கொரோனாவால் பலி..

இலங்கையில் கொரோனா தொற்றினால் உயிரிழந்தவர்களின் எண்ணிக்கை 9ஆக அதிகரித்துள்ளது. கொழும்பு ஐடிஎச் வைத்தியசாலையில் சிகிச்சைப் பெற்று வந்த நிலையில் குறித்த நபர் உயிரிழந்துள்ளதாக சுகாதார சேவைகள் பணிப்பாளர் டொக்டர் அனில் ஜாசிங்க தெரிவித்துள்ளார்.

கொழும்பு 15ஐச் சேர்ந்த 52 வயதுடைய பெண் ஒருவரே இவ்வாறு மரணித்துள்ளதாக சுகாதார அமைச்சு வெளியிட்டுள்ள அறிக்கையில் தெரிவிக்கப்பட்டுள்ளது.

இலங்கையில் இதுவரை 755 பேருக்கு கொரோனா தோற்று உறுதி செய்யப்பட்டுள்ளதுடன், 197 பேர் குணமடைந்து வைத்தியசாலையிலிருந்து வெளியேறியுள்ளனர்.

சலூன்களை திறக்க அனுமதி..

தற்காலிகமாக மூடப்பட்டுள்ள அழகு கலை நிலையங்கள், முடி வெட்டும் நிலையங்களை பாதுகாப்பு முறையின் கீழ் திறப்பதற்கு சுகாதார அமைச்சர் பவித்ரா வன்னிஆராச்சி அறிவித்துள்ளார்.

கொரோனா வைரஸ் தொற்று காரணமாக அரசாங்கத்தினால் தற்காலிகமாக மூட நடவடிக்கை எடுக்கப்பட்டுள்ள அழகு கலை நிலையங்களை மீள திறப்பதற்கான நடவடிக்கைகள் மேற்கொள்ளப்பட்டுள்ளன.

அழகு கலை துறைக்கான சட்டத்திட்டங்களை முன்னெடுக்க வேறு எந்த துறையும் இல்லை என்பதனால் சுகாதார அமைச்சிற்கு மாத்திரமே அது தொடர்பான தீர்மானங்களை மேற்கொள்ள முடியும் என அவர் குறிப்பிட்டுள்ளார்.

அதற்கமைய தினசரி சேவையின் போது, சுகாதார அமைச்சின் ஆலோசனையின்படி, முடி வெட்டுதல் உள்ளிட்ட மிக அத்தியாவசிய சேவைகளை மட்டுமே மேற்கொள்வதற்கு வழங்க சுகாதார அமைச்சினால் அறிவுறுத்தப்பட்டுள்ளது

சுகாதார அமைச்சினால் வழங்கப்பட்ட சுகாதாரப் பாதுகாப்புத் தரங்களுக்கு ஏற்ப போதுமான இடவசதியுடன் பணியாற்றவும் அறிவுறுத்தப்பட்டுள்ளது.

அத்துடன் அழகு நிலையம் சேவைகளை முறையாக பராமரிப்பது குறித்த அறிவுறுத்தல்களுடன் வழிகாட்டியை சமர்ப்பிக்க சுகாதார அமைச்சு திட்டமிட்டுள்ளது.

-தமிழ்வின்-

பாடசாலைகளை மீண்டும் ஆரம்பிப்பது தொடர்பில்..

கொரோனா வைரஸ் தொற்று காரணமாக இலங்கையில் அனைத்து பாடசாலைகளுக்கும் விடுமுறை வழங்கப்பட்டுள்ளது. இந்த நிலையில் பாடசாலைகளை மீண்டும் ஆரம்பிப்பது தொடர்பில் கல்வியமைச்சின் செயலாளர் எச்.எம்.சித்ரானந்தா நாடளாவிய ரீதியில் அந்தந்த மாகாண கல்வி பணிப்பாளர்களுடன் சந்திப்புகளை நடத்தி வருகிறார்.

அந்த வகையில் நாளைய தினம் கல்வியமைச்சின் செயலாளர் சித்ரானந்தா கிழக்கு மாகாண கல்வி பணிப்பாளர் எம்.கே.எம்.மன்சூரை சந்தித்து கலந்துரையாட உள்ளதாக எமது செய்தியாளர் தெரிவித்தார்.

கிழக்கு மாகாணத்தில் கொரோனா அச்சத்தால் மூடப்பட்டுள்ள பாடசாலைகளை மீளத்திறப்பது உள்ளிட்ட கள நிலவரங்கள் பற்றி விரிவாக இதன்போது கலந்துரையாடவுள்ளதாக தெரியவருகிறது.

கல்வியமைச்சின் செயலாளர் இதுவரை தெற்கு, வடமத்திய மற்றும் வடமேல் மாகாணங்களின் கல்வி பணிப்பாளர்களை சந்தித்து பேச்சுவார்த்தை நடத்தி அவர்களது கருத்துகளை அறிந்துள்ளார்.

