ஒடிசா மாநிலம் பூரி பலங்கா பகுதியில் சேர்ந்த 12 வயது சிறுமி லட்சுமிப்ரியா சாஹு, கடுமையான பேன் தொல்லையால் உயிரிழந்த சம்பவம் அதிர்ச்சியை ஏற்படுத்தியுள்ளது.
சிறுமியின் தலையில் பல மாதங்களாக பேன்கள் இருந்ததாகவும், சிகிச்சை எடுத்தும் குணமாகவில்லை என்றும் குடும்பத்தினர் தெரிவித்துள்ளனர். தலையில் ஏற்பட்ட துர்நாற்றம் காரணமாக வெளியே செல்வதையும் சிறுமி நிறுத்தியதாக கூறப்படுகிறது.
தனது உடல்நிலை பிரச்சினையை குடும்பத்தினரிடமிருந்து சிறுமி மறைத்து வந்ததாகவும் கூறப்படுகிறது. மூன்று நாட்களுக்கு முன்பு சிறுமி திடீரென இரத்த வாந்தி எடுத்ததால், உடனடியாக பூரி அரசு மருத்துவமனைக்கு கொண்டு செல்லப்பட்டது. ஆனால் சிகிச்சை பலனின்றி சனிக்கிழமை இரவு சிறுமி உயிரிழந்தார்.
சிறுமியின் தலையை மொட்டையடிக்க ஆசிரியர்கள் அறிவுறுத்தியதாக பெற்றோர் தெரிவித்துள்ளனர். ஆனால் அதற்கு சிறுமி சம்மதிக்காமல் அழுததாக கூறப்படுகிறது.
சிகிச்சையளிக்கப்படாத பேன் தொல்லையின் ஆபத்தை இந்த சம்பவம் வெளிச்சத்திற்கு கொண்டு வந்துள்ளது.
உலக சந்தையில் தங்கத்தின் விலையானது ஏற்ற இறக்கத்துடன் பதிவாகி வருகிறது. அந்த வகையில் முன்னதாக 5ஆயிரம் அமெரிக்க டொலரை தாண்டியிருந்த ஒரு அவுண்ஸ் தங்கத்தின் பெறுமதி 4750 டொலர்கள் என்ற மட்டத்தை அடைந்திருந்த நிலையில் தற்போது மீண்டும் ஏறு முகத்தை கண்டு வருகிறது.
இந்த நிலையில் இன்றைய தினத்தின் அடிப்படையில் உலக சந்தையில் தங்கத்தின் விலை நிலவரத்தை பார்க்கும் போது சுமார் 5050 முதல் 5070 அமெரிக்க டொலர்கள் என்ற நிலையில் ஒரு அவுன்ஸ் தங்கத்தின் விலையானது பதிவாகியுள்ளது.
இது தொடர்பில் வர்த்தக அவதானிகள் கூறுகையில், இவ்வருடத்தில் உலக சந்தையில் தங்கத்தின் விலையானது 6000 அமெரிக்க டொலர்களை தொடும் சாத்தியம் உள்ளதாக தெரிவிக்கின்றனர்.
இவ்வாறான சூழலில் இலங்கையிலும் தங்தக்தின் விலையானது ஏற்ற இறக்கமாகவே காணப்பட்டு வருகின்றமை குறிப்பிடத்தக்கது.
மேலும் கொழும்பு செட்டியார்தெரு தகவல்களின் படி இன்றைய தினம் 24 கரட் தங்கப் பவுணொன்றின் விலையானது 395000 ரூபாவாகவும், 22 கரட் தங்கப் பவுணொன்றின் விலை 365400 ரூபாவாகவும் பதிவாகியுள்ளமை குறிப்பிடத்தக்கது.
என்ற போதும் இலங்கையில் இன்றைய தினம் தங்கத்தின் விலையில் எவ்வித மாற்றமும் ஏற்படவில்லை என அகில இலங்கை நகையக வியாபாரிகள் சங்கம் அறிவித்துள்ளது.
சர்வதேச சந்தை மற்றும் உள்ளூர் சந்தை நிலவரங்களுக்கு அமைவாக, இன்று தங்கத்தின் விலையில் அதிகரிப்போ அல்லது குறைவோ ஏற்படாது ஸ்திரமான நிலையில் காணப்படுவதாக அந்தச் சங்கம் சுட்டிக்காட்டியுள்ளது.
கனடாவின் பிரிட்டிஷ் கொலம்பியா மாகாணத்தில் உள்ள டம்ப்ளர் ரிட்ஜ் பகுதியில் அமைந்துள்ள மேல்நிலைப் பாடசாலையில் செவ்வாய்க்கிழமை மதியம் நிகழ்ந்த துப்பாக்கிச் சூட்டில் 10 பேர் உயிரிழந்துள்ளனர்.
