ட் மாதம் நடைபெறவிருந்த உயர்தரப் பரீட்சை ஒக்டோபர் மாதத்தில் நடத்துவதற்கும் டிசம்பர் மாதம் நடைபெறவிருந்த சாதாரண தரப்பரீட்சையை ஜனவரி மாதம் நடத்துவதற்கும் முன்னதாக திட்டமிடப்பட்டிருந்தது.

கோவிட் பெருந்தொற்று காரணமாக பாடசாலை கற்றல் நடவடிக்கைகள் பாதிக்க்பபட்டுள்ளதால் இந்த திகதிகளில் மீளவும் மாற்றம் செய்யப்படக்கூடிய சாத்தியங்கள் அதிகம் என கல்வி அமைச்சின் பேச்சாளர் ஒருவர் தெரிவித்துள்ளார்.

இணைய வழி கற்கை நெறிகளின் மூலம் எல்லா பிரதேசங்களுக்கும் நிறைவானதும், சம அளவிலானதும் வளங்கள் இன்மையினால், உரிய தினத்தில் பாடசாலை கற்றல் நடவடிக்கைகளை முன்னெடுப்பதில் சிரமங்கள் காண்படுவதாகத் தெரிவித்துள்ளார்.

பாடசாலைகளை ஆரம்பிப்பது குறித்து நிச்சயமான திகதிகளை அறிவிக்க முடியாத நிலை காணப்படுவதாகவும், இதனால் பரீட்சைகளை எப்போது நடத்த முடியும் என்பது குறித்து திடமான அறிவிப்புக்களை தற்போதைக்கு மேற்கொள்ள முடியாது எனவும் கல்வி அமைச்சின் பேச்சாளர் ஒருவர் தெற்கு ஊடகமொன்றுக்கு குறிப்பிட்டுள்ளார்.

-தமிழ்வின்-

இலங்கை மக்களுக்கு…

இலங்கையில் அமுலாகும் பயண தடை குறிப்பிட்ட மணித்தியாலங்களுக்கு நீக்கப்படும் போது மக்கள் வெளியில் செல்ல வேண்டாம் என அறிவுறுத்தப்பட்டுள்ளது.

மே 25 ஆம் திகதி பயண தடை நீக்கப்படும் போது கடைகளுக்கு விரைந்து சென்று ஒன்றுகூட வேண்டாம் என்று இராணுவத் தளபதி ஜெனரல் சவேந்திர சில்வா பொதுமக்களிடம் கோரிக்கை விடுத்துள்ளார்.

மே 21 ஆம் திகதி இரவு 11:00 மணி முதல் மே 25 ஆம் திகதி காலை 4:00 மணி வரை நடைமுறைக்கு வரும் பயணக் கட்டுப்பாடுகளுக்கு மக்கள் தயாராக இருக்க வேண்டும் என்று அவர் கேட்டுக்கொண்டார். மீள பயணக் கட்டுப்பாடுகள் மே 25 ஆம் திகதி இரவு 11:00 மணி முதல் மே 28 ஆம் திகதி காலை 04:00 மணி முதல் வரை நடைமுறைக்கு வரும் என்றார்.

முக்கிய அறிவிப்பு…

அத்தியாவசிய உணவுப் பொருட்கள், மருந்துகளை அடுத்த சில நாட்களுக்கு வீடுகளில் சேமித்து வைத்துக் கொள்ளுங்கள் என இராணுவத் தளபதி ஜெனரல் ஷவேந்திர சில்வா நாட்டு மக்களுக்கு அறிவித்துள்ளார்.

சிங்கள ஊடகமொன்றுக்கு கருத்து தெரிவிக்கும் போதே அவர் இந்த விடயத்தை குறிப்பிட்டுள்ளார். அவர் மேலும் குறிப்பிடுகையில், அத்தியாவசிய பொருட்களை கொள்வனவு செய்து வைத்துக் கொள்ளுங்கள் என நாம் ஏற்கனவே அறிவித்திருந்தோம்.

இந்நிலையில் ஒருவாரகால பயணவரம்பு விதிக்கப்படும். எனவே வீடுகளில் அத்தியாவசியப் பொருட்களை கொள்வனவு செய்து வைத்துக் கொள்ளுங்கள்.

பயணக்கட்டுப்பாட்டுக் காலத்தில் தேவையின்றி வீதிகளில் இருந்து யாரும் பயணிக்க கூடாது. வெளியில் இருந்து வருபவர்களை வீடுகளில் வைத்துக் கொள்ளக் கூடாது என குறிப்பிட்டுள்ளார்.