இந்த சந்தர்ப்பத்தில் நாளை கிழக்கு மாகாணத்திற்கு விஜயம் செய்து தொடர்ந்து வடக்கு, ஊவா மாகாணக் கல்வி பணிப்பாளர்கள் மற்றும் மத்திய மாகாண கல்வி பணிப்பாளரையும் சந்திக்க திட்டமிட்டுள்ளார்.

சகல மாகாண கல்வி பணிப்பாளர்களையும் சந்தித்த பின்னர் ஒரு முடிவுக்கு வரவிருப்பதாகவும், பாடசாலைகளுக்கான விசேட நேர அட்டவணையை தயாரிக்கவிருப்பதாகவும் கல்வியமைச்சின் வட்டாரங்கள் தெரிவிப்பதாக எமது செய்தியாளர் தெரிவித்தார்.

பொதுவான பத்தாம் தரத்திற்கு மேற்பட்ட வகுப்புகளை முதலில் ஆரம்பிப்பதெனவும், சிலவேளை மாகாணத்திற்கு மாகாணம் விசேட நிகழ்ச்சி நிரலின் படி பாடசாலைகள் திறக்கப்படலாமெனவும் தெரியவருகிறது.

-தமிழ்வின்-

கொழும்பில்..

கொழும்பில் குடிசைக் குடியிருப்பில் வாழும் மக்களுக்காக சுமார் 50 ஆயிரம் வீடுகளை நிர்மாணிக்கும் பணிகள் நாளை முதல் இடம்பெறவுள்ளன.

நகர அபிவிருத்தி அதிகார சபையினரால் இது குறித்த பணிகள் முன்னெடுக்கப்படவுள்ளன. ஜனாதிபதி கோட்டாபய ராஜபக்ச மற்றும் பிரதமர் மகிந்த ராஜபக்ச ஆகியோரின் ஆலோசனைக்கு அமைய இந்த வேலைத்திட்டம் ஆரம்பிக்கப்படவுள்ளது.

இதன் முதல்கட்டமாக கொழும்பு – 14 சிறிமாவோ பண்டாரநாயக்க மாவத்தை, எதிரிசிங்க மாவத்தை, சிறிமுத்து உயன அருகில் 1000 வீடுகளை கொண்ட தொடர்மாடி கட்டடங்கள் நிர்மாணிக்கப்படவுள்ளன.

ஆசிய அபிவிருந்தி வங்கியின் நிதியுதவியின் கீழ் இதற்காக 5,950 மில்லியன் ரூபா செலவிடப்படவுள்ளது. மூன்று வருடங்களுக்குள் இந்த திட்டத்தை பூர்த்தி செய்ய நடவடிக்கை எடுக்கப்பட்டுள்ளது.

இலங்கை வைத்தியரின் அனுபவம்..

கொரோனா வைரஸ் தொற்றுக்குள்ளாகி மீண்டு வந்த விசேட வைத்தியர் பிரியங்கர தனது அனுபவங்களை பகிர்ந்துள்ளார். நேற்றைய தினம் தனியார் தொலைக்காட்சி நிகழ்ச்சி ஒன்றில் கலந்து கொண்டு கருத்து வெளியிடும் போதே அவர் இதனை குறிப்பிட்டுள்ளார்.

மார்ச் மாதம் 19ஆம் திகதி கொரோனா தொற்றுடன் அடையாளம் காணப்பட்ட வைத்தியர் தற்போது பூரண குணமடைந்து மீண்டும் தனது பணிகளை ஆரம்பித்துள்ளார். இது தொடர்பில் கருத்து வெளியிட்டவர்,

“மார்ச் மாதம் 18ஆம் திகதி உறங்க செல்ல முன் பல் துலக்க சென்றேன். என்றுமே இல்லாத அளவு புதுவிதமான தொண்டை வலி ஒன்றை அன்று இரவு உணர்ந்தேன். மீண்டும் காலை எழுந்து பல் துலக்க செல்லும் போதும் மீண்டும் அதே வலியை உணர்ந்தேன்.

சாதாரணமாக ஒருவருக்கு ஏற்படும் தொண்டை வலிக்கும் இந்த வலிக்கும் நிறைய வித்தியாசங்கள் உள்ளன. இதனால் 30 வருட நண்பரான வைத்தியர் ஒருவருக்கு அழைப்பேற்படுத்தி இதனை கூறினேன். நான் மருத்துவ பரிசோதனை செய்துக் கொள்ள வேண்டும் என கூறினேன்.