சந்தேக நபரான துப்பாக்கிதாரி உட்பட 10 பேர் உயிரிழந்துள்ளதாக பொலிஸார் தெரிவித்துள்ளனர்.
7 முதல் 12-ஆம் வகுப்பு வரை மாணவர்கள் பயிலும் டம்ப்ளர் ரிட்ஜ் மேல்நிலைப் பாடசாலையில் மதியம் இந்தத் தாக்குதல் நடத்தப்பட்டுள்ளதாக பொலிஸார் தெரிவித்துள்ளனர்.
துப்பாக்கிச் சூடு குறித்த தகவல் கிடைத்தவுடன், பொலிஸார் உடனடியாக அந்தப் பகுதியில் அவசரகால எச்சரிக்கையை விடுத்தனர்.
பொலிஸார் உடனடியாக பாடசாலைக்கு நுழைந்து சோதனை செய்தபோது, பாடசாலை வளாகத்தில் 6 பேர் உயிரிழந்த நிலையில் கண்டெடுக்கப்பட்டனர். மற்றொரு இடத்தில் மேலும் 2 உடல்கள் மீட்கப்பட்டன.
மருத்துவமனை செல்லும் வழியில் படுகாயமடைந்த ஒருவர் உயிரிழந்தார். இந்த நிலையில் சந்தேக நபர், தன்னைத்தானே சுட்டுக்கொண்டு உயிரிழந்த நிலையில் பாடசாலை வளாகத்தில் மீட்கப்பட்டுள்ளார்.
கடந்த சில நாட்களாக சமூக ஊடகங்களில் சர்ச்சையை ஏற்படுத்திய காணொளி குறித்து விசாரணையை முன்னெடுத்த வலப்பனை பொலிஸார், அந்த காணொளியுடன் தொடர்புடைய சந்தேக நபரைக் கைது செய்துள்ளனர்.
பூனையை மனிதாபிமானமற்ற முறையில் துன்புறுத்தும் நபர் பற்றிய காணொளி சமூக ஊடகங்களில் பரவியது. இதனையடுத்து விலங்கு உரிமை அமைப்புகள் உட்பட பல தரப்பினர் அதற்கு எதிர்ப்புத் தெரிவித்தனர்.
அதற்கமைய, காணொளியில் தோன்றும் சந்தேக நபர் வலப்பனை பொலிஸாரால் கைது செய்யப்பட்டார். சந்தேக நபர் திப்பட்டுகொட பகுதியைச் சேர்ந்த 26 வயதுடைய பூனையின் உரிமையாளர் ஆவார்.
குறித்த நபரை வலப்பனை நீதவான் நீதிமன்றத்தில் முன்னிலைப்படுத்தப்பட்ட நிலையில் 14 நாட்கள் விளக்கமறியலில் வைக்க நீதிமன்றம் உத்தரவிட்டது.
சந்தேக நபரின் மனநிலையை பரிசோதித்து மருத்துவ அறிக்கையை சமர்ப்பிக்குமாறு பொலிஸாருக்கு நீதிமன்றம் உத்தரவிட்டுள்ளது.
இலங்கையில் பாடசாலைகளில் பணம் வசூலிப்பதற்கு தற்போதைய அரசாங்கத்தால் எவ்வித சட்டப்பூர்வ அனுமதியும் வழங்கப்படவில்லை என அமைச்சர் நளிந்த ஜயதிஸ்ஸ தெரிவித்துள்ளார்.
இவ்வாறு பணம் அறிவிடுதால் மாணவர்கள் பல்வேறு மன உளைச்சலுக்கு உள்ளாவதாகவும் அவர் சுட்டிக்காட்டியுள்ளார்.
அமைச்சரவை தீர்மானங்களை அறிவிக்கும் நேற்றைய ஊடக சந்திப்பில் கலந்துகொண்டு கருத்து வெளியிடும் போதே அவர் இதனைத் தெளிவுபடுத்தினார். இது தொடர்பில் அவர் மேலும் தெரிவிக்கையில்,
பாடசாலைகளில் பல்வேறு செயல்பாடுகளை முன்னெடுப்பதற்காக மாணவர்களிடையே பணம் வசூலிப்பது நீண்ட காலமாக ஒரு பொதுவான நடைமுறையாக இருந்து வருகிறது.
ஒவ்வொரு பாடசாலையிலும் மாணவர்களின் எண்ணிக்கையின் அடிப்படையில் தொகைகள் முன்னர் கணக்கிடப்பட்டன. தேசிய மக்கள் சக்தியின் தற்போதைய அரசாங்கத்தின் கீழ், பாடசாலைகளில் பணம் வசூலிப்பதற்கு எந்த சட்டப்பூர்வ அனுமதியும் வழங்கப்படவில்லை.
