தங்கத்தின் விலை எதிர்வரும் நாட்களில் மேலும் உயரவே வாய்ப்புள்ளதாகப் பொருளாதார வல்லுநர்கள் கணித்துள்ளனர்.
இந்நிலையில், தங்கத்தின் விலை இதுவரை இல்லாத வகையில் ஒரு அவுன்ஸ் தங்கம் 5,000 டொலர்களை கடந்து புதிய வரலாற்று உச்சத்தை எட்டியுள்ளது.
உலோகங்களின் வர்த்தக வரலாற்றில் இது ஒரு முக்கிய மைல் கல்லாக பார்க்கப்படும் நிலையில்,தங்கத்தை தொடர்ந்து வெள்ளியின் விலையும் அவுன்ஸ் ஒன்றுக்கு 105 டொலராக உயர்ந்துள்ளது.
உலகளவில் காணப்படும் நிச்சயமற்ற சூழலால் முதலீட்டாளர்கள் ஏனைய முதலீடுகளை விட தங்கம் மற்றும் வெள்ளியில் முதலீடு செய்வதை பாதுகாப்பானதாக கருதுகின்ற நிலையில் விலைகளில் மாற்றம் ஏற்பட்டுள்ளது.
அமெரிக்க ஜனாதிபதி டொனால்டு ட்ரம்பின் அதிரடி வர்த்தகக் கொள்கைகள் சந்தையை நிலைகுலையச் செய்துள்ளதுடன்,முதலீட்டாளர்களை தங்கத்தின் பக்கம் திருப்பியுள்ளது.
கிரீன்லாந்து விவகாரத்தில் அமெரிக்கா மற்றும் நேட்டோ அமைப்புகளுக்கு இடையே ஏற்பட்டுள்ள மோதல் நிதிச் சந்தையில் பெரும் பாதிப்பை ஏற்படுத்தியுள்ளதுடன், தங்கம், வெள்ளி விலை உயர்வுக்கு வித்திட்டுள்ளன.
உயர்ந்து வரும் பண வீக்கம், அமெரிக்க டொலர் மதிப்பு வீழ்ச்சி, உலக நாடுகளின் மத்திய வங்கிகள் அதிக அளவில் தங்கத்தை வாங்கி குவிப்பது மற்றும் வட்டி விகித எதிர்பார்ப்பு ஆகியவையும் தங்கம், வெள்ளி விலையேற்றத்துக்கு முக்கிய காரணங்களாக உள்ளன.
மேலும் தங்கத்தின் விலை எதிர்வரும் நாட்களில் மேலும் உயரவே வாய்ப்புள்ளதாகப் பொருளாதார வல்லுநர்கள் கணித்துள்ளனர். கோல்ட்மேன் சாக்ஸ் நிறுவனம், 2026-ம் ஆண்டின் இறுதியில் ஒரு அவுன்ஸ் தங்கம் 5,400 டொலர்களைத் தாண்டும் என கணித்துள்ளது.
2026-ல் ஒரு அவுன்ஸ் தங்கம் விலை 6,000 டொலர்களை தாண்ட வாய்ப்புள்ளதாக பேங்க் ஆஃப் அமெரிக்கா தெரிவித்துள்ளது. ஜே.பி.மார்கன் நிறுவனமும் தங்கம் 6,000 டொலர்களைத் தொடும் எனவும் தெரிவித்துள்ளது.
திருமணமாகி இரண்டே ஆண்டுகளில், கணவனின் பண ஆசைக்கு ஒரு இளம்பெண்ணின் உயிர் பலியாகியுள்ளது. இது குறித்துப் போலீசார் தீவிர விசாரணை நடத்தி வருகின்றனர்.
பெங்களூரு பனசங்கரி பகுதியைச் சேர்ந்த குருபிரசாத் என்பவருக்கும், கீர்த்திக்கும் கடந்த 2 ஆண்டுகளுக்கு முன்பு திருமணம் நடைபெற்றது. திருமணத்தின் போது கீர்த்தியின் பெற்றோர் சுமார் ரூ.35 லட்சம் வரை செலவு செய்ததாகக் கூறப்படுகிறது.
ஆரம்பத்தில் மகிழ்ச்சியாக இருந்த தம்பதியினருக்கு இடையே, குருபிரசாத் சொந்தமாக வீடு கட்டத் தொடங்கியபோது விரிசல் ஏற்பட்டது. வீடு கட்டக் கூடுதல் பணம் தேவைப்பட்டதால், தனது மனைவியைப் பெற்றோரிடம் பணம் கேட்டு வருமாறு வற்புறுத்தியுள்ளார்.
ஏற்கனவே திருமணத்திற்குப் பெற்றோர் அதிகம் செலவு செய்து விட்டதாகக் கீர்த்தி மறுத்துள்ளார். இருப்பினும், கடந்த இரண்டு மாதங்களாகக் கூடுதல் வரதட்சணை கேட்டு குருபிரசாத் கீர்த்தியைத் துன்புறுத்தியுள்ளார்.