எனக்கு பு கைப்பிடிக்கும் பழக்கம் இல்லாமையினால் சற்று அ ச்சமடைந்தேன். உடலில் சோர்வு தன்மையை உணர்ந்தேன். ஒரே நேரத்தில் நிறைய ஊசிகளை தொண்டையில் குத்துவதனை போன்ற வலி ஏற்பட்டது.

பின்னர் நானும் IDH வைத்தியசாலையில் அனுமதிக்கப்பட்டேன். தொடர்ந்து சிகிச்சை அளிக்கப்பட்டது. வைத்தியர் என்ற ரீதியில் இதனை சாதாரண நோய் என்று உணர வேண்டும் என்பதனை மனதில் நினைத்துக் கொண்டேன்.

ஏனைய நோயாளிகளுக்கு கொடுக்கப்பட்ட அதே மருந்து வகைகள் எனக்கும் வழங்கப்பட்டது. கஞ்சி நான் குடிக்கவில்லை. உப்பு நீரில் தொண்டையை கழுவினேன். ஆவி பிடித்தேன். ஆரம்பத்திலேயே சென்றமையால் சீக்கிரமாக குணமடைந்து வீடு திரும்பினேன்” என வைத்தியர் மேலும் தெரிவித்துள்ளார்.

நன்றி தெரிவித்த மஹிந்த..

தமிழ் தேசிய கூட்டமைப்பின் உறுப்பினர்களுக்கு பிரதமர் மஹிந்த ராஜபக்ஷ விசேட நன்றி தெரிவித்துள்ளார்.

அலரி மாளிகையில் நேற்று இடம்பெற்ற முன்னாள் நாடாளுமன்ற கூட்டத்தில் கலந்து கொண்டமை தொடர்பில் தமிழ் தேசிய கூட்டமைப்பின் தலைவர் ஆர்.சம்பந்தன் உட்பட கட்சியின் உறுப்பினர்களுக்கு, பிரதமர் நன்றி தெரிவித்துள்ளார்.

அனைத்து உறுப்பினர்களுக்கும் அழைக்கப்பட்டு, புதிய யோசனைகள் இருப்பின் அதனை ஆராய்ந்து அவசியமான வேலைத்திட்டங்கள் தொடர்பில் கருத்து பகிர்வதற்கே இந்த கலந்துரையாடல் ஏற்பாடு செய்யப்பட்டுள்ளது.

தமிழ் தேசிய கூட்டமைப்பின் தலைவர் உட்பட குழுவினருக்கு விசேட நன்றியை தெரிவிக்க வேண்டும். நாட்டு மக்களின் பொறுப்புகளை நிறைவேற்றுவதற்கும், அவர்களின் கருத்துக்களை பகிர்வதற்கு இங்கு வந்தவர்கள் தொடர்பிலும் எனது நன்றியை தெரிவித்துக்கொள்கிறேன் என பிரதமர் மேலும் தெரிவித்துள்ளார்.

மன்னாரில்..

மன்னார் – எமில் நகர் கிராம சேவகர் பிரிவிற்கு உற்பட்ட ஜிம்றோன் நகர் பகுதியில்உள்ள வீடொன்று இன்று முழுமையாக எரிந்து தீக்கிரையாகியுள்ளது.

திடீரென தீப்பற்றியமையால் குறித்த வீடு முழுவதும் தீப்பற்றி எரிந்துள்ளதுடன்,கற்கல் அடுக்கப்பட்டு ஓலையால் மேயப்பட்ட வீடு என்பதால் வீடு முழுவதும் வேகமாக தீப்பரவல் ஏற்பட்டுள்ளது.

அதை தொடர்ந்து அயலவர்கள் மற்றும் நகர சபையின் தண்ணீர் பவுசரின் உதவியுடன் தீ அணைக்கப்பட்ட போதும் வீடு முழுவதுமாக எரிந்து நாசமாகியுள்ளது.

கிராம சேவகர்கள் மற்றும் சமூக சேவை உத்தியோகஸ்தர்கள் மற்றும் பொலிஸார் குறித்த பகுதிக்கு வருகை தந்து நிலைமை தொடர்பான விடயங்களை பார்வையிட்டுள்ளனர். இக்குடும்பத்துக்கு உதவ விருப்புபவர்கள் 0772658949 தொடர்பு கொண்டு உங்களால் முடிந்த உதவியை செய்ய முடியும்.

முக்கிய அறிவிப்பு..

எதிர்வரும் மே 11ஆம் திகதியில் இருந்து கொழும்பு, களுத்துறை, கம்பஹா மற்றும் புத்தளம் மாவட்டங்களில் அரச மற்றும் தனியார்துறையினர் தமது பணிகளை மீளஆரம்பிக்க வேண்டும் என்று ஜனாதிபதியின் ஊடகப்பிரிவு தெரிவித்துள்ளது.