இப் பயணக் கட்டுப்பாடானது கோவிட் தொற்றுப் பரவுவதை தடுப்பதற்கு உதவும் என சுகாதார துறையினர் வலியுறுத்தியிருப்பதாகவும் இதனடிப்படையில் ஐனாதிபதியின் பரிந்துறையின் பேரில் இப் பயணக்கட்டுப்பாடு அமுல்படுத்தப்பட்டுள்ளதாகவும் அவர் தெரிவித்துள்ளார்.

வெல்லம்பிட்டிய சந்தியில்..

கடந்த 2 நாட்களுக்கு முன்னர் வெல்லம்பிட்டிய சந்தியில் வயோதிப பெற்றோரை நடுவீதியில் விட்டு செல்லப்பட்டுள்ளதாக தெரிவிக்கப்படுகின்றது.

அவர்கள் இங்கிரிய பிரதேசத்தை சேர்ந்தவர்கள் எனவும் அவர்கள் இருவரையும் பிள்ளைகள் அவ்விடத்தில் விட்டு செல்லப்பட்டுள்ளதாக உறுதி செய்யப்பட்டுள்ளது.

கடை ஒன்றில் முன்னால் விழுந்து கிடந்த இந்த இருவரையும் சுகாதார அதிகாரிகள் பீசீஆர் பரிசோதனைக்குட்படுத்த நடவடிக்கை மேற்கொண்டுள்ளனர். அதில் அவர்கள் இருவரும் கொரோனா வைரஸ் தொற்றுக்குள்ளாகியுள்ளதாக தெரியவந்துள்ளது.

கொரோனா தொற்றியமையினாலேயே பிள்ளைகள் வீதிகளில் விட்டு சென்றிருக்கலாம் என சந்தேகிக்கப்படுகின்றது. அவர்கள் இருவரும் மிகவும் ஆபத்தான நிலையில் இருப்பதாக சுகாதார பரிசோதகர்கள் தெரிவித்துள்ளனர்.

குறித்த இருவரையும் ஐடிஎச் வைத்தியசாலைக்கு கொண்டு செல்ல கொத்தட்டுவ சுகாதார வைத்தியசாலை அதிகாரிகள் நடவடிக்கை மேற்கொண்டுள்ளனர்.

குறித்த தம்பதிக்கு கடந்த நாட்களாக அருகில் இருந்தவர்களே உணவு வழங்கி அவர்களை சுத்தப்படுத்தியுள்ளனர். சுத்தப்படுத்தியவர்களை கண்டுபிடித்து தனிமைப்படுத்துவதற்கு சுகாதார அதிகாரிகள் நடவடிக்கை மேற்கொண்டுள்ளனர்.

இதேவேளை, பிள்ளைகளின் நற்பெயருக்கு பாதிப்பு ஏற்படும் என்ற அச்சத்தில் அந்த பெற்றோர் பிள்ளைகள் தொடர்பான தகவல்களை வெளியிட விரும்பவில்லை என தெரிவிக்கப்படுகின்றது.

கொரோனா..

இலங்கையில் மேலும் 36 கொரோனா மரணங்கள் பதிவாகியுள்ளதாக அரசாங்க தகவல் திணைக்களம் வெளியிட்டுள்ள அறிக்கையில் தெரிவிக்கப்பட்டுள்ளது.

இதன்படி, இலங்கையில் கோவிட் தொற்றினால் உயிரிழந்தவர்களின் மொத்த எண்ணிக்கை 1051 ஆக உயர்ந்துள்ளது. இலங்கையில் நாள் ஒன்றில் பதிவான அதிகூடிய கொரோனா மரணங்கள் இதுவாகும்.

இதேவேளை நேற்றைய தினம் 3,623 பேருக்கு தொற்று உறுதி செய்யப்பட்டுள்ளதாக இராணுவத் தளபதி ஜெனரல் ஷவேந்திர தெரிவித்துள்ளார். அதன் அடிப்படையில் இலங்கையில் இதுவரையில் 151,343 பேருக்கு கொரோனா தொற்று உறுதிப்படுத்தப்பட்டுள்ளது.

இதேவேளை, இலங்கையில் கோவிட் தொற்றுக்கு உள்ளானவர்களில் மேலும் 1,222 பேர் இன்று குணமடைந்து வீடு திரும்பியுள்ளனர். இதற்கமைய தொற்றிலிருற்து குணமடைந்தவர்களின் எண்ணிக்கை 122,367 ஆக அதிகரித்துள்ளது.