நகரசபை..

வவுனியா நகரில் உள்ள குப்பைகளை தரம் பிரிக்காது உடனடியாக அகற்றி நகரின் தூய்மையைப் பேண சபை அனுமதி வழங்கியுள்ளதாக நகரசபையினர் தெரிவித்துள்ளனர்.

வவுனியா நகரசபையின் கழிவகற்றல் முறையில் ஏற்பட்ட சிக்கல் நிலை தொடர்பில் ஊடகங்களுக்கு தகவல் வழங்கிய போதே அவர்கள் இவ்வாறு தெரிவித்தனர்.

வவுனியாவில் தரம் பிரித்து குப்பைகளை அகற்றுவதற்கு நகரசபை நடவடிக்கை எடுத்திருந்தது. இந்நிலையில் வர்த்தகர்கள், பொதுமக்கள் தரம் பிரித்து கழிவுகளை சரியான முறையில் வழங்காமையினால் அதனை அகற்றுவதில் இழுபறி நிலை காணப்பட்டது.

இதனால் வவுனியா நகரசபைக்குட்பட்ட பல பகுதிகளில் சில நாட்களாக குப்பைகள் அகற்றப்படாது காணப்பட்டது. இந்நிலையில் நகரசபையின் சுகாதாரக் குழுவின் கவனத்திற்கு இவ் விடயம் கொண்டு வரப்பட்டு இது தொடர்பில் ஆராயப்பட்டிருந்தது.

இதன்போது நகரசபை சுகாதாரக் குழு தற்போதைக்கு தரம் பிரிக்காது நகரின் குப்பைகளை அகற்றி நகரை தூய்மைப்படுத்த வேண்டும் என நகரசபை உப தவிசாளர் சு.குமாரசாமி தெரிவித்தார்.

இதனடிப்படையில் நேற்று (12.05) இடம்பெற்ற சபை அமர்வில் குறித்த விடயத்தை நான் முன்வைத்து சபை உறுப்பினர்கள் மற்றும் நகரசபை செயலாளர் ஆகியோர் அதற்கு இணக்கம் தெரிவித்தனர்.

இதனையடுத்து வவுனியாவில் குப்பை அகற்றுவது தொடர்பில் காணப்பட்ட இழுபறி நிலைக்கு தீர்வு காணப்பட்டுள்ளது. உடனடியாக குப்பைகளை தரம் பிரிக்காது அகற்றுவதற்குரிய நடவடிக்கைகள் முன்னெடுக்கப்பட்டுள்ளது என நகரசபையினர் மேலும் தெரிவித்தார்.

கொரோனா..

வவுனியாவில் மேலும் 5 பேருக்கு கொரோனா தொற்று உறுதி செய்யபட்டுள்ளது. வவுனியாவில் இனங்காணப்பட்ட கொரோனா தொற்றாளர்களுடன் தொடர்புகளைப் பேணியவர்கள் மற்றும் வைத்தியசாலையில் சிகிச்சைக்காக அனுமதிக்கப்பட்டவர்களிடம் மேற்கொள்ளப்பட்ட பிசீஆர் பரிசோதனையின் முடிவுகள் சில நேற்று (12.05) இரவு வெளியாகின.

அதில், சுந்தரபுரம் பகுதியைச் சேர்ந்த ஒருவருக்கும், ஒமந்தை வேப்பங்குளம் பகுதியைச் சேர்ந்த ஒருவருக்கும், தெற்கிலுப்பைக்குளம் பகுதியைச் சேர்ந்த ஒருவருக்கும், போகஸ்வெவ பகுதியைச் சேர்ந்த ஒருவருக்கும், நெடுங்கேணி பகுதியைச் சேர்ந்த ஒருவருக்கும் என 5 பேருக்கு கொரோனா தொற்று உறுதி செய்யப்பட்டுள்ளது.