கீர்த்தியின் பெற்றோர் ஏற்கனவே கடன் வாங்கி ரூ.8 லட்சம் கொடுத்தும், குருபிரசாத் திருப்தியடையாமல் மீண்டும் கீர்த்தியை அடித்து உதைத்துக் கொடுமைப்படுத்தியுள்ளார்.
கடந்த 24-ம் தேதி இரவு தம்பதிக்குள் ஏற்பட்ட கடும் வாக்குவாதத்தால் விரக்தியடைந்த கீர்த்தி, வீட்டில் தூக்கிட்டுத் தற்கொலைக்கு முயன்றார். மருத்துவமனையில் அனுமதிக்கப்பட்டுத் தீவிர சிகிச்சை பெற்று வந்த கீர்த்தி, நேற்று முன்தினம் சிகிச்சை பலனின்றி உயிரிழந்தார்.
கீர்த்தியின் பெற்றோர் அளித்த புகாரின் பேரில், பனசங்கரி போலீசார் வரதட்சணை கொடுமை மற்றும் தற்கொலைக்குத் தூண்டுதல் ஆகிய பிரிவுகளின் கீழ் வழக்குப் பதிவு செய்து, கணவர் குருபிரசாத்தைப் பிடித்து விசாரணை நடத்தி வருகின்றனர்.
இந்தியச் சட்டப்படி வரதட்சணை கேட்பது மற்றும் கொடுப்பது இரண்டுமே தண்டனைக்குரிய குற்றமாகும். குறிப்பாகத் திருமணமாகி 7 ஆண்டுகளுக்குள் ஒரு பெண் சந்தேகத்திற்கிடமான முறையில் உயிரிழந்தால்,
அது வரதட்சணை மரணமாகக் (Dowry Death – Section 304B IPC) கருதப்பட்டு விரிவான விசாரணை நடத்தப்படும். பெங்களூரு போன்ற பெருநகரங்களிலும் வரதட்சணை தொடர்பான மரணங்கள் மற்றும் குடும்ப வன்முறைச் சம்பவங்கள் குறையவில்லை என்பது சமூக ஆர்வலர்களிடையே கவலையை ஏற்படுத்தியுள்ளது.
புத்தளம், மாரவில பொலிஸ் பிரிவுக்கு உட்பட்ட தல்வில, மோதரவெல்ல பகுதியில், அலைச்சறுக்கு விளையாட்டில் ஈடுபட்டிருந்த ஒருவர் நீரில் மூழ்கி உயிரிழந்துள்ளதாக பொலிஸார் தெரிவித்துள்ளனர்.
இந்த விபத்து நேற்று முன்தினம் மாலை 5.30 மணியளவில் சம்பவித்துள்ளது. உயிரிழந்தவர் குருநாகல், வேவரவு பகுதியைச் சேர்ந்த 38 வயதான நலிந்த சதுரங்க அனுருத்த மெண்டிஸ் என அடையாளம் காணப்பட்டுள்ளார்.
அலுவலக பணியாளர்களுடன் நேற்று முன்தினம் வெஹெர பகுதியில் இருந்து பேருந்தில் சிலாபம் பகுதிக்கு சுற்றுலா சென்றுள்ளார்.
இதன்போது தல்வில பகுதியில் அலைச்சறுக்கு விளையாட்டில் ஈடுபட்டிருந்த போது திடீர் அலையில் சிக்கியுள்ளனர். அவர்களில் பலர் கடலில் அடித்துச் செல்லப்பட்டனர்.
அலைகளில் சிக்கிய 47 வயதுடைய ஒரு பெண்ணையும் அவரது 16 வயது மகளையும் அங்கிருந்த வெளிநாட்டு குழுவொன்று மீட்டுள்ளனர்.
அந்த நேரத்தில் ஏற்பட்ட பரபரப்பு நிலை காரணமாக உயிரிழந்தவர் மீது எந்த கவனமும் செலுத்தப்படவில்லை. எனினும் குழுவில் அவர் காணவில்லை என்பதை அறிந்து கொண்டு கடலில் மூழ்கியவரை தேடிப் பிடித்துள்ளனர்.
உடனடியாக மாரவில ஆரம்ப வைத்தியசாலையில் அனுமதிக்கப்பட்ட போதும் சிகிச்சையின் பலனின்றி அவர் உயிரிழந்துள்ளார். உயிரிழந்தவரின் மனைவி தற்போது இரண்டு மாத கர்ப்பிணியாக உள்ளதாக தெரிவிக்கப்பட்டுள்ளது.
புதிய இணைப்பு : திருகோணமலையில் நேற்று (26) காணாமல்போனதாக தேடப்பட்டு வந்த 17 வயதுடைய பாடசாலை மாணவன், இன்று நிட்டம்புவ பகுதியில் காயங்களுடன் மீட்கப்பட்டுள்ளார்.
கடத்தல்காரர்களிடமிருந்து தப்பியோடிய மாணவன், பொலிஸ் நிலையத்தில் தஞ்சம் புகுந்ததை அடுத்து இந்த மீட்பு நடவடிக்கை இடம்பெற்றுள்ளதாக தெரிவிக்கப்படுகின்றது.