சில குழுக்கள் அல்லது தனிநபர்களின் பணம் கோருதல்கள் காரணமாக ஒரு மாணவர் சிரமத்தை எதிர்கொண்டால் மாணவர்களின் நலனில் தலையிட அதிகாரம் உள்ளது.
அதேநேரத்தில், தன்னார்வ அடிப்படையில் பாடசாலைகளுக்கு உதவும் குழுக்கள் அல்லது பெற்றோரிடமிருந்து தன்னார்வ பங்களிப்புகளைத் தடுக்கவும் முடியாது. இதுவரை, இந்த விஷயத்தில் அமைச்சுக்கு எந்த முறைப்பாடும் கிடைக்கவில்லை என சுட்டிக்காட்டியுள்ளார்.
கொழும்பு நாலந்தா கல்லூரியின் இரண்டு ஆசிரியைகள் பாடசாலையிலிருந்து உடனடியாக நீக்கப்பட்டு, மாகாண கல்வி அலுவலகத்திற்கு இணைக்கப்பட்டுள்ளனர்.
முன்னாள் தலைமை மாணவருடன் முறையற்ற தொடர்புகளைப் பேணியதாக கூறப்படும் இரண்டு ஆசிரியைகளே இவ்வாறு இடமாற்றம் செய்யப்பட்டுள்ளனர்.
குறித்த இரு ஆசிரியைகளும் மாகாண கல்வி அலுவலகத்திற்கு மாற்றப்பட்ட போதிலும், அவர்கள் இதுவரை அங்கு பணிக்குச் சமூகமளிக்கவில்லை எனத் தெரிவிக்கப்படுகிறது.
பாடசாலை அதிபரிடமிருந்து முதற்கட்ட விசாரணை அறிக்கை கிடைத்துள்ளதாகவும், அதன் அடிப்படையில் மேலதிக நடவடிக்கைகள் எடுக்கப்படும் எனவும் கல்வி அமைச்சின் செயலாளர் நாலக களுவேவ தெரிவித்துள்ளார்.
அத்துடன், பாடசாலையின் மாணவர் தலைவர் சபை கலைக்கப்பட்டுள்ளது. தலைமை மாணவர் மற்றும் ஆசிரியர்களுக்கு இடையிலான முறையற்ற நடத்தைகள் தொடர்பான காணொளிகள் சமூக வலைதளங்களில் பரவியதை அடுத்து, பாடசாலை நிர்வாகம் உள்வாரி விசாரணைகளை ஆரம்பித்துள்ளது.
தற்போது இந்தச் சம்பவம் தொடர்பாக கல்வி அமைச்சினால் விசாரணைகள் முன்னெடுக்கப்பட்டு வருகின்றமை குறிப்பிடத்தக்கது.
முன்னாள் நாடாளுமன்ற உறுப்பினர் அமரகீர்த்தி அத்துகோரல கொலை செய்யப்பட்ட சம்பவம் தொடர்பான வழக்கில் குற்றவாளிகளாக இனங்காணப்பட்ட 12 பேருக்கும் மரண தண்டனை விதித்து தீர்ப்பளிக்கப்பட்டுள்ளது.
கம்பஹா மேல் நீதிமன்றத்தின் மூவரடங்கிய நீதிபதிகள் ஆயம் இந்த தீர்ப்பை அறிவித்தது. அத்துடன், 4 பேருக்கு 5 வருடம் ஒத்திவைக்கப்பட்ட ஆறு மாத கால சிறைதண்டனை விதிக்கப்பட்டுள்ளது.
இந்த வழக்கில் 41 பேருக்கு எதிராக சட்டமா அதிபரால் வழக்கு தாக்கல் செய்யப்பட்டிருந்தது.
கடந்த 2022 ஆம் ஆண்டு மே மாதம் 9ஆம் திகதி நாட்டில் ஏற்பட்ட அரசாங்கத்துக்கு எதிரான போராட்டங்களின் போது, நிட்டம்புவ நகரில் வைத்து அமரகீர்த்தி அத்துகோரல மற்றும் அவரது பாதுகாப்பு உத்தியோகத்தர் ஆகியோர் நிட்டம்புவ ஊடாகச் சென்றுகொண்டிருந்தபோது ஆவேசமடைந்த கும்பலால் தாக்குதலுக்கு உள்ளாகியிருந்தமை குறிப்பிடத்தக்கது.