அவர்களை கொரோனா சிகிச்சை நிலையத்திற்கு அனுப்பி வைக்க நடவடிக்கை எடுக்கப்பட்டுள்ளதுடன், அவர்களுடன் தொடர்புடையவர்களை தனிமைப்படுத்தவும் சுகாதாரப் பிரிவினர் நடவடிக்கை எடுத்துள்ளனர்.

அத்துடன், வவுனியாவில் நேற்றைய தினம் (12.05) யாழ் பல்கலைக் கழகத்தின் வவுனியா வளாக மாணவர்கள் 31 பேர், வவுனியா வைத்தியசாலை வைத்தியர்கள், தாதியர்கள் 5 பேர் உட்பட 41 பேருக்கு கொரோனா தொற்று உறுதி செய்யப்பட்டுள்ளமை குறிப்பிடத்தக்கது.

கைது..

ஹெ.ரோ.யி.ன் போ.தை.ப் பொ.ருளுடன் பெண் ஒருவரை கைது செய்துள்ளதாக வவுனியா பொலிஸார் தெரிவித்துள்ளனர். குறித்த பெண் நேற்றைய தினம் இரவு வேளையில் கைது செய்யப்பட்டுள்ளார்.

வவுனியா பொலிஸாருக்கு கிடைத்த இரகசிய தகவலின் அடிப்படையில் மேற்கொள்ளப்பட்ட திடீர் சோ.தனையின் போது சந்தேகநபர் கைது செய்யப்பட்டுள்ளார்.

சம்பவம் தொடர்பில் 45 வயதுடைய பெண்ணொருவரே தேக்கவத்தை பகுதியிலுள்ள அவருடைய வீட்டில் வைத்து போ.தை.ப் பொ.ருளுடன் கைது செய்யப்பட்டுள்ளார்.

இதன்போது அவரிடமிருந்து 2.7 கிராம் ஹெ.ரோ.யி.ன் போ.தை.ப் பொ.ருளும் கைப்பற்றப்பட்டுள்ளது. இச்சம்பவம் தொடர்பான மேலதிக வி.சாரணை வவுனியா பொலிஸாரினால் மேற்கொள்ளப்பட்டு வருகின்றமை குறிப்பிடத்தக்கது.

ஈச்சங்குளம் பொலிஸ் பிரிவில்..

வவுனியா, ஈச்சங்குளம் பொலிஸ் பிரிவில் 2 கொரோனா தொற்றாளர்கள் அடையாளம் காணப்பட்டுள்ளதுடன், 19 குடும்பங்கள் தனிமைப்படுத்தப்பட்டுள்ளன.

வவுனியா, ஈச்சங்குளம் பொலிஸ் பிரிவுக்குட்பட்ட கிடாச்சூரி, கோதண்டர் நொச்சிக்குளம் ஆகிய இரு கிராமங்களில் 2 கொரோனா சமூகத்தொற்றாளர்கள் அடையாளம் காணப்பட்டுள்ளதுடன்,

அவர்களுடன் தொடர்பைப் பேணிய 19 குடும்பங்கள் சுகாதார பிரிவினரால் தனிமைப்படுத்தப்பட்டுள்ளன. குறித்த பிரதேசத்தில் எழுமாறாக மேற்கொள்ளப்பட்ட பிசீஆர் பரிசோதனையின் போதே இவ்விரு தொற்றாளர்களும் அடையாளம் காணப்பட்டிருந்தனர்.

அத்துடன், இவர்களில் ஒருவர் சிறுநீரக நோய் காரணமாக வவுனியா வைத்தியசாலையில் 40 நாட்களாக சிகிச்சை பெற்று வீடு திரும்பியவராவார். குறித்த நபரை பார்வையிடுவதற்காக சென்ற நபர்களே இவ்வாறு தனிமைப்படுத்தப்பட்டுள்ளனர்.

வடமாகாண ஆளுனர்..

வவுனியா பொருளாதார மத்திய நிலையத்தில் அமைக்கப்பட்ட கொரோனா சிகிச்சை நிலையத்தை பார்வையிட்ட வடமாகாண ஆளுனர் பீ.எஸ்.எம்.சார்ள்ஸ், சிகிச்சை நிலையத்திற்கு தேவையான ஒரு தொகுதி பொருட்களையும் கையளித்தார்.