திருகோணமலை நீதிமன்ற வீதியைச் சேர்ந்த பிரபல சட்டத்தரணியின் மகனான எம்.எல். முன்சித் என்ற மாணவனே இவ்வாறு மீட்கப்பட்டவராவார்.
நேற்று (26) பாடசாலைக்குச் சென்ற நிலையில் கடத்தப்பட்டதாகக் கருதப்பட்ட இம்மாணவன், கடத்தல்காரர்களிடமிருந்து தந்திரமாக தப்பித்து, நிட்டம்புவ பொலிஸ் நிலையத்தில் பாதுகாப்புத் தேடி சரணடைந்துள்ளார்.
குறித்த மாணவன் மீட்கப்படும் போது உடலில் அடி காயங்கள் காணப்பட்டதாக பொலிஸ் தரப்புத் தகவல்கள் தெரிவிக்கின்றன.
இச்சம்பவம் குறித்து நிட்டம்புவ பொலிஸார் திருகோணமலையிலுள்ள மாணவனின் பெற்றோருக்குத் தகவல் வழங்கியுள்ளனர். தகவலறிந்த பெற்றோர் தற்போது மாணவனைப் பார்ப்பதற்காக நிட்டம்புவ நோக்கி விரைந்துள்ளனர்.
நேற்று காலை பாடசாலைக்குச் சென்ற மாணவன் வீடு திரும்பாத நிலையில், சமுத்திரகம பகுதியில் அவரது சைக்கிள் மற்றும் புத்தகப்பை என்பன கைவிடப்பட்ட நிலையில் மீட்கப்பட்டன.
இதனைத் தொடர்ந்து பொலிஸார் தீவிர விசாரணைகளை முன்னெடுத்து வந்த நிலையிலேயே, மாணவன் நிட்டம்புவையில் மீட்கப்பட்டுள்ளார்.
இதேவேளை, குறித்த மாணவருடன் தொடர்புபடுத்தி சமூக வலைதளங்களில் பகிரப்பட்ட மற்றொரு தகவல் குறித்து பொலிஸார் தெளிவுபடுத்தியுள்ளனர்.
திருகோணமலை பேருந்து தரிப்பிடத்தில் காணாமல்போனதாகக் கூறப்பட்ட 22 வயதுடைய யுவதி ஒருவர், தனது காதலனுடன் சென்றுள்ளதாகத் தெரியவந்துள்ளது.
இந்த யுவதியின் சம்பவத்திற்கும், மாணவன் கடத்தப்பட்ட சம்பவத்திற்கும் எவ்வித தொடர்புமில்லை என ஆரம்பகட்ட விசாரணைகள் தெரிவிக்கின்றன.
மாணவன் எதற்காகக் கடத்தப்பட்டார்? கடத்தல்காரர்கள் யார்? என்பது தொடர்பான மேலதிக விசாரணைகளை நிட்டம்புவ மற்றும் திருகோணமலை பொலிஸார் இணைந்து முன்னெடுத்து வருகின்றனர்.
முதலாம் இணைப்பு : திருகோணமலை மாவட்டத்தில் இருந்து ஒரே நேரத்தில் மூவர் காணாமல் போயுள்ளதாக தகவல்கள்வெளியாகியுள்ளன. நேற்றையதினம்(26) இந்த சம்பவம் இடம்பெற்றுள்ளது.
இதன்படி, திருகோணமலை நீதிமன்ற வீதியை சேர்ந்த 17 வயதுடைய எம்.எல்.எம்.எம். முன்சித் எனும் பாடசாலை மாணவர் நேற்று (26) காலை முதல் காணாமல்போயுள்ளதாக திருகோணமலை பொலிஸார் தெரிவித்துள்ளனர்.
திருகோணமலையில் உள்ள பிரபல வழக்கறிஞர் ஒருவரின் மகனான குறித்த மாணவர், நேற்று காலை பாடசாலைக்குச் செல்வதாக கூறி வீட்டிலிருந்து வெளியேறிய நிலையில்,மாலை நேரமாகியும் வீடு திரும்பாத நிலையில், அவர் மேலதிக வகுப்புகளுக்குச் சென்றிருக்கலாம் என குடும்பத்தினர் எண்ணியிருந்தனர்.
இருப்பினும், மாணவர் நேற்று பாடசாலையில் நடைபெற்ற தவணைப் பரீட்சைக்கும் சமூகமளிக்கவில்லை என்பதை அறிந்த பாடசாலை நிர்வாகம், இது குறித்து பெற்றோருக்குத் தெரியப்படுத்தியதுடன், பொலிஸ் நிலையத்தில் முறைப்பாடு செய்துள்ளது.
இதனையடுத்து பொலிஸார் மேற்கொண்ட தேடுதலின் போது, கோணேஸ்வரா இந்து கல்லூரி மைதானத்திற்கு அருகிலுள்ள சமுத்திரகம கிராமத்திற்கு முன்னால் உள்ள பற்றைக்காட்டுப் பகுதியில் மாணவனின் சைக்கிள் மற்றும் புத்தகப்பை என்பன கைவிடப்பட்ட நிலையில் மீட்கப்பட்டுள்ளன.
