கொரோனா சிகிச்சை..

வவுனியா பொருளாதார மத்திய நிலையத்தில் 200 கட்டில்களை கொண்டதாக அமைக்கப்பட்ட சிகிச்சை நிலையம் இன்று (12.05.2021) இரவு 11 மணி தொடக்கம் இயங்குமென வன்னி இராணுவத் தளபதி தெரிவித்தார்.

வவுனியா பொருளாதார மத்திய நிலையத்தில் அமைக்கப்பட்டுள்ள சிகிச்சை நிலையத்தின் இறுதிக்கட்ட வேலைகளை இன்று (12.05) பார்வையிட்ட பின்னரே இவ்வாறு தெரிவித்தார்.

நாட்டில் கொரோனா தொற்று தீவிரமாக அதிகரித்து வரும் நிலையில் நாட்டின் பல பகுதிகளிலும் கொரோனா சிகிச்சை மையங்களை அமைக்கும் நடவடிக்கைகள் முன்னெடுக்கப்பட்டுள்ளன.

அந்தவகையில் வவுனியா பொருளாதார மத்திய நிலையம் கொரோனா சிகிச்சை மையமாக மாற்றப்பட்டுள்ளது.

குறித்த பொருளாதார மத்திய நிலையத்தில் 200 கட்டில்கள் போடப்பட்டுள்ளதுடன் 200 கொரோனா நோயாளர்களை தங்க வைத்து சிகிச்சையளிப்பதற்கான ஏற்பாடுகளை இராணுவத்தினர் மற்றும் சுகாதார பிரிவினர் இணைந்து முன்னெடுத்திருந்தனர்.

இந்தநிலையில் வவுனியா பொருளாதார நிலையம் கொரோனா நோயாளர்களை உள்வாங்குவதற்கு தயாரான நிலையில் தற்போது சிகிச்சை மையமாக மாற்றப்பட்டுள்ளதுடன் இன்று (12.05.2021) இரவு 11.00 மணி முதல் நோயாளர்களை கொண்டு வருவதற்கான நடவடிக்கைகள் முன்னெடுக்கப்பட்டுள்ளது எனத் தெரிவித்தார்.

அத்துடன் குறித்த நோயாளர் தற்போது இராணுவ பாதுகாப்புடன் பேரூந்து மூலம் வவுனியா நோக்கி வருகை தந்து கொண்டிருப்பதுடன் இரவு 11.00 மணியளவில் வவுனியா கொரோனா சிகிச்சை நிலையத்தினை வந்தடைவார்கள் என எதிர்பார்க்கப்பட்டுள்ளது.

விழிப்புணர்வு பதாதைகள்..

கொரோனா தொடர்பான விழிப்புணர்வு பதாதைகள் வவுனியாவில் இன்று மாலை (12.05) நிறுவப்பட்டன.

கொவிட் 19 மூன்றாம் அலையின் தாக்கமானது வவுனியாவில் வேகமாக அதிகரித்து வருகின்றது. இந்நிலையில் மக்கள் மத்தியில் இது தொடர்பான விழிப்புணர்வுகளை சுகாதார திணைக்களத்துடன் இணைந்து பல்வேறு அமைப்புக்களும் முன்னெடுத்துள்ளன.

அந்தவகையில், ‘கொரோனா நோயில் இருந்து எம்மை பாதுகாத்து கொள்வோம். பொது இடங்களுக்கு செல்லும் போது முககவசம் அணிவோம்’ என பொறிக்கப்பட்ட பதாதைகள் வவுனியா புதிய பேரூந்து நிலையம் மற்றும் மக்கள் அதிக நடமாட்டம் உள்ள பகுதிகளில் நிறுவப்பட்டது.

இதன் ஆரம்ப நிகழ்வில் வவுனியா பிராந்திய சுகாதார சேவைகள் திணைக்கள பணிப்பாளர் வைத்தியர் எம்.மகேந்திரன், வைத்தியர் லவன் மற்றும் பொது சுகாதார பரிசோதகர்கள் உள்ளிட்ட பலரும் கலந்து கொண்டனர்.

மூன்று நாட்களுக்கு..

இலங்கையில் கோவிட் தொற்று பரவலானது தற்போது தீவிரமடைந்து வருகிறது. இந்த நிலையில் நாட்டின் பல பகுதிகள் தொடர்ச்சியாக தனிமைப்படுத்தலுக்கு உட்டுபடுத்தப்பட்டு வருகின்றன.

இவ்வாறான சந்தர்ப்பத்தில் வவுனியா மாவட்டத்தில் அமுலுக்கு கொண்டு வரப்படவுள்ள தடை தொடர்பான அறிவிப்பு வெளியாகியுள்ளது.

