வவுனியா வைரவப்புளியங்குளம் குளக்கட்டினுள் முச்சக்கரவண்டியொன்று வீழ்ந்து விபத்துக்குள்ளானதில் ஒருவர் காயமடைந்த நிலையில் வைத்தியசாலையில் அனுமதிக்கப்பட்டுள்ளார்.
இன்று (12.04.2021) திங்கட்கிழமை இரவு 7.00 மணியளவில் இடம்பெற்ற இவ்விபத்துச் சம்பவம் தொடர்பில் மேலும் தெரியவருகையில்,
கூமாங்குளம் பிரதான வீதியூடாக வவுனியா நகர் நோக்கி பயணித்துக்கொண்டிருந்த முச்சக்கரவண்டி வைரவப்புளியங்குளம் குளக்கட்டினை அண்மித்த சமயத்தில் வாகனம் சாரதியின் கட்டுப்பாட்டையிழந்து குளக்கட்டினிலிருந்து கீழே வீழ்ந்து விபத்துக்குள்ளானது.
இவ்விபத்தில் முச்சக்கரவண்டியின் சாரதி காயமடைந்த நிலையில் வைத்தியசாலையில் அனுமதிக்கப்பட்டுள்ளதுடன் முச்சக்கரவண்டியினை மீட்கும் பணியில் பொதுமக்கள் ஈடுபட்டுள்ளனர்.
கொரோனா அச்சத்திற்கு மத்தியிலும் சித்திரைப் புத்தாண்டை முன்னிட்டு வவுனியாவில் வியாபார நடவடிக்கைகள் களைகட்டியுள்ளது.
தமிழ் – சிங்கள புதுவருடம் புதன் கிழமை கொண்டாடப்படவுள்ள நிலையில் வவுனியாவின் பல்வேறு பகுதிகளிலும் இருந்து வவுனியா நகருக்கு வருகை தரும் மக்கள் சுகாதார நடைமுறைகளைப் பின்பற்றி புத்தாடைகள்,
இனிப்பு பொருட்கள், வெடிகள் என்பவற்றையும் மரக்கறிகளையும் ஆர்வத்துடன் கொள்வனவு செய்வதை அவதானிக்க கூடியதாகவுள்ளது.
இதனால் வவுனியா நகரம் சனநெரிசல் மிக்கதாக காணப்படுவதுடன், கண்காணிப்பு நடவடிக்கைகளில் பொலிசாரும் ஈடுபடுத்தப்பட்டுள்ளனர்.
வவுனியா, சுத்தானந்தா இந்து இளைஞர் மண்டபத்தின் நடராஜர் மண்டபத்தில் நடராஜர் உருவம் எரியூட்டப்பட்மை இந்து மக்கள் மத்தியில் அதிருப்தியை ஏற்படுத்தியுள்ளது.
வவுனியா, சுத்தானந்தா இந்து இளைஞர் சங்கத்தின் வருடாந்த பொதுக் கூட்டம் நேற்று (11.04) சுத்தானந்தானந்த இந்து இளைஞர் சங்கத்தின் நடராஜர் மண்டபத்தில் இடம்பெற்றது.
இதன்போது சுத்தானந்தா இந்து இளைஞர் சங்கத்தில் 14 மாதங்கள் பதில் தலைவராக இருந்து பொதுச்சபைக் கூட்டத்தை ஒழுங்குபடுத்திய செ.சபாநாதனால் நடராஜர் உருவம் பொறிக்கப்பட்ட நிலையில் ‘என் பார்வை அறிக்கையும் ஆண்டறிக்கையும்’ என்ற புத்தகம் வெளியிடப்பட்டது.
இது தொடர்பில் அதிருப்தி அடைந்த சங்கத்தின் துணைத் தலைவர் நா.தியாகராஜா மங்கள விளக்கேற்றிய தீபச் சுடரில் நடராஜர் உருவம் பொறிக்கப்பட்ட புத்தகத்தை தீயிட்டு எரித்து இந்து மதத்துக்கு அவதூறு எற்படுத்தினார்.