காணாமல் போன மாணவர் குறித்து இதுவரை எவ்வித தகவல்களும் கிடைக்கப்பெறவில்லை என கூறப்படுகின்றது.
குறித்த மாணவர் தொடர்பில் ஏதேனும் தகவல்கள் கிடைத்தால் உடனடியாக திருகோணமலை பொலிஸ் நிலையத்திற்கோ அல்லது அருகில் உள்ள பொலிஸ் நிலையத்திற்கோ தகவல் வழங்குமாறு பொலிஸாரும் உறவினர்களும் கேட்டுக்கொண்டுள்ளனர்.
மேலும், மாவட்டத்தின் வெவ்வேறு பகுதிகளில் உள்ள முச்சக்கரவண்டி சாரதி ஒருவர் மற்றும் மாணவி ஒருவர் ஆகியோரும் இவ்வாறு காணாமல் போயிருந்ததாக அறிவிக்கப்பட்டிருந்தது.
எனினும், குறித்த்த முச்சக்கரவண்டி சாரதி கடும் காயங்களோடு மயக்கமடைந்த நிலையில் இன்று காலை கண்டுபிடிக்கப்பட்டு வைத்தியசாலையில் அனுமதிக்கப்பட்டுள்ளதாக அப்பகுதியில் இருக்கும் எமது செய்தியாளர் தெரிவித்துள்ளார்.
மேலும், குறித்த சம்பவம் அப்பகுதியினரிடையே அச்சத்தை ஏற்படுத்தியுள்ள நிலையில், இது குறித்து பரபரப்படைய வேண்டாம் என்றும், பொலிஸார் விசாரணைகளை ஆரம்பித்துள்ளதாகவும் பிரதி அமைச்சர் அருண் ஹேமச்சந்திரா தெரிவித்துள்ளார்.
இது தொடர்பான விசாரணைகளை பொலிஸார் தொடர்ந்து மேற்கொண்டு வருவதாக அப்பகுதியில் இருக்கும் எமது செய்தியாளர் தெரிவித்துள்ளார்.
கூரிய ஆயுதத்தால் பெண் ஒருவரின் கழுத்தை வெட்டி தப்பிச் சென்ற சம்பவத்துடன் தொடர்புடைய சந்தேகநபரை கைதுசெய்ய பொலிஸார், பொதுமக்களின் உதவியை நாடியுள்ளது.
மத்துகம – தொலஹேன பகுதியில், 2025.04.18 திகதியன்று 34 வயதுடைய பெண் ஒருவர் கூரிய ஆயுதத்தால் தாக்கப்பட்டமை தொடர்பில் பொலிஸாரால் விசாரணைகள் முன்னெடுக்கப்பட்டன.
குற்றம் தொடர்பான உண்மைகள் மத்துகம நீதவான் நீதிமன்றத்தில் தெரிவிக்கப்பட்டுள்ளதாகவும், சம்பந்தப்பட்ட சந்தேகநபர் அந்தப் பகுதியை விட்டு தப்பிச்சென்று தலைமறைவாகி இருப்பதாகவும் தெரியவந்துள்ளது.
எனவே, தப்பிச் சென்ற சந்தேக நபரைக் கைதுசெய்ய பொலிஸார் பொதுமக்களின் உதவியை நாடியுள்ளது.
பெயர் – பிராமணகே தொன் சனத் ரவீந்திர நிலந்த முகவரி – இலக்கம் 78-01, இஹலகந்த, அகலவத்த தேசிய அடையாள அட்டை இலக்கம் – 840321401X சந்தேகநபர் தொடர்பாக ஏதேனும் தகவல்கள் தெரியுமாயின் கீழே உள்ள தொலைபேசி இலக்கங்களுக்குத் தெரிவிக்குமாறு பொலிஸார்,
பொதுமக்களைக் கேட்டுக்கொண்டுள்ளனர். தொலைபேசி இலக்கம் பொலிஸ் தலைமையக ஆய்வாளர் – மத்துகம (071 – 8591701) தலைமையக குற்றப் புலனாய்வுப் பிரிவு – மத்துகம (071-8594381)
சர்வதேச சந்தையில் தங்கத்தின் விலை தொடர்ந்து ஏற்ற இறக்கங்களைச் சந்தித்து வரும் நிலையில், இலங்கையில் இன்று தங்கத்தின் விலையில் வீழ்ச்சி பதிவாகியுள்ளது.
அகில இலங்கை நகையக வியாபாரிகள் சங்கம் வெளியிட்டுள்ள சமீபத்திய தகவல்களின்படி, நேற்று (26) 24 கரட் தங்கம் பவுண் ஒன்று 397,000 ரூபாயாக விற்பனையாகியிருந்த நிலையில், இன்று 24 கரட் தங்கம் பவுண் ஒன்றுக்கு 3000 ரூபாயால் குறைவடைந்துள்ளதாக தெரிவிக்கப்பட்டுள்ளது.