வவுனியா பொருளாதார மத்திய நிலையத்தில் 200 கட்டில்களைக் கொண்டதாக அமைக்கப்பட்டுள்ள கொரோனா சிகிச்சை நிலையத்திற்கு நேற்று (12.05) மாலை விஜயம் செய்த வடமாகாண ஆளுனர்,

அதன் கட்டுமாணப் பணிகளை பார்வையிட்டதுடன், கொரோனா சிகிச்சை நிலையத்திற்கு வரும் நோயாளருக்கு தேவையான ஒரு தொகுதி பொருட்களையும், வவுனியா மாவட்ட அரச அதிபர் சமன்பந்துலசேன மற்றும் வவுனியா மாவட்ட கொவிட் செயலணியின் இராணுவ பொறுப்பதிகாரி மேஜர் ஜெனரல் டி.எம்.எச்.டி.பண்டார ஆகியோரிடம் கையளித்தார்.

அத்துடன், சிகிச்சை நிலைய வசதிகள் மற்றும் மேற்கொள்ள வேண்டிய செயற்பாடுகள் தொடர்பிலும் இரச அதிகாரிகள், சுகாதார பிரிவினர் மற்றும் இராணுவ அதிகாரிகள் ஆகியோருடன் கலந்துரையாடியிருந்தார்.

நுங்கு விற்பனை..

வவுனியா மாவட்டத்தில் தற்போது வெயில் சுட்டெரித்து வருவதுடன், நாளுக்கு நாள் வெப்பத்தின் தாக்கம் அதிகரித்து பொதுமக்களை வாட்டி வதைத்து வருகிறது.

இந்நிலையில் வெயிலின் தாக்கத்தை போக்க பழச்சாறு, குளிர்பானங்கள் போன்றவற்றை குடிப்பது போல் நுங்குகளையும் பொதுமக்கள் விரும்பி வாங்கிக் குடிக்கின்றனர்.

அந்தவகையில், வவுனியா மாவட்டத்தின் பல பகுதிகளிலும் நுங்கு விற்பனை அமோகமாக நடந்து வருகிறது. ஏராளமான பொதுமக்கள் நுங்கினை வாங்கி குடிப்பதுடன், வீடுகளுக்கும் ஆர்வத்துடன் வாங்கியும் செல்கின்றனர்.

நகர்ப்புறங்களில் 50 ரூபாய்க்கு 3 சுளை நுங்கு விற்கப்படுகிறது. உடலின் ஆரோக்கியத்தை பாதுகாக்கும் என்பதாலும் குறிப்பிட்ட கோடை காலத்தில் மட்டுமே பனை நுங்கு கிடைக்கும் என்பதாலும் விலையை பொருட்படுத்தாமல் பனை நுங்குகளை சிறியவர்கள் முதல் பெரியவர்கள் வரை அனைவரும் ஆர்வத்துடன் வாங்கிச் செல்கின்றனர்.

இது குறித்து நுங்கு விற்பனையாளர்கள் கூறுகையில், நுங்கு வெட்டி விற்பனை செய்யும் தொழிலை கோடை காலங்களில் செய்து வருகிறோம்.

கோடை காலத்தில் உடலுக்கு தேவையான நார் சத்து, நீர் சத்து உள்ளிட்ட பல்வேறு சத்துகள் நிறைந்துள்ளதால் உடல் ஆரோக்கியத்திற்கு மிகவும் உதவியாக பனை நுங்கு உள்ளது. இலாபம் இல்லாவிட்டாலும் ஒவ்வொரு வருடமும் நுங்கு விற்பனையை சேவை அடிப்படையில் தொடர்ந்து செய்ய விரும்புகிறோம்.