இது தொடர்பில் இந்து மக்கள், இளைஞர்கள் பலரும் அதிருப்தியை வெளியிட்டு சமூக வலைத்தளங்களில் குரல் கொடுத்து வருகின்றனர்.
அத்துடன் பொறுப்பு வாய்ந்த இந்து அமைப்பு ஒன்றின் துணைத் தலைவர் இவ்வாறு நடந்து கொண்டமை தொடர்பில் நிர்வாகம் நடவடிக்கை எடுக்க வேண்டும் எனவும், மாவட்ட மற்றும் பிரதேச இந்து கலாசார உத்தியோகத்தர்கள் கவனம் செலுத்த வேண்டும் எனவும் பலரும் கோரிக்கை முன்வைத்து வருகின்றனர்.
இந்து சமயத்தை அவமதிக்கும் வகையில் நடராஜர் உருவத்தை பொறுப்பு வாய்ந்து இந்து அமைப்பு ஒன்றின் முன்னாள் மற்றும் தற்போதைய துணைத்தலைவரான நா.தியாகராஜா எரித்தமை தவறான முன்னுதாரணம் என்பதுடன்,
ஓட்டுமொத்த இந்து மக்களையும் அவமதிக்கும் செயல் எனவும், இது தொடர்பில் இந்து அமைப்புக்கள் மௌனம் காப்பது ஏன் எனவும் இளைஞர்கள் கேள்வி எழுப்பியுள்ளதுடன், அவரை உடனடியாக குறித்த சங்கத்தின் உறுப்புரிமையில் இருந்து நீக்க வேண்டும் எனவும் கோரியுள்ளனர்.
சிறியளவில் போக்குவரத்து விதிமுறைகளை மீறுகின்ற சாரதிகளுக்கு எதிராக நீதிமன்றத்தில் வழக்கு தாக்கல் மேற்கொள்வதற்கு பதிலாக பொலிஸாரினால் தண்டப்பணம் விதிக்கப்பட்டுகின்றன. பொலிஸாரினால் வழங்கப்படும் தண்டப்பத்திரத்தினை எடுத்துச் சென்று அஞ்சல் அலுவலகங்களில் தண்டப்பணம் செலுத்தப்பட வேண்டும்.
வவுனியா தெற்கு தமிழ் பிரதேச சபை பிரிவுக்குட்பட்ட நெளுக்குளம் அஞ்சல் அலுவலகத்திற்கு தண்டப்பணம் செலுத்த செல்பவர்களை இங்கு தண்டப்பணம் செலுத்த முடியாது எனவும் வவுனியா பிரதான அஞ்சல் அலுவலகத்திற்கு சென்று தண்டபணத்தினை செலுத்துமாறு பொதுமக்களை நெளுக்குளம் அஞ்சல் அலுவலக அதிகாரி திரும்பியனுப்புகின்றார்.
இதன் காரணமாக நெளுக்குளம் அஞ்சல் அலுவலகத்திலிருந்து சுமார் 5 கிலோமீற்றர் தூரத்தில் உள்ள வவுனியா பிரதான அஞ்சல் அலுவலகத்திற்கு சென்று போக்குவரத்து தண்டப்பணத்தினை செலுத்தி மீண்டும் 5கிலோ மீற்றர் தூரம் பயணித்து நெளுக்குளம் பொலிஸ் நிலையத்திற்கு சென்று சாரதி அனுமதிப்பத்திரத்தினை பெறவேண்டிய நிலமை சாரதிகளுக்கு ஏற்பட்டுள்ளது.