அந்தவகையில், தற்போதைய தங்க விலை நிலவரப்படி, 24 கரட் தங்கம் பவுண் ஒன்று 397,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 367,200 ரூபாயாகவும், விற்பனை செய்யப்படுகிறது.
இதன்படி, 24 கரட் தங்கத்தின் ஒரு கிராமின் விலை 49,625 ரூபாயாகவும், 22 கரட் தங்கத்தின் ஒரு கிராமின் விலை 45,900 ரூபாயாகவும், விற்பனை செய்யப்படுகிறது.
வவுனியா தாண்டிக்குளம் தண்டவாளத்தில் இடம்பெற்ற விபத்தில் பெண் ஒருவர் மயிரிழையில் உயிர் தப்பிய சம்பவம் இன்று (27.01.2026) இடம்பெற்றுள்ளது.
குறித்த பெண் வவுனியா தாண்டிக்குளம் ரயில் கடவையில் சமிக்ஞையை மீறி மோட்டார் சைக்கிளில் பயணித்துள்ளார். இதன்போது யாழில் இருந்து வவுனியா நோக்கி பயணித்த ரயிலுடன் மோட்டார் சைக்கிளின் பின்புறம் மோதியுள்ளது.
விபத்தில் கிடாச்சூரி சாஸ்திரிகூழாங்குளத்தை சேர்ந்த அல்பிரட் ஜெயராஜ் திலகவதி (வயது – 52) என்பவர் காயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளார் .
சம்பவம் தொடர்பான மேலதிக விசாரணையினை வவுனியா பொலிஸார் மேற்கொண்டு வருகின்றனர்.
கூகுள் குரோம் வெப் ஸ்டோரில் மறைந்திருந்த சில ஆபத்தான எக்ஸ்டென்ஷன்கள் காரணமாக, சுமார் ஒரு லட்சத்திற்கும் அதிகமான பயனர்கள் பாதிக்கப்பட்டுள்ளதாக அதிர்ச்சி தகவல் வெளியாகியுள்ளது.
சமீபத்தில் மேற்கொள்ளப்பட்ட சைபர் பாதுகாப்பு ஆய்வுகளின்படி, கூகுள் குரோம் வெப் ஸ்டோரில் சில போலி எக்ஸ்டென்ஷன்கள் ஊடுருவியுள்ளன.
இவை வெளிப்படையாக பயனுள்ள டூல்கள் அல்லது VPN சேவைகள் போல தோன்றினாலும், அவற்றை இன்ஸ்டால் செய்தவுடன் பயனர்களுக்குத் தெரியாமல் பின்னணியில் செயல்பட்டு, அவர்களின் தனிப்பட்ட தகவல்களை திருட தொடங்குகின்றன.
இந்த எக்ஸ்டென்ஷன்கள் பயனர்களின் ‘செஷன் குக்கீஸ்’ மற்றும் ‘ஆத்தென்டிகேஷன் டோக்கன்கள்’ போன்ற முக்கியமான தரவுகளை குறிவைக்கின்றன.
இதன் மூலம் ஹேக்கர்கள் பாஸ்வேர்ட் தேவையில்லாமலேயே பயனர்களின் ஃபேஸ்புக், ஜிமெயில் மற்றும் வங்கி கணக்குகளுக்குள் நுழைய முடியும். இதுவே இந்த சைபர் தாக்குதலின் மிகப்பெரிய ஆபத்தாக கருதப்படுகிறது.
ஆய்வாளர்கள் கண்டறிந்த பட்டியலில் சில எக்ஸ்டென்ஷன்கள் குறிப்பாக இடம்பெற்றுள்ளன. இவை பெரும்பாலும் செயற்கை நுண்ணறிவு சார்ந்த கருவிகள் மற்றும் VPN செயலிகள் என்ற பெயரில் உலா வருகின்றன.
உதாரணமாக, AI Assistant, Web Mirror, VPNCity, ChatGPT App போன்ற பெயர்களில் சில போலி எக்ஸ்டென்ஷன்கள் கண்டறியப்பட்டுள்ளன. இந்த பெயர்களில் அல்லது உங்களுக்குத் தெரியாத வேறு எந்த எக்ஸ்டென்ஷனும் உங்கள் பிரவுசரில் இருந்தால், அது ஆபத்தானதாக இருக்க வாய்ப்பு உள்ளது.
பயனர்கள் பாதுகாப்பாக இருக்க உடனடியாக சில நடவடிக்கைகளை மேற்கொள்ள வேண்டும். முதலில், குரோம் பிரவுசரில் உள்ள எக்ஸ்டென்ஷன் பட்டியலைச் சோதிக்க வேண்டும்.
வலது மேல் மூலையில் இருக்கும் மூன்று புள்ளிகளை கிளிக் செய்து, Extensions என்ற பகுதியில் Manage Extensions என்பதைத் திறக்க வேண்டும். அங்கு உங்களுக்குத் தெரியாத அல்லது பயன்படுத்தாத எக்ஸ்டென்ஷன்கள் இருந்தால், உடனே அவற்றை Remove செய்து நீக்க வேண்டும்.