கண்டி யாழ்ப்பாணம் வீதியின் வவுனியா நகருக்குட்பட்ட 3 கிலோமீற்றருக்குட்பட்ட பகுதி அகலப்படுத்தப்பட்டு மேம்படுத்தப்படவுள்ளதாக வீதி அபிவிருத்தி அதிகாரசபை தெரிவித்துள்ளது.
வவுனியா மாவட்டத்தில் உள்ள பிரதான வீதிகள், சிறு வீதிகள், கிராமிய வீதிகள் தொடர்பான விசேட ஒருங்கிணைப்புக்குழு கூட்டம் போக்குவரத்து மற்றும் நெடுஞ்சாலைகள் அமைச்சர் பிமல் ரட்நாயக்க தலைமையில் மாவட்ட செயலகத்தில் நேற்று இடம்பெற்றது.
இதன்போது வீதி அபிவிருத்தி அதிகாரசபையின் அதிகாரியால் இவ்வாறு கூறப்பட்டிருந்தது. அந்தவகையில் கண்டி யாழ்ப்பாணம் வீதியில் வவுனியா பொலிஸ் நலன்புரிச்சங்கத்திற்கு அண்மையில் இருந்து புதிய பேருந்து நிலையத்திற்கு அருகில் உள்ள தேசிய நீர் வழங்கல் வடிகாலமைப்பு சபைஉள்ள பகுதிக்கும் இடையில் உள்ள 3 கிலோமீற்றர் நீளம் கொண்ட பகுதி (176-179 கி.மீ) அகலப்படுத்தப்பட்டு மேம்படுத்தப்படவுள்ளது. அதற்காக 1322 மில்லியன் ரூபாய் பணம் மதிப்பிடப்பட்டுள்ளது.
அந்தவகையில் வவுனியா மணிக்கூட்டு கோபுரசந்தி மற்றும் வைத்தியசாலை சுற்றுவட்டம் என்பனவும் அகலப்படுத்தப்பட்டு, மேம்படுத்தப்படவுள்ளதாக தெரிவிக்கப்பட்டது. அத்துடன் நகரப்பகுதியில் உள்ள வடிகால்களை சீரமைப்பதடன் அதற்கு சீமெந்திலான மூடிகளை இடும் வேலைத்திட்டமும் முன்னெடுக்கப்படவுள்ளது.
அத்துடன் வவுனியா பொது வைத்தியசாலைக்கு அருகில் அமைந்துள்ள பண்டாரவன்னியன் சதுக்கத்தில் இவ்வருடம் போக்குவரத்து சமிஞ்சை விளக்குகள் பொருத்துவதற்கான நடவடிக்கை எடுக்கப்பட்டுள்ளதாக வீதி அபிவிருத்தி அதிகாரசபையால் தெரிவிக்கப்பட்டிருந்தது.
22 கிலோ கேரள கஞ்சாவுடன் இருவர் கைது செய்யப்பட்டுள்ளதாக வவுனியா பொலிசார் இன்று தெரிவித்தனர்.
வவுனியா தலைமை பொலிஸ்நிலைய போதைத்தடுப்பு பொலிசாருக்கு கிடைத்த இரகசிய தகவலையடுத்து பட்டானிச்சூர் பகுதியில் கடமையில் இருந்த பொலிஸ் குழுவினர் கப்ரக வாகனம் ஒன்றை வழிமறித்து அதில் சோதனையில் ஈடுபட்டனர்.
இதன்போது குறித்த வாகனத்தில் சூட்சுமமான முறையில் கஞ்சா கொண்டு செல்லப்பட்டமை கண்டுபிடிக்கப்பட்டது.
இதனையடுத்து குறித்த வாகனத்தில் இருந்த இருவர் பொலிசாரால் கைது செய்யப்பட்டதுடன், அதில் இருந்த 22கிலோ கஞ்சாவும் மீட்கப்பட்டது.
குறித்த கஞ்சா போதைப்பொருள் மன்னாரிலிருந்து திருகோணமலைக்கு கொண்டு செல்லப்பட்ட நிலையிலேயே பொலிசாரால் கைப்பற்றப்பட்டது.
வவுனியா பொலிஸ் நிலையப் பொறுப்பதிகாரி சுரங்க வீரரத்தின தலைமையில் பொலிஸ் பரிசோதகர் இலங்கசிங்க, மற்றும் திசாநாயக்க (37348), கீர்த்தி ரத்ன (48001), குமார(63340), ரட்னசேகர(6762), றெஜினோல்ட் (68300), ரணில்(81010), கலாகிரு(85763), குமார(87334), சகரான் (22449), பிரதீஸ்(99695) ஆகியோரால் இந்நடவடிக்கை முன்னெடுக்கப்பட்டது.