அனைத்து அஞ்சல் அலுவலகங்களிலும் போக்குவரத்து தண்டப்பணம் செலுத்துவதற்குரிய வசதிகள் காணப்படுகின்ற போதிலும் நெளுக்குளம் அஞ்சல் அலுவலகத்தில் மாத்திரம் போக்குவரத்து தண்டப்பணம் செலுத்த முடியாத நிலைக்கு காரணம் என்ன என்பது தொடர்பில் சாரதிகள் கேள்வி எழுப்பியுள்ளனர்.
இவ்விடயம் தொடர்பில் வவுனியா மத்திய அஞ்சல் அலுவலகத்தினை தொலைபேசியூடாக தொடர்பு கொள்ள முயற்சித்த போதிலும் அவர்களை தொடர்பு கொள்ள முடியவில்லை.
சுயாதீன தமிழ் இளைஞர்களின் குருதிக்கொடை நிகழ்வு சமயபுரம் சனசமூக நிலைய மண்டபத்தில் இன்று (11.04.2021) ஞாயிற்றுகிழமை காலை நடைபெற்றது.
மருக்காரம்பளை கிராம அலுவலர் நா.ஸ்ரீதரன் ஏற்பாட்டில் நடைபெற்ற இந்த நிகழ்வில் வவுனியா பிரதேச செயலாளர் நா.கமதாசன் பிரதம விருந்தினராக கலந்து கொண்டார்கள்.
ஏராளமான இளைஞர் யுவதிகள் மற்றும் பொதுமக்கள் பங்களிப்புடன் காலை 8.30 மணி தொடக்கம் மதியம் 12 மணி வரை இவ் இரத்ததான நிகழ்வு நடைபெற்றது.
குருதிக்கொடையானது சமயபுரம் கிராம அபிவிருத்தி சங்கம், மணிபுரம் கிராம அபிவிருத்தி சங்கம், இளங்கோ விளையாட்டுக் கழகம், அகில இலங்கை சைவத்தமிழ் மன்றம், பாக்கியம் அறக்கட்டளை, சுயாதீன தமிழ் இளைஞர்கள் ஆகிய பொது அமைப்புக்களின் பங்களிப்புடன் சிறப்பாக நடைபெற்றது.
மேலும் இதில் பங்குபற்றிய குருதி கொடையாளர்களுக்கு “மனிதநேய மாண்பாளர்” பட்டம் வழங்கி சிறப்பு சான்றிதழ்களும் வழங்கப்பட்டமை குறிப்பிடத்தக்கது.
வவுனியா மத்திய பேரூந்து நிலையத்திலிருந்து உள்ளூர் மற்றும் வெளி மாவட்டங்களுக்கு தினசரி 40க்கு மேற்பட்ட பேரூந்துகள் சேவையில் ஈடுபட்டு வருகின்ற போதிலும் தற்போது கொரோனா தொற்று காரணமாக பயணிகளின் எண்ணிக்கை குறைந்தளவில் காணப்படுகின்றது.
கொரோனா அச்சத்தினால் மக்கள் தற்போது சொந்த வாகனங்கள் மற்றும் வாடகை வாகனங்களில் அதிகளவில் பிரயாணத்தினை மேற்கொள்வதினால் தமிழ் இ சிங்கள புத்தாண்டு காலத்திலும் குறைந்தளவு பயணிகளுடன் பேரூந்துகள் தமது பயணத்தினை தொடர்கின்றன. இதன் காரணமாக தனியார் பேரூந்து உரிமையாளர்கள் பல்வேறு இன்னல்களுக்கு முகங்கொடுத்துள்ளனர்.
உள்ளூர் பேரூந்து சேவையில் பயணிகளின் எண்ணிக்கை கனிசமானளவு காணப்படுகின்ற போதிலும் வெளிமாவட்டங்களுக்கான பேரூந்துகள் குறைந்தளவு பயணிகளுடன் வவுனியா மத்திய பேரூந்து நிலையத்திலிருந்து சேவையினை தொடர்கின்றன.