இது தொடர்பான பணிப்புரைகள் அனைத்து நிறுவன தலைமைகளுக்கும் வழங்கப்பட்டுள்ளதாக ஜனாதிபதியின் ஊடகப்பிரிவு அறிவித்துள்ளது. பணிகள் ஆரம்பிக்கப்பட்டதும் நிறுவனங்களின் தலைமையாளர்கள் சுகாதார அதிகாரிகளால் வழங்கப்பட்டுள்ள ஒழுங்கு விதிகளை உரிய முறையில் கடைபிடிக்கவேண்டும்.

தனியார்துறையினர் மே 11ஆம் திகதியில் இருந்து தமது பணிகளை ஒவ்வொரு நாளும் முற்பகல் 10 மணிக்கு ஆரம்பிக்க வேண்டும். ஒவ்வொரு நாளும் பணிகளுக்கு யார் வரவேண்டும் என்பதை தீர்மானிப்பது நிறுவனத் தலைமைகளின் பொறுப்பாகும்.

இலங்கை போக்குவரத்து சபையின் பேருந்துகளும், தொடருந்துகளும் அரச மற்றும் தனியார்துறை பணியாளர்களை மாத்திரம் பணிகளுக்கு ஏற்றியிறக்கும் சேவைகளை மேற்கொள்ளும்.

அதேநேரம் அத்தியாவசிய தேவைகளுக்கான பொதுமக்களை தவிர்ந்த ஏனையோர் கொரோனா வைரஸ் தொற்றை தடுக்கும் முகமாக வீடுகளிலேயே தங்கியிருக்குமாறு கோரப்பட்டுள்ளனர்.
வெளியில் செல்லும் பொதுமக்களும் அத்தியாவசிய பொருட்களை கொள்வனவு செய்வதற்காகவே செல்லமுடியும்.

இதேவேளை ஊரடங்கு சட்டம் அமுலில் உள்ள இடங்களில் உள்ளவர்கள் மே 11ஆம் திகதி முதல் தமது தேசிய அடையாள அட்டைகளின் இறுதி இலக்க அடிப்படையில் வெளியில் செல்ல அனுமதிக்கப்படுவார்கள்.

எனினும் ஊரடங்கு சட்டம் அமுலில் இல்லாத இடங்களுக்கு இந்த தேசிய அடையாள அட்டை முறை அவசியமற்றது என்று ஜனாதிபதியின் ஊடகப்பிரிவு தெரிவித்துள்ளது. இதற்கிடையில் ஊரடங்கு அமுலில் இல்லாத இடங்களிலும் மக்கள் தேவையற்ற வகையில் ஒன்றுகூடவேண்டாம் என்று கோரப்பட்டுள்ளனர்.

கொரோனா நோயாளர்கள்..

இலங்கையில் நேற்றைய தினம் 33 கொரோனா நோயாளர்கள் பதிவாகியதாக சுகாதார பணிப்பாளர் அனில் ஜாசிங்க தெரிவித்துள்ளார்.

“நேற்று பதிவாகிய 33 கொரோனா நோயாளர்களில் 31 பேர் விடுமுறைக்கு வீடு சென்ற மீளவும் அழைக்கப்பட்ட கடற்படையினராகும்.

நேற்று இரவு வரை நோயாளிகள் இல்லை என்பதனை குறித்து மகிழ்ச்சியாக இருந்தோம். எனினும் நாள் முடியும் போது 33 நோயாளிகள் அடையாளம் காணப்பட்டனர். ஆரம்பத்தில் மூவரே அடையாளம் காணப்பட்டனர். இறுதியில் 33 ஆக பதிவாகியது.

இந்த 33 பேரில் ஒருவர் கடற்படையினரின் குடும்பத்தை சேர்ந்த 13 வயதுடைய சிறுவனும், கடற்படையினருக்கு தொடர்புடைய 70 வயதுடைய பெண் ஒருவரும் உள்ளடங்குகின்றனர்.
ஏனைய 31 பேர் கடற்படை சிப்பாய்களாகும். இவர்கள் விடுமுறைக்கு வீடு நோக்கி சென்றவர்களாகும்.

எனினும் இந்த அனைவரும் தற்போது தங்கள் வீடுகளில் இல்லை. குடும்ப உறுப்பினர்களுடன் அவர்கள் ஒரு இடத்திற்கு அழைத்து வரப்பட்டுள்ளனர். பரவல் குறைவடைந்திருப்பதற்கு இதுவும் ஒரு காரணமாகும்” என அவர் மேலும் தெரிவித்துள்ளார்.

இலங்கையில் இதுவரை 755 கொரோனா நோயாளர்கள் அடையாளம் காணப்பட்டுள்ளனர். இவர்களில் 194 பேர் பூரண குணமடைந்து வீடுகளுக்கு சென்றுள்ளமை குறிப்பிடத்தக்கது.