கைதுசெய்யப்பட்டவர்கள் மேலதிக விசாரணைகளின் பின் நீதிமன்றில் முற்படுத்தவுள்ளதாக பொலிசார் மேலும் தெரிவித்தனர்.
இன்றைய டிஜிட்டல் யுகத்தில் பலரும் அலுவலக வேலை அல்லது செல்போன் மோகம் காரணமாக இரவு நீண்ட நேரம் கண் விழித்து இருக்கிறார்கள். ஆறு மணி நேரம் அல்லது அதற்கும் குறைவாக தூங்குவதை வழக்கமாக வைத்திருக்கின்றனர்.
தினமும் இரவு 6 மணி நேரத்துக்கும் குறைவாக தூங்கினால் உடலில் என்னென்ன விளைவுகள் ஏற்படும் என்பதை பார்க்கலாம்.
தினமும் 6 மணி நேரத்துக்கும் குறைவாக தூங்குபவர்களுக்கு இரண்டாம் வகை நீரிழிவு நோய் ஏற்படும் அபாயம் இரட்டிப்பாகும் என்று ஆய்வுகள் தெரிவிக்கின்றன.
தினமும் இரவு 6 மணி நேரத்துக்கும் குறைவாக தூங்கினால் உடல் பருமன் அதிகரிக்க வாய்ப்பு உள்ளதாக ஆய்வுகள் தெரிவிக்கின்றன.
பசியைத் தூண்டும் ஹார்மோர்ன் அதிகரிக்கும். அதிகப்படியான தேவையற்ற உணவுகளை சாப்பிட நேரலாம். 7-8 மணி நேரம் தூங்குபர்களை விட ரத்தக்குழாயில் அதிக கொழுப்பு படிவதாக தெரியவந்துள்ளது.
ஆறு மணி நேரம் அல்லது அதற்கு குறைவாக தூங்கி வந்தால், மூளையில் நச்சுக்கள் குவியும். பிறகு எதிர்காலத்தில் அறிவாற்றல் குறைபாடு அல்லது மறதி நோய் ஏற்படும் அபாயம் அதிகரிக்கும் என்று ஆய்வில் கண்டறியப்பட்டிருக்கிறது.
நினைவாற்றல் குறைபாடு, முடிவெடுக்கும் திறன் குறைவு, கவனச் சிதறல் போன்றவையும் குறைந்த தூக்கத்தால் ஏற்படுகின்றன.
யாழ்ப்பாணம் – வட்டுக்கோட்டை பொலிஸ் பிரிவிற்குட்பட்ட பொன்னாலையில் இன்று முற்பகல் இடம்பெற்ற விபத்தில் ஒருவர் உயிரிழந்ததுடன் மற்றொருவர் படுகாயமடைந்துள்ளதாக தெரிவிக்கப்படுகிறது.
சம்பவம் குறித்து மேலும் தெரியவருகையில், பொன்னாலை சந்தியில் இருந்து மாதகல் பக்கம் செல்கின்ற வீதியால் இருவர் மோட்டார் சைக்கிளில் பயணித்துக்கொண்டிருந்தனர்.
இதன்போது அவர்கள் பயணித்த மோட்டார் சைக்கிள் வேகக் கட்டுப்பாட்டை இழந்து வீதியோரம் நின்ற பனை மரத்துடன் மீது மோதி விபத்து சம்பவித்துள்ளது.
இதன்போது ஒருவர் உயிரிழந்ததுடன், மற்றையவர் படுகாயமடைந்த நிலையில் யாழ்ப்பாணம் போதனா வைத்தியசாலையில் சிகிச்சைக்காக சேர்ப்பிக்கப்பட்டார்.
உயிரிழந்தவரது சடலம் தற்போது காரைநகர் பிரதேச வைத்தியசாலையில் வைக்கப்பட்டுள்ளது. இது குறித்து வட்டுக்கோட்டை பொலிஸார் விசாரணைகளை மேற்கொண்டு வருகின்றனர்.
மூன்று ஆண்டுகளாக தான் கதாலித்துவந்த பெண், தனக்கு திருமணம் என்று கூறி திருமண பத்திரிகை வைத்ததால், ஏமாற்றத்தைத் தாங்கிக்கொள்ள இயலாமல் துயர முடிவொன்றை எடுத்துள்ளார் இளைஞர் ஒருவர்.
இந்தியாவின் பெங்களூருவைச் சேர்ந்த கிரண், காதலர் தினத்துக்காக தனது காதலிக்கு பெரிய பரிசொன்றைக் கொடுப்பதற்காக தயாராகிக்கொண்டிருந்தார். சனிக்கிழமையன்று, தன் காதலரை பார்க்க வந்தார் அந்தப் பெண். அவர் கொடுத்த சர்ப்ரைஸை கிரணால் தாங்க இயலவில்லை.