கோழி இறைச்சியின் விலை தற்போதைய விலை விட இரண்டு மடங்கு அதிகரிக்கப்பட்டுள்ளது. ஒரு கிலோ கிராம் கோழி இறைச்சி சந்தையில் 675 ரூபாய் முதல் 800 ரூபாவுக்கு விற்பனை செய்யப்பட்டதாக நுகர்வோர் தெரிவித்துள்ளனர்.
கோழி இறைச்சியை அரசாங்கம் நிர்ணயித்த விலையில் மாத்திரம் விற்பனை செய்ய உற்பத்தியாளர்கள் விருப்பம் தெரிவித்திருந்ததாக ராஜாங்க அமைச்சர் லசந்த அழகிவண்ண தெரிவித்துள்ளார்.
ஒரு கிலோ பொய்லர் கோழி இறைச்சியின் நிர்ணய விலை 430 ரூபாய் எனவும், குளிரூட்டியில் வைக்காத ஒரு கிலோ கோழி இறைச்சியை 375 ரூபாவுக்கும் விற்பனையாளர்களுக்கு வழங்க உற்பத்தியாளர்கள் இணங்கி இருந்தனர் எனவும் அவர் கூறியுள்ளார்.
இந்த நிலையில், தமிழ் – சிங்கள புத்தாண்டு காலத்தில் விலை அதிகரித்திருப்பதால், அரசாங்கத்திற்கும் சிக்கலான நிலைமை ஏற்பட்டுள்ளதாகவும் ராஜாங்க அமைச்சர் குறிப்பிட்டுள்ளார்.
மட்டக்களப்பு -கொழும்பு பிரதான வீதியில் கடவத்தமடு பிரதேசத்தில் வான் ஒன்று டயர் வெடித்து குடைசாய்ந்ததில் அதில் பயணித்த ஒருவர் காயமடைந்துள்ளதாக வாழைச்சேனை பொலிஸ் நிலைய பொறுப்பதிகாரி தனஜயபெரமுன தெரிவித்தார்.
கொழும்பில் இருந்து சம்மாந்துரை பிரதேசத்திற்கு திருமண நிகழ்வு ஒன்றில் கலந்து கொள்வதற்காக பயணித்த வானின் டயர் வெடித்ததில் வான் குடைசாய்ந்து அருகில் உள்ள வயலுக்குள் வீசப்பட்டுள்ளது.
வான் முழுமையாக சேதமடைந்துள்ள நிலையில் அதில் பயணித்த இருவரில் ஒருவர் காயமடைந்துள்ளார். இச் சம்பவம் தொடர்பாக வாழைச்சேனை போக்குவரத்து பொலிஸார் விசாரணைகளை மேற்கொண்டு வருகின்றனர்.
நீர்கொழும்பில் வைத்தியர் ஒருவரினால் உயிரிழந்ததாக உறுதி செய்யப்பட்டு பிணவறைக்கு அனுப்பப்பட்ட நபருக்கு மீண்டும் உயிர்வந்த சம்பவம் ஒன்று இடம்பெற்றுள்ளது.
இந்த சம்பவம் தொடர்பில் விசாரணை ஆரம்பிக்கப்பட்டுள்ளதாக நீர்கொழும்பு வைத்தியசாலையின் வைத்தியர் நிர்மலா லோகநாதன் ரெிவித்துள்ளார்.
நீர்கொழும்பு, துங்கல்பிட்டிய பிட்டிபன பிரதேசத்தை சேர்ந்த 45 வயதுடைய எலெக்ஸென்டர் சில்வா என்ற நபர் நேற்று முன்தினம் நீர்கொழும்பு வைத்தியசாலையில் அனுமதிக்கப்பட்டார்.
இரத்தத்தில் சீனி மட்டம் குறைவடைந்த காரணத்தினால் அவர் வைத்தியசாலையில் அனுமதிக்கப்பட்டார். அவரை பரிசோதித்த வைத்தியர்கள் அவர் உயிரிழந்து விட்டதாக கூறி பிணவறைக்கு கொண்டு சென்றுள்ளனர்.