முன்பெல்லாம் கிராமங்களில் நிறைய பனைமரங்கள் தென்படும். தற்போது பனை மரங்களை பார்ப்பது அரிதாகிவிட்டது. மரங்களை தேடி அலைந்து கண்டுபிடிக்க வேண்டிய சூழல் உள்ளது.

பெரும்பாலான மரங்கள் அழிந்துவிட்டன. இதனால் நுங்குகளுக்கு தட்டுப்பாடும் உள்ளது. மக்கள் நகரங்களில் ஆர்வமாக வாங்கிச் செல்கின்றனர். பனை மரங்களை அதிகளவில் வளர்ப்பதற்கு அரசாங்கம் மற்றும் விவசாயிகள் முன்வர வேண்டும் என்றனர்.

கொரோனா சிகிச்சை மையத்தில்..

வவுனியா பொருளாதார மத்திய நிலையத்தில் 200 கட்டில்களை கொண்டதாக அமைக்கப்பட்ட சிகிச்சை நிலையத்தில் வவுனியா மாவட்டத்தினை சேர்ந்தவர்கள் உட்பட 155 நோயாளர்கள் அனுமதிக்கப்பட்டுள்ள சுகாதார பிரிவினர் தெரிவித்தனர்.

நாட்டில் கொரோனா தொற்று தீவிரமாக அதிகரித்து வரும் நிலையில் நாட்டின் பல பகுதிகளிலும் கொரோனா சிகிச்சை மையங்களை அமைக்கும் நடவடிக்கைகள் முன்னெடுக்கப்பட்டுள்ளன.

அந்தவகையில் வவுனியா பொருளாதார மத்திய நிலையம் கொரோனா சிகிச்சை மையமாக மாற்றப்பட்டு நேற்று (12.05.2021) இரவு 11.00 மணி தொடக்கம் நோயாளர்கள் உள்வாங்கப்பட்டனர்.

வவுனியா பல்கலைக்கழக மாணவர்கள் 31 பேரும், வவுனியா வைத்தியசாலையில் அனுமதிக்கப்பட்டிருந்த 2 நபர்களும் கொழும்பு மற்றும் கம்பஹா மாவட்டத்தினை சேர்ந்த 122 நபர்களும் என 155 (ஆண் நோயார்கள்) கொரோனா நோயாளர்கள் அனுமதிக்கப்பட்டுள்ளனர்.

இவர்களுக்கான மூன்று நேர உணவுகள், மற்றும் ஏனைய வசதிகளை வன்னி இராணுவத்தினர் முன்னெடுத்துள்ளதுடன் அவர்களுடைய சுகாதாரம், மருத்துவம் போன்ற வசதிகளை வவுனியா சுகாதார பிரிவினர் முன்னெடுத்து வருகின்றனர்.

கொரோனா தொற்று..

வவுனியா, பம்பைமடுவில் அமைந்துள்ள யாழ் பல்கலைக் கழகத்தின் வவுனியா வளாகத்தைச் சேர்ந்த 31 மாணவர்களுக்கு அன்டிஜன் பரிசோதனையில் கொரோனா தொற்று உறுதி செய்யப்பட்டுள்ளது.

வவுனியா, பம்பைமடுவில் அமைந்துள்ள யாழ் பல்கலைக்கழகத்தின் வவுனியா வளாக மாணவர்கள் சிலருக்கு கடந்த சில நாட்களாக கொரோனா தொற்று உறுதி செய்யப்பட்டிருந்தது.

இதனையடுத்து அவர்களுடன் தொடர்புடைய மாணவர்களிடம் இன்று (12.05) அன்டிஜன் பரிசோதனை மேற்கொள்ளப்பட்டது. இப் பரிசோதனையில் 31 மாணவர்களுக்கு மேலும் கொரானோ தொற்று உறுதி செய்யப்பட்டுள்ளது.

இதனையடுத்து அவர்களை கொரோனா சிகிச்சை நிலையத்திற்கு கொண்டு செல்வதற்கான நடவடிக்கைகளை சுகாதாரப் பிரிவினர் முன்னெடுத்துள்ளனர்.