ஆம், தனது திருமண பத்திரிகையைக் கொடுப்பதற்காக வந்திருந்தார் அந்தப் பெண். தனக்கு ஏற்கனவே வேறொருவரும் நிச்சயதார்த்தம் ஆகிவிட்டதாகக் கூறி, திருமண அழைப்பிதழைக் கொடுத்துவிட்டுச் சென்றார் அந்தப் பெண்.
சோகத்தில் தன் அறைக்குள் சென்று உள் பக்கமாக கதவைப் பூட்டிக்கொண்ட கிரணை, பிறகு சடலமாகத்தான் பார்த்தார்கள் அவரது பெற்றோர்.
அந்தப் பெண்ணின் குடும்பம் வாங்கியிருந்த 50 லட்ச ரூபாய் கடனை அடைக்க உறுதியளித்திருந்தாராம் கிரண்.
அவர் அந்தப் பெண்ணுக்கு காதலர் தின பரிசு கொடுப்பதற்காக தயாராகிக்கொண்டிருக்க, அவரோ தங்கள் பிள்ளை உயிரை மாய்த்துக்கொள்ளக் காரணமாக இருந்துவிட்டதாக பொலிசில் புகாரளித்துள்ளார்கள் கிரணுடைய பெற்றோர்.
பொலிசார் இந்த சம்பவம் தொடர்பில் வழக்குப் பதிவு செய்து விசாரணை மேற்கொண்டு வருகிறார்கள்.
சீகிரியா, கலகொட்டுவ பகுதியில் வீடொன்றில் நேற்று இரவு தீ விபத்து ஏற்பட்டு, வீட்டின் ஒரு அறை முற்றிலுமாக எரிந்து நாசமாகியுள்ளது.
சார்ஜருடன் கையடக்க தொலைபேசி இணைக்கப்பட்டிருந்த போது ஏற்பட்ட மின் கசிவு காரணமாக தீ விபத்து ஏற்பட்டதாக வீட்டு உரிமையாளர்கள் தெரிவித்துள்ளனர்.
இந்த ஆண்டு க.பொ.த உயர்தரப் பரீட்சைக்கு எழுதவிருந்த மாணவர் ஒருவர் பயன்படுத்திய அறையில் தீ விபத்து ஏற்பட்டுள்ளது. மேலும் தீ விபத்து ஏற்பட்ட நேரத்தில் மாணவர் அறையில் இல்லை என தெரியவந்துள்ளது.
எனினும், மாணவரின் மடிக்கணினி, உடைகள் மற்றும் கல்விக்குத் தேவையான அனைத்து புத்தகங்களும் தீயில் எரிந்து நாசமாகியுள்ளன. சம்பவம் குறித்து சீகிரியா பொலிஸார் மேலதிக விசாரணைகளை மேற்கொண்டு வருகின்றனர்.
பொது வெளியில் பெண்களை அனுமதியின்றி புகைப்படம் எடுத்த குற்றச்சாட்டில் இலங்கை யூடியூபர் ஒருவர், டொராண்டோ பொலிஸாரினால் கைது செய்யப்பட்டுள்ளார்.
அவர் மீது, அனுமதியின்றி அந்நியர்களைப் படம் பிடித்தமை தொடர்பான தொடர்ச்சியான சம்பவங்களைத் தொடர்ந்து, நான்கு குற்றவியல் துன்புறுத்தல் குற்றச்சாட்டுகள் சுமத்தப்பட்டுள்ளன.
45 வயதான அந்த நபர், டொராண்டோ முழுவதும் பொது இடங்களில் பலமுறை தனிநபர்களை அணுகி, அவர்களுக்கு குறிப்பிடத்தக்க அசௌகரியத்தை ஏற்படுத்தும் வகையில் அவர்களை படம் பிடித்ததாக அந்நாட்டு பொலிஸார் குற்றம் சாட்டுகின்றனர்.
டொராண்டோ பொலிஸ் சேவை வெளியிட்ட அறிக்கையின்படி, அவர் கடந்த டிசம்பர் 10, 2025 அன்று பொலிஸ் காவலில் எடுக்கப்பட்ட நிலையில், பெப்ரவரி 4, 2026 அன்று ஒன்ராறியோ நீதிமன்றத்தில் முன்னிலைபடுத்தப்பட்டுள்ளார்.
குற்றவியல் துன்புறுத்தல் தொடர்பான நான்கு வெவ்வேறு சம்பவங்களையும் பொலிஸார் நீதிமன்றில் தெரிவித்துள்ளனர்.