பிணவறையில் உள்ள கணவனின் சடலத்தை பார்க்க வந்த மனைவி, அவர் உயிரிழக்கவில்லை என்பதனை கண்டுபிடித்துள்ளார். “நான் அவருக்கு அருகில் செல்லும் போது துணி ஒன்றினால் அவர் மூடப்பட்டிருந்தார். அந்த துணியை வெளியே எடுத்து பார்த்து அழும் போது அவரது வாய் அசைந்தது.
பின்னர் அவரிடம் அசைவுகள் காணப்பட்டது. நான் வைத்தியரை அழைத்து கூறியும் போது எனது கணவர் ட்ரொலியில் இருந்து எழுந்து நடந்து செல்லவும் ஆரம்பித்தார். தற்போது அவர் நல்ல உடல் நிலையில் உள்ளார்.
மூளை சாவடைந்து விட்டார் என்றே கூறினார்கள். எனினும் 2 மணித்தியாலங்கள் கணவர் பிணவறையிலேயே இருந்துள்ளார். இவ்வாறான சம்பவங்கள் வேறும் யாருக்கும் ஏற்படாத வகையில் பார்த்துக்கொள்ள வேண்டும்” என அவர் மேலும் தெரிவித்துள்ளார்.
வவுனியா கண்டி வீதியில் அமைத்து மத்திய அஞ்சல் அலுவலகத்தில் மாதாந்த உதவிப்பணத்தினை பெறுவதற்காக 25க்கு மேற்பட்ட முதியவர்கள் கடும் வெயிலுக்கு மத்தியில் காத்திருந்துள்ளனர்.
வடமாகாண சபையின் சமூக சேவைகள் திணைக்களத்தினால் பொதுசன உதவி எனும் தொனிப்பொருளில் முதியவர்களுக்கு மாதாந்த உதவிப்பணம் அஞ்சல் அலுவலகங்கள் ஊடாக வழங்கப்பட்டு வருகின்றன.
இந்நிலையில் குறித்த மாதாந்த உதவித்தொகையினை பெறுவதற்கு இன்று (10.04.2021) காலை தொடக்கம் வவுனியா மத்திய அஞ்சல் நிலையில் 25க்கு மேற்பட்ட முதியவர்கள் கடும் வெயிலின் மத்தியில் காத்திருந்தனர்.
வவுனியா மாவட்டத்தின் பிரதான அஞ்சல் அலுவலகமாக காணப்படும் இவ் அஞ்சல் அலுலத்தில் உதவிப் பணத்தினை வழங்கும் செயற்பாட்டில் ஒரு உத்தியோகத்தர் மாத்திரமே ஈடுபட்டுள்ளமையினாலேயே முதியவர்கள் சிரமத்திற்கு முகங்கொடுத்துள்ளனர்.
நாட்டின் பல பாகங்களில் அதிகளவிலான கடும் வெப்பத்தினூடனான காலநிலை நிலவி வருகின்ற இவ் சமயத்தில் முதியவர்களை கடும் வெயியில் காத்திருக்க வைத்து சேவையினை முன்னெடுத்து வருகின்ற வவுனியா அஞ்சல் அலுவலகம் தொடர்பில் வவுனியா மாவட்ட சமூக ஆர்வலர்கள் விசனம் வெளியிட்டுள்ளனர்.
வேப்பங்குளம் சமூர்த்தி வங்கியினால் அன்பான வணிகன் எனும் தொனிப்பொருளில் புதுவருட விற்பனைச் சந்தை வேப்பங்குளம் சமூர்த்தி வங்கிக்கு முன்பாக இன்று (10.04.2021) காலை 9.30 மணியளவில் திறந்து வைக்கப்பட்டது.
இன்று மற்றும் நாளை (10,11) ஆகிய இரு தினங்களும் இயங்கவுள்ள புதுவருட விற்பனைச் சந்தையினை பாராளுமன்ற உறுப்பினர்கள், பிரதேச செயலாளர் ஆகியோர் இணைந்து திறந்து வைத்தனர்.
வவுனியா பிரதேச செயலாளர் கமலதாசன் தலமையில் இடம்பெற்ற நிகழ்வில் பிரதம அதிதியாக பாராளுமன்ற உறுப்பினர் குலசிங்கம் திலிபன், கௌரவ விருந்தினராக பாராளுமன்ற உறுப்பினர் வினோ நோகராதலிங்கம் மற்றும் சமூர்த்தி அதிகாரிகள் , பிரதேச செயலக உத்தியோகத்தர்கள் என பலரும் கலந்து கொண்டுள்ளனர்.
குறித்த புதுவருட விற்பனைச் சந்தையில் மரக்கறி வியாபார நிலையம், ஆடை விற்பனையகம், உணவுப் பொருட்கள், பண்பாண்டங்கள் என பல சந்தைகள் அமைந்துள்ளன.
தெற்காசியாவின் முதலாவது டிஸ்னிலான்ட் இலங்கையில் நிர்மாணிக்கப்படவுள்ளதாக தகவல் வெளியாகியுள்ளது.
மலேசியா மற்றும் கொரியாவின் முதலீட்டுடன் கொரிய நிறுவனமான Korea Cavitation Co வினால் இதன் நிர்மாண பணிகள் முன்னெடுக்கப்படவுள்ளன.
டிஸ்னிலான்ட் அமைப்பதற்காக 150 ஏக்கர் காணியை பெற்றுக் கொள்வதற்கு இலங்கை அரசாங்கத்துடன் கலந்துரையாடல்கள் இடம்பெற்று வருவதாக கொரிய நிறுவனத்தின் இலங்கை பிரதிநிதி குறிப்பிட்டுள்ளார்.
பிரதானமாக கொரியா மற்றும் மலேசியா உட்பட நாடுகளிடம் இருந்து 400 மில்லியன் அமெரிக்க டொலர் வெளிநாட்டு நிதி உதவி இந்த திட்டத்திற்கு பெறுவதற்கு எதிர்பார்ப்பதாகவும் கொரோனா வைரஸ் தொற்று ஏற்படுவதற்கு முன்னர் 30 வீதம் நிதி சேகரிக்கப்பட்டுள்ளதாகவும் அவர் கூறியுள்ளார்.
கொரோனா வைரஸ் தொற்று கட்டுப்பாட்டுக்குள் கொண்டு வரப்படுகின்ற நிலையில், தடுப்பூசி போடும் நடவடிக்கை முன்னெடுக்கப்படுவதனால் இந்தியாவும் முதலீடு செய்யும் என அவர் குறிப்பிட்டுள்ளார்.
இந்த திட்டம் மலேசியாவின் Genting Highlands திட்டத்திற்கு சமமானதாகும். இதில் விசேட ரயில் வீதி உட்பட பல்வேறு விடயங்களை உள்ளடக்க எதிர்பார்ககப்பட்டுள்ளதாக அவர் தெரிவித்துள்ளார்.
சுற்றுலா பயணிகள் தங்குவதற்கு 300 அறைகள் கொண்ட ஹோட்டல்களையும் நிர்மாணிப்பதற்கு நடவடிக்கை மேற்கொள்ளப்படவுள்ளதாக அவர் மேலும் தெரிவித்துள்ளார்.
யாழ்ப்பாணம் வடமராட்சி கிழக்கு க.டலில் மி.தந்து வ.ந்த ஒருவகைப் பா.னத்தை அ.ருந்திய ஒ.ருவர் உ.யிரிழந்துள்ளார். நேற்று மாலை குறித்த போ.த்தல் க.ரையொதுங்கியதாகவும் அதனை எடுத்து 20 வ.ரையானோர் ப.ருகியதாகவும் தெரிவிக்கப்படுகிறது.