அதன் பிறகு, ஜிமெயில், ஃபேஸ்புக் மற்றும் வங்கி இணையதளங்களின் பாஸ்வேர்டுகளை உடனடியாக மாற்றுவது அவசியம். மேலும், கணினியை முழுமையாக ஆன்டி-வைரஸ் மென்பொருள் மூலம் ஸ்கேன் செய்வதும் பாதுகாப்புக்கு உதவும்.
இந்த வகையான ஆபத்தான எக்ஸ்டென்ஷன்களை கூகுள் நிறுவனம் தொடர்ந்து கண்டறிந்து நீக்கி வருவதாக தெரிவித்துள்ளது. இருப்பினும், ஹேக்கர்கள் புதிய பெயர்களில் மீண்டும் மீண்டும் இதுபோன்ற செயலிகளை உருவாக்கி ஊடுருவி வருகின்றனர்.
எனவே, தேவையில்லாத மற்றும் நம்பகத்தன்மை இல்லாத எக்ஸ்டென்ஷன்களை இன்ஸ்டால் செய்வதை தவிர்க்க வேண்டும் என்றும், பயனர்கள் எப்போதும் விழிப்புணர்வுடன் இருக்க வேண்டும் என்றும் தொழில்நுட்ப வல்லுநர்கள் எச்சரிக்கின்றனர்.
கொழும்பு பல்கலைக்கழகத்தின் இயற்பியல் துறையின் தலைவரும், ஆர்தர் சி. கிளார்க் நவீன தொழில்நுட்ப நிறுவனத்தின் தலைவருமான பேராசிரியர் சந்தன ஜெயரத்ன,
அடையாளம் தெரியாத பறக்கும் பொருள்களை (UFOs) காட்டுவதாகக் கூறப்படும் வீடியோக்கள் தொடர்ந்து தனக்கும் இலங்கையில் உள்ள தொடர்புடைய அறிவியல் நிறுவனங்களுக்கும் சமர்ப்பிக்கப்படுவதாகக் கூறியுள்ளார்.
இரணவிலவில் இறால் பண்ணையில் வேலை பார்க்கும் ஒருவரை ஒரு யுஎஃப்ஒ பின்தொடர்வதைக் காட்டும் ஒரு காணொளி சமூக ஊடகங்களில் பரவி வருவதற்கு பதிலளிக்கும் விதமாக அவர் இந்தக் கருத்துக்களைத் வெளியிட்டுள்ளார்.
அந்தக் காணொளியின்படி, கடந்த வெள்ளிக்கிழமை அதிகாலை இரணவிலவில் உள்ள வாய்ஸ் ஆஃப் அமெரிக்கா (VOA) பரிமாற்ற மையத்திற்கு அருகில் ஒரு யுஎஃப்ஒ என்று நம்பப்படும் கண் சிமிட்டும் பொருள் காணப்பட்டுள்ளது.
குறித்த மையத்திலிருந்து வடமேற்கே சுமார் 500 மீட்டர் தொலைவில் அமைந்துள்ள ஒரு இறால் பண்ணையை நடத்தும் நபர் ஒருவர் அதிகாலை 3.00 மணியளவில் இதைக் கண்டதாகக் கூறப்படுகிறது.
முதலில் வானத்தில் ஒரு ஒளிரும் ஒளியைக் கவனித்ததாகவும், அதை ஒரு டார்ச்சைப் பயன்படுத்தி சமிக்ஞை செய்ய முயன்றதாகவும் அவர் கூறியுள்ளார்.
“சுமார் பதினைந்து நிமிடங்களுக்குப் பிறகு, வெளிச்சம் என் திசையை நோக்கி நகரத் தொடங்கியது. அது ஏதோ ஒரு கப்பல் போல் இருந்தது, ஆனால் அதன் வடிவம் தெளிவாகத் தெரியவில்லை. அது என்னை நோக்கி மிக வேகமாக வந்தபோது, நான் டார்ச்சை அணைத்துவிட்டு ஓட ஆரம்பித்தேன்” என்று குறிப்பிட்டுள்ளார்.
இந்நிலையில் குறித்த பண்ணையில் இருந்த மற்றொரு நபரை எச்சரித்து, அங்கிருந்து தப்பிச் சென்றதாக அவர் கூறியுள்ளார்.
“மேலும் வெளிச்சம் எங்களைப் பின்தொடர்ந்தது. நாங்கள் டார்ச்சை அணைத்தவுடன், அந்தப் பொருள் நகர்வதை நிறுத்திவிட்டு வானத்தில் நிலையாக இருந்தது” என்றும் அவர் மேலும் கூறியுள்ளார்.
கிளிநொச்சி பொலிஸ் பிரிவுக்கு உட்பட்ட உதயநகர் பகுதியில் திங்கட்கிழமை (26) இடம்பெற்ற ரயில் விபத்தில் ஒருவர் உயிரிழந்துள்ளார்.
சைக்கிளில் புகையிரத கடவையை கடக்க முட்பட்ட முதியவர் ஒருவர், அனுராதபுரம் பகுதியில் இருந்து யாழ்ப்பாணம் நோக்கி பயணித்த யாழ்ராணி ரயிலுடன் மோதுண்டு சம்பவ இடத்திலேயே உயிரிழந்துள்ளார்.