கடந்த ஜூன் 8, 2025 அன்று, டன்டாஸ் தெரு மேற்கு மற்றும் டஃபெரின் தெரு அருகே ஒரு நிகழ்வில் ஒரு பெண் கலந்து கொண்டிருந்தபோது, குறித்த நபர் தன்னை படம் பிடித்ததை உணர்ந்துள்ளார்.
பின்னர் அந்த பெண் அவரை நிறுத்தச் சொன்னபோது, அவர் மோதலில் ஈடுபட்டார், தொடர்ந்து அவரை துன்புறுத்தினார், மேலும் பாதுகாப்பு உத்தரவை மீறி வெளியேற மறுத்துவிட்டார் என்று கனேடிய பொலிஸார் நீதிமன்றில் குறிப்பிட்டுள்ளனர்.
அதேநேரம், அதிகாரிகள் அவ்விடத்திற்கு செல்லும் முன்பே குறித்த சந்தேக நபர் வெளியேறியதாகவும் மேலும் அந்த பெண்ணுக்கு எவ்வித பாதிப்பும் ஏற்பட்டிருக்கவில்லை எனவும் சுட்டிக்காட்டியுள்ளனர்.
மேலும், ஓகஸ்ட் 21, 2025 அன்று, பிற்பகல் 2:45 மணியளவில், அதே நபர் யூனியன் ஸ்டேஷனில் உள்ள ஒரு TTC ஊழியரை அணுகி, அவர்களின் சம்மதமின்றி அவர்களைப் படம்பிடித்து, அவர்களின் இனம் குறித்து துன்புறுத்தும் கருத்துக்களைத் தெரிவித்ததாகக் கூறப்படுகிறது.
அடுத்ததாக செப்டம்பர் 27, 2025 அன்று, பிற்பகல் 3 மணியளவில் டேவிட் பெக்காட் சதுக்கத்தில், இதேபோன்ற சம்பவம் நடந்ததாகவும் அங்கு நின்ற ஒருவர் அணுகி, நிறுத்துமாறு கோரிக்கைகள் விடுத்த போதிலும் படப்பிடிப்பைத் தொடர்ந்துள்ளதுடன் மோதலில் ஈடுபட்டுள்ளார்.
மற்றொரு சம்பவத்தில், மே 26, 2025 அன்று, குற்றம் சாட்டப்பட்டவர் யோங் தெரு மற்றும் ஷட்டர் தெருவில் உள்ள ஒரு பெண் அதிகாரியை அணுகி, அவரைப் படம்பிடித்து, அவரது தோற்றம் குறித்து கருத்து தெரிவித்ததாக கனேடிய பொலிஸார் தெரிவிக்கின்றனர்.
டொராண்டோ பொலிஸார் அவரது படத்தை வெளியிட்டு, மேலும் பாதிக்கப்பட்டவர்கள் இருக்கலாம் என்று நம்புவதாகவும் தகவல் தெரிந்த எவரும் டொராண்டோ பொலிஸ் சேவையைத் தொடர்பு கொள்ளவோ அல்லது குற்றத் தடுப்பாளர்கள் மூலம் பெயர் குறிப்பிடப்படாத உதவிக்குறிப்புகளை வழங்கவோ முடியும் என வலியுறுத்தியுள்ளனர்.
கனடாவின் குற்றவியல் சட்டத்தின் கீழ், குற்றவியல் துன்புறுத்தல் குற்றப்பத்திரிகை மூலம் வழக்குத் தொடரப்பட்டால் அதிகபட்சமாக 10 ஆண்டுகள் சிறைத்தண்டனைக்கு வழிவகுக்கும் என்பது இங்கு குறிப்பிடத்தக்கது.
இரத்தினபுரி – எலபாத்த பகுதியில் பாடசாலை முடிந்து வீடு திரும்பிக் கொண்டிருந்த விபத்தில் உயிரிழந்த மாணவி தொடர்பான மேலதிக தகவல்களை பொலிஸார் வெளியிட்டுள்ளனர்.
உயிரிழந்தவர் எலபாத்த பொலிஸ் பிரிவின் ரம்புக்கந்த தோட்டத்தில் உள்ள தமிழ் வித்தியாலயத்தில் நான்காம் ஆண்டு படிக்கும் ராமநாதன் பிரியதர்ஷனி என்ற 9 வயதுடையவர் என அடையாளம் காணப்பட்டுள்ளார்.
அவர் எலபாத்த பொலிஸ் பிரிவின் ரத்னஹங்கமுவ, அலுகெட்டியவைச் சேர்ந்தவராகும்.