அ.ருந்தியவர்களில் ஒருவருக்கு ஏற்பட்ட பா.திப்பு காரணமாக பருத்தித்துறை ஆதார வை.த்தியசாலையில் அ.னுமதிக்கப்பட்ட போதும், சி.கிச்சை ப.லனின்றி அ.வர் உ.யிரிழந்துள்ளார்.
உ.யிரிழந்தவர் நாகர்கோவில் கிழக்கைச் சேர்ந்த 48 வயதான மூன்று பிள்ளைகளின் தந்தையான கந்தையா ஸ்ரீகுமார் என்று தெரியவந்துள்ளது. ஆதார வை.த்தியசாலை பி.ரேத அ.றையில் ச.ட.ல.ம் வை.க்கப்பட்டுள்ளது.
குறித்த போ.த்தலும் வைத்தியசாலைக்கு கொண்டு செல்லப்பட்டு ஒ.ப்படைக்கப்பட்டுள்ளது. அங்கு ஆ.ய்வுகூடத்தில் அதனை ப.ரிசோதித்த போது அது கா.ய.த்.தி.ற்.கு பயன்படுத்தப்படும் ஸ்.பி.றி.ட் என தெரியவந்தது.
உடனடியாக வைத்தியர்கள் இத் தி.ரவத்தை அ.ருந்திய சகலரையும் வை.த்தியசாலைக்கு வருமாறு ப.ணித்ததாக அங்கிருந்து கிடைக்கும் தகவல்கள் தெரிவித்துள்ளன.
வவுனியா நகரில் கொரோனா வைரஸிலிருந்து பாதுகாக்க முகக்கவசம் அணியாத நபர்களுக்கு எதிராக சட்ட நடவடிக்கை மேற்கொள்ளும் நடவடிக்கையில் சுகாதார பிரிவினருடன் இணைந்து வவுனியா பொலிஸார் முன்னெடுத்திருந்தனர்.
தமிழ் சிங்கள புத்தாண்டு எதிர்வரும் சில நாட்களில் வரவுள்ள நிலையில் வவுனியா நகரில் மக்களின் நடமாட்டம் அதிகரித்த நிலையில் காணப்படுகின்றது. இதன் காரணமாக கொரோனா தொற்று வைரஸ் பரவும் அபாய நிலைமை ஏற்பட்டுள்ளது.
இதனை கருத்தில் கொண்டு வவுனியா சுகாதார பிரிவினருடன் இணைந்து பொலிஸார் திடீர் நடவடிக்கை ஒன்றினை இன்று (10.04.2021) காலை வவுனியா தர்மலிங்கம் வீதி சந்தியில் முன்னெடுத்திருந்தனர்.
இதன் போது சீரான முறையில் முகக்கவசம் அணியாமை, முகக்கவமின்றி காணப்பட்ட நபர்கள் ஆகியவர்களை மறித்து அவர்களின் பெயர், அடையாள அட்டை இலக்கம் என்பவற்றினை பெற்றுக் கொண்டதுடன் சுகாதார பிரிவு காரியாலயத்திற்கு சமூகமளிக்குமாறு உத்தரவும் பிறப்பித்துள்ளனர்.
குறித்த நடவடிக்கையில் போது 80 க்கு மேற்பட்ட நபர்களின் விபரங்கள் பெறப்பட்டுள்ளதாகவும் இவ்வாறான திடீர் நடவடிக்கைகள் தொடர்ந்து இடம்பெறுமென சுகாதாரப் பிரிவினர் தெரிவித்தனர்.