எதிர்வரும் வெள்ளிக்கிழமை , சனிக்கிழமை , ஞாயிற்றுக்கிழமை (14,15,16) ஆகிய மூன்று தினங்கள் வவுனியா மாவட்டத்திலுள்ள அனைத்து வர்த்தக நிலையங்களும் மூடப்படுவதுடன் மருந்தகங்கள் மாத்திரம் அத்தியாவசிய தேவைகள் நிமித்தம் திறக்க அனுமதிக்கப்படுகின்றது.

மேலும் மக்களின் நடமாட்டமும் கட்டுப்படுத்தப்படுவதுடன் தேவையின்றி வெளியில் நடமாடுபவர்கள் மீதும் சட்ட நடவடிக்கை மேற்கொள்ளப்படுமெனவும் வவுனியா மாவட்ட பொலிஸ் அத்தியட்சகர் திஸ்ஸலாத சில்வா தெரிவித்துள்ளார்.

கொரோனா..

கொரோனா தாக்கத்தால் கிளிநொச்சியில் மரணமடைந்த வவுனியா நபரின் சடலம் பூந்தோட்டம் மயானத்தில் இன்று (12.05.2021) தகனம் செய்யப்பட்டது.

வவுனியா, பம்பைமடு கிராம அலுவலர் பிரிவுக்குட்பட்ட கற்பகபுரம் பகுதியில் வசிக்கும் 49 வயதுடைய நபர் ஒருவர் கடந்த 23 ஆம் திகதி கொரோனா தொற்று உறுதிப்படுத்தப்பட்ட நிலையில் கிளிநொச்சியில் உள்ள கொரோனா சிகிச்சை நிலையத்தில் சிகிச்சை பெற்று வந்தார்.

இந்நிலையில் குறித்த நபர் சிகிச்சை பலனின்றி நேற்று (11.05) இரவு மரணமடைந்தார். மரணமடைந்த நபரின் சடலம் சுகாதாரப் பிரிவினரால் எடுத்து செல்லப்பட்டு வவுனியா நகரசபையின் பூந்தோட்டத்தில் அமைந்துள்ள மின்சார மயானத்தில் தகனம் செய்யப்பட்டது.

சிறுவர் பராமரிப்பு நிலையம்..

வவுனியாவில் சுகாதார பிரிவினரின் அறிவுறுத்தல்களை மீறி செயற்பட்ட சிறுவர் பராமரிப்பு நிலையத்துடன் கூடிய கல்வி நிலையத்தினை சுகாதார பிரிவினர் முற்றுகையிட்டனர்.

கொவிட் அச்சுறுத்தல் காரணமாக அரசாங்கத்தினால் பாடசாலைகள், பல்கலைக் கழகங்கள், மேலதிக வகுப்புக்கள், தனியார் வகுப்புக்கள் என்பவற்றை மறு அறிவித்தல் வரை நடத்துவதற்கு தடை விதிக்கப்பட்டுள்ளது.

இந்நிலையில் குறித்த அறிவுறுத்தல்களை மீறி சில இடங்களில் கல்வி நிலையம் இடம்பெறுவதாக சுகாதார பரிசோதகர்களுக்கு கிடைத்த முறைப்பாட்டையடுத்து வவுனியா பட்டானிச்சூர் பகுதியில் அமைந்துள்ள சிறுவர் பராமரிப்பு நிலையத்துடன் கூடிய கல்வி நிலையத்தினை சுகாதார பிரிவினர் முற்றுகையிட்டனர்.

இதன் போது குறித்த சிறுவர் பராமரிப்பு நிலையம் சுகாதார விதிமுறைகளை மீறி செயற்பட்டதன் பிரகாரம் இன்று 12.05.2021 தொடக்கம் எதிர்வரும் 25.05.2021ம் திகதி வரையிலான 14 நாட்கள் சுகாதாரப் பிரிவினரால் குறித்த நிலையம் தனிமைப்படுத்தப்பட்டுள்ளது.

கொரோனா..

வவுனியா வைத்தியசாலையில் இரு வைத்தியர்கள் உட்பட 5 பேருக்கு கொரோனா தொற்று உறுதி செய்யப்பட்டுள்ளது. வவுனியாவில் மேற்கொள்ளப்பட்ட பிசீஆர் பரிசோதனையின் முடிவுகள் சில இன்று (12.05) காலை வெளியாகின.