கடந்த 6 ஆம் திகதி, பாடசாலை முடிந்து தனது மூத்த சகோதரியுடன் வீடு திரும்பும் போது, லொறி ஒன்றின் இடது பின்புற சக்கரத்தில் மோதியதில் படுகாயமடைந்து மருத்துவமனையில் அனுமதிக்கப்பட்டார்.
சிறுமி மருத்துவமனையில் அனுமதிக்கப்பட்டவுடன் உயிரிழந்ததாக வைத்தியர்கள் தெரிவித்தனர். விபத்தின் பின்னர் லொறியின் சாரதியே மாணவியை இரத்தினபுரி மருத்துவமனையில் அனுமதித்துள்ளார்.
மரணம் தொடர்பான விசாரணையை இரத்தினபுரி மருத்துவமனையின் நீதித்துறை மருத்துவ அதிகாரி தம்மி லூயிஸ் ஹேவா மேற்கொண்டார். மேலும் பிரேத பரிசோதனையை இரத்தினபுரி மருத்துவமனையின் மரண விசாரணை அதிகாரி லக்மினா தென்னகோன் மேற்கொண்டார்.
மூளை மற்றும் தலையில் ஏற்பட்ட காயங்களால் மரணம் ஏற்பட்டுள்ளதாக மரண விசாரணை அதிகாரி லக்மினா தென்னகோன் அறிவித்துள்ளர். விபத்து தொடர்பாக லொறி ஓட்டுநர் பொலிஸாரால் கைது செய்யப்பட்டுள்ளார்.
கம்பளையில் மின்சாரம் தாக்கி உயிரிழந்த தாய் மற்றும் மகள் பற்றிய தகவலை பொலிஸார் வெளியிட்டுள்ளனர்.
கலஹா, கிரிபோகஹைன்னவை சேர்ந்த 46 வயது தாயும் அவரது 13 வயது மகளும் தங்கள் தோட்டத்தில் அறுந்து விழுந்த மின்சார கம்பியில் சிக்கி உயிரிழந்தனர்.
ஜே.கே.எம். சாந்தி குமாரி என்ற தாய் மற்றும் உதயங்கனியே நிசான்சா என்ற மகள் ஆகியோரே உயிரிழந்துள்ளதாக அடையாளம் காணப்பட்டுள்ளனர்.
டித்வா சூறாவளியின் போது அறுந்து விழுந்த மின் கம்பிகளை மின்சார சபை இரண்டு மாதங்களுக்கும் மேலாக சரி செய்யத் தவறியதால் இந்த பேரழிவு ஏற்பட்டதாக உயிரிழந்தவர்களின் உறவினர்கள் மற்றும் அப்பகுதிவாசிகள் குற்றம் சுமத்தியுள்ளனர்.
தங்கள் தோட்டத்தில் விழுந்த மின் கம்பிகளை அகற்றுமாறு மின்சார சபை அதிகாரிகளிடம் பலமுறை கேட்ட போதிலும், அவர்கள் அவ்வாறு செய்யவில்லை என உயிரிழந்த தாயின் மூத்த மகள் மற்றும் கணவர் தெரிவித்துள்ளனர்.
இரண்டு நாட்களுக்கு முன்பு இந்தப் பகுதியில் மின்சார கம்பிகள் காரணமாக தீ விபத்து ஏற்பட்டுள்ளது.
பேரிடரின் போது அறுந்து விழுந்த மின் கம்பிகள் தரையில் இருந்தபோது அருகிலுள்ள வீடுகளுக்கு மின்சாரம் வழங்க வந்ததற்காகவும், ஆபத்தான கம்பிகள் தரையில் இருந்தபோது வெளியேறியதற்காகவும் கிராம மக்கள் மின்சார சபைக்கு கடும் எதிர்ப்பு தெரிவித்தனர்.
சனிக்கிழமை, காலை 10 மணியளவில், மதிய உணவு தயாரிக்க கறிவேப்பிலை பறிக்க தோட்டத்திலுள்ள ஒரு மரத்திற்கு தாயும் மகளும் சென்றிருந்தனர்.
எனினும், அருகிலுள்ள மின்சார கம்பியில் மோதியதில் அவர்கள் தரையில் விழுந்தனர். அயலவர்கள் வந்து அவர்களை காப்பாற்ற முயன்றபோது, முடியாமல் போயுள்ளது. மின்சாரம் தாக்கிய தாயும் மகளும் ஏற்கனவே உயிரிழந்து விட்டதாக அப்பகுதி மக்கள் தெரிவிக்கின்றனர்.
உயிரிழந்தவர்களின் உடல்கள் டெல்டோட்டா பிராந்திய மருத்துவமனைக்கும், பின்னர் பிரேத பரிசோதனைக்காக பேராதனை மருத்துவமனைக்கும் கொண்டு செல்லப்பட்டன.