கிளிநொச்சி ஆனந்தபுரம் சேர்ந்த 82 வயதுடைய முதியவரே பரிதாபகரமாக உயிரிழந்தார். இது தொடர்பான மேலதிக விசாரணைகளை கிளிநொச்சி பொலிஸார் மேற்கொண்டு வருகின்றனர்.
திருகோணமலை நீதிமன்ற வீதியைச் சேர்ந்த 17 வயதுடைய எம்.எல்.எம்.எம். முன்சித் என்ற பாடசாலை மாணவன், நேற்று திங்கட்கிழமை (26) காலை முதல் காணாமல் போயுள்ளதாக திருகோணமலை பொலிஸார் தெரிவித்துள்ளனர்.
திருகோணமலை பகுதியில் பிரபலமான வழக்கறிஞர் ஒருவரின் மகனான குறித்த மாணவர், நேற்றைய தினம் காலை 7.00 மணியளவில் வீட்டை விட்டு வெளியேறியிருந்ததுடன், மாலை வரை வீடு திரும்பவில்லை.
அவர் பாடசாலைக்குச் சென்றிருக்கலாம் என குடும்பத்தினர் ஆரம்பத்தில் எண்ணியுள்ளனர். காணாமல்போன மாணவர், திருகோணமலையில் அமைந்துள்ள கோணேஷ்வரா இந்து கல்லூரியின் மாணவராவார்.
அன்றைய தினம் நடைபெற்ற பரீட்சையில் அவர் பங்கேற்கவில்லை என்பது தெரியவந்ததைத் தொடர்ந்து, பாடசாலை நிர்வாகம் இது தொடர்பாக பொலிஸில் முறைப்பாடு அளித்துள்ளது.
இதனையடுத்து மேற்கொள்ளப்பட்ட தேடுதல் நடவடிக்கையின் போது, இந்து கல்லூரி மைதானத்திற்கு வெளியே உள்ள சமுத்திரகம கிராமத்திற்கு முன்னால் அமைந்துள்ள பற்றைக்காட்டுப் பகுதியில், குறித்த மாணவனின் சைக்கிள் மற்றும் புத்தகங்களுடன் கூடிய பை ஆகியவை பொலிஸாரால் மீட்கப்பட்டுள்ளன.
இந்நிலையில், மாணவர் தொடர்பான மேலதிக தகவல்கள் இதுவரை கிடைக்கப்பெறவில்லை. குறித்த மாணவர் குறித்து யாருக்காவது தகவல் இருப்பின், தயவுசெய்து திருகோணமலை பொலிஸ் நிலையத்திற்கு உடனடியாக அறிவிக்குமாறு பொலிஸார் பொதுமக்களிடம் கேட்டுக்கொண்டுள்ளனர்.
முல்லைத்தீவு புதுக்குடியிருப்பு பகுதியில் இளைஞன் ஒருவர் காணாமல் போயுள்ளதாக அவரது உறவினர்கள் வழங்கிய முறைப்பாட்டின் அடிப்படையில், சம்பவம் தொடர்பாக புதுக்குடியிருப்பு பொலிஸார் தீவிர விசாரணைகளை ஆரம்பித்துள்ளனர்.
புதுக்குடியிருப்பு 10ஆம் வட்டாரம் பகுதியில் வசித்து வரும் 24 வயதுடைய இளைஞனே இவ்வாறு காணாமல் போயுள்ளதாக தெரிவிக்கப்பட்டுள்ளது.
கடந்த ஞாயிற்றுக்கிழமை (25) இரவு சுமார் 7.00 மணியளவில், குறித்த இளைஞனின் வீட்டிற்கு வந்த நபர் ஒருவர், அவரை மோட்டார் சைக்கிளில் அழைத்துச் சென்றதாகவும்,
அதன் பின்னர் அவர் தொடர்பில் எந்த தகவலும் கிடைக்கவில்லை என்றும் உறவினர்கள் தெரிவித்துள்ளனர். இதுவரை அவர் வீடு திரும்பாத நிலையில், இதுகுறித்து புதுக்குடியிருப்பு பொலிஸ் நிலையத்தில் முறைப்பாடு பதிவு செய்யப்பட்டுள்ளது.
இந்த முறைப்பாட்டின் அடிப்படையில் சம்பவம் தொடர்பான விசாரணைகள் தொடர்ந்து முன்னெடுக்கப்பட்டு வருவதாக பொலிஸார் தெரிவித்துள்ளனர்.
மேலும், குறித்த இளைஞன் தொடர்பான தகவல்கள் யாருக்காவது தெரிந்திருந்தால், அருகிலுள்ள பொலிஸ் நிலையத்திற்கோ அல்லது 070 131 6536 என்ற தொலைபேசி இலக்கத்திற்கோ அறிவிக்குமாறு கேட்டுக்கொள்ளப்பட்டுள்ளது.
களுத்துறை, பதுரலிய பகுதியில் தனது பிறந்தநாளுக்கு மறுநாள், தனது நண்பருடன் மோட்டார் சைக்கிளில் சென்ற மாணவன் விபத்தில் உயிரிழந்துள்ளார்.
மோட்டார் சைக்கிள் மின் கம்பத்தில் மோதியதால் இந்த விபத்து ஏற்பட்டுள்ளது. 18 வயதான ஹசிந்து தேமியா விஜயதுங்க என்பவரே விபத்தில் உயிரிழந்துள்ளதாக அடையாளம் காணப்பட்டுள்ளார்.
உயிரிழந்தவர் C.W.W கன்னங்கர மத்திய கல்லூரியில் உயர்தரம் பயிலும் மாணவன் என விசாரணையில் தெரியவந்துள்ளது.
தனது பிறந்தநாளுக்கு மறுநாள், பதுரலிய கலுகல வீதியில் தனது நண்பருடன் மோட்டார் சைக்கிளில் சென்றபோது, மோட்டார் சைக்கிள் அருகே இருந்த மின் கம்பத்தில் மோதி விபத்துக்குள்ளாகியது.
மோட்டார் சைக்கிளை ஓட்டி வந்த மாணவன் உயிரிழந்துள்ளார். அவருடன் பின்னால் அமர்ந்து வந்த அவரது நண்பர் இமேஷா துஷான் குமார படுகாயமடைந்து களுத்துறை – நாகொட பொது மருத்துவமனையில் அனுமதிக்கப்பட்டார்.
விபத்து தொடர்பில் அதிகாரிகள் மேலதிக விசாரணைகளை மேற்கொண்டு வருகின்றனர்.
உலக சந்தையில் தங்கத்தின் விலை அதிகரித்ததினால் இன்று இலங்கையிலும் தங்கத்தின் விலை 12,000 ரூபாயினால் அதிகரித்துள்ளது. உலக சந்தையில் முதன் முறையாக ஒரு அவுன்ஸ் தங்கத்தின் விலை 5,000 அமெரிக்க டொலரைக் கடந்துள்ளது.
அதன்படி இன்று காலை இலங்கை நிலவரப்படி, 24 கரட் தங்கம் பவுண் ஒன்று 397,000 ரூபாவாக விற்பனை செய்யப்படுகிறது. 22 கரட் தங்கம் பவுண் ஒன்று 367,200 ரூபாவாக விற்பனை செய்யப்படுகிறது.
இதன்படி, 24 கரட் தங்கத்தின் ஒரு கிராமின் விலை 49,625 ரூபாயாகவும், 22 கரட் தங்கத்தின் ஒரு கிராமின் விலை 45,900 ரூபாயாகவும், விற்பனை செய்யப்படுகிறது.
செட்டியார் தெரு தங்க சந்தையின் தகவல்களுக்கு அமைய கடந்த வௌ்ளிக்கிழமை, 24 கரட் ஒரு பவுன் தங்கத்தின் விலை 385,000 ரூபாயாகவும் 22 கரட் ஒரு பவுன் தங்கத்தின் விலை 356,000 ரூபாயாகவும் விற்பனை செய்யப்பட்டமை குறிப்பிடத்தக்கது.
தலவாக்கலையிலிருந்து கொழும்பு நோக்கிப் பயணித்த இலங்கை போக்குவரத்து சபைக்குச் சொந்தமான பேருந்து ஒன்று, இன்று (26) அதிகாலை கினிகத்தேனை பகுதியில் பாரிய விபத்திலிருந்து நூலிழையில் தப்பியுள்ளதாக காவல்துறையினர் தெரிவித்துள்ளனர்.
இன்று அதிகாலை ஹட்டன் – கொழும்பு பிரதான வீதியின் கினிகத்தேனை, கடவலை வளைவுப் பகுதியில் இப்பேருந்து பயணித்துக் கொண்டிருந்தபோது, திடீரென அதன் தடையாளி (Brake) கட்டமைப்பு செயலிழந்துள்ளது.
பேருந்து கட்டுப்பாட்டை இழந்து சரிவில் இறங்கியபோது, வீதியோரமிருந்த மணல் மேடு ஒன்றின் மீது பேருந்தினை மோதச் செய்து சாமர்த்தியமாக நிறுத்தினார்.
சாரதியின் இந்த துரித மற்றும் சமயோசித செயலால் பேருந்து பள்ளத்தில் விழுவது தவிர்க்கப்பட்டு, அதிலிருந்த சுமார் 80 பயணிகள் எவ்வித காயமுமின்றி உயிர் தப்பினர்.
விபத்தைத் தொடர்ந்து, பேருந்தின் சாரதி மற்றும் நடத்துனர் இணைந்து பயணிகளை மற்றுமொரு பேருந்தில் ஏற்றி தங்களது இடங்களுக்கு அனுப்பி வைப்பதற்கான நடவடிக்கைகளை மேற்கொண்டனர்.
இச்சம்பவம் குறித்து கினிகத்தேனை காவல்துறையினர் மேலதிக விசாரணைகளை முன்னெடுத்து வருகின்றனர்.