வவுனியா புகையிரத நிலைய வளாகத்தினை அண்மித்த பகுதியில் உயிரிழந்து அழுகிய நிலையில் மாடு காணப்படுவதினால் சுற்றுப்புறச்சூழல் மாசடையும் நிலமை ஏற்பட்டுள்ளது. இச் சம்பவம் தொடர்பில் மேலும் தெரியவருவதாவது,
கொழும்பிலிருந்து யாழ்ப்பாணம் நோக்கி பயணித்த புகையிரத்தில் நேற்று (08.04.2021) காலை 4.30 மணியளவில் மாடொன்று மோதுண்டு விபத்துக்குள்ளானதுடன் சம்பவ இடத்திலிலேயே மாடு உயிரிழந்துள்ளது.
அதனையடுத்து புகையிரத நிலைய ஊழியர்கள் உயிரிழந்த மாட்டினை அப்புறப்படுத்தி புகையிரத நிலைய வளாகத்தினை அண்மித்த பகுதியில் வைத்துள்ளனர்.
உயிரிழந்த மாட்டினை அகற்றுமாறு வவுனியா நகரசபைக்கு அறிவித்தல் வழங்கப்பட்ட போதிலும் அவ்விடத்திலிருந்து உயிரிழந்த மாடு அகற்றப்படவில்லை.
உயிரிழந்த மாட்டிலிருந்து அழுகிய நீர் வழிந்து வெறியேறுவதுடன் காகங்களும் மாட்டினை இறையாக்கி எடுத்துச் செல்வதுடன் தூர்நாற்றமும் வீசி வருகின்றது.
இதன் காரணமாக சுற்றுப்புறச்சூழல் மாசடையும் நிலமை ஏற்பட்டுள்ளது.
இவ்விடயம் தொடர்பில் நகரசபையினரை தொடர்பு கொண்டு வினாவிய போது,
குறித்த விடயம் தொடர்பில் எமக்கு கிடைக்கப்பெற்ற முறைப்பாட்டினை சுகாதார பிரிவினருக்கு வழங்கியுள்ளோம் விரைவில் நடவடிக்கை எடுக்கப்படுமென தெரிவித்தனர்.
அன்னார் காலஞ்சென்றவர்களான திரு.திருமதி நவரத்தினம் இராசம்மா தம்பதிகளின் அன்பு மகனும் காலஞ்சென்றவர்களான திரு. திருமதி.நவரத்தினம் திலோத்தமை தம்பதிகளின் அன்பு மருமகனும் காலஞ்சென்றவர்களான இராசரத்தினம் சிவசுப்பிரமணியம் ஆகியோரின் அன்புச் சகோதரனும் செல்வரட்ணத்தின் (செல்லம்)அன்புக் கணவரும் சுதர்சினி (ஆசிரியர் வவுனியா தமிழ் மத்திய மகாவித்தியாலயம்), ரேவதி (வைத்தியர் RDHS வவுனியா)மயூரன் மக்கள் வங்கி வவுனியா) ஆகியோரின் அன்புத் தந்தையும் கோகுலதாசன்(ஆசிரியர் வவுனியா தமிழ் மத்திய மகா வித்தியாலயம்),அற்புதராஜா (பீடாதிபதி யாழ் பல்கலைக்கழக பொறியியல் பீடம் -கிளிநொச்சி) பிரியதர்ஷினி (ஹோட்டல் ஓவியா-வவுனியா)ஆகியோரின் அன்பு மாமனாரும் கோசிகன்,அபிசிகன் நர்மிதா, ஜதுர்ஷன்,சப்தனா ஆகியோரின் அன்புப் பேரனும் ஆவார்.
அன்னாரின் இறுதிக்கிரியைகள் 11.04.2021 (ஞாயிற்றுக்கிழமை) அன்னாரது இல்லத்தில் நடைபெற்று பிற்பகல் 1.00 மணியளவில் தகன கிரியைகளுக்காக இறம்பைக்குளம் இந்து மயானத்திற்கு எடுத்துச் செல்லப்படும்.
இவ் அறிவித்தலை உற்றார் உறவினர் நண்பர்கள் அனைவரும் ஏற்றுக்கொள்ளுமாறு கேட்டுக் கொள்ளப்படுகிறார்கள்.