அதில், வவுனியா வைத்தியசாலையின் விடுதியில் கடமையாற்றும் இரு வைத்தியர்களுக்கு கொரோனா தொற்று உறுதி செய்யப்பட்டுள்ளது. அத்துடன் வைத்தியசாலையில் பணியாற்றும் மூன்று தாதியர்களுக்கும் கொரோனா தொற்று உறுதி செய்யப்பட்டுள்ளது.

நேற்றும் (11.05) வவுனியா வைத்தியசாலையில் இரு தாதியர்களுக்கு கொரோனாத் தொற்று உறுதி செய்யப்பட்டுள்ளமை குறிப்பிடத்தக்கது.

கொரோனா..

வவுனியாவில் மேலும் 3 பேருக்கு கொரோனா தொற்று உறுதி செய்யப்பட்டுள்ளது. இதனடிப்படையில் நேற்று மட்டும் 6 பேர் கொரோனா தொற்றாளர்களாக இனங்காணப்பட்டுள்ளனர்.

வவுனியாவில் கொவிட் தொற்று அதிகரித்து வரும் நிலையில் வவுனியா வைத்தியசாலையில் அனுமதிக்கப்பட்டவர்களிடம் பிசீஆர் பரிசோதனை மேற்கொள்ளப்பட்டது.

இதன் முடிவுகள் சில நேற்று இரவு (11.05) வெளியாகின. அதில் வவுனியா கோவில்குளம் பகுதியில் ஒருவருக்கும், தோணிக்கல் பகுதியில் ஒருவருக்கும், செட்டிகுளம் பகுதியில் ஒருவருக்கும் என 3 பேருக்கு கொரோனா தொற்று உறுதி செய்யப்பட்டுள்ளது.

இன்று மதியம் ஏற்கனவே 3 பேர் கொரோனா தொற்றாளர்களாக இனங்காணப்பட்ட இரவு வெளியாகிய முடிவுகளின் படி நேற்று மட்டும் 6 தொற்றாளர்கள் இனங்காணப்பட்டுள்ளனர்.

இதனையடுத்து அவர்களை கொரோனா வைத்தியசாலைக்கு கொண்டு செல்வதற்கும், அவர்களுடன் தொடர்புடையவர்களை தனிமைப்படுத்துவதற்கும் சுகாதாரப் பிரிவினர் நடவடிக்கை எடுத்துள்ளனர்.

இதேவேளை, நேற்று இனங்காணப்பட்ட தொற்றாளர்கள் வைத்தியசாலையில் அனுமதிக்கப்பட்ட நிலையில் இனங்காணப்பட்டுள்ளதுடன், ஒருவருக்கு வீரியம் கூடிய கொரோனா தொற்றியுள்ளதாக சுகாதார பிரிவினர் ஊடாக அறிய வரும் நிலையில்,

இது தொடர்பில் வவுனியா வைத்தியசாலை பணிப்பாளரை தொடர்பு கொண்டு கேட்ட போது வைத்தியசாலையில் அனுமதிக்கப்பட்ட எவருக்கும் கொரோனா தொற்று இல்லை தவறான தகவல் என தெரிவித்து தொலைபேசி அழைப்பை துண்டித்திருந்தார்.

கொரோனா..

வவுனியா – கற்பகபுரம் பகுதியை சேர்ந்த நபர் ஒருவர் கோவிட் தொற்றால் மரணமடைந்துள்ளார். கற்பகபுரம் பகுதியில் 9 பேருக்கு கோவிட் தொற்று இருப்பது அண்மையில் உறுதிசெய்யப்பட்டது.

சித்திரை வருடப்பிறப்பினை கொண்டாடுவதற்காக திருகோணமலையில் இருந்து வவுனியா கற்பகபுரத்தில் உள்ள உறவினர் வீட்டிற்கு வருகைதந்த நபர் ஒருவருக்கு, திருகோணமலையில் முன்னெடுக்கப்பட்ட பி.சி.ஆர் பரிசோதனையில் தொற்று இருப்பது உறுதிசெய்யப்பட்டுள்ளது.

இதனையடுத்து அவர் வருகைதந்த வவுனியா கற்பகபுரம் பகுதியில் உள்ள சிலருக்கு பி.சி.ஆர் பரிசோதனைக்கான மாதிரிகள் பெறப்பட்டிருந்தது. அதில் 9 பேருக்கு தொற்று உறுதி செய்யப்பட்டது.

தொற்று உதியான நபர்கள் கிளிநொச்சி கோவிட் சிகிச்சை வைத்தியசாலையில் அனுமதிக்கப்பட்டிருந்த நிலையில் 49 வயதான நபர் ஒருவர் சிகிச்சை பலனின்றி மரணமடைந்துள்ளார